رواية ولو بعد حين الفصل الحادي عشر 11 - بقلم خلود احمد

مضت على الورق وكانت بتبتسم ابتسامه مزيفه. المأذون: بارك الله لكما وبارك عليكما وجمع بينكما في خير. كلهم باركولهم وفايزه كانت بتزغرط. وبعدين ركبوا عربايتهم وراحوا القاعه. كلهم كانو مبسوطين. أميره: سلمت عليها.. افردي وشك عشان محدش يلاحظ باين عليكي أوي. ليال: مش قادرة أنا لحظة وهعيط. يوسف: مالك في حاجة؟ ليال: اتخنقت مش قادرة. يوسف نادى لعمر: يلا ياعمر. عمر: مستعجل على إيه؟ يوسف: يا رخم ده وقت هزار ليال تعبانة يلا.

عمر: تمام تمام. بعد ربع ساعه كانوا بيسلموا على أهل ليال ومشوا على بيت يوسف. كل واحد راح أوضته ويوسف وليال دخلو الأوضة. أول ما دخلت لقت صورة كبيرة على الحيطة، كانت صورة يوسف. الأوضة كانت منظمة وفيها بلكونة كبيرة بتطل على حديقة البيت اللي فيها حمام سباحة. ليال دخلت الحمام وقفت قدام المرايا وبصت لنفسها. كانت بتتنفس ببطء وبتدمع كل ما تفتكر الماضي. شالت الطرحة من على راسها ورمتها على الأرض.

كانت بتحاول تفتح سوستة الفستان مش عارفة. قامت قعدت في الأرض وفضلت تعيط. فضلت وقت كبير جوه. يوسف كان برا غير هدومه ببنطلون أسود وتي شيرت. مسك الفون وقعد يستغرب لما اتأخرت كتير جوه. يوسف: مالها دي اتأخرت ليه؟ قام يخبط عليها مش بترد. يوسف: ليال انتي كويسة؟ فضل يخبط ويحرك في الأوكره. يوسف بعد عن الباب وحط ايده على دقنه: راحت فين دي. سمع صوت عياطها راح عند الباب بسرعة. يوسف: ليال انتي كويسة افتحي طيب متخافيش. فتح الباب.

يوسف دخل عندها: انتي بتعيطي ليه في حاجة؟ ليال: مش عارفة افتح السوسته. يوسف مسح على وشه: يارب صبرني انتي هبلة يعني دي مستاهلة عياط لفي هعملهالك. ليال: لا مش عايزة منك حاجة تيجي ناحيتي أو تشوف جسمي. يوسف: مش هبص عليكي هغمض عيني وأخرج. ليال بصتله وخلاص. يوسف: صدقني. لفت ضهرها وهو غمض عينيه وعملهالها بعد محاولات كتيرة وخرجها. غيرت وخرجت أخدت مخدة والغطا وراحت نامت على الكنبة. هو مرضاش يكلمها ونام على السرير من السكات.

في نص الليل صحى كان الغطا واقع على الأرض. راح غطاها وقعد على الكرسي اللي جمبها بيتأمل ملامحها. يوسف: فيكي شبه كبير من ملك ولا أنا بقيت أشوف كل الناس شكلها. شعرها كان جاي على وشها فضل يلعب في خصلات شعرها ويبتسم. هي حست بإيده فتحت عينها وقامت بسرعة. ليال: في إيه؟ يوسف: مفيش حاجة مالك اهدى. ليال: أوووف أنا خوفت. يوسف: هو أنا بخوف؟ ليال: الساعة كام دلوقتي؟ يوسف: 4 الفجر وراكي حاجة ولا إيه؟

ليال: دمك خفيف وحطت ايدها على رقبتها اااه. يوسف قام أخد الفوطة بتاعته: السرير فاضي اهو قومي نامي عليه. ليال: مش عايزة منك حاجة. وكملت نوم على الكنبة. هو أخد دش وقعد يلعب رياضة شوية. الساعة جت 10 الصبح. يوسف: ليال انتي يابنتي أي النوم ده كله. ليال: اممم. يوسف: قومي بقي. ليال قامت أخدت هدوم ودخلت الحمام غيرت وخرجت. ليال: ها هنعمل إيه؟ يوسف: هننزل نفطر يلا. نزلوا فطروا وقعدوا شوية معاهم وطلعوا تاني.

