رواية ذنوب على قيد الغفران الفصل الرابع والأربعون 44 - بقلم براء

دخلت أنا وفهد للمطبخ وتصنمنا بمكاننا. عزّه! هاي شنو؟ فيصل وسارة بالمطبخ بوضع، استغفر الله. عاد صدق يحجون، خلصت المكانات اجو بالمطبخ؟ فهد: باوعتلها. غمضي عيونج. دكيت الباب. يمعودين، صباحكم الله بالخير. مو هنا، مو هنا. سارة: سديت الروب. صخام الصخمني شافونه. فيصل: احم. ها الحمدلله على سلامتك. شعجب كاعدين بهيج وقت؟ فهد: الله يسلمك. والله نزلنه نتريك بس من شفناكم بطلنه. سارة: ان اني راح اصعد فوك. تعال فيصل، تعااال.

فهد: اباوعلهم صعدوا بسرعة ومبين عليهم متفشلين. يعني ماكو هيج، كلنه مرته بس مو بالمطبخ. شهالعبان نفس هذا. ناس زاعيتها كلش. غنى: همست. فهد، صوتك حباب، فشلة ليكعدون. فهد: شلون ترديني أنصّي صوتي؟ يعني ميصير اكو شي اسمه عيب؟ عدهم غرفه، شيردون يسوون بيها؟ خليهم يسوون، المن سموها غرفه نوم؟ حتى الواحد يمارس خصوصياته بيها وبراحته، مو ينزل كدام العالم. شفتي هذا؟

أكره هالسوالف الطايح حظها. ذولا مطايه، ميفتهمون ان العلاقة بين المرة والرجال لازم تكون خاصة بينهم وما حد يتطلع عليها. غنى: دخلت للمطبخ. بهدوء، صراحة توقعت هالشي عادي عندك.

فهد: كعدت. لا شنو عادي. صحيح اني لساني متبري مني، وأشرب، وعندي مكسرات. بس من توصل لعلاقتي الجسدية، وخاصة ويه مرتي، عيب وزحمة واحد يشوفني أو يعرف شيصير بيني وبين مرتي. تدرين مرات أتعجب على الزلم الي يحجون تفاصيل علاقاتهم ويه نسوانهم أو يتحارشون بيهم، أو يبوسها أو يكرصها كدام العالم. هذا غلط. لو مهما يكن، لازم تبقى علاقتهم الزوجية مثل السر بينهم، محد يعرف شيصير بيها غيرهم. يعني هسه حلوة بحقهم؟

شفناهم بهيج وضع. عدكم غرفه، اكلو تبن بيها. غنى: هو يحجي واني أهز راسي. كلامه كله صحيح. عجبني تفكيره. طكيت بيض عيون وصبيت جاي. جبت الصينية خليتها على الميز بالمطبخ وكعدنا نتريك. فهد: باوعتلها. ليش ساكته؟ ما علقتي على كلامي. غنى: بهدوء. شحجي يعني؟ وكلامك صح، ماكو داعي أعلق عليه. فهد: بعدچ ماخذة موقف مني مو؟ غنى: نزلت ستكان الجاي. فهد، شنو لزومة نحجي بهالموضوع؟ مو كلنا سدّه.

فهد: لازم نحجي بي. شلون ترديني أسكت وأني أشوف كل هالبرود منج. غنى: بهدوء. ماكو داعي نفتح هالموضوع. وبالنسبة إليه، صدقني متتوهم. لا باردة ولا شي، وانت أكثر واحد تعرف اني هاي طبيعتي. مو بمعناها إذا ساكته يعني اكو شي. فهد: أي اكو شي. قبل كنتي تحجين، تتناقشين وياي. أما هسه بس ساكته. غنى: انت كلتها، قبل مو هسه. وحسب كلامك، إحنا قبل كنا أصدقاء. أما هسه لا، إحنا مجرد زوجين مجبورين نعيش سوا، لا أكثر.

فهد: أسألج سؤال. انتي جاي تحاولين تغيريني حتى أصير مثل ما انتي كنتي تتمنين وتريدين، مو؟ غنى: أي صحيح. اني ما كنت رايدة أتزوج واحد مثلك، وشكو شي جنت أتمنّيته ما صار. ردت رجال يحبني وانت متحبني. وردت رجال ملتزم، يخاف الله، يحب الصلاة والصوم، وانت بعيد كل البعد عن الالتزام. إضافةً إلى اني ردته حنين، حباب، هادئ، وانت معندك ولا صفة من اللي اني أحلم بيها.

فهد: ضرب على الميز. وإذا اني مو مثل ما تردين، ليش وافقتي عليه من البداية؟ غنى: انت تعرف شنو السبب. ماكو حاجة نعيد ونسقل بالحجي. وبالنسبة لكلامك الثاني، فلا متتوهم. اني ما ردتك تتغير حتى تناسبني، وإنما ردتك تتغير لنفسك. تره محد يفيدك يافهد غير بس صحتك وربك. المشروب الي تشربه ممكن يسببلك مشاكل بالكبد أو بالقلب وغيرها. والملهى الي تروحله، شايف كم ذنب يجيك بسببه؟ لو شلون عرش الرحمان يهتز من تروح ترتكب محرمات؟

لو انت تباوع لأجسام الله محرمها عليك؟ إضافة للشغلات الثانية الي ممكن تنقلك أمراض. ولو تمرضت، منو يفيدك؟ يفيدك الشرب؟ لو تفيدك الملاهي؟ صدقني محد يفيدك غير صحتك. وصَدك، لوما هالاشياء مضرة بينه إحنا كبشر، ما جان ربنه حرمها ومنعنا عنها. أصفن بكلامي شويه وفكر بي. فهد: اجيت أجاوبها وشفت آلاء وسعاد طبوا. حمحمت وأشرتلها تسكت. سعاد: صباح الخير. شو كاع... هاا يمه فهد، شلونك؟ شوكت اجيت؟ فهد: الفجر.

سعاد: لعد ليش كاعد هسه وانت ستوك راجع؟ فهد: نزلت أتريك ويه مرتي. اكو مشكلة؟ سعاد: لا أكيد. بيتك هذا وبراحتك. آلاء: أكول غناوي، بلا زحمة عليج، غسلي المواعين المتوصخة لأن اني جاي أسوي ريوك النه. غنى: ضليت صافنة. أسلوبها تغير وياي 180 درجة. كمت شلت الصينية. فهد: غنى، صبّيلي جاي وجيبي للاستقبال. غنى: صار. غسلت ستكانة بمي حار وجيت أصبله جاي بس شويه. آلاء: افف، لاحكتني وين ما أروح. تعاي خلصيني.

