رواية ذنوب على قيد الغفران الفصل الثالث والعشرون 23 - بقلم براء

طلعنه اني وياا نزلنه من المطعم. دنمشي وصادفتنه وحده، شفت فهد وكف. "شبيك فهد ليش وكفت؟ " باوعت على نظره شفت عينه على البنيه مبين يعرفها. "منو هاي فهد؟ "منو هاي فهد وشمعرفها بيك؟ "منو انتي؟ "امشي غنى." باوعتله عاف البنيه واخذ ايدي ومشه. "فهد مكتلي منو هاي البنيه هسه ليش ساكت احجي." "سدي حلكج وامشي وانتي ساكته." وصلنه يم البنات واني الفضول اكلني، معقوله هاي حبيبته؟ لا لو عنده حبيبه جان كلي. "يله امشن." "هاي اجه جعفر...

باي بنات." "باي." صعدنه وفهد الطريق كله موبايله ماسكت لحظه وحده. "فهد شوف موبايلك خاف صاير شي ماسكت من طلعنه لسه." "ماكو شي اكيد من الشركه." "والشركه هيج تلح بالمراسله؟ صاح: "هو تحقيييييييق لو شنووو؟ صارت خنسه محد حجيه بعد. وصل لبيتهم. "يله نزلن." "هو شغل بعمل لو موصلين غنى بالبدايه؟ "عندي طلعه ويه جماعتي اوصلها واروح." "خوش يله باي نونه." "بيباي غنى." "باي." نزلن البنات وحرك فهد. "تعاي حولي لكدام."

"بهدوء مرتاحه هنا." "شنو سايق ابوج اني؟ "لتجيب طاري ابويه فتهمتتتت ومحد جبرك توصلني انت تطوعت معاجبك نزلني هنا." "اكلج تبن لا انزل اوكلج بأيدي حيوانه." "هاي الخبصه كلها لان طلعت سوالفك كدامي." "سوالفيش بت الكلب." ستهضمت من شتمني فتحت الباب اريد انزل بسرعه داس بريك. وكفت السياره ونزلت. "لج انتي خبله شلون تفتحين الباب السياره تمشي لو نازله جان وكعتي وتفلشتي تعرفين شنو يعني تتفلشيييين ثوله انتييي لو تستثولين."

نزلت من السياره. "معليك انت يطبني مرض لتسوي نفسك مهتم يله وخر عني." "غنى الناس تباوعلنه عقلي وصعدي لا اجيبج براشدي اكلب خلقتج والله." "وخر عني فهد... جان ستحيت تشتم رجال ميت وكدام بنته بس انت نازع المستحه فرد مره." دفعتها دصعدي صعدي... صعدتها كوه وسديت الباب رجعت اسوق.

الطريق كله دموعي تنزل، ما اذاني من غلط عليه كد ما اذاني من شتمني، يعني اهلي لا وهمه عايشين مرتاحين من الناس ولا وهمه ميتين مرتاحين اني كولشي ولا اهلي احسهم شي مقدس واتخبل لو نجاب طاريهم بالموزين. "هسه غير افتهم عليمن هالبجي." مجاوبته. وصلني للعماره، اخذت جنطتي ونزلت بسرعه. "غنى اوكفي غننننننى سمعييي.... بعصبيه: "يلعن ابو هالطلعه الكشره هاي...

طلعت موبايلي لكيت كومه رسائل من فرح منهن. "اذا متجي للبيت هسه اقسم بالله احرك روحي وموتي بذمتك." جاوبتها: "جايج." حركت سيارتي متوجهلها. وصلت وره فتره فتحت الباب لكيتها كاعده. "كمت بسرعه منو هاي الي وياااااك بالمول هاا مرتك مووو احجييييي ليش ساكت." "صوتج لتعلي عليه بت القندره." "شهالبروده الاعصاب الي عندك هاي....

اشو تحجي ولا كأن شفتك ويه وحده بالمول لا ومنسق ولابس انت وياها نفس اللون وجماله اخذت ايدها ولبستني ورحت ولا كأن اني موجوده... انت اذا عندك مره ليش تزوجتني اذا تحبها ليش تدور وراهااااا هااا." كعدت: "دكافي اكلان تبن وكعدي صدعتي راسي." "هاي كعدت احجي فهمني اني غبره وثوله انت فهمني." "اولا انتي مالج حق تحاسبيني سواء جنت متزوج لو لا...

