رواية صرخات انثى الفصل 107 - بقلم ايه محمد رفعت

أضرم النيران بكومة من القش، وانتظر أن يشتعل فيها اللهب، ولكن أصابته الحسرة حينما وجده يطالعه ببرودٍ، وثبات يُدرس للأجيال، وكأنه فقد حاسة السمع للتو. ازدرد "عُثمان" ريقه بتوترٍ من جمود ملامح الطاووس، الذي كسرت ثباته الفعلي ابتسامة، ويا لها من بسمة مقبضة للأخير. راقبه من نفس محل قربه، ومازالت ساقه يستند بها على المقعد الحديدي، وبصوتٍ خرج رزينًا، هامسًا: _لو كان علي إختيارك إنت كمان كنت عفيت عنك يا عثمان.

توسعت مُقلتيه في صدمةٍ، بينما تتسع ابتسامة عُمران بانتشاء لرؤية الرعب يكاد أن يقبض روحه: _يا ريتك كنت ذكي كفايا، واستوعبت إن خروج بنتك من قصر الغرباوي عمره ما هيتم وموجود فيه دكتور علي الغرباوي. وتابع بشماتة ضاحكة: _عيني عليك وإنت بتاخد الصدمة من رد فعل علي، صدم أمك صح؟؟ كاد أن يسقط بالمقعد من فرط التصاقه بأخره، والخوف يجلجل بدنه، بينما يستكمل عُمران حديثه:

_كنت فاكر إني الصايع الوحيد اللي بيعرف يلاعبك، بابا علي المثقف ختم قفاك بقلم هيفضل معلم على قفا أمك العمر كله. قبض أسنانه ببعضهما، ودفع المقعد بساقه، فسقط أرضًا بمقعده متألمًا، والهلع يقتحمه بلا هوادة، مما سيفعله به عُمران. انحنى إليه يقابله بنظرة غمسها بالقسوة والكره، قبل أن يحرر كلماته: _الست اللي تعاشر عُمران سالم الغرباوي، عمرها ما هتشوف راجل تاني من بعده.

ابتلع ريقه بصوتٍ مسموع، وقال باضطرابٍ من خوض تلك المعركة التي سيكون أول خسائرها روحه: _حتى لو كان الراجل ده هو علي الغرباوي نفسه؟ سيطر على بوابة جحيمه الساطعة من رماديتاه التي فقدت كل جاذبيته وتوارت خلف تلك العاصفة خوفًا وطمعًا بمسكنٍ آمن، ومال إليه يفاجئه بلف يده حول عنقه، يرفعه تجاهه بجمودٍ بينما الاخير يسعل ويحاول تحرير ذاته من قبضة كانت كالفولاذ، ليصم أذنيه بخشونته المهددة:

_بتلعب مع مين يا عثمان، إعرف مقامك وشوف مين اللي قدامك، وقبل ما عقلك يصورلك إنك هتكرهني في أحب الناس على قلبي، افتكر أنك متملكش القوة إنك تقف في تحدي وإنت بعمرك وسنك ده، هتفرفر مني من أول جولة! وأضاف قبل أن يطرق عنقه:

_وعشان فضولك ميقتلش أمك، خليني أكرمك مرة أخيرة لأجل عيون بنتك، لو كان ربنا كاتبلي الموت ورزق بنتك وكان ليها فرصة مع علي، فصدقني ده الشخص الوحيد اللي هأمن على مراتي وابني معاه، وعندي كل الثقة إنها لو فضلت معاه مليون سنة عمر عينه ما هتترفع في عينها. وختم بقوله وابتسامة فخر تحتله:

_كل أخلاقي الكويسة اللي جوايا راجعه للي زرعه علي الغرباوي جوايا، والبلطجي اللي بيتصرف معاك دلوقتي ده إتربى على إيدي أنا، ودلوقتي وقت حسابك جيه. قالها ودفعه أرضًا، بينما الاخير يزحف للخلف برعبٍ من سماع كلماته الاخيرة، ماذا ينتوي إليه؟ تراجع لأخر الغرفة، وترجاه بتعبٍ: _هتعمل أيه يا عُمران، ده أنا في مقام أبوك يابني. تمردت ضحكة رجولية منه، وصاح بتهكمٍ:

_هو إنت كنت أب لبنتك عشان تكونلي أب، إنت عندك عجز في سد الخانات يا حمايا العزيز. ومال إليه يصوبه بنظرة حارقة، قبل أن يخبره: _واجبي هيوصلك جوه الزنزانة، كل الرفاهية اللي أخدتها جوه السجن بسبب مركزك الآرستقراطي العبيط أنا هجردك منه، من اللحظة دي هتتنقل زنزانة جماعية، وخدمتهم كلهم هتكون عليك. هز رأسه بصدمة، وقال: _حرام عليك، أنا مش آ.. قاطعه حينما هدر بسخطٍ:

_معرفتش تقوم بدورك كأب هتحاول تكون أم مثالية، طبيخ وغسيل ومسح والذي منه. واضاف بابتسامة ساخرة: _مش عايز حد من العيال يشتكيلي منك يا عثمان، عايزك تشرفني باختياري المثالي ليك. وربت على كتفه ببرود ضاحك: _طالت عليك و وراك غسيل، أسيبك تشوف أشغالك، وكل ما نار اشتياقك ليا تزيد طفيها وإنت بتمرش الغسيل، وكتر الإريل متبقاش بخيل يا عثمان! ولف ذراعه من حوله، فبدى وكأنه يضمه ولكنه كان يخنقه من فرط قوته الجسمانية:

_مش عارف أقولهالك إزاي، بس مضطر أنصحك تحافظ على نفسك وسط الاوباش دول، أصلهم بيتعاطوا، فحاول متظهرش بليل قدامهم ليتلخبطوا فيك!

وتركه ونهض واقفًا بشموخٍ، ونظرة تشيعه بكرهٍ وحقد، يلتمعان برماديتاه، وهو يتذكر بكاء زوجته بين ذراعيه في صباح هذا اليوم، فبرع بالحفاظ على أعصابه، وقمع كل الافكار الشيطانية التي تطالبه بقتله، أو بزيادة أنواع العذاب الذي يملك سلطانا لها، ولكنه ولاجلها اختار أبسط الاشياء، بالاتفاق مع هؤلاء المجرمين الذين سيرافقهم بالحبس، حسنًا لقد كذب بجزئية أنهم يتعاطون المخدرات ولكن ليجعله يموت في جلده كل يومٍ، مثلما كتب الخوف والترقب مما كان سيفعل لزوجته، قرة عينه وقلبه!

أتجه ليغادر من الغرفة، تاركًا الاخير يتخيل نهايته البشعة بوقوعه بهذا المستنقع، وقبل أن ينجرف عن الباب الذي يحده اثنان من العساكر، استدار يخبره بنبرة واثقة لا تليق سوى بطاووس وقح مثله: _خليك عارف إن نيتي معاك كانت الاحترام، وأنت اللي قليت بأدبك وخلتني أحط عليك وبالجامد، من غير سلام لإن اللي زيك ميستهلوش!

سئم "جمال" من المماطلة أمام الوفد الفرنسي، وكل لحظة والاخرى كان يتفقد هاتفه، عسى أن يتلقى رسالة صريحة من عُمران أو فاطمة، ولكن الأمر ينتهي دون أي جدوى، ومع بلوغ الثلاث ساعات بالانتظار، وقف إحدهم يهتف بضيقٍ: _ما يحدث هنا إهانة صريحة لنا سيد جمال، لقد انتظرنا قرابة الأربع ساعات ولم يأتي بعد، لم نعتاد على عدم التقدير منكم، ولأكن صريحا سيكون هذا أول وأخر تعامل لنا رفقتكم. _ومن قال بأنه سيكون هناك تعامل بيننا بالاساس!

قالها الطاووس وهو يدلف لصالة الاجتماعات، بخطاه الواثق، فإذا بالجميع يقفون في أماكنهم بدهشةٍ وقلق من تصريحه، بينما يتطلع له جمال بذهولٍ من حدة نبرته المندفعة، وطريقته الغريبة بالحديث. استكمل "عُمران" طريقه للمقعد الخاص برئيس مجلس الإدارة، اعتلاه وهو يصوب نظراته للوفد الفرنسي المكون من ثلاثة رجال، نطق أحدهم بلطف اصطنعه لتلطيف الأجواء: _العفو والسماح منك سيد عُمران، ألبرت لم يقصد التقليل من احترامك.

