رواية ملاك الزين الفصل الثاني والعشرون 22 - بقلم الكاتبه دودو

رجعت ملك البيت، لقيت أحمد ومامتها جاهزين. ملك: ثواني بس هلبس وأجي على طول. الأم: عارفة لو اتأخرتي هنسيبك ونمشي. ملك: أنت اللي بتعطليني أهو. الأم: حسبي الله ونعم الوكيل فيكي، امشي يا ملك البسي بسرعة. ملك: حاضر أهو. بعد وقت، جهزت ملك وطلعت. ملك: أنا جاهزة أهو. الأم: هو ده اللي ثواني؟ ملك: بجهز نفسي يا ماما، الأّه. الأم: امشي قدامي، ويارب أسمع صوتك. ملك: شوفي أمك يا أحمد بتتخانق معايا إزاي وأنا مش بتكلم خالص.

أحمد: شايف يا أختي مش بتتكلمي، امشي بقى قدامي. ملك: طب متزقش وأنا همشي. عدى وقت وكأنهم قاعدين في بيت جميلة. ملك: (همست في ودن أحمد) اتكلم بقى ولا هنقضيها ساكتين كده. أحمد: (بهَمْس) أتكلم أقول إيه، أنا نسيت كل حاجة. ملك: يعني أسيب ماما تتكلم؟ أحمد: خلاص هتكلم أنا. أبو جميلة: في حاجة يا بنتي؟ ملك: لا يا عمي، بس أنا عايزة أشوف جميلة. مامة جميلة: حاضر يا حبيبتي هندَهلك عليها. الأب: خير يا ابني في حاجة؟

أحمد: كل خير يا عمي، أنا كنت جاي أطلب إيد جميلة بنت حضرتك. شرف ليا إني أتجوز بنت حضرتك. الأب: الشرف ليا يا ابني، وأنا معنديش مانع بس الرأي رأي العروسة. في اللحظة دي دخلت جميلة وقدمت الصينية وقعدت جنب والدها. مامة أحمد: بسم الله ما شاء الله اسمها جميلة وفعلاً جميلة. جميلة: شكرًا من ذوق حضرتك. مامة أحمد: حضرتك إيه بقى؟ قوليلي يا ماما ولا أنا مش زي ماما؟ جميلة: حاضر يا ماما. الأب: جميلة بنتي، أحمد طالب إيدك، إيه رأيك؟

جميلة: (بكسوف) اللي تشوفه يا بابا. الأب: على بركة الله نقرا الفاتحة. بعد ما قرأوا الفاتحة. أحمد: إحنا نعمل شبكة يا عمي والفرح مع ملك إن شاء الله. الأب: اللي تشوفه يا ابني. أحمد: بكرة إن شاء الله ننزل نجيب الشبكة. الأب: تمام يا ابني. أحمد: نستأذن بقى. الأب: لسه بدري، اقعدوا شوية. أحمد: الجايات كتير، عن إذنك. الأب: إذنك معاك. وصلوا البيت ودخلوا. ملك: وأخيرًا هتبقى عريس، أنا كنت فكراك هتعنس. أحمد: امشي يا بت من قدامي.

ملك: عايزة فلوس عشان أشتري فستان للخطوبة. أحمد: هو أنا العريس وهجبلك فستان؟ ملك: إذا كان عاجبك. أحمد: لا مش عاجبني. ملك: يبقى هوري الفيديوهات اللي معايا لجميلة. أحمد: فيديوهات إيه؟ ملك: فيديوهات أنت وصغير، فاكر ولا أكمل؟ أحمد: خلاص، أحلى فستان لأحلى ملوكة في الدنيا، بس وغلاوتي عندك لتمسحي الفيديوهات. ملك: هخليهم ضمانة إنك تعملي اللي أنا عايزاه. أحمد: متبقيش رُخمة وامسحيهم وأنا أعملك اللي أنت عايزاه.

ملك: تؤ تؤ، مش مصدقاك. أحمد: أعمل إيه عشان تصدقي؟ ملك: اممم، أطلب أي حاجة. أحمد: قولي عايزة إيه خلينا نخلص. ملك: أول حاجة الفستان، وبعدين تجبلي شوكولاتة وتفسحني وتعزمني على الغداء وبعدين تجبلي حاجة حلوة وبس كده. أحمد: أنتي منسيتيش حاجة؟ ملك: استنى أفكر تاني يمكن ناسية حاجة. أحمد: أنتي صدقتي؟ كفاية اللي أنتي قلتيه بس امسحي الفيديوهات. ملك: تؤ تؤ، لما تعمل اللي قلت عليه. أحمد: ماشي وأمري لله، بس هتمسحيهم.

ملك: أول ما تعمل اللي قلت عليه همسحهم. أحمد: خلاص، بكرة تروحي معاي نجيب الشبكة وأفسحك. ملك: موافقة، تصبح على خير بقى. أحمد: وأنتي من أهله يا أختي. عند زين. تليفونه رن وكانت زينة. زينة: إيه يا زين مسألتش عليا النهارده؟ زين: مشغول يا حبيبتي أعمل إيه. زينة: لا لازم تريح نفسك شوية. زين: حاضر هحاول. زينة: لا لازم بكرة تاخد إجازة ونقضي اليوم كله مع بعض. زين في نفسه: فرصة أعرف منها الخطة. زينة: زين أنت روحت فين؟

زين: معاكي، خلاص بكرة هاخد إجازة ونخرج مع بعض. زينة: هستناك يا حبيبي باي. زين: باي. زين رن على ملك. زين: حبيبتي عاملة إيه؟ ملك: بخير يا حبيبي وأنت. زين: أنا بخير طول ما أنتي بخير. ملك: دايمًا يارب. زين: ملك حبيبتي أنا بكرة مش هقدر أجي الشغل. ملك: وأنا كمان مش هقدر أجي، بس أنت مش هتيجي ليه؟ زين: بكرة هطلع أنا وزينة. ملك: نعم؟ أنت ومين؟ زين: أهدي يا حبيبتي أنا هطلع معاها عشان المهمة.

ملك: أنا مش حابة البنت دي، خلص المهمة دي بسرعة. زين: حاضر يا حبيبتي، وأنتي مش هتيجي ليه؟ ملك: بكرة أحمد هيجيب الشبكة وأنا هروح معاه. زين: آه، ألف مبروك، باركيله نيابة عني. ملك: أنت تباركله بنفسك، أنت مش هتحضر الخطوبة؟ زين: إن شاء الله يا حبيبتي، بس أنتي وحشتيني أوي. ملك: وأنت كمان يا حبيبي. زين: إمتى نبقى في بيت واحد؟ ملك: خلص أنت المهمة دي ونتزوج على طول وأحمد هيبقى فرحه معانا.

زين: إن شاء الله يا حبيبتي عن قريب خالص. ملك: إن شاء الله يا حبيبي، هنام أنا بقى، تصبح على جنة. زين: وأنتي من أهلها يا روحي. قفلوا وكل واحد راح في النوم.