رواية لماذا احببتك الفصل الثامن وسبعون 78 - بقلم اورجانزا الطائي

رواية لماذا احببتك
البارت الثاني عشر
بقلمي اورجانزا الطائي.
.
.
.
.
.
.
.
.
.
.
.
....
دك جهازة فتح خط
لحضات معدودة عيونة نگلبن لون احمرر واعصابة وضحن..

غلق الخط من المتصل..

مااعرف شسوة بالجهاز ثواني واسمع صوت طفل يصيح ااااخخ لا هيج اخخخ ايدي ..

مجرد سمعت هيج فز گليي.

طلع اركان من الغرفة يركض...
عمتي طلعت وراه اسمها يگول الها
_رواء محتاجتني..

ردت علية
_عوفها لاتوصل الها والله والله اذا تجيبها ما ارضة عليك ليوم الدين ما عولت خلصت من هل ساقطة ببنت عمك نوب تجيبلي هل شكول..

رد عليها
_لاتحجين عليها هيج واني رايح، قفلو البوب لان مااجي.

طلع من البيت و عمتي تصيح وراه وهو ماسمع الها.

بين تأثير الحلم والواقع احس ضغط قوي على راسي..
غمضت عيوني قوي احاول استرجع الي صار قبل لا انام وليش هل حلم بالتحديد؟!

وبهل وقت!
معقولة اركان محاجي عمة وجيتهم ما الها داعي ليش ما أجو قبل هو صار اله 15 يوم..

وتچايتي منو هذا؟؟

ورواء هاي منو نوب
يالله شنو ومنو دختتت والله...

گمت وكفت طلعت للهول لگيت عمتي گاعدة على الكرويتة وواضح عليها القلق..

گعدت يمها بدون مااحجي..

دموعي نزلن حاسة اكو شي راح يصير.

الف سؤال براسي شعجب عمتي ما گالت اتصلي على هجان ليش ساكتة وقلقانة!!

معقولة الطفل ابن اركان؟
بس هو مامتزوج

واحتمال هم ستر اوحاط وحدة يجمع حسنات على گولتة؟!

ضغطت على راسي بقوة وحجيت
_عمة منو هل طفل وليش گلتي لـ اركان ما ارضة عليك ليوم الدين؟!..

غمضت عيونها وهزت راسها گالت
_يجي وهو يفهمج تعبت منة كل يوم جايبلي مرة شكل..

رديت بضعف
_هي منو شنو الصلة الي بينهم ..

هزت راسها بدون ماتحجي.

ارتاكيت على الكرويتة انتضر وصول اركان حتى اعرف منو الي يحجي عنها..

ما حسيت غير نايمة على نفس گعدتي.

فزيت على صوت الباب يندك.
طلعت عمتي قبلي فتحت باب الشارع واني واكفة بباب الكلدور.

كامشة گلبي بيدي احس راح انكسر منة..

لحضات حسيتهن سنوات صارن.

دخل اركان گايد ولد يطلع عمرة بـ ال12او 13سنة نص شعرة مزين صفر والنص الثاني شعر اسود نازل لرگبتة..

ملامحة متشوهة ماينشاف من كثرة الوروم والطكع البنفسجية والزرقة..

شكلة بهل عمر مرعب..

مايگدر يمشي بالگوة يخطو الخطوة..

لحد هل لحضة امنت بس من دخلت بنية مو بالعمر الصغير..

متوسطة العمر وكلش حلوة عيونها زرك والوجهة ابيض بس مخربة طكعة زركة يم عينها وشفايفها الدم يابس بيهن..

لابسة عباه خليجية ونص شعرة طالع من الحجاب..

عمتي شافتها صاحت
_ والله والله هل رواء ما تدخل البيت بس تعبر الباب اطلع نوب علية بنات الشوارع..

اركان طلعهاااا لا اهجم حياتك والله العظيم ..

عمتي منفعلة وتصيح وتعيط والبنية الي تدعة رواء ختلت وره اركان حاضنة ايدة..

توقعت اركان يبعدها او يبتعد بس الي صدمني حضن اركان الها وتمسكة بيها وبالولد..

فتحت عيوني نزلن دموعي وحجيت باانكسار
_ارركان...

صد علية ركز بعيوني لحضات گال
_ بعد عافيتة ، انتضري افهمج كل شي لا تحكمين على شي..

هزيت راسي حجيت
_انتضر لعد شعندي حتى اذا الي ببالي بعد ماتشوف خلقتي..

ابتسم طرف شفتة گال
_تردينها علية زلة!

هزيت راسي..

تحمحم گال
_ حبيتي رواء روحي وية مشاعر.

غمضت عيوني بقوة شنو حبيبتي شنو روحي وية مشاعر؟!

ابتسمت اشرت لها.
دخلنة للبيت وهي واضح الخوف بعيونها.

طلعت فتى شافتها ركضت حضنتها وتصيح
_مامي رواء اجيتي..

فتحت عيوني بصدمة رد فعل فتى صدمني..

رواء حضنتها وتبجي تگول
_يعمري مشتاقتلج والله..

ابتعدت عنها گالت
_ليش البارحة ما خابرتي على بابي حتى اسولفلج الي صار وياي..

ردت بـ اقناع
_البارحة ماگدرت لان نمت من وقت..

ردت فتى مأشرة على عين رواء
_منو ضربج.؟

ردت باابتسامة
_محد بس وكعت على وجهي..

ماناقشتها فتى ابتعدت بهدوء.
دخلتها لغرفتي گعدت على الجرباية منزلة راسها..

ضليت واكفة وصافنة عليها..

لحضات رفعت راسها ركزت بعيوني گالت
_اسفة والله لو ما مجبورة ما سوي هيج..

نضراتها صفنتني لان لون عينها والحمار محاوطة ولمعة دموعها يصفن..

دنكت راسي حجيت
_ما اعرف شنو الي سويتي او انتِ منو ومنين تعرفج فتى درجة تناديج مامي!؟

بس اگلج، عندي ثقة بـ اركان وانتِ على راسي واداريج بعيوني.

اذا شفتي نضراتي الج هذا صدمة لا اكثر.
واعتذر منج على كلام عمتي اذا اسائت الج بحرف.

اعتبريها والدتج او عزيها على معزة اركان.

رمشت اكثر من مرة گالت
_يعني ماتكرهيني؟؟

رديت عليها
_لا اكيد ليش اكرهج مسويتلي شي او دايستلي على طرف حتى اكرهج؟؟..

ردت بفهاوة
_هااا

رمشت اكثر من مرة ابتسمت لشكل عيونها البرائة واضحة بيهن..
خوفي لاتطلع زوجة اركان واني منعجبية بشكل عيونها وملامحها.

تنهدت حجيت
_ ارتاحي بين ما ارجع، اعتبري البيت بيتج.

هزت راسها.

واني تقدمت ردت اطلع من الغرفة وگفني صوتها تگول
_ مشاعر سؤال.

التفتت عليها مبتسمة حجيت
_تفظلي.

سكتت ثواني واردفت
_انتِ تحبينة؟؟...

عقدت حواجبي باانزعاج حجيت
_اي طبعاً عندج شك؟!

هزت راسها بنفي.
طلعت من الغرفة للاستقبال.

دخلت لگيت اركان واكف يم عمتي ويسولف وياها وهي صادة على صفحة.

كعدت كدامهم..

عمتي صدت علية گالت
_عود اوصيج خل يضحك عليج بحجايتين وقبلي..

رد عليها اركان
_انتِ وياي ضدي مو اگول البنية واگعة بمصيبة واني اوله بيها من الغريب..

سكت ثواني اردف
_يمة الغريب ذيب شمعرفنة شيسوي بيها وهي لا حول ولا قوة بنية مالها سند وتلد.

رد علية عمتي
_انتَ غريب عن مشاعر يعني ذيب هم؟!!

ضرب ايد بـ ايد گال
_اني وين احجي هي وين تحجي، رحمة لـ ابوي مسموط لصفحة قبلي ترى واصلة وياي اروح احرگ كبر ابوي اخلي حتى بالگبر مامرتاح.

هم الله حاركة بنار جهنم واني حاركة واشوف منو يگول لا من دنعل صفحتة الي يورطني ويلف راسة.

ترى تعبت منكم اريد كو**سرسري ابن ك** گال يامسموط الصفحة اني وياك.

من باب احنة واحنة ومن باب الله مايخلصني منكم.

ردت عمتي بعياط.
_گول موتي واخلص..
اني هم ن سوالفك الماتتسولف هم راح الف راسي نفس ابوك وذيج هسة احجي...

رد عليها
_ هو الله لو يسوي فضل ويخلصني من هل حياه عاد جهنم ولا ناس بوجهين تاكل بنص بيتي وتطلع تحجي بعرضي.

سمعي زين يمة.
رواء واخوها يعيشون هنا ان شئتي ام ابيتي لان بط گلبي شگد قنعت وحجيت.

ردت علية
_مالي گعدة بهل بيت لعد.

جاوبها
_الي ترتاحيلة سوي.

طلع من الاستقبال عصبي صديت على عمتي الي حاجتني..

_ تجين وياي لو تبقين يمة بعد هل بيت ما ابقة بي..

رديت عليها.
_ما اسوي شي قبل ما اركان يسولف الي ما اريد اتخذ خطوة خطأ واخسر كل شي..

على الاقل من احجي اعرف شنو ومنو واطون صاحبة موقف مو اطلع وياج واني ما فاهمة شية..

ضربت صدرها گالت
_انه اسولفلج.

هزيت راسي حجيت
_عذريني عمة بس والله حالفة مااسمع غير منة هو وبس..

غمتني وطلعت.

ضحكت لان اول مرة تسويها..

بقيت گاعدة بمكاني حتى ما الي واهس اسوي اكل.
اريد اشوف اركان واسمع منة..
لان خايفة اسبق الحدث واخذ قرار اتندم بي او اشك بي.
واثقة منة مامتزوج ولا يتزوج..

بس وسواس يگلي حلمج راح يتحقق
او بالاحرى اني انسانة من النوع الي تأمن بهل خرافات و اثق بالروئية خاصتة بكل مرة تصيب بس هل مرة اتمنة تخطأ.....

غمضت عيوني حجيت
_مشاعر اركان يحبج وانت هم تحبينة لاتفكرين بشي..

طلعت من الاستقبال صار سيف گدامي يگول
_ماما ليش بيبي راحت؟!

ابتسمت حجيت
_بس اليوم باجر او عگبة تجي..

هز راسة والتفت راد يمشي صد علية گال
_ ماما خالة رواء حبابة ماتضرب بس يضربها..
واني احبها لان تحبنة اني وفتى.
وما تأذينة وتسوي النة ايس كريم كلش طيب.

ابتسمت لكلامة حجيت
_اعرف حبابة ولهل سبب بابا جابها.

هز راسة وعافني.

كملت طريقي رحت لغرفتي.
داهمتني ذكرى عيد ميلاد فتى وسيف.

واتصالات مروة من جهازي.
والسبحة والعطر وبالاخير زواجهم..

هم نفس الفترة الي بدأ القرب بينة..
هزيت راسي ابعد هل افكار..

تقربت للباب اسمع صوت رواء تبجي واركان يهون عليها ويگول

_ششش ياله حبيبتي لخاطري سكتي اذا ما تهتمين الي اهتمي للطفل الي بداخل احشائج..

ردت
_واني شمصبرني غير الطفل ول البعد گتلني وجاب اخرتي.

رد
_لاتحجين هيج ازعل منج وانتِ تعرفيني من ازعل شسوي...

فتحت الباب مصدومة من الي سمعتة.
بس انذهلت بالمنضر الي گدامي...

اركان حاضن رواء وهي مبادلتة الحضن وتبجي..
وگعت دمعتي من هل منضر.

صدمني رد فعلة من بعدها بهدوء ويمسح دموعها ويعدل شعرها الطالع..

ضحكت بستهزاء وطلعت من الغرفة بعد ما غلقتها بقوة.
ركضت للاستقبال.

