رواية و لو بعد حين الفصل السادس 6 - بقلم خلود احمد

فضلت تفكر طول الليل وجمعت كل الكراريس اللي يوسف جابها لها في شنطة ونامت. تانى يوم الصبح خالد في شغله وعمر في كليته وفايزه كانت في المطبخ. ملك خدت الشنطة ونزلت وقفلت الباب وراها. نزلت الشارع فضلت ماشية في الشارع ومش عارفة تروح فين. العصر أذن وعمر وخالد رجعوا البيت. فايزه: مش عارفة والله كنت في المطبخ ودخلت أوضتها ملقتهاش. أنا هتجنن يا خالد رجعلى بنتي. خالد: اهدى بس هننزل أنا وعمر ندور عليها. يارب نلاقيها.

عمر: متقلقيش يا ماما. نزلوا يدوروا عليها. هى فضلت تمشي لغاية ما وصلت عند موقف عربيات. سواق التاكسي: انتي مستنية حد يا بنتي بقالك نص ساعة واقفة كده. ملك: لا أنا مش عارفة أروح فين. السواق: إزاي بس فين بيتك طيب. ملك: معنديش بيت. السواق بص عليها، لقي لبسها كويس وشكلها منظم يعني مش باين إنها عايشة في الشارع. ملك: ممكن توديني مكان أعيش فيه.

السواق: أنا والله ما عارف أقولك إيه يابنتي لو كنت حالي يسمح لي كنت خدتك تعيشي مع عيالي بس أنا عندي أربع عيال والتاكسي مش بتاعي والحال مش مظبط بس هوديك بيت أيتام وأمري لله. ملك: ماشي شكراً. السواق وداها ومشي. الحارس: تعالي ادخلي جوة. ودخلها للمديرة. المديرة: اسمك إيه. ملك: اسمي ملك. المديرة: وفين أهلك يا ملك. ملك: مش عارفة أنا كنت عاملة حادثة وناس خدوني عندهم بس أنا مشيت عشان مش حابة أعيش هناك.

المديرة: ماشي يا ملك أهم حاجة هنا الاحترام والالتزام بكل الأوامر. وفي أوقات كثيرة ناس بتيجي عشان تتبنى أطفال من هنا يعني ده مش مكان دايم ليكي وأول ما تتمي الـ 18 سنة بتمشي من هنا. ملك هزت راسها بموافقة. المديرة خدتها ودتها أوضة مع شوية بنات. خالد: بقالنا 4 ساعات بندور معقول اختفت. عمر: كده يا ملك كل ده عشان عليت صوتي عليكِ. خالد: ليه يا عمر لييييه مانت عارف إنها بتزعل.

عمر: والله غصب عني كان ضغط الامتحانات وبعدين ما أنا دايماً معاها كده وعادي هي أكيد زعلت من يوسف ومشيت. خالد: أعمل فيكم إيه انتوا الاتنين. حسبي الله ونعم الوكيل. عمر: يا بابا كفاية بالله عليك أنا حاسس بالذنب أصلاً. فضلوا يدوروا عليها لغاية ما الليل جه مفيش فايدة وروحوا. فايزه: مفيش حل إزاي يارب أنا مش عارفة أقعد حاسة إن في حاجة ناقصة. هي صحيح مش من لحمي ودمي بس قلبي اتعلق بيها أوي.

عمر دخل أوضتها وفضل يفتكرها. بيبص على الكومودينو لقي ورقة. عمر: ماما سابت دي جوا. فايزه: فيها إيه اقرأها بسرعة. عمر كان بيحاول يقرأ خطها والكلمات الغلط اللي مكتوبة. عمر بيقطع في الكلام: أنااا ماشية يا ماما ويا بابا هروح مكان تاني عشان يوسف مشي هو كمان وعمر بيروح الكلية ومش بشوفه كتير ومفيش حد بيلعب ويلوننن معايا. أنا حبيتكم أوووى ولما أكبر هاجي أشوفكم تاني ومش زعلانة من عمر عشان امبارح بحبكم أوى سلااام.

فايزه دمعت: يا حبيبة قلبي يارب رجعهالي تاني يارب. عمر طبق الورقة وحطها في جيبه. خالد: ربنا يحفظها أي كان المكان اللي راحت. فايزه: ياارب. الأيام عدت وملك كل يوم تعيط عشان أخواتها عمر ويوسف اللي اتعلقت بيهم جداً. عمر كان قاعد في يوم ويوسف رن عليه. يوسف: واحشناااا. عمر: انت أكتر يا بني إيه شهر بحاله أنا قولت نسيتني. يوسف: الامتحانات ياعمر خلصت وخلصتني معاها ياااه تعب والله تعب. عمر: ربنا معاك ياحبيبي. أي الدنيا عندك.

