رواية رسالة قدر الفصل الثالث 3 - بقلم لارين كمال

فاكر البنت اللي كنت بحلم بيها من سنين؟ ياسين: أيوه، ودي مالها ومال البنت دي؟ يحيي: يا غبي، ماهي دي نفس البنت. ياسين: أنت عاوز تفهمني إن هي دي اللي كانت من ٧ سنين وكل عقلك وكانت دايماً بتجيلك في أحلامك، وكنت هتتجنن وتشوفها على الحقيقة، وعاوز تفهمني إن هي دي نفس البنت اللي حبيتها في حلمك؟ يحيي: أيوا بالظبط، بس صدقني الموضوع مش حكاية حب والسلام. ياسين: اومال حكاية إيه؟ يحيي: حكاية عشق، أو تقدر تقول إن دي رسالة من القدر.

ياسين: يا عيني يا عيني على الناس اللي بدأت تحب، عيشة وشوفت يحيي إبراهيم زيدان بيحب، جدعان! يحيي: وطي صوتك، الله يخربيت أهلك، هتفضحنا. ياسين: طيب ناوي تعمل إيه معاها؟ يحيي: مش هسيبها أكيد، يعني أنا مصدقت لقيتها. ياسين: ادخل. فرحة: اتفضل يا يحيى. فرحة: اتفضل يا ياسين. ياسين: فرحة، انتي حطيتي ٤ معالق سكر زي ما قولتلك؟ فرحة: أيوا يا حبيبي، عاوزين حاجة تاني؟ ياسين ويحيي: لا، شكراً. بعد ما خرجوا:

يحيي: أختك لسه في ثانوي صح؟ ياسين: آخر سنة أهي وهتدخل صيدلة إن شاء الله. يحيي: ربنا معاها. ياسين: يارب. *** ترن ترن ترن. تالين: الو. محور: أي يا بنتي، كل دا نوم؟ قومي، رنيت أكتر من ٥٠ مرة. تالين: أي عاوزه إيه؟ عاوزه أنام. محور: قومي يلا، عاوزه أتكلم معاكي في حاجة. تالين قامت وقعدت على السرير وقالت بكسل: ها يا ستي، إيه فيه؟

محور: بصي، عيد ميلاد صاحبة أختي يوم الخميس، وهي كلمتني وعزمتني، وطبعاً أنا مش هعرف أروح لوحدي، وأكيد أختي نور هتروح، وأنا هبقى واقفة زي قرد قطع لوحدي، فعاوزاكي معايا، ومتقلقيش، الهدية هنجبهالها سوا، قولتي إيه؟ تالين: قولت تصبحي على خير، يلا سلام. محور: لا لا لا، استني، يخرب عقلك، أهدي كده وفوقي معايا واتكلمي جد، عشان خاطري تعالي معايا، مكسلة أروح والبت عزمتني، وأنتي هتونسيني.

تالين: يارب الصبر من عندك، انتي قولتي عيد الميلاد إمتى؟ محور بفرح: يوم الخميس. تالين: ها هتيجي؟ محور: أيوا. تالين: ويلا اقفلي قبل ما أغير رأيي، سلام. محور: سلام يا موزتي. يوم ورا يوم، وجه يوم الأربع. *** أم أحمد: مالك يا حبيبي؟ أحمد: مليش يا أمي. أم أحمد: لا، دي مش من عوايدك، القعدة لوحدك كده وقلة الأكل، وكمان لي مش بتكلم تالينا؟ أحمد بتمثيل: لأننا سبنا بعض. أم أحمد: يخبر أبيض! لي يا ابني؟ أي حصل؟

أحمد: مش عارف، مش عارف يا أمي، أي حصل. أحمد: طيب يا ابني، احكيلي أي حصل، وأنا هكلم أمها ونحاول نصلح اللي حصل بينكم. أحمد: مفيش يا أمي، حاجة هتتصلح خلاص، وهي مش هترجعلي تاني، أنا بحبها أوي يا أمي، هي إزي هان عليها تبعد وتسيبني. أم أحمد: يا قلبي، طيب متعيطش، هي غلطانة إنها سابتك، حقك عليا أنا، بكرة ربنا يعوضك باللي أحسن منها، بس إنت متزعلش، إنت تستاهل كل خير يا قلب أمك. (طبعاً يستاهل، بس يستاهل اللي هيحصل فيه)

أحمد بدموع تماسيح: سابتني وأنا بحبها، كسرت قلبي، أنا مش هسامحها أبداً. أم أحمد: منها لله، معلش يا حبيبي، ربنا يعوضك ويرزقك باللي أحسن منها، وبكرة أوعدك هجوزك ست ستها. أحمد: يخليكي ليا يا ماما، يا حبيبتي. (ابن أمك أوي، يلا) جه يوم الخميس. *** أم تالين: هتنزلي إمتى يا حبيبتي؟ تالين: خلاص أهو، أي رأيك؟ شكلي حلو. أم تالين: قمر يا ست البنات كلهم، ربنا يحميكي من العين يا رب، خلي بالك من نفسك.

تالين: حاضر يا ست الكل، استني، تلفوني بيرن، هشوف مين.