لف مقعده المهتز تجاه محل وقوفه، ويده تطرق بقلمه الثمين من فوق الطاولة البيضاوية: _ومن سيترك له الفرصة للتقليل من شأني أندريه!! قبل أن يفكر بفعلها كان ليفكر ألف مرة. وأضاف ومازالت عينيه تجوب من يقف أمامه مستاءا: _يظن نفسه ذكيًا، يتحاشى التقليل مني ويفعل عكس ذلك لشريكي! ذراعه رفقة الاخير وهمس له: _اعتذر للسيد جمال على الفور، والا لن يتمم السيد عُمران عملنا.

أذعن لمطلب رفيقه، واستدار تجاه جمال المدهوش لما يحدث قبالة عينيه، وأبدى اعتذاره أكثر من مرةٍ، ثم نظر تجاه عُمران ينتظر سماع رأيه فيما فعله، فقال ومازال يحرك مقعده بثبات: _بامكانكم الرحيل والعودة غدًا، سيخبركم سكرتيري الخاص بالموعد الجديد. تطلعوا لبعضهم البعض، وانسحبوا بهدوء تاركين الغرفة الواسعة تحوي الرفيقين، وبمجرد خلو القاعة تحرك جمال من محله، وإتجه إليه يحرر دهشته بسؤالٍ حائر:

_ممكن تفهمني أيه اللي بيحصل ده، وطريقتك بالتعامل مالها!!! وأخيرًا سمح لنفسه التفرس بملامحه، فاحتل الحزن مُقلتيه حينما لاحظ انتقاص وزنه الملحوظ، لقد أدماه فراقه عنه، وجسده الهزيل يقص كل المعاناة التي حكاها، وبينما هو غارق بتأمله هز جمال المقعد وهو يناديه بقلق: _عُمران جاوبني!

رفع "عُمران" يده، يفك ازرار قميصه الأسود، بعدما نزع عنه جاكيته ببطءٍ أثار فضول جمال وريبته حول ما أصاب رفيقه الذي يتصرف بغرابة، أشمر عن ساعديه وإنتزع ساعته الباهظة، بينما يعود جمال لهزه مجددًا: _فهمني بتعمل أيه؟؟؟ رد بهمسٍ خافت وهو ينحني ليضع خاتمه جوار الساعه: _خايف تتعور. عقد حاجبيه بعدم فهم: _أتعور من أيه؟

أجابته لكمته التي أصابت أنفه، فطرحته أعلى الطاولة الزجاجية الضخمة، وعينيه تتسع في صدمة، بينما يرنو إليه عُمران بخطواتٍ متهدجة، جعلته يردد بقلق: _عُمران إنت جرالك أيه، اهدى كده وإعقل، انا هتصل على دكتور علي حالًا يجي يشوف جرالك أيه؟ طرحه بعنف على الطاولة مجددًا حينما كان بطريقه ليجذب هاتفه من جاكيت بذلته المعلق على مقعده، بينما يميل تجاهه وهو يصيح بغيظٍ:

_إنت الوحيد اللي حسيت ليه بالارتياح ويوم ما أجيلك بيتك تقابلني بلكمة يا حيوان!!! وتابع ومازال يده تجذب قميصه بغضب: _بتستغل إني ناسي كل حاجة!! اتسعت عينيه بذهولٍ، بينما يسترسل عُمران: _ثم إنك عامل في نفسك كدا ليه!! وأيه القرف اللي إنت لبسه ده!!

حارم نفسك من متاع الدنيا بسبب موتي وإنت السبب فيه، لو كنت سمعت كلامي ونطيت من غير ما تعيش دور سي روميو العاشق كان زماني نفذت من اصابتي وكنت على الاقل ربيت الكلاب دول، بس انت كالعادة مخلوق عشان تعاندني وبس. أدمعت عيني جمال بعدم تصديق، بينما يستطرد الطاووس بعنجهيةٍ: _اديني رجعتلك أهو وهنصفي القديم والجديد يابن أشرقت!! تهاوت دمعته دون أي قيد، وهمس بعدم تصديق: _عُمـران!!!