غنى: إلهي الصبر. صبيتله الجاي وطلعت. شفت الكل كاعدين. صبحت عليهم ورحت للاستقبال. فتحت الباب ودخلت. تفضل. فهد: عاشت إيدج. صدك، حضري روحج تره بالعشرة نروح. غنى: وين؟ فهد: لبيت جدي. وين يعني؟ غنى: شعدنا؟ فهد: اخذيها قاعدة. كل يوم جمعة إحنا نتجمع عد بيت جدي. وإذا ما رحنا، الحجية تزعل. غنى: هاا، أي لعد بعد ساعة كون نروح. فهد: أي، روحي انتي حضري روحج واني بس أكمل الجاي أجى وراج. غنى: هزيت راسي وطلعت.

أروى: هاا ياحلو. صباحو. غنى: ابتسمت. صباح النور. وينج البارحة؟ ليش ما داومتي؟ أروى: انتي تدرين اني محاضراتي قليلة. وجيتج للجامعة جانت على حسابجن. وهسه هالتشوفين اني كاعدة أشتغل على الرسالة وتالي فوك تعب سنتين، اللجنة متقتنع بالرسالة. حتى أنتحر بيهم. غنى: لتحجين هيج. إن شاء الله يقبلوها وتأخذين الماجستير وترتاحين. انتي شاطرة وكدها. أروى: هذا الحجي، أروحلك فدوة. آلاء: شكو اليوم؟ صاعدة جرعة الحنان والمحبة عدكم.

أروى: انتي لتضلين على كل شي تعلقين. التهي بنفسج، رحمة لأهلج. غنى: خلي أصعد أحسن. مالي خلك الحجي الماصخ. صعدت لغرفتي. طلعت جبه زيتونية، خلي أغير شويه. أخذت شال بيجي. رحت أبَدل. سمعت باب الغرفة انفتح. عرفته فهد. فهد: وينج غنى؟ غنى: بالحمام دأبدل. فهد: اندكت الباب، رحت فتحتها. شفت سارة. خير؟ سارة: وين غنى؟ فهد: جاي تبدل. شتردين منها؟ سارة: أريدها بشغلة. سويلي مجال أريد أدخل. فهد: تنهدت. طبي. غنى: طلعت. هاا فهد، شنو ردت؟

فهد: تعاي شوفي سارة شتريد. غنى: لفيت شعري. هاا سارة، تفضلي. سارة: أريد الحمرة الترابية مالتج. فهد: شتردين؟ غنى: باوعت لفهد بتحذير. لا يروح يركعها بحجاية ثكيلة. معندي حمرة ترابية. سارة: لا عدج. ذاك اليوم شفتها من اجيت. عدج، حتى شوفي فتحت الجرارة، مو هاي؟ غنى: باوعت لفهد الي خزرني. هاي مو ترابية، جوزية. سارة: هو نفس الشي. عادي آخذها. غنى: ها... أي. سارة: شكراً. يله خلي أروح أبَدل.

فهد: سديت الباب وراها. انتي شلون تتطببيها لهنا؟ اني شكايل؟ غنى: شسوي فهد؟ قابل أطردها؟ زحمة والله. فهد: مو تطرديها، بس لتنطيها وجه. ثقلي عليها. وبعد من تدك الباب لتفتحيها. الف مرة كتلج ما أحب واحد يطب لغرفتي. غنى: ماشي. فهد: باوعتلها. لايكلج هاللون. غنى: شكراً. فهد: عفواً. ..... يله فضيها، لبسي صايتج خلي نروح.

غنى: رحت لبست الصاية والشال. تعطرت. وهو بدل ونزلنا حتى نروح. وصلنه لبيت جده. دخلنا. فهد راح يم الولد واني دخلت جوه. النسوان: السلام عليكم. الكل: وعليكم السلام. غنى: كَاموا الكل. بوسوا أهل فهد. واني الحجية تلكتني ذاك الملكة. ما اعرف ليش هيج تتعامل وياي. والبنات هم حبابات. بس نسرين سلمت من وره خشمها. ومروة مثقلة وجها. واني هم لبستها. وحتى متقربت منها. اكتفيت بسلام من بعيد. حياة: نزعي صايتج يمه. ما عدنه أحد.

غنى: فتحت صايتي صفطتها وخليتها بالجنطة. ياسمين: اخذي راحتج حبيبتي. بيت جدج هذا. غنى: ابتسمت. تسلمين حجية. ايمان: شاورتها. خليج ويه أروى. وأي شي تحجي سعاد وجناينها، غلسي عليهن. خوش؟ غنى: صار. ايمان: عفيه. شهد: بنات، امشوا نروح لغرفتي. عليمن كاعدين هنا؟ عود من يردون يصبون الغده، خلي يصيحولنه. غنى: كَاموا البنات واني ضليت كاعدة. شهد: غنى، شو كاعدة؟ كومي يله. أروى: غنى تستحي. اله واحد يعزمها شخصياً ياله تكوم.

شهد: دكومي كومي. ما عدنه مستحة إحنا. والله وكيلج ذني يطبون لغرفتي أكثر مني. ويندلّن حتى بالمطبخ جم خاشوكة. وانتي بعدج عايشة بذاك الزمن مال الخجل. دكومي. غنى: لا شكراً. مرتاحة بمكاني. انتو اخذوا راحتكم. ضليت كاعدة يم خالة ايمان وأسمع كلام واني ساكته. شوية واجت مروة. مروة: أكول غنى، عندي فستان أريدج تخيطيه إلي. انشك البارحة واني أجربه. غنى: بس اني بطلت أخيط.

مروة: لا، مو بالمكينة، بأيدج قصدي. كومي حبابة خلي نصعد فوك حتى تخيطيه. غنى: كمت وياها. صعدت فوك. دخلت لغرفة شهد. شفت البنات. علا، عبير، شهد، ملك، أروى، وردة، بتول، سارة. ماشاء الله كومة. سلام. البنات: يا هلا. مروة: كعدي خلي ألبس البدلة و أراويج وين الفتك صاير. شهد: يعني صدك تحجين؟ البنية جايه تتونس تردين تكربيها. غنى: لا، عادي ماكو مشكلة. بس أريد أبرة وخيط بلون البدلة حتى أسويها. مروة: كومي ملك جيبيها من غرفه الحجية.