يوسف: فللل هنا شوية مزز يلا 😂. عمر: اااه قول كده هما دول بقي اللي لاهينك هتنزل امتى يلا. يوسف: نازل آخر الشهر. المهم كل اللي عندك عاملين إيه. عمر: كويس. يوسف: اااه والله كويسة. عمر: اااه. يوسف: مالك في إيه ماما كويسة؟ عمر: اااه والله كويسة. يوسف: امال في إيه ملك مزعلاك هههههه. عمر بحزن: ياريتها كانت هنا وزعلتني. يوسف: هاا!؟!! قصدك إيه. عمر: ملك مشيت من هنا بعد ما سافرت بشوية. يوسف: انتتت بتقول إيه ليييه.

عمر حكاله كل اللي حصل. يوسف بحزن: دا أنا اشتريت لها الكراريس وكنت فرحان إني نازل عشان وحشني اللعب معاها. ليه كده يا ملك ليييه. طيب معرفتوش حاجة عنها خالص. عمر: لا. يوسف: ماشي ياعمر سلم لي على ماما وبابا سلام. الجد عمران: أنا تعبت يا إبراهيم ابني وحشني يعني كلكم حواليا وهو متلطم في بيوت الناس شغل وإيجار ومصاريف وهو حقه كله هنا أنا ندمت ومعدش في العمر بقية. إبراهيم: متقولش كدا يا بابا ربنا يطول في عمرك.

عماد: إحنا حاولنا كتير معاه وروحناله كذا مرة وانت شايف يا بابا. عمران: أنا هروحله بنفسي خلي منعم يجهز العربية. إبراهيم: إحنا هنيجي معاك. عمران ابتسم: يلا. الباب خبط. فايزه: افتح ياعمر أنا بعمل الأكل. عمر فتح الباب: جدو!! عمران: معقول لسه فاكرني. عمر باس إيده: طبعاً يا جدو اتفضل. ازيك يا عمو إبراهيم. ازيك يا عمو عماد. اتفضلوا ادخلوا. ادخلوا قعدوا في الصالون.

عمر عارفهم لأنه مشي من هناك وهو عنده 10 سنين ويوسف كان 4 سنين. عمر: بابا جدو برا واعمامي معاه. خالد: ياااه دي آخر زيارة لنا فيها كانت من أربع سنين خير يارب. عمر: مش عارف. فايزه خرجت سلمت عليهم وعملت قهوة. خالد قعد معاهم هو وعمر. إبراهيم: ماشاء الله يا عمر بقيت راجل ملو هدومك. أخويا مرة شوفتك كنت في إعدادي وانت عندنا في عزاء سعاد الله يرحمها. عمر: ربنا يرحمها ويغفر لها. ياعمي حازم ومروة عاملين إيه.

إبراهيم: الحمدلله يا بني. حازم مسافر بقاله 3 سنين ومعاه كارما وزين عقبالك. عمر: ماشاء الله. وانت يا عمو عماد أخبارك إيه وطنط خديجة. عماد: الحمدلله ماشي الحال يا حبيبي ناقصنا وجودكم بس. عمر بص لخالد وسكت. عمران: قولت إيه يا خالد قولتي إيه يا فايزه. أنا نفسي نتجمع تاني قبل ما أموت يا بني احفادي عايزهم كلهم حواليا. فايزه: ربنا يبارك في عمرك يا بابا بس الكلمة لخالد طبعاً.

خالد: أنا مرتاح كده يا بابا وكمان أنا مقطعتش الود بينكم وبشوف اخواتي وبزورك دايماً. عمران: دايماً؟ كل كام سنة مرة. واحفادي مشوفتهمش غير لما بقوا رجالة حتى يوسف سفرته من غير ما أسلم عليه. إبراهيم: احمم نهاية الموضوع اللي كانت السبب خلاص ماتت يا فايزه واحنا عارفين اللي فيها خلاص نلم شملنا بقي ولا إيه يا عمر. عمر عشان ينهي الموضوع: إن شاء الله هنفكر في الموضوع ونرد عليكم.

عمران: طيب بالاذن بقي أتمنى زيارتي ليكم يكون ليها تقدير وتفكروا في كلامي. فايزه: أكيد يا بابا زيارتك على راسنا. عمران: ربنا يحفظك يابنتي والله كلك ذوق. مشيوا وفايزه وخالد قعدوا يتكلموا.