رواية متيم بك الفصل الأول 1 - بقلم فرح وائل

الحقنا يا دكتور البنت اللي جايه جديده عماله تصرخ وتقول انا مش مجنونه وحاجات غريبه كده. = اديها جلسه كهربا. _مش هقدر عليها لوحدي يا دكتور وياسر وممدوح اجازه. = طيب ماشي هخلص اللي في ايدي وجاي. قمت مع نعمات أشوف البت اللي عاملة دوشة دي. = واديها جلستين كهربا يمكن تتخمد يومين ولا حاجة ونرتاح. ~ أنا مش مجنونة. ابعدي عني لو سمحتي وبلاش المعاملة دي عشان أنا عاقلة ومش مجنونة.

= احم. طيب ممكن تهدي وتفهمني انتي مش مجنونة إزاي. ~ انت الدكتور!! = أيوا. ~ يا دكتور أقسم بالله أنا مش مجنونة أنا عاقلة والله. اسألني في أي حاجة هتلاقيني عاقلة. بذمتك دا منظر واحدة مجنونة!! بصيت لشكلها. كان شعرها قصير كيرلي ومنكوش. ولابسة المريلة بتاعة المجانين وبتعيط. = يا آنسة الجنان ملهوش علاقة بالشكل. دا خلل في الأعصاب وممكن يكون نتيجة صدمة واحدة أو عدة صدمات متتالية. شافها بتبصله وساكتة. راح ضحك بسخرية وقال.

= وأنا بشرحلك زي الأبلة على أساس إنك هتفهمني أصلاً. ~ أنا فهماك على فكرة. أنا أصلاً كلية إعلام. = عادي جداً. في ناس بتبقى دكاترة ومهندسين وعلماء وناس مرموقة في البلد وتبقى مجنونة بعد كدة عادي. ~ انت بني آدم مستفز على فكرة. = ليس على المجنون حرج. ~ أنا مش زفتت مجنونة بس بقا. = نعمات. حضري الكهربا. وكنت لسه بقرب منها عشان أربطها. لقيتها انهارت وقعدت في الأرض وهي بتعيط وحاطة إيديها على وشها وحالتها كانت مزرية جداً.

~ أنا مش مجنونة والله. ومش عارفة أنا جيت هنا إزاي. أنا صحيت لقيت نفسي هنا. عشان خاطري خرجني من هنا. صعبت عليا أوي وهي بتعيط كده ومش عارف ليه إحساسي بيقولي إن أصدقها. مع إني قابلت ناس زيها كده كتير وكلهم بيطلعوا مجانين فعلاً في الآخر. بس ليه لا نجرب مش هخسر حاجة. طلبت من نعمات تقعدها على السرير وتجيب لها حاجة تشربها عشان تهدى. وقعدت جنبها. = أنا مش عايز أضايقك والله بس كل اللي هنا عملوا زيك كده في الأول. ~ ممكن تخرس.

= أفندم!! ~ بقولك ممكن تخرس. لأني مش طايقاك بجد. قالت كده وهي لسه بتعيط وأنا قعدت دقيقة أستوعب هي قالت كده بالسهولة دي إزاي. = ما شاء الله يعني مجنونة وقليلة تربية كمان. أي الهنا ده. ~ اهو انت اللي مجنون وابن مجنونة. = على فكرة كلمة كمان وهنسى إني دكتور وإنك مريضة وهتزعلي. ف ياريت نحترم بعض شوية.

~ هو انت أصلاً دكتور. دا انت آخرك محصل نور. وقال حضريلي الكهربا حضريلي الكهربا اللهي تتمسك بسلك عريان يجيب أجلك. قول إن شاء الله. أتصدمت من جرأتها معايا في الكلام وبالسرعة دي. مع إني ممكن أقوم أكهربها فعلاً عادي. ف ابتسمت على شكلها المتعصب وقولت بهدوء. = إن شاء الله انتي. وكانت لسه هتتكلم بس دخلت نعمات بعصير ليمون. ف بصتلها وسكتت. وأنا أخدت العصير من نعمات وطلبت منها تمشي. = اتفضلي اطفحي. ~ مش عايزة منك حاجة. = ليه!

~ ممكن تكون حاططلي سم فيه عشان تخلص مني. = أحطلك سم ليه هو أنا جوز أمك. أنا أول مرة أشوفك أصلاً. ~ مليش دعوة مش هشرب. اشرب منه انت الأول. = بس بس أنا عرفت انتي عندك إيه. انتي مريضة وسواس قهري يبت صح!! ~ يعم أنا مش مريضة اللهي تمرض. ومش هطفح حاجة. = عشان تهدي. ~ ما أنا هاااادية أهو انت شايفني مجنونة.

