رواية ذنوب على قيد الغفران الفصل الأول 1 - بقلم براء

بيبي اخويه يسمع. زكيه: أي بيبي يسمع. هلو مروان، آني غنى اختك الجبيرة. لتخاف راح أضل ألعب وياك لحد ما يرجعون بابا وماما. زكيه: مروان شنو؟ غنى: بيبي ماما تصيحله مروان من جان ببطنها، يعني اسمه مروان. زكيه: باوعتلها، لساني عاجز. شحجي وشكول؟

أكلها أبوك وأمك انكلبت بيهم السيارة. أبوك منتهي بالحادث، وأمك كوه نقلوها للمستشفى بيها نفس. جابت منا ماتت منا. منو يصدك حادث سيارة يموت شخصين بعز صحتهم وينقذ طفل رضيع عمره يوم ويطلع عايش؟ الها إرادة إلهي. سحر: شراح تسوين هسه يمه؟ زكيه: شسوي؟ آخذها هي وأخوها لبيتنا، قابل أعوفها هنا. سحر: خاف أهل أبوهم يردّوهم. زكيه: آني مستعدة كلشي أسوي ولا أفرط بيهم. وين كانوا أهل أبوهم؟ من سنين ستوهم ذكروا عدهم أحفاد. شيريدون يسوون؟

خلّوا يسوون. حتى لو ياخذون هالبيت ويتنازلون عنهم، آني قابلة. ولج هذوله من ريحة أختج، شلون ترديني أفرط بيهم؟ ولج منو يصدك ختام أم ضحكة الحلوة تروح هيج؟ ولج قبل خمس أيام اجتني تريد تخيط لي ملابس تكلي يمه أريد تخيطي لي ملابس منج حتى ألبسهن من أجيب. ولج يمه عفتيني ورحتي ومالبستي هدومج، لبسوچ الجفن. يا يمه. سحر: كمت وعفتها. ما أكدر أصدك أختي وصديقتي ماتت وتركت وراها طفلين. هاي صار على روحچ ثلث تيام يا ختام. آخ.

سعاد: تعالوا ولكم هنا بسرعة بسرعة. منذر: ها ماما. سعاد: شوف ولك، أبوك إذا سألك وين جنت شتكله؟ منذر: جنت آكل. سعاد: ضربته. لك غبي! شنو تاكل؟ قصدي وين جنت قبل ساعة؟ مو بالشارع. إذا إجه أبوك سألك كله فهد جان يلعب ويانا، آني وفيصل، وبعدها عافنا وحدنا وراح. منذر: بس هو ما جان ويانا، أصلًا ما طلع اليوم. سعاد: شلون بيه ويه الحمار اللي عندي؟ آني ولك اسمعني زين. فهد ما يحبكم، يكرهكم هواي. منذر: صدك؟ منو كال؟ سعاد:

أي آني سمعته يكول لأمه: "اله أضرب منذر وفيصل". منذر: بس آني أحبه. سعاد: جريت أذانه. اسمع ولك، هاي أول وآخر مرة أسمعك تكول أحب فهد. تره أطيح حظك. منذر: آخ! ليش هو مو أخويه؟ سعاد: لويت أذنه. لا مو أخوك، والله إذا تكول أخوك أكطعك. هذا ابن إيمان مرت أبوك، يعني مو أخوك. وإذا تكول أحبه، أجويك على لسانك حتى متكدر تحجي بعد. منذر: لا لا والله بعد ما أحبه ولا حتى ألعب وياه. بس لاتجويني. سعاد: هديت أذنه. يله وليييييييييله.

ليلى: يمه شبيج عصبية؟ سعاد: كعدت أخوج راح يموتني. يلعب ويه ولد إيمان. جم مرة كتله لتختلط بيهم، بس ماكو. عبالك أحجي ويه الحايط. ليلى: عوفهم جهال. سعاد: ولج موتوني! ألف مرة حجيت وكلت: ولكم ذوله ولد مرت أبوكم، هذوله كسرت أمكم. ليلى: هسه خليهم. ليش تضلين تاكلين بروحج؟ عليمن؟ منو يستاهل يا ماما؟ سعاد: ولج آني ميتة قهر. خاف عبالج أبين مامتهتمة؟

ولج آني نار وأكعد جوايه. عبالج سهلة عليه بيوم وليلة ياخذون رجلي مني ويعرسوا على حساب الولد الثاني؟

ما اكتفوا بواحد. والله أتمنى أخنك بيبيتج على اللي سوته. راحت جابت وحده ريفية بت فلاح وزوجتها لسالم حتى تخلف له ولد. والله طلع حوبتي بيهم. ثلث سنوات هي ما عدها حمل وكلها صاحت الثانية عاقر، وسالم رجعلي تالي. الحقيرة مدري شسوت، حبلت وجابت له فهد. أبوك الحقير ما كدر ينتظر شوية. هاي آني جبت له ولدين وهاي انتي، وذيج الحقيرة جابت له ولدين. وشمدريج يجوز الثالث بالطريق. ليلى: ماما موضوع وانتهى. انسيه.