لان انتي زوجه متعه ونسه لا اكثر فعادي لو تزوجت عليج او جنت متزوج قبلج سواء جان مؤقت او دائمي." "يعني هاي مرتك مو؟ "خلي ارضي فضولج... لا مو مرتي." "جاا شتصير منك حبيبتك؟ "هاي اختي." "اختك؟ "اي." "وليش ما كتلي اختك؟ "هو انتي انطيتيني مجال خبصتيني جنج كح... عوره كلبتي الدنيا." مسحت دموعي: "يعني الي جانت وياك اختك مو مرتك؟ هزيت راسي: "لا." ركضت حضنته: "تدري اجه كلبي يوكف عبالي تزوجت." "لو اريد اتزوج ما اخذ اذنج تره."

استنشقت عطره: "اني اسفه حقك عليه بس كد ما احبك اجيت اتخبل لمجرد تفكيري انو اكو وحده سجلت بأسمك." "اول وتالي راح تجي الي تسجل بأسمي اذا مو اليوم فبيوم من الايام." "مهمني المستقبل الي يهمني هسه انت ما مزوج وباقي الي." "اني مو لأحد." بست ركبته: "ميخالف." "اكلج خلصت اجازتج لو لا؟ غمزتله: "تريد اجهزلك سهره؟ ابتسمت: "ياريت صار فتره مخزن طاقه." همست: "وطاقتك كلها اخلصها اني وكول فرح كالت."

رحت لغرفتي بسرعه بدلت واجيت شغلت المسجل وبديت السهره او سهره فهد الخاصه. *** كاعده وخاله ايدي على خدي. رغم بطلت بجي بس احس كلبي موجر احسه غادي نار. فهد كولش قهرني اليوم اسلوبه جان ابد مو حلو يغلط ويتجاوز والمفروض مني اكله شكرا واسكت. ما اعرف ليش دائما انصدم بالاشخاص الي الهم مكانه خاصه بكلبي المشكله كل شخص اكون اله صوره حسنه ببالي يثبتلي العكس.

رفعت راسي للسما يارب واسمك تعبت، اريد يوم واحد بس يوم واحد انام واكو فرح بداخلي. طلعت موبايلي اتمنى لو بيبي موجوده واكعد احجي وياها. اووف شكد صعب شعور الوحده. شعور ماله وصف تحس نفسك تايهه رغم الناس حواليك بس تشوف نفسك وحيد تشوف نفسك غريب عن هالعالم. يا ترى لو اهل بابا محتضنينه اني ومروان مو جان احنه هسه مرتاحين مو جان هسه مروان كاعد ديحضر لامتحانات الثالث.

كمت طلعت شهادته من كنتوري اباوعلها واحس كلبي يحترك نار نار متنطفي بيه ابد. حبيبي طلع من الاوائل على المدرسه طول عمره جان شاطر ومواضب بكولشي ليش يادنيا تاخذين بس الزينين بحياتنه ليش. حضنت شهادته عبالك حضنته اله. رجعتها وطلعت صورنه ويومياتنه الي جنه نصورهن ويه بيبي فتحت جنطه الصور وانفتحت وياها شلالات دموعي. *** كاعدين كلنه بغرفه امي نتابع مسلسل وسمعنه صوت صياح. "شنو هالصوت؟ كمت ركض. "اوكفي ولج...

يمه شلون ويه هاي المكلكله تموت على المشاكل." طلعنه بسرعه سمعنه الصياح جاي من فوك صعدنه لكينه سعاد صايره بين ساره وفيصل الي جاي يضربها اخواني يجرون بي بس يرجع عليها. اباوع الاء واكفه على صفحه تضحك. سألت بتول: "خير شكو؟ "فيصل كتل ساره." "ليش ليش؟ "ماخذه فلوس من محفظته بدون متكله ومن لكاها ماخذه ورقتين لزمها كطعها تكطع." "صدك تحجي ولك تكتل مرتك على حساب الفلوس قحط؟

"ما كلت قحط بس بت الكلب تصرف فوك الورقه بطلعه وحده جريتها دشوفي شمشتريه سوالف مالها داعي مكياج وملابسسسس بورقتييين الله يقبلهااااا." "دعوفها غير بت فكر وما شايفه... عوفها ولك هاي حامل لتروح تطرح وتخسر ابنك عفوها لو ما حامل اني اكلك كسرها بس عوفها." جريته دوخر... "عمي الورقتين اني انطيهن الك بس عوفها حرام عليك يا بني ادم الفلوس انت تجيبها مو هي تجيبك... شبيك."

