رواية ملائكة بالف وجه الفصل الثامن عشر 18 - بقلم اروي طاهر

أحياناً نكمل حياتنا ظناً منا أننا تخلصنا من كل مشاعر الحب التي كانت في قلوبنا، وأن كل ما صار مجرد فترة وعدت خلاص. نبدأ نخطط لحياتنا الجديدة بعد ما طلعنا منها هلبا ناس، وتمر أيام وشهور وحنا مرتاحين في سلام. لكن فجأة يجي موقف يقلب كل شيء في حياتنا ويصحي هلبا مشاعر وأحاسيس بنظرة وحدة بس. نصر: سرح للحظة ومعرفش حتى يطلق السلام عليهم.

أما ريحانة فتجمدت في مكانها وهي تشوف لنصر. بعد كل هالشهور وكل الظروف اللي عاشتها معاه، متوقعتش أنها تشوفه فجأة. نجمة: الوووو تي وين سرحتي؟ ريحانه: فاقت على نفسها. أهلاً نجمة. وسلمت عليها سلام حار هلبا. نجمة: جايه لرباب؟ ريحانه: أي ليا أيام عليها، رغم إن آخر مرة جيتها رجلي انكسرت. نجمة: شهقت بصدمة. ألف سلامة عليك. ريحانه: شافت لأبوها. بابا خلاص تو تساعدني. سمير: به تمام يبارك فيك بنتي. صحيت. نجمة: الله يسلمك عمي ولو.

نصر: طلع بالسيارة كأنه هارب من شيء، ميبيش يرجعله بدون حتى ما يسلم على سمير. مش كل الناس تكون نيتها اتجاهنا حلوة، حتى لو شفنا منهم مجهود جبال. والطرف الثالث في العلاقات ديمة يكون خبثهم كبير وعميق لدرجة متقدرش تكشفهم إلا بصدفة يبعتها لك ربي. طق الباب بهدوء، بس ورا الهدوء هذا كانت فيه عاصفة. مودة: شنو نسيتي الغبية هذه؟ وفتحت الباب. نجم الدين: خش بهدوء بدون حتى ما يكلمها. مودة: ضحكت. حيّي مكنتش متوقعة توصل بسرعة هكي.

سكرت الباب وزبطت نفسها شوي على مراية المدخل وخشت وراهم. مودة: بابتسامة عريضة. شنو تحب تشرب؟ تفضل خيرك واقف! نجم الدين: شافلها من فوق لعند لوطه. على أساس مريضة؟ مودة: توترت. اءءء أه أي أنا كنت تعبانة شوية صح، بس خذيت فوار وهكي ومشت أموري. نجم الدين: بصوت هادي. علاش درتي هكي؟ مودة: تحاول إنها تخلي الابتسامة على وجها. كيف مفهمتش؟ تقصد إن خوفتك عليا؟ هههههههه والله ما كنت نقصد أنا م...

نجم الدين: طلع التلفون ووراها المكالمة اللي قاعدة مفتوحة ومدتها 45 دقيقة. هرب منها كل الكلام وتلاشت الضحكة اللي كانت على وجها. مودة: اءءء أنا مكنتش أنا نقصد إن... نجم الدين: ماسك يديه على شكل قبضة ويحاول يحافظ على أعصابه. علاش درتي هكي؟ مودة: طلع الوجه الثاني وبدت مواجهة الصراحة. قالت وهي منفعلة. لأن أنا اللي نستاهلك مش هي! نجم الدين: عيط عليها بصوت عالي. تي مين أنتِ أصلاً؟ مين أنتِ؟

أنا جاي نبيك تحسني لي حياتي مع مرتي، مررررررتي اللي نحبها ومش قادر على بعدها، تجي تخربيلي كل شيء؟ تضحكي عليا أنا؟ تضحكي عليا أنا باسم علم النفس والعفن اللي خليتيني نمشي وراه؟ خليتيني نهدم كل شيء بيني وبين مرتي. مودة: قاطعته وهي تبكي ولصقت فيه. نجم الدين أنا نحبك صدقني، أنا اللي نستاهلك ومقدرة كل شيء. صدقني مقدرة غيرتك ورجولتك اللي هي مش حاسة بيهم وتدير منهم مشاكل. نجم اسمعني الله يخليك.

