رواية وعد الحر الفصل الثاني 2 - بقلم همس حسن

ازيك يافارس. احتمال متشوفش ورقتي لأني هحطها في جيبك من غير ماتحس، بس لو شوفتها أكيد مش هكون معاك. انت عارف وأنا كمان عارفة إن علاقتنا وجوازنا من البداية كان صفقة. أجيب الحفيد والوريث لعيلة الحر، واتفاق الشغل اللي بينكم وبين عمي يتم. ووقت ما هتكون بتقرأ الورقة دي هتكون معاك بنتك. كذا أنا مهمتي انتهت. وبالنسبة للمشاعر اللي اتكونت جواك ليا، دا مكنش بمزاجي ولا كنت عاوزاه. وهاودتك فيه للآخر لحد ما أولد وأشوف طريقي.

طريقي مع البني آدم اللي بحبه وعاوزاه من زمان. خد بالك من بنتنا يافارس. ولما تكبر متخليهاش تكرهني. قولها كلمة واحدة بس: "كل اللي حصل من البداية مكنش بإرادة مامتك". فارس ماسك الورقة ومبرق. عروقه كلها مزرقة وعرقان من الصدمة. نزل ايده بالورقة وكرمشها في ايديه. فارس: لا يا كارمن غلطانة. الحكاية مش هتخلص بالبساطة دي. وبعد ٢٤ ساعة من دلوقتي لو مكنتيش معايا مبقاش أنا فارس الحر. *** نتعرف بفارس 💛 البطل 💛.

شاب عنده 30 سنة. خريج وشغال في سلسلة مصانع أبوه الله يرحمه هو وأخوه وصلاح خاله ووليد ابن خاله. مفيش داعي نوصف شكله لأنه واضح من الصورة. طبعه قاسي وحاد جداً. وفي نفس الوقت عاطفي ودا مبيظهرش غير في أوقات معينة لناس معينة. عايش في ڤيلا كبيرة مع أمه *فاطمة* وأخوه ومراته *سيف وأمنية*، وخاله وابن خاله. وقبل ما كارمن تختفي كانوا متجوزين بقالهم سنة وعايشين في أوضة كبيرة جداً داخل الڤيلا. ***

كارمن ساندة على الحيطة وبتنهج وبتمسح دموعها. حست بخطوات جاية عليها. حطت ايديها على بوقها كتمت نفسها واللي بقى بيتحرك فيها عينيها المدمعة اللي بتبص يمين وشمال من الخوف والرعب. ياترى مين الشخص اللي جاي عليا!! راجل كبير سناً وغلبان داخل عليها وبيصلها باستغراب. الراجل: إيه يابنتي اللي مقعدك كدا في عز البرد ده؟ أول ما شافته وعرفت إنه شخص غريب ومش عارفها شالت ايديها من على بوقها وغمضت عينيها خدت نفسها ودموعها نازلة.

الراجل: انتي بتعيطي كمان؟ لا قومي قومي معايا يابنتي أنا بيتي هنا اهو. عارف إنه صغير وفقير وباين عليكي بنت ناس بس اهو أربع حيطان يحموكي من قرصة البرد. كارمن بتحاول تقوم تقف ومش قادرة من التعب. الراجل اتقدم عليها وحاول يساعدها تقوم تقف رغم إن هو كمان تعبان وعلى قد حاله. قومها وسندها تدخل البيت عنده. دخلت قعدت على الكنبة وسندت راسها لورا. الراجل: ثواني يابنتي هجيبلك أي غطا تحطيه عليا بس لبس المستشفيات الخفيف ده.

كارمن: لا لا ياحج أنا تمام. الراجل: متقلقيش. بنتي قبل ما تتجوز كانت في سنك وعندي ليها هدوم هتيجي على مقاسك. تلبسيه لحد ما نقعد نتكلم ونشوف إيه حكايتك. *** نتعرف بكارمن 💖 البطلة 💖. بنت عندها 23 سنة. متخرجة من كلية آداب علم نفس. اللي موجود من عيلتها أمها *جميلة* وأختها *داليا* اللي عايشين في نفس العمارة مع عمها *مصطفى* وابن عمها *سليم* ومرات عمها *ناهد*.

