ابتسمت نعمة وهي تمسح دموعها: خير يا معلم، نسيت حاجة؟
جلس جابر بجانبها: أنا لقيتك مهمومة دايماً والدموع مش مفارقة عيونك، وجبتلك اللي يطمنك ويريح بالك.
نعمة: مش فاهمة يا معلم، قصدك إيه؟
أخرج جابر من جيبه شنطة سوداء وأعطاها لها، ففتحتها ووجدت فيها نقوداً.
نعمة: إيه ده يا معلم؟
جابر: دول ميت ألف جنيه، روحي اديهم للبلطجي خليه يطلقك، وأنا هستناكي لما تخلصي شهور العدة ونتجوز.
نعمة: نتجوز!
جابر: آه، لو وافقتي صدقيني ماحدش حايقدر يحبك في الدنيا كلها قدي، بس إنتِ اديني الأمل.
هزت نعمة رأسها بالموافقة.
قام جابر وبدأ يرقص بالعصا التي يمسكها دائماً: يا دين النبي واتفرج على الحلاوة، حلاوة دي بلدي ونقاوة نقاوة، ده بص على الحلاوة حلاوة.
ضحكت نعمة.
جلس جابر: بس على وجه السرعة تخليه يطلقك، وأنا هاجي معاكي.
وقفت نعمة وأدارت ظهرها له وهي تفرك في أصابعها بتوتر: بس ماينفعش تيجي معايا يا معلم.
جابر: ليه بقي إن شاء الله؟
لمعت في دماغها فكرة، فالتفتت إليه وهي مبتسمة وقالت: ده راجل بلطجي وأنا فاهمة دماغه كويس، هايقول فضلت راجل تاني عليا، وإنت معلم قد الدنيا وملو هدومك وكعبك عالي عليه.
عدّل جابر ملابسه بكبرياء وهو يضحك.
أكملت نعمة كلامها: فيعند وما يرضاش يطلق، وإن حتى خلعته يفضل مستقصدني ويمرر عليا حياتي وعليك، فسيبني أنا أحل الموضوع لأني نفسي أستتر وأكون مرات راجل وأحس إن ليا سند.
اقتربت منه ومشّت يدها على صدره: ولا إنت شايف إيه يا معلم؟
جابر بتوهان وهو يبلع ريقه: اللي تشوفيه يا قلب المعلم، أنا أنا ورايا مشوار وهاجيلك كمان شوية، أو... أوصلك المحطة، إنت قلتلي إنت بلدك فين؟
نعمة: كفر الشيخ يا جبورتي.
ضحك جابر: يا دين النبي!
مشى جابر، وجلست نعمة وهي تضحك: ما أتزوجه وخلاص، والنبي غلبان، بس لأ أنا عايزة أبقى هانم مش مرات جزار، مش طموحي، ههه.
عاد جابر، وكانت نعمة قد جهزت شنطتها.
أعطاها جابر هدية.
نعمة: إيه دي؟
جابر: افتحيها بس!
فتحتها نعمة ورأت هاتفا.
نعمة بابتسامة: إنت طيب أوي يا معلم.
جابر: لقيتك مش معاكي تليفون، قلت أجيبه ليكي عشان أبقى أطمن عليكي، وسجلت رقمي عندك باسم حبيبي.
ضحكت نعمة بدلع.
جابر: مش بس كده...
أخرج من جيبه علبة وفتحها، وكان بها دبلة.
جابر: الشبكة الكبيرة، أما تجيبي ورقة طلاقك يا ست الستات، ممكن صوابعك الملبن ألبسها لك.
مدت نعمة يدها، فلبسها.
جابر: حاسس إني أسعد إنسان في الدنيا، أرجوكي ما تتأخريش عليا.
مشيت نعمة معه وهي تشعر بالذنب، كلما نظرت إليه اشترى لها آيس كريم من عربية ماشية.
نظر إليها بحب وهي تركب القطار: خلي بالك من نفسك، وريني عليا أوي ما توصلي، أنا عامل لك باقة.
القطار مشى، فجرى جابر بجانبه وهو يمسح عرقه بالشال الأبيض الذي فوق الجلابية: لو حسيتي بأي خطر ابعتي رسالة فيها أي حرف وأنا ح أفهم وأجي وأجيب رجالتي نطربقها على دماغ اللي يضايقك.
نعمة: حاضر يا معلم، حاضر.
وقف جابر بتعب: مع السلامة، مع السلامة يا ست الستات.
نظرت نعمة إلى الطريق وهي تفكر في الفترة القادمة في حياتها، ماذا ستفعل؟ ولازم كل خطوة تكون محسوبة.
نعمة بتفكير: مش معايا إلا 130 ألف جنيه، دول حايعملوا إيه؟ حتى ما يجيبوش حتة شقة في اليومين دول.
***
دقوا المزاهر يلا يا أهل البيت، تعالوا جمع ووفق، والله وصدقوا اللي قالوا عين الحسود فيها عود.
كان يزن عريساً ونعمة عروسة، ومأنكجها ويضحك.
يزن: أنا فرحان أوي يا مليكة، أنا بحبك أوي أوي أوي.
مليكة (نعمة): يزن يزن يزن.
يزن: إيه يا مليكة، بتكرري اسمي ليه؟
مليكة: يزن يزن.
فتح يزن عينه، وكان نائماً.
"إيه يا بني، بصحيك بقالي ساعة، قوم افطر يلا والفطار سخن."
هز يزن رأسه وقام ليغسل وجهه وهو مبتسم.
يزن: يارب حقق الحلم وخليه حقيقة.
***
بعد شهر.
كان جابر جالساً على القهوة، ولحيته طويلة وهو مكتئب ويفكر: ليه كده يارب؟ أنا والله ما زعلان على الفلوس اللي راحت في داهية، الفلوس، أنا بس زعلان على عشمي، على خيبة أملي، ده أنا في أيام حلمت ببيت وعيلة وولاد، وفكرت خلاص إن الدنيا ضحكت لي.
لأ، وكمان الأدهى إن أنا حبيتها، طب كانت تعرفني إن همها الفلوس وبس؟ ما خلتش طريقة أحاول أعرف مطرحها إلا وعملتها، تليفونها قفلته مسافة ما ركبت القطر، وروحت كفر الشيخ لفيتها كعب داير، ما سبتش فيها حتة شبر شبر، وماحدش يعرف عنها حاجة، ولا يعرف مين مليكة أحمد عبد المعز.
خليك فاكر الاسم ده كويس يا جابر، اللي جرح قلبك وموتك بالبطيء، مليكة أحمد عبد المعز.
منك لله يا شيخة، منك لله.
***
كانت نعمة تجري في مكان راقٍ وهي لابسة لبس رياضة ورابطة شعرها ديل حصان وحاطة السماعات في ودنها.
نعمة بتفكير وهي تنظر إلى الناس اللي حواليها: اكتشفت عشان أوصل للي في دماغي وأبقى هانم لازم أعاشر الهوانم.