رواية تار صعيدي الفصل الحادي والعشرون 21 - بقلم ملك شاهين

فراس فضل باصص ومذهول من اللي حصل. كان لسه بدر هيضربه بالنار دلوقتي وهيموت، وفجأة اتحول كل ده وضرب نفسه هو ومات! فراس قرب منه ووطى على الأرض ومسك إيده وقعت منه. هيثم قرب منه. هيثم: فراس، خلاص ده جزاته. فراس بصدمة: مش قادر أصدق إنه يعمل كل ده... تخيَّل صاحب عمرك يطلع في الآخر أكبر عدو ليك. هيثم بمواساة: ياما حذّرناك يا فراس، وإنت كنت قافل ودنك وعامي عينك عن الحقيقة، بس خلاص كل حاجة خلصت.

حمزه ونسمة دخلوا بيجروا. نسمة جريت على فراس. نسمة: إنت كويس؟ حاجة حصلتلك؟ فراس: أنا كويس. نسمة بصت قدامها لقت بدر مرمي على الأرض. حطت إيدها على بوقها. حمزه: إيه اللي حصل؟ هيثم: كان خلاص هيضرب فراس بس عكس الاتجاه وضرب نفسه. حمزه ببرود: كويس علشان يضمن جهنم. فراس بص له: هو مات خلاص، ما يجوزش ليه غير الرحمة. حمزه ببرود: المسلم الميت لما بيموت ما يجوزش عليه غير الرحمة مهما عمل، بس ده خلاص انتحر يعني بقى كافر!

والكافر ما يجوزلوش الرحمة. فراس بص له جامد وسكت وخرج بره البيت وخد نسمة معاه. هيثم بضيق: مش فاهم حاطين نقركم من نقر بعض ليه. حمزه: أنا ما عملتلوش حاجة... أنا قولت الحقيقة وكويس إنه مات علشان كان هيموت على إيدي أنا. بعد شوية الإسعاف جت وخدت بدر على مستشفى علشان يخلصوا الإجراءات. روحوا هما البيت وحمزه قالهم إن بدر قتل ماري. فلير بصدمة: يعني إيه! ...

أنا أنا كنت بحبها ما كنتش بكرهها دي دي أختي هي هي اللي كانت بتكرهني ما أعرفش ليه بس بس ليه يقتلها؟ ليه؟ كان كان ممكن تتغير، أي حد بيتغير من الوحش ويبقى حلو وهي ما كانتش وحشة قوي علشان تموت الموتة دي. ليه ليه؟ فراس حضنها جامد: اهدي اهدي يا حبيبتي... ادعيلها ربنا يرحمها. بعد شوية فراس كان قاعد مع سالم. فراس: عمي البقاء لله. سالم: ونِعم بالله يا ابني. فراس: عمي عارف إنه مش وقته بس أنا كنت عايز أعرف إيه علاقتكم ببدر؟

سالم بتعب: بدر كان شريك ليا في شغل وكان بييجي يزورني كتير في البيت بكذا حجة ولما عرفت إنه شغال شغل مش تمام فضيت الشراكة بينا. البلد كلها عرفت بموت بنت الجناوي ورغم إنهم ما عرفوش مكان المدفن أو أصلاً ادفنت ولا لأ عملوا العزا اللي استمر ٣ أيام. وبعد مرور ٣ أيام فلير كانت قاعدة عندهم في القصر علشان العزا ولسه مروحة. نسمة: عاملة إيه دلوقتي؟ فلير: الحمد لله... إنت عاملة إيه؟ نسمة: تمام... أنكل سالم وحمزه عاملين؟

فلير: كويسين... لسه برضه إنت وخالتو ما بتتكلموش؟ نسمة: فلير لو سمحتي بلاش نتكلم في الموضوع ده. فلير: لا يا نسمة ما ينفعش لازم نتكلم في الموضوع ده بالذات. نسمة بعصبية: أتكلم في إيه يا فلير أنا عمري ما هسامحها هي السبب في علاقتي أنا وفراس إنها تبوظ هي السبب إنها تخلي أخويا يكرهني هي السبب. فلير بعصبية أكتر: لا مش هي السبب في أي حاجة، هو ما كانش بإيدها أي حاجة أصلاً...

