رواية سعوديات في بريطانيا الفصل الثالث والستون 63 - بقلم angel

بو رائد يصرخ من اعلى صوته : والله لاربيس من جديد شكلي عطيتس وجهك بزياده

ذوق تناظر امها وهي تبكي : بابا ماما ايدي شعري .. ماما شعري آه .. انا وش سويت

بو رائد : انتي ماعرفتيني ياذوق لهاللحين وانا بعلمتس من ابوتس ..

ام رائد تمسك ايد بو رائد : عبدالعزيز اترك البنت بتكسر ايدها ليه كل هذا ..وش هي مسويه ..؟

بو رائد دف امها بقوه : ابعدي لاتوطى بكرشتس ..
و شد شعر ذوق لقدام ثمن لورى بقوه : بتهربي معه ها ... ماعاد الا هي .. ناويه تتركي هنا .. انا اغلطان اللي وثقت فيتس .. وبالاخير سودتي وجهي . الله ياخذتس فضحتينا

ذوق تمسك ايد ابوها تحاول تتخلص من الالم : بابا تكفى شعري بابا ..

جرها من شعرها : كلي تبنس وانثبري هنا ... وين جوالتس وينه ..؟

ذوق: آه بابا خلاص تالمني بابا اتركني

بو رائد رامها على السرير لحد ماضرب راسها بالخشب : آه

ام رائد ركضت لها : ماما ذوق

مشى لعند الالاب توب واخذه وسحب الجوال من الطاوله : ابغى اشوف كيف بتحاتسين حبيبتس

ذوق بكت اكثر : بابا انا ذوق بابا ليه تعمل كذا ..

ام رائد :البنت وش سوت ...

بو رائد : انثبري انتي وانقلي بره بسرعه

ام رائد: ايه وش فيها البنات ليه كل

بورائد سحب ام ذوق من ايدها وطلعها بره الغرفه وطلع هو : انا بوريتس كيف تحبيلتس واحد منحط مثل فيصل ..

ذوق ركضت لعند ابوها : بابا وش فيه ..؟ بابا انا وش سويت ..؟

بو رائد : الله يسود وجهتس مثل ماسودتي وجهي

ذوق تمسك بيد ابوها وهي مقطعه نفسها بكي .. : بابا و

بو رائد رماها بقسوه على الارض : ابعدي الله لايوفقتس ..
سكر الباب وقفله قفلتين بالمفتاح ...: مالتس طلعه من هنا الا على قبرتس

ذوق : بابا ماما ..ماااااااما ... ماما ليه كذا

ام ذوق بانفعال : عبدالعزيز ليه تقفل على بنتك

ذوق تطق الباب : ماما ليه ..؟ بابا ايش فيه ..؟

ام ذوق : افتح لبنتي والله بتنجن وهي تصرخ كذا ..؟

بو ذوق : كلي خراتس بنت وحده ومانتي عارفه تربينها

ام ذوق بتهديد : عبدالعزيز اذا مافتحت هاللحين لي تصرف ثاني

ذوق تسمعهم : ماما تكفين خليه يفتح ليه يسوي معي كذا ..

بو ذوق فتح جواله : شوفي .. شوفي سواد وجه بنتس .. والله لادفنها حياء

ام ذوق خذت الجوال وهي ترتجف وقلبها ناغزها .. شافت مقطع لذوق ترقص مع فيصل وهم قراب مره من بعض ... ومكتوب عنوانه (( فضيحة ذوق الباقي ))

بو رائد: شفتي بعيونتس في بنت متربيه تسوي كذا وهذا المقطع نقطه ببحر من المقاطع المنتشره .. سودت وجهي الله يسود وجهها ... اليوم ماقدر اناظر بالفراش بالمكتب والبركه ببنتتس اللي فضيحتها على كل لسان

ذوق خمنت الا تاكدت انه الفديو اللي صورته مع فيصل ببريطانيا هو اللي يحكي عنه ابوها بس كيف انتشر وفيصل معطيها الاغراض ... اكيد ان عنده نسخه منهم ...

وقفت وهي تصرخ : النذل الحقير

رمت كل الاغراض اللي على التسريحه : كذاااااااب ****** ..

بو رائد : اسمعي من بكره تروحي وتكشفي على بنتك مسودت الوجه

ام ذوق تناظر الباب وتفلت عليه : تفوا عليك يا لقذره ..جد ماعرفنا نربيك

بو رائد : واحد ماندري وينه والله اعلم على ايش خامر والثانيه صايره من بنات الليل بصورها الله يلعنتس ويلعن عيالتس

ذوق بكت اكثر من وراء الباب : لااااااا يمه لا – تحس راسها ثقيل - ..والله كان معنا البنات .. والله ماني وقحه ..

طلال بالمستشفى يناظر رجله المحروقه والمشوهه (( هذي اخرتك ياطلال مشوهه انت الوسيم اللي البنات ماتقدر ترفض لك طلب من ابتسامتك الجذابه .. وضحكتك الرنانه ... آه ياربي ياليت الندم يرجع اللي فات .... جد الواحد مايعرف قيمة الشي الا اذا فقده ... ياليتني انتبهت للمويه ليه فتحت المويه الحاره بدل البارده كيف مانتبهت كيف .. له من نواره انا من يوم عرفتها وحياتي متلخبطه ... اكرهك ياونواره اكرهك )) غمض عيونه بقوه تخيلها وهي تغمز له ومبتسمه ابتسامته المرحه ..
- غض كف ايده بقوه – الله يلعنك هبلتي فيني .. كيف اهرك وانت مثل الطفله البرياءه اللي تسعد من حولها ..

