رواية و للنصيب رأي أخر الجزء الثاني الفصل الثلاثون 30 - بقلم لوليتا محمد

ندي بلعت ريقها بتوتر وقالت بابتسامة هادية: بص بقا يا بوس... معايا تذكرتين لحفلة عربية. وائل ونهي بصوا لها باهتمام. لحظات ووائل سألها بهدوء: حفلة إيه دي يا ندي؟ ندي قالت لوائل إنها راحت مع أصحابها لمكان الجاليات العربية، وكان في ناس بتوزع تذاكر حفلة مجانًا وهي معرفتش تاخد أكتر من تذكرتين بس ليها.

ندي مرضيتش تقول لهم إن يوسف هو اللي كان معاها ولا اللي حصل هناك. هي حبت تحتفظ بده لنفسها وكمان عشان وائل ما يحسش إنها ويوسف على طول بيخرجوا مع بعض وفي تواصل بينهم. والأهم من ده كله، إن مفروض إن ندي ما تعرفش إن يوسف رجع من السفر. وائل ربع إيده وباستفسار: والمطلوب؟ ندي بابتسامة: تيجي معايا. نهي سكتت وبتسمعلهم بهدوء. ووائل بهدوء: امممم.... أجي معاكي؟ ندي برجاء: آه يا بابي... أنا بجد نفسي أحضر حاجة زي دي. ندي

ونبرة صوتها اتغيرت لحزن: أنا عمري ما حضرت حفلة وأنا في مصر. نهي بصت لها بحزن ووائل كمان. وندي بتكمل كلامها: عارفة يا بابي إنك كنت خايف عليا أنت ومامي، وأنا والله كنت راضية ومش زعلانة، وكان ليك حق. بس المرة دي بجد مش هيبقى في خوف. نهي بجدية: يعني إحنا كنا رافضين وإحنا في مصر عايزيننا نوافق وإحنا في أمريكا؟ ده كلام يا ندي؟ ندي برجاء: يا مامي حاولي تفهميني...

الوحش موجود في كل مكان في العالم مش في مصر بس. كل اللي أقصدة إن الحفلة دي مش هتبقى في استاد أو ديسكو، ده زي مطعم وهيبقى فيه فرقة بتغني وبتعزف مش رقص أو شرب. ندي بصت لوائل: وعشان كده يا بابي أنا طلبت منك إنك تيجي معايا وتشوف بنفسك المكان والوضع يعني مش هروح لوحدي. نهي سكتت لما لقت حجة ندي المرة دي أقوى من حجتها. ووائل بابتسامة هادية: طيب ومامي... هنسيبها لوحدها يا ندي؟

يعني أنا وأنتي سايبنها طول النهار عشان الشغل ودراستك، وهي قاعدة لوحدها في البيت. نسيبها ونخرج؟ نهي ابتسمت بهدوء على إحساس وائل بيها فقالت بابتسامة هادية وحب: مجتش من يوم يا حبيبي... اخرجوا واتبسطوا. وائل بحب: بصراحة يا نهى قلبي مش مطاوعني أسيبك لوحدك. نهي ابتسمت أوي وفرحت من كلام وائل. وندي قالت لوائل بزعل مصطنع: طب وأنا؟ الحل إيه بقا دلوقتي؟ وائل بص لبعيد وهو بيقولها بحيرة: مش عارف والله يا ندي.

كلهم سكتوا وبيفكروا وندي مش عايزة تجيب سيرة يوسف عشان ما يعرفهمش إنها عارفة إنه رجع واتقابلوا من وراهم. لحظات ونهي قالت بهدوء: يوسف لو كان هنا... كان ممكن يروح معاها. ندي ابتسمت بمكر إن سيرته جت عن طريق حد تاني غيرها. ووائل بتلقائية: يوسف جه من نيويورك النهارده. نهي بصت لندي بابتسامة هادية. وندي بسرعة وبحماس: طيب كلمه يا بابي وخليه ييجي معايا؟ وائل بسرعة:

يا ندي بقولك هو لسه راجع النهارده. يعني أكيد هيبقى عايز ينام ويرتاح. عايزاني أكلمه وأقوله خد بنتي خرجها وفسحها... ده كلام برده؟ نهي سكتت لأن كلام جوزها صح ومنطقي. وندي بصت لها بصعوبة يعني قولي حاجة... بس نهي فعلًا مكنش عندها كلام تقوله. ندي لما لقت نهي سكتت، بصت لأبوها وهي بتقوله برجاء: بص يا بابي... ممكن حضرتك تجرب وتكلمه وتطلب منه إنه ييجي معايا عشان مبقاش لوحدي لأنك عندك ظروف ومش هتعرف تيجي معايا.

وائل بص لنهي اللي هي كمان بصتله وقالت له بهدوء: إيه رأيك يا وائل؟ وائل بتنهيدة: يا جماعة افهموني.... هو أكيد هيوافق عشان هيتحرج مني. وائل بجدية: أكيد يعني مش هيقولي إنه تعبان وعايز ينام ولا وراه مشوار... يعني من الآخر.... هيتكسف يقولي لأ. ندي بصت له بـ زعل بجد ورجعت بصت لأمها. ونهي بهدوء عشان تراضي بنتها اللي صعبانة عليها: طب ما تجرب يا وائل.... يمكن هو يوافق عن طيب خاطر. وائل بقلة حيلة بعد ما شاف

نظرة الرجاء على وش بنته: ماشي يا ندي... هكلمه وأشوف الدنيا فيها إيه. ندي بحماس وفرحة طفولية: كلمه دلوقتي يا بابي واسأله... عشان خاطري.... بلييييز. نهي ابتسمت هي ووائل على تصرفها. ووائل طلع تليفونه وهو بيقولها: حاضر يا نودي... هكلمه. يوسف كان في بيته وهو رايح جاي وهيجنن من كتر التفكير وهو مش عارف يوصل لحاجة ولا عارف ندي بتعمل إيه ولا هتقول لوائل إيه. وهو لسه بيروح وييجي...

لقي تليفونه رن. جري بسرعة عليه وابتسم أوي لما لقى وائل. بلع ريقه بالعافية وأخد نفس جامد وخرجه بالراحة ورد بهدوء: آلو. وائل بص لندي ونهي وهو متوتر من رد يوسف: آلو... ازيك يا يوسف. يوسف بابتسامة هادية: تمام الحمد لله رب العالمين. إزاي حضرتك مستر وائل. وائل بابتسامة: تمام الحمد لله بخير. يوسف قلبه بيدق جامد. ووائل بتوتر: ا... بص يا يوسف.... كنت عايز أطلب منك خدمة... ده لو يعني ظروفك تسمح.

يوسف اتوتر أوي وهو بيحاول يمسك نفسه زي اللي عامل عملة وبيحاول يبقى طبيعي: أكيد طبعًا مستر وائل... اتفضل. وائل بلع ريقه بتوتر: أصل ندي معزومة النهارده على حفلة في الحي العربي. يوسف غمض عينه وأخد نفس جامد وخرجه بالراحة بارتياح. وبعدين فتح عينه وهو مبتسم أوي: طب دي حاجة كويسة... متهيألي إنها ماراحتش هناك قبل كده. وائل بص لندي: هي راحت النهارده هناك وجاتلها دعوة لشخصين. وائل بتوتر: بس للأسف مش هعرف أروح معاها...

فلو يعني... يوسف ابتسامته بتزيد وقطع كلامه بسرعة: حضرتك عايزني أروح معاها؟ وائل بلع ريقه بتوتر: ده لو ظروفك تسمح يعني. يوسف وهو بيقول لنفسه بسعادة وفرح بس بصوت واطي عشان وائل ما يسمعهوش: yes... yes. وبعدين حمحم: إححمم... ده شيء يسعدني ويشرفني مستر وائل إني أكون معاها. يوسف باهتمام وجدية: وماتخافش عليها وهي معايا.... محدش هيقدر يأذيها أبدا. وائل ابتسم برضا: أنا عارف ومتأكد من كده يا يوسف. يوسف باهتمام:

حضرتك تحب أعدي عليها الساعة كام؟ وائل بص لندي وهو كاتم صوت الموبايل بإيده عشان يوسف ما يسمعهوش: يجي لك الساعة كام؟ ندي بسعادة وفرح وهي بتشاور بإيديها: وائل ليوسف: ٧ هيكون مناسب. يوسف بسعادة وفرحة مكتومة: إن شاء الله تعالى هاجي في الميعاد. وائل بابتسامة هادية: أنا مش عارف أشكرك إزاي يا يوسف. يوسف كان عايز يقوله إنه هو اللي عايز يشكره إنه سمح له إن يخرج مع ندي ويروحوا الحفلة دي مع بعض بس خبي اللي جواه

وقاله بتنهيدة متدارية: العفو مستر وائل.... ده شرف ليا إنك تفكر فيا أنا إني أكون مع ندي. يوسف لقاها فرصة كويسة ليه فحب ينتهزها: وأي مشوار خاص بميس نهى وندي يشرفني إني أقوم بيه في أي وقت وفي أي مكان من غير أي تردد مستر وائل. وائل بابتسامة هادية: تسلم يا يوسف وده من عشمي فيك. يوسف بابتسامة: تمام... يبقى هاجي على ٧ إن شاء الله تعالى. وائل بحب: إن شاء الله تعالى... مع السلامة. يوسف قفل مع وائل من هنا...

وفضل يتنطط من الفرح والسعادة على اللي حصل. بسرعة بعت لندي على الواتس: نفسي أشوفك دلوقتي يا مجنونة وأعرف أنتي عملتي إيه بالظبط. أول ما وائل قفل مع يوسف اتفاجئ بندي مسكت إيده بسرعة وهي عمالة تتنطط زي العيال الصغيرة وهي عمالة تبوس فيه وهي بتقوله: حبيبي يا بابي... يا أحلى بابي في الدنيا دي كلها. نهي بتتفرج عليهم وهي فرحانة على فرح ندي واللي بتعمله في وائل، ووائل كمان كان فرحان بفرحة ندي اللي شايفها في عينيها وتصرفاتها.

ندي سابتهم وطلعت جري على أوضتها عشان تظبط نفسها وتستعد للحفلة. وأول ما طلعت تليفونها من شنطتها لقت رسالة يوسف ليها. ضحكت أوي وردت عليه بغلاسة: تدفع كام وأنا أقولك؟ يوسف كان مستني ردها. فكتبلها بسرعة من غير تردد: نص عمري. ندي ابتسمت أوي وردت عليه برخامة: طب والنص التاني هتخليه لمين؟ يوسف رد بغلاسة: هقولك لما أشوفك النهارده. ندي بابتسامة هادية: يبقى لما أشوفك النهارده..... سلام. يوسف بسعادة: سلام.

بعد ما قفل معاها فرد ظهره على سريره وهو مغمض عينه ومش قادر يصدق كل اللي حصل واللي بيحصل معاه النهارده. دقايق عدت وبسرعة فتح عينه ودخل ياخد شاور ويستعد لخروجة بالليل. ندي مكنتش أقل منه في سعادته. بالعكس... بدأت تحس إن الدنيا بقت حلوة وجميلة أوي. وسعادتها بقت بين إيديها. بسرعة فتحت دولابها وبدأت تختار لبس مناسب للخروجة دي. عدى الوقت على أبطالنا. وفي تمام الساعة السابعة مساءً بالتمام والكمال. جرس الباب رن كان يوسف.

ويادوب وائل فتح له من هنا واتفاجئ هو ويوسف بندي خرجت من وراه بسرعة. ما يعرفش لحقت تنزل من فوق إمتى. وائل ابتسم أوي على تصرفها وهو بيقوله بإحراج: معلش يا يوسف... هنتعبك معانا. ندي بصت في الأرض بإحراج ويوسف بابتسامة عريضة: مفيش تعب ولا حاجة مستر وائل. وائل هز راسه بـ تمام وندي باست وائل في خده وخرجت مع يوسف في هدوء. أول ما ركبوا العربية يوسف بص لها بابتسامة شوق واشتياق. وهي بصت في الأرض بكسوف.

لحظات وطلع بيها طيران ع الحفلة وهما بيضحكوا ويهزروا ويغلسوا على بعض. أول ما راحوا لقوا زين واقف بيسلم ويتكلم مع ناس تانيين. يوسف وندي راحوا عنده وسلموا عليهم بترحاب. زين وهو بيوصلهم للترابيزة اللي هيقعدوا فيها:

الحفلة هتعجبكوا أكتر كتير. المكان كان عبارة عن مسرح كبير ومقفول وفيه شاشات عرض كبيرة عشان اللي ورا يشوفوا المسرح. وفي عروض حلوة. من غنا والساحر ودي جي. وفي فقرة للمواهب وفرقة موسيقية بتعزف أغاني عربية قديمة وجديدة بس بصوت الشباب. كنوع من اكتشاف المواهب. أو أي حد عايز يجرب... يجرب. زين بابتسامة هادية: ندي... شو رأيك تغني؟ ندي بصت ليوسف بابتسامة هادية من غير ما تتكلم.

ويوسف مكنش محتاج منها إنها تفسر وتوضح أكتر من كده أو تسأله سؤال مباشر. كفاية عليه بس إنه يبص في عينيها وهيفهم سؤالها وطلبها من نظرة عينيها. كان باين أوي من نظرتها ليه كأنها بتستأذنه إنها تغني. ابتسم أوي وهو يهز راسه بـ آه. وهي ابتسمت أوي وبصت لزين: ماشي. زين بابتسامة عريضة: أوكي... هروح أجهز فقرتك وأيجي أبلغك. ندي بسرعة قبل ما يمشي: زين... استنى.

يوسف بص لها باستغراب وهي بسرعة قربت من ودانه وقالت له حاجات ويوسف مكنش عارف يسمع حاجة من كتر الدوشة والصوت العالي. بعد ما ندي خلصت. زين بص لها وهو مبتسم أوي وبيشاور لها بإيده وهو منشكح أوي: إيه... تكرم عيونك يا عيوني. ندي ابتسمت أوي وهي مندمجة في الأغنية اللي شغالة. ويوسف بغيظ منها من اللي عملته مع زين: ممكن أعرف إيه اللي إنتي عملتيه ده؟ ندي بابتسامة غلاسة: اصبر بس شوية وانت تعرف. يوسف بغيظ منها وغمزة:

عارفة يا ندي لو عملتي مصيبة النهارده... مش هقولك هعمل فيكي إيه. ندي بابتسامة رخامة: هتعملي فيا إيه يا بطتي؟ يوسف بابتسامة عريضة وهو بيضحك: ههه... هتبقى مفاجأة يا ندي. وأحسن لك بلاش تعرفيها. ندي بلعت ريقها بتوتر وهي بتبص قصادها بسرعة قبل ما يتجنن ويطلع عفاريته عليها. عدى شوية وقت اتفرجوا على فقرات كتيرة كانت خفيفة وظريفة وهما بيضحكوا ويهزروا. شويه وزين راحلهم وقال لندي بابتسامة هادية: يلا يا ندي.

ندي ابتسمت بهدوء وهي بتقوم من مكانها. ويوسف بغيظ وهو بيقوم من مكانه وراها: استنى هنا رايحة فين؟ ندي لفت وشها ليه بسرعة وهي بتقوله بجدية وحزم بس بابتسامة: مكانك..... خليك مكانك. يوسف كشر أوي وبصلها بغضب جامح من طريقة كلامها وتصرفها اللي مش مفهوم. وهي بتكمل كلامها بابتسامة هادية وهي بتبص في عينيه بحب: جيالك. يوسف ملامحه اتغيرت فجأة وهو بيبصلها وسؤال ظهر في عينيه من غير ما يسأله وهو قلبه بيدق جامد

أوي لما حس إنها بتبعد عنه: رايحة فين وسايباني لوحدي؟ هتهربي؟ هتسيبي قلبي وتمشي؟ سؤال موجود جواه. مقدرش ينطق بيه. سابته ومشيت مع زين وسابته في حيرته وشوقه وهو شايفها قصاد عينه بتبعد عنه. فجأة النور اتطفى. لحظات وظهرت أنوار كتير ملونة. وإضاءة خفيفة. وصوت محدش عارف هو جاي منين بيقول: "... عينى عليك بتروح... قلبى ليك مفتوح... عينى وقلبى معاك.... ياروح ما بعدك روح.... معاك مكان ما تروح.... يا معذب قلبى معاك.....

يوسف تنح واتصدم أول ما جه سبوت جامد ناحية ندي وهي بتخرج من جنب الاستادچ وبتوقف ع المسرح وهي بتشاور عليه وبتقوله بصوت عذب: "مكانك خليك مكانك.... جيالك أخد حنانك.... ليالى أنا سهرانه سرحانه ف هواااااك..... يوسف ابتسم أوي أول ما شافها قصاده وهي بتغني ليه هو وبس وقدام الكل وهي بتقوله بحب ظاهر أوي في نبرة صوتها وكلامها وملامحها وهي ما شالتش عينيها من عليه وكأنها بتعلن وبتثبت وجودها وحبها ليه قدام الناس كلها وهي بتقوله:

"عليه غرام يجنن.... يخلى قلبى يعلم... كل الحبيبه.... يا واد... متخلنيش أتألم.... يلا حبيبى أتكلم... وقولى يا حبيبه... حبيبااااه.... مكانك خليك مكانك.... جيالك أخد حنانك... ليالى انا سهرانه سرحانه فى هواااااك..... 《 بشري -مكانك 》 زين كان واقف جنب يوسف وهو بيقوله بغلاسة: أعلنت حبها ع العلن... يا رب تكون فهمت. يوسف بص له وهو مبتسم أوي وقرب منه ووشوشه زي ما ندي عملت. بعد ما خلص. زين بابتسامة عريضة: إيه خايي... حالآ.

زين سابه وجرى بسرعة للكواليس وهو مبسوط جدًا بالشو ده. دقايق عدت ورجعله تاني إداله حاجة في إيده ورجع تاني للكواليس. بعد ما ندي خلصت. النور ظهر في كل مكان عادي وكل طبعًا سقف وهاص وصفر على صوتها وأدائها وحسن اختيارها للأغنية وهي لسه واقفة ع الاستادچ ما نزلتش منه. لحظات وسمعوا موسيقى اشتغلت وواحد في وسط الموجودين فجأة قال: "..لا بنادي ولا بعشق دي.... ولا دي.... م الليلة دي... أنا اخترت بنت بلادي....

أموت أموت أنا عليها دي..... كلهم بصوا لبعض باستغراب وندي بصت ناحية الناس بس مش عارفة تشوف حاجة. شوية وبدأت الناس توسع لل بيغني عشان يعدي ويطلع ع المسرح وهما بيسقفوا ويصفروا وهما بيقولوله بصوت عالي: روح لها... روح لها... روح لها... ندي اتفاجئت واتصدمت لما الناس وسعت له أوي ولقت يوسف بيبصلها بابتسامة عريضة وهو بيكمل غنا وعينه في عينيها وهو بيقرب منها ومش شايف حد غيرها هي وبس وهو بيقولها بلهفة وشوق

وهو بيمسك إيديها بامتلاك: ".... لا بنادي ولا بعشق دي.... ولا دي.... م الليلة ديييي... أنا اخترت بنت بلادي.... أموت أموت أنا عليها دي..... ندي ابتسمت أوي وهي مش قادرة تصدق إن يوسف بيغنيلها هي وكمان بيغني بالعربي. مش كده وبس... لأ ده شبه إنه بيعترف إنه بيحبها للناس كلها أول ما قال: ".... روحي بقلبي بعيني بادوب.... أتوب عني وعنها ما توب.... أوصافها أنوارها..... شمس طالعة ليلاتي ولا ليها غروب.... بتزين الدهب والماس....

لا ملايكة ولا جن وناس..... حبيتها وعشقتها..... عشق تاني جاني غير كل إحساس..... قمر الليل وعنيها إخوات.... يوم تمشي تغار الحلوات.... بسحرها وعطورها... فيها رقة وعظمة ملكات.... الدنيا بنظرتها تميل.... تشيل الصبح تجيب الليل... ف عودها و ف خصرها.... أي إستوصاف برضو عنها قليل..... جوه عينيها بتجري بحور.... من يومها عايشة ف قصور..... عرفتها... لمستها... أنا كده حاسس إني مسكت النور.... بتكلمني بكل سكوت.....

خلتني أعشقها موت.... من وقتها يوم شفتها... خايف على عمري لو ثانية يفوت..... لا بنادي ولا بعشق دي.... ولا دي.... م الليلة دي... أنا اخترت بنت بلادي.... أموت أموت أنا عليها دي..... 《 فارس -بنت بلادي 》 يوسف خلص من هنا ومحسش بنفسه وهو بيشدها جامد في حضنه وبيلف بيها. ندي مكنتش قادرة توصف سعادتها وفرحتها بيه وهو بيعترف قدام الناس كلها إنها الوحيدة اللي قدرت تخترق حاجز قلبه وحياته برضاه وموافقته.

لحظات ويوسف بعدها عنه وهو مش قادر يشيل عينه من عينيها وشفايفها. عض شفايفه بغيظ منها. ما فاتش ثواني غير وهو خاطفها من نفسها وحياتها والناس والدنيا بحالها وبيجروا على بره بسرعة. وقفوا عند موتوسيكل كان زين سايبهوله. ركب هو الأول وبص لندي بابتسامة هادية. وهي من غير ما تفكر ولا تتكلم بكلمة واحدة ركبت وراه وحضنته أوي وهي سعادة الدنيا كلها مش سايعاها.

يوسف ابتسم أوي وخد إيديها وباسها بمنتهى الحب والحنان. ورجع حطهم تاني في حضنه وطلع بيها ما يعرفش هيهرب بيها على فين. ندي مكنتش عايزة تعرف هما هيروحوا فين ولا هيعمل إيه. المهم عندها إنهم يكونوا مع بعض وبس. مش مهم أي حاجة تانية. المهم يكونوا مع بعض.

يوسف كان زيها ويمكن أكتر منها. كان حاسس إنه عامل زي الطير اللي خرج من قفص حزنه ووجعه اللي فضل سنين كتير محبوس فيه بسبب خوفه اللي سيطر عليه. حس إنه أخيرًا حر. طليق. بيحلق فوق السحاب من غير قيود. من غير وجع. من غير خوف. من غير ألم. فجأة وقف على تل كبير كله خضرة ومفتوح. منهم للسما. نزل الأول وبص لندي بابتسامة هادية وهو بيمد إيده ليها عشان تنزل. وهي ابتسمت بهدوء وهي بتديله إيديها.

يوسف وندي اترموا على الأرض على ظهرهم وهما بيضحكوا وفاردين إيدهم وبيصوا للسما والنجوم. زي أي طير ما بيفرد جناحاته للدنيا وللحياة. فضلوا يبصوا للسما من غير ما يتكلموا في أي حاجة. وكأنهم خلاص مش محتاجين يقولوا أي حاجة. شويه ويوسف بدأ يلمس إيديها بهداوة. وندي غصب عنها غمضت عينيها أول ما إيده لمست إيديها. شويه ويوسف بص لها أوي وبدأ يشبك إيديها في إيده جامد وهي فتحت عينيها وبتبص له بشوق وهيام واستسلام.

بدأ يقرب منها أكتر وعينه ما تشالتش من عينيها وشفايفها. وهي نفسها بيطلع وينزل بسرعة. وقلبها بيدق جامد أوي وهي بتبص ما بين عينيه وشفايفه بحب وشوق وهيام وكأنها بتطالبه إنه يقرب منها أكتر وأكتر. ويادوب شفايفه خلاص هتلمس شفايفها. فجأة... حسوا بحاجة غريبة حواليهم. هما الاتنين في نفس الوقت بصوا ع السما لقوا الثلج بينزل عليهم. رجعوا بصوا لبعض وهما بيضحكوا أوي. يوسف مسك إيديها وقومها وبدأوا يجروا بسرعة ع الموتوسيكل. يوسف

بص لندي بحزن وهو بيركبها: لازم تروحي دلوقتي. ندي وهي بتبص في عينيه بزعل: بس أنا... يوسف قطع كلامها بسرعة وبحزن وزعل أكتر منها: لازم تروحي قبل ما الثلج يزيد ومانعرفش نروح. ندي بصت لبعيد ودموعها بدأت تلمع في عيونها. ويوسف لف وشها ليه بحنان وعينه في عينيها بشوق وهو بيلمس خدها بحب: أوعدك هعوضك عن كل يوم وكل ساعة وكل دقيقة عيشتيها وإنتي بعيدة عني. هعوضك عن كل يوم أنا عيشته من قبل ما أعرفك.