"كدرتك بس عليه روح شوف اختك صرفت كومه فلوس بالمول شنو اني وحد بشنو اختلف عنها." صفنت عليها صدك متستحين ولو هو الصوج مو بيج صوجي اني احترمتج واخذج وياي وبعدين رجلج ما صارف عليه شي اني ماخذه من اخويه... فتهتي. "وانتي كل عقلج اخذتي بت الفكر هاي وياج للمول والله فشله حتى برستيجج راح." "كافي بنات شبيجن... خاله خلي ساره تدخل جوه." "تعاي انغام احنه ماعلينه مشاكلهم همه يحلوها وحدهم... " جرها وراح لغرفتهم.

"تف عليك يا عار الزلم... خليك دومك اسحب مرتك وروح." اخذنه ساره وعلي اخذ فيصل طلعه اباوع للبنيه مدمي وجها طاحظك اي والله. "يعني انتي ما لكيتي تاخذين فلوس غير من هالعصاره فيصل والي ياخذ ياخذ ورقتين ادري شبيج حتى البوك ما فالحه بي." "ورده لو تسكتين لو تولين جوه." "وشبيهن بناتهم قابل لابسات تراكات حصر كدام الزلم لو طالعات بحمره حمره عبالك مطي ماكل طماطه." "صحت بيهااا ورده كافي."

"ترا ما كالت شي ورده ليش تصيحين عليها كلامها صح شو تذب بلاها علينه." "وليش انتي من بناتهم حتى شملتي روحج بكلامي؟ "وها قد بدئ تطاير الجبهات في هذه الغرفه ما هذا يا إلهي." "متصيرلج جاره ابد ولا جن فهد هانج قبل فتره." "سكتي اصلا اني زعلانه منه." عقمت وجهه البنيه وعفتها يم سعاد واخذت بناتي ونزلت. شوكت يبرد راسنه من هالمشاكل ما ادري. *** نايمه بحضن فهد. "حبيبي." "نعم." "شنو اسم اختك؟ "ميخصج باسمها."

"هسه قابل راح اكلها هو بس اعرف اسمها." "فرح لتعكرين مزاجي." بست صدره: "خلص لتكول اسمها... بس تدري اختك تخبل." ابتسمت: "صدك." "اي تشع شع احسها كد ما ترفه بس واحد يلزمها تنجرح." "لهدرجه." "واكثر جنها لعابه والله مو مبالغه." "وبعد؟ "ماكو عجبتني حلوه كلش ومبينه عليها هادئه وحبابه بس شو متشبهك ابد." "شعلت الجكاره اخذت نفس... "يعني ماكو اي شبه بيناتكم هي بيضه كطن جنها كيمر وناعمه وانت اسمر وخشن ولا عبالك اخوان."

بهدوء: "اي صحيح احنه منتشابه." "زين اكلك اختك ما سألتك عني؟ "لا اختي مو حشريه طبيعتها متدخل بشي ميخصها تسأل مره وحده حصلت جواب كان بها ماحصلت تسكت وتسد الموضوع." "احس هذا بسمار الي." "زين تعرفين؟ "شتريدني اسوي وانت ضام عليه كل تفصيل بحياتك اني حتى جم اخت واخ عندك مااعرف حتى مكان شغلك ما اندله الي اعرفه انت ضابط وبس." "لعد ليش وافقتي من البدايه اذا تدرين هيج؟

"اني مره تزوجت صغيره كلش وتطلكت من زمااان بقيت وحيده ماعندي احد واضل اني بشر وعندي رغبات وبصراحه ما لكيت واحد احسه رجال من صدك غيرك فوافقت بسرعه اصلا لو ما عارض عليه انت جان اني الي طلبت منك نتزوج." باستهزاء: "هاي طلعت هيج اني جنتل بعين النسوان ماجنت اعرف."

تقربت عليه: "انت عسل كلك على بعضك رجوله وهيبه حتى بالفراش احس رجولتك واسلوبك غير عن باقي الزلم و ارجع واكلك احسد الي راح تتوسد على صدرك وللابد والي كلبك راح يدكلها هم هاي اتمناها لو موجوده هسه تموت عندي كلبك يبقه فارغ ولا تسكنه غيري." "ذكرتيني بوحده هم تتفلسف بس ذيج عدها امكانيات عاليه." "شنو قصدك؟

"اقصد انو ذيج فلسفتها حياتيه تتفلسف بالدين وتنطي حكم ومواعض وانتي تتفلسفين بالامور الجسديه والجنسيه واني بالحالتين ما احب الي يتفلسفون." بتموع: "زين ياهو الاحسن فلسفتها لو فلسفتي؟ بهدوء: "طبعا فلسفتها احسن ذيج عدها امكانيه على الكلام فضيعه بحيث تخلي الي كدامها صافن من كميه الثقافه والمعرفه الي عدها." بغيره: "سد هالموضوع وخلي نرجع لموضوعنه شلونها طاقتك هسه خلصت لو لا؟ "عمرج يخلص وطاقتي متخلص." "ههههه." *** صباحا.