غنى: راحت. بدلت واجت. صاير الفتك يم الخصر. هذا شلون انشك هيج. نزعيها خلي أسويها. ولو ما تضبط، لازم اله مكينة. ملك: طبيت. تدرين فتحت جرارة الحجية شفت علبة حلويات. كيفت. تالي أفتحها تطلع بيها أبر وخيوط. شفتن بله. البنات: هههه. غنى: كعدت أخيط بالبدلة وهنه يسولفن. حلوة لمتهن. يونسن. عبير: عفيه شهد، استعجلي بالعرس نريد نركص. ملك: أي والله، غير تستعجل وتفضها. أريد آخذ غرفتها. شهد: يعني ماكو هيج صلافة؟

طمعانة بغرفتي واني بعدني هنا. وعناد بيج، الغرفة تبقى إلي. علا: والله كله جذب. هم حجيت مثل حجيج. تالي أول ما تزوجت كعدوا مرتضى أفندي بغرفتي. غنى: باستغراب. ليش؟ انتي مو بت أبو حارث؟ شلون مرتضى يكعد بغرفتج؟ علا: هههه. لا حبيبتي. إحنا عدنا اثنين مرتضى. واحد ابن عمتي نسرين، وهذا الي يداوم وياج. والثاني أخويه، هذا صغير بعده بالرابع اعدادي ومكضي حياته بس يدرس حتى ميطلع.

غنى: تذكرت مروان. يا عمري. هو هم جان بس يقرأ وماله شغلة بأحد. سودة عليه حبيبي. تنهدت. الله يحفظه ويخليه الكم. ملك: غنى، عندي سؤال فضولي. بس رجاءً لتفهمين قصدي غلط. غنى: تفضلي. سألي. ملك: فهد شلون يتعامل وياج؟ أقصد، هم عنده جانب رومانسي؟ هم يضحك ويشاقه؟ لو لا؟ تعذريني على التدخل، بس الفضول أكلني. يعني ما أصدك فهد المطنكن والي أربعة وعشرين ساعة ساكت وينافخ، عنده جانب حنين ورومانسي يطلعه عليج.

مروة: ما أعتقد. فهد طبيعته هي هي، سواء وياها أو ويه غيرها. غنى: باوعتلها. ما أعرف شنو الي خلاني أحجي هيج. لا بالعكس، فهد كلش حنين ويحبني ومدللني دلال ومقصر وياي أبد. وحتى الضحكة متروح من وجهه وقت الي نكون سوا. بس هو حدي شويه ويه الناس عامة، وبس ويه المقربين لا، طبيعته تختلف. بتول: بس شو يعاملج برسمية كدامنة. لا شفنا حنية ولا شفنا رومانسية. تدرين انتو حتى ميبين عليكم متزوجين.

غنى: فهد يحب الخصوصية. وإذا هو زين ويايه، مو شرط العالم كلها تدري. هذا شي بيناتنا. مروة: تنفست. ما أريد أكوم أسحلها. وحدة جذابة. أصلاً فهد ميحبها ولا بحالها. .... كملتي البدلة؟ غنى: أي. تفضلي. بس ما أعتقد ضبطت. يرادلها دقة بالخياط حتى ترجع مثل قبل. مروة: رحت لبستها بسرعة. انفتك الخيط وانشكت البدلة بالزايد. يعني انتي ثولة حتى خياط مادبرتي. خياطة جيس حب انتي. شهد: شبيج؟ البنية كلتلج اله مكينة ياله تضبط.

مروة: دختروح يمعودة. خياطة وبالك؟ عني متكدر تبدر فتك صغير. بس هي الثوالة وراثة. غنى: بهدوء. لزمي لسانج ولتتجاوزين حدودج. مروة: لزمني بنات، لزمني. خفت. يعني فوك ثوالتج لا وتحجين هم. غنى: طبعاً أحجي مادام لسانج زفر وتتجاوزين. ومو بمعناها اني ساكتتلج تتجاوزين. مروة: دنجبي بت الفكر. هم إلها لسان وتحجي. لو منح أطم روحي. وحدة سايبة. غنى: بهدوء. ليش قابل اني قليلة أدب مثلج حتى أطم روحي؟ مروة: هاي منو القليلة الأدب؟ ولج.

شهد: بنات شجاجن؟ علا: كافي مروة. تخبلتي؟ هي بدلة وانمزكت عادي، شصار؟ شبيج كلبتي الدنيا. مروة: لج متعرفيها؟ هاي متعمده. وحدة حاقدة وطماعة. شافتنه نلبس أحسن، نلبس وعايشين أحسن عيشة. وهي جانت تلكط بالزبايل وتاكل. فنفنس كلبها حقد علينه لأن نلبس أحسن منها ومرتاحات.

أروى: لا عاد تره مصختيها. كافي احترمي نفسج وبطلي تتعالين على خلق الله. انتي مو أحسن منها. وعيب عليج تحجين بالمستويات الاجتماعية. إحنا مو أحسن من أحد، ولا اكو أحد أدنى منه. وبالنسبة لغنى، فالبنية مو بت فكر. انتي الفكر والي تفكيرها مريض هم. وردة: على كولة فهد، أهلج انطوج خبز ما انطوج تربية. مروة: انجبييي. ادبسز. بعد عليّه الزعاطيط تحجي براسي؟ هي هاي العايزة؟ بنات الفكر والجهال أصيرن براسي وأتفزلكن؟

غنى: أخذت جنطتي واديه يرجفن. اني محرد عليج لأن اذا رديت حنزل لمستواج. وهذا الي ما أريده. خليج باخلاقج وتفكيرج السز. وحدة سخيفة وتافهة. بتول: يااا غنى! شلون تكولين على مروة هيج؟ انتي تعرفين شنو مروة؟ مروة: حسيت نار وجت بيه. عود اسكتلها؟ لا والله. ركضت جريتها من شالها. تعاي ولج حقيييره. منووو أخلاقها سزز؟ غنى: انتي وحدة أخلاقها سز وما مؤدبة. شتردين بعد؟ مروة: صفكتها راشدي. ولج انتييي بت الفكر! تكولين أخلاقي سزز؟

انيييي أخلاقيييي سزز؟ يا ام العلاقاااات! أذكرج بمرتضى. إذا ناسيه، أذكرج شلون شبع بيج. عبير: انجبييي مروة! أخوييه شعليه؟ خليتي بالوسطة. أروى: نجر بيها وهي مجبله بغنى متقبل تعوفهاااا. ولللللج عوفيهاااا. ملك: بعصبية. عود صدك تحجين؟ هذا أسلوب وحدة مثقفة وخريجة؟ لعد شخليتي لبنات الشارع؟ الله يطيح حظج. مروة: عوفنييييي! أريد أراويها الأخلاقها سز شتسوي. شهد: ولج عوفي البنية. الله بغضب عليج.

أباوع للبنيه صار وجها أزرك. جرينها كوه والبنيه وكعت بالكاع. يااا البنية راحت. مروة: باوعتلها. وكعت بخوف. والل والله هي وكعت وحدها. ماسويتلها شي. سارة: كمنه نرجف واحنه نشوفها. لا إيد ولا رجل. كَمن البنات يصرخن. وردة: ماتت ماتتتت! موووو؟ اروووى! وجهاااا صار أزركككك! رووووحي صيحي لفهدددد. أروى: نزلت أركض. صاروا الولد كداميي. بدموع. فهد! فهد! غنى! فهد: بخوف. شكو؟ شبيها؟ أروى: غنى وكعت فهد ووو. بعدني ما كملت. صعد ركض فوك.