كارمن بنت عيونها عسلية وملامحها بريئة براءة الأطفال. شعرها لونه بندقي وناعم زي بشرتها البيضا زي ما بردو واضح في الصورة 🤍🤍. صفاتها ممزوجة بين البراءة والطيبة، وبين الشقاوة والجنان. متجوزة فارس الحر بقالها سنة بالظبط. ومع بعض هنعرف حكايتهم بدأت إزاي وإيه وصلها لكده. *** سيف نزل وقعد يدور كتير لحد ما لقى فارس واقف على جنب ووشه جايب ألوان. جري عليه. سيف: إيه يابني انت فين قلبت عليك الدنيا. فارس باصص قدامه وساكت.

سيف حضنه وبدأ يدب على كتفه وكأنه بيقويه. سيف: إجمد ياخويا، إجمد واصلب طولك. هنلاقيها هنلاقيها هتروح فين يعني! بعد عنه شوية وطبطب على كتفه: يلا يافارس تعالي اطلع المستشفى معايا شيل بنتك وحسسها بوجود حد فيكو. وبعدها هننزل نقلب الدنيااااااا عاليها واطيها لحد ما نلاقي أمها. فارس بينزل ايد سيف: مش هيحصل ياسيف. سيف: هو إيه اللي مش هيحصل.

فارس: مش هبص في وشها قبل ما أمها تكون موجودة. جبناها سوا وعملنا كللللل ده عشان خاطرها ومش من حقي أمسكها ولا أشوفها ولا حتى أشم ريحتها قبل ما أمها تشوفها. سيف: لا ياخويا مش صح. بنتك محتاجاك دلوقتي. أمها الله أعلم راحت فين وإيه حكايتها بس الأهم في اللحظة دي إنك تطمن بنتك وبعدها تعمل اللي انت عايزه. فارس: وأنا قولتلك اللي فيها ياسيف. واظن انت أكتر واحد عارف أخوك لما بيعند في حاجة.

بيطبطب علي كتفه: اطلع ياسيف ادي البنت لمراتك وخليها تاخدها في حضنها وتعتبرها بنتها ومن دمها لحد ما أمها ترجع. فرصتها وجاتلها. أما بالنسبة لكارمن.. وحياة دم الحر اللي بيجري في عروقي ما هيعدي ٢٤ ساعة غير وهي معايا. نزل ايده وبيلف عشان يمشي. سيف مسكه: استني يافارس أنا جاي معاك. فارس: لا لا خليك معاهم. في غيابي لازم يكون حد موجود مع كل الحريم دي. متقلقش عليا. سابه وركب العربية واتحرك. على فين؟ ناوي على إيه؟

لسة مش عارفين. 💛💛💛💛💛💛💛💛💛💛💛💛💛💛 *في البيت الفقير* كارمن قاعدة لابسة الهدوم اللي جابها ليها الراجل العجوز. عينيها مدمعة ووشها واضح عليه معالم التعب والألم. الراجل داخل عليها. الراجل: سلام عليكم. كارمن: عليكم السلام. تعالي ياحج أنا لبست خلاص. الراجل: قوليلي بقى. حكايتك إيه وليه كنتي لابسة هدوم مستشفى واضح إنك هربانة من حاجة؟ كارمن: دي حكاية يطول شرحها أوي. خليني أحكيلك وقت تاني. الراجل: بصي يابنتي.

أنا مش هضغط عليكي تحكي حاجة طبعاً لأن ديني كمسلم بيوجب عليا أسألش ضيفي عن أي حاجة ٣ أيام متتاليين واليوم الرابع أسأله. ولكن أنا عايز أساعدك فـ على الأقل قوليلي كنتي في المستشفى ليه. كارمن: مفيش كنت تعبانة شوية وعملت عملية بسيطة كده وخرجت. الراجل: يعني العملية دي مش ولادة؟ لو هي ولادة قوليلي عندنا حكما كتير حوالينا أخليهم يساعدوكي. كارمن بتوتر: لا لا ولادة إيه. يعني هو أنا لو والدة كنت هسيب بنتي كده وأهرب!

