رواية ما لم يقله المنام الفصل الخامس عشر 15 - بقلم هاجر نور الدين

صباح الخير يا عصام يا حبيبي عامل إي نمت كويس؟ شيلت الموبايل من على ودني بإستغراب ورجعت حطيتهُ تاني بعد ما اتأكدت من الإسم وقولت: _وإنت اللي يسمع صوتك ويبقى معاك يعرف ينام، إشجيني؟ رد عليا بصوتهُ الطبيعي المزعج وقال: = ما إحنا مش ناس كدا، المهم التقارير طلعت وفي قضية جديدة. إتعدلت بتعب جامد وإرهاق وأنا جسمي متكسر بسبب شيل إمبارح وقولت: _طيب يلا سلام أنا جايلك.

قفلت معاه وقومت خدت دُش وبعدين لبست وقبل ما أنزل بصيت ناحية بلكونتها ولقيتها مقفولة، أتضايقت بصراحة ولكن نزلت. كانت الساعة 8 الصبح أكيد مش هتقدر تقوم دلوقتي. نزلت وروحت القسم وكان طارق مستنيني. قعدت على المكتب وهو جه ورايا وهو بيقول بعملية: _التقارير طلعت وفعلًا البصمات اللي على الجهاز لإبن الراجل والدم المتجلط للراجل. هزيت راسي وقولت: = تمام إبعت هات الواد دا خلاص القضية لبساه رسمي، إي القضية التانية؟ قعدت

قدامي وقال بإختصار وشرح: _واحدة ست من هوانم زمان دول لقوها مقتولة في شقتها في المهندسين. بصيتلهُ وقولت بإستغراب: = ما تكمل فين باقي التفاصيل؟ رد عليا وقال: _لأ ما هو أنا مش عارف أكتر من كدا، البلاغ جالنا بكدا بس، محدش لاقي آي أثر والشقة مترتبة بشكل طبيعي وكأن محدش دخلها أبدًا. بصيت في الفراغ بتفكير وقولت:

= مستحيل تلاقي مجرم مش سايب أثر وراه حتى لو كان محترف وخارق الإحتراف لازم هيسيب وراه أثر، المهم يلا بينا للمهندسين. نزلنا وركبنا وبعد شوية وقت وصلنا للمهندسين. طلعت للشقة وكان كالمعتاد الطب الشرعي ورجالتنا موجودين. الشقة فعلًا نضيفة بشكل يخليك تشك إن فيها حد ميت أصلًا مش بس جريمة! روحت ناحية الجثة وكانت ست في منتصف الخمسينات تقريبًا ومطعونة في رقبتها وكانت مرمية حرفيًا مرمية على كنبة الصالون بطريقة عشوائية.

وطيت شوية جنب الدُكتور وقولت بتساؤل: _إي نظرتك المبدئية يا دكتور؟ إتكلم الدكتور وقال بعملية وهو بيشاور على رقبتها: = الظاهر إن كان في خنق أصلًا قبل الطعن، والطعن هنا كان بحاجة صغيرة وحادة جدًا مش سكين أبدًا. إتكلمت بتساؤل وفضول وقولت: _أومال إي مثلًا يا دكتور؟ عليا بعملية وتركيز وقال: = حاجة صغيرة ولكنها حادة ومن فتحة الطعنة واضح إنها مش عريضة عرض السكين ولا بالقوة الكافية يعني.

هزيت راسي بتفهم وقومت من جنبهُ سيبتهُ يكمل شغلهُ بعد ما بصيت للجثة كويس وشوفتها يمين وشمال. قومت بعدها وقفت جنب طارق اللي جه وإداني كوباية القهوة وقال بتساؤل: _وصلت لـ حاجة؟ إتنهدت وأنا بمسح الشقة بعيني في كل ركن وقولت بحيرة: = مفيش آي حاجة فعلًا وكأن الست هي اللي قتلت نفسها ولكن دا مستبعد ومستحيل هو مجود مثل، ولكن أكيد هنلاقي حاجة، مفيش مجرم بيستخبى طول العمر.

وأنا ببص على كل ركن في الشقة لفت نظري واحد من رجالتنا هادي جدًا وهو شغال وبياخد عينات من الضحية. تابعتهُ بنظري عادي مش شاكك فيه ولا حاجة بس يعني برود أعصابهُ دا بتمناه في حياتي دايمًا. لحد ما وصل عند الرقبة وفضل ماسكها ثوانٍ وهو مفيش حد جنبهُ وكان باصصلها وإبتسم! إبتسم لثوانٍ إبتسامة سريعة وبسخرية وإختفت على طول! مكنتش فاهم الحقيقة إي دا ولكن خرجت من تركيزي وبصيت ناحية طارق اللي كان بيهزني في كتفي عشان أبصلهُ.

_إي يا طارق؟ رد عليا وقال بإستغراب: = بكلمك من بدري مش بترد عليا؟ رجعت بصيت ناحية الراجل دا ولكن لقيتهُ قام وبيتعامل عادي وهو بيدندن أغنية. زاد إستغرابي الحقيقة ولكن بصيت تاني ناحية طارق وقولت: _لأ مفيش حاجة كنت مركز بس، المهم عايزك تفرغلي كاميرات المراقبة وكمان عايز طلب تاني. بصلي طارق بإنصات وقال: = تمام قول أكيد. خدتهُ وبعدت شوية عن المسرح وقولت وأنا بشاورلهُ بعيني ناحية الراجل دا وقولت:

_عايزك تجيبلي معلومات الظابط دا. إتكلم طارق بتساؤل وقال: = ليه يعني؟ بصيتلهُ وقولت بهدوء وإختصار: _هبقى أفهمك بعدين ولكن إنت عارف في سرية تامة. بعدها كملت تحقيق في المكان وبحاول أوصل لآي حاجة ولكن اللي عمل كدا محترف بشكل فظيع! بعد حوالي 4 ساعات شغل موبايلي رن، كان كريم، رديت بلا مبالاة وأنا مركز في اللي بعملهُ وقولت: _أيوا يا كريم.