ملك: وخرن وخرن. فتحت حجابها. بسرعة. يربي اني يادوب مرحلة أولى كلشي ما أعرف. بخوف. هي بيها شي؟ وردة: أي بيها. خفقان بالقلب. ملك: فتحت حجابها. روووووحن خلي ياخذوها للمستشفى. أباوع لمروة. وجها صار أصفر. فختيييي! ارتاحيتيييي هسه؟ انفتح الباب وطب فهد يركض. فهد: طبيت للغرفة واشوفها واكعة بالكاع وداير مدايرها البنات. ركضت خليتها بحضني. فتحت حجابها وكمت أفرك بصدرها. جيبين مايييي!

بسرعة. اخذت الدولكة. نكعتها. أريدها بس تصحى. ضربت خدها. غنى! غنى! بس اصحي. أباوعلها كعدت بس كامت تختض بشكل غريب. حضنتها بقوة حتى أكدر أسيطر عليها. ماهتميت للولد ولا لأي أحد. أحس كلبي راح يوكف واني أشوفها تصارع مثل السمجة حتى تاخذ نفس. الكل صعد فوك والبيت كله انخبص. كل طاقة ماعندي بعد. أريد أشيلها آخذها للمستشفى. ما أكدر. أحس روحي فصلت. همست. تنفسي، تنفسي حبيبتي. الله يخليج بس حاول تأخذين نفس.

ياسمين: عين الماصلت على النبي. ولكم شبيها؟ ايمان؟ شبيها جنتج؟ ايمان: فركت أديها ويه فهد. والله خاله ما أدري. يمكن كلبها تعب. هي عدها خفقان. ياسمين: يايمه سودة عليه. مرتضى: أباوع لفهد انخبص بيها. دعوفهااا وكوم اخذهااا للمستشفى. حضنك بشنوووو يفيدها؟ فهد: لا رد. ضليت أفرك صدرها. مكان كلبها.

أباوعلها بدت تتنفس بشكل طبيعي وبده يرجع وجها للونه الطبيعي. أول ما فتحت عيونها حضنتها وأحس روحي سكنت. حسيت بدموعها تنزل على ركبتي. كامت تبجي بحركة. بهدوء. أحجيلي شسويتلنها وليش وكعت؟ وهي متوكع غير بس وكت التتعب. أباوعلهن. وحدة كامت تباوع للثانية. صحت. أحجججججنن. حسيت غنى تفز. مسحت على راسها. تحجن. لا. قسم بالله أكوم أغسلجن كلجن وما يوكف بعيني أحد.

وردة: بدموع. فهد، هاي مروة تعاركت ويه غنى وضربتها وكامت تجر بشالها بحيث اختنكت وماعت روحها. مروة: والله جذابة. ما خنكتها اني. سارة: انتي الجذابة. صحيح كلام وردة. واسمع شسوتلها. بعد حجيتله كل شي صار من البداية. بتول: بس غنى هي الغلطانة. شكت بدلتها. ياسمين: وإذا شكت البدلة، تروح تضربها؟ شهالهيلكة هاي؟ وين كاعدات إنتن؟ ولج مروة، ما استحيتي تضربين مرت ابن عمج على حساب بدلة؟

صدك تحجين. أدري فكور إحنا بحياتج مامشترية بدلة وهيج تتصرفين. مروة: بدموع. شبيكم عليه؟ مو على حساب البدلة. لأن غلطت عليه. حارث: وإذا غلطت عليج، حيوانة؟ ترحين تضربيها؟ ما استحيتي على كبرتج وعمرج؟ المفروض من تجاوز عليج تغلسين عليها مو تعتدين عليها. هي هاي أخلاقنه. ضحى: أي والله يمه. لاعاب حلكك. نسرين: شبيكم على البنية؟ دفهمو السالفة من الطرفين. ايمان: كوم يمه شيلها خليها على الجرباية. خلي أروح أسويلها عصير وأجي.

فهد: كمت وشلتها خليتها على الجربايه. أباوعلها ساكته ومبين عليها التعب. لفت نظري خدها الي مطبوع عليه أثر إيد وصاير أحمر. شلون صالخة خدها البر... تقربت وكفت كبال مروة. بهدوء. شلون تجرئين ترفعين إيدج على مرتي؟ عسى بأيدج الكسر. مروة: بارتباك. تجاوزت عليه وكالت أخلاقج سزز. فهد: حتى لو. انتي أخلاقج مو سز بتصرفج هذا. ثبتي انج فعلاً عديمة أخلاق. وأخلاقج أنكس من السز. سارة: تره كل الصار بسبب بتول. هي دفعت مروة على غنى.

نسرين: فهد، لتنسى روحك. ويامن جاي تحجي؟ هاي بت عمك. فهد: لو مو بت عمي، أطيح حظها. اني ما أمد إيدي على مرتي. تالي تجي هاي تضربها. هسه لو صاير بيها شي منو يفيدني؟ انتي؟ لو واكف كلبها وخسرتها؟ الربح بيمن؟ بيج؟ لو ببتول الغبرة؟ تدرين اني أكدر هسه أجيبج براشدي أكسرلج سنونج بحلكج. بس انتي بنية. وهذا الواكف بعيني. ياسمين: اهدئ يمه. مو هيج. شوف وجهك. فهد: اني ماراح أسوي شي هسه احتراماً للكبار. بس...

أقسم بالله لو اجيت ولكيت مرتي انخدشت، مجرد خدش، بسبب أي أحد كائن من يكون. أهجم البيت على راسه. وإن سمععععت واحد يكولها انتي بت فكر لو من مستوانه، والله العظيم وحلفي براسي، أزوع دمه. سواء كان رجال لو مرة. واني نغ... من النغ... إذا ما أسويها. وانتي ست مروة، من شوكت صايرة تحجين بالمستويات وعايشة دور الأميرة ديانا؟ تره انتي خلك محللة بزبانه. محد يعبرج. ياسمين: عوفها يمه لتفرفح وياها. اني اعرف شلون أدبها.

دفعتها. امشي اعتذري من البنية. يله. مروة: ما أعتذر. اني مو غلطانة. ومرت فهد هي الغلطانة. مرتضى: دنجبي انتي التعتذرين وغصباً ما عليج. مو زين ما صار بيها شي من وراج. فهد: انت لتتدخل. وخليك بروحك. محد وكلك محامي لمرتي. وبالنسبة لمروة، فسواء اعتذرتي أو لا، اعتذارج مرفوض. وأيالج تحاولين تتقربين منها بعد. لتخليني أخلي عقلي بعقلج وساعتها تصير مو خوش وياج. رحت يم غنى. دنكت. سديت حجابها وعدلت ملابسها. همست. تكدرين تكومين؟

غنى: هزيت راسي. فهد: كومتها. حجية من رخصتج راح نرجع للبيت حتى ترتاح. ياسمين: براحتك يمه. براحتك. وطمني عليها. الله يخليك. ايمان: هاك يمه شربها عصير قبل لتروحون. فهد: اخذت الكلاص. قربته منها. غنى: بتعب. كلشي ما أريد. نفسي تلعب. فهد: خلص براحتج. محسن، اطيني مفتاح سيارتك. ما أكدر آخذها مشي. العصر أجيب السيارة الج. محسن: هاك خويه هاك. شتسوي بيها؟

فهد: نزلتها من الدرج على كيفي. ما قبلت أشيلها كدامهم. مو شلتها قبل شويه. والله مو صاحية هالبنية. فتحت السيارة صعدتها. ... وحركت. نروح للمستشفى. غنى: بخفوت. لا، هالشي طبيعي. فهد: وصلت للبيت. نزلتها. دخلنا للصالة. أباوعلها كوة تمشي. شلتها. لتكابرين. أدري بيج تعبانه. غنى: خليت راسي على صدره وغمضت. فهد: فتحت الباب ودخلت. خليتها على الجرباية. بهدوء. أطلع لج ملابس تبدلين. غنى: ملابسي على الكرسي. انطيني ياهن.

فهد: انطيتها البجامة والتشيرت. ودخلت للحمام. غسلت وطلعت. لكيتها متمددة. كعدت يم راسها. تلمست خدها. أذتج مروة؟ غنى: هزيت راسي ودموعي نزلت. فهد: صووجج. مثل ما ضربتج ضربيها. ليش تسكتيلها؟ مرات لازم ننزل لمستوى غيرنه حتى نأدبه. غنى: بدموع. فهد، منطتني مجال حتى أحجي. اني ميهمني انو ضربتني. انت مشفتها شحجت؟ لو الاتهامات الي اتهمتني بيها؟

تكلي انتي وأهلج تاكلون من الزبالة. والله جذابة. رغم إحنا وضعنا المادي ضعيف، بس ممدينا ايدنه لاحد. والله يافهد اني الربع جنت أضمه وما أصرفه على روحي. أكول يجوز أحتاجه ويفيدني. أحسن ما أمد ايدي لاحد. عمري ما مديت ايدي لاحد ولا كلت من الزبالة. لا اني ولا أهلي.

فهد: حضنتها. خلي تولي. صدقيني هاي الخبصة كلها لأن شافت عندج شي ما موجود عدها. هاي اسمهلها غيره. لا أكثر. والمعروف الي يغار يضل يسقط بالكدامة بس حتى يثبت انو هو الأحسن. غنى: ليش؟ شعندي اني وتغار مني؟ فهد: يمكن تغار من أخلاقج. تغار من حب الكل الج. هواي أشياء ممكن تكون تافها بينه، بس غيره يريدها وبشدة. فلتستغربين. غنى: شريد أكله؟ لأن تحبك؟ شادة ويايه.

باوعتله. ما أعتقد تغار. الي يغار ميضرب ويخنك. حتى شوف من وراها ان جرح بلعومي بالندبوس. فهد: شو أشوف؟ غنى: رفعت راسي. شوف شلون انشخط بلعومي. فهد: دنكت بست ركبتها. بمكان الدنبوس. نمت بصفها ورفعتها خليتها على صدري بدون ما أحجي. غنى: احتقن وجها. فهد، انت ليش دافعتلي؟ جان تكدر تسكت. فهد: مسحت على شعرها. انتي مرتي وكرامتج واحترامك من احترامي. والي يفكر يدنالج، أنعل والديه.

زائد انتي تخصيني ومالتي. واني كل شي ولا واحد يمس شي يخصني. صحيح علاقتنه كزوجين مو تامه تماماً، بس تبقين مرتي. والي يضرج يضرني. فهمتي قصدي؟ غنى: هزيت راسي. فهد: العب بشعرها حتى تنامين. غنى: أي. فهد: بديت ألعب بشعرها. نصيحة. دائما خليج قوية. غنى: اني قوية بس مو وقحة. فهد: وهذا الحلو بيج. غنى: شكراً لأن دافعتلي اليوم. فهد: هذا واجبي يا مرتي.

كرصت خشمها. يله نامي وارتاحي حتى أشوف بلكي العصر أسأل على دكتور قلبية زين حتى نحجز عنده ونروح باجر. غنى: كتلج ماكو داعي. كولشي مابيه. فهد: ميخالف. نطمئن أحسن. غنى: غفيت بحضنه وما حسيت على شي بعد. _العصر ايمان: مرت أخوجن شلون صارت؟ أروى: ما صعدتلها. أكيد تلكيها نايمة هسه. والله يايمه من أتذكر وجها شلون صار أزرك كلبي ينمرد. ايمان: زين متعرفين شنو سبب خفقان القلب مالتها؟ ومزمن لو لا؟ أروى: لا. مزمن شنو؟

بس الدكتور كاللها ابتعدي عن التوتر والضغط. تجنبي العصبية والتعب النفسي. أي جهد نفسي يأثر على وضعج. وكلما كانت حالتج النفسية مرتاحة، كلما كلبج سليم. ايمان: زين همه عدهم القلب وراثة؟ أروى: ما أعتقد. لأن هي عدها خفقان وأخوها الله يرحمه من البداية عضلة القلب مالته تعبانة. فما أعتقد وراثة. ايمان: اروى، غنى كلشي تحجيلج مو؟ أروى: أي. ليش؟ ايمان: زين إذا كلشي تحجيلج، هم جانت تشكيلج من خالتها؟

أروى: يوو. خطية شبعت ضيم هناك. والحجي بيناتنه، جانت تجي تبجي من تصرفات رجل خالتها النذل. خطية مرة على مرة يمد ايده عليها أو يتحارش بيها، وهي تدك وتلطم لمن الله رحم بحالها. ورجع خالتها سحر ورجعن استقرت هنا. ايمان: معقولة كلامهم صح؟ وفعلاً ما جان اكو شي بينهم؟ وبتول جذابة؟ أنـي لازم أتحرى عن الموضوع. _غنى: كعدت المغرب. كمت على كيفي. توضيت وصليت وكعدت أقرأ أدعية بلكي الله يفرجها عني.

