رواية ذنوب على قيد الغفران الفصل السادس والأربعون 46 - بقلم براء

يله حبي مابقه شي وانتي يمنا. هاا شنو قصدج. قصدي انتي تعرفين يامرات اخويه ياحبيبت البي. غمزتلها خاف عبالج ما ادري تره ادري ومطنشه بمزاجي. باوعتلها تعالن تعالن شو كولشي مدافهم. اجت اروى تحجي ودك الموبايل طلع اسم فهد على الشاشه. عفت الكدر وجريت الموبايل ناهيه مكالمه نرجس حتى السالفه نسيتها. ولج وين. بعدين بعدين. اخذت الموبايل وطلعت بسرعه للحديقه حتى اسمع زين. فتحت الخط الووو. الو ها نونه.

وينك فهد وكعت كلبي عليك صار فوك الساعتين مكابله الموبايل ومنتظره مكالمه منك. اسف موبايلي ما جان بي شحن وانتظرته يشحن واخابرج اني قبل ساعه وصلت. طمنتني الحمدلله على سلامتك تدري ضل بالي يمك من طلعت لحد الان. ادري بيج. شكد حتبقى هناك مكلولك. والله لحد الان ما انطونه اي معلومه عن الالتحاق المفاجئ هذا. وبعد ربع ساعه عدنه اجتماع كلت اخابرج قبل لا اروح. من يكلولك كلي حباب. صار اكو شي ثاني. اي صليت صلاة الظهر.

اي اول ما وصلت توضيت وصليت حتى ما انساها. وفطرت لو لا. لا ما فطرت. لا شلون انت تعتبر على طريق سفر ولازم تفطر. اعرف بس شو ماهانلي افطر وكملت الصيام عود اذا بقيت لعشر تيام اكثر انوي اقامه واصوم بشكل طبيعي. عفيه عاشت ايدك. يله تردين شي. لا سلامتك. مع السلامه. مع السلامه حبيبي ديربالج على روحج وعلى امي هم ما اوصيج. هاا شكلت. باي باي. سديته منه واني صافنه كزبر جسمي من سترجعت نبره حبيبي بصوته. ابتسمت اروحلك فدوه اني.

دخلت جوه صارت ليلى بوجهي. اني مو كلت لفهد اريده بشغله مهمه ليش عافني وراح. اجا امر مستعجل وانجبر يطلع بسرعه. والامر المستعجل ما طلع اله لمن اني ردت احاجي. هاي بعد شغل وصارله شيسوي. وليش تحجيها بثكل. لا ابد بس اني هيج نبرتي. صدك لا كالو. وافق شنن طبقه انتي وفهد نفس الطريقه بالكلام تفتون الكلب والله. روحي عني شوفي شغلج. مجاوبتها اصلا مابيه حيل روحي وانوب فهد راح زاد الطين بله. رجعت للمطبخ هاا كملتي.

اي بس ينشف الماي ويه الشكر واصبها. خليتي هيل. اي خليت ما كتيلي فهد شكلج. ابتسمت وصل قبل ساعه بس موبايلي مبي شحن وانتظره يشحن ويخابرني وكلي اطمنكم عني. الحمدلله شفتي من الظهر لسه تفترين رايحه جايه وتاكلين بروحج تالي طلع كلشي ماكو. الحمدلله يمعوده اهم شي وصل بخير شفت بتول دخلت يله اني حصعد لغرفتي اذا احتاجيتو شي صيحيوني. ليش من شفتيني طلعتي شنو شايفه جني. من رخصتج وخري شويه عبرتها وطلعت.

راح فهد وبدت سوالفهن التافها ويايه. صعدت فوك فتحت غرفتي ودخلت ذبيت حجابي وملابسي لزمت القران ستوني فتحته واندكت الباب بس لا ساره اني ماعندي مشكله وياها بس فهد ميقبل احد يدخل وهمه من يجون يحرجوني واضل بين نارين. كمت منو. اني. فتحت الباب شفت آلاء. شنو راح تخليني واكفه. هاا لا تفضلي. اباعللها طبت وراحت كعدت. اي شلونج شخبارج. اباوعلها مرتبكه و وضعها مو تمام. الحمدلله خير اكو شي.

لزمت ايدها اني اجيت اعتذر على الصار قبل فتره والله بعد ما اسويلج شي بس لتخلين فهد يطلعنه من البيت والله لو طردنه نصفه بالشارع. اهدي اهدي لتبجين حبابه وفهميني. بدموع شلون مترديني ابجي واني وجهالي راح نصفى بالشارع ومتأكده فيصل مو بحالنه ولا يكلبنه حتى امه يذبها لو طلعنه فهد من البيت. منو كلج حتصفون بالشارع ومنو كال اصلا فهد حيطردكم من البيت.

ورده كلتلي عود فهد كايل مادام يأذون مرتي ما الهم كعده ببيتي وبس ارجع اطردهم بالشارع. خليت ايدي على حلكي هاي ورده كلتلج هيج. اي والله قبل شويه كلتلي واني تخبلت واجيت احاجيج الله يخليج والله بعد كلشي ما اسويلج ومالي علاقه بيج بس لتخلين فهد يطلعنه من البيت ابوس ايدج والله اني اسفه حتى شغل لتستغلين بعد بس عوفينه هنا.

