رواية لم اعلم عنه الكثير الفصل الأول 1 - بقلم نجلاء عبد الظاهر

قومي هزي طولك. قلدي البنات اللي بيرقصوا دي، يمكن حد يعبرك وتتجوزي بقى. -لا اطمني يا مامي، أنا قاعدة على قلبك. = مامي في عينك، قومي. -مش هقوم يا حجة. وبعدين دول شوية عرر وسرسجية، تحبي أتجوزلك سرسجي؟ = يخربيتك! واطي صوتك، فضحتِينا. أي دا! أم إسلام! -أي دا، ازيك يا أم رغد؟ إيه أخبارك؟ = الحمد لله يا حبيبتي، وحشاني والله. كده متسأليش؟ -حقك عليا يا أختي، عارفة إني مقصرة في حقك جامد. الله، هي دي رغد؟ = آه يا حبيبتي.

-ما شاء الله، بقت عروسة زي القمر. = تسلميلي يا رب. لحد هنا، أنا أصلاً مكنتش مركزة معاهم، أنا كنت ببص على الرقاصة. لحد ما ماما سألت السؤال: -إيه أخبار الرائد بتاعنا؟ = إسلام حبيبي، يعنى طالع عينه. من غير ما أفكر: -هو ابنك رائد؟ = آه يا حبيبتي، هيترقى قريب ويبقى مقدم أد الدنيا. -أمور بقى على كده. ماما ضربتني في جنبي. أم إسلام، اللي هي حماتي قريب، ضحكت: = هو خلاص على وصول وهتشوفيها.

فجأة لقيت وحش داخل علينا، طول بعرض ولابس بدلة سودة. عقبال بدلة فرحنا يا بيبي، ومسرح شعره، ومش زي القرود اللي عمالة تتنطط حواليا. جه الوحش ووقف قدام الترابيزة بتاعتنا. مش عارفة ليه حبيت أم إسلام فجأة. = بس حلو أوي يا طنط الفستان اللي حضرتك لبساه، مصغرك أوي. -أنا صغيرة يا حبيبتي، دي الناس لما تشوفني مع إسلام بيقولوا ليه هي دي أختك الصغيرة؟ = اممممم، انتي هتقوليلي دا انتي نغة الصغيرة. -إيه؟ = لا ولا حاجة. -انتي رغد؟

يالهوي! دا بيكلمني. صوته كان حلو أوي، يحتضن الواحد كده. طرق أبواب قلبي، لا طرق إيه، داخل خالع الباب ودخل يا باشا. حاولت على قد ما أقدر أرفع صوتي وأبقى كيوت. = احم، أيوه أنا. -كل دا بتفكري؟ = ههههه، فاكر يا إسلام لما كنتوا صغيرين وكل يوم كنت بتضربها؟ = كتك نيلة فيك انت وامك.

كان نفسي أقولها، بس لما لقيت الوحش ضحك، نسيت أنا مين أصلاً. الفرح خلص بسرعة للأسف. وطبعاً كحال أي بنت مصرية بتحب واحد، بيتهيألي إنه منزلش عينه من عليها. هو أصلاً مكنش معبرني، وكان بيبص على الرقاصة. استأذنت من ماما إني أروح لأصحابي بسمة ونسمة (هما تؤام) . وصلت هناك. = أهلاً، ازيك يا رغد؟ اتفضلي. -مرسي يا طنط، هما نسمة وبسمة فين؟ = فوق في أوضتهم يا حبيبتي. خبطت ودخلت. نسمة وبسمة: -رغد!

سلمنا على بعض وكده. قمت رميت الشنطة على الأرض، وفكيت الطرحة، ورميت نفسي على السرير، وفضلت أصرخ زي المجانين. = مالها دي؟ -مش عارفة. رفعت راسي فجأة و...