انفتح الباب دخلت السستر : صباح الخير الزايك النهارده

طلال بدون نفس : مثل كل يوم

السستر حطت الورد على الطاوله اللي بجنبه : وادي احلى ورد

طلال : من مين هالورد ..؟

السستر ترفع الكرت : مش عارفه دي بنوته حلوه وصغيره ادتني اياها والتلي اوصلها الك

طلال يناظر الكرت بطفش
(( انا غلطت يوم اني جيت لك
اسفه شكلي ازعجتك ياستاذ طلال
بس كل ذنبي انك تمشي بعروقي
الله يرجعك بالسلامه لاهلك

مع تحياتي ..
نونو .. مثل ماكنت تحب تناديني ))

طلال عفس الكرت بايده مقهور : ليه ماتنساني ليه ..؟ مع كل اللي سويته وراجعه تسالين ..؟

السستر : اولت ايه يافندم ماسمعتكش ..

طلال وعيونه مغرقه : وينها ..؟ وين اللي اعطتك الكرت

السستر : دي كانت بتعيط وبينها خرقة من هنا لاني شفتها تمشي لعند البوابه

طلال تنهد (( الله يعلم انك ماتهوني علي واني بنجن علشانك ... ))

%%%%%%%%%%%%%%%%%%%

بنفس المستشفى لكن بجهه ثانيه ..

ام البندري تمشي بسرعه وعبايتها تطير معها : محمد يمه محمد وينها

محمد : يمه مريم وش مجيبكم

مريم : تاخرت علينا وانت ماترد خالتي مارضيت الا تجي

ام البندري : محمد اختك وش فيها .. الجنين صار له شي

محمد بصدمه وعصبيه : يعني كنتي عارفه ان الهبله حامل

ام البندري : ها ا

محمد: الله يسود زوجهها كيف ..؟ كيف تفكر هي مع هذا االمراهق

مريم : محمد وط صوتك حنا بمستشفى ليه الصراخ وبعدين البندري ماغلطت لاسمح الله حامل من زوجها

محمد: والله هذا اللي كنت خايف منه .. انا الغلطان اللي عطيتهم حريه مع بعض

ام البندري : عاد صار اللي صار وهاللحين هي تعبانه ..وماله داعي تحاكيها

محمد : ابغى اعرف وش نقول لناس

مريم : لاحول ولاقوة الا بالله لاحول ولاقوة الا بالله ...

ام البندري بكت : يارب رحمتك بهالصغيره يارب

محمد : وش نفول لناس هاللحين وين اودي وجهي وهذا زوجها من ايام ماحنا بعارفين عنه شي بعد ...

مريم: محمد ..خلاص

ام البندري عصبت : الناس مالها شغل واي احد يتكلم على بنتي اقطعه له لسانه

محمد: حنا عايشين مع الناس مو بغابه

مريم: محمد لاتجنني هي بالحلال وزوجته

ام البندري: الناس ماناخذ منهم الا كثر الكلام والا نسيت يامحمد وش قالوا عني لما قتلت ابوك

محمد تنهد : حسبنا الله ونعم الوكيل الهم اجرني في مصيبتي واخلف لي خيرا منها

ام البندري : هي وينها وش قالوا

محمد : داخل التحاليل من الفجر عاملينها ومابعد توصل يقولوا في خطر على الجنين لازم ترتاح لحد الولاده لان شكلها بتولد بدري بالشهر السابع يعني

مريم وام البندري شهقوا : لاحول ولاقوة الا بالله

محمد: وزوجها الدلخ هذا وينه ..؟ مافي اخبار عنه ..؟

مريم : لا علمنا علمك ..

ام البندري : نبغى ندخل نشوفها

محمد: هي نايمه هاللحين يمه اتركيها ترتاح وبعدين ادخلي شوفيها ..

مريم ابتسمت : هي باي شهر والا ماعرفت

محمد مقهور : الرابع ...

ام البندري : يعني فيه روح

محمد : والله لو مافيه روح كان من زمان منزله

ام البندري خافت على بنتها من اخوها : لا ماتسويها انا عارفتك انت مجرب حرمان الضنى لفتره علشان ماتسويها

محمد: انا بدق على ابو رائد اقوله يمكن يعرف شي عن ولده ..

%%%%%%%%%%%%%%%%%%%%%%

رائد على عينه ربطه .. مغطيه عينه .. : اقولك ماعرف شي ..والله ماعرف كنت مع خويي ياسر

الشرطي : اسمع انكارك هذا ماينفع انتم شباب ليه تدمروا انفسكم بهذا الارهاب

رائد : اي ارهابي ياعمي ان وش لي بهذي السوالف اصلا انا ماحب هذي الحركه

الشرطي : يعني مو راضي تعترف انتم تبع مين ..

رائد شوي يبكي : لاحول والله ماعرف احد حنا كناا رايحين لمصر و

الشرطي يقاطعه : وبعدين معك من اربع ايام وانت ماعندك الا هذا العذر ...

رائد: لاحول ولا قوة الا بالله حسبي الله عليكم حسبي الله عليكم

الشرطي : لا تقعد تتحسب لو تعرف ربك كان ماخنت بلدك و اهلك انت عارف ان

رائد: يوووووه انت بن ****** ماتفهم اقولك ماعرف عن ايش تحكي

الشرطي : حنا نعرف نخليك تحكي يا عسكري خذه لسجن وشممه هواء

رائد: لاااااااا الا الهواء لا .. وش تبيني اقول اقول شي ماعرفه . والله مالي علاقه ..