وإنتِ سامحتي فراس مش عارفة تسامحي أمك اللي ولدتك واتحرمت منك ما لحقتش تشوفك حرام عليكي يا نسمة حرام عليكي غيرك مش لاقي يا شيخة هتستني لما النعمة تزول من وشك وبعدين تحسي وتندمي... أنا قولتلك اللي عندي خالتو ما لهاش ذنب في أي حاجة، اعملي اللي تعمليه بقى. وسابتها وطلعت على جناحها. نسمة تحت فضلت تفكر في كلام فلير وبعدين طلعت على أوضة مامتها خبطت ودخلت لقتها هي وفراس ولورين اللي قاعدين جنبها. ليلة بفرحة: نسمة...

تعالي يا حبيبتي في حاجة؟ نسمة قربت منهم وقالت بإحراج: هو لازم يبقى في حاجة علشان أجي أوضتك؟ ما فيش غير فراس ولا إيه؟ ليلة: أكيد لا تيجي في أي وقت طبعًا أنا استغربت بس. فراس: مالك ومال فراس يا ست نسمة؟ نسمة وهي بتزقه من مكانه: قوم من هنا وسيبني أقعد شوية. فراس باستفزاز: لا مش قايم. نسمة: طب ولو قولتلك إن مراتك جت؟ فراس بفرحة: إيه بتهزري صح؟ أيوه صح دي قايلة إنها جاية انهارده... طب سلام عليكم أنتم بقى.

وخرج بسرعة فضِلوا هما الإتنين يضحكوا عليه. نسمة بأسف: ماما أنا آسفة على معاملتي ليكي و... ليلة قاطعتها وهي بتاخدها في حضنها: آسفة على إيه بس دي كفاية كلمة ماما اللي طالعة منك دي بالدنيا. نسمة: أنا بحبك قوي. ليلة: أنا بحبكم أنتم تلاتة أكتر من أي حاجة في الدنيا. لورين بتذمر: مامي وأنا كمان خديني في حضنك اشمعنى نوني؟ ليلة خدتهم هما الإتنين في حضنها وفضلت تدعي ربنا يديمهم ليها وما يحرمهاش منهم تاني.

في جناح فلير وفراس، فلير كانت قاعدة على الكنبة بتقلب في الموبايل. فراس فتح الباب بسرعة هي اتفزعت. فلير بخضة: أخص عليك يا فراس بجد أنا اتخضيت. فراس حضنها جامد من غير ما يتكلم وهي حضنته. فراس بحب: وحشتيني. فلير بخجل: وإنت كمان. فراس: وأنا كمان إيه؟ فلير: وإنت كمان وحشتني. فراس: الله أكبر... بقولك إيه. فلير بدلع: إيه؟ فراس بحب: بحبك. فلير: وأنا كمان. فراس: وإنت كمان إيه بقى؟ فلير: يوووه بقى الله ما خلاص.

فراس بضحك: خلاص يا ستي... بس أنا مش بحبك بس... كمل وهو بيبوسها أنا بعشقك.... بعد مرور حوالي ٤ شهور. في جنينة قصر الأسيوطي. حمزه: يا بنتي يا بنتي خطوبة بس حتى أنا هخلل جنبك. نسمة: لما أخلص آخر سنة امتياز. حمزه وهو بيحك إيده الإتنين على وشه: يا حظي الأسود. فراس وفلير جم ناحيتهم. فراس: مالك بأختي يلا؟ حمزه بغيظ: على فكرة خطيبتي. فراس: دي قراية فتحة بس. حمزه وهو بيبص لنسمة: شايفة الذل اللي عمالهولنا...