كملت وكمت. مر اليوم وتوالت أيام حياتي بشكل طبيعي وروتيني. ومضى الشهر بين مشاكل البيت الي مدتخلص وكل يوم عركة ومصيبة شكل. وبين امتحاناتي الي صارت ويه امتحانات وردة. وفوق هذا التحاق فهد والي كام يطول بالموصل بحكم شغله. بحيث منشوفه غير وقت جيته. وهو هناك حتى اتصال ما عنده وقت يتصل بينه. وللأسف بهالفترة مشاعري لفهد كل مابيها دتزيد. تقريباً عزلت نفسي عن الكل والتهيت بنفسي وبوردة لأن دادرسها للامتحانات. خطية بدت قبل رمضان بأسبوع وحتخلص يوم سبعة برمضان. وطبعاً باجر رمضان. بالمختصر مر شهر شعبان بدون منحس بي.

باوعت لوردة. هاا حبيبتي خلصتي؟ وردة: أي. كل الأسئلة حليتها. بس الماضي البسيط ما جاي أفهمه ولا أكدر أحل الأسئلة العليه. غنى: شو انطيني. شوفي حبيبتي، إحنا مو شرحنا سابقاً؟ كتلج الماضي مثل المضارع بالضبط. الاختلاف بس تحولين الفعل من مضارع لماضي. لو تضيفين (ed)

هاي اذا الفعل منتظم. واذا شاذ، تكتبين الحالة الشاذة مالته. إضافةً إلى انو لازم تحذفين شكو ظرف موجود بالمضارع. وخلصت السالفة. وبالسؤال والنفي اني شرحته الج. وإذا تردين أعيده. وردة: لا لا فاهمتهن. بس الجملة المثبتة ما فاهمتها. هاج صلحلي ورقتي. غنى: للتصحيح اسمها. صححيها مو صلحيها. شو باوعت للورقة. عفيه. صدك وردة، انتي إن شاء الله تطلعين الأولى. وردة: تدرين شكد أحبج؟ اني والقرآن أموت عليج.

غنى: يعمري والله حتى اني أموت عليج. هسه ضبطنا المادة. عندج شي بعد؟ وردة: لا. أصلاً راح أروح أنام. المادة وحفظتها. وبقت بس مراجعة. وأكعد بالليل كلش أراجع. غنى: كمت. نصيحة، خلي مراجعتج الفجر. لأن العقل بالليل يحتاج راحة. يله أعوفج. طلعت وعفتها. نزلت جوه. شفت خالة ايمان. ايمان: تعاي غنى. أريدج. غنى: طبيت للغرفة. ها خاله.

ايمان: صار شهر اني لا ليلي ليل ولا نهاري نهار. كمت أدور وره بتول أريد شي يثبت انو كلامها غلط وكلامكم صح. من جهة اكو شي بداخلي يحثني حتى أصدكج. ومن جهة كلبي ملجوم منج. وما لكيت غير حل واحد. غنى: اني صارلي شهر ونص أحاول أثبتلج انو الفكرة الماخذتها عني غلط. والمفروض من كعدتي عدكم تعرفين اني شنو من خلال أسلوبي وتصرفاتي تحكمين عليه. عليه. بس على العموم خاله، شنو الي تردي واني حاضرة.

ايمان: تحلفين على كلام الله. كل كلامج انتي وفهد جان صحيح. غنى: ابتسمت. عندج قرآن هنا لو أروح أجيب؟ ايمان: يعني راح تحلفين؟ غنى: أكيد. وليش ما أحلف واني ممجذبة؟ ايمان: رحت طلعت القرآن. تعاي حلفي. كولي وحق هذا كلام الله، كل الحجينا اني وفهد صحيح.

غنى: خليت إيدي على القرآن. وحق هذا كلام الله. كل الحجينا اني وفهد صحيح. ومجذبنه عليج بأي شي. وهذا كلام الله يشهد عليه. وإذا جذبت بكلامي، عسى هالايام الفضيلة متمر عليه واني عايشة. هيج كافي لو أحلف بعد؟ ايمان: بهدوء. لا، كافي. تكدرين ترحين. غنى: بست راسها. وهمست. حاولي تفكرين بالموضوع وحتعرفين الصدوك من الجذب. عن أذنچ. طلعت ورحت سويت العشة ويه آلاء. لأن سارة جابت صارلها عشر تيام بغرفتها حتى الأكل يصعدلها فوك.

اني كملت. تردين شي؟ آلاء: هاا. لالا. روحي روحي. غنى: صعدت لغرفتها. فتحت الباب. شفت فهد كاعد على التلفزيون. فهد: وين جنتي من العصر لسه مختفية؟ غنى: نزعت حجابي. جنت أدرس وردة. باجر عدها انكليزي. فهد: شوكت تخلص؟ صارلها أسبوع من بدت. غنى: مو همه يختلفون. المفروض يوم امتحان ويوم عطلة وهكذا. يله هانت. بقالها أسبوع وتخلص. فهد: وانتي شوكت تخلصين؟ غنى: قبلها بيومين أخلص. رحت توضيت وكفت أصلي. كملت وكعدت أسبح.

فهد، باجر رمضان. انت تصوم؟ فهد: ذبيت الريمون. صراحة، لا. غنى: ولا مرة؟ ولا مرة؟ فهد: ولا مرة. غنى: بس ميجوز واجب عليك الصيام. فهد: باوعت لوجهها الطالع من الجادر والسبحة بأيدها. منظرها تحفة. يعني اني صلاة ما أصلي، ترديني أصوم؟ غنى: كمت وكفت كباله. باوعلي. فهد: ليش؟ اني شايل عيني عنج؟ غنى: احم. باوعلي زين. فهد، حاول تصوم باجر لخاطري. فهد: خاطرج على عيني وراسي. بس ما أكدر. أصلاً أكره رمضان.

غنى: استغفر الله. شهر فضيل. الناس تنتظره انتظار. وانت تكول أكرهه؟ ميجوز. زين جرب تصوم واني وياك. والله حيعجبك الصيام وتكمل بإرادتك. شتكول؟ فهد: كلت لا يعني لا. غنى: باوعتله. خليك بلي انت بي وشوف الله شحيسوي بيك. مو بعيدة هسه غضبان عليك. افهم. يافهد الحياه مرة وحدة نعيشها. ومنعرف شوكت نموت. فعلى الأقل نكون مأدين واجباتنه أمام الله. لأن أصلاً هو خلقنه حتى نعبده. مو حتى نعيش لنفسنه وبس. اني حجيت الي عليه. وانت حر.

رجعت أسبح وأسوي صلوات. منتظرة الساعة ب12 حتى أصلي صلاة أول الشهر. هم زين قريت من الظهر حتى نوم مانمت حتى أخلي نومتي لليل. سمعت الباب يندك. كام فهد يفتحها. درت وجهي على الباب. شفت سعاد. خير. هاي أول مرة تجينه. فهد: نعم. سعاد: أخوك لسه مارجع للبيت. خابره شوف وينه. فهد: ياهو منهم؟ سعاد: فيصل. منو يعني؟ اجيت أخابره. لكيت موبايلي مطفي. ونسوانه ما أدري وينهن. فهد: تعاي دخلي. هسه أخابره. دكيت عليه. جاوبني. الوو؟ وين انت؟

شعندك بالبصرة؟ انت تعرف الوضع شلونه؟ وبعدين باجر رمضان. شلون راح تصوم هناك؟ ترجع اليوم. ليش انت شوكت رحت؟ من الفجر طالع غير تكول لامك لو وحدة من نسوانك. ماشي. ماشي. سديته. يكول راح يجيب سيارات من البصرة وهسه شويه ويطب لبغداد. لتخافين عليه. سعاد: هاا. زين. أكلك اختك ليلى تريد تجيلها يومين هنا تتونس. هي وجهالها. فهد: أي هله بيها. شنو المطلوب مني؟ سعاد: دز لها فلوس كروة ومصرف. تدري رجلها كل شي ما عنده.

غنى: اني كاعدة وخاله ايدي على خدي وأسمع حجيها. والي فاجأني أسلوب فهد الفظ وياها. فهد: شكد أدزلها يعني؟ سعاد: يعني فد مليون. فهد: مليون؟ تضربين بالعالي. الله يسلمج. سعاد: ياا هو مليون؟ فهد: شو تحسسيني وكأن الطلبتي عشر تالاف. تره مليون مو قليل. واني ما فاتح البنك المركزي وأوزع فلوس. تردين أدزلها مصرف من عيوني. بس مبلغ معقول. مو مليون. سعاد: ميخالف. وتره أخوج فيصل هم محتاج مساعدة. ياريت متقصر وياا. هو هم يبقة أخوك.

فهد: بعد. أنزع هدومي خاف بتول ماعدها هدوم تلبسهن. مرت أبويه. إذا صاحبك لتأكله كله. سامعه هالمثل؟ سعاد: سامعته. بس مو كل شي لمرتك. خواتك واخوانك هم الهم حق عليك. فهد: ليش مرتي؟ شايفه مني؟ كون أحمد ربي من باقية ويايه بعد ما عاشت وياكم. سعاد: ليش؟ شو عايشة عيشة كل البنات تتمناها. فهد: طبعاً لأن تستاهل. ولو شما انطيها مقصر وياها. عوفج مني. مرت أبويه. اكو شي ثاني؟ نريد ننام. سعاد: هاا. يله تصبحون على خير. فهد: هله بيج.

سديت الباب. غنى: فهد، ليش تعاملها هيج؟ مو عيب. فهد: ما أحبها. أكرهها. ولو بأيدي اطلع بروحها. ما أقصر. ولتسأليني ليش. غنى: خلص براحتك. رجعت أكمل صلاة. صارت الساعة ب12. كمت حتى أسبح وأصلي صلاة أول الشهر. (السبح مستحب) . كمت أخذت ملابسي ودخلت للحمام. سبحت وطلعت. فهد، طفي السبلت حباب. فهد: أي. هسه. غنى: طلعت. انت شلون بدون تشيرت متبرد؟ فهد: صيف وأبرد. صدك تحجين؟

الله وكيلج بتموز تلكيني حاضن قالب ثلج ونايم. هاي اذا ما طكطكت نعالاتي (عفواً) وأطفر لدولة أوروبية أخلص تموز بيها وأرجع. غنى: وشغلك؟ فهد: أقدم على إجازة. هاي اذا انطوني. غنى: على طاري شغلك. صدك حتصير مقدم؟ فهد: هاي يامطي كالج؟ وين اكو مقدم عمره ثلاثين؟ شنو بس اني يخلوني مقدم بهالعمر؟ والله عدكم سوالف. غنى: هاا. يعني بعدك مصاير مقدم. فهد: لا. بعد فد خمس سنين لگدام ياله. غنى: هاا. زين.

كمت صليت صلاة أول الشهر. عسى ربي يجعل هالشهر شهر خير على كل امة محمد، واني من عرضهم. كملت وكمت حتى أنزل أساعدهن بالسحور. فهد: أكول غنى. غنى: نعم. باوعتله. فهد: اني قررت أصوم باجر. غنى: صدك؟ فهد: أي. غنى: بفرح. أي عاشت إيدك. بس لازم تصلي هم. فهد: أي. بس... غنى: بس شنو؟ فهد: حكيت راسي. احم. بس اني ما أعرف أتوضى. فشلون أصلي؟

غنى: ابتسمت بهدوء. أي عادي. مو فد مشكلة. لزمت ايده. تعال خلي أعلمك شلون تتوضى حتى من يأذن الفجر نصلي سوا. فهد: دخلت وياها للحمام. أباوعلها. رفعت ردانات الدشداشة. مطلعة أديها. غنى: شوف. بالبداية تسمي بسم الله. وانوب تاخذ مي بأيد.... وشرحتله الوضوء بالتفصيل. وتوضيت كدامه أكثر من مرة. يلله توضى. فهد: بسم الله. بديت أتوضى كدامها. وهي شاركتلي الحلك. ما أعرف شبيها. هااا. صحيح؟ غنى: بابتسامة. أي. عفيه.

فهد: اخذت الخاولي. نشفت. شكراً. شوفي. اني باجر راح أصوم. بس هاي كدامج. اذا صعدت ريحة أكل لفوك أفطر. غنى: هههه. لا والله. خوش سالفة هاي. لا حبيبي ماكو. تصوم يعني تصوم. فهد: شكلتي؟ غنى: كلت؟ فهد: حبيبي؟ غنى: اني كلت. فهد: ما أعرف. يجوز اني متوهم. يله تعاي خلي ننزل. يراد أخزن هواي طاقة حتى أصوم. غنى: أي. بس البسي تشيرتك. خو متنزلي هيج. فهد: ليش نازل فديوم سفردح؟ حتى أنزل هسه هيج. غنى: ابتسمت. انت شتحجي اليوم؟

ما أعلق لأن فرحانة بهالخطوة الحلوة الي خطيتها. فهد: غمزتلها. اني خطواتي دوماً حلوة. غنى: ديله. همزين مزنجر. فهد: أم وجه الفاهي. هم تحجي. غنى: ابتسمت. نزلنه جوه. لكيناهم كاعدين. رحت سويت ويه البنات سحور. تفاجئت لكيت سارة كاعدة. سارة: هاا غنى. وين جنتي؟ بس لا تنطين لفهد جرعة طاقة تصبره منا لباجر. غنى: باوعتلها. بله هاي شجاوبها؟ بتول: تلكيها هي طلبت الجرعة. مو هو. نسوان متستحي. غنى: استغفر الله.

أروى حبيبتي. وين الزيتون؟ أروى: لج مو زين مالح ويعطشج وانتي صايمة. غنى: مو الي. لفهد. تدرين بي مياكل جبن عرب اله ويه الزيتون. بتول: هو شهر ونص انتي وياه. شوكت لحكتي تتعلمين طباعه؟ غنى: سمعت خالتج تصيحلج. روحي شوفيها شتريد. أحسن. شلت الأكل ويه البنات وديته. فهد: وين الزيتون؟ غنى: انت حتصوم باجر. مو زين يعطش. ايمان: شلت راسي. منوه اليصوم؟ غنى: فهد. ايمان: بتفاجئ. انت تصوم؟ فهد: ليش؟ وحد؟ قابل ملحد؟

ايمان: الله يهديك يمه. غنى: كعدنه تسحرنه وكملنه. كلمن طب لغرفته. واني غسلت المواعين لأن حضرتهن ميكدرن. كملتهن واجيت اطلع. صار فيصل بوجهي. فيصل: شلونج مرت أخويه العزيزة؟ غنى: الحمدلله. أخويه. بس من رخصتك شويه. فيصل: متطلعين؟ منو لازمج؟ غنى: ما أكدر اطلع. بس شويه انطيني مجال. فيصل: لحظة. شبيج مستعجلة؟ خلي نحجي. ليش دائما ساكته؟ غنى: هاا. فيصل: تدرين لو كل الزلم الله يطيهم مرة مثلج تنتهي الدنيا. غنى: بارتباك. ليش؟

فيصل: لأن راح يضلون مكابليهن وكاعدين ومحد راح يطلع لشغله. وبالتالي تنتهي الدنيا لأن محد يشتغل ولا يطلع. خاصة الزلم يفقدون على الترافة. غنى: بخوف. دفعتة بسرعة وصعدت أركض. فتحت الباب ودخلت. فهد: شبيج؟ وجهج أصفر. غنى: لزمت وجهي. هاا. فهد: كمت وكفت كبالها. شبيج غنى؟ شنو تعبتي؟ يوجعج شي؟ غنى: لا. مابيه شي. بس جنت أغسل المواعين وشفت بزونة واخترعت. فهد: عبالي. شو شبيج؟ هي بزونة؟ لو شايفة أسد شتسوين؟

غنى: ما أسوي شي. لأن شايفة فهد سابقاً. فهد: تقربت عليها. وشنو رأيج بالفهد العندج؟ غنى: باوعت لعيونه. الفهد العندي شالع كلبي. فهد: حاوطت خصرها. ليش؟ تره حباب وميسوي وكاحة مثل باقي الفهود. غنى: بخجل. عاد شلونه هو؟ فهد مزنجر. فهد: قربتها عليه. أراويج المزنجر شيسوي. غنى: بلعت ريكي. هاا. فهد: دنكت عليها. هاا. شنو أراويج لو لا؟ غنى: غمضت عيوني من أنفاسه لفحتني. رفعت أيدي أدفع عنه. فهد! فهد! وخر.

فهد: إش. خليج هادئة. رفعت إيدي لزمت وجها وعيوني على شفايفها. غنى، اني بحاجة أسوي شي وضروري. غنى: شنو هو؟ فهد: دنكت أريد أبوسها وسمعت الباب اندك. ابتعدت. لا ربحنه الواضح. هواي راح نبوس. غنى: باوعتله. نبوس؟ رحت فتحت الباب. هاا. خاله. ايمان: كاعد يقره قرآن. شربوا ماي قبل ليجيم. فهد: رحم الله والديج يمه. ايمان: عليمن يمه؟ فهد: رحم الله والديج وبس. روحي جيبي ماي خلي نتسمم قبل ليأذن.

غنى: طلعت خاله ورحت جبتله ماي. شرب واني شربت. أذن. كمنه توضينه اني وياا ووكفنه. بديت أصلي بصوت عالي حتى يفهمه. هم زين طلع حافظ سور من القرآن وعنده معلومات. أجه فرش سجادته وكبر. وبده يصلي. لو شكد ما أحجي ما أكدر أوصف المنظر الكدامي. ولا حتى أكدر أوصف شعوري. فهد ديصلي ولاول مرة كدامي. أحس بشعور حلو وسعادة بداخلي ما أكدر أوصفها. كملنه صلاة الفجر وكعدنه. هاك هذا الكتاب. طلع هالدعاء واقرأ.

فهد: أدري. أول ما شطح نطح. وحدة وحدة مو صلاة وصوم وأدعية. جرة وحدة. غنى: غير واجب ولازم تأدي. فهد: اخذت الكتاب. والله شكلج. منا لنهاية رمضان تكلبيني داعي إسلامي. ومو بعيدة تلبسيني عمامة. غنى: عن الاستهزاء. يله اقره. واقره بخشوع وتركيز حتى ترتاح نفسيتك ويوصل دعائك. أباوعله. كَام يقرأ بتركيز وتمعن. أروحله فدوة. بس لو يستعدل يبقى مثل الورد. كملنه وكمنه نمنه. تصبح على خير. فهد: كرصت خدها. وانتي بخير. _ظهراً

غنى: طلعت من الكلية وره ممتحنت. لكيت فهد بره. صعدت. الله يساعدك. فهد: راح أفطر. غنى: شنو؟ شنو؟ فهد: جوعان وعطشان. جيبي العلاقة الوراچ. راح أفطر. غنى: ماكو والله متفطر. لعد شحجينه البارحة؟ فهد: غنى، بعد ما أتحمل. حلكي يابس. غنى: لزمت ايده. فدوه فهد لتخرب كولشي. كول يا الله وكمل صيامك. فهد: استغفر الله. تره اذا استمر الوضع هيج والله أفطر. غنى: لا تتعود. منا ليومين تتعود. بس فدوه لتفطر.

وصلنه للبيت. صعد كبل فوك واني رحت سلمت على أروى. جانت بس هي كاعدة. هاا. أروى: الله يساعدج. ربج كملت الرسالة وارتحت. همزين ما عندي دوام. غنى: انتي بله كملتي الرسالة. بس بتول تركت والتركة تركة. أروى: غير بطلت. غنى: ياا ليش؟ أروى: تكول مالي واهس. بطلت وكعدت من عينها غبرة. غنى: صيام صيام يمعودة. أروى: اللهم اني صائم. غنى: ابتسمت وصعدت فوك. سمعت صوت الدوش. سودة عليه. طلع بهالحر حتى يجيبني. سمعت صوت موبايله. صحت. فهد!

موبايلك! فهد: شوفي منووو. غنى: لزمت موبايله. انتهت المكالمة. شفت اسم فرح. فتحت الجهاز. لكيت رسالة. صورة. فتحتها وشفت صورة. وكفت الدم بعروكي.