سعاد: بحقد. عمري وحياتي ما أنسى سوايت أبوچ بيه. غدرني وراح تزوج عليّ. ويا ريت لو الماخذها تسوى. ولج بت فلاح تحلب بالبقر، فضلها على بت العز والدلال وراح تزوجها وجاب منها دسته جهال. وما خله أي اعتبار لمشاعري. ليلى: بس ماما بابا ميحب خالة إيمان. وحتى ضرب يضربها. جم مرة أشوف وجها كله آثار ضرب، بس ولا مرة شفتها تبجي.

سعاد: أدري بي ميحبها ولا راح يحبها. بس القاهرني إنو كدرت نفسيته تتقبل وحدة غيري. أدري بيها مشلوعة كلب وياه، بس هي اللي جابتها لنفسها من قبلت. أما إنو متبجي، فهاي وحدة صلفة وبرعة. جانت عايشة ويه الحيوانات، أكيد تصير بلا إحساس مثلهم. على العموم، هذا موضوع خالص. ماكو داعي نحجي بي. وين بتول؟ شو ماشفتها اليوم؟ ليلى: تغدت ونامت. سعاد: خليچ يمه. ديري بالج. أسمعج مضوجتها. هاي بت أختي ومعزتها من معزتكم وأكثر.

ليلى: لا يمه أكيد. أحطها بعيوني. حتى هسه من تكعد أدرسها. سعاد: عفيه بيچ. أريدچ شكول تكولين. صار. ليلى: صار. إيمان: لازمة العصارة وأخليها على جروح فهد. ميتة من القهر عليه. دومه ساكت وانعزالي. إلى درجة شخصيته حيل صعبة. وطبعًا يصير هيج لأن أبو محتوي ولا أحد مداره. لو خواله يخابرون عليه ياخذوه يمهم، لو محد بحاله. خو ميأذيك؟ فهد: لا يمه متأذي. إيمان: عوفه يجف شوية والبس ملابسك. وهسه أكعد أقرأ. باچر عندك امتحان مو؟

فهد: أي عندي إنكليزي. إيمان: أي يله طلع كتبك واكعد أقرأ حتى تنام من وقت. فهد: صار. كعدت أقرأ. كملت وكمت ألعب أروى وعلي لأن يضوجون. أروى: فهد، إيدك ليش حمرة؟ فهد: تعورت بالباب. يله تعاي صعدي على ظهري. أروى: بضحكة. تشيليني حمال باشي؟ فهد: أي يله. أروى: بس صعدت على ظهره صرخ. شبيك؟

فهد: ابتسم. مابيه شي. أشاقه وياج. يله خلي نلعب. فتريت بيها بالغرفة وهي تضحك. أروى ونستنا. آني وعلي مخلينها اللعبة مالتنا. نمشط لها ونلعبها هواي ألعاب حتى تضل تضحك. رغم جسمي يأذيني من ضرب الحزام، بس ميخالف. أهم شي أختي تتونس. ضلينه نلعب لحد الساعة بالعشرة وبعدها رحنا نمنه، لأن إذا سعاد سمعت صوتنة، تخلي أبويه يضربنه. سحر: يله غنى خالة تعاي اقري. باچر عندچ إملاء. غنى: ما أريد. أريد ألعب ويه مروان.

سحر: حبيبتي صيري حبابة وسمعي الكلام. تعاي خلي أردلچ إملاء وبعدين عود كعدي ألعبچ ويه مروان. غنى: صار. سحر: ابتسمت. عفيه بالوردة اللي تسمع الكلام. زكيه: أكلچ خو ما تسأل على أهلها بعد؟ سحر: كل ما تسألني أطلع لها عذر، لحد ما بطلت تسأل.