حضنت جسمي وگعدت على الكرويتة.
دموعي تنزل اريد اصدك انو هم مابينهم علاقة.

بس الطفل والبعد وحبيبتي لا اكيد اكو شي..
ضربت راسي بقوة حجيت بهمس
_ضلي غبية انتِ تنتضرين يگلج تزوجت ياله تصدكين؟؟

بجيت بالزايد..
اتوقعتة يجي ويبرر بس هو عبث ولا وصلني.

لليل هدئت نوعا ما.
ارتاكيت على الكرويتة وغفيت..

حسيت على اركان يشيلني.
نعسانة وتعبانة لدرجة مو طبيعة.

غلق الضو وسد الباب حطني على الجرباية.
حسيت علية يفتح بالباب مال الكنتور.

لحضات اختفة الصوت..
كملت نومتي.

فزيت على حركاتة..
احتضني بدون ما يحجي.
نمت على صدرة رغم اكو خوف بداخلي.

وخايفة لا هذا اخر حضن بينة..

حاولت انام ماگدرت واتخيلها هي بحضنة لو رسمت سيناريو هم داخل الغرفة...
شهگت تلقائي.

بعدت هل افكار وهو همس بصوت مسموع
_ بالج لايروح بعيد خلي نضيف..

فتحت عيوني وگعدت كدامة اريد احجي..
فهمت معنى حركتي رفع روحها وارتاك على التاج.

حاضن ادينة مبتسم..

تنهدت وحجيت
_رواء منو وشنو تقرب الك؟!

ركز علية وحچة
_انتِ شفكرتي شنو موقعها بهل بيت؟!..

ابتلعت ريگي وحجيت
_اخت بس الي اعرفها ماعندك اخوات..
نوب گلت لا هذه بنت اختة.
واخير شي توقعت..

سكتت لان متأكد اذا اگول زوجة يلزمها علية.

رد علية
_كملي اخر توقع لج شنو؟؟

رديت
_ما اعرف انت اعرف..

اخذ نفس وزفرة
_اني اگلج زوجة؟!

هزيت راسي بقبول بدون ما ازيد كلام..

سكت لحضات تنهد گال
_رواء اعز من روحي علية رغم صغر عمرها لاكن واثقة على روحها وهل شي الي يقربني ناحيتها.

حامل الها سبع اشهر.
مستقرة بـ دهوك الي شفتي وياها اخوها عمرة ١١سنة.
بس الي يشوفة يتوقع اكبر لان عضمة خشن.

رواء و اوراس الوحيدين لـ شجن.
ساكنين وية ابوهم الي مايعرف الرحمة شنو من بعد وفاة شجن.
لان توفت من بعد ولادتها لـ اوراس بشهرين ونص.

سبب تشمع بالكبد وڤايروس بالكلى.
. اكتشفو مرضها بخلال فترة حملها بس ما گدرو يعالجوها لان حامل وزوجها اكثر من مرة اقترح يسقطون الطفل بس هي ترفض بكل مرة..

لان ماعدها غير ٦بنات.
وهل ولد الوحيد.

ابوهم الي هو سامر اعرفة صديقي قبل وفاة شجن كان انسان مختلف جذريًا..

يعشق شئ اسمة شجن.
تخيلي لو يخيرو بين الجنة وبين شجن يختار شجن.

على گولتة شجنة روحي شلون اتخلة عنها.
للعلم بعد ولادتها بـ اسبوع اتبرعالها بـ كلى بس مفاد هل شي.

الله مقاسم الها عمر جديد
لاكن هو مو راضي يصدك هل شي.

سامر كردي الاب..

اوراس ماخذ ملامح امة..
و رواء ماخذة شكل امها وملامح ابوها.

بمرور الوقت سامر ماگدر على موت شجن..
تخيلي مگابل المقبرة وگاعد.

مايعرف الدنيا طشت او رشت.
رواء عمرها ٢٣سنة.

مسحت دموعي حجيت
_الله يرحم شجن ويصبر سامر بس صلتك بيهم شنو؟!..

هز راسة گال
_تعرفين ابوي مسموط الصفحة؟!.

بالگوة لزمت نفسي ما اضحك..
حجيت
_اي اعرفة على كلامكم.

_شبيج يابة ضحكي تراه اذا ماطلعتي الضحكة تنجلطين.

ضحكت حجيت
_عليك الله شلون عرفت ردت اضحك؟!.

_لان حجيتي بضغط واضح على نبرة صوتج.

_همم

_المهم يا دائي ابوي المسموط قبل لا تطلب الطلاك منة امي
عارفة بي مزوج و عندة بنية وحدة وهل بنية متزوجة.

وامها للبنية ميتة بحادث سير.

وبوقتها اعرف بي متزوج واني اشوف احتياجات شجن الي هي اختي من المسموط ابوي.

يعني رواء و اوراس ولد وبنت اختي من ابوي المسموط.

فتحت عيوني بصدمة حجيت
_عليك الله صدك؟!!.

رد
_و رواء زوجها توفة قبل ٥اشهر.

رديت
_يااا خطية والله..

بدون ما يرد علية اخذ جهازة.
فتح فيديو انطاني الجهاز.

شفتة وشهگت.
اوراس رافعينة من ادينة فلقة بس بالشورت..

و واحد يضربة بصوندة على جسمة

لحضات ترك الضرب و واحد بيدة مكينة زينو نص شعرة..
وهو بدون حركة بس يصيح..

منضر كفيل يبجيني ويوگع مني الجهاز.

حضني اركان وباس راسي وگال
_حقي باليل اطلع اجيبهم؟!

هزيت راسي حجيت
_اصلا عاشت ايدك شلون وحشيين ليش هيج يضربو ومنو هذولة؟!

_.. هذا الي زينة عمة والثاني ابن عمة.

رديت
_لعد وابو وين؟!

رد
_ابو بي حالة نفسية مايطلع من البيت مالهم ويأذي بنفسة.
واغلب طلعاته للمقبرة ليل يبقة يمها لحد ثاني يوم يرجع مايعرف بنفسة شماكل.

رديت
_لعد عمتي ليش ترفض وجود رواء مالها ذنب، لو لان اولاد ضرتها؟!

رد
_لج باباتي هذه خالتي اخت امي شلون صارت ضرتها وامي عايشة؟؟

رفضها كان سبب شجن لان ماقبلت تجي تعيش ويانة.
وخلاف بينهم والاكثر سامر بوقت خطب بنت خالتي وبعدها فسخو وتزوج شجن

سالفة خبط ماتفهمين راسها من رجلها.

هزيت راسي بعدني عن حضنة گال
_ ملعونة كم سب سبيتيني من البارحة ولحد الان!!

ضحكت حجيت
_ماسبيت بس حجيت وجنت احاول اصدك انو مابينكم علاقة.

بس تعاااال صدك
شلون تحضن بيها وليش فتى تصيحها مامي.؟

رد
_بنت اختي مالج حك يمي وثانيا فترة الي اخذت الاطفال تركتهم يم رواء شهر بعدها رجعنة..

ومامي لان شافت رواء تبجي وبوقتها عمها ضاربها وگالت ماعندي حتى طفل يگول ماما مات ابني.

فتى تبرت بـ مامي رواء.

رديت
_والله هل طفلة كل يوم تصدمني.
بس وين رجعتهم من رجعت دهوك؟؟

تمدد وسحبني لحضنة گال
_مكان امين اثق بي اكثر من روحي..

رديت
_منوو؟؟!

رد
_نعـسان عندج مانع؟!.

رديت
_اي اگعد.

گعد وسحبني اله گال
احيانا افكر شلون حبيت شخص مجهول لا احجي وياه ولا اشوفة ولا معاشرة؟!
حتى التناسي مانفع وياج.

ابتسمت حجيت
_الله قاسمني الك احتمال!.

رد
قصدج واقع هل شي مو احتمال.

رديت
_ايي..

حضنتة ونمت مرتاحة ما على بالي هم..

اتمنة هل راحة تدوم لگلبي وبالي.
وجود اركان بحياتي راحة.
هل انسان تعويذة سحرية وگعت على گلبي...

