تاليا بتوتر: مروان بعتلي مسج.
روح باستغراب: إيه؟
تاليا: بيقولي ازيك.
روح ضحكت جامد: طب وإنتي متوترة أوي كده ليه؟ ما إنتي كنتي عايزاه يكلمك أصلاً. على العموم، إنتي عارفة إننا هنعمل حفلة عشان جوازي أنا وأسر وهو جاي.
تاليا توترت أكتر: هـ.. هييجي؟
روح بضحك: أيوه، كلمت أسر من شوية وهييجي. مستنياكي بكرة.
(وكملت بتحذير) وإياكي متجيش، إنتي فاهمة.
وقفلو مع بعض.
تاليا فضلت باصة للرسالة شوية وبعدين ردت: الحمد لله.
شافها في نفس الوقت.
*هشوفك بكرة.*
تاليا ابتسمت: أيوه.
*وحشتيني.*
تاليا اتصدمت أول ما شافت الرسالة واتوترة أوي.
(مروان وتاليا كانوا بيحبوا بعض أيام الجامعة بس اعترفوش لبعض ومروان سافر لسبب).
في مكان تاني:
"أنا اللي بحبها وبسبب الزفت ده سبتني."
"احترم نفسك يا جدع إنت."
"إنتي مش قولتي هتساعديني آخدها ونبعد؟"
"أيوه قولت، بس مش معني كده هسيبك تتكلم عليه بالأسلوب ده. وكمان مش هسمحلك تأذي. كل اللي أنا عايزاه إن البت دي تبعد عنه."
"تمام. في الحفلة..."
"ده إنت طلعت دماغك سُم."
ابتسم بخبث: "روح ليا أنا وبس."
عدى اليوم وجه وقت الحفلة.
كانت روح جميلة أوي وفرحانة أوي، وأسر كان متابعها بعيونه وفرحان أكتر.
(روح وأسر حبوا بعض 4 سنين من أيام الجامعة، وبعد ما اتخرجوا اتقدم ليها واتخطبوا سنة).
أسر قرب منها وحضنها جامد وباسها من جبينها: مبسوطة؟
روح بفرحة: أوي.
أسر ابتسم وحضنها أكتر.
زين بابتسامة: الله على الحب وجماله.
أسر أول ما سمع صوته كشر.
روح بصتله وهمست: أسر عشان خاطري، اهدي.
أسر بصالها بابتسامة: حاضر.
ابتسمت وبصت لزين وشافت جنبه مامتها وباباها: ماما.
جريت عليها حضنتها وحضنت باباها، وأسر قرب منهم وسلم عليهم.
والد روح: عارف لو زعلتها فيوم هعمل فيك إيه.
صوت من وراهم: هو يقدر يزعلها.
بصوا في اتجاه الصوت وكان والد أسر ومامت روح.
جريت عليهم وسلمت عليهم، وأسر برضو.
وبعد فترة جت تاليا وبعدها مروان.
روح بضحك: مالك يابنتي وشك اصفر كده ليه؟
تاليا: عمال يبص وامبارح قالي وحشتيني، أنا مش فاهمة حاجة.
روح: قالك وحشتيني؟!
تاليا بتوتر هزت راسها بالإيجاب وعملت نفسها مش فاهمة.
وقاطع كلامهم أغنية اشتغلت.
وأسر قرب من روح ومسك إيديها وبدأوا يرقصوا.
تاليا بصت في اتجاه مروان لقتوه جاي عليها: يالهوي، أكيد مش جاي ليا. لا.
مروان: إنتي بتكلمي نفسك.
تاليا بتوتر: ها، آه.. اا، لا.
مروان ضحك: تقبلي ترقصي معايا؟
تاليا بصتله بصدمة: هااا؟
مروان مسك إيديها وبدأوا يرقصوا.
تاليا: إنت بتعمل إيه؟
مروان: بنرقص.
تاليا: لأ مش عايزة.
(ولسه هتمشي مروان شدها ليه).
مروان: وحشتيني ياتاليا.
تاليا خلاص هيغمي عليها من التوتر.
مروان: بقالي سنة مشفتكيش من بعد الجامعة.
تاليا: إنت اللي سافرت.
مروان: غصب عني.
تاليا: غصب عنك إيه يامروان، إنت اللي كنت عايز تسافر بأي طريقة.
مروان: عشان كنت بحبك.
تاليا بصدمة: إيه؟!
مروان: أيوه بحبك، ولسه بحبك.
تاليا: طب ليه سافرت؟
مروان: عشان فكرت إنك مش بتحبيني.
تاليا: إنت غبي، ما تسأل مش يمكن كنت أعترف بـ...
مروان: تعترفي بإيه؟
تاليا: احم، ولا حاجة. ارقص وإنت ساكت.
مروان ضحك: مجنونة، بس بحبك.
تاليا ابتسمت بكسوف وبصت في الأرض.
روح بابتسامة وهي بتبص لمروان وتاليا: شكلهم حلو أوي.
أسر: طب ممكن تبصيلي بقا شوية.
روح بصتله وضحكت: إيه ياحبيبي.
أسر غمزلها: شكلك حلو أوي.
روح بغرور: عارفة، وإيه الجديد؟ أنا علطول قمر.
أسر بابتسامة: طبعاً.
الأغنية خلصت وقرب منهم واحد لابس كاب وفي إيده صينية عليها كوبايات عصير.
روح: جيت في وقتك.
وخدت منه كوباية عصير شربتها.
بعد فترة.
تاليا لأسـر: هي فين روح؟
أسر: قالتلي إنها راحة الحمام.
تاليا: تمام.
وراحت لروح ومش لقتها هناك، بس لاقت الإسورة بتاعتها واقعة على الأرض.
خرجت جري لاسر وقالتله.
أسر: هتكون راحت فين؟
وفجأة...