زكيه: هزيت راسي. كومي يمه قريها. لا تقصرين وياها. اعتبريها بنتچ. أعرف هالسبوعين جاي أضغط عليچ، بس ما عندي معين غيرچ يا يمه. خواتچ كلمن ملتهية بروحها. ولا كأن أختهن صار لها أقل الشهر من ميتة. سحر: لا يمه صدك تحجين؟ طبعًا ما أقصر وياها. هاي بت أختي حسبت بنتي. واني أنطيت خبر لرجلي كتله راح أبقى فترة هنا لحد ما تهدأ الأوضاع تمامًا. زكيه: الله ينطي العافية ويرزقه من أوسع أبوابه.

سحر: إن شاء الله. يله من رخصتج أروح أقري البنات. زكيه: براحتچ. فهد: حلينا من المدرسة آني وعلي. نمشي بجهة. وفيصل ومنذر ورحمن صديق فيصل يمشون بجهة. ولا عبالك إخوان. آني صف ثالث متوسط، وعلي ومنذر بالخامس ابتدائي. نفس العمر مو توأم، بس ولدوا بنفس السنة. وفيصل أكبر منه بالسادس أدبي. علي: فهد فهد. فهد: ها. علي: فهد تعال نشتري لبلبي منا من أبو جاسم. فهد: بهدوء. اشتري أنت. آني ممنوع عليّ أصرف شي منا لأسبوع.

علي: ميخالف. آني أشتري بمصروفي وأنت أكل وياي. فهد: لا ما أشتهي. لو جوعان آخذ منك، بس مجوعان. منذر: ها علي، شلونك بالامتحان اليوم؟ علي: زين. حتى حليت الأسئلة. كل أجوبتي صح. أنت شلونك؟ منذر: يعني مجاوب. علي: أي وأنت؟ منذر: ما عليك أنت. فيصل: تعال منذر، لا تمشي ويه ولد الفلاحة. علي: انجب ابن الما بيها حظ. رحمن: ضربته. حقير! شلون تحجي ويه أخوك الجبير هيج؟ هاي أمك فلاحة وبت فكر، وهيج نافشين أرواحكم. لو ملكة شتسووون.

فيصل: ههه. آني أدري. ياريت لو تستاهل بواكه الزلم.

فهد: آني سمعته كال هيج على أمي وجربته من قميصه. نمت فوكه. أضربه على وجهه. آني كل شي ولا أمي. ملخوني ولا تمسون أمي. خرمشت وجهه بأظافري. صحيح هو أكبر مني، بس آني أضخم وأقوى منه. وهذا الحمار صديقه عود يفزع له. دفرته دفره يمكن وكعت كليته من وراه. بس آني واحد وهمه أثنين. هم أذوني، بس ميخالف. أهم شي أتوبهم حتى ميحجون على أمي بعد. كوه وخرونه عد بعض. والله إذا بعد تحجي على أمي، أخلي تبن بحكك الأعوج هذا الحقير. شلت جنطتي

وأخذت إيد علي ورجعت للبيت. طبيت. صارت بوجهي سعاد. أحنه النه الطابق الجوه، وهي الها الطابق الفوك. أبويه مطلعلها درج ورة البيت حتى تاخذ راحتها. وفوك هذا كل ساعة كامزة عدنا بالبيت. أحنه وأهل أبويه كلهم كاعدين بنفس المنطقة. عددنه جبير، بحيث ماخذين نص المنطقة ببيوتنه. أباوع أمي طلعت من المطبخ. أباوع لها. أنطت خبز لسعاد، لأن أمي تخبز دائمًا. سلمت عليها. شلونچ يمه؟

إيمان: أباوع لقميصه مترب وممزق وحاجبه مضروب وينزف. باستغراب. هله يمه، شبيهن هدومك؟ شنو جنت تتمرغل بالتراب؟ وشبي وجهك؟ شنو متعارك؟ فهد: بهدوء. لا يمه وكعت بالطريق. عفتها وطبيت لغرفتنا آني وعلي. ذبيت ملابسي. طبيت سبحت وطلعت. علي: فهد، أنت ليش تعاركت؟ ضربت فيصل وضربت رحمن ابن المختار. هسه أبويه يلعب جولة بينه. فهد: تريده يقلل من قيمة أمي وأسكت له؟ لو مو ابن المختار وأخويه؟ إيمان: دخلت للغرفة. ها، راح تنام؟

فهد: تمددت على جربايتي. أي. ولحد يكعدني. عندي امتحان مهم باچر. أريد أنام وأكعد أقرأ. إيمان: شو ما شفتك صليت؟ فهد: وأني من شوكت أصلي؟ إيمان: أمي ميجوز. أنت هسه مكلف شرعاً. يعني الصلاة والصيام واجب عليك. فهد: رفعت الغطة. متغطي. عود الله كريم. إيمان: فهد، آني شحجيت؟ كوم صلي ونام. فهد: يمه صلاة ما أصلي. رجاءً طلعي وسدي الباب. أريد أنام. وموضوع الصلاة عود نتناقش بي بعدين. الله يخليج طلعي وسدي الباب.

إيمان: بحده. أحسب حسابك. هاي آخر مرة أسامحك. كلشي ولا التزامك بالدين. جا آني المن أجمعكم وأسولفلكم قصص وأحجيلكم عن دينه؟ غير حتى تعرفون دينكم وتبحثون عليه أكثر، مو حتى تتركون الصلاة. حرام ابني الصلاة عماد الدين. فهد: أي. من سعاد كامت تصلي، وأنتي حسبي من يمچ. إيمان: طلعت وسديت الباب. هالايام هالفهد صاير متمرد. حتى كلامي ما يمشي عليه. آخ. أهدي ربي. هالولد عمره حيل حساس. لازمه توعية ونصائح. بس منو اللي يوعي؟

حظي. رحت حميت الأكل وكعدنا تغدينه آني والجهال. لأن سالم أكله وشربه واحتياجاته كلهن عد سعاد. ماكو عصر. كعد فهد. غسل وأخذ له ساعة يقرأ بيها. مع إنو يدرس قليل، بس كلش شاطر. أباوع له وليدي كبر. ولا كأن قبل جم سنة جبته للدنيا. السنين تمشي ركض ركض وما جاي نحس بيها. بدل وتألق. صاير يعتني بروحه هواي. طلع ويه ولد عمه حارث ومحسن.

فهد: واكفين آني والولد ببيت جدي. دائمًا العصر نتجمع هناك. واكف أحجي ويه حارث. وما أحس روحي غير انجرت من هدومي. أباوع أبويه وياه فيصل. سالم: ولك هاي شمسوي بأخوك أنت. فهد: أباوع كلها كامت تباوع. وولد عمامي تجمعوا داير مدايرنه. حاولت أفلت إيده من ملابسي. ما أريده يحرجني كدامهم. هدني يابه، لو أمشي للبيت نتفاهم. سالم: صفكته راشدي كدام الكل. لك أنت شلون بيك؟ شوكت تبطل هالعنف والهمجية اللي عندك؟

ضربته واحد ثاني. لك أنت واحد مستهتر، زايعته الدنيا وقليل أدب ومو مال احترام. فهد: أول مرة بحياتي أتعرض لهيج موقف كدام أهل أبويه. شكد شابع ضرب من أبويه، بس ولا مرة وصلت بي إنو يضربني كدام أحد. حتى إخواني ماشايفيني يضربني. هالمرة كسر شي بداخلي. حسيت كرامتي انمحت كدام الكل. أباوع لولد عمي يتشاورون ويضحكون بيناتهم. ماعدا حارث ومحسن ضلوا ساكتين. عباس: أنت صدك تحجي سالم؟ شلون تضربه كدام العالم؟ شنو زعطوط ابنك؟

تره جاي يكبر. وبتصرفاتك هاي جاي تطلعه عن الطريق وتدمر شخصيته. سالم: دخلي يا ولي. واحد مينطيه وجهه. مهدي: هسه هو شمسوي؟ مو فيصل اللي غلط على أمه؟ شنو تريده يسكت؟ سالم: ولك ياريت لو على فيصل السايب. ضارب ابن المختار. أجة أبو يشتكي منه. والله صرت بنص هدومي. ماعرف شكله والولد يصيح من ظهره. آني أتفشل وما أعرف أحجي. من ورا واحد أدبسزز. ولك إلى متى تبقى شالع كلبي بعركاتك ومشاكلك؟

ساعة السودة اللي تزوجت بيها أمك الغبرة وخلفتك. عباس: لا تحجي هيج. أكيد هو ما ضربهم بدون سبب. أكيد. شو شمسويله؟ سالم: يجي يكلي مو يروح يتصرف بكيفه؟ مو رجل كرسي آني. فهد: إذا جانت عندي ذرة كرامة بهاللحظة، فانحسمت. وكدام اللي يسوه واللي ما يسوه. لو أمي اللي طاح لها مسبّة كدام الكل. سالم: باوعت له. اعتذر من أخوك الجبير. يله وبعدها نروح تتعذر من رحمن.

فهد: بهدوء. آني مو غلطان حتى أعتذر. الغلطان هو ابنك الجبير وصديقه. والغلط الأكبر من أمه اللي ما علّمته على الأدب وشلون يحترم الكبار. فيصل: تاج راسك أمي. بنت الريفية. فهد: هديت عليه أريد أضربه. لزمني أبويه بقوة. يباوع لي وعيونه تجدح. سالم: أول شي تجاوزت على أخوك الجبير بكل صلافة. وهسه تجاوز على أمك بكل عين صلفة. لك آني مو بعينك؟ مالي سيطرة عليك؟ يعني وتالي وياك؟

فهد: لو محترمين نفسهم، محد يتجاوز عليهم. بس الواحد هو يجيب الاحترام لنفسه. وفهمك كفاية. سالم: هذا الحجي منو ملقنه لك؟ خوالك مو؟ اسمع ولك، تعتذر هسه من أخوك وابن المختار. وتروح تبوس إيد أمك وتعتذر منها على كل شي سويته. وأنت الممنون. آني ما مجبور أضل أحل مشاكلچ وعركاتك بكل مكان. لا الغربة سلمت منك ومن همجيتك، ولا حتى إخوتك خلصوا منك. فهد: كتلك اعتذار ما أعتذر. آني مو غلطان. سالم: يعني تعاند؟

فهد: باوعت له بحقد. أي. شتريد تسوي؟ يعني تضربني؟ ما أخاف منك بعد. حزامك وقايش المبردة والعودة بعد ما يخوفني. شيريد يصير؟ يعني تطردني من البيت؟ أكيف. آخذ هدومي ووجهي بعد ما أراوي لك. سالم: جريته من إيده. تعال أريد أعلمك شلون تتحداني كدام عمامك. سحلته كدامي. وصلت للبيت. دفعته بوجهك للمخزن. بسرعة. أنت مثل المساجين اللي عندي. إذا مو بالجلد والإهانة، ما يمشون.

فهد: طبيت للبيت. طلعت أمي وإخواني على صوت صياح أبويه. أباوع حتى سعاد وجهالها نزلوا يركضون. إيمان: شكو شكو؟ ليش لازمه هيج هدة؟ وين عايشين إحنه؟ سالم: أنت لا تدخلين. محد طيح حظه وحطمه غيرچ. يله لك تعتذر لو أتصرف وياك آني. فهد: يابه اعتذار ما أعتذر. وهاي مرتك كدامك وأحجيها بوجها. مرتچ تربيتها سزز وماعدها احترام لأحد. خوش. سعاد: ببكاء مصطنع. ليش يمه شمسويتلك آني؟

أشوف شايلتك بالصلوات وحتى أعاملك أحسن من ولدي وأحبك. أموت عليك. حتى أبوچ ما أخلي يضربك. هاي جزاتي. فهد: آني وأنتي نعرف كلش زين كمية الحب اللي شايلته إلي بگلبي. بحيث كل ساعة مشتكية مني كدام رجلچ. آني مو مطي ولا زعطوط وما أفهم. سالم: دتعال اليوم أنعل والديك. أريد أشوفك شلون تحجي بعد.

فهد: طبينا للمخزن تحت صياح أمي وصياح سعاد. اللي أدري بي جذب. وهي هسه مسوية حفلة داخلها لأن أبويه حجه علينه وقلل من قيمتنا كدام أهله. يا فرحتها اليوم. أباوع للمخزن. هذا أكثر مكان يشهد على آلامي ودموعي. هالمرة كل زاوية بي تسجل لقطة من المعاناة اللي أعيشها. من جنت صغير وإلى اليوم. آني كل يوم أنضرب بشكل. بحيث صار الضرب ميأثر بيه. كبرت صغير. طفولتي ما عشتها من كد المشاكل والقيل والقال. وأمي آخ يا أمي. محد مصبرني وموكلني تبن غيرها. أباوع لأبويه. ذرة رحمة وحنية ماكو بگلبه. يعاملنه عبالك مجرمين جوه إيده.

سالم: نزعت الحزام. انزع قميصك. يله.

