رواية ليلة بكى فيها الحاضرون الفصل التاسع عشر 19 - بقلم محمد طه

سليم يقرب من سهام. سهام تحرك شفايفها وتقول جملة لسليم من غير ما تطلع صوت. سليم واقف متنح ومش فاهم حاجة من اللي هي عايزة تقولهوله. بيقول في سره: "إنتي ليه سلمتيلنا نفسك بالسهولة دي؟ كان ممكن تقاومي وتهربي بكل سهولة، وأنا كنت هساعدك في إنك تهربي." نعمان يبص لسليم يلاقيه واقف باصص لسهام ومتنح. نعمان: إيه يا سليم؟ هيا البت عجباك ولا إيه؟

سليم: والله يا باشا هيا البت حلوة مافيش كلام. بس يا خسارة الحلو ما يكملش. بعد اللي هنعمله فيها ما هنعرفلهاش ملامح. سهام تبدأ تستفزهم. سهام: هو دا المرسال بتاعك؟ اللي يسوق كتيبة قدامه؟ دا آخره يسوقك أنت ومراتك. هدي تقلع الجزمة وتروح تضرب بيها سهام على وشها. سهام تستفزها أكتر. سهام: تصدقي هو آخره يسوقك قدامه على أوضة النوم. وتضحك ضحكة عالية. سهام: أنا متأكدة إنه حصل، باين في عنيكي يا...

هدي تغلي من جواها وتفضل تضربها بالجزمة في كل مكان في جسمها. سهام تضحك في وشها. سهام: عارفة إن كلامي بيوجع أكتر من ضربك. أصل إنتي إيدك حنينة أوي يا هدهود. نعمان: اطمني موجود إيدين خشنة وهتعجبك أوي. هدي تكمل. هدي: يا سوسو. سليم من غير ما حد ياخد باله، بعت اللوكيشن بتاع المكان لسامر. *** (في بريطانيا) (قصر العزيزي باشا) لين: جدو، بابا وماما راحوا فين؟ العزيزي: بابا وماما في الشغل. أول ما هيخلصوا هييجوا على طول.

لين: طيب، أنا عايزة أكلمهم. العزيزي: حاضر، هخليكي تكلميهم وفيديو كمان. بس دلوقتي هما شغالين. أول ما هيخلصوا شغل هخليكي تكلميهم. لين بكل براءة: جدو، متخليش الشغل ياخد مني بابا وماما. العزيزي ياخدها في حضنه. العزيزي: طول ما أنا عايش، مفيش حاجة هتقدر تاخد منك بابا وماما. لين: أنا بحبك أوي يا جدو، ربنا يخليك ليا. *** (عند سامر) (مخبأ سري) سامر وعادل وضحي كانوا في الجراج ولسه هيتحركوا. رسالة اللوكيشن توصل على تليفون سامر.

سامر: الحمد لله، سليم بعت اللوكيشن. ضحي: تعالى يا رياسة، سوق أنت الموتوسيكل. والبس الخوذة عشان مش لازم حد يشوفك. عادل بتحذير: بفكرك يا رياسة، من غير نقطة دم. سامر: أنا أعطيت كلمة للباشا، بس لو حصل ضرب نار، أكيد هندافع عن نفسنا. وبعدين اطمنوا، نعمان أنا عايز أخليه للآخر عشان أحاسبه حساب الملكين قبل ما أسلمه للحكومة. *** (المقر السري لنعمان) نعمان وهو بيشمر أكمام القميص.

نعمان: أول حاجة عايزها منك، هتتنازلي عن كل حاجة كتبهالك سامر باسمك. تاني حاجة عايز أعرف مين اللي معاكي، وتعرفوا عني إيه، عشان لو فيه حاجة ناقصة أكملها لكم. سهام وهي بتبص لمراته. سهام: الحاجة الناقصة واقفة جنبك. مراته تروح عشان تضربها، نعمان يوقفها. سهام بدهاء: على فكرة يا نع نع، أنا فكرت في الطلب اللي أنت طلبته مني ليلة امبارح، لما وزعت الحرباية وبنتها وجيتلي لوحدك وطلبتني للجواز. وتبص لهدي.

سهام: تخيلي يا هدهودة، حمايا طلبني للجواز وأنا لسه بفستان فرح ابنه. هدي تبص لنعمان ودمها بيغلي. هدي: نعمان، تعالا عايزك. ويبعدوا عن سهام ويتكلموا بصوت واطي. وسليم يقرب من سهام ويكلمها بصوت واطي جداً. سليم: ضيعي وقت على قد ما تقدري، سامر جاي في الطريق. نعمان ومراته. هدي: إيه الكلام اللي البت قالته ده يا نعمان؟ نعمان: بتهلفط بأي كلام، ده أنت تبقي اتجننتي لو صدقتيها. هدي: وما أصدقهاش ليه؟

ما حاولت تعملها قبل كده أكتر من مرة، ومع بنات أصغر منها، وأصغر من بنتك. نعمان: اعقلي يا هدي، وخلينا نشوف هنعمل إيه في المصيبة دي، قبل ما تخلص هي علينا. البت دي مش سهلة ومش لوحدها. هدي بغل وكره: البت دي أنا هدبحها وبإيديا، ومش هتبقى أحسن من اللي اتدبحوا قبل كده. نعمان: مش هينفع نخلص عليها قبل ما ناخد منها اللي إحنا عايزينه ونعرف مين معاها. هدي بعد تفكير: خلاص يبقى تخلي حد من رجالتك يغتصبها قدامنا كلنا.