الراجل باستغراب: وإنتي عرفتي منين إنك لو ولدتي هتجيبي بنت. كارمن عرقت واتوترت زيادة: أصل ا.... أصل من وأنا صغيرة وأنا نفسي لما أحمل وأخلف أجيب بنوته. بتبتسم بكسرة وهي بتفتكر وش بنتها البريء لحظة ما ولدتها. مسحت دموعها وكملت كلامها: وكان نفسي أسميها وعد كمان. *Flash back* 📸🔙 كارمن حامل وقاعدة على الانتريه وفارس جنبها. وطى وباس بطنها. كارمن: فرحان إنك هتبقى أب؟

فارس: يااااه. مفيش أي كلام يوصف إحساسي أقسم بالله، خصوصاً إن الطفل ده هيكون من أحلى بنت في الدنيا ❤️❤️. كارمن: عارف. على قد فرحتي بالروح البريئة اللي هجيبها للدنيا وأكون أمها، على قد خوفي. فارس: خوفك من إيه بس ياحبيبتي. كارمن: خوفي عليها من الدنيا. خوفي إنها تطلع ومتلاقيش أبوها وأمها مع بعض لأي سبب وده يخلق جواها فجوة كبيرة وتحس إحساسي وتتوجع الوجع اللي عيشته طول حياتي.

فارس: طول ما أنا عايش على وش الدنيا وإنتي كمان عايشة مش هخلي حاجة في دنيا تحسسها كده. ودا لأني هفضل شايل أمها في عيني طووول حياتي. وحتى بعد ما أموت هفضل بحبها. كارمن: وعد يافارس؟ فارس: وعد ياروح قلب فارس. هما الاتنين ركزوا في نفس اللحظة وهما مبتسمين. وفي نفس اللحظة قالوا نفس الكلمة. فارس * كارمن: وعد الحر 😍😍😍. كارمن بتضحك جامد: ربنا بعتلنا الاسم المناسب في الوقت المناسب. "وعد فارس الحر" 🙈🙈🙈.

فارس: ربنا يجيبها على الدنيا بالسلامة وتتربي في حضننا يارب. وأوعدك بعد ما تتولد هغير اسم سلسلة مصانع الحر لـ *وعد الحر* ❤️❤️. رجعت كارمن من الفلاش باك على صوت الراجل. الراجل: ربنا يعوضك في ابن الحلال اللي يصونك وبعدها تسمي كل الأسماء اللي انتي عاوزاها. كارمن: ربنا يكرمك. أنا هقوم أمشي بقى كتر خيرك لحد كده. الراجل: لااااا تمشي إيه ده أنا لسة هقوم أعملك لقمة ترم عضمك يابنتي اقعدي.

كارمن: لا لا بالله عليك مش قادرة آكل أي حاجة أنا هقوم أمشي بس. الراجل: طيب تعالي نتفق اتفاق. أنا هقوم أجهزلك لقمة حلوة على ما تنامي في الفرشة دي شوية وتريحي جتك من الطريق والجري. ومتخافيش الدار أمان وإنتي زي بنتي. كارمن بتبتسم: كتر خيرك ياحج. الراجل: يلا ريحي على ما أرجعلك بالأكل. خرج من الأوضة ورد الباب وراه. لقى ابنه في وشه. الراجل: إيه يا خالد واقف كده ليه!! خالد بيبص ع الأوضة: إحنا عندنا ضيوف يابا ولا إيه.