مرت الايام واجة شهر رمضان..
طول هل فترة رواء واوراس يمنة.

رواء ولدت ولد سمتة ارام.
وجيلان كذالك ولدت هم ولد وسمو أبو الحسن.

جيلان ما اعرف شلون الله طلعها سالمة بعد ما تعرضت لحادث سير..

أبو الحسن صار روح هجان بحيث ما يوكع من ايدة.
وبعد ما گام يناغي ويضحك كل جيات هجان وياه ابنة.

اليوم ١٠رمضان هجان عازمنة على للفطور.
رحنة الهم ساعة اربعة ونص العصر.

ساعدت جيلان بالشغل.
وتفاجئت بـ امي شايلة ابو الحسن بيدها ماتقبل تعوفه.

هل شي صدمني وفرحني خاصتة تقربت من جيلان.

گعدنة بعد الفطور بالحديقة كلنة.

هجان تبرع يسوي الگهوة.
انطاني ابو الحسن واخذ جيلان و دخلو للمطبخ.

اركان گاعد يمي اخذة مني يلاعبة..

بهل اثناء رجعو هجان وجيلان بيدها صينية فناجين.
قدمت النة اخذنة اركان عافها يمه بدون ما يشربها.

ضحك هجان گال
_اركان اريد انخيك بسالفة وانيه اعرفك ماتردني وبالاخير مايرد الكريم اله البخيل.

رد علية اركان
_ما يعيجك غير لسانك گول.

اخذت ابن هجان منة وهو عدل گعدتة.

رد هجان
_ بنص بيتي وصبيتلك گهوة ورديتنة لان ماشربتها.
تقبلها اسويها ببيتك؟!.

رد اركان
_على عيني وراسي انتَ وگهوتك بس يا اخوي الروح ماتهواها

رد هجان
_افا عليك الگهوة تحجي عليها

رد اركان
_عمي هايهية.

من بعد نقاشات حجة هجان

_ما الوم لنسوان من يسألون على الطفل.
اي مشاعر واركان شوكت ناويين تسوون طفل مو كافي طولتو.

نهة كلامة بغمزة لـ اركان الي غص بالگهوة..

ضحك گال
_له له له شبيك عضيدي.

اخذ مي شرب گال
_سلامة گلبك بس فك ياخة هم شربتني گهوة وهم تسولف.

رد
_لا مو بالحيف بس اسأل لاتاخذ بغير قصد.

هز راسة گال
_ ملاعيبك كلهن عندي يا خوي.

رد هجان
_ الفكرة وصلت الك وما وصلت لـ بنية امي

طول ما هم يحجون اني اريد اجمع بكلامهم حتى افهم القصد.
بس مجرد فهمت قصد هجان حجيت
_هجاااان شبيك.

الكل ضحكو علية واني يا كاع انشگي وبلعيني.
خلص اليوم ورجعنة للبيت بعد السحور.

مجرد صليت ونمت.

ثاني يوم گعدت بال١٢ بين ما صليا ونضفت البيت گعدت رواء ساعدتني بالفطور.

مشت الايام على هل منوال حياتنة هادئة.
اليوم اول عيد اعتبرة الي يم اركان.

راح الصبح للصلاة ورجع الضهر وياه عمتي.
سلمت عليها وعايدتها.

باليل طلعت اشترينة ملابس لزواج گمرة وجساس.

رجعنة الفجر.

خلصن هل يومين ترتيب وتعديل.

بـ اخر يوم العيد زفتها
البارحة الحنة مالتها رحت الها.
زواجهم كلش حلو

وسوالف جساس الي مزيدة العرس جمالية.

بيوم الزفة الكل كاعدين مركزين على جساس وگمرة شلون يركصون..

وواضح نضراتهم شلون حلوة..

لحضات واشر جساس لـ اركان وهجان وحسين اسلام.
وفعلا كلنة ركصنة وياهم.

يوم كلش حلو قضيناه.

بوقت الزفافة تطلع من القاعة
اصدقاء جساس مسوين عراضة اله.

متفقين وية اركان وهو منطيهم العنوان والوقت.

طلعنة لنص الطريق رجعنة لان رواء تخربطت.

اخذناها للمستشفى مابيها اي شي.

رجعنة للناصرية ميتيين تعبب

فتى وسيف نايمين.

شالهم اركان دخلهم للبيت.

سبحت ورجعت للغرفة مددت.

واركان اخذ ملابسة وراح يسبح
لحضات حاوطني لحضنة.

تقرب الي وتم كل شي بينة..

باس راسي گال
_ابد ما بيوم جنت اتوقع تصيرين من نصيبي بس سبحانة الي زرع المحبة بگلبج اتجاهي.

حبج الداء وانتِ الدواء..

اتمنة ما بفد يوم اخذل ثقتج اتجاهي وتأكدي انتِ گاعدة بين عيوني بكل خطوة اخطيها كفيلج حي الدارين من يوم الي حبيتج ولحد هل يوم ما نضرت لوحدة.

جنت اشوفج بين عيوني.
سمارج عمة عيوني وثبتج بگليبي.

عسى الله مايحرمني منج وعمري على عمرج.

نزلن دموعي مسحن گال
_حرام عليج اعترفلج وانتِ تبجين..

نهه كلامة بضحكة واردف
_انتِ احلى وحدة شافتها عيني.

رديت
_ بس گلي شلون احلى وحدة واكو احلى بهوواي مني.

رد
_يـ الداء والدواء ما سامعة بـهل مثل القرد بعين امة غزال واني اشوفج احلى من الغزال نفسة.

عكس ما يشوفج غيري.

ضحكت وحجيت
_لا هاي هية هزيت ابو الثقة على هل مثل..

كرص خدودي گال
_انعل صفحة الثقة ولا بو هل ثقة.

ميلت راسي حجيت
_تذكر بيوم گلت من يجي الوقت المناسب اگلج يم منو عفت الجهال؟؟

رد اي اتذكر وعفتهم يم هجان وجيلان وقبل لاتحجين وتسوين شاكل ذمتهم.

فتحت عيوني بصدمة حجيت
_عليك الله اگول ليش جيلان تگول لاتخافين عليهم أمني.

حضني وگال
_واريد هل شي يبقة سر ماتحجين بي لطير الطاير.
اتناسي..

هزيت راسي حجيت
_ان شاء الله..

لحد هل نقطة خلصت حياتي شفتوها بمرورتها قبل حلاتها..
مو كل زواج يعني حلو او بالاحرى مو كل زوجة اخ تگدر تتأقلم.

هواي شفت عدهم هل شي عادي بس والله هذا كلام لان اني ماگدرت اعترف مو بس ابادل..

رغم سيف الي سواه كرهني بروحي لان اني الي عانيت وما فهمت شئ..

غلطة وتندمت عليها سالفة سر اركان لان من المفترض اكون اكثر نضج ومااحجي بي يبقة سر.

واتمنة الي تقرأ قصتي ماتعيد اغلاطي واولهن ما اسمع المقابل.

كونو على ثقة الي يحب مايأذي.
والدليل اركان رغم الاذية الي حصلها مني كان ردة الي مختلف بعيد عن الانتقام.

مشاعر زهرت وعرفت شنو المشاعر والحب من اركان شاركني حياتي وهذا دليل على انو الشخص الصح هو الانسب لـ اكمال الحياه.

بالمناسبة اركان يسلم عليكم كلكم ويعتذر على تجاوزة بحقكم.
ويگول الكم

كنا غرباء تحت شعار الزواج واصبحنا عشاق..

وخلصت الحدوتة ✧

شكراً لتحملكم تأخري.
واتمنة منكم تتابعون قصة غرائب القدر يتم نشرها بعد الامتحانات.

رأيكم بالبارت الاخير.

واهم شئ رأيكم الصريح بـ طريقة السرد وانقال الاحداث.

واكثر بارت دوخكم من ناحية السرد.

منشو لـ اكثر مشهد حبيتو

وشلونه انتقال الحلم للواقع بالبارت السابق؟!

وسبب تأخير البارت حالتي الصحية تدهورت.

والي متابعيني على الانستا يعروفون.
umkno22 يوزر الانستا