اباوعلها بندت من البجي قهرتني مسحت على ظهرها اهدي اهدي والله فهد محجه ولا كال راح اطلعهم يجوز ورده فاهمه غلط فهد ميسويها خاصه انتو تبقون اهله وهذا الواكف بعينه لتخافين والله ميطلعكم من البيت. بدموع الله عليج يعني ماراح يطلعنه منا. لا والله. الحمدلله والله وكع كلبي واجيت اتخبل اني جدا اشكرج واسفه بعد ما اسويلج شي. مصار شي. يعني انتب متأكده ماراح يطردنه. اي متأكده. ابتسمت الله يبشرج بالخير.

كمت يله من رخصتج اروح اسوي الفطور انتي كلشي لتسوين. اباوعلها طلعت اخذت شالي وطلعت وراها رحت لغرفه ورده لكيتها لازمه الايباد لان اليوم خلصت الامتحانات ومن الصبح لسه مكابله النت وكاعده. جيبي الايباد. ليش. جيبي اريد احجي وياج. اخذته منها خليته على صفحه. انتي شكايله لآلاء. ببراءه شكايله. ضميت اديه ورده هاي سوالفج مشيها على الكل مو عليه. اني اعرفج زين احجي ليش كايله لآلاء بس يرجع فهد يطردكم. ههههه بس لا اجتج تتوسل.

اي وبندت من البجي ليش هيج سويتي مو انتي صايمه شلون تجذبين. شوفي اني خلصت امتحانات اليوم وتفرغتلهن والله لخليهن يتخبلن عبالكم اذا عندي امتحانات وملتهيه ما اعرف شيصير بالبيت تره رمضان كله شفت اسلوبهم وياج واخر شي البارحه خلن فهد يصير عصبي وكلبن اليوم على راسنه فكلت اسويلهن جرة اذن ورحت بوست احمد وزينه وكتلهم راح اشتاقلكم وهي سألتني واني كتلها فهد كال بس ارجع اطردهم وهي شاطت وصار المطلوب.

هزيت راسي انتي شنو ولج مصيبه خليتي البنيه تدك وتلطم. يطبها ستين مرض محد كلها تصير سخيفه وتعيش دور الاميره بالبيت تستاهل خلي تضوك اللوعه حتى تبطل خباثه سموميه وهسه جيبي ايبادي يامرت اخويه العزيزه لان كاعده اشوف حبيبي وانتي قاطعتي كعدتنه. فتحت عيوني حبيبج شنو. فتحت الايباد وباوعتلها عود صدوك تحجين النمر الوردي. ههه لعد شعبالج طبعا اني كلش احب الكارتون وخاصه كارتونات سبيستون اعشقها ماكو مثلها.

دهاج عبالي عدج سالفه يله اعوفج وعفيه ورده فدوه اروحلج لتعيديها بعد ما اريد تصير مشكله وتدرين فيصل شيسوي بيج وفهد ماهو حتى يكدرله فسمعي الكلام حبابه. بستها من عيوني على هالاسلوب الحلو شتردين اسوي. ابتسمت ورجعت بستها عفيه بالورده.

مثل ماتعرفون راح تصير مداهمه شامله على كل مقرات الارهاب وهالخطوه صار فتره نخططلها ومترددين على تنفيذها لخطورتها علينه وعلى الشباب الويانه ولافتقارنه للعدد المطلوب تم الامر بجمع كل القوات سوه حتى تصير دخلتنه دخله وحده.

العفو منك بس هذا غباء اذا دخلنه كلنه ماكو اي دعم النه لو افرض متنه بقمبله بمدفع او وصلتهم اخبار عن هالمخطط بكل بساطه يكدرون يدمرونه بالاسلحه والقنابل والمعدات العدهم وساعتها كلنه بلحظه وحده نطير فكرو شويه الراح تحاربو جيش غدار ميجيك من كدامك ويقاتلك لا يتختل ويطعنك بظهرك. نكدرلهم مو فد.شي صعب. شنو مو شي صعب.

افهموووو يا مسلمين الله انو احنه ماراح نحارب الجيران وكلمن توثيته بأيده احنه داخلين نرجع بلدنه وناخذ حق اهالينه وعرضنه حاولو تستوعبون الفكره لو وصلهم خبر بمخططكم ياترى راح نكدر نسيطر على الوضع. الجواب اكيد لا. فشلون تخطون هيج خطوه وغانم شلون يقبل وكل الموجودين ما موافقين وكل الرتب الحاضره هسه ماموافقه على قراركم. اي صح كلامك. ضابط فهد انت لازم تعترض على كلشي يعني هاي اوامر واجت من فوك لازم تكعد تدقق وتعلق عليها.

وشعليهم المسوؤلين الفوك بس ينطون قرارات وهمه بمكاتبهم واحنه الصايرين بوجه المدفع تره الجاي تروح ارواح مو لعبه شغلو مخكم شويه احنه نريد نقضي عليهم بأقل خسائر ممكنه وانتو جاي تذبونه بالنار بسوايتكم هاي. كلام الضابط فهد صحيح هيج خطوه خطره وغير مدروسه والمفروض انتو متخاطرون بحياتنه هيج وكأنها شي عادي. فعلا هالخطه ابد مو ناجحه وما بالمثل احنه عدنه اسلحه حديثه ومجهزين بشكل كافي من كل النواحي حتى نكدر نسيطر.