الراجل: ملكش صالح عندنا إيه. خش غير الهدوم اللي عليك واخرج كمل أكل عيشك. خالد: يعني هي الضيوف تقعد في الأوضة اللي لماني وتقولي ملكش صالح!! الراجل: البيت ده بيتي وأجيب فيه اللي أعوز أجيبه. مش عاجبك شوفلك مطرح تاني اتلقح فيه. اتفضل. خالد: خلاص يابا اديني اتكتمت. 💛💛💛💛💛💛💛💛💛💛💛💛💛💛 *في قسم الشرطة* فارس داخل. قام الظابط جري ياخده بالحضن. الظابط: اهلاااااااااا ابو الفرسان. فارس: ازيك ياعاصم عامل إيه.

الظابط: زي الفل يابرنس إنت أخبارك إيه. وفينك كده هناخد مواعيد عشان نشوفك ولا إيه. ياعم هو مين فينا اللي ظابط 😂😂😂. فارس: دوامة ياعاصم والله. الواحد عايش في دوامات طول الوقت. الظابط: الله يعينك ياصاحبي. إيه خير. مجيتك ووشك مخطوف ده مش مريحاني. فارس: عايزك في موضوع مهم أوي ياعاصم وعارف إن مفيش غيرك هيعرف يساعدني في حاجة زي دي. الظابط: خير ياصاحبي رقبتي ده إنت خيرك عليا من زمان. فارس: مراتي. الظابط: مالها مراتك!!

فارس: كانت بتولد النهاردة وكل حاجة كانت ماشية طبيعي. وبعد الولادة بلحظات اختفت اختفاء غريب ومن ساعتها قالب الدنيااااا كلها عليها مش لاقيلها أثر. الظابط: إيه ده غريبة دي؟؟؟ بس المشكلة إن إنت بتقول الموضوع لسه النهاردة يعني لسه معداش ٢٤ ساعة على واقعة الاختفاء عشان نبدأ ندور. فارس: أيوة بس أنا مش حد غريب ياعاصم! أنا مش هينفع بأي شكل أستنى ٢٤ ساعة أنا هتجننننننننن. عاصم: طب خلاص أهدى أهدى. أنا هحاول ألاقيهالك.

فارس: يعني أثق في كلامك ولا هتنساني؟؟؟ عاصم: يا عم عيب اللي بتقوله ده أنا عاصم. فارس: ودا العشم ياصاحبي. هستنى منك تليفون. عاصم: تمام ابعتلي صورتها عشان نبدأ ندور. 💛💛💛💛💛💛💛💛💛💛💛💛💛💛 *في المستشفى* سيف داخل عليهم الطرقة. قدمت فاطمة. فاطمة: لقيت أخوك؟ سيف: آه لقيته بس مرضيش يطلع. فاطمة: ليه؟؟؟ سيف: مش عايز يشوف البنت قبل ما يلاقي مراته. فاطمة: صبرني ياااااارب.

دخل سيف على الأوضة. أمنية قاعدة على السرير حاطة البيبي على رجلها وعمالة تحسس على وشها وهي ضحكتها من الودن للودن. دخل وقف قدامها وبصلها شوية. وطي باس دماغها. سيف: قريب هيتعاد نفس المشهد ده بس هتكون من دمك ياحبيبتي. أمنية: والله مبقاش فارق معايا من دمى ولا لا. البصة في وش البنوتة دي تسوى الدنيا وما فيها. سمى سيف ومسك البنت بص في وشها. سيف بفخر: وعد فارس الحر. نايمة ومش حاسة بأي حاجة حواليكي.

بس أنا متأكد إنك هتكوني سبب في صلاح أي حاجة بايظة، وتجميع أي حاجة متفرقة. باس على دماغها واداها تاني لأمنية. أمنية: ها وصلتوا لحاجة عن كارمن؟ سيف: مفيش ولا حس ولا خبر وفارس قالب الدنيا. أنا بس نفسي أي راجل ييجي يقف معاكو عشان أنزل أنا كمان أدور عليها مع فارس. وهو بيتكلم سمع صوت جاي من برا خرج بسرعة. مصطفى عم كارمن داخل عليهم ومعاه سليم ابنهم. مصطفى: اللي أنا سمعته ده يـ جميلة؟!!!