الشرطي : ياعسكري خذه ..

رائد يحاول يفلت من ايد العسكري بايدينه المربطه : والله مالنا دعوه اقسم لك اني رايح لمصر .. حاكوا ابوي ابغى ابووووي

العسكري : امشي وانت ساكت لو انك تخاف على ابوك كان مامشيت ورى هذي الفئه الظاله ..

رائد بقله حيله : والله ماعرفهم والله انا كنت رايح لمصر

مسفر : ها حياتي وين حابه تتغدي

لوجين : امممممم اي مكان .. اهم شي انا معك

مسفر : وش رايك بدارين ناخذ لنا شي بحري من اللي يحبهم قلبك ..

لوجين : اوكيه ...انا تحت طوعك وامرك .. ياسي السيد

مسفر : هههه تسلمين لي ..

لوجين تعد مع ثواني الاشاره كم ثانيه وتفتح .. : سوسو

مسفر : ههههه وانتي كل يوم لك دلع

لوجين : هههه اللي يلطع معي ..

مسفر : خذي راحتك يالولو

لوجين: لا احب لجو وبس

مسفر : وش معنى

لوجين : كذا بابا كان كاتب للي بالوصيه كذا

مسفر : اها امري يالجو وش بغيتي

لوجين : انت تبغاني البس مثل البندري برقع والا عادي مايفرق عندك ..

مسفر : والله كنت حابه احكي معك بهالموضوع لكن بعد مانتزوج وبما انك فحتيه .. ابقولك اني اغار عليك موووووت ..وياليت تلحقي صاحبتك

لوجين : اسفه مسفر ماقدر اتركها للوقت احسن يمكن اقتنع

مسفر بحلم : اوكيه حياتي خذي راحتك

وقف قبال المجمع : يله الغداء

ذوق عند الباب تبكي : ماما ...ماما افتحي بابا افتحوا لي
ماما تكفيييييييييين ماما ادري انك هنا افتحي لي

ام ذوق من ورى الباب : ليه ..؟ ليه ياذوق عملتي كذا ليه خنتي ثقتنا فيك ليه ..؟ والله لو ما ابوك يحبك كان هاللحين ذبحت

ذوق : ماما والله مالي دعوه كان معنا بالجامعه و

ام ذوق : اسكتي لك عين تحاكين عنه ...

ذوق تضرب الباب برجلها : ماما افتحوا ماما لاتصيري انتي والزمن علي

ام ذوق : انا ماعندي بنت اسمها ذوق .. ذوق تزوجت وسافرت لبريطانيا .. ماهي بعندنا

ذوق : لا يا ماما انا بنتك ماما لاتقسين علي

ام ذوق مشت وطنشتها .. مشت ودعتها بخدها على بنتها كيف ذوق الهاديه الحبوبه يطلع منها كل هذا

ذوق وقفت ورجلها ترتجف كل جسمها يرتجف ... اللي شافته مو قليل جائين يزيدون عليها : الله لا يسامحك يافيصل الله لايسامحك ...

دقت الباب بقوه : افتحوا افتحوا ... افتحوا لي ..

نواره جالسه بالكوفي شوب حاطه ايدها على خدها
تناظر الناس الرايحه والجايه والحركه المستمره كل شي حولها يتحرك الا هي ساكنه وساكته ... كل الناس تضحك وتمزح الا هي حابسه دموعها بداخلها .. حتى ذوق مالها خلقها وسكرت بوجهها وماترد ..

الوتر ينظف الطاوله : تبغي شي ثاني

نواره : لا شكرا ..والا اقولك جيب لي قوه تركيه بدون سكر

الوتر : حاضر ..

نواره ماسكه جوالها (( ليه مارسل بدل الطفش )) غيرت نكها وكتبت " متكحله بدم خاينها " تحس انها متكحله بدم طلال .. مهما عمل لها يضل حبيبها وتحبه مهما قسى وجار عليها يضل بعيونها كحل يزين حياتها ... يضل الحبيب والشجاع والشهم بنظرها

جاءها بلوتوث من " بقايا جروح " واحد من الشباب اللي مملين الكوفي ..

(( انا خالد حاب اتعرف وهذا رقمي *******050 ))سيف يناظرها مبهور بجمالها

نواره طلعت بوكها من الشنطه وكانت صورتها مع طلال يوم التخرج غرقة عيونها كانوا مبسوطين سوا مايربطهم شي مع بعض الا مشاعر الاخوه والصداقه { طبعا هذا اللي تفكره نواره ماكنت تفكر طلال يحبها بهذيك الفتره **

سيف لما شافها كذا عرف انها بتحاسب وتمشي وقف بسرعه يلحق عليها قبل لاتمشي

نواره حطت الحساب على الطاوله ومسكت شنطتها الا انتبهت باحد يسحب الكرسي ويجلس وكانت نفس العيون العسليه قبالها رجعت الشنطه لحضنها وارتخت بالجلسه عارفه لهالاشكال ماتفك الا اذا انطردت بادب

سيف : ممكن اجلس معك ..؟

نواره : انت جلست مانتظرت شي ..

سيف : وحده اموره مثلك تجلس لوحدها ليه

نواره ناظرته وهي رافعه حواجبها : ممكن تتفضل لطاولتك ..

سيف : ليه كذا ليه الحزن بعيونك ..؟

نواره : ياحبيب ديمه تفضل لطاولتك

سيف : لا مايهون علي اتركك وانتي متضايقه كذا

نواره مقهوره محتاج تحكي مع احد بس اكيد مو هذا (( الله ياخذكم تعرفون كيف تدخلون على البنات ومن اي مدخل )) رفعت جوالها الممتلي اكسسورات وبينت ايدها الناعمه واظافرها الحمراء الكيوت ..: اوكيه اجلس براحتك
: هالو .. اكبر ..

اكبر : يس نواره

نواره : ليكرو كاري جلدي (( احضر السياره بسرعه ))

اكبر : كاه ((اين ..؟))

نواره : اووو روكو فيصليه (( تعال وقف بالفيصليه ))

اكبر : اوكيه

سكرت وناظرت المفهي والمستغرب اللي يناظرها ..

نواره : اخوي بيجي وشرايك يعني يجي يشوفك كيف بيصير شكلي ..

سيف : انتي هنديه ..؟

نواره: ايوه بس عايشه بالسعوديه ..

سيف : اها

دق جوال سيف بلوتوث فتحه ..وابتسم : ايش هذا كيكه ..

نواره وقفت : فرصه تعيسه

سيف : لحضه شوفي هالبلوتوث خطير

نواره تبغى تفتك منه سبحت الجوال بدون نفس ...ومع الاسف ياليتها ماشافته ..
" ذوق الباقي تداعب حبيبها "
ذوق تلعب بشعر فيصل ويضحكون
نواره شهقت : ذوق ..؟

سيف : ماعرفتيها بنت تاجر السيارات معارض الباقي .. ايش هذي قطعه ..هههه جد بنات الفلوس رايحيين فيها

نواره وقف شعر جسمها من الخوف : ارسله ارسله لي

سيف بخبث : تامرين امر

مجرد ماستقبلته ..مشت بسرعه لبره المجمع وكل الافكار براسها هذي ذوق كيف ومن وين هذي الصور

انتبهت باكبر واقف عندها : نواره جلدي

نواره مشت وراه : لبيت ذوق بسرعه ..

الافكار اخذتها وجابتها اكيد اكيد هذا فيصل النذل على باله انها تزوجت ويبغي يطلقها .. ياربي ابوها ورائد ماشافوه يارب ماينتشر .. بس مدامه انتشر بالفيصليه اكيد الرياض كلها دارت هاللحين

بالسياره

اكبر : نواره هذا انت متى يجي ساعوديه

نواره: وانت وش دخلك ..؟

اكبر : ليه مافي يجي بيت بابا كبير

نواره: اكبر مالي خلقك اسكت خلاص

اكبر : نواره ماما كبير في يضرب بابا كبير ويطلا من البيت

نواره : كيييييف ..؟

اكبر : انا في يودي بابا كبير مستشفى وبادين في جيب لانو هذا ماما مو ..جين ..

نواره عصبت : وهذي كيف تضربه مو هو – سكتت مقهوره مو لاقيه حكي تقوله .. وهمها مع ذوق المفضوحه اكبر من مشاكلها مع امها وابوها اللي مايملون من بلاويهم –

اكبر : في يودي بيت بابا والا بيت زوق

نواره: لا بيت ذوق وكل تبن عورت راسي

اكبر : ........

الجوري جالسه تلعب مع بدر (( ورقه ...سولتير .. جنجفه)) على السرير ..

بدر : الجوري بذبحك غشاشه ...

الجوري: ههههه لحد هاللحين ماعرفتني ..انا اكبر غشاشه بهذي اللعبه من شلة مانشستر

بدر : شله مانشستر ...من هذولا ..؟

الجوري: هههه انا والبندري وذوق ولوجين ونواره اسمنا شلة مانشستر ..

بدر: اهاااااا قولي كذا وانتي احلاهم

الجوري : اكييييد انا ام العيون الزرقاء

بدر: مايمدحون الغرور

الجوري: هههههه بذمتك مايحق لي

بدر: اكيد انتي قلبي ولازم احلاهم ..

الجوري : ههههه

بدر: لاتضيعين الموضوع وتضحكين علي العبي بس العبي

الجوري: بدوررررري

بدر: عيونه

الجوري: تذكر المكرونه السباكتي اللي بلندن هذاك اليوم

بدر: هههه اللي اشتهيتيها وماكلتي ايوه اذكرها وش فيها

الجوري: وش رايك تسويها لي هاللحين نفسي اذوقها

بدر: لا ماينفع مافيه مطبخ

الجوري: نسويها تحت عادي

بدر: احلفي وش يريحني من رنده ورناد

الجوري رمت الاوراق : طيب انا طفشت هنا

بدر: اها قولي كذا طفشتي مني حراااام عليك وانا اللي مابغى ازور طلال علشانك

الجوري: لا والله مو كذا ليه مانطلع ..

بدر: وين ..؟

الجوري: اي مكان لكوفي المطعم الممشى .. ايوه ليه مانمشى بشارع الملك عبدالله والله وناسه ونخفف وزن

بدر: البسي ويله ..