رجاءاً حاولو تراعون انو الاسلحه العدنه مقارنه بالموجوده عدهم لا شيئ صحيح احنه مدربين بشكل ممتاز بس هالشي مو كافي واحنه ماعدنه كفائه الاسلحه العدهم. المفروض بكل خطه تخلوها تحذروهم لان كلشي يتوقع منهم وهمه ملازمين ابليس بالتفكير والغدر. لعد اني شجاي اكول. اكو مثل سامعه ؤكول. بعدوك لا تستهزء تاليته يغلبك لازم نكون نبهين حتى بالخطط النخليها و فكره انو ندخل دخله وحده هاي مليون بالميه مفكرين بيها ومتحضريلها.

واذا انتو ما خايفين علينه خافو على هالشباب ذوله شنو شافو من الدنيا وتضحون بيهم هيج خلو خططكم مدروسه حتى نكدر نسيطر على الوضع. والله محد عتب عليهم هالشباب وكلهم تطوعو. انت تشاقه لو تحجي صدك.

شنو محد عتب عليهم هذا بلدهم وجهادهم واجب ومسوؤليه عليهم بس مو معناها نضحي بيهم ومنخاف على حياتهم وارجع واكول احنه جايين حتى نحرر بلدنه مو حتى نموت كلنه عدنه حياة وبيت وعائله منريد نخسرهم واذا انت سبع وبراسك خير روح وحدك مو كاعد بمكتب واحنه النشتغل. كمت صباح رجاءاً حاول تتواصل ويه المسوؤلين وتتناقشون بالموضوع هالمره لازم تفكر بشكل حذر والا انت اولنه التموت لان مستحيل اذا عددنه جبير نكدر نغلبهم.

بعصبيه شلون منكدر نغلبهم اذا دخلنه بعدد جبير ودخله وحده نكدر نسيطر عليهم. لتنسى النبي محمد (ص) بمعركه من معاركه جان جيشه اقل من جيش الكفره وبهواي هم وتالي انتصر عليهم فالفوز مو بالعدد بالاداء يا سيد صباح وهذا شي درسنا بالكليه واذا ناسي اذكرك بمحاضرات الاستاذ خليل وشجان يكول بيها من رخصتك عفتهم وطلعت. عود كل عقلهم يردونه نطب عليهم طبه وحده.

هذا بس حجي ما اعتقد ينفذو ميكدرون يخاطرون هيج مخاطره شنو تردون مجزره سبايكر تنعاد آلالاف الشباب راحو ولحد الان جثثهم جاي تنلكه تردوهم يعيدون نفس الفلم لا ميسووها هسه يقسمونه وندخل على شكل دفعات. هذا احسن قرار بس منو كالفهد.

اني اكلك هسه يتراجعون عن هالخطه لتنسون الاشتباكات الصارت بيناتنه جاي تخلينه ننتصر عليهم بسبب كفاءه الشباب الله يخليهم صحيح انطينه هواي ولد بس بالمقابل كدرنه نوصل لهدفنه وان شاء الله مابقه شي وتتحرر الموصل ومن بعدها كل واحد بينه يرجع لشغله الاساسي. ان شاء الله تفض على خير والله هالبلد تعب. مره واحد كلي. اذا احب الله عبداً ابتلاه ويحوز الله من حبه لبلدنه يبتلي شعبه بمصائب يختبرهم بيها. منين سامع هالحديث.

اولا هاي ايه مو حديث وبالنسبه للي كلي تنهدت واحد عزيز عليه دائما يكوله الي. عزيز وعليك انت هاي من شوكت عدك عزاز انت. تنهدت من فتره صار عندي اشخاص اكثر من عزاز على كلبي بحيث الحجايه لو طلعت من حلكهم تكلبني ميه وثمانين درجه. هاا هاا عرفته الواضح الزواج هواي مغيرك لا وشفتك صليت اول ما اجيت. حركت حواجبي الواضح المدام هواي ماثره عليك. كوا.... متصيرلكم جاره وطار صيامك يافهد خرب يا ولد الكلب راح صيامي من وراكم.

هههه صيام مقبول. واكفه اساعدهم بالفطور وهاي ليلى صرعت راسنه ولا جنها صايمه استلملتك العالم واحد واحد فلان سوه هيج وعلان سوه هيج. خاله شفتي مرت عمي حياة شمسويه بروحها شفتيها صابغتلي الشعر ومخصلته بله مو عيب على. يا امي احنه شعلينه كلمن حر بنفسه اللهم اني صائم بنتي لتشيلين غيبه احد صيامج يروح. اني ماصايمه عليه الشهريه.

باوعتلها هاي صدوك تحجي جهال كاعدين ويلكفون الحجايه بسرعه وحتى لو احنه بس نسوان هم عيب واحد يحجي بهالمواضيع. ماما ثنو ثهريه. هاا حبيبي شهريه يعني يعني. تعال بيبي سويتلك حليب شربه انت مو جوعان هاك حبيبي يله روح شربه بالصاله. هاا شمسويات فطور. ليش انتي صايمه حتى تسألين. لا نفسه ميصير اصوم. اكول شمسويات صبلي لان ميته من الجوع. هذا الاكل للفطور ما طبخنا لحلكج. والله الاكل مو من جيبج من جيب حمايه فهد فما عليج.

غنى صبيلي حبابه تدرين بيه نفسه وما اكدر. شسالفه لو كل نفسه مثلج جان بطلت النسوان تحبل كافي صارلج فوك الاسبوعين من جايبه تكدرين تكومين على حيلج وتتحركين يابنتي كافي اكل ونوم اكل ونوم مو والله موزين عليج. خاله اضل سهرانه ويه محمد وانام متأخره غير هيج دائما جاي اجوع شسوي شنو لكمتي ثكيله عليكم انطوني صبر خلي يطلع الاربعين واكوم. خلي نشوف وره الاربعين وره الاربعين يمه غنى صبيلها.

اخذت ماعون وطاسه صبيتلها جنه مسوين مركه لوبيه. كثريلي مركه لازمني تغذيه. هذا الا ياخذله فكر لو شكد ما ينطيها تبقى عينها ضيكه. ماراح اجاوبج لان مالي مزاج. تفضلي. عاشت ايدج يامرت الغالي يله اعوفجن مااريد اكل كبالجن وانتن صايمات ميجوز. كملنه كولشي واذن الاذان فرشنه السفره وكعدنه نفطر. وين فهد. التحق الصبح. ليش مو المفروض تخلص عطلته بعد يومين. هذا المفروض بس اجا امر.

هسه يطلع جذاب ومعرس عليج ورايح يم مرته سوالف الزلم متخلص. اي مو هو فيصل ابو الوصخ عود يشاقه. شو ساكته مرت فهد. فهد ميجذب لتكول جذابه. شدعواج عيني شكلج ونطيتي. منطيت بس سألني وجاوبته. اكلتي عوفي الشوربه هاج رمي عظمج مابيج كل لحمه. خاله فهد شبع باللحم خلي يتونس بالعظام. لبسته ولا جاوبته عرفته مومال واحد ينطي وجهه.

كملنه اكل وكفت اغسل مواعين الفطور الاء كالت هي تغسل السحور والله سوالفج يا ورده خلت البنيه تمشي مثل الساعه. انغام حبيبتي بلا امر عليج فدوه صبي جاي خلي اكف المواعين. ياا صدك جذب تدللين. راحت انغام تصب الجاي واني اغسل بالمواعين وبالي يم فهد ياترى هسه فطر لو لا وشأكل بالفطور سوده عليه مقابل يفطر. يربي بجاه حبيبك محمد كون تتحرر الموصل ويرجعون ولدنه سالمين ونرتاح. واكفه امسح الطباخ وسمعت صوت فيصل درت وجهي.

غنى خوما زعلتي مني تره جنت اشاقه وياج. لا عليمن ازعل منك انت اخو زوجي وبمقام اخويه. وكفت يمها اكول على طاري اخويه متعرفين بأي بنك حاط فلوسه لان اريد اخلي فلوسي بنفس البنك واامن عليهن. هاا لا ما اعرف اسمه. معقوله يعني فهد ميحجيلج وين خال فلوسه والملايين العنده. لالا كولشي ميحجيلي اصلا ولا عندي كل علم. ليش مو المفروض انتي مرته وكلشي تعرفين عن حياته. اكو اشياء اني ميخصني بيها وفلوس فهد مكانهن ونسبتهن مو شغلي.

تدرين اني انقهر عليج. ابتعدت عنه ليش. يعني تزوجتي واحد مخبل وانضحك عليج. احترم نفسك رجاءاً وديربالك تحجي عليه نص حجايه لا عبالك اني ساكته اسمحلك تجاوز على زوجي. ول يابه فديت الشراسه على كيفج اني ماكلت شي غلط رجلج صدك مخبل. وماصار هيج من وحده وانما من التعذيب طك عنده فيوز. تعذيب شنو. ليش ما حاجيلج عن طفولته.

درت وجهي عليه ليش منو كلك هو محاجيلي شي تره متوهم فهد مسولفلي ابسط تفاصيل حياته واعرف عنه كولشي وبالنسبه للي عاشه فاني ما اهتمله واحبه واحترمه واقدس كل لحظه مرت بحياته سواء جانت زينه او لا عن اذنك عفته ورحت. فهد كولشي ما حجالي عن طفولته ودائما يتجنب يسولف عن هالفتره وحتى ابو من يذكره يتحسر بس مع هذا مردت ابين لفيصل انو اني مااعرف شي بس لازم استفسر عن الموضوع. دخلت لغرفتي تمددت واخذت موبايلي داكه عليه. الو.

الو الله يساعدك. ويساعدج شلونج. الحمدلله فطرت لو لا. اي قبل فنره فطرت وهسه كاعد على السجاده ستوني خلصت فرض المغرب. امم شوكت ترجع. مطول اقل شي عشر تيام. ليش. هاي بعد غير شغل. شوكت ترجع تشتغل بالمركز. الله كريم مابقه شي. ان شاء الله خير. غنى. همم. اريد انام بحضنج وتلعبين بشعري نعسان وتعبان من الظهر لسه على فرد وكفه. سوده عليه عفيه لتضغط على روحك لتنسى انت صايم وهستوك فطرت.

تنهدت شلون فطور هو شوربه ذره ملح مابيها وهم مركه شجر. ههه شعدكم ويه مركه الشجر. ما اعرف يجوز عدهم كطين زايد كالو نسوي مرك ونذبه براس المكاريد ذوله. منو مكرود انت. تره اني فقير. ههه اي كولش. استهزئي استهزئي اعلمج من اجي. ابتسمت ميخالف. خو محد ضوجتج اليوم. لا ابد بس سؤال فهد فيصل سألني عن اسم البنك الخال بي فلوسك على اساس يريد يودع مبالغ هناك ويكول عود امن وهيج شي اني اعرفه بنك (... بس مكتله كلت خاف متقبل.

عفيه عاشت ايدج ديربالج تكليله. هذا جذاب لاعنده فلوس ولابطيخ بس جاي يسحب لسانج. لعد همزين ما كتله. زين انت شلون وضعك هناك خو متعبك الصيام. الحر صمط ابو ابويه وهناك لا سبالت ولا بطيخ مروحه كهربائيه ومبرده صغيره واحنه بالصيف الله وكيلج هاي رابع مره اسبح كتلني الحر من وره هالكو. وتالي وياك عود هاي انت صايم. ما اكدر غنى لساني متعود وهالالفاظ ملازمتني ولتحاولين تخليني اعوفها ابد. مو كاعد على السجاده انت عيب من الله.

الله بكل مكان مو بس على السجاده على العموم عوفج من هالموضوع شلونه اليوم بدوني. ضوجه وكولش هم. يله حسبي سبوع سبوعين اني يمج. ان شاء الله الله يردك سالم انت وكل الوياك بجاه محمد واله. آمين يله اكوم اخلص صلا اخابرج بعدين باي. باي.

سديته كمت صليت وكعدت اقره قران رغم فهد خابرني ومبي شي بس كلبي يلعب وممرتاحه كملت وكمت نمت مرن اول ست ايام على خير البيت هدوء نوعاً ما آلاء فكت ياخه عني وليلى حتبقه للعيد عدنه زوجها مدري شلون يقبل تعوفه كل هالفتره. وفهد سوده عليه كل وقت ماعنده اول ايام جان يخابر يكدر يحجي اله هسه وره الفطور يخابرني نحجي شويه ويروح وهكذا. كاعده بغرفه خاله ايمان اني والبنات نشوف فلم تقريباً عازلين احنه همه يكعدون بمكان واحنه بمكان.

دكيت الباب. يمه كاعده. لبست حجابي بسرعه. تعال يمه تعال. السلام عليكم دخلت لكيتهن كاعدات هاا شو متجمعات هنا. ليش حبيبي عندك مانع. لا ليش عندي مانع خاصه انتي تنورين بكل وقت. اكول يمه اريدج بسالفه من رخصتج. عليمن من رخصتج يمه علي يريد يتزوج هاي اني خلصتك من الاحراجات ادخل بالمفيد خويه. لج انتي شنو شعللليييج تنطين من مكان.

خاف عبالك ما سمعتكم انت واروى من جنت تقنعها تنطيك رقم نرجس ورشيتها بخمسه وعشرين واخذت الرقم يا ابو فليس. باحراج اكلي تبن عيب الجذب. كل لروحك. لحظه لحظه شبيكم خبصتوني. ومنو يريد يتزوج وشنو نرجس فهموني شكو. يمه اني قررت اتزوج. اي بالمبارك يمه والله احسن قرار بس منو تريد. حكيت راسي نرجس صديقه غنى. خو كول صديقه اروى. نفس الشي حبيبتي اروى خليني محترمج. هاا يمه شكلتي.

صدك تحجي تسألني هالسؤال طبعا اخطبها الك وين الاكي مثل نرجس ورده وورده. اني شعليه. انتي انجبي اي وين جنه اي خوش بنيه واهلها ناس دره بس شوكت نروحلهم. شنو رأيج من يرجع فهد. خليها بالعيد حتى هم نعايدهم وهم نخطبها الك. خوش على حجايتج يله من رخصتكم. ابتسمت هسه نرجس تركص بجفيه لو تدري. السلام عليكم. وعليكم السلام تفضلي. اني جنت مؤجره بهذا البيت اليمكم. هاا اهلا وسهلا تفضلي.

اريد اعرف صاحب البيت وين سكنه الاصلي لان موبايلي ضاع واريد انطي الايجار الاخير فكلت اسأل على بيته وادزه اله تعرفين بعد حرام ويصير بركبتي. قصدج الضابط فهد والله ما اندل بيته وهو هم ميختلط بأحد من الحي وحتى لهالبيت ميجي غير نادرا ماشايفي قبل بفتره جاي. يعني ماعندج اي معلومه عنه ولو حتى صغيره. لا والله كل الي نعرفه عنه ضابط واسمه فهد بس اذا مصره توصليله سألي عليه بالمراكز اكيد يعرفو لان رتبته جبيره حسب كلام زوجي.

اي والله المركز راح عن بالي. تسلمين حبيبتي الله يوفقج متتوقعين شكد ساعدتيني. بخدمتج حبيبتي. طلعت منها بسيطه يافهد اوصل لعنوانك اوصل لو ادري افتر على كل مراكز بغداد بس حتى احصلك ما اكول لا. وهاي الكح... الماخذها والله ما اخليج تتهنين بي واني رايدته اله اخلي مرته تطلب الطلاك منه وتعوفه اله اخلي يعيش نفس العشته. الو الهام وينج عرفت شسوي ويه فهد. كاعده واجتني رساله من علي. حضري نفسج بالعيد احنه يمكم.

طفرت شنو بالعيد كتبتله شعدكم جايين. ههه غير نخطبج شنو متستقبلون ضيوف. شنو منستقبل والله نبوسهم من الباب. بس لحظه ميصير ابين ميته عليه. كتبت اهلا وسهلا بيكم. وبيج اكثر حبيبتي. احترم نفسك عيب حبيبتي. لعد شكلج. كلشي لتكول استحي شويه. ههههه خلص حبيبتي وحياتي وعمري شتردين بعد. وكلبي نسيتها. وكلبي بعد شتردين.

ابتسمت اوي مامصدكه عود صدك طلعت انحب حالي حال البنات باوعت لروحي بالمرايه اني سمره وعيوني جوزيه جنت سمينه بس ضعفت من كبرت ماكو شي بشكلي مميز غير شخصيتي الجان الكل يحبني بسببها بطبيعتي احب اتصرف مثل ما اني متعوده لا اتقيد بأحد ولا اهتم لاحد غير بس غنى لانها صديقتي المقربه والي مستحيل ياثر بيه احد غيرها ما انكر سابقا جنت اضوج من اشوف الكل يمدح جمالها وشطارتها من غير مقارنه اهلي بيني وبين غنى غنى احسن منج غنى اشطر منج

غنى عاقله وووو صحيح جنت اضوج بس اول ما اشوف غنى اتغير وارجع مثل ماجنت علاقتي بيها تتجاوز الصداقه بحيث اني اغار عليها ما اقبل تصادق وحده غيري وحالياً من حبني علي واعترفلي حسيت بنفس الشعور شعور التملك او الغيره شتسموها سموها ابتسمت اني راح اتزوج يعني ماراح اعنس ياييييييي ههههه راح اتزوج واخلص من جعفر واروح ابقه ويه اروى وغنى واعيش ببيتهم هله هله كمت اركص كد ما فرحانه.

وينكم. خابرتني مروه باجر عيد ميلاد شهد ومسويلها حفله وره الفطور. ليش مو سوولها عيد ميلاد قبل جم شهر. وين قبل سنه بس انت منعس. المهم باجر احنه معزومين وره الفطور على عيد ميلادها والحجيه تريد الكل يجي وهاا تره شهد متدري حارث مسويلها مفاجئه. اروى يمه اختصري شتردين انتي. اريد نطلع نشتريلها هديه حبابه. اي بس منو ياخذج ومترحين وحدج.

غنى تروح ويايه حتى تشتريلها هديه حبابه تدرين بشهد انتي كل مناسبه تذكر الكل مو عاد بعيد ميلادها ننساها وبعدين غنى راح تروح ويايه هاا غنى. اكل لفهد اذا قبل اروح. ولا تكعد راحه الطالبه المواضبه. استغفر الله. يمه ماكو روحه وحدجن اخاف عليجن وانتن بنات شابات مومال تروحن وحدجن. خليها تروح خاله اني اخذها اليوم وره الفطور عندي محاضره ويه طالب سادس جاي يحضر للامتحانات. عندي حصه يمه اذبهن بالسوك وعود من اكمل محاضره امر عليهن.

يعني شيصير لو الله يخلق منك كم نسخه بس كم نسخه. لا عيني هي نسخه وحده وصارت من نصيبي. تره استحي وهسه اسيح عليكم. ههه. ابتسمت فدوه انغام ومنذر شكد لطيفين. انغام ليش متجين ويانه. مابيه حيل اني انطيجن فلوس و انتن اشترن شي مرتب الها. واحنه شو محد عرض علينه نروح. عود نطلع باجر الصبح نشتريلها هديه خلي غنى واروى ياخذن راحتهن ما انكلبت الدنيا. هاي شنو ماعرفتج من شوكت انتي هيج وديعه.

كمت عن اذنكم صعدت فوك حتى اخابر فهد دكيت عليه جاوبني بسرعه كالعاده. الو. الو هلو فهد شلونك. هله بيج الحمدلله انتي شلونج. الحمدلله. خير محتاجه شي. لا بس وره الفطور منذر ياخذنه اني واروى نشتري هديه لشهد بت عمك لان باجر عيد ميلادها عادي اروح. ابتسمت اي روحي واخذي فلوس من الكنتور عايفلج مبلغ بكنتورج واذا احتاجيتي الخزنه يمج. لا شكرا عندي بس حبيت اكلك قبل لا اروح خاف متقبل كلت اخابرك واستأذن منك. تنهدت اروح فدوه لليستأذن.

بفهاوه اني اني حروح انام. نوم العوافي تدرين شتهيت هسه على بروده الغرفه واشبكج وانام. هذا معقوله فهد. بارتباك باي. ابتسمت باي. سديته منها. شبيك تضحك. اكيد مرته مخابرته. ادري مرتك شعدها كل شويه مخابرتك متمل. وانت شعليك لو دو. الغيره تنبش بيك متكدر متحجي. مو علساس تبت وكمت تصلي وتصوم مو عيب عليك تتلفظ هالالفاظ. بهدوء تره كمت اصلي واصوم ماصرت داعي اسلامي شبيكم. اعذرنه خويه بعدنه مصدومين بيك ما مستقبلين الوضع بس نتعود.

هاي النسوان الحوك شوف غيرتك. امك هم حوك شلون ضبت ابوك من جان صايع. تنهدت هسه ابويه شعليه. مادام جاب عار مثلك خلص لعد بي انه. هههه متصيرلك جاره. ابتسمت ابد. كملنه فطور وكمنه بدلنه وطلعنه ويه منذر. وين تردن ترحن. للسوك نشتري جم جاحه النه ونجيب هدايا لشهد. اي وين صاير بالضبط واني اخذجن ولتكللي سوك وبس بغداد بيها مية سوك. اخذنه ل (... خوش. ذبنه منذر وراح وكال ساعه ساعه ونص هو يمنه. نزلنه. شتردين تشتريلها.

جنطه وشال اشوفه انسب شي لان مااعرف هي شتفضل. صحيح يله تعاي. دخلنه لمحل عجبتني جنطه بيضه ونيليه شكلها يجنن وبيها فيونكه بالجانب كولش نازكه وهالون جدا مناسب. شنو رأيج. تخبل راح اخذ وحده مثلها بس غير لون. تره احنه اجينه حتى نشتري الها مو الج. لا بله بس لا عبالج هاي الطلعه على حساب شهد افندي. لعد. لا حبيبتي اني محتاجه جم حاجه وسويتها وحده بوحده حتى هم اشتري لشهد هديه وهم اشتري لروحي الاريده.

يمه منج واني عبالي كتلتي نفسج على مودها. ديله خلي نشتري ونخلص بسرعه امي كالت حدجن للتسعه ونص تسعه وخمسه وتلاثين دقيقه متفوتنه للبيت. اخذت الجنطه واخذتلها شال من محل شالات واحجبه واروى اخذتلها فستان رسمي بس حلو واخذت كلاده فضه على شكل ملاك الها. هاا خلصتي. اي يله عندج شي بعد. لا كولشي ماعندي خلي نرجع ما اريد نتأخر. اي يله عندج شي بعد. اي يله خلي نرجع ما اريد نتأخر. طلعنه وكفنه على جهه خابرت منذر.

الو ها منذر وينك هسه جاي بالطريق ماشي احنه منتظريك. يكول بالطريق. هزيت راسي. باوعت على محل يبيع تجهيزات مال عرايس. صارت عيني على سيت نوم لونه احمر تذكرت بكنتوري اكو فوك العشر سيتات وملابسه ولا واحد منهم حتى استحي اباوعلهم. هاا عجبج. شنوه. السيت الاحمر تردين تشتري. لا عيب شنو اشتري. لعد شتلبسين لاخويه بالغرفه ازار صلاه. انجبي عيب هالحجي.

بس تدرين اذا تلبسين لفهد هالسيت الاحمر يمكن تضربه جلطه لان اخويه ضعيف كدام هالكتله من الانوثه والدلع. الله يطيح حظج صدوك متستحين اله اكل لفهد اروى العبالك فقيره طلعت متستحي. فنج والله جذابه لا تحجين ولا تكولين همزين جنج فاره كدامه. اجيت اجاوبها وسمعت موبايلها اروى موبايلج. اوكفي هذا منذر يمكن اجه. الو ها منذر ياا ليش وهسه شلون. والله السياره بنجرت بالطريق مااعرف شبيها.

اكلج خابري علي خلي يجيجن لترجعن وحدجن خوش اني ما اكدر اعوف السياره لو اكدر جان جبت تكسي واجيتجن بس هاي المشكله السياره وين اعوفها. خليك يم سيارتك وهسه اخابر علي يجينه. خير شكو. سياره منذر بنجرت وميكدر يجينه خلي اخابر علي. خابرته دك دك وماجاوب اكيد يمه مراجعين رجعت دكيت عليه مره وثنين وعشره وهم ما جاوب. شلون هسه. خلي نرجع مشي. انتي خبله شلون تردينه نمشي كل هالمسافه امشي ناخذ تكسي ونرجع شنسوي يعني.

لا اروى الدنيا ليل هسه ومو مال نصعد بتكسي وحدنه انتي متعرفين الدنيا مو امان وبعدين الولد ميقبلون وبالاخص فهد يتعقد من سالفه التكاسي. يمعوده قابل شنسوي الضرورات تبيح المحظورات خلي ناخذ تكسي ونرجع احسن ما نصفى بس احنه بالسوك وساعتها صدك تصير مشكله. جريت ايدها تعال تمشينه شفت سياره صفره اشرتلها اجت يمنه. وكفت السياره يمنه اباوع السايق شكله غريب.

اروى حبابه اني ممرتاحه خلي نرجع مشي او نخابر ولد عمج او اي واحد يجينه حبابه. سكتي سكتي. تكسي. اي. تاخذنه لمنطقه.... ( ..... اي صعدو. جريتها دتعاي لتخافين قابل راح ياكلنه. صعدنه بالتكسي واني ابد مامرتاحه وكلبي يدك سريع ما اعرف ليش. شبيج غنى وجهج اصفر. همست ما شفتي شكله شلون تصعدينه وياا. واحنه شعلينه بشكله قابل نريد نخطبه. وين تردون اوصلكم. اروى هذا شبي صوته. احم لمنطقه (...... وين صايره هاي.

اديها يرجفن اروى الرجال وضعه مو طبيعي شوفي طريقه كلامه عبالك واحد سكران وحتى سواقته رايحه يمنه يسره حبابه خلي ننزل. بخوف اخويه نزلنه هنا. مو تردن لمنطقه (... هسه اخذجن. عفية انتبه على الطريق. م م هه مركز مركز. صرخت يمعود عينك على الطريق غنى حبابه اهدي لترجفين. شلون مترديني ارجف وهذا ميعرف يسوق. حسيت السياره طارت بينه بجيت ولج هذا شبي. وكف السياره وكفهااا. احاجيك اخويييه حباب وكف السياره.

هممم شتكولين هسه اوصلكم انتو بالحارثيه مو. بدموع لالا بس وكفنه حباب الله يخليك راح تنكلب السياره من سرعتك الله يخليك اوكف والله انطيك كل الفلوس. تشتريلي عرك. عززه هذا شيحجي والله عرفته بي شي. حباب قلل سرعه. اباوعله ولا كأن يزيد مينقص ومبين شارب وضعه مو طبيعي وكام يدخل بفروع من وحده واني واروى نبجي اباوع داس بانزين وتوجهه على الرصيف. لا لا لا حباب لا.

هنا واجاني اشعار انو حنموت شويه وما احس غير السياره تنكلب بينه واخر شي سمعته هو صوت اروى تصرخ وماحسيت على شي بعد. الساعه العاشره والنصف مسائاً. دخلت للبيت. السلام عليكم. الكل وعليكم السلام. جا وين البنات. يا بنات. اروى وغنى راحن للسوك خذاهن منذر ورجع خابرني كال بنجرت سيارتي وكلي علي راح يجيبهن من السوك. لا محد كلي. طلعت موبايلي لكيت عشر مكالمات من اروى دكيت عليها مترد. رجعت دكيت على غنى هم مترد.

يمه شبيك وجهك صار اصفر. ميردن. اهدوا اكيد هوسه يمهن تعرفون سوك وكومه ناس تطلع برمضان. ارجع خابرهن. رجعت دكيت عليهن ميردن. اللهم صلِ على محمد وال محمد ياربي دخيلك. والله صوجكم اكو واحد يعوف بنيات وحدهن يطلعن لو فهد هنا جان خلاهن اكيد لا بس ااخ منجن. رحمه لابوج سكتي. دك موبايلي شفتها غني هاي غنى جاوبتها. الو. اجاني صوت رجالا. يا الله لزمت كلبي الي وجعنيفجئه. انت تعرف صاحبه هالرقم. اي اي مرت اخويه.

صاحبه الرقم تعرضت لحادث هي و وحده وياها وهسه بمستشفى (........ ياريت تجي بسرعه. فتحت عيوني شنووووو هسه هسه جاي. خير يمه شبيك. غنى واروى سون حادث وهسه بالمستشفى. لطمت يمه سوده بوجهي يمه بناتي راحن. خطيه عفيه علي استعجل الله يخلللليك روحلهن. جايه وياك اوكف طلعت اركض ورا حتى عبايه ماخليت على راسي طلعت ليلى انطتني عبايه وطلعنه. بدموع يمه سوده بوجهي شلون خليتهن يطلعن شلوون شجايه وقبلت. اهدي يمه ان شاء الله مابيهن شي.

ان شاء الله ان شاء الله. وصلنه للمستشفى ونزلنه بسرعه. قبل شويه جابو بنات ثنين مسويات حادث. قصدك على طريق (....... اي اي. اي وحده بالطابق الاول غرفه. والثانيه بالعمليات. رحنه ركض للطابق الاول شفنه الدكتور طلع من الغرفه. يارب احفظهن دخيلك هاا دكتور. انتو اهل البنات. اي احنه. البنيه الاسمها اروى تعدت مرحله الخطر عدها كسور ومجرد رضوض مو خطره بس. بس شنو دكتور.

البنيه الثانيه وضعها جدا خطر وصارلها ساعه ونص بالعمليات وحيل متأذيه اضافه انو كلبها موزين فيكون استقبال جسمها جدا ضعيف. دكتور ممكن تشرحلي الوضع.

صاحب التكسي جان متعاطي ومو بوعيه جاي بسرعته وصاعد على الرصيف منكلبه بي السياره هو البنات وحسب كلام الجابوهن لهنا يكولون البنيه الثانيه طبعا احنه منعرف اسمها لان مالكينه بجنطتها لا هويه ولا شي بس البنيه الاولى لكينه بجنطتها هويه فعرفنه اسمها اروى المهم البنيه جانت قريبه على الرصيف ومحشوره بين السياره والرصيف وماكدرو يطلعوها غير بالكوه ومن جابوها صايره قطعه حمره وكلشي ما مبين منها.

دكتور احجي بمختصر وضع مرت اخويه شلونه ولتحاول تخفي شي اني دكتور واعرف سوالف الدكاتره. صراحه وضعها جدا سيئ وهاي الحقيقه. بدموع صخام الصخمني راحت البنيه ولك يمه فهد تعال شوف مريتك شصار بحالها.