رواية صرخات انثى الفصل الثامن عشر 18 - بقلم ايه محمد رفعت

أحاطه ألم مقبض احتل فقرات ظهره ورقبته من نومته غير المريحة على هذا المقعد القاسي. بالرغم من ذلك لم يعنيه الأمر في سبيل رؤية تلك الراحة التي تنعم بها ملامحها، والآن حظي بغطاء وضمة كف يدها لخصلات شعره الطويل لخلف رقبته. الأمر كان مرضيًا لمشاعره المرهفة، فابتسم علي وادعى نومه وهو يراقبها تخرج من الحمام وتتجه لارتداء إسدال صلاتها، تؤدي صلاة الصبح بخشوع تام.

حينما أنهتها تسللت للأسفل بحذر، عدم إيقاظه لتعاون مايسان بطهي الطعام مبكرًا كما اتفقنا مسبقًا. ولجت المطبخ فوجدتها قد استيقظت بالفعل وبدأت بتحضير الطعام، لتجد الأخرى تلحق بها. فهتفت بعدم تصديق: _معقول قومتي بدري كده عشان تساعديني! أنا فكرتك بوق ومستحيل تقومي من 5 الصبح. منحتها فطيمة بسمة رقيقة، وأشمرت عن معصمها تقترب تعاونها وهي تخبرها: _أنا وعدتك إني هساعدك ومستحيل أخلف بوعدي. اتسعت بسمتها وقالت بفرحة تغمرها:

_والله أنا ربنا بيحبني أنه رزقني بسلفة قمر زيك يا فاطيما، أنا كنت هنا بحس بالملل، والأغرب إني كنت لما بحس بالوحدة بضطر أروح مع فريدة هانم الجمعيات بتاعتها، يا أما أروح مع شمس كام مشوار مع صديقاتها الأجانب اللي لا يطاقوا بالمرة. ضحكت وهي تستمع لها باهتمام، وشرعت بجذب الوعاء للنيران قائلة بمزح: _مش هتنجبري تروحي تاني مع حد، أنا جيتلك أهو وقاعدة متفرغة الـ 24 ساعة. جذبت المنشفة تزيح المياه عن يديها، وقالت بتسلية:

_بس أنا عندي تعقيب صغير. استرعت اهتمامها، وتساءلت: _تعقيب إيه؟ أضافت بعملية باحتة: _المفروض إني مرات عمران، وهو أصغر من علي، وإنتي مرات الأخ الكبير وواجب عليا احترامك صح؟ انتظرت قليلًا تحسب كلماتها جيدًا قبل أن تهز رأسها بخفة بالرغم من عدم فهم حساباتها الغريبة، فقالت الأخيرة بنزق: _إزاي بقى وأنا أكبر منك!!! أدلت الأخيرة شفتيها بحيرة، فلم تعد تحسن اختيار الرد الصريح الذي ترجوه الأخرى منها، لذا قالت:

_عامليني زي ما تحبي، أنا في كده جاية معاكي وفي كده جاية بردو! تشاركان الضحك معًا وضمتها مايا إليها بحب سرى لفاطمة التي تعلقت بها بقوة، كالتائه ببلد لا يعلم بها أحدًا. وفجأة، طلت له روحًا طيبة تطمن قلبه وتخبره بأنها لن تفارقه أبدًا. *** خرج علي من الغرفة يسند رأسه على كتفه بتعب شديد، فتفاجئ بأحمد يعاون أخيه بدخول المصعد. ولج خلفهما يردد وهو يخشى الالتفات للخلف حيث مكانهما: _صباح الخير.

تفرس أحمد بملامحه الغريبة، هاتفًا: _صباح النور يا دكتور. وباستغراب استطرد: _إيه اللي شنكلك بالشكل ده؟ ارتبك علي وراح يبحث عن أي حجة تحفظ ماء وجهه: _لا أنا بس آآ... تحمل عنه عمران الحرج حينما قال: _هتلاقيه خد صف أول على كرسي غير مريح أو كنبة نص عمر، اسألني أنا يا عمي أنا مطقطق وفاهمها وهي طايرة. كظم غضبه بثبات لا يعلم من أين تحلى به، فتولى أحمد مهام الرد ليهدم جبهته، حيث قال:

_ما بلاش إنت يا عم الوقح، ده إنت من يوم ما اتجوزت وإنت بطولك في أوضتك والله صعبان عليا وأنا شايفك وحيد وبائس كده! أغيب بالشهور وأرجع على أمل إن نحسك اتفك ألقيك لسه ثابت على توب التعفف. ضحك علي مستهزءً، بينما ردد عمران بسخرية: _أنا زاهد والله بس هي فتنة تحل من على حبل المشنقة، أقف على رجلي بس! ترك أحمد كتفه فكاد بالسقوط أرضًا لولا استناده على كتف علي الذي صرخ بوجع وهو يحيط برقبته صارخًا:

_مش عايز ألمحك النهاردة، إبعد عني أنت سامع! عاد يبحث عن أحمد مرددًا بخبث: _إيه يا عمي هتتخلى عن مساعدتي وأنا كنت ناوي أجوزك مع الواد علي بعد بكرة. تلألأت عيناه بقوة، وكأنه صبي لا يتعدى عمره السادسة عشر، فتمسك بجسد عمران الصلب متسائلًا: _هتعملها إزاي دي؟ ابتسم وهو يتصنع غروره: _لا إزاي دي بتاعتي، سيبها عليا وأنا أروشلك الهانم تروشية تدعيلي عليها العمر كله. واستطرد ساخرًا:

_مهو مش معقول هقف أتفرج عليك وإنت مبرد نفسك لآخر الشهر، هو العمر فيه كام شهر يا راجل!! الحاجات دي عايزة الراجل الحامي، شوف برودك إنت والدكتور النص كم اللي واقف جنبك ده وصلك لفين؟ برق أحمد بعينيه بصدمة لجراءة حوار عمران الوقح، ومع ذلك استطرد بعقلانية يتبارك بها لذاتها:

_لما مشيت ورا عقلك والواد علي هتتجوز وإنت على عتبة الخمسينات يا راجل ولولا تدخلي كنت هتكتب كتابك بس على الحور العين أهو ربنا كان هيعوضك دنيا وآخرة على نزاهتك المبالغ فيها دي!! وأشار لذاته بعنجهية: _وشوف بقى لما همشي ورا كلامي ونصايحي هوصلك فين. وأشار ببده بعدما خرجوا من المصعد، فاتبع إصبعه باب الجناح الخاص بغرفة فريدة هانم، ردد علي بسخط: _نفسي أرميك بنظرة قاتلة بس للأسف مش قادر ألفلك! وتطلع لأحمد القريب منه يستأذنه:

_اديله بصة حمرا من بتاعت الشيطان دي يا عمي لما عضم الترياقة بتاعتي يفك! لم يبخس شيئًا به، فمنحهما معًا نظرة مستحقرة، قبل أن يتجه للخارج بصمت مخيف، جعل عمران يهمس بحيرة وهو يتطلع لعلي المتعصب: _اتقمص! *** خرجت فطيمة تاركة مايا تصنع المشروبات، فوضعت الدورق الضخم بالبراد. وما كادت بالاستقامة بوقفتها بعدما انتهت من وضعه بالرف السفلي حتى شهقت فزعًا ورددت بصعوبة بالحديث: _خضتني يا عمران!!

طوفها بنظرة جريئة شملتها من الأعلى للأسفل، قبل أن يهمس بصوت رخيم دافئ: _سلمت حبيب عيوني وقلبي من الخضة، إيه يا وحش، تأثيري عليك قلبك مش قده ولا إيه، إجمد كده!

رفرفت باهدابها بذهول من طريقته تلك، ومع ذلك لم تهتم كثيرًا فهي تعلم بأن زوجها يحتل المرتبة الأولى بالوقاحة العالمية، لذا تحركت تعيد جذب الدورق الآخر لتعيده للبراد والاخر يستند على الحائط المجاور للبراد يراقبها بنظرة لم تكن عادية لها، ومع ذلك تجاهلته إلا حينما طل من فوق باب البراد يسألها بصوت مغري: _محتاجة مساعدة؟ إشرأبت بعنقها للأعلى لتجده يكاد يسقط باب البراد من فوق رأسها، فاستقامت بوقفتها تجيبه ببرود:

_لا شكرًا خلصت كل حاجة، اطلع أنت ريح برة لحد ما صحابك يوصلوا. مال تجاهها بجسده يتساءل ببراءة وود: _أنا خوفت أتعبك قولت أساعدك بأي حاجة، وعندي خوف تالت تكوني هنا وحيدة من غيري، طب بذمتك ينفع تكوني لوحدك وأنا موجود يا بيبي! ارتبكت مايسان من طريقته الغامضة بالحديث، وكأنه يتعمد أن يجردها من برودتها التي تخفي من خلفها مشاعرها المتلهفة إليه، فتراجعت حتى قيدت الرخامة السوداء حركتها، فرددت بهمس مرتعش: _في إيه يا عمران؟

نقل ذراعه الذي بات يستجيب لحركته نوعًا ما، ليقيد منفذ هروبها الوحيد، وابتسامته المسلية لا تترك شفتيه بينما رماديته تحاربها بكل قوة، وحروفه تخرج بطيئة مغرية لمسمعها: _بأمانة كده أنا مش راضي عن وضعنا ده، يرضيكِ أبقى لبانة في بوق عمي وعلي.. ها.. يرضيكِ يا بيبي؟ ارتبكت عينيها وتهربت من عينيه القريبة منها، فتابع بخبث: _الحل إنك تيجي تنوري جناحي اليتيم، ده حتى مساعدة المريض صدقة وأنا مريض جدًا ومحتاج اهتمام منك.

وتابع مشيرًا ليده التي تقترب منها لتحاصرها: _حتى شوفي إيدي! اعتلت معالمها بغضب جعلتها تقذف وابل عصبيتها إليه: _قول كده بقى، طيب بص يا حبيبي حكاية عمك وعلي والحوار ده سبق وفتحناه واتقفل، يعني الحوار ده مالوش سكة معايا! تلاشى غضبها وحل محله الدهشة من ابتسامته الجذابة التي مازالت لم تتركه، بل ملامحه لم تتأثر بتاتًا بما قالت، بل انحنى يهمس لها:

_الجانب الإيجابي إن لسانك نطق إني حبيبك، طب بذمتك في حبيب بيقسى على حبيبه كده يا بيبي؟! أبعدته عنها وكادت بالفرار، فجذبها لمحلها مجددًا وهو يلتقط نفسًا مطولًا يجعله بملامح تتهيء لشيء جادي. فانصبت فيروزتها إليه تنتبه لما سيقول، فأتاها صوته الرخيم: _بصراحة كده لما جيتيلي أوضتي امبارح واتكلمنا وبتاع اكتشفت حاجة مهمة جدًا يا مايسان. انتبهت إليه وقد جرى الحديث بجدية جعلتها تترك مزحه الثقيل جانبًا وتسأله: _حاجة إيه؟

طرق بيده على الرخامة من خلفها بشكل أفزعها: _إني كنت مصلي لسه قيام الليل وربنا منزل على قلبي التقوى. وانحنى لها مجددًا يغمز لها بوقاحته: _أنا بقول عدي عليا النهاردة تاني يمكن شيطاني يكون حاضر ونرتكب معاصي! استنزف داخلها كل محاولات صبرها، فدفعته بشراسة جعلت الأدوات من خلفها تسقط أرضًا، وكادت بالتنحي جانبًا فتعركلت قدميها بزجاجة الزيت من أسفل قدميها، فاندفع ذراعه يضمها إليه هامسًا بسخرية: _إسم الله والحارس الله يا بيبي.

اعتدلت بوقفتها ترمقه بازدراء، وصاحت: _إنت مالك النهاردة من الصبح بيبي بيبي، حد قالك إني عيلة صغيرة!! ضحك وهذا استفزها، وخاصة حينما قال وهو يجيبها ببرود: _إنتِ بنتي أنا ومتزعليش يا ستي بنت قلبي الكبيرة عشان متزعليش. وأخفض نبرة صوته يحطم كبرياء أنثاها المتمردة، ساخرًا من حالهما: _ولو كنتِ متعاونة كان ممكن أكون متفائل إن هيكون عندنا بيبي صغير بجد.. فلحد ما ده يحصل هفلق دماغك بكلمة بيبي اللي بتعصبك دي يا بيبي.