الجوري : يعني رضيت

بدر: اكيد .. انتي تتدللين

الجوري اول مره حد يدلعها كذا ومايرد لها طلب : بدوري اموت عليك

بدر : لا مو وقت موت مابعد طفشت منك

الجوري راحت تلبس عبايتها : صحيح تذكرت ابغى امر بيت عمي واجيب ملابسي من بيت عمي

بدر: اوكيه انا بنتظرك تحت

الجوري: لا ااا تكفى اجلس هنا اخاف ان ام سعود تغثك بكلامها

بدر فهم عليها ومشى لعندها وباس راسها : لاتخافي والله لو ترمي ام سعود نفسها من الدور العاشر ماتغيرني عليك ..

الجوري ريحها كلامه كثير تحبه الا تعشقه

البندري فتحت عيونها بثقل بس تحس انها مرتاحه اكثر من قبل تنفست بقوه تبغى نفس هي لحد هاللحين عايشه اعجاز كانت فاقده الامل تعيش مره ثانيه بعد اللي شافته امس لفت راسها شافت امها نايمه وهي مستنده على ايدها رحمتها وحست انها غبيه لما زعلتها هذي الحنون تستاهل تنحط على الراس ....((يوه يمه دامك تعبتي فيني مثل مانا تعبانه من الحلو تستاهلي اشتغل خدامه تحت رجلينك ))
– حطت ايدها على بطنها – وينك يارائد وينك ..؟
-نزلت دمعه من عيونها ..-: ارجع محتاجين لك انا والبيبي ..

مسحت دمعتها : يمه يمه

ام البندري بخوف : هاه وش فيه ..؟ - لما ركزت ابتسمت - يمه صحيتي

البندري : الله يهداك يمه ليه نايمه هنا ..

ام البندري مبتسمه : الحمد لله على السلامه

البندري: الله يسلمك .. يمه وش صار ..؟

ام البندري مسكت ايدها: الله يقومك يالسلامه الدكتور يقول لازم ترتاحي بالسرير لحد ماتولدين

البندري انفعلت : اولد ..؟ كيف ورودي والزواج بعد اسبوع

ام البندري : صحتك اهم

البندري ارتبكت وقالت بخجل : يمه مافي اخبار عن رودي

ام البندري هزت راسها : لا

البندري : وينه .. ليه يسوي كذا ؟

ام البندري : لاتخافي الغايب عذره معه ..

البندري : لكنه طول يمه طول

ام البندري: لا بيرجع واكيد فيه شي ..المهم – ابتسمت تغير الموضوع - توقعي كم شهر صار لك ..؟

البندري ابتسمت بفضول : كم شهرين

ام البندري بخبث : لا شكلكم من يوم الملكه .. اربعه شهور يا قلبي ..

البندري خدودها صارت حمراء : يعني فيه الروح

ام البندري: ايوه واتوقع انها بنت

البندري: لاااااا يمه مابغى بنت ابغاه ولد

ام البندري: ليه ..؟ شمعنى ..؟

البندري: لان اذا بنت بتتعذب كثير بتحب وتنجرح وتنخان .. بتنصدم بحياتها كثير ..

ام البندري :لا ليه كذا ليه متشائمه

البندري: الا البنت حساسه اما الولد قوي ويقدر يطنش حبه وماينجرح بالخيانه

ام البندري: هههه على بالك ماله قلب ..

البندري: يمه تتوقعي رائد وين هاللحين ..؟

رائد ...
جالس بالسجن الضيق مره وكانه حمام ..
يحس انه مخنوق ومو قادر يتحرك الضرب اللي شافه مو سهل حتى النور ممنوع عنه لانه متهم بالسياسه والتهم السياسيه مو سهله ..
نزلت من عيونه دمعة قهر وظلم : والله ماعرف شي والله

اصعب شعور بالعالم كله الشعور بالظلم والقهر .. أصعب شي تصرخ وتسمع صدى صرخاتك ..: يالله ياررررررررررررب يارب ..

بالسوبر ماركت

لوجين : مسوسي وش رايك بهذا الكريم شكله حلو

مسفر : مادري عندك خذيه

لوجين : مو لي لرنا

مسفر رفع حواجبه : لا من متى ..؟

لوجين : انا متفق معها اني بمرها اليوم معك

مسفر : بتمريها وين ....؟؟؟

لوجين : ببيتكم

مسفر : بيتنا .. لاااااا ماينفع

لوجين: ليه ..؟ رنونه عازمتني ..

مسفر : لا حبيبتي انتي مفروض ماتدخلي لبيتنا الا لما نتزوج ..كذا الاصول

لوجين تتثاوب : بدينا ...

مسفر : هههههههه

لوجين : لاتضحك انت عارف اننا ماراح نزور اهلك على طول بنروح لبريطانيا ..

مسفر مبتسم : والله انا جالس احاول مع منصور يجلس اطول فتره ببريطانيا

لوجين بانفعال : لا مابغى اجلس هنا ..

مسفر استغرب : وش فيها اذا جلسنا هنا

لوجين: انا بعد بكره او بكره برجع لبريطانيا اجهز هناك وبعدها لباريس ولس ..ليه اعور راسك ..يني بتنقل علشان جهازي .. – ارتفع صوتها - ومابغى اجلس هنا انا اكره السعوديه

لفوا عليها اللي واقفين يشترون

مسفراول مره يعرف انها كذا : لوجين لو سمحتي لاترفعي صوتك مره ثانيه ..

لوجين استحت وتلفت يمين ويسار تناظر اللي يناظرونها : اوكيه

مسفر : على بالك على طول بنعيش ببريطانيا ..؟؟

لوجين : اكيد شغلنا هناك انت بشركه وانا بشركه والب

مسفر : مو هنا نحكي بعدين تعالي نحاسب ..