فهد: بدون نقاش. فتحت القميص وذبيته على جهة. درت وجهي منطي ظهري كالعادة. ما أحس على الحزام نزل على ظهري. ضرباته شكد تلسع بجسمي، بس مو مثل گلبي. صعبة على كل واحد يتقبل إنه ينغلط على أمه. لو مهما كانت. وآني من جنت طفل بالاول وإلى اليوم، كلها تصيح لي "ابن الفلاحة". مع إنو أمي مو فلاحة. جانت كاعدة بالبصرة وأبوها عنده بساتين حلاله. وعنده فلاحين يشتغلون بيها. هي حتى ما جانت تطلع لأن هناك متشددين. مو مثل بغداد. ومن حجيت ريحانة خطبت أمي بزيارة للبصرة. ومن انطوها موافقة وتزوجت أبويه. وإلى اليوم وهذي صار لها سنين تسمع كلمة "الفلاحة"، "الريفية"، "المعيديه". ميدرون همه يرحون فدوة لتراب البصرة وناسها. فزيت على ضربة اجتني بكفاه

(علبوتي) . تأذيت هواي. ودموعي يتسابقن يردن ينزلن، بس ما أنزلهن. لا والخلق محمد. سالم: ها. توب لو لا؟ فهد: ساكت. مابديت أي ردة فعل. أتمنى هسه أبقى بغرفة وحدي وأصيح بصوت كل الألم اللي بيه. أطلعه بهالصيحة. سالم: جاوب. شو ساكت. فهد: إذا كملت. أريد أطلع أقرأ. عندي دوام باچر. سالم: ها. يعني ماتبت. فهد: ولا راح أتوب. تدري شكد أكرهك؟

حرام أنت تسمى أبو. وخوالي آباء. يعني الشهداء جاي تروح وتودع عوائلها وأنت لسه عدل ومكابلنه. عندي كمية حقد شايلها بگلبي الك. والله تملي هالدنيا كلها. أول مرة بحياتي أتجاور على أبويه. شكد كلت ضرب، بس ولا مرة عليت حتى صوتي عليه. سالم: صفكته راشدي. يمكن صوفرت أذني بي. تكرهني؟ مو بسيطة. إذا ما أخليك تكرهني بالزايد، ما أسمى سالم. فتحت الباب. سعاااااد. سعاد: ها عيوني ها. سالم: روحي حميلي الصيخ وتعالي بسرعة.

سعاد: ابتسمت بداخلي. بس ميص... سالم: قاطعتها. كلت روحييي جيبي الصيييخ وتعايي يلللله. إيمان: بدموع. شراح تسوي؟ بس لا وصلت بيك تجوي؟ أنت شنو من بشر؟ ولك هذا ابنك. ابنك يا مسلم. الله ابنك. شلون تتحمل تشوفه بهالمنظر؟ اذكر شغلة وحدة. هذا ابنك. مثله مثل فيصل ومنذر وعلي. ليش تكرهه؟ بس فهمني لييييش؟

سالم: أكرهه لأن مثلچ. نسختچ هذا. وكلما بي جاي يتمرد عليّ. ابنچ صاير لي طير حر يريد يطير وين ميريد. ميدري سالم يلزمه ويكص له جناحاته حتى يحلم يطير بعد. سعاد: أجيت أطلع. أجتني إيمان تركض. إيمان: عليچ القرآن. عوفي الصيخ. هاي أول مرة أتوسل بيچ. لتخليه يجوي. أبوس إيدچ. حاچي. بس أنتِ تكدرين تحاجي. سعاد: شو دوخري. آني شعليه. شنو تردي يرزلني؟ آني شكو؟ قابل ابني هو؟

خوش سالفة هاي. آني ولدي ما أدافع لهم. أدافع لولد ضرتي. عفتها وطلعت. أنطيت الصيخ لسالم. خلي يادبّه. الحقير مدمي أخو ومارد له عينه. مرد الكلب. فهد: أباوع لأبويه فاتح الباب. وإخواني واكفين بره يباوعولي. علي واكف على صفحة يبجي. وأمي تريد تطب بس أبويه ميخليها. أجت سعاد بكل هدوء. أنطت الصيخ لأبويه وراحت. سد الباب أبويه وواجه. ما أنكر خفت من شفت الصيخ شلون صاير لونه كد ما حامي. أبويه شكد يضربني، بس عمره ما وصلت بي يجويني.

سالم: ها. تعتذر لو لا؟ فهد: أحجي وشفايفي ترجف من الخوف. كلت لك ما أعتذر. سالم: بدون مقدمات. خليت الصيخ على صدره. فهد: يمكن صحت صوت هز البيت كله من الألم. صدك بجيت ساعتها. وآني أشوف الصيخ ينبت بجلدي. سالم: أباوع له. كام يبجي. ها؟ بجيتك لو لا؟ ولك آني سالم. ما يجي زعطوط ستوى بدأ يكبر يشيخ براسي؟ ولك أنعل والدي اللي يتحداني. لو ابن أمي وأبويه. فتهمت. وخرت الصيخ. أباوع صاير خط مال حرك على جسمه. شوف هذا الجرح.