ولكن اللي حصل خلاني سيبت كل اللي في إيدي وقومت وقفت بسرعة وبشكل ملحوظ لدرجة إن اللي حواليا بصولي. كانت ليلى اللي بتتكلم وبتقول بصوتها العسول: _عاصم هتيجي إمتى؟ خدت جنب مع نفسي يعيد شوية عن الناس وإبتسمت وأنا بحاول أتكلم عادي: = ليه في حاجة معاكي ولا إي؟ إتكلمت بحماس ومرح وقالت: _لأ لأ مفيش حاجة معايا بس يعنس بشوفك هتيجي إمتى عشان عاملالكم حاجة حلوة لازم تتاكل سخنة.

عيني لمعت الحقيقة وكمان معدتي، أنا وكريم مكلناش أكل بيتي بقالنا كتير أوي. إتكلمت بحماس وقولت: = حالًا جاي البيت. إتكلمت بنفس النبرة الجميلة بتاعتها وقالت: _تمام بس تعالى على شقتي على طول أنا عازماكم عندي مع صاحبتي ومامتها وأخوها. سكتت شوية وقولت بتساؤل: = أخوها دا يعني إممم قد إي؟ ردت عليا وقالت: _عندهُ تقريبًا 19 سنة. إبتسمت براحة وبعدين قولت: = حالًا أنا جاي. قفلت معاها وروحت البيت طيران حتى تحت إستغراب طارق.

ولكن قبل ما أطلعلها بصراحة طلعت شقتي خدت دش وغيرت وبعدين روحت الناحية التانية. قبل ما أخبط كنت سامع صوت ضحك عالي من ضمنهم صوت كريم أخويا، أيوا ما هو حسه الفكاهي عالي طول ما القاعدة فيها بنات. إتنهدت وخبطت على الباب وفتحتلي ليلى وهي مبتسمة، إتكلمت وقالت: _إي كل التأخير دا؟ رديت عليها بإبتسامة وهيام وقولت: = معلش الطريق بس، عقبال ما تفتحيلي باب شقتنا كدا. قولت أخر جملة بصوت واطي شوية ولكنها سمعتها وكنت قاصد

الحقيقة وقالت بإستهبال: _قولت حاجة؟ إبتسمت ودخلت وأنا بغمزلها وقولت: = لأ. دخلنا وسلمت على اللي موجودين وبعدين قعدنا كلنا، كانت ما شاء الله ريحة الأكل بالأكل مجنناني. جميع أنواع المحاشي وفراخ محمرة وملوخية وكمان جلاش باللحمة. الحقيقة أنا وكريم إستغلينا الفرصة دي ونسفنا الأكل. إتكلمت بعد ما خلصنا أكل وقولت: _تسلم إيدك بجد يا ليلى والله كان واحشني أكل البيت بشكل ومن إيدك ليه طعم تاني خالص بجد. ردت عليا وقالت بإبتسامة:

= بالهنا والشفا إن شاء الله بعد كدا هعمل حسابكم في آي أكل هعملهُ وهبعتهولكم. إتكلمت بإبتسامة معترضة وقولت: _مالهوش داعي والله مش عايزين نتعبك. إتكلم كريم اللي مش قادر يتنفس وقال: = والله فكرتك تحفة يا أنسة ليلى ياريت بجد. خبطتهُ بكوعي في جنبهُ وأتأوه، ضحكت ليلى وقالت: _سيبهُ هو معاه حق. بعدها قامت ليلي وصاحبتها اللي كريم منزلش نظرهُ من عليها وحتى والدتها لاحظت وأنا خبطتهُ أكتر من مرة بس البعيد حلوف.

إتكلمت والدة صاحبة ليلى وقالت بإبتسامة وتساؤل: _وإنت يابني بقى متجوز على كدا؟ رد كريم بسرعة وحماس غريب وقال: = لأ يا خالتي والله ياريت لو تشوفيلي عروسة وياريت أكتر لو قريبة منك اوي يعني. ضحكت وقالت: _لأ مبسألكش إنت، بسأل أخوك إنت لسة صغير. إبتسمت بعد ما بصيتلهُ بتوعد وقولت: = لأ يا خالتي لسة، بس إن شاء الله قريب أنا مقرر بس يارب التساهيل.

خلصت كلامي على دخلة ليلى بالشاي وكانت سامعة كلامي، دخلت تاني المطبخ ولكن أنا شوفت الإبتسامة على وشها. إبتسمت وإتحمست أكتر. كلنا بعدها كنا قاعدين بنشرب الشاي مع الحلويات اللي عاملاها ليلى. كريم كان مندمج مع والدة وصاحبة ليلى وبيضحك معاهم وأنا وليلى كنا قاعدين على الكرسيين اللي جنب بعض. ميلت راسي شوية ناحيتها وقولت بتساؤل: _مش بتفكري تتجوزي يا ليلى؟ بصتلي بإستغراب من السؤال المفاجئ ولكنها قالت بهدوء:

= يعني أكيد لما يجيلي الشخص المناسب. إبتسامتي وسعت وقولت بتساؤل: _يعني لو أنا؟ بصتلي بإستغراب من تاني وتوتر وقالت: = يعني إي؟ إتكلمت بوضوح أكتر وبصيغة مباشرة على طول وقولت: _يعني تتجوزيني يا ليلى؟