خيم الحزن عليه وانشق قلبه لما حدث له، وكأن تلك اللحظة هي الاولى لرؤياه، فسانده ليستقيم بجلسته، ثم عدل من قميصه الغير مرتب بشكلٍ لائق، وانحنى يجذب جاكيته، وساعده بارتدائه، وجسد جمال ينساق خلفه دون أي تحكم منه، فقط نظراته المندهشة تتابعه بعدم تصديق، وما أن انتهى حتى استدار يجذب من جيب جاكيته الخاص مشط صغير، ومال يرفع به شعر جمال، قائلًا بضيقٍ:

_مصمم على تسريحة عبحليم بردو، الظاهر أنك كسرت كل تعليماتي في غيابي، بس وحياة أمك هترجع تسف كل اللي فاتك عشان تتلاشى غضبي، وأولهم إنك ترجع لوزنك تاني. وتابع ساخطًا: _فكرك إنك كده هتصعب عليا يعني ومش هنزلك معايا الجيم، بعينك يابن أشرقت، هتنزل معايا يعني هتنزل. وأضاف مازحًا: _بفكر أعملك إنت وعلي مختوم من صنع ايدي، هتجيب معاكم من الأخر. تمعن به حينما وجده يتابعه بصمت، فقال مبتسمًا:

_أيه يا جيمي مش مبسوط أني رجعت ولا إنت كنت حابب تبدأ المنافسه على مكانتك من أول وجديد؟!! تحرك إليه جمال باكيًا، وارتمى إليه محاوطًا عنقه ببكاءٍ بدد من ثبات عُمران، فضمه وهو يردد بصوتٍ محتقن بالبكاء: _عملت في نفسك كدليه يا جمال؟ أنا معرفتكش!! شرع بتحرير صوته الباكي هاتفًا: _ولو كنت إتاخرت في ظهورك كنت هموت وراك، أنا حياتي كلها وقفت على مشهد موتك! ربت على ظهره وقال وهو يجاهد لزرع المرح بينهما:

_وأديني رجعتلك أنظملك حياتك البائسة دي من تاني، بس على الله متزهقش مني، بس ناويت والنية لله أعملك عملية ترميم من تاني، هبدأ من البدروم وسقف الدور الأول، هتستحملني ولا هتنخ من أولها! ضحك وهو يبتعد عنه، ويدفعه بمزح: _لا ارجع مكان ما كنت، أنا كنت عايش مرتاح وبنط في أول لبس يقابلني، مش عايز أرجع اقف قدام المرايا ساعتين أنظم في نفسي عشان خوفي منك. شاركه الضحك وهو يخبره:

_ياض لازم تبقى شيك وجنتل مان، أنت بمنظرك ده مش محصل حتى صبي جزارة، والله حمص في الرمق عنك. زوى حاجبيه باستغرابٍ: _مين حمص ده؟ مال يلتقط جاكيته وقال وهو يلف ذراعه حوله ليحركه تجاه الخارج: _هحكيلك بس ننزل أي مطعم أزغطك الأول، لحسن أنا حاسس إنك هتقع مني. وأضاف وهو يضغط على زر المصعد: _اللي يشوفك يقول أن انت اللي داسك قطر الموت مش أنا!! ده أنا صالب طولي عنك!!! هموت وأعرف شوشو سكتت عليك بالوضع ده ازاي!! أجابه ببسمة ساخطة:

_محدش يقدر عليا، دماغي ناشف وحجر صوان ولا نسيت! زم شفتيه بتهكمٍ صرح عنه: _ده على أمك يالا مش عليا، خف شوية عشان خلقي ضايق ودراعي سابقني، وإنت أصلًا مفيش فيك نفخة. واستطرد بشفقة مضحكة: _ده انا كنت ناويلك على نية، بس خوفت لتتقطم في ايدي، بقيت شبه خلة السنان يا جمال!! وربت على كتفه وهو يطمئنه مازحًا:

_بس متقلقش يالا ولا يكون عندك أي خوف، أنا مش هتخلى عنك أبدًا، وهعالجك بعون الله، هخليهم يتوصوا بالسمنة البلدي وكل الأكل الدسم، لازم ترجع و بأقصى سرعة، عشان احساس الذنب اللي عندي ده يختفي، المهم أي حاجة تنزل على التربيزة تأكلها وانت ساكت. وأضاف وهو يعتصر رأسه بالمأكولات التي ستعاونه برفع وزن جمال بأيام معدودة: _هنكتر من الكوارع والحمام المحشي، وكمان الفطير البلدي والمحاشي والذي منه. واستدار يشمله بنظرة تقيمية:

_أنت محتاج لكل حاجة فيها دهون، بفكر أخليهم يعملولك خروف بحاله، أيه رأيك؟؟ رد عليه وقد غلب نوبة ضحكه: _لو هتأكل معايا معنديش مانع. أجابه عُمران بجدية جعلت كلاهما يسقطان من فرط الضحك: _أمال هسيبك تتدلع لوحدك بروح أمك!!! انتهى من مهمته حينما ساعد عُمران بالوصول لأهدافه داخل المعتقل، وها هو يتجول بلا وجهة بسيارته، ليقطعه صوت رسالة هاتفه على الواتساب، فتحها ليجد أخاه يستنجد به:

«آدهم إلحقني بسرعة، أنا واقع في مشكلة، بعتلك اللوكيشين، تعالى بسرعة! ارتعب فور أن انتهى من سماع الرسالة، وعلى الفور انعرج بسيارته تجاه الموقع المرسل، ولحظه أنه كان على بعد عشر دقائق منه. كونه ظابطًا محترفًا، إعتاد التصرف بحكمة وذكاء، فلم يشغل عقله بالاتصال، حتى لا يربك عقله عن القيادة، فيطول طريقه عن العشرة دقائق.

وصل "أدهم" للموقع المنشود، فإذا به يتجمد على مقعده من دهشته، المشهد برمته كان غريبًا، سيارة أخيه موضوعة اعلى الحاجز الإسمنتي الصغير، المصفوف بمحاذاة الرصيف، ومن أعلاه يجلس آيوب داخل السيارة، ويلتف من حوله مجموعه من الرجال يحاولون أن يجعلوه يقفز من السيارة ولكنه يرفض بإصرارٍ عنيف. هبط أدهم من السيارة واستطاع ان يفض الجمع، بينما يطرق على أسفل باب السيارة، مشيرًا له بأن يفتح الباب، ففتحه وهو يخبره بحزن:

_شوفت يا ادهم اللي حصل؟! منع ابتسامة ساخرة من الانفلات: _مش انا لوحدي اللي شايف يا آيوب. وتابع بسؤالٍ هام: _قولي أيه اللي طلعك الطلعة دي؟ توترت معالمه وكأنه طفلًا سيتعرض للعقوبة: _شوفت الطلعة اللي قبل الحاجز. استدار آدهم للخلف يتمعن بما ذكر، وعاد يتفرس بأخيه الذي قال بحرج:

_شوفت عُمران طلعها قبل كده ونزل منها عادي، بس معرفش لما عدتها أيه اللي حصل معايا، ملمستش بعدها الرصيف، العربية طارت وكملت على الحاجز اللي في نص الطريق، زي ما انت شايف كده! تحررت ضحكته الرجولية، وهز رأسه هاتفًا: _شايف، وحاسس ان سقف طموحاتك عليت أوي، كنت لسه بتتعلم تطلع بالعربية، دخلت في الطيران من غير ما تضيع وقت، طموح انت أوي! زم أيوب شفتيه ضيقًا: _انت بتضحك!! رد عليه وهو يتفرس باصابة السيارة، التي استهدفت اسفلها:

_مش عارف أهنيك على النطة ولا أواسيك على الخبطة! منحه نظرة غاضبة، فكبت ضحكاته بصعوبة وهو يفرد ذراعيه له: _تعالى يا حبيبي، انزل. لف رأسه باصرار: _مش نازل قبل ما عربيتي تنزل. فشل في السيطرة على ضحكاته مجددًا، وادعى الرزانة والتعقل بحديثه: _الواقعة الحريفة دي عايزة ونش ينتشل العربية من فوق الحاجز، مينفعش معاها كتل بشرية يا بوب. لف رأسه له مجددًا، واقترح ببلاهة اسقطت أدهم ضحكًا:

_ما تزق من ورا لحد ما نوصل لنهاية الحاجز تقوم العربية نازلة طوالي، كده كده الحاجز مش عالي اوي. أتاه الرد من بين سيل ضحكاته: _حد قالك إني هركليز عصرك، إنزل يا آيوب إنزل الله يسترك دنيا وأخرة. احتقنت نظراته الاندفاعية تجاه أخيه، وباصرار طفل صغير قال: _طيب خلاصة الليلة دي يا أدهم إني مش نازل طول ما عربيتي متشعلقة الشعلاقة دي، اتصرف هات الونش ينزلها وأنا فيها، واعتبره تهديد بقى! عقد حاجبيه بدهشة من أفعاله الطفولية:

_الناس هتتلم علينا تاني يا آيوب، انزل وبطل لعب العيال ده. ردد بتحدٍ وضيق: _هننزل مع بعض، مش هسبها كده. منع ذاته من أن يشتبك معه لفظيًا، وسحب هاتفه يحرر اتصالًا بأحد الظباط، وما ان أنهاه حتى أعاد الهاتف متمتمًا بانزعاج وهو يدس يده بجيب بنطاله: _لما أشوف أخرتها معاك أيه؟ طرقت باب الغرفة مرارًا، وانتظرت أن يفتح بابه، فإذا بصوته الهادئ يأتيها: _تعالي يا خديجة.

ولجت للداخل تبحث عنه، فوجدته يجلس على سجادة الصلاة، ومن خلفه يغفو صغيرها على الفراش، انتظرت حتى انتهى من التسبيح وقراءة آية الاخلاص والفلق والناس والكرسي ثلاث مرات، تعلم جيدًا قيمة تلك الايات خلف كل صلاة، مثلما علمهم الشيخ مهران. انتهى عما يردد ونهض يحمل سجادة الصلاة، يضعها على ذراع المقعد، ودنا يتساءل: _قولي اللي مترددة تقوليه وباين في عيونك. سحبت نفسًا عميقًا من أنفها، ورددت بكل عزيمة:

_انا أخدت قراري يا يونس، وهعمل العملية. ترقبت رد فعله بارتباكٍ، رغم أنه بالاوقات الماضية شرع له موافقته المبدئية بما تريد، فاذا به ينهد بحزنٍ بدى بفيروزته، وانتقل عكسه بصوته الهادئ: _اللي يريحك أنا معاكي فيه يا خديجة، معانا رقم الدكتورة اللي دكتور علي ادهوني، هنحجز ونروحلها، واللي فيه الخير ربنا يقدمه. حُلت عقدة وجهها المترقب لردة فعله، ومالت إليه تلجئ لضمة صدره، فأحاطها بكل ترحابٍ، فرددت على استحياءٍ:

_أنا عارفة إنك كنت معارضني في قراري ده، وقبولك بيه دلوقتي عشاني، شكرًا يا يُونس. قوى ضمته لها، وقال بعشقٍ صادق: _ميهمنيش غير راحتك إنتِ يا ست البنات. اتسعت ابتسامتها والراحة تتسلل لها، لتمنحها شعور الأمان كلما كان هو لجوارها، وفجأة انتفضت بين ذراعيه حينما اندفع فارس عليهما، فتمردت الضحكات بينهم، وقد التقفه يونس بين ذراعيه هو الآخر.

وصلت سيارة "علي" في نفس لحظة وصول سيارة "أحمد"، هبطت "فريدة" برفقته، وما أن رأت علي يخرج من سيارته برفقة فاطمة حتى اتجهت اليهما مبتسمة: _عديت على فاطيما في الشغل ولا اتقابلتوا برة يا دكتور؟ ردت فاطمة بابتسامتها الرقيقة: _مرحتش النهاردة يا فريدة هانم، روحنا لزينب وبعدها اتمشينا شوية بالعربية. تعجبت من سماعها لما قالت، وتساءلت باسترابة: _غريبة إنك منزلتيش الشركة النهاردة، طمنيني أنتي كويسة؟ اتخذ علي محلها بالاجابة

حينما حاوط والدته بحنان: _اطمني حبيبتي، فاطمة كويسة، بس زينب كانت عازمانا عندها وعُمران كده كده نزل الشركة مع جمال النهاردة. وأضاف وهو يتابع عمه الذي اقترب إليهم بعدما صف السيارة: _طمنوني يومكم كان عامل ازاي؟ اجابه أحمد مبتسمًا: _ممتاز يا علي، كويس انك اقترحت عليا أخذ فريدة معايا تغير جو، خلصت ال meeting بعد ساعتين من وصولنا، وبعدها اتمشينا على البلاج، المنظر ساحر حقيقي. أضافت فريدة لحديثه:

_فعلًا يا علي الاجواء هناك ممتازة، وقررت اشتري شاليه هناك عشان نبقى نغير جو من فترة للتانية. رفع يدها يقبلها برفقٍ، وقال: _طلبات فريدة هانم كلها أوامر وتتنفذ. مررت يدها على خصلات شعره الطويل، بفرحةٍ: _متحرمش منك يا حبيبي. وتابعت بلهفةٍ: _طمني على أخوك، حالته احسن دلوقتي؟ ارتسمت بسمة ماكرة على شفتيه، وأجابها: _أحسن الحمد لله، وهتشوفي ده بنفسك لما يرجع بإذن الله. رددت في راحةٍ وارتياح:

_ربنا يطمن قلبي بيكم دايمًا يا حبيبي. وأضافت وهي تشير لهما: _هطلع أخد شاور وأريح شوية، لفينا كتير ورجليا تعبتني. وتركتهما وصعدت للأعلى، فحمل أحمد الحقيبة، ونطق بنعاسٍ: _وأنا كمان هطلع أنام قبل معاد الطيارة. تساءلت فاطمة بدهشة: _هو حضرتك مسافر؟ رد عليها بينما يميل بجسده الرياضي لحمل الحقيبة الصغيرة الخاصة بزوجته: _عندي اجتماع مهم بكره في لندن، مش هتأخر هناك، يومين تلاتة وراجع بإذن الله. منحته ابتسامة صافية،

وهتفت برقة: _تروح وترجع بألف سلامه يا عمي. ابتسم لها بجاذبية تليق بعمره، وردد بامتنان: _تسلمي يا حبيبتي، لو عايزة حاجة من هناك بلغيني بيها وأنا تحت أمرك. انحنى علي يحمل عنه الحقيبة، ويجيبه بتهذب: _عايزين سلامتك يا عمي، هنفتقدك اليومين دول. منحه بسمة ممتنة لحمله الحقيبة، وقد أرهقته القيادة طوال الطريق، فمسح على ظهره بحب: _متحرمش منك يا علي.

صعد ثلاثتهم بالمصعد، وكان أول من وصل لجناحه أحمد، وتابعوا معًا للطابق العلوي، فلف علي ذراعه حول فاطمة، واتجهوا لجناحهما، فسألته بفضول: _مقولتش لفريدة هانم ليه أن عُمران رجعتله الذاكرة. رد عليها ببساطة وهو يفتح الباب: _خليه يفاجئها ويشوف بعيونه فرحتها، أكيد هيتخزن في عقله ردود أفعال كل الاشخاص المقربين ليه في لحظة زي دي. ابتسمت ونطقت: _دايمًا عندك حق وبعد نظر يا دكتور علي. بابتسامته الساحرة رد: _قلب دكتور علي!

صف سيارته ببقعة منعزلة بالقصر، وبهدوءٍ مخيف نزع عنه جاكيته وجرفاته، وحل أزرار قميصه ببطءٍ، بينما تموج عينيه المساحات الخضراء، وحديث ذلك الأرعن يترك علاماته داخل أعماقه.

لم يكن بمخيلاته أن يوصل ألم زوجته لتلك الدرجة، لم يكن الأمر مقتصرًا على غيابه فحسب، بل كان للأغلب دورًا فيما خاضته بدونه، وما يُولم قلبه أن تكون والدته ممن تسببن بوجعٍ لها، لقد أقسم لها على أن يستعيد حقها كاملًا ممن تسببن لها بالأذى، فماذا سيفعل بوالدته بحق الله؟!

خرج عُمران من سيارته مهمومًا، بعد أن تمكن من معاونة جمال بالخروج من تلك الحالة التي كان سببًا بها، وفور أن انعزل ببقعته المعتمة، خنقه الألم وجعله يشعر بعدم مقدرته على التنفس بشكلٍ طبيعيًا.

رطمه الهواء ففرق قميصه المفتوح، ضاربًا صدره بتياراتٍ باردة، تمنى لو نفذ من جلده السميك لنيران قلبه المستعيرة، مضى بطريقه قاصدًا مدخل الحديقة الخلفية، المطعم بالرخام الثمين، وإذا به يكاد أن يمر للداخل فوقعت رماديتاه عليها تغفو على أرجيحة القصر الخارجية، بين الورود، أتجه إلى محيطها والعتاب يقتنص من عينيه، ويزيد من وابلها.

وجدها تحني ساقيها وقد وضعت حولهما قربة من المياه الباردة، رفعها عُمران عنها، فلاحظ احمرار أصابعها، فعلم أنها تؤلمها، جذب المقعد الخشبي الخاص بالطاولات الخارجية، وقربه منها، وبلمساته الخبيرة بفك تشنجات الساقين وقتما يمارس التمارين الرياضية، استطاع أن يخفف من حدة ألمها، فاسترخت معالمها وبابتسامةٍ رددت: _علي! فتحت عينيها لتتفاجئ بصغيرها، الذي يضع عينيه نصب الوجع تهربًا من أن يتطلع لها، فابتسمت بسعادة

ولهفتها تنطق بما فيها: _عُمــــــــران!! رجعت أمته يا حبيبي، أنا بستناك من ساعتها! ازدرد غصته وأجابها: _من شوية.. وقال ومازال يفرك ساقيها برقة: _مالها رجلك؟ أجابته بوجعٍ وهي تمدد ساقيها: _كنت مع أحمد في العين السخنه، كان عنده اجتماع مهم هناك وروحت معاه، اتمشينا كتير ولما رجعت محستش برجليا. ردد بحشرجة عميقة: _ألف سلامة على حضرتك.

انتظرت أن يرفع رأسه ولكنه لم يفعل، فسحبت ساقيها من يده وجلست قبالته، تسحب ذقنه وتجبره ليقابلها، وهي تناديه: _عُمـران!! توسعت زُرقتها في صدمة، حينما رأت احمرار عينيه بشكلٍ نقل لها غضبه الشديد، فرددت بفزعٍ: _مالك يا حبيبي؟ تهرب منها بابتسامة زائفة: _مفيش، راجع مصدع شوية، هأخد مسكن وهرتاح. لمست كذبته من قبل خروجها، وأصرت بقولها: _أيه اللي مضايقك ومخليك بالشكل ده، اتكلم يا عُمران!!

تعمق بعينيها وعتابه يجلدها دون حديث، وبشجاعة حرر ما ابتلعه بارادته: _مايا اتوجعت في بعدي، وزاد عثمان وجعها باصراره إنه يجوزها غصب عنها، فازاي جالك قلب تزيدي من وجعها لما قررتي تجوزيها من علي!!! إزاي قدرتي تعملي كده؟!!! جحظت عينيها في صدمة، ورعب مما سيحدث بينها وبين صغيرها، انسحب كفها عن وجهه، وبالرغم من التماع الدموع بعينيها الا أنها ابتسمت فرحة نطقتها بحديثها:

_اللي قدامي ده عُمران ابني، متتخيلش أنا ارتاحت ازاي أنك رجعت لقوتك ومبقاش في مجال لحيرتك بين شخصيتك اللي كنت وبقيت عليها. رد بهدوءٍ والاحترام يلحق نبرته: _مش دي اجابة سؤالي، سؤالي واضح يا فريدة هانم. تطلعت له بارتباكٍ، وتساءلت بتلعثم: _مين اللي قالك؟ عثمان أكيد لان مايا عمرها ما تعمل كده، تربيتي وأنا واثقة فيها. ابتسم بألمٍ، وقال يعاتبها:

_ولما هي تربيتك، إزاي قدرتي تكوني قاسية عليها بالشكل ده، مفكرتيش في علي، ازاي قبلتي تحطيه في موقف زي ده هو وفاطيما، ازاي أخدتي قرار قاسي ومتهور زي ده قوليلي يا أمي!!! وأضاف والوجع يحشرج صوته المبحوح: _كان هيجيلك قلب تقدمي حياة ليها ولابني على حساب حياة علي وفاطمة؟؟!! وبابتسامة ختم فيها وجعه المتضخم: _للدرجادي كنتِ مصدقة إني مش راجع، محطتيش أمل صغير أني عايش طالما مشوفتيش بعنيكي جثتي!!

أخفضت وجهها أرضًا عسى أن تخفي تلك الدمعة الزاحفة على وجهها، فما أن رأها عُمران حتى نهض يزيحها.