لوجين ضبطت اعصابها (( وش فيك يالوجين مانتي بوجه سعاده او يوم حلو .. ليه تنكدي على نفسك بنفس .جد اني بقره اكيد مسفر تضايق ))
بهدوء قالت : اوكيه

مشى مسفر قبلها وهو حاط بباله كل الاحتمالات كل شي ممكن يطلع من لوجين بحكم عيشتها بره واختلافها عن عادات المجتمع هنا واكيد بتكره هذا المكان لانه يحرمها من ابسط الحريات التافهه ببريطانيا ..

لحقته لوجين ومسكت بايده : مسوسي اسفه

مسفر لف عليها مبتسم : لجونه مابيننا اسف حنا تعدينا هذي المرحله ..هاللحين انا انتي وانتي انا .. صرنا روح بجسمين

لوجين ريحها كلامه كثير حست انها مرتبطه باطيب قلب شافته بحياتها كلها ..هذا اللي يستاهل تضحي باي شي علشانه ..ولو يطلب منها تسكن بالبر والله لاتسكن وهي مغمضه دامه معها وحولها

************

نواره : هلا خالتي كيفك

ام ذوق بضيقه : هلا نواره تفضلي

نواره لما شافت وجه ام رائد شكت انها عرفت : وين ذوق ..؟

ام ذوق مرتبكه : طالعه ..

نواره : عرفتوا صح ..؟

ام ذوق منصدمه : انتي بعد عرفتي ..؟

نواره: ايوه ياخالتي البلوتوث منتشر بكل مكان ..

ام ذوق تضرب خدها : ياويلي عليك ياذوق فضحتينا الله يفضحك

نواره: لا ياخالتي مالها ذنب اكيد هذا اللي معها بالصوره مركبهم

ام ذوق : سود الله وجهها هذي مو مركبه حقيقيه واضح والا على بالك انا ماعرف

نواره : هي وينها هاللحين ..؟

ام ذوق : ابوها حابسها بالغرفه وماخذ عنها كل شي

نواره : كيف ..؟
طلعت بسرعه لفوق بدون استاذان ..: ذوق ذوق

ذوق سمعت صوت نواره ركضت للباب وتعثرت وطاحت ورجعت دموعها تحكي قهرها من جديد : آه نواره نواره

نواره تدق الباب : ذوق حبيبتي كيفك ؟.

ذوق: نواره حبسوني نواره والله مالي شغل ..

نواره دمعة عيونها لدموع صديقتها وصوتها المنهار بس تكلمت بقوة علشان ماتزيدها عليها : لاتخافي ذواقه انا اعرف كيف ارد لك حقك من هذا الحشره فيصل

ذوق : نواره تكفين طلعيني من هنا قولي لهم يطلعوني من هنا والله بنجن ..

نواره ترفس الباب برجلها : ولا يهمك انا بدبرها بس انتي هاللحين اسكتي

ذوق تشهق : نواره لاتتخلين عني .. لاتتركيني

نواره نزلت دموعها : والله ماكون بنت امي وابوي اذا ماربيت لك هذولا الحشرات ..

مشت بسرعه لتحت ولا عبرت ام رائد ..
نواره : انت يازفت ياكبر على المستشفى على طول

اكبر : حازر

ذوق تبكي : افتحولي تكفون افتحولي ..ماما افتحي

*************

الجوري ببيت عمها ..مع بدر

الجوري وهي تنزل الملابس من الدولاب بشنطه بسرعه : لا يانوره ابوديهم للبيت ..

نوره : يعني خلاص بتستقروا هنا

الجوري مشغوله بالشنط : لا بنرجع لندن اخوه يتعالج والا نسيتي

نوره : ابسالك الجوري بدر مايشتغل

الجوري وقفت وبيدها البنطلون صحيح بدر مايشتغل : والله مادري بس مامره سمعته يقول بروح لشغل وبعدين ابوه هو اللي يرسله الفلوس

نوره : يعني ابوه يصرف عليه

الجوري تصفط البنطلون : هذا الظاهر

نوره : اهاااااا ..

الجوري: الا نوره وين عبدالرحمن لحد هاللحين مارجع مع مشاري من جده

نوره : لا يقولوا ان مدرستهم عامله نشاط بالاجازه وحابه تستضيفهم اسبوعين

الجوري: مادري وش اللي خلاكم تودونهم لمدارس داخليه

نوره : احسن لهم ..

الجوري سكرت شنطتها : خلصت يله نوره باي تاخرت على بدر ..

نوره مبتسمه : الله يوفقك يارب .. مع السلامه

الجوري طلعت بشنطها الثلاثه : خلصت بدور

بدر ابتسم : كل هذولاء

الجوري: هههه ماكان عندي وقت اخذهم معي

بدر : يله مشينا

بالسياره

رفع جوالها : قبل لانسى في مكالمتين من هلاليه كول .. من هلاليه هذي

الجوري : هههههه نواره غريبه وش عندها داقه ..

بدر : كنت برد بس بما اني نصراوي متعصب كرامتي ماسمحت لي

الجوري: ههههههههههههه اذا حكيت معها بقولها ..والله لاتحقد عليك اكثر

بدر : ماعليك منها اعزمها على كوفي ترضى

الجوري : لا احلف

بدر : عادي نواره مثل اختي

الجوري: لا ياقلبي اليوم اختي بكره خويتي اسفه ..

بدر: هههه تغارين من صديقتك

الجوري: ايوه نواره خفيفة دم وتنحب بكره تقول اللي عندي ثقيلة دم وماتنطاق احول عليها احسن

بدر : هههههههه انتي مثل العسل على قلبي من قال انك ثقيلة دم

الجوري : امزح معك
دقت على نواره وكان جوالها مشغول ..

%%%%%%%%%%%%%

نواره دخلت للمستشفى والشر بعيونها مشت والشياطين تتنطط بوجهها ..
فتحت باب غرفة 190 من غير استاذان

لفوا طلال وراكان وبنتين على الباب وتوقف الضحك اللي كان مغرق الغرفه من دقايق ..

نواره ماهتمت لاحد عيونها كانت بعيون طلال ولا رمشت وهي تناظره وتصارخ..: اسمع انت ياحقير قول لصاحبك انه ماراح ينترك كذا .. والله ياطلال اني سكت عليك انت وربعك الحثاله كثير .. لكن اللي صار مع ذوق مراح اسكت عليه

اللكل : ؟؟؟؟؟؟؟؟؟؟؟؟؟
نواره : لاتناظرني كذا وكانك ماعملت شي انا عارفتك وعارفه غذارتك ..

راكان وقف : بنات تعالوا معي شوي

البنتين يناظروا بعض

-: من هذي ..؟

-: طلال ايش فيه

طلال: معليه هاجر ساره .. تركونا شوي

طلعوا البنات ومعهم راكان ..ونواره واقفه تناظره بحقد وتهز رجلها ..

طلال بهدوءتكلم .. بعكس قلبه المتخربط ومشاعره المندفه لها ((تعالي ياغلى الحبايب تعالي اجلسي بحضني وسولفي معي ..ابتسمي لي احكي معي خففي همي )): نعم ..؟

نواره ناظرته ماقد كرهت حد مثل طلال ..حست بكره مو طبيعي له : لاتستهبل انت عارف انتم وش عملتوا .. لكن والله ثم والله مراح اسكت وقول لفيصل الزفت انه بيندم على اللي عمله

طلال عقد حواجبه : فيصل .. وش دخل فيصل ممكن تفهميني شصاير

نواره : اها بتستهبل اوكيه دامك حاب تستهبل انا بجاريك – مشت لعنده معصبه ووقفت قباله – شوف شوف عمايلك انت وخويك ..حرام عليكم ماتخافون الله

طلال رفع الجوال بهدوء وعيونه معلقه بعيون نواره في شي يجذبه لها ..
شاف المقطع اللي تلاعب فيه ذوق شعر فيصل ..
رجع ناظر نواره : وش فيه ..؟

نواره قربت منه اكثر وحطت عينها بعينه : وش فيه كل الناس شافته تقول وش فيه

طلال حس بمشاعر بداخله تتفجر ونواره قريبه منه ياهو محتاجها محتاج لها كثير ..
ماسمع وش قالت او ..وش فيه البلوتوث كل تفكيره بهذي العيون الصغيره اللي فيها هموم الارض وهو سببها
طلال : وحشتيني

نواره فتحت عيونها على الاخير ماتوقعته يقولها حست بضربات قلبها تزيد بسرعه جنونيه .. شمت ريحته ريحة معجون الحلاقه مع سجاير طلال وعطره "هوقو " المميز ..تجمعت الدموع بعيونها وارتجف اسفل ذقنها (( لا مو وقته .. الله يلعنك ياقلبي ماتنسى ماتقسى )) ..

طلال رفع ايده ومسح شعره بتوتر لا مو هذا اللي يبغاه ليه قال لها ..

نواره لمحت برقة الدبله اللي بيده اليمين ايده اللي رفعها (( طلال تزوج ..؟؟؟))

طلال انتبه وين ناظرت ..

نواره سكتت شوي وهي تناظره .. بعدها جئتها الشجاعه وقالت بصوت قريب للهمس : ملكة

طلال ناظر الخاتم وهو ساكت ..(( لهذي الدرجه تحبني كل اللي سويته فيها وتحبني ...))

نواره بانفعال : تكلم .. طلال ملكة ..احلفك بالله تنظق ..

طلال تاكد ان حياته بدونها ماتسوى : اسف .. روحي بروح غيرك مغصوبه

نواره نزلت عيونها بسرعه عن عيونه ونزلت معها دمعتها مسحتها بسرعه وناظرته بتامل ..
وابصعوبه حروف من فمها نطقت .. والسكون صار مثل الريح وهبوبـه : اكرهك
قالتهـا ..بـس مااتحملـت بكت كثير ..وكانها تغسل حبه من قلبها كانها تتخلص من نجاستها هذا الشخص بحياتها ..

طلال وجاءته جاهزه من غير لايفكر فيها او يحسب لها حساب : ليه مانتي راضيه تنسي انا نسيتك خلاص ولو سمحتي اطلعي من حياتي ببساطه فكي عني ..

نواره جمعت بقايا كرامتها سحبت الجوال من ايده : ومن قال اني مانسيتك ياطلال ..انت اكبر غلطه بحياتي ..

طلعت بسرعه من الغرفه

طلال رمى جسمه على المخدات المرتفعين حس نه بذل مجهود سلب منه كل طاقته ..مستغرب من قدرته الفضيعه على ضبط اعصابه ومشاعره ..رفع الغطاء بشويش وناظر رجله : والله مارضاها على نفسي تقبلين فيني شفقه ....ومارضاها لك تتزوجي مشوه ..