ندي ابتسمت أوي وهي بتترمي في حضنه وبتغمض عينيها وبتشم ريحته. وهو بيضمها جامد أوي كأنها بتاعته وملكه وهو مغمض عينه: كل دقيقة وكل ثانية عيشتها من قبل ما أعرفك ولا ليها معنى ولا ليها وجود في حياتي. من النهارده عمري ابتدى. هعيشه ليكي ومعاكي يا ندي عمري. ندي دموعها نزلت منها غصب عنها وهي مش قادرة تبعد عنه ولا قادرة تسيب حضنه. لحظات ويوسف بعدها عنه وهو بيبتسم أوي وبيمسح دموعها بإيده: تؤتؤ...

من النهارده مفيش دموع ومفيش حزن ومفيش زعل تاني خلاص. من النهارده مفيش غير ندي ويوسف وبس. إتفقنا؟ ندي وهي بتبتسم أوي وهي بتهز راسها بـ حاضر: إتفقنا. يوسف بابتسامة هادية: يلا عشان ألحق أروحك قبل ما الثلج يزيد ويقفل الشوارع. ندي ابتسمت بهدوء وهي بتركب وراه وماسكة فيه أوي وساندة راسها على ظهره بأمان. كانت حاسة بالهدوء والسكينة وكأنها بتحلق زي الطير في السما من غير خوف أو قيود.

أول ما وصلوا. ندي نزلت وبصت في عيونه بسكوت بس بحزن وعتاب إنه خلاص وصلها وهيسبها ويمشي. وهو كان بيبصلها بحزن إنها هتاخد قلبه منه وهتمشي. لحظات سكون عدت عليهم في عتاب ولوم في عيونهم من كل واحد فيهم للتاني من غير ما يفصحوا ولا يعبروا عن مشاعرهم لبعض. لحظات... وندي ابتسمت بـ وجع ويادوب لفت وشها عشان تمشي. يوسف بسرعة من غير ما يشعر مسكها من إيديها وهي لفت وشها ناحيته وفجأة...

باسها بمنتهى العشق والجنون واللهفة والهيام والشوق. مش قادر يبعد نفسه عنها ولا قادر يبعدها عنه. وكأنه كان بينتقم من كل يوم وكل لحظة وكل ثانية مرت عليه وهي بعيدة عنه وعن حضنه وقلبه. ندي مكنتش أقل منه في شوقها وحبها ولهفتها عليه. بالعكس... كانت بتتمنى اللحظة اللي يمسك فيها بإيده وسنانه وما يخرجهاش بره حضنه أبدًا. دقايق عدت عليهم في عشق وجنون وشوق وهيام.

شويه ويوسف بعد عنها يشوف عينيها. لقى عينيها مغمضة وهي في عالم غير العالم. ابتسم بهدوء وهو بيقرب من شفايفها يكمل اللي بدأه. بس في ثانية... فتحت عينيها وبصتله بابتسامة هادية وجريت جري على جوه وسابته في تنهيته وصدمته من تصرفها. لدرجة إنه فضل باصص عليها بذهول وهو مش عارف هي زعلت واتضايقت من تصرفه... ولا متقبلة اللي عمله... ولا إيه حكايتها بالظبط.

فات دقيقتين تلاتة وهو مش عارف يعمل إيه. كان متوتر وقلقان وجسمه بيترعش من كتر ما هو مش راسي على بر معاها. ويادوب لف وشه عشان يمشي وهو مكشر ومتضايق ومخنوق وبيلوم نفسه على تصرفه وتهوره معاها وإنه مكنش ينفع يتهور بالشكل ده. فجأة سمع صوتها بتنادي باسمه. بص وراه بسرعة وهو مبتسم أوي وقلبه بيدق جامد وهيخرج منه. وندي بابتسامة عريضة وهي بتجري عليه بلهفة وشوق. فجأة تنح واتصدم واتلجم ومابقاش عارف ينطق بحرف واحد أول ما ندي باسته

في خده وقالتله بهمس وحب: بحبك.