نجم الدين: دفها من عليه بقوة. أقسم بالله ما زال نشوف رقمك في تاليفوني ولا تحاولي توصلي لي، ما تشوفي إلا كل شر مني. واحمدي ربك إن مدرتلك شيء لأن مقدر إنك بنت وربي كنهادا فرمتك. مودة: مشت وراه وهي تبكي وماسكة فيه لعند الباب تتوسل إنه يعطيها فرصة وتتأسف. بس هو كان يبعد فيها بطريقة واضحة إنه متقزز منه.

نزل لسيارته سكر الباب ومقدرش يحرك السيارة ولا يدير شيء بعد الشيء اللي عرفه. استرجع كل ذرياته في لحظة واحدة وكل موقف يفوت عليه يكتشف ويعرف قداش ظلم شيخه وهانها وضيع حبه في قلبها. بدى يخبط هستيرية وهو يقول. غبببببببببببببببببببببببببببببببببببببببببببببي غببببببببببببببببببببببببببببببببي غبي شن درت. أما مودة مستسلمتش وكملت يومها بكي وانهيار، لا!

لأن مش كل البنات تتخلى على الشيء اللي تبيه بالساهل، حتى لو كان الشيء اللي تبيه مش ليها. *** كل البديات حلوة. وبدأت بدايات قصة الحب المختلفة اللي الحب منها يجي بعد مواقف وأيام وعشرة وقت. حتى الكلام والغزل فيها يكون غير. ندى: هادي القهوة. تفضل. نذير: يبارك فيك. ندى: نزلت خدت سفرة الفطور اللي كانت عند نذير وجت خاشه. لكن نذير مسكها من يدها. ندى: شنو؟

نذير: هاتي السفره جاي. خداها منها ورجعها على الطاولة. تعالي جاي قعمزي نبيك شوي. ندى: قعدت باستغراب. شنو فيه؟ نذير: جبت لك حاجة. ندى: ضحكت. والله؟ حلوة ولا شوكولاتة؟ نذير: أنتِ كبرتي خلاص على الحاجات هذه. جبت لك حاجة متاع كبار. ندى: تشوقت. نذير: شنو بتعطيني مقابلة؟ ندى: ربعت يديها. نذيييييير بلا جو هيا. معش قادرة نصبر. وقف وطلع شيء من جيبه ودرقه ورا ظهره. ندى: وقفت قدامه. هيااا هات نشوف. نذير: أغريني بمقابل نعطيك هي.

ندى: نذيييييير بلا دراه هيا. نذير: قعد يضحك وهو يقيّم في الهدية اللي جايبها وهي تحاول توصلها بدون فايدة. لين حط الهدية ورا راسه فجأة وقربت ندى بعفوية وخطف منها بوسة سريعة. ندى: فزعت من اللي صار ووخرت وهي حاطة يديها الزوز على فمها. خززززي عليك. نذير تحشم الدنيا زحمة كان حد شافك. نذير: مرتي شن اللي درته أنا! الباين إنك متبيش هديتك هي. خلي نمشي. ندى: لا عاااااد وريني.

نذير: غمزلها بخبث. شن رايك نركبوا لي حوشنا نعطيهولك فوق؟ ندى: بلا هباااال عاد هيا شردت. نذير: ضحك عليها. خلاص هاك. ندى: شهقت بصدمة وهي ماسكة الهدية وقامت عيونها في نذير. تبصر؟ هذا ليا؟ نذير: تستاهل. ندى: معنديش معنديش ويوم تجيب لي تجيب لي 14 مرة وحدة. نذير: مش خسارة فيك. حطيت لك فيه شفرتك ونضمت لك الأمور فيه. ندى: نذير بجديات صحيت وربي. نذير: بنظرات خبث. تعالي اشكريني فوق. ندى: ضحكت. تحششممممممم مبردك.

نبيلة: نذيييييير نذير. نذير: في لحظة تحول من شخص هايم في الحب ونظراته ذابلة وهايمة فيها. لواحد واقف بعيد على مرته ونظراته كلها جدية. لين ندى انصدمت. نذير: ها يا أمي؟ نبيلة: سلم ولدي نقصت علينا المكرونة للغدي جيبلنا بالله وقت. نذير: إن شاء الله حاضر. شاف لندى. تحركي البسي عبايتك بري معايا. ندى: عقدت حواجبها باستغراب. علاش؟ نذير: غير امشي البسي تو. نبيلة: هيا يا ندى سرعي روحك سلم بنتي امشي معاه وقت. ندى: تمام عمتي هي.

نذير: ابتسم لها من تحت لتحت بنصر. نجمة: تي شنو مسكر عليك الحقير كيف هكي؟ رباب: من ورا الباب. نجمة امشوا من هنايا قبل ما يجي. خليه تو نعرف كيف نتعامل معاه. ريحانه: تي كيف بنروحوا ونخلوك هكي؟ امتى مروح هو؟ رباب: مش عارف. عليه جاب لي بضاعة وقالي إنه بيختفي أيام. نجمة: تو ندير حل. رباب: مديري شيء يا نجمة. مديري شيء خلاص امشوا من هنايا. يصير خير تو ندبر أموري معاه. روحوا تو.

نجمة: أشارت بعيونها لريحانة بمعنى. خليك تو نجيك. وركبت نجمة لبيت خالتها. طقت الباب أكثر من مرة ولما قريب تفقد الأمل فتح الباب. يزن: يحك في عيونه. شنو أديري هنايا؟ نجمة: جيت نبي نشوف رباب. يزن: اها به خش. نقصد عني إن اسمعي كنت راقد أنا مش فاهم شيء. نجمة: قاطعته. نبي منك خدمة ضروري يزن. يزن: عقد حواجبه باستغراب. شنو تبي! شنو صاير؟ أنتِ أصلاً من جابك هنايا؟ نجمة: جابني نصري. يزن: نصررررررر؟ من قال لك بري معاه؟

شنو تتصرفي من راسك؟ نجمة: اسمع مش وقتها الدوا هيا كلها. توا تعالا معاي. ومسكته من يده نزلتها. ريحانه: غطت وجهها بسرعة أول ما شافت يزن. نجمة: رباب تسكر عليها الباب باهي ومعش يفتح من داخل. دير حل فك القفل ولا أي حاجة. رباب: استغربت من ورا الباب بسبب الكذبة! يزن: تنهد. يا أختي حاولي تفتحيه من الداخل. رباب: اخت؟ الباب سكرته بالمفتاح والمفتاح راح. يزن: شاف لنجمة. راكب شوي ونجي. خلي نجيب العدة. نجمة: به.

ريحانه: نزلت وقفت على طرف الدرج تراقب في المدخل خايفة طه يخش في أي لحظة. وبدي يزن يحاول يفك القفل بدون ما يكسر الباب وبعدين يرجع يركبه. *** نجم الدين: نزل من شقته يجري. خش لي بيت بوه يدور زي المجنون على أكثر إنسانة يحبها وغلط في حقها ودمر لها نفسيتها وكسر لها قلبها. جت عينه عليها وكانت مقعدة جنب كفاح ترضع في ولدها. كفاح: لبست بسرعة حجابها. شيخة: مستغربة من دخلته عليهم. خيرك شنو فيه؟

نجم الدين: نبيك نبيك شوي تعالي للحوش. شيخة: حتى أنا نبيك في موضوع غير توا. منقدرش نطلع الضيوف عند بوك. خلي لين نضيفوهم قبل. نجم الدين: تمام متعطليش نبيك ضروري. شيخة: به. نجم الدين: رجع لشقته مسيب بوه وضيوفه وكل المواضيع. وكان تركيزه على شيخة بس.