كلما توكف على المراية كول: توبة. هذا عقاب أبويه. توبني. عفته وطلعت. إيمان: طبيت للمخزن. أباوع له ينشغ من البجي. حضنته وبجيت. الله لاينطيك يا سالم. الله لاينطيك. دمرتنه. الله يدمرك.

فهد: وخرت عنه. طلعت من المخزن. صارت بوجهي سعاد. إذا ما يجي يوم وأخليچ تعضين أصابع الندم وتجين جوه قندرتي. أطلع آني ابن حرام وكولي فهد كال. عفتها وطبيت للحمام. فتحت الدوش وطبيت جوه. هو نزل الماي على الجوية، وآني أحس روحي شاغت. لو تمر ألف سنة ما أنسى هاليوم. بيومها بجيت بجي عمري ما باجي. القهرني مو لأن جواني. القهرني لأن نفذ كلام مرته وهان كرامتي وكرامة أمي كدام أمه. لا إله إلا الله. كلها ما خلى اعتبار لأي أحد. بس والله والله إذا ما أخليهم يندمون على كل شي سوو بينه. ما أطلع ابن إيمان.

غنى: طبيت للبيت أركض. بست بيبي. شلونچ بيبي؟ زكيه: حضنتها. هله بعد عمري. شلونچ؟ غنى: أخذت عشرة بالإملاء. المعلمة رسمت لي وردة بالدفتر. شوفي. زكيه: بستها. عفيه بالوردة. عفيه هيج أريدچ. كون كله عشرات. غنى: صار. زكيه: يله كومي بدلي حتى أصب غدا ونتغدى. غنى: وين مروان؟ زكيه: نايم بالغرفة. غنى: دخلت ركض للغرفة. أشوفه نايم بكاروكه. تلمست وجهه. شلونك حبيبي مروان؟

آني أجيت من المدرسة وجبت لك كيكة وعصير. فتحت الجنطة. هاك شوف هذني. من تكعد أكلهن. خليتهن يم راسه وبسته ورحت. كلش أحب مروان أخويه. منتظرته يكبر حتى نداوم ونلعب آني وياه. بدلت. بيبي وين خالة سحر؟ زكيه: حبيبتي خالتج راحت لبيتها. رجلها جاي خطار. باچر تجي. يله تعاي تغدي حتى أشبعچ وأنام. نعسانة آني. غنى: حضنتها. يله ميخالف. هسه ننام.

فهد: صار يومين آني محبوس بغرفتي. ما طلعت من البيت. أصلًا ما أريد أشوف أحد. واليوم أجو عليّ ولد عمي. وأمي أصرت أروح وياهم. طلعنا نتمشى. حارث: صار لك يومين مختفي. وينك؟ كل ما أجيك متقبل تطلع لي. فهد: بهدوء. مالي خلك أطلع. محسن: تعالو نكعد هنا. سولف لي شصار قبل يومين من خذاك عمي؟ خو ما سوى لك شي؟ فهد: لا ما سوى شي. بس رزلني. حارث: بس فيصل كال للحجية ياسمين أبوك جوّاك كدامهم.

فهد: بعصبية. كتلك ماسوالي شي. ذاك يجذب. لتضل تلح. حارث: شبيك كبيت بوجهي؟ أعصابك. محسن: عوفه حارث. يجوز ضايج. صح لو لا؟ فهد: أي. محسن: شنو رأيك أنطيك شي يوخر الضوجة؟ فهد: شنو؟ راويني. محسن: طلعت باكيت الجكاير من جيبي. شلت وحدة. هاك جربها وادعي لي. فهد: شنو هاي؟ تأدب؟ آني ما أدخن. محسن: ولك والله فد تونس. آني صار لي شهرين وادمنتها. حارث: ولك أنت منين متعلم هالسوالف؟ متستحي. محسن: دجربوها. إذا ما عجبتكم، عوفوها.

فهد: مديت إيدي بتردد. أخذتها منه. خليتها بين شفايفي. أشعلها يله. محسن: طلعت الجداحة. اسمه توريث. ورث لي مو أشعلها. فهد: أخذت نفس منها. اختنكت. كمت أكح. لعبان نفس. الله يطيح حظك. مرة تكتل. محسن: هاي لأن بالبداية. بعدين تحس بلذتها. أخذ بعد نفس. فهد: أخذت بعد نفس. أحسها تحرك صدري. ما عجبتني. بس جبرت روحي أكملها. حتى حارث جربها. كمت نفضت ملابسي. آني رايح. بعدين أشوفكم. رجعت للبيت. أجيت أطب للغرفة. صاحتني أمي.

إيمان: تعال اكعد يمي. عوف الغرفة. صار لك ثلث تيام ما مليت. يله تعال. أريد أسولف وياك. صار هواي ما مسولفة ويه ابني. فهد: كعدت. أحجي يمه اسمعچ. إيمان: كعدت كدامه. بعدك ماخذ موقف من أبوك؟ فهد: شتكولين أنتِ؟ إيمان: حقك يمه. بس مهما يكن، يبقى أبوك. والي سواه بحالة عصبية. وأنت همين غلطان. متكدر تلزم أعصابك شوية؟ يصير كل مرة تسوي مشكلة وتتكاتل. الناس كلها كامت تحجي عليك. كد ما تتعارك.

كاموا يصيحون لك: أبو المشاكل. ليش يمه تسوي هيج؟ لاتصير مثل أبوك. كتلك أريدك قوي، بس مو همجي. تصرفاتك هاي مال همج. وأنت بعدك ببداية طريقك. لتتعلم على الأذية يا ابني. فهد: لتنسين إني ابن منو؟ وبالنسبة للي أتعارك وياهم، لو ما همه يتحارشون، ما جان آني أتقرب منهم. إيمان: يعني وتالي؟ نبقى العمر كله إحنه بالمشاكل؟ فهد: تنهد. يمه، أريد أروح يم خوالي. أبقى هناك. إيمان: شيوديك للبصرة؟ صدك تحجي؟ وبعدين أبوك ما يخليك.

فهد: ميهمني. أصلًا آني حتى أخلص منه. أريد أروح. إذا أبقى هنا، أضل كل ساعة أتعارك. على الأقل هناك أبقى يم ناس يحبوني ويحترموني. أحسن لي. إيمان: وتعوف أمك وصديقتك؟ فهد: ابتسمت. بايست إيدها. اروحلچ فدوة آني يمه. لو ألف الدنيا كلها ما ألكه مثل حنيتج. إيمان: حضنته. الله يحفظك ويخليك لي يا يمه. فهد: حضنتها. شوية وما أحس بيها غير تجر شعري. إيمان: شهالريحة ولك؟ فهد: آخ يا ريحة. يمه شبيج؟ إيمان: بحده. تشرب جكائر ولك؟

فهد: أي وإذا. إيمان: بعصبية. أنوب هاي سالفة جديدة مال الجكائر. شبيك ولك؟ شكو سلعة عوجة جاي تاخذها. فهد: كام يوووه. يمه شبيج؟ يعني على كل شي تحاسبين؟ إيمان: ألام. هسه من أطيح حظك. ولك بعدك صغير وكمت تدخن. جا من تكبر شتسوي؟ فهد: يمه مالچ علاقة بيه. أنتِ مو تريدين شهادة؟ خلص. ماعليچ بيه. آني جاي أقرأ وأتعب. أما تصرفاتي الباقية رجاءً ما عليچ بيها. واللي يحجي أكله تبن. خوش؟ كافي. مو طفل آني ومسويني وصلة مسح. عفتها ورحت.

إيمان: صفنت عليه. أدري ابني جاي ينجر لدرب الله أعلم شنو هو. هالايام تصرفاتنه متغيرة. تختلف جذرياً عن قبل. جانت شخصيته ضعيفة. بس شو هو كبر له سنة وهو انكلب كلاب. كل مابيه جاي أشوف فهد جديد. والمشكلة ما أعرف إذا هالفهد راح يصير فهد زين لو فهد أعوج. ومن يومها فهد ما عاد فهد. ابني الطفل أبو دمعة. صار فهد ثاني. كام يروح يم خواله باستمرار ويبقة فترة طويلة. خاصة بالعطل. وبالدوام. يقرأ واجباته ويطلع ويه ولد عمه. وصار مينشاف.

يجي كل يوم ريحة الجكاير تعط منه. وأشوفه يتجنب الناس كلها بصورة عامة. كلامه قليل. ساكت أغلب الوقت. يتصفن هواي. حتى ضحكته اللي جانت تدوي بالبيت. رغم الضرب اللي جان ياكله. بس يجيني مبتسم. أما هسه متغير هواي. أعتقد خواله فعلاً جاي يأثرون عليه. صاير على كل شي يركز ويدقق. مرات أكله بطل هالحالة. لتتدقق على كل شي. آني أمه واللي ربيته على إيدي. ما جاي أكدر أفههمه. الله يستر منك يايمه. گلبي يلعب ومامرتاح لفهد الجديد.

*********************