كمل وهو بيبعده عن فلير... طب ابعد إنت بقى عن أختي. فراس وهو بيشدها في حضنه: لا يا بابا دي مراتي. حمزه: والله! ... طب أنا عايز أكتب الكتاب بقى. فراس: اتنيل إنت عارف تخطب أصلاً. حمزه بغيظ لنسمة: شايفة شايفه. نسمة بضحك: الله وأنا مالي يا لمبي؟ حمزه بسرعة: إنت تعرف إننا اتفقنا إن كتب الكتاب آخر الأسبوع وأنا كنت داخل أبلغ جدي هارون. فراس بص لنسمة اللي متنحة وقال: الكلام ده بجد؟ نسمة بصت

لحمزه اللي همس ليها وقال: وربنا لو كدبتيني وموافقتيش لأخطفك ومحدش هيعرفلك طريق. نسمة بتوتر: آه آه يا فراس. حمزه: شوفت. في الوقت ده هيثم ومرام جم. مرام كانت بتجري عليهم بسرعة. مرام وهي بتاخد نفسها وبتنهج: احضرونا يا جماعة. فراس: يخربيت صوتك. مرام: هش ش ش ش ش. فراس رفع حاجبه وبصلها. فلير بضحك: في إيه يا مرام؟ هيثم جه ناحيتهم: ازيكم يا جماعة. الكل رد بعدها مرام اتكلمت. مرام: ركزوا معايا بقى دلوقتي كده.

الكل بصوت واحد: اخلصي. مرام: يخربيت حب الناس بجد... المهم. البيه بيقولي إن هو اللي خد الفيرست ستيب عشان كلمني الأول مع إني أنا اللي قلتله وسألته (إنت مش هتقولي بحبك بقى؟ يبقى مين فينا اللي خد الفيرست ستيب الأول من غير كدب؟ الكل بصوت واحد: هو. مرام: طب ارجعوا للكدب تاني بقى. الكل بضحك: إنتِ. هيثم: الهبلة عايزة تفشكل الفرح اللي كمان يومين علشان خاطر مين اللي خد الفيرست ستيب الأول أولع في نفسي.

حمزه: مش عارف إنت مستحملها إزاي الصراحة. مرام: إنت مالك إنت مالك على قلبه زي العسل. فراس بهمس لفلير: متى. بعد مرور ٥ سنوات. في مدينة الفيوم تحديدًا في جبل المدورة كانوا كلهم متجمعين وعاملين حفلة باربيكيو بس الجو كان حر جامد. نسمة: حمزه بقى يلا ننزل علشان تبدأوا شوي أنا جعانة. حمزه وهو حاطط وشه على تكييف العربية: مش نازل مش نازل الجو ولع منع لله أخوكي. نسمة بزهق: يوووه بقى يلا يا حمزه أنا جعانة.

حمزه: انزلي اشوي إنتِ أنا مش مستغني عن نفسي. نسمة: ما كنتش جيت بقى وكنت أقعد مع بنتك. حمزه اتعدل وبصلها: حبيبت بابا والله وحشتني. نسمة بغيظ: والله! ... على فكرة إنت بقيت بتحبها أكتر مني خلي بالك. حمزه بضحك: إنتِ بتغيري من بنتك؟ نسمة: آه بغير منها ويلا بقى انزل علشان جعانة. حمزه باسها بسرعة وقالها: بحبك وفتح باب العربية ونزل. فلير قامت تقف مع فراس اللي واقف عند العربية. فلير: حبيبي بيعمل إيه؟

فراس: كنت بكلم ماما بطمن على الولاد كلمتيهم؟ فلير: حبايب مامي أكيد كلمتهم. فراس: لا هسألك سؤال بجد إنتِ بتحبيني أنا أكتر ولا هما؟ فلير بضحك: ده بجد؟ ده سؤال أكيد هما طبعًا. فراس كشر: يعني إيه يعني؟ فلير بضحك: ده سؤال يا حبيبي إنت هتغير من الولاد ولا إيه؟ فراس بضيق: لما تقولي إنك بتحبيهم أكتر مني المفروض أفرح؟ فلير بحب: حبيبي أنا بحبهم حب وإنت حب تاني خالص. فراس: ثبتيني ثبتيني. فلير بضحك: طب بذمتك مش اتثبت؟

فراس: الصراحة آه. فلير: فراس أقولك نكتة؟ فراس: لا لا لا ونبي.... وجري بسرعة وسابها. فلير: بقى كده ماشي. عند مرام وهيثم. مرام: بتخوني يا هيثم؟ هيثم بصلها وما ردش. مرام: مترد بتخوني صح؟ هيثم: ما أنا لو قلت لأ هتقوليلي كداب، ولو قلت آه هتقوليلي كداب برضه. مرام: أنا نكدية يا هيثم؟؟ قول أنت عايز تقول كده صح؟ هيثم: أنا اتكلمت دلوقتي؟ مرام: جوايا بيقولي إن جواك عايز يقول للجوايا إن أنا نكدية. هيثم دماغه لفت: إيه كل ده؟

مرام: هيثم أنا حامل في الشهر الكام؟ هيثم: ده اختبار مفاجئ. مرام: هيثاااام جااوب. هيثم: في السادس يا حبيبتي. مرام: غلط. هيثم: غلط إيه؟ إحنا كنا عند الدكتور إمبارح وقال كده. مرام بعصبية: أنا في السادس وأسبوع يا هيثم، شوفت إنك مش مهتم. هيثم بصلها بقلة حيلة ومسح وشه وطبطب على ضهرها وقام وسابها. مرام بصوت عالي: خلي بالك الاهتمام ما بيطلبش. هيثم بصوت عالي: أبو شكلك أنت والاهتمام يا حبيبتي. مرام: ماشي يا هيثم والله لأوريك.

هيثم جه من وراها وباسها: بحبك يا مجنونة. وراح بسرعة عند حمزة. فلير وفراس جم ناحيتها. مرام بتعب وزهق: منك لله يا اللي في بالي. فراس من وراها: بتقولي حاجة يا مرام؟ مرام بغيظ: بقول ربنا يعلي مراتبك يا فراس يا أخويا وينصرك على مين يعاديك، على الفسحة والفكره الجامدة دي، آه والله جميلة. فراس باستفزاز: طب كويس إنها عجبتك. مرام لفلير بغيظ: عايزة أقوم أجيب جوزك من شعره، عااا منه لله.

فلير بضيق: ما تدعيش عليه لو سمحت، الله ما حدش قالك توافقي تيجي. مرام وهي بتضربها: ما هو أنا لو أعرف إن الجو حر كده ما كنتش جيت، ما كنتش جيت، منكم لله هتولدوني في السادس. نسمة جت ناحيتهم: ما تخافيش يا اختي ما حدش بيولد في السادس، وكمان يعني معروفة إن الفيوم حر في الصيف خصوصًا في شهر ٨ و ٩. مرام: تصدقوا أنا غلطانة إني بتكلم معاكم، وأنا أستاهل فعلًا، أنا هضرب نفسي بالجزمه حاضر. بعد شوية حمزة وفراس وهيثم جم ناحيتهم.

مرام بجوع: ها خلصتوا؟ هيثم بص لفراس وحمزة علشان حد يتكلم فضلوا ساكتين. فلير بقلق: هو في إيه؟ ما تقولوش لسه، ده أنا هموت من الجوع وممكن أصورلكم قتيل هنا. فراس وهو بياخد نفسه: بصوا الصراحة يعني... وبعدين سكت. حمزة بتوتر: هو يعني فراس عايز يقول... مرام: في إيه يا جماعة ما تخلصوا؟ هيثم بصلهم بصة هما فهموها وبعدين اتكلم: الصراحة بقى إحنا نسينا نجيب فحم اللي هنولع بيه ونشوي. التلاتة في نفس واحد: نعاااام.

هيثم بضحك: بنهزر بنهزر والله... دول مجانين وممكن ياكلونا. فلير بصوت عالي: يلا يا جماعة ناخد صورة جماعية. وقفوا كلهم وخدوا صورة سوا وكملوا بقية اليوم يجروا ورا بعض ويلعبوا ويهزروا.