أما في مربوعة فتحي كانت الأجواء ناااار. من جهة طه كان يحلف بأيمانات الله إن الولد مش ولده. ومن جهة كان داوود وخاله قالبين الدنيا ومتأكدين إن طه كان متزوج تقوى بالسروطة. من جهة يحلف إن تقوى كانت تخدم في طريق الحرام وإن رقد معاها ليلة وحدة في تونس وعطاها حقها ومصارش بينهم أي ورق زواج مهما كان رسمي ولا عرفي. والعياط والسبان كان واصل لآخر الدنيا بين الطرفين. في النهاية اتفقوا الاثنين إن فحص الأبوة (DNA)

قادر إنه ينهي كل ها الخلافات. وبعد يدير الله ألف طريق ورح يلاقوا حل يرضي الطرفين. *** كريمة: سألت بابتسامة مغطية وجها. شنو رايك في نجمة؟ نبيلة: جاوبت بعدم فهم محتوى السؤال بالضبط. الله يبارك عليها والله طول العرس يد بيد مع العوالة تعرفي مبطلتش بكاء. كريمة: مش هكي قصدي. نبيلة: عقدت حواجبها باستغراب. شنو مفهمتش؟ كريمة: نقصد إن زي ما تعرفي أدهم فسخ خطبته الأسبوعين اللي فاتوا. وهو واتي من كل شيء. نبيلة: أي!

كريمة: فكرت نخطبها له. ياريت تعرفي نتهنى عليها وعليه. نبيلة: غريبة والله توقعت تقولي يزن. كريمة: تنهدت بملل. يزن مطول معنداش إلا ها الاستراحة. مداير باله عليها. يزرع فيها صبح وليلي. يا ريته مداير راي لروحه. كل ما نقوله هيا سلم ولدي خود شقة ابني دير أي شيء مدام الفلوس موجودة. شي شي مسكر راسه. فقلت نسقد أدهم قبل. أنا قاعدة ما عرضتش عليه الموضوع لكن الأيام اللي فاتوا يشكر فيه.

نبيلة: توكلي على الله وربي يكتب اللي فيه الخير. كريمة: ياااارب ربي يسمع منك والله ياريت نجيب كنة تساعدني شوي وتكون معايا. نبيلة: عيني خير وإن شاء الله ربي يسخر الحال. كريمة: يارب! نجمة: ماهو مش حل هكي تقعدي تحت رحمته. نوضي تحركي لشقتي والله معاد قاعدة هنايا! ريحانه: أي والله كلامها صح. وكان تبي تباعدي روحي معاي خير. اقعدي عندي حتى شهر وربي ماما تفرح بيك لين خلاص صدقيني!

رباب: بنات أنتم مش فاهمين. أنا نبي نكسبه قبل بعدددين نهرب. ما نبيش نهرب منه طول. ريحانه: هاك هذا مفتاح الشقة متاعي. امتى ما تحسي روحك فديتي اطلعي وخلي له الدنيا. ريحانه: ضحكت. هههههههههههههه. رباب: اخخخخ راسي بيتفجر أنا. خلي أنوض ندير قهوة ع السريع. ريحانه: اسمعي خلي نروحوا بالك يجي توا! رباب: تتكلم من المطبخ. صدقيني لا يبي قريب 4 ولا 5 أيام ومرات حتى أسبوع. نجمة: كرهتتتتته ياربي قداش مستفز وحقير.

رباب: ضحكت من بعيد. وربي ليا أيام مضحكتش هي. نجمة: خلي نطلع نشكر يزن ونجيكم. مسكين فتح الباب خشينا طول. ريحانه: 😂😂😂 خلي أنحي الملاية حاسة روحي مطبوخة تحتها. *** الساعة 8 في الليل. ندى: طلعت من الدوش ورمت نفسها على السرير بارتخاء. سكرت عيونها وهي مبتسمة مذكرة كل تفاصيل طلعة اليوم مع نذير. حركاته الرومانسية اللي تجنن في السيارة. ومشية البحر اللي جت فجأة وكانت أحلى طلعة بالنسبة ليها.