تهدل كتفيها بحزنٍ ويأسها يتراقص على ملامح وجهها من أمامه، ورددت بهدوء غريب بعد استسلامها لوقاحته ومزحه القاتل الذي لو استمر به لن تنجح بردعه: _مش كنا اتفقنا يا عمران وكنت بقيت لطيف بكلامك معايا إيه حصلك فجأة النهاردة؟ ابتسم وهو يراقبها تشكوه لنفسه، وانحنى يهمس لها بإغراء: _عياري فلت بعد ما شوفتك بالقميص المحترم بتاع امبارح!! وصاح متجهمًا: _أنا واحد قاعد في حالي أشوف أكل عيشي، أتفاجئ بحورية داخلة تروضني عن آ.........

كممت فمه بيدها وعينيها تبرقان بصدمة، فاستدارت تبحث عن أحدٍ حولها قبل أن تصيح بانفعال: _بسسس إنت إيه!! بالع حبيتين جراءة على الصبح! وبنظرة شاملة تساءلت: _عمران إنت رجعت تشرب تاني؟! هز رأسه ببراءة ومازالت تكمم فمه، فانتفضت فجأة حينما لثم باطن يدها، لتراقبه بذعرٍ بينما يستكمل هو طريق برائته متسائلًا بلهفة: _مالك يا حبيبتي؟! بقيت بتخشبية جسدها تبرق له بصدمة لايجاده تمثيل دوره التقديري لجائزة الأوسكار بالتمثيل، بينما

تابع وهو يتفحصه بنظرة قلق: _إنتِ تعبانه؟ هزت رأسها نافية ومازالت تتراجع حيث بامكانها الفرار من ذاك المنحرف الخطير، وبينما هي تتراجع قال ببسمة ماكرة: _أجبلك كوباية ميه تبلعي كلامي السم يا بيبي؟ هزت رأسها نافية، فابتسم بوادعة لطيبتها الغريبة وهدوء وقفتها، فتكرر وابل أسئلته: _زعلانه مني؟ هزت رأسها توافقه حزنها منه، فعاد يتساءل بمكر: _بتحبيني؟ هزت رأسها موافقة حبها له، فتهللت أساريره وانحنى يطبع قبلة على خدها هامسًا

بخبث: _وأنا كمان بحبك يا بيبي. كادت بأن تفر عدساتها من عينيها لفرط فتحهما، وبينما هي تراقبه بصدمة افاقت على حقيقة تبلد جسدها أمامه، فكانت تختبر مصارعة ما يعتري عقلها بتلك اللحظة، عينيها تجوب بالمطبخ وكأنها تبحث عن السكين لطعنه، فعادت تحوم من حولها إلا أن اهتدت لشيءٍ أهم تمتلكه، وكان يدها الذي هوى لتمنحه صفعة رقيقة تناهز رقة أصابعها وصراخها العاصف يحيط بأذن ذاك الواقف على عتبة المطبخ يردد بتوسل:

_مايا اعمليلي قهوة، دماغي من الصداع مش قا... انقطع حديثه حينما رآها تهوى بصفعة على وجه أخيه وهي تصيح بوجهه بغضب: _إنت وقح يا عمران! وتركت المطبخ بأكمله وغادرت من أمامهما، فاقترب منه علي بصدمة ليجده يضم خده ببسمة خبيثة وهو يردد بالإنجليزية: _كان هذا قاسيًا يا رجل! بينما تمرد لسان الأخير هاتفًا وعينيه تراقب زوجة أخيه التي تفر للخارج بعصبية الشياطين أكملها: _إنت عملت إيه يلا! تحلى بثبات مخادع والتفت لعلي

يردد بخشونة اعتلت نبرته: _ولا حاجة. ردد ساخرًا: _ولا حاجة!! دي إديتك كف خماسي الأبعاد. اعتلى الضيق ملامحه وهتف بتأثر: _آه خدت بالك من القلم، شرسة أوي بنت خالتك دي بس على مين أنا حبالي طويلة واتعودت أمشي بالطريق الطري لأخره، فإن شاء الله أجيب آخرها وأتمنى متجبش هي أخري ساعتها مش هيكون في مجال للوقاحة تاني يا دكتور علي! واستند على الرخام يجبر قدميه الثقيلة على الحركة وهو يتابع:

_يلا أسيبك تعملنا القهوة بقى، وابقى اعملي سندوتش كده عشان أعمر الطاسة الخربانة دي لأجل ما أفوق لفريدة هانم أرميها بجوازة عمك دي أهو أتسلى عليها قبل ما تتسلى على مراتك الغلبانة. وتركه منصدمًا وكاد أن يتخطاه ولكنه عاد يخبره من جديد: _آه افتكرت.. اوعى تيجي قدام جمال أو يوسف وتشتكي من رقبتك، العيال دي لماحة وعقلها بيرمح ورا الخيل هيفهموا الليلة ووكستك السودة هتتفضح قدامهم. ورفع يده يشدد على كتفه وكأنه يواسيه:

_مهما كان انت أخويا وشكلك يهمني. وتركه وغادر لباب المطبخ الهزاز وصاح قبل أن يختفي من أمامه: _ابقى حط مخدة ورا رأسك، خليك ذكي ولماح! وهز رأسه بسخط ومر يتحدث مع ذاته وصوته يصل لذاك المصعوق من أمر أخيه: _محدش في البيت ده بيفكر بعقله، مصممين تفضحوا نفسكم سواء أخويا أو عمي الاتنين معاتيه!! واستطرد بحماس: _اصبروا عليا بس، أنا قعدتلكم أهو لا شغلة ولا مشغلة!