ليال قعدت على التليفون كانت بتكلم أميرة رسائل وبتضحك. يوسف: بتضحكي على خير وبتكلمي مين؟ ليال: وانت مالك؟ يوسف: بجد والله. ليال: اه والله ملكش دعوة بأي حاجة تخصني. يوسف اتضايق من أسلوبها خرج وقفل الباب جامد. نزل خد العربية وراح عند الشلة بتاعتهم. مي: جووو أي ياحبيبي جاى تاني يوم فرحك ليه؟ هي مزعلاكي؟ يوسف: محدش يقدر يزعلني بس انتي عرفاني بزهق بسرعة. مي حطت ايدها على خده: عارفه ياحبيبي والله ظلموك بالجوازة دي.

يوسف: هنعمل إيه. مي: مش عارفه نشوف الشباب كده. عمر دخل الأوضة لقاها ضلمة وفي شمعة منورة على التسريحة. راح عندها لقي ورقة مكتوبة: هالو دادي. عمر استغرب: مروة! مروة فتحت النور وراحت عنده. عمر: ده إيه؟ مروة: تفتكر؟ عمر ضحك: بجد. مروة ادتله اختبار الحمل: آه والله بجد. عمر حضنها ولف بيها: أحلى حاجة حصلت النهارده ياحبيبتي ربنا يحفظكم ليا يارب. مروة: ويحفظك لينا يا أحلى بابا.

باس راسها وايدها: أنا مبسوط أوي يلا غيري هدومك بسرعة نروح نطمن عليه ونتغدى بره. مروة: بس. عمر: يلاااا مش عاوز أعذار. مروة ضحكت: أمرك يا عموور. عمر: قلبه. الليل جه وعمر ومروة لسه بره. ليال زهقت قامت تلون في الكراريس بتاعتها. بعد شوية سمعت صوت العربية بتاعته قامت خبّت الكراريس في الدولاب. يوسف دخل خد هدومه عشان يغير من غير ما يكلمها حتى. تليفونه رن وهو في الحمام كان متسجل ميوش وجنبه قلب أحمر. ليال: اممم بقي كده.

سابت الفون وقعدت. هو خرج كان بينشف شعره. ليال كانت حاطة رجل على رجل: في واحدة رنت عليك. يوسف مسك الفون يشوف مين وحطه مكانه تاني: وانتي مالك ومال خصوصياتي. ليال: خصوصيات إيه هو رن وأنا شفت مين. يوسف: ملكيش حق إنك تشوفي مين. ليال وقفت: لا والله انت بتتلكك بقي. يوسف قرب منها شوية: وانت زعلانة كده ليه يعني غيرانة مثلا؟ ليال: أغار من إيه انت مجنون انت بتردهالي يعني.

يوسف: هو أنا من حقي أعرف انتي بتكلمي مين وبتضحكي ومبسوطة كده عشان أنا الراجل مش انتي. ليال: لا مش من حقك برضو ولا انت هتعمل فيها جوزي أوي أنا وانت عارفين أنا وافقت عليك ليه. يوسف اتخنق: والله محدش قالك توافقي كنتي قوليلى لابوكي لأ. ليال بصوت عالي: وانت كنت تعرف أنا مريت بإيه عشان أبقى مجبورة أتجوزك انت معندكش دم يعني ولا إيه مش قولتلك أنا مش عايزة يوم ما خرجنا سوا مرفضتش انت ونهيت الجوازة دي ليه من الأول.

يوسف كان شارب ومش مركز في كلامها أوي. يوسف: اسكتي بقي. ليال قربت منه وخبطت على صدره بعصبية: لا مش هسكت ولا انت لما تبقى غلطان تقولي اسكتي بقي. يوسف قرب منها وباسها. هي بعدت عنه بسرعة وضربته بالقلم. حطت ايدها على بوقها من الصدمة.