رواية نجمة في الصعيد الفصل التاسع عشر 19 - بقلم ملك نصر الله

حمزه قرب منها وحضنها غصب عنها. راحت هي عيطت. "ابعد عني، انا مش طايقاك يا حمزه." حمزه بهدوء: "مش طيقاني مش طايقاني، بس مش هسيبك." "بطل تمثيل، انا اتخنقت من كذبك و تمثيلك." حمزه بصدق: "طب واللهِ العظيم ما بكذب ولا في بيني وبين ميرنا حاجه، دي اختي الصغيرة." نجمه بطلت عياط لما استشعرت نبرة الصدق اللي بيتكلم بيها وقعدت على طرف السرير بارهاق وقالت بصوت متقطع: "طب ليه طريقتك معاها الفترة اللي فاتت؟

حمزه حط أيده على رأسه من ورا وقعد يلعب في شعره وبص في الأرض. "قول بقا ولا بتدور على كذبة جديدة؟ حمزه ضحك: "انتي على فكرة ظالماني." "ليك نفس تضحك." حمزه بهدوء: "هحكيلك كل حاجة، انا بس كنت... حمزه سكت بتوتر. "سكت ليه؟ حمزه بتوتر: "نجمه انا بحبك." نجمه ضحكت بتعب: "يا سلام، لا بجد انا كده اقتنعت انك مفكرني غبية." حمزه بصلها بضيق.

"انتي كده فعلا غبية، بقولك بحبك، انا اصلا عملت كده علشان اتنيلت حبيتك، يعني اتفقت مع ميرنا نمثل إننا إلى حد ما بنحب بعض، ودا يخليكي حتى تلمحي إنك بتحبيني واخد خطوة وأعترفلك، بس الموضوع كله جه بنتيجة عكسية، بس واللهِ بحبك ومحبتش غيرك ولا هحب غيرك، حبيتك قبل جوازنا أصلاً." نجمه بصت في عيونه علشان تشوف بيصدق ولا بيكذب عليها. "يعني لما تبصي في عيني هتعرفي بكذب ولا لأ؟ "اه اسكت انت، وبعدين انت واقع من زمان."

حمزه ضحك بتوتر: "طب وعرفتي؟ نجمه مش ردت. "طب عرفتي امتى إني بحبك؟ نجمه ابتسمت: "لما عينك بعتت سلام." حمزه بخبث: "وعرفتي امتى إنك بتحبيني؟ نجمه كملت: "لما قلبي بقا يستنى سلام من عينك." حمزه بصراخ: "يعني بتحبيني أهوه." نجمه أخدت بالها هي قالت إيه. نجمه اتوترت: "يخربيتك في إيه؟ حمزه حضنها: "لما بتحبيني سايباني كل دا ليه؟ نجمه بخبث: "لا دا أحب إخوات مش اللي في بالك." حمزه بعد وبصلها: "بتتكلمي جد؟

نجمه بغيظ: "اه، دانا هطلع عينك يا حمزه على اللي عملته فيا." حمزه ضحك: "قلبك أسود." "مش أسود منك." حمزه قرب منها وقال بحنية: "حقك علي قلبي." نجمه بصتله بتوتر: "حمزه انت بجد بتحبني؟ حمزه بصدق: "وواللهِ ما حبيت غيرك." نجمه بهدوء: "طب والطلاق؟ حمزه ضحك: "لا طلاق إيه بقا، عوض الله عليكي، هتكملي حياتك معايا." نجمه ضحكت: "وواثق كده ليه؟ حمزه ابتسم بتوتر: "علشان انتي بتحبيني زي ما بحبك واللي بيحب حد مش بيبعد عنه."

نجمه بخبث: "عارف باباك كان عايزني ليه؟ "ليه؟ "علشان قالي لو مش متوافقة مع حمزه وعايزة تطلقي أنا أطلقك منه." حمزه بهدوء: "و انتي قولتي إيه؟ نجمه ببساطة: "وافقت." حمزه بزعيق: "نعم يا أختي؟ نجمه خافت من صوته: "صوتك صوتك، واللي سمعته هو اللي حصل." حمزه حاول يهدي نفسه: "وافقتي بجد يا نجمه؟ "اه هو الموضوع دا فيه هزار؟ "يعني عايزانا نطلق؟ نجمه بخبث: "اه ومتخافش انا مش هطلع شكلك وحش قدام حد انا هقول محصلش نصيب وخلاص."

حمزه بحده: "طب طلاق مش هطلق، ارتاحي بقا." نجمه بخبث دخلت المطبخ وهي بتقول: "هخلعك." حمزه بصلها بغيظ: "انتي مش كنتي مش قادرة تمشي من شوية؟ نجمه بكيد: "مانا دورت كلام باباك في دماغي ولقيتني حسيت براحة غريبة كده بعد ما فكرت في حوار الطلاق ده." حمزه تغاضى عن كلامها هو عارف أنها بتحبه وبتقول كلام تطلع بيه غيظها وخلاص. "انتي بتعُكي إيه كده؟ "بعُك؟! مش هدوقك بعد ما أخلص." "لا هدوق هشوف." نجمه بصتله بغيظ وهو قعد على

الرخامة بتاعت المطبخ وغنى: "وعرفت قيمتك لما بعدت ورجعت بعد فراق، جربت أعيش من غير هواك وادي النهاية، خليك معايا، خليك معايا يا حبيبي مهما كان، خليك معايا، خليك معايا يا حلم عمري اللي في خيالي من زمان." نجمه ابتسمت بخفوت. حمزه ابتسم: "ضحكت يبقى قلبها مال." "لا لسه مش مال." حمزه ضحك: "لا مال." نجمه بصتله بغيظ. "انتي بتعُكي إيه بجد." نجمه بخفوت: "هقولك بعُك آيس كوفي." "اعمليلي معايا." "مانا بعملك علشان هنتفرج فيلم."

حمزه ابتسم بحب: "صالحتيني؟ نجمه بزعل: "لا لسه واخده على خاطري منك، بس هنقعد علشان بقالنا كتير مش قعدنا سوا." حمزه هز رأسه بزعل وخرج قعد مكانهم على الكنبة. نجمه جابت الآيس كوفي وقعدت جنبه راح شدها في حضنه. حمزه بهمس: "مكانك في حضني، مهما اتخاصمنا متبعديش عني." نجمه بصتله بتوتر: "والمفروض أنا أضعف بقا وكده؟ حمزه ابتسم: "تقريباً." حمزه باس راسها بحنية. سكتوا بعدين نجمه قالت: "كان واحشني الكلام معاك."

حمزه ابتسم بهدوء: "وانتي كلك على بعضك كنتي وحشاني... والاحضان دي بقا أكتر حاجة كانت واحشاني." "سافل سافل مفيش كلام." حمزه ضحك وهي ابتسمت، وسكتوا تاني. حمزه همسلها: "بحبك، وعارف إنك بتحبيني بس بتكابري." نجمه ابتسمت: "إيه مخليك واثق كده؟ "عيونك."