جميلة: آه للأسف ياحج. أنا ندهتلك تتصرف بما إنك مكان أبوها عشان أنا مش عارفة أعمل إيه. سليم بخضة: هو إيه اللي يتصرف!!! إنتو ازاااااي تسيبوها تهرب وتختفي بالشكل ده يعني معندكوش عين؟ سيف بصوت عالي: لا حيلك حيلك ياسليم اتكلم عدل عشان الواحد خلقه في مناخيره ومش ناقصاك. واكيد كارمن مخرجتش من وسطنا وقولنالها يلا ياحبيبتي طريق السلامة. هي اختفت بطريقة عجيبة بعد الولادة بلحظات.

مصطفى: ازاااي يعني الكلام ده وفين جوزها ان شاء الله؟؟؟؟؟؟!!! فاطمة: جوزها نزل من ساعتها وقالب عليها الدنيا. وبراحة علينا شوية ياخويا إحنا زينا زيكم. مصطفى: أنا هعمل اتصالات وأخرب الدنيا لحد ما ألاقيها. بس بعد ما ألاقيها هيكون لينا كلام تاني. مصطفى طلع تليفونه وخرج على برا. سليم: كارمن لو جرالها حاجة أنا مش هسامح حد فيكو. إنتو فاهمين؟؟؟؟؟ سيف: في إيه ياسليم ما تتكلم عدل أنا ساكتلك من الصبح.

باستغراب: ثم إنك إيه اللي حامقك اوووووي كده يعني؟!!!! سليم: إيه اللي هيحمقني يعني هي دي مش بنت عمي يعني لحمي ودمي!!! سيف: لحمك ودمك ها. تمام. أنا هنزل أشوف فارس راح فين ياجماعة. عن إذنكم. 💛💛💛💛💛💛💛💛💛💛💛💛💛💛 بعد ٧ ساعات... فارس ماشي عمال يعدي على أي حد يعرف كارمن من أهلها لأصحابها لمعارفها. ووسط ده كله تليفونه رن. فارس: أيوة يا خالي. صلاح: إيه يافارس عملت إيه. فارس: ولا أي جديد. صلاح: لسه ملقتهاش لحد دلوقتي؟؟؟

فارس: للأسف. صلاح: امممم. طيب أنا هعمل اتصالات وهخلي الرجالة ينزلوا يدوروا هما كمان. وهتابع المصانع لحد ما تلاقيها وتقف على رجليك. فارس: ده العشم بردو يا خالي. معلش هتعبك بقى وأشيلك شغلي فوق شغلك. صلاح: من امتى فيه بينا الكلام ده يافارس إنت ابني وإنت عارف ده كويس. اللي يفرق معايا دلوقتي تلاقي مراتك وترجعها بيتها وأيا كان اللي بينكم يتحل تحت سقف بيتكم.

فارس: والله يا خالي ما فيه بيننا غير كل حب ومودة وخير بس وعشان كده أنا هتجنن. صلاح: خير يابني. خير. متفقدش الأمل وخليك وراها لحد ما تلاقيها. فارس: حاضر يا خالي. قفل فارس المكالمة ولسة هيحط الفون في جيبه لقاه بيرن تاني "عاصم الظابط". فارس بيرد بسرعة: الو... عاصم: إيه يافارس. إحنا تقريباً كده عرفنا مكان كارمن مراتك. تعالى على المكان اللي هقولك عليه بسرعة. 💛💛💛💛💛💛💛💛💛💛💛💛💛💛 *في البيت الفقير*

كارمن من التعب والإرهاق اللي مرت بيهم اليوم كله غفلت وراحت في النوم. خالد ابن الراجل بيفتح الباب ببطئ وداخل عليها في غفلة أبوه مش موجود فيها. بدأ يتسحب ويدخل واحدة واحدة لحد ما بقى واقف قدامها. بص على جسمها كله بطريقة قذرة. وفجأة قرب منها وحاول يتهجم عليها ولكن....