نزلت سلفتها عندها وهي ماسكة في إيدها أكل.
وقبل ما تدخل سمعتها بتتكلم مع شخص وهي بتتكلم بضيق وبتقول:
"إيه يا أخي مش عارفه أقعد في بيتي؟ كل مناسبة عايزني أطلع أكل من اللي عملاه أو اللي شرياه لسلفتي هي وعيالها؟ هو إحنا اللي مسؤولين عنهم؟ ولا أخوك اللي زهق منها وسابها وماحدش يعرف عنه حاجة؟"
طبعاً الكلام ده كله كان موجه لجوز سلفتها وهو واقف ماسك أعصابه.
رجعت لورا بدموع وهي بتقول لنفسها وبتبص على طبق المكرونة بالبشاميل في إيدها وعليه كذا قطعة بانيه:
"بقى دا كله طلعتي مخبياه في قلبك تجاهي يا زهراء... معقولة دا كله يطلع منها، وكمان بتقول على جوزي سابني ومشي؟"
كانت طالعة على السلم تاني، لقيت سلفها جوز زهراء بيقول باستغراب:
"رانيا، كنتي فين؟"
بصتله رانيا وقالت بتوتر:
"كنت جايبة الطبق ده ليكوا، بس قولت أطلع الطبق وأناديكم تاكلوا فوق وناكل مع بعض وخلاص."
وكانت راسمية ابتسامة مزيفة وجواها وجع من كلام سلفته.
بصلها حامد بضيق من كلام مراته عليها وحقدها عليها وقال بطيبة:
"إحنا اتغدينا يا رانيا، تسلمي. طلعي الطبق ليكي ولعيالك، أنتم أولى بيه."
وسابها ونزل وهو متعصب من تصرفات زهراء وكلامها اللي بيعصبه منها على مرات أخوه.
أما رانيا طلعت على فوق وهي زعلانة وبتفكر: يا ترى جوزها راح فين من آخر مرة طلع ومارجعش من شهرين بعد لما اتخانقوا بسبب زهراء.
وقعدت تفكر: يا ترى فعلاً هو زهق منها وسابها ومشي، ولا حصله حاجة، ولا لسه زعلان منها؟ رغم إنها ما غلطتش في سلفتها زي ما قالت، ولكن كان سوء تفاهم.
قطع تفكيرها صوت ابنها وهو بيقول:
"يا ماما أنا جوعان وعايز أكل."
بصتله بابتسامة وقالت في نفسها:
"أهي دي اللي نزلت ليها أديها من الأكل قبل ما آكل عيالي، طلعت بتكرهني وبتقول عليا كلام مش كويس. حقيقي الناس بقت غريبة."
طبطبت على ابنها وقالت:
"ادخل يا حبيبي نادي أختك وتعالى عالمطبخ عشان ناكل."
راح ينادي أخته. وهي راحت المطبخ تحط لكل واحد طبق فيه مكرونة وبانيه، وجم قعدوا ياكلوا وبيشكروا في أكلها، وهي أكلت حاجة بسيطة.
قامت غسلت الأطباق اللي أكلوا فيها وعملت فشار لعيالها بعد لما طلبوا منها. وبعدها طلعت لهم وقالت:
"اتفضلوا يا حبايبي واتفرجوا عالكرتون وماتعملوش مشاكل، وأنا هروح أنشر الغسيل اللي في الغسالة."
قالوا حاضر وهي راحت تشوف شغلها. ولكن موبايلها رن، لقيته رقم غير متسجل وردت عليه وكان جوزها.
ردت بفرحة وقالت:
"إنت فين يا شريف؟ بقالك شهرين غايب عالبيت ومشيت من غير ما تسمعني وغلطتني."
رد عليها وقال:
"أنا اتجوزت عليكي يا رانيا."
وقفل المكالمة على طول.
بصت للموبايل بصدمة ودموع.
يا ترى اتجوز ليها امتى ومين، وهيحصل إيه؟