فتحت عيونها ومسكت تلفونها الجديد. خشت على الرسايل واتصلت بالرقم اللي بعتهولها نذير. ردت صاحبة الرقم وكان صوتها يرجف. هديل: ندى باهي اللي اتصلتي. ندى: شنو فيه خيرك! هديل: خليك دقيقة نطلع للصالة. ندى: تمام. ناضت ندى وقفت وهي متوترة. هديل: ندى ندى تسمعي فيا؟ ندى: نسمع فيييك. ادوي طيحتي لي قلبي. راجلك فيه شيء ولا شنو صاير خيرك! هديل: بلعت ريقها. فيه شخص يهدد فيا يا ندى بنموت. اليوم بيكلم راجلي.

ندى: سكتت وهي تشوف للظرف اللي في يدها. هديل: ندى الله يخليك ديري لي شيء بالله عليك بنهبل وربي. راجلي لما يطلقني. ندى: اسمعيني. أصلاً متصلة بيك على الشي هذا. اليوم حفلتك في حد بعت صور ليك أنتِ وولد و... هديل: انهارت بكي وتخبييييط على وجها. وربي يا ندى قديم الموضوع. أقسم بالله قديم. حسبي الله فيه. ياربي كيف ندير. لمن عطهم الصور؟ ندى: طاحوا في يدي أنا الحمد الله. فهميني هو شنو يبي منك؟

هديل: ميبيش شيء. يبي يخرب لي حياتي بس. لأن رجعلي وقتها مخطوبة وطلب مني نفسخ على خاطره. المشكلة سنة كاملة ما حكيناش مع بعض. ندى: بإذن الله يصير خير. والله ما عارفة شنو نقول لك أنا راعشة من أمس وربي مفهمتش كيف نتصرف. هديل: مسكت أعصابها ودموعها. هي حبيبي دقيقة ندوش أنا. وتسكر الخط. قعمزت ندى وهي تفكر. مسكت تلفونها وتشوف للرقم المكتوب خلف صورة من الصور. فكرت وفكرت وفكرت ألف مرة وكانت جداً حائرة. ***

درست السيارة قدام حوش عثمان. نجمة: حسيتك زي اللي تفركست مبكري لما شفت ريحانة صح؟ نصر: شنو تدوي أنتِ غبية لا طبعاً. نجمة: قول الحق عادي. راهم وليه تهبل ريحانة عموماً بجد متغيره هلبا. نصر: انزلي سلم بنتي بلا هبال انزل. نجمة: علاش به مترجعوش؟ شفتها كيف قعدت سارحة فيك مسكينة! نصر: مفيش حب بينا لا شيء يا بنتي افهمي خلاص. غلطة غلطناها وصلتنا للجواز وكل حد مشي على روحه. طبيعي لما نشوفها بنضايق.

نجمة: بس نظرتك ليها مكانتش ضيق! نصر: إيه علينا عاد بديتي تقري في النظرات توا خلاص. نجمة: به لو... كريمة: نجمممة جيتي أخيراً. نجمة: خدت شنطتها ونزلت من السيارة. كريمة: شنو حال رباب؟ نجمة: كويسة الحمد لله. لقيتها واخدة بردة خفيفة لكن مشت أمورها. كريمة: به كويس. تعشيتي؟ نجمة: لا والله. بدير عشي قلنالها ارتاحي. ميتة جوع تو نخش ندير ساندوتش. كريمة: ضحكت. لالا سلم بنتي خليت لك حصتك من العشي. خشي غيري حوايجك وتعالي.

نجمة: ابتسمت. يا ودي سلمها ليا الحنونة أنا. وبوستها. شرين التلفون واستأذنت شوية من خالتها. كريمة: خشت للحوش. ونصر ناشبها شوية وركب لشقته. نجمة: أيوا؟ المنذوب: أختي أنا وصلت للحوش اللي وصفتيه لي. نجمة: من أنت؟ المنذوب: أنا متع الطلبية اللي كلمتك الضهر. نجمة: معليش ممكن نفهم الطلبية شنو بالضبط؟ لأن أنا مش طالبة شيء ومعنديش حد يبعت لي. المنذوب: صاحب الطلبية اسمه أدهم تقريباً. نجمة: أدهم! لا أسفة منقدرش نقبل الطرد هذا.

المنذوب: أختي بالله عليك. أنا نخدم على راسب. متسببيليش مشكلة. أنتِ الصبح وافقتي اطلعي خدي طلبيتك وبعدين لو تبي تريحيها أنتِ حرة. نجمة: تنهدت بتوتر. اوكي طالعة. طلعت نجمة من الحوش وكانت فيه شاحنة بيضا صغيرة تراجي فيها. قربت بدون أي شك من شيء لأن فعلاً واضحة السيارة متع خدمة. بس أول ما مدت يدها بتاخد الطرد سحبوها للشاحنة بدون ما يخلوا أي أثر ليها. *** حمزة: خيرك؟ هديل: شيء حبيبي خيرني! ولفت وجها تحاول تخفي ملامحها.

حمزة: اشبحي لي هنايا ليش وجهك هكي؟ كنتي تبكي ولا شنو؟ فهميني. هديل: مقدرتش تمسك دموعها وبكت قدامه. حمزة كان مصدوم وخايف عليها بشكل كبير. حمزة: نكلممم فيك من ضايقك ولا زعلك؟ هديل ردي عليا ادوي. هديل: ما في حد ضايقني بس استاحشت ماما. منعرفش كيف بنعيش بدونها هنايا بتقعد بروحها.

حمزة: وعلامات الراحة على وجهه. يا عمري أنتِ. أمك معاها بنتك خالتك ومرت أخوك يعني مش بروحها. وأنتِ خلاص بتفتحي عيلة بروحك توا شوي شوي تتعودي على الوضع. هديل: مسحت دموعها واشرت راسها بمعنى اوكي. حمزة: باسك على راسها بحب. وهديل كان في بركان داخلها. نذير: ندددى وينك؟ ندى: حبيبي أنا في الحمام نلبس. شوي وطالعة. نذير: قعد على السرير بتعب. اطلعي ديري لي شيء ناكله تربحي بنموت جوع.

بعد دقايق من رقاده على السرير سمع مسج وصل. شاف يمينه كان المسج لندى. ضحك وهو يقول. نذير: مسرع بدوا يوصلوا لك حتى رسايل أنتِ! لكن محتوى الرسالة كان صدمة ليه. (اسمعي بعد ما فكرت في الموضوع رح أعطيك فرصة عشان صوتك العسل هذا. امتى ما تفضي كلميني.) *** صوت الباب انفتح وكان بالنسبة لنجم الدين هذا أحلى صوت يسمعه بعد طول انتظار. شيخة: السلام عليكم. نجم الدين: بلهفة. تعالي نبيك.

شيخة: ابتسمت. عارفة على شنو بتحكي. دقيقة نحط متين في غرفته منبيشي ينوض. نجم الدين: مهتمش لكلامها وقال. تمام. شيخة: حطت ولدها في سريره وسكرت عليه الباب. ورجعت لنجم الدين. نجم الدين: شوفي الأيام اللي فاتوا كلها أنا... شيخة: قاطعته. كنت تحب وتتمعشق مع وحدة اسمها مودة. هذا باش ما في شيء عاجبك فيا. لا اهتمامي بيك ولا أكلي ولا لبسي ولا شيء. نجم الدين: كأن حد كب عليه مية سخونة. كيف!!

شيخة: كانت عيونها دموع بس الابتسامة مرسومة على وجهها. مش مهم كيف عرفت المهم فهمت وخلاص. يا ريتك جيت قلت لي بس بدون ما تجرحني وتكسرني عشان أبعد عنك وتعيش حالة الحب اللي أنت فيها براحتك. طول فترة بكاي الفترة اللي فاتت مش عشانك كانت لسبب ثاني بكاء. والحمد لله اليوم عرفت إنك عايش قصة حب وعندك إنسانة في حياتك. على الأقل تعبي الفراغ اللي رح أخليه وتكون أم كويسة لولدي. أكيد رح تكون كويسة مدامها دكتورة.

نجم الدين: بصدمة. أم كويسة! شنو تحكي أنتِ؟ شيخة: فتحت الورقة اللي كانت بين يديها ومدتهاله. نجم أنا مريضة. والباين إن مش رح أكمل حياتي معاك. احمد ربك إنك رح تعيش معاها في سعادة.