اتجهت نظرات علي المصدوم تجاه مايسان التي خرجت من الحمام المجاور للمطبخ فور تأكدها من مغادرته فاتجهت لتراقب علي الذي مازال يحتضن رقبته بإحراج لسماعها حديث عمران الأخير، فتصنعت انشغالها بصنع القهوة بينما ردد هو: _ماله ده؟! استدارت إليه بلهفة، وكأنه لقط الحديث على لسانها: _معرفش والله من الصبح مش طبيعي. وهدأت قليلًا تفكر بحديثه مع علي ثم قالت: _أنا سمعته بيقول إنه جايب عريس لفريدة هانم؟ هز رأسه يؤكد لها، فتابعت بتفكير:

_لو قالها دلوقتي هتقوم الحريقة وزمان أصحابه على وصول، إلحقه يا علي واقنعه ميقولهاش حاجة إلا بعد ما يمشوا. حاول هز رقبته مجددًا فصرخ ألمًا وصاح: _آآآه.. منك لله يا عمران. وإتجه للخارج مضيفًا: _اعملي قهوة يا مايا واعمليله يطفح بيقولك محتاج يتغذى قبل ما يشن الحرب! *** بغرفة شمس.

لم تتمكن من النوم طيلة الليل تفكر بحديث آدهم المخيف، مازالت جملته عالقة بذهنها، وتحليلها يكمن بتعابير مقبضة تجعلها تخشى القادم، فإن لم يتمكن من الحصول على ذاك الملف قبل موعد تسليم الشحنة السامة لمصر وقتها ستضيع جهوده هباءًا وما يزيدها قلقًا تعرضه للخطر حينها لإن الشكوك برمتها ستصبح مسلطة عليه بعد ان تم كشف عملتين متتاليتين لراكان ومن خلفه بنفس الفترة التي تولى بها آدهم العمل معهم.

استحضرت حديثه أيضًا عن صعوبة اقتحامه لقصرة وغرفته الخاصة بوقته الحالي لإنه لا يريد إثارة أي شكوك تجاهه هو وفؤاد وباقي فريقه بخضم لحظة إعدادهم للشحنة القادمة، فانتفضت عن فراشها تتجه لنافذتها وهي تعقد شالها الرقيق حول بيجامتها الستان الزرقاء لتهمس بخفوت: _بس أنا أقدر أدخل قصر راكان بمتتهى السهولة ووقتها آدهم مش هيتأذى! ***

انتهت فطيمة من تبديل ملابسها المتسخة بفستان رمادي اللون يعلوه حجاب أسود، فكانت رقيقة بملامح وجهها الهادئ. اتجهت للأسفل فما إن انتهت من الدرج وصولًا للطابق الأول حتى صعقت باتجاه فريدة للهبوط هي الأخرى، كادت بالتراجع للأعلى أو الاتجاه للمصعد، ولكنها توقفت رغمًا عنها حينما عقدت فريدة ذراعيها أمام صدرها وتساءلت بحدة: _جوابك موصلنيش يعني؟

ابتلعت ريقها بصعوبة وحاولت أن تتسم بهدوئها، تخشى أن يهاجمها الإغماء أو التشنجات الغريبة. فقطعت فريدة صمتها حينما دنت لتصبح قبالتها تردد وعينيها الزرقاء لا تترك غنيمتها: _لو المبلغ قليل ممكن نزوده المهم إننا نوصل لكلام نهائي بالموضوع ده. أجلت فاطمة صوتها أخيرًا وبالرغم من اختفاء الكلمات من حلقها إلا أنها قالت: _أنا مش عارفة ليه حضرتك مصممة إني وافقت أتجوز دكتور علي عشان فلوسه، أنا مكنتش أعرف حاجة عن عيلته ولا أملاكه.

ورفعت عينيها لها تترجاها بحزن: _من فضلك سبيني في حالي، أنا معنديش استعداد أخوض حرب جديدة زيادة على حروبي، صدقيني أنا بتمنى أن يكون بينا حب واحترام وبحاول من دلوقتي تكون العلاقة بينا كويسة بس حضرتك اللي مش مديني فرصة. ضحكت بصوت أثار قلق فاطمة، فراقبتها بتوتر وخاصة حينما رددت بتريث: _قولتلك قبل كده إن الأفلام الهندية دي مبتدخلش عليا. وتابعت بنظرة صارمة مخيفة:

_خليكي فاكرة إني كلمتك بالحسنى وعرضت عليكي تبعدي عن علي وإنتِ كسبانة مبلغ محترم، لإن اللي جايلك فيه خسارة وهتخرجي منه بطولك لا معاكي علي ولا فلوسه. وتركتها مصدومة وهبطت للأسفل، متجهة لأحمد وعمران الذي يقبض كلماته بعد تنبيهات علي بذلك، فرددت بازدراء وهي تتابع ابتسامة أحمد المؤكدة على حديث الأمس: _مساء الخير. رفع عمران عينه عن هاتفه يجيبها بابتسامة واسعة:

_مساء الجمال والورد يا فريدة هانم، أول مرة يعني تنزلي من فوق الساعة واحدة الظهر، خير؟ ارتبكت نظراتها الموجهة لأحمد المبتسم بانتصار لرؤية النوم يفارق عينيها لتأثر حديثهما، فقالت بتوتر: _آآ... أنا... آآ.. اهتدى عقلها كونها الهانم هنا وهو الابن لذا قلبت الآية حينما صرخت باندفاع: _هو انت بتسألني بأي حق! ثم إنك يهمك في إيه أقوم بدري ولا متأخر ما أنت مظبط عزومتك ومرتب كل حاجة بدون ما ترجعلي أو حتى تأخد رأيي!

التهم عمران الشطائر التي أعدتها له زوجته بنهم، وقال وهو يلوكها بتلذذ: _محبتش أزعجك معانا بالأكل الدسم اللي هيتعمل ده أنا حتى خصصت الشيف يعملك Healthy food (أكل صحي) عشان وزنك الرشيق ده اللي عيشتي تحافظي عليه لابن الحلال اللي يستاهلك والحمد لله لقيته واتقدملك وأنا وفقت. طرق علي بيديه فوق رأسه بصدمة مما يتفوه به أخيه، بينما حدجته فريدة بغضب ثائر: _إنت بتقول إيه!! هز رأسه مؤكدًا على ما يقول:

_بقول جايلك عريس لقطة ميترفضش. احتدت نظراتها وكادت بقتله، فأسرع علي بالتدخل قائلًا وهو يغتصب ابتسامة زائفة: _متخديش على كلامه يا فريدة هانم، هو شكله كده السم اللي شربه عامل معاه مفعول. هز رأسه رافضًا لحديث أخيه وتابع مشيرًا على أحمد الذي يتابع ما يحدث بابتسامة هادئة:

_مش صحيح أنا بعقلي، حتى إسالي أنكل أحمد سالم الغرباوي لقيتله حتة عروسة طلقة روسية هنروح بعد الغدا نطلبهاله مع إنه مصمم إنه هيتجوز واحدة تانية آخر الشهر بس أنا عايز أكافئه الراجل زاهد في جنس الستات وصبره يستحق المكافأة، يدلع نفسه بالاتنين دول ولو عايز يتجوز أربعة معنديش مانع، إنت عندك مانع يا أحمد يا ابني؟

هز أحمد رأسه نافيًا متبعًا نفس طريق عمران بالاعتراض والموافقة، فاتخذت فريدة عينيها مدفعًا يتقمصه فأشار بكتفيه ببراءة وهو يدلي بشفتيه وكأنه مغصوب على تلك الزيجة وحديث ذاك العمران الأبله!

لأول مرة يعجز لسان فريدة هانم عن الحديث، وزعت نظراتها بينهما بحيرة وجدها أحمد كسطوح الشمس، وقد كان مندهشًا لاستجابتها لطريقة عمران الغبية ولكن عليه الاعتراف هذا الوقح يجيد التعامل مع صنف النساء وكأنه كان الزير المجنح للعائلة على مر العهود! تحررت عن صمتها ذاك حينما صاحت بعصبية: _عريس إيه وعروسة إيه، عمران بطل أسلوبك المستفز ده وإتكلم عدل وإلا مش هيحصلك طيب. كاد بأن يتحدث فقاطعه الخادم الذي أتى يخبرهم:

_لقد وصل السيد يوسف والسيد جمال سيدي. أشار له بعصبية وهو يعتدل بجلسته: _أيها الأبله هل تأتي لتخبرني وتتركهم بالخارج. عاد الخادم يرحب بضيوف عمران بالداخل، فقابلتهم فريدة ببسمة صافية بالنهاية يوسف وجمال من الشخصيات التي تجبر من أمامها الانحناء وقارًا لهم. أشار أحمد لهم بترحاب: _يا أهلًا وسهلًا بالغاليين، اتفضلوا.

ولج يوسف برفقة زوجته وجمال يلتقط يد صبا التي تخطو للداخل بارهاق يوجهها منذ الصباح حتى أنها كانت ترفض الحضور ولكن جمال أصر عليها. انسحبت فريدة للخارج تاركة له مساحة الجلوس برفقتهم واتبعها أحمد دون ان يلاحظهما أحد. هبطت مايسان للأسفل ترتدي فستان من اللون السماوي وحجاب أبيض جعل وجهها ينير كالبدر، فولجت للداخل تردد على استحياء: _السلام عليكم.

اجابوها جميعًا بصدر رحب، وقد افتقدوا لتلك التحية الإسلامية التي باتت مهجورة بتلك البلاد، فاقتربت من ليلى وصبا قائلة بحبور: _كان نفسي اتعرف عليكم من زمان وأخيرًا جت الفرصة. ضمتها ليلى بحب، قائلة: _سبق وقابلتك بس كان وقتها كنتِ مشغولة مع البشمهندس، ربنا يكمل شفاه على خير. آمنت على حديثها واقتربت من صبا تتبادل الأحضان معها، قائلة بلباقة: _إيه الجمال ده كله، ما شاء الله اسم على مسمى يا صبا. ضرم وجهها حمرة الخجل،

وبادلتها ببسمة رقيقة: _انتِ اللي زي القمر اللهم بارك. أتاهم صوت مشاكس يؤكد لهم: _القمر لما بيشوفها بيقوم ويشاورلها تقعد مكانه. ضحك جمال يشاكسه: _ما تفكك من جو كاظم ده وقوم استعجلنا الأكل لحسن أنا جاي واقع. لكزه عمران بغضب: _إنت جاي من بيتك طفس يا جدع، ما تهدأ علينا شوية. ضحك يوسف عليهما واستشهد بعلي: _عجبك كده يا دكتور علي، اخوك بيتوقح علينا من أولها يرضيك.

حاول جاهدًا أن يلتف إليه، فعاد يتطلع أمامه وهو يعتصر شفتيه ألمًا قائلًا: _فكك منه يا دكتور يوسف وتعالى نلعب طاولة زي زمان. ضيق عينيه بدهشة، وسأله بدهشة: _مال رقبتك يا علي؟ كاد بأن يبحث عن حجة قوية تحجبه عن ذكاء طيب قد يكشف جميع حججه، فتنهد عمران قائلًا بحزن جعل الجميع يتأثر به:

_أخويا مفيش أطيب من قلبه، شافني نايم طول الليل تعبان رايح جاي على السرير بنازع جاب كرسي ونام جنبي من كتر خوفه عليا لأقع من السرير وينكسر ضلعي اللعين هو كمان. هزت الفتيات رؤوسهن بحزن، بينما كبت جمال ويوسف ضحكاتهما مما جعل علي يكز على أسنانه هادرًا: _اصبر عليا، وربي لأعيد تربيتك من أول وجديد. أشار بصدمة وهو يهمس له بصوت مسموع للرجال: _عملت إيه بنقذ رجولتك المهدورة يا غبي! صعد يوسف من بينهما فقد كان يجلس

بمنتصف الأريكة بينهما: _البنات قاعدين بلاش فضايح!! انتبه علي إلى ليلى التي سألته بابتسامة هادئة: _أمال فين مراتك يا دكتور علي؟ حين تذكرها بحث بالردهة بحثًا عنها، فتابعت ليلى بمزح: _هتخبيها عننا ليوم الحفلة ولا إيه؟ رد عليها بابتسامة صغيرة: _لا أبدًا، كانت هنا من شوية. ورفع صوته عاليًا: _فاطيمــا.

سمعت لصوته المنادي، ففركت يدها بتوتر، كانت تظن بأن الأمر لا يخصها فستكتفي بجلوسها بالمطبخ تعاون مايا بتسخين الطعام ففاجئها علي بنادئه. خرجت تتجه للصالون وهي تجاهد لتهدئة انفعالاتها ورسم ابتسامة صغيرة، فما أن رآها علي تقترب حتى نهض ليتبع خطواتها البطيئة ليعرفها بمن أمامها قائلًا: _ده البشمهندس جمال وده دكتور يوسف أصحابي أنا وعمران يا فاطيما.

ارتبكت للغاية بالبقاء بمكان يحوي ثلاث من الشباب لا تعرف إلا عمران من بينهم، فتبلدت بوقفتها ورغمًا عنها تشبثت بجاكيت علي بشكل جعل يوسف يتابعها بنظرة دقيقة قادرة على تحليل حالتها باجتياز وادهشه الأمر حقًا، أيعقل أن يرتبط علي بفتاة على ما بدا له تحمل مرضًا نفسيًا ظاهرًا على ارتباكها وضم أصابعها بطريقة يعلمها جيدًا كطبيب. مد جمال يده لها بابتسامة هادئة: _أهلًا مدام فاطيما، وألف مبروك مقدمًا.

راقبت يده الممدودة برجفة سرت بجسدها، وعينيها معلقة على كفه الممدود بحرج، فأسـرع علي برد الحرج عنها وعن جمال حينما صافحه وهو يضيف مازحًا: _فاطيما متدينة شوية، لكن أنا منحرف وبسلم عادي. تعالت الضحكات فيما بينهم على عكس تعابير يوسف الجامدة، فخطى بها علي تجاه الفتيات ليشير لمايا بتحمل هي أمر تعارفها بهم، وقال بلباقة لمعرفته بأنها لن ترتاح بالجلوس هنا:

_مايا خدي فاطيما ودكتورة ليلى ومدام صبا الحديقة الخارجية المنظر من هناك هيعجبهم جدًا. تفهمت إشارته ونهضت على الفور: _أيوه المنظر من هناك تحفة وهنكون على راحتنا أكتر.. اتفضلوا. وبالفعل انسحبوا معًا للطاولة الخارجية، فبدأت فاطمة بالتعرف على ليلى وصبا وكذلك فعلت مايا ولكنها لازمت صبا لتستدرجها لأمر العمل بالشركة. ضحكت ليلى وهي تتابع صبا التي قالت بمزح:

_يا ريتني مشيت ورا جمال من زمان وعرفت إن ليه أصحاب عشان نتجمع التجمع اللطيف ده وأتعرف عليكم، أنا من وقت ما جيت هنا وأنا لوحدي. ردت عليها مايسان بتهكم: _ما أنا أهو بشتغل بالشركة مع عمران وحاسة إني لوحدي بردو كل اللي حوالي هناك أجانب ومفيش غير كام موظف مصريين بس رجالة مفيش بنات، عشان كده أنا مش هتنازل عنك يا صبا، هخلي عمران يكلم البشمهندس جمال وتنزلي تشتغلي معايا أنا محتاجة لواحدة بمؤهلك ده جدًا.

ابتهجت معالم وجهها الأبيض، ورددت بعدم تصديق: _بجد يا مايسان، يا ريت والله نفسي أخرج من البيت وأخد على البلد هنا. وتلاشت ابتسامتها وهي تقول عابثة: _بس أعتقد إنه مش هيوافق لإني حامل. ردت عليها ليلى ببسمة رقيقة: _وفيها إيه يا صبا هو إنتِ راحة تهدي حجارة، أنتِ هيكونلك مكتب وشغلك كله حسابات يعني راحة جدًا ومش خطر عليكي. تحمست مجددًا وقالت لمايسان: _خلاص يا مايا قولي له يكلمه ويا رب يوافق.

هزت رأسها بتأكيد، فقطعت ليلى الصمت حينما وجهت حديثها لتلك الصامتة منذ لحظة جلوسهم: _وإنتِ يا فاطمة مؤهلك إيه وبتشتغلي ولا لأ؟ رفعت عينيها إليهم بحرج لمسته مايسان فكادت بالتدخل نيابة عنها ولكنها وجدتها تبلغها: _أنا مقدرتش أكمل تعليمي، يعني كنت مخطوبة قبل كده وكنت بحب خطيبي فمدخلتش الجامعة واكتفيت باللي وصلتله عشان أكون معاه. وبامتعاض استرسلت: _بس محصلش نصيب، نصيبي كان هنا مع دكتور علي. ابتسمت صبا وهتفت بتأثر:

_سبحان الله... ربنا يفرحك يا حبيبتي ويجعله العوض ليكي عن كل اللي شوفتيه. ابتسمت بسعادة وقالت: _يا رب... تسلمي. *** كان يتبعها للخارج حينما تسلل لهاتفه رسالة عمران النصية: «اتقل متدلقش وراها كده، خليك زي بذر الخوخ لما بيقف في الزور» زم شفتيه ساخرًا وغير اتجاهه لمكتب المنزل، هاتفًا لذاته: _والله عال أحمد الغرباوي بقى ماشي ورا كلام العيال! وإتجه للمقعد الرئيسي يجذب حاسوبه ليتابع العمل هامسًا ببسمة تسلية:

_وماله خلينا وراه لما نشوف آخرتها آ.... ما كاد باستكمال كلماته حينما وجدها هي من تلحق به، فولجت للداخل تصيح به: _عروسة إيه اللي هتخلي ابني أنا يروح يطلبهالك يا أحمد باشا، روح اتجوز اللي تتجوزها بعيد عني أنا وأولادي سامعني! اتسعت ابتسامته وإلتحف بالبرود يخبرها: _حاضر، هروح لوحدي. وعاد يستكمل عمله، وحينما وجدها مازالت تقف أمامه رفع عينيه يتساءل بنفس ذات البراءة الخاصة بعمران الذي بات معلمه الذكي:

_في حاجة تانية يا مرات أخويا؟ سحبت شيطانيها وغادرت المكتب صافقة الباب من خلفها بقوة كادت باطاحة زجاجه الباهظ، فاعتلى ثغره ابتسامة جذابة وهو يهز مقعده باستمتاع. *** بالخارج. دمغ يوسف يديه بزيت الزيتون الساخن الذي أحضره له الخادم بناء على طلبه يدلك رقبة علي الذي هتف باسترخاء: _الله عليك يا جو، اضغط بقوتك على الجنب ده ربنا يراضيك. انصاع له يوسف مرددًا بسخرية: _وماله يا حبيبي، دكتور يوسف لعلاج قفشات العظام تحت أمرك.

كتم جمال ضحكته بصعوبة وقال بخبث: _يوسف بعد الليلة دي عايزك تفتح العيادة تكشف على صبا مش عارف مالها من الصبح كده دايخة وتعبانة. استدار إليه يمنحه نظرة محتقنة قبل أن يسحبها لعمران المسترخي أمام الشاشة يتناول مكسرات بتسلية: _مش عايزني أكشفلك على حاجة إنت كمان؟ قال وهو يشير لقدميه بتعب: _رجلي بتنقح عليا يا جو والله خلص أبو علي وتعالى دلكلي رجلي بالزيت يمكن ربنا يجعل في وشك القبول وأقف عليها بقدرة قادر. التفت يوسف

حوله ثم تحرر صوته المحتقن: _لو مكنتش عامل احترام لوالدتك وعمك كنت قولتلك لفظ من إياهم عارفهم؟ ضحك عمران بصوته كله حتى كاد بأن يقتل من سعاله لتوقف التسالي بحلقه، بينما تساءل علي بدهشة: _لفظ إيه ده؟ ضحك جمال وهو يشير له: _بلاش يا دكتور علي إنت محترم وابن ناس. صدح رنين هاتف يوسف الموضوع على الأريكة، فجذب المنشفة يجفف يده ثم رفع الهاتف يجيب: _أيوه يا سيف. تجهمت معالمه بصورة ملحوظة لجمال وعمران الذي

تساءل فور إغلاقه هاتفه: _في إيه يا يوسف؟ جذب مفاتيح سيارته وهو يشير لجمال قائلًا: _مفيش حاجة نص ساعة وراجعين، سيف بس في مشكلة صغيرة هنحلها ونرجع. إشارة يوسف لجمال فهمها عمران جيدًا، فرفع ذراعيه لهم قائلًا بإصرار: _معاكم.. رجلي على رجليكم في الطالعة دي، أنا مش متنازل سامعين!! انتصب علي بوقفته يتساءل بقلق: _طالعة إيه؟ هو في إيه يا يوسف؟ رد عليه سريعًا: _مفيش يا دكتور علي، أخوك دمه يلطش بس مش مصدق.

وضغط على شفتيه لعمران يشير له بالصمت، بينما انحنى جمال يساعده لتأكدهما بأنه لن يتركهما بالساهل، فعاونه يوسف من الجهة الأخرى، فالتف لعلي قائلًا بمرح: _قولهم يجهزوا الأكل عما نرجع. راقبهم باستغراب، وعاد يتسطح محله بهدوء وكأنهم نسمة عبرت بطريقها للخلاص. *** بسيارة جمال. صاح يوسف بعصبية لمن يغفو بالمقعد الخلفي: _مش عارف لزمتك إيه، كنا هنخلص أنا وجمال الحوار ونرجع! اجابه وهو يجتهد بوضع ساقًا فوق الأخرى:

_لا إنت ولا هو هتقدروا تخلصوا الليلة، أنا معايا كورس في التربية ياض. وتساءل باهتمام: _المهم هو الواد اللي بيروق أخوك ده هو نفسه الواد المصري الملزق اللي ساكن في الدور اللي فوقه وكان بيشتكي منه قبل كده. هز يوسف رأسه بتأكيد، ففرك عمران يديه وهو يهمس ببسمة شيطانية: _فرجت، عضلات إيدي نقحة عليا من يوم ما نمت بالسرير. رد عليه جمال ساخرًا: _يا حبيبي إنت مش شايف نفسك، إحنا مساندينك للعربية يا عمران هتتعارك مع الواد إزاي بس!

أشرأب بعنقه يعنفه بغضب: _إنت مال أمك إنت يا جمال، وديني للواد ده وسيبني أتعامل. جحظت عين جمال من لفظه الوقح، فمرر يوسف يده على وجهه وهو يهمس لجمال: _حقك عليا أنا، متعصبش عمران لما بيتعصب بيبقى وقح سوق واستهدي بالله خلينا نلحق الواد قبل ما نوصل نلاقيه جثة.

التقط شهيق قوي ولفظه زفير أقوى، فقاد بأقصى سرعته حتى وصل للعمارة، فلمحوا سيف يتأوه أرضًا وذاك الشاب الذي يتبختر بعضلات جسده يكيل له الركلات، فاندفع جمال ويوسف خارج السيارة بسرعة جعلت عمران يخرج رأسه من النافذة هادرًا بانفعال حازم وهو يصوب سلاحه تجاههما: _أقسم بالله لو خطيتوا خطوة واحدة كمان لأطلق رصاصي عليكم، قولتلكم الواد الممحون ده قتيلي النهاردة، ارجعوا كده لعقلكم وساندوني أوصله!

تبادل جمال مع يوسف النظرات والاخر يتطلع لأخيه بقلق، فأسرعوا للسيارة يفتحوا بابها، ليسانده جمال من جهة ويوسف من جهة أخرى، وما إن اقتربوا منهما حتى اندفع يوسف لاخيه يعاونه على الوقوف بينما يساند جمال عمران، فحاوطوا ذاك النذل الذي ضحك مستهزءً: _ده أخوك اللي كلمته تتحامى فيه يالا. نهض يوسف قبالته يصيح بانفعال: _إنت فاكر إنها سايبة ومفيش قانون أقدر أحبسك بيه وآ... دفعه عمران للخلف بغضب:

_ريح إنت يا دكتور يا محترم سبلي أنا الردح. ووقف قبالته مستندًا على جمال بكتفه الأيسر، فضحك الشاب قائلًا: _انتوا جايبنلي واحد مشلول يأخد بحقه!! ابتسم عمران بثقة جعلت الأخير يتابعه بسخرية، فسأله عمران: _سمعت عن عمران سالم الغرباوي يالا؟ هز رأسه مستهزءًا، فاتسعت بسمة عمران وتابع: _حظك يا روح أمك إنك هتشوفه وش لوش.

وضربه برأسه ضربة جعلت الأخير يترنح للخلف من شدة الضربة التي تلاقاها من رأس عمران، فكاد بالسقوط أرضًا متعثرًا، فأشار ليوسف: _أمسك الحلوة دي وقربها لي يا دكتور. كبت يوسف ضحكاته بصعوبة، وبالفعل جذبه ليدفعه تجاه عمران الذي يشير لجمال الضاحك: _امسكني حلو لحسن الشلل ده رعاش ممكن أجيب شمال.. بينما عاد يقابل ذاك الذي يرى عمران أربعة أشخاص تتراقص من أمامه، فقال ببسمة هادئة: _قولي يا حيلة أمك، أبوك بيشتغل إيه؟

بدى متحيرًا وكأنه فقد الذاكرة، فردد جمال بدهشة: _مالك بأبوه يا عمران؟ تطلع جواره بجيبه: _عايزينه يلم بنته اللي فارضة عضلاتها تغري الأجانب هنا، ما هنا سبحان الله بيقدروا الستات والرجالة الـ** برق يوسف بعينيه وهو يتابع أخيه يتأمل عمران بصدمة، وكأنه يرى شخصًا يراه لأول مرة، فقد سبق ليوسف وجمال مشاهدة جزء من خروج ذاك المعتوه عن رزانته، بينما استرسل عمران قائلًا:

_انتي مكسوفة تقولي شغلانة أبوكي يا عسلية، أنا هنوب شرف المهمة دي، عارف يا سيفو شارع الهرم، أبوه بيلم النقطة من ورا العالمة كل يوم راجل مكافح وشهم بيكافح عشان يربي البقف اللي جاي يفرد علينا عضلاته.. جحظت عين الشاب صدمة، فتابع عمران ضاحكًا: _ياض ميغركش البدلة الشيك اللي أنا لبسها دي، أنا أصلًا من العتبة يا حيلتها. وسدد له لكمة قوية أطاحته أرضًا بقوة، فأشار ليوسف: _قوم نوسة يا دكتور.. وسندهالي. جذبه يوسف إليه مجددًا،

واقترب يهمس له: _خلاص كده يا عمران الواد اتربى وأخد الكورس كامل، بلاش نلم علينا السكان. لكزه ليعود تجاه سيف مجددًا: _ريح إنت. وأشار لمن جواره: _تكة لمين شوية يا جيمس، مش طايله يا جدع! هز رأسه بضحكات صاخبة، فاتجه عمران ليجذب الأخير من تلباب ملابسه ليصبح أمام رماديته الحارقة وتلك المرة كان جادًا غامضًا:

_اسمعني بروح أمك إحنا هنا من لما كنت لسه بتعملها على روحك، فمش هتيجي على آخر الزمن تعمل علينا بلطجي في مكاننا، دكتور سيف من هنا ورايح لما تشوفه تضربله تعظيم سلام ولو طولت تحوض من الحيط عشان متتقابلش معاه هتعملها ده لو مش عايز تشوف واحد وقح وقادر يكسرك اسمه عمران سالم الغرباوي، وصلت يا نوسة ولا نسف الشريط تاني بس خد بالك المرة الجاية هتلاقيني واقف على رجلي من غير ما حد يسندني وتخيل بقى هيحصل فيك إيه وقتها!

هز رأسه بارتعاب فإن كان لا يمتلك نصف الآخر وفعل ذلك ماذا سيتمكن من فعله، دفعه عمران للخلف بشراسة جعلته يهرول لداخل المبنى وكأنه كان يقابل شبحًا لعينة منذ قليل. استدار يشير ليوسف: _يالا يا جو هات دكتور سيف وبينا الأكل هيبرد. ابتلع سيف ريقه بصعوبة بالغة، ومال يهمس ليوسف: _مين ده؟! تنحنح الأخير وهو يكبت ضحكاته: _بشمهندس عمران صاحبنا بس بعد عنك وقت ما بيلاقي خناقة بيقلب على بلطجي من نزلة السمان! هز رأسه متفهمًا

وعاد يهمس: _أنا خوفت. عدل يوسف من نظارة أخيه التي كادت بالسقوط هامسًا بضحكة: _لازم تخاف، وبعدين الراجل وجب معاك وهو متدشمل! وتابع ضاحكًا: _والحيوان ده ابن حلال ويستاهل ما المرة اللي فاتت لما ضربك كلمناه أنا وجمال بالعقل ولا عمل أي اعتبار لينا وضربك تاني، بعد اللي عمران عمله وقاله معتش هتلمح طيفه اسمع مني. تعصبت ملامح سيف، وهتفت بانفعال: _متقولش ضربك دي، أنا كنت هعلم عليه بس احتارت وملقتش زوايا. منحه نظرة ساخرة وهدر:

_عندك حق الواد كله زوايا وانحناءات! *** طرق الباب وحينما استمع لأذن الدخول ولج للداخل يبحث عنها، فاتجه للطاولة التي تحتل مقعدها، فقال بنظرة عميقة: _ممكن تسمعيني؟ اعتدلت فريدة بجلستها وأصغت لمن يجلس قبالتها باهتمام، فقال بعد أن أطال بنظره لها: _مجاش الوقت اللي تفكري في نفسك يا أمي؟

خلاص إحنا كبرنا ومبقناش العيال الصغيرة اللي تخافي تسبيهم وراكِ، بقينا رجالة وفاهمين وواعين وعمرنا ما هنقف في طريقك وخصوصًا بعد الظلم اللي حصل زمان بينك وبين آآ.... آآ... عمي... جيه الوقت اللي تختاري الحبيب اللي هجر قلبك طول السنين اللي فاتت دي!