نواره طلعت تهرب من طلال وحبها له تهرب من الحقيقه المره اللي كذا والا كذا بتتقبلها وتنساه .. قلبها كان ينزف وكرامتها هاينه عليها ..
مشت ببمرات المستشفى "طلال ملك ونساها طلال عافها ومايبغاها مثله مثل حسام كلهم سوا بس الفرق ان طلال جرحه اكبر لان طعناته كانت اكثر "

دق جوالها شافت الشاشه " البابا "

مسحت دموعها و ردت عليه بتعب : هلا يبه ..؟

بو نواره : شفتي شفتي امك الغذره وش سوت فيني

نواره ببرود : خير وش صار بعد

بو نواره : بس سافرتي تركتني وقالت انا ماجيت الا علشان نواره ودامها راحت مابغاك .. تركتني يانواره مثل كل مره

نواره تتنهد : يبه خلاص اصلا انا غاسله ايدي منها

بو نواره: لاااا وضربتني بعد

نواره كسر خاطرها ابوها وتضايقة علشانه : هونها يبه وتهون انا عندك هاللحين ..؟ جايه للبيت ..

بو نواره : انتظرك

نواره : يله باي

سكرت ومشت وهي تحس انفاسها ثقيله الهم اللي بصدرها كاتم على نفسها ..انتبهت بمريم ومحمد جالسين على الكراسي ..

راحت لعندهم بسرعه : مريم محمد ايش فيه ..؟

محمد وجهه متضايق وكانه بعزاء :البندري تعبانه مره ..

مريم تمسح دموعها من تحت الغطاء : نواره حنا خايفين عليها ..فيه خطر على حياتها ...

نواره :ليه وش فيها

محمد تكلم بين اسنانه : اللي سوته شي ماينقال

مريم : البندري حامل من رائد ..

نواره تمثل الصدمه : حامل مبروك ..

ناظروها بغباء : على ايش

نواره ابتسمت بتعب : على الحمل الله يثبته ..

محمد رمى شماغه على الكرسي ومشى بعيد عنهم ...

مريم : يانواره هذي مصيبه

نواره: استغفري ربك ..انا هاللحين ابغى اشوفها عهي باي غرفه ..؟

مشت نواره للغرفه اللي اشر ت عليها مريم
مشت و تجر رجلها جر و الدنيا حولها تدور عيونها تفتح وتغمض وماهي قادره تركز وراسها ثقيل .. حست بتوازنها يختل سندت ايدها على الجدار تستند فيه دام ان مالها سند بالدنيا لازم تسند نفسها بنفسها ...سحبت رجلها ومشت لعند الغرفه وقبل لاتوصل ايدها لمقبض الباب ضلمت الدنيا بوجهها وزادت الضيقه بصدرها و طاحت على الارض مغمى عليها ..

مريم ركضت لعندها : نواره

%%%%%%%%%%%%%%%

بريطانيا – مانشستر

فيصل جالس على المكتب وحوله كتب كثيييييره الدكتوره بالعلوم السياسيه مشيبه راسه ..

دق جواله بمسج نغمة نوكيا المعتاده ..رفعها بكسلكانت رسالة وسائط فتحها ... شاف البلوتوث المنتشر ..(( ذوق الباقي تداعب حبيبها ))
كان اكثر بلوتوث انتشر هو يمكن لانه اجرء واحد فيهم .. شهق من السخيف اللي يمزح وراسله هذا معقوله ذوق ..نزل يشوف مصدر الرساله ..رقم اخته جنى استغرب دق عليها بسرعه : الو ..

جنى : شفته ..؟

فيصل : شنو هذا وانتي من وين حصلتيه ..؟

جنى بضيق : فيصل البلوتوث منتشر بالرياض كلها الا بالسعوديه والله كلها ..

فيصل : كيف ..؟

جنى : مثل ماسمعت ..مسكينه ذوق اكيد زوجها ذبحها هاللحين

فيصل وقف من الانفعال والعصبيه : ذوق ...؟جنى من اللي نشره .. وايش صار على ذوق ...؟

جنى : مادري والله مادري بس ولد عمامي جائوا اليوم لعندها و هزئوا امي وجرحوها انها ماعرفت تربيك وفضيحتك بكل مكان ..؟

فيصل : جنى ماني فاهم شي من اللي نشر هذا .. هذي الصور بيني وبين ذوق ..

جنى : يعني مو انت تنتقم ..

فيصل صرخ : جنى وش هالحكي انتي عارفه اني عطيت ذوق كل اللي معي .. ومافيه نسخ منها الا الاصل اللي عند ذوق ..انا لازم احكي معها واعرف

جنى : لا ااااا لاااا لاتحكي معها لاتحاول حتى ..المسكينه هاللحين اكيد زوجها طلقها واخوانها قتلوها .. لا تدق بتزيد الطين بله

فيصل : طيب وش السوات وش الدبره

جنى : والله مادري انت متاكد محد معه غيرك

فيصل: جنى وبعدين معك

جنى : خلاص خلاص صدقتك ..بس شي يحير

فيصل: الا يشل مستحيل ذوق تفضح نفسها ..اسمعي انا نازل لسعوديه هاللحين ..

جنى : لا والدكتوراه

فيصل : السنه الجايه لاحق عليها المهم هاللحين ذوق ..

جنى : لا لاتستعجل انا بتاكد من شي قبل بعدين يصير خير