وصلت للجامعه دخلت لكيت مرتضى واكف بره تقرب مني مشيت بسرعه. "غنى بس لحظه الله يخليج انطيني فرصه افهمج الي صار والله انتي ضالمتني." "امشي ولي عن وجهي لا اروح للعميد واشتكي عليك والله... يله وخر." عفته ومشيت. "استغفر الله اني ما عولت اخلي تحاجيني انوب طلعتلي هالبت الكلب صفح." "شبيك مرتضى؟ "اخلاص الساقطه رايحه لغنى وحايره شمسويه بيها من كتلها اريد انفصل عنج واخطب غنى راحت تعاركت ويه غنى وغنى اخذت موقف مني بسببها."

"كتلك كافي عوف البنيه بحالها حرام عليك البنيه كافيه خيرها شرها ومالها علاقه بأحد حرام الي جاي تسوي بيها." "فادي احبها والله احبها مو بأيدي." "لا متحبها كول لان ما منطيتك مجال جاي تتحدى نفسك اني اعرفك مرتضى هسه بس تقبل بيك وتتونس وياها فتره وتعوفها نصيحه من اخوك عوف غنى تره هي ما عايزه." "ما اكدر بعد ما دخلت كلبي وحبيتها مستحيل اكدر اعوفها." "الله يهديك.... تعال راح تبدي المحاضره."

دخلنه للمحاضره شفنه الاستاذ جعفر يبوو جانت عايزه والتمت. "استاذ نعتذر على التاخير عادي ندخل." "وين جنتو؟ "بره ما انتبهنه." "تفضلو بس لتتاخرون بعد." دخلنه صارت عيني على غنى. ااااخ لو تدرين شكد احبج ما جان هذا موقفج وياي. كعدنه وبدت المحاضره. كملنه المحاضره وبده استاذ جعفر يوزع الدرجات. "انتي ضلي رجفي كلما نستلم الدرجات وتالي تطلعين مجاوبه." "خايفه نرجس خاف ماخذه درجه قليله."

"لتخافين تلكيج مهكره كل الماده مو تعلميني بيج."

"اول شي اني جدا مستاء منكم درجاتكم ما عجبتني ولا كأن اني اشرح واتعب وياكم ما اعرف شلون باجر عكبه راح تصيرون مدرسين ومترجمين وانتو بهالكسل هذا يا شباب انتو هسه مرحله رابعه و هالمرحله هي الحاسمه بحياتكم وهي الي تحدد مستقبلكم فرجاءاً تعبو على نفسكم شويه وطبعا كلامي ما موجه لكل الطلاب وانما البعض وحقيقه اكو طلاب ينحطون على الراس وابسط مثال عليهم الطالبه غنى صالح اربع سنوات من التميز والذكاء ولا مره اخذت درجه ضعيفه طالبه نتمنى كل الطلاب يصيرون مثلها ....

تفضلي غنى عاشت ايدج انتي الوحيده بشعبتج ماخذه درجه كامله احييج على اجتهادج واتمنى كل الطلاب يغارون ولو شويه منج ويدرسون." بخجل كمت واحس روحي راح اسيح. اخذت ورقتي ورجعت لمكاني. بده الاستاذ يوزع الاوراق وكالعاده ورقه نرجس اخر شي. "اكيد كلكم تعرفون نرجس اختي ومن اكسل الطلاب عندي حالها من حالكم تكعد مصفطه وتالي تنجح شلون ما ادري ... هاج على الحافه شدي حيلج تره ارسبج." "مثل ما انجح كل سنه انجح هالسنه."

القسم كله يموت على علاقه نرجس وجعفر لان واحد يذب بسمار على الثاني بس كلنه نعرف الاستاذ كد ما يحبها يحب يشاقيها. "كتيلي ما قاريه عمه بعينج انتي لاطعه الكتاب." "ايع طاحظج شنو لاطعه الكتاب بطلي هالمصطلحات." "دكومي خلي نروح اريد اتريك تره كد ما جوعانه يجوز اشلع لحمه منج." ابتسمت: "يله كومي." *** دخلت لمكتب غانم. "اعتذر على التاخير تفضل هذا ملف القضيه كملته."

"تعال احجيلي شبيك ذاك اليوم طلعت تركض خوفتنه عليك عبالنه شو شبيك." "صارت عندي شغله ضروريه وانجبرت اطلع على العموم هذا الملف كدامك اني كملته واخذت اقوال المتهمين وكملت كلشي والباقي عليك." "عاشت ