رواية رغد وكبريائه الفصل الثاني 2 - بقلم مروة حسن

مراد أخذ رغد ودخل الكافيه بكل كبرياء. مراد: من أولها كده عملتي مشكلة. رغد: يعني إيه حضرتك هو اللي وقفني وقال ممنوع أدخل بالنقاب. مراد بعصبية: أنا عارف كل ده. كان ممكن تتصلي من الأول بس إنتي وقفتي تتكلمي معاه واتأخرتي 5 دقايق. رغد: حضرتك أنا كبيرة وأقدر أحل مشاكلي بنفسي. مراد: واضح جداً. رغد: ممكن أعرف إنت مين؟ مراد: أفندم. رغد: يعني حضرتك مين عشان تقدر تطرد مدير الكافيه كده بمنتهى السهولة؟ مراد: صاحب الكافيه مثلاً.

رغد: اممم بس اللي أنا أعرفه إنك صاحب شركة ستارز للأزياء. مراد: عندي مجموعة من الشركات مش بس شركة ستارز للأزياء والكافيه ده برضه. عندك مانع؟ رغد بإحراج: احم لا أبداً. أنا آسفة إني كنت سبب غير مباشر للتأخير. اتفضل حضرتك ده الـ C.V بتاعي. مراد بإعجاب بعد ما ألقى نظرة على الـ C.V: تمام. هتبدأي من بكرة. رغد: بالسرعة دي؟ مراد: معنديش وقت أضيعه والـ C.V بتاعك مناسب. اتفضلي امضي على الورق ده. رغد: ليه كل ده؟

مراد: كان المفروض ليكي 5 دقايق تقريهم بس إنتي ضيعتي الوقت ده. رغد بدموع: على فكرة أنا اعتذرت مع إن دي مش غلطتي وحضرتك السبب أصلاً إنك مش فاضي تعرف إيه اللي بيحصل في الكافيه بتاعك. مراد عارف إن معاها حق: طيب ممكن تاخديهم دلوقتي وتجيبيهم معاكي بكرة الشركة بعد ما تمضيهم. رغد: امم ممكن أسأل سؤال؟ مراد: بسرعة. رغد: داليا أسيسنت حضرتك كانت هي اللي هتقابلني النهارده. هي كويسة؟ عشان حضرتك يعني اللي جيت بدالها.

مراد: آه كويسة. الميتنج خلص اتفضلي تقدري تمشي. رغد في سرها: إيه التكبر ده. بس يستاهل الصراحة. إيه ده استغفر الله. رغد أخذت الورق وهي باصة في الأرض وقالت: السلام عليكم. ومشيت. مراد بإبتسامة بعد ما مشيت: وعليكم السلام. رغد ركبت تاكسي وهي بتفكر. قررت تروح تقضي اليوم عند باباها.

(رغد باباها ومامتها منفصلين لسبب هنعرفه بعدين. وهي قررت تصرف على نفسها من أول يوم اتخرجت فيه وبقت تاخد كورسات أونلاين في لغات كتير. وكانت متابعة دايماً عروض الأزياء اللي بتعملها ((شركة ستارز) ) دي واحدة من أكبر شركات الأزياء في مصر والعالم كله. كانت بالنسبالها مجرد حلم مش أكتر. لأن أغلب الشركات العالمية ليها أوتفيت معين ممنوع الحجاب والنقاب. مين ممكن يسمحلها تدخل هناك حتى لو عندها موهبة زي التصميم اللي محدش يعرفها.)

وهي في التاكسي مقدرتش تصبر. عايزة تشوف إيه اللي مكتوب في الورق وتمضي عليه وتخلص. هي أصلاً مش مصدقة لحد دلوقتي. الورق كان موجود في دوسيه شفاف عبارة عن 4 ورقات. الورقة الأولى مكتوب فيها كل حاجة مسموح بيها وكل حاجة ممنوعة في الشركة زي مثلاً: ممنوع استخدام التليفون أثناء العمل، ممنوع الأكل أثناء ساعات العمل، وغيرهم كتير. رغد وهي بتضحك: مش معقول بجد ده. فاكرنا في مدرسة؟

ممنوع الأكل، ممنوع الشرب، ممنوع التليفون. ناقص يقول ممنوع دخول التويلت كمان. الورقة الثانية: مكتوب فيها شروط كتير لازم تقبلهم. من ضمنهم البقاء في الشركة اليوم بأكمله إذا استدعى الأمر، السفر خارج مصر في أي ميتنج، وغيره. رغد لنفسها: أنا مستحيل أضيع الفرصة دي. يبقى مش لازم أكمل قراية عشان أمضي وكده كده هقرأهم بليل عشان أعرف باقي القواعد.

وقعت على باقي الورق بفرحة وهي بتتخيل إنها خلاص بقت أسيسنت لصاحب الشركة اللي نفسها تدخلها طول عمرها. وهي متعرفش إن ده هيسبب لها مشاكل كتير بعدين. في منزل والد رغد... رغد: السلام عليكم ورحمة الله وبركاته. والد رغد واسمه عبد الله: عليكم السلام ورحمة الله وبركاته. جاية بدري النهاردة؟ رغد: عشان وحشتني. مقدرتش أستنى لحد العصر.

عبد الله وهو بيحضنها بحب: وإنتِ وحشتيني أكتر يا حبيبتي. اطلعي أوضتك غيري وتعالي عشان عايزك في موضوع مهم. رغد: من عيني. بس هي فين ماما مروة؟ عبد الله: لسه نايمة. يلا بسرعة يا رغد. رغد طلعت بسرعة على أوضتها وغيرت هدومها واتوضت ولبست إسدال. كانت هتنزل بس سمعت صوت تخبيط. رغد افتكرت مرات أبوها لأن مفيش حد تاني في البيت: أخيراً صحيتي يا ماما مروة. صوت رجولي هي عارفاه كويس: لا ده أنا يا رغد.

رغد بصدمة ومش مصدقة إن الشخص اللي مصدقت تخلص منه رجع تاني: رعد!!