رواية ربما صدفة الفصل الثالث 3 - بقلم دعاء احمد علي

حااازم حااازم حسام (الظابط) بضحك: يخربيت عقلك، دا لو كنت أفتكرت ربع جنيه كان جه. تالين بمزح: طول عمرك مادي حقير يابرنس. حسام ببعض من الجدية: احترمي نفسك، فيه ناس موجودة. تالين وهي تشاور على أحمد الذي يقف مثل الأطرش في الزفة: دا أحمد مش غريب. حسام: انت تعرفيه؟ تالين: أيوا ما أنا جاية علشان أشهد معاه. وقصت تالين على حسام كل ما حدث. حسام بتصنع الحزن: أنا قولت بردو إنك مش جاية تسألي.

أحمد حس إن علاقة تالين بحسام خطوبة أو حب، وزعل جداً مايعرفش ليه. نفض الفكرة من رأسه بأنه لسه عارفها انهارده. ثم أكمل حسام: على العموم أعتبر حاجتك بين يدك يابشمهندس أحمد. أحمد: شكراً ليك يافندم. تالين: حسام. حسام: نعم. تالين وهي توجه سبابتها في وجهه: الشنطة ترجع ياحسام في ظرف ٢٤ دقيقة. حسام وهو يلقي تحية الاستجابة: أوامرك يافندم. تالين بنفس النبرة: بدون أي خساير مادية أو بشرية أو حتى نفسية.

حسام بضحك: ولا عاطفية يافندم. تالين: عذبوه، إجلدوه، إحبسوه، خرصوه، المهم الشنطة ترجع. حسام بضحك: اطلعي برا يابت، بوظتوا سمعتنا. *** أحمد وتالين بعد ما خرجوا من عند حسام. أحمد: انتي جيتي ليه؟ مكنتش عايز أتعبك كفاية اللي حصلك بسببي، وعرفتي ازاي إنه مطلوب شهادتك. تالين: حيلك حيلك ياعم، موضوع وعد خلاص، ومش هتشوفني تاني. أحمد بحنية: مش قصدي والله، بس انتي بتساعدي أي حد كدا؟

تالين: أبويا مربيني على الجدعنة، مقدرش أشوف حد محتاج مساعدة وأقف أتفرج مع القطيع. أحمد شافها شخصية مختلفة عن أي حد قابله سواء بنات أو أولاد. أحمد: بغض النظر عن لسانك، بس انتي شخصية جميلة أوي. تالين وهي تضع يدها على خصرها: ماله لساني يابشمهندس. أحمد: وبالنسبة لشخصيتك جميلة ملهاش محل من الإعراب. جات تمشي تالين بس وقفها صوت أحمد: حسام قريبك؟ تالين: أخويا. أحمد: بتكلم جد. تالين: وأنا مش بهزر.

أحمد: ازاي أخوك وانت اسمك تالين سيد جابر، وهو اسمه حسام القاضي. تالين بابتسامة استفزازية: أخوات من الأم. ومشيت. أحمد لنفسه: الحمد لله،،،،،،، أخوها ولا أبوها وأنا مالي، بس شخصية جميلة بجد. *** دخلت تالين شقتهم. رحاب (أم تالين) : كنتي فين دا كله ياهانم! تالين: طب إسأليني هببتي أي في الامتحان! رحاب: ما أنا عرفت إنك مدخلتيش الامتحان أصلاً، كنتي فين! تالين بصوت واطي: أه يااخباصة ياثريا، مبضيعش فرصة.

تالين: طبعاً الحرباية بنت أختك قالتلك. رحاب وعملت نفسها مسمعتش: كنتي فين يابايرة؟ تالين وهي تدخل أوضتها: عند حسام ياأم البايرة. رحاب بفرحة ودخلت ورا تالين: وهو كويس. تالين: عال العال وبعتلك بوسة أولقفيها. رحاب: ياحبيبي يابني. تالين بهمس: نفسي أسمع مرة ياحبيبتي يابنتي قبل ما أموت. *** أم جاسر: هاا يابني فشكلت. جاسر بجمود: أيوا خلاص كل حاجة انتهت. أم جاسر بفرحة شديدة واضحة على وشها: أوعى تكون زعلان.

جاسر: لا طبعاً هزعل ليه! المهم العروسة اللي هتجبهالي تكون فائقة الجمال. أم جاسر: دا أنا جيبالك واحدة الناس كلها هتشاور عليك، ويحسدوك عليها، أخد معاد بكرة هنروح نتقدملها. جاسر بابتسامة: ومااالو بكرة بكرة.