= لا خالص يعني قاعدة في مستشفى المجانين ولابسة مريلة مجانين وقاعدة مع دكتور مجانين. كل دا مش مبرر إني أشوفك مجنونة خالص. ~ بُص انت عندك حق. بس والله صدقني أنا مش مجنونة. أرجوك ثق فيا شوية. = أثق فيكي إيه. إذا كانت انتي مش واثقة فيا وفكراني حاططلك حاجة في العصير. ~ يعم اشرب أم العصير اللي محيرك دا. بس هتصدقني صح!! = خدي اشربي.

أخدت العصير مني وبدأت تشربه واحدة واحدة في صمت. وأنا بصصلها وبفكر. هو أنا ليه بستاهبل كده يعني. ممكن أقوم وأسيبها عادي. ليه يعني قاعدة جنبها ومستحملة كلامها السم ده. يمكن فضول لأن شخصيتها غريبة ومثيرة للفضول مش أكتر. المهم إني قطعت الصمت ده وسألتها. = ها اسمك إيه بقا. ~ شهد. = اسم مش على مسمى خالص للأسف. ~ وانت على كده اسمك إيه يا توم كروز. = تيم. ~ اسمك حلو أوي. سكت حبة مش عارف أرد أقول إيه. هو أنا كسفت.!!

أكيد لا يعني هي مش أول بنت تقولي كده بس هي قالتها بطريقة تلخبط بجد. = شكراً. ~ أي دا انت كسفت ولا إيه. قالتها وهي بتضحكلي وبعدين كملت شرب للعصير عادي. وأنا ابتسمت كده وقولتلها. = لا بس توقعتك هتشتميني زي ما شتمتك. ~ أي شغل الحضانة ده. ما انت اسمك حلو فعلاً هكدب لي. = على فكرة وانتي كمان اسمك حلو بس أنا كنت بزاولك. ~ ما أنا عارفة. = عارفة إني بزاولك؟؟ ~ لا عارفة إن اسمي حلو.

= بت أنا عرفت انتي عندك إيه. انتي نرجسية. دا مرض نفسي وخطر جداً. ~ يعم انت عايز تلبسني أي تهمة وخلاص. ما تريح دماغك مني. = يعم!! دا إيه الرحرحة اللي انتي بتتكلمي بيها دي. أنا دكتورك. ~ دكتور كفتة. حسيت إني زودتها معاها وأديتها حجم أكبر من حجمها. أنا مينفعش أخليها تكلمني بالأسلوب ده. دي مهما كانت مجنونة. ومش معنى إني اديتها فرصة يبقى ناخد على بعض بالسرعة دي. ف وقفت بسرعة ومثلت الصرامة وقولتلها.

= لا مش معنى إني عاملتك كويس تنسي إن أنا دكتور وإنك مريضة. وإن كنت اخدت معاكي في الكلام ف عشان انتي مريضة وزيك زي أي حد هنا لازم أسمعه لأن دي شغلتى. لكن هتطولي لسانك عليا مش هسكتلك. ~ أنا آسفة والله أنا مكنتش أعرف إنك هتتضايق. أنا كنت بهزر معاك. = وتهزري معايا بتاع إيه إن شاء الله. ~ ما قولت خلاص مكنش قصدي. متزعلش. = لا أزعل. عشان دا مش أسلوب بين دكت. ~ خلاص اتفلق. = !!!! ~ أنا هروح بيتي إمتى.

= مش هتروحي لحد ما أشوف ورقك وأعرف انتي جايه مع مين وإزاي. ~ هتعرف إمتى. = براحتي بقا. بكرة بعده الأسبوع الجاي الشهر اللي بعده والله ع حسب ما أفضي. ~ طب اطلع بره بقا عشان هنام. ولا انت هتفضل واقف كده. بصتلها شوية وبعد كده ابتسمت ودخلت على مكتبي. ولحظي الحلو إن النهاردة عندي شيفت مسائي وهبات هنا في المستشفى. ف قولت فرصة إني أطلب ورقها وأشوفها جت هنا إزاي.

والمفاجأة إني أتصدمت لما شفت ورقها ومكنتش متوقع إزاي يحصل كده. وكنت مستني الصبح يطلع عشان أعرف منها كل حاجة. وع الساعة 2 كده لقيت الباب بيخبط. = ادخل. ~ تيم. = أي يا شهد في إيراد بعصبية. ~ انت شوف حل في المجانين بتوعك دول أنا مش عارفة أنام. يا أما تسكتهم يا أما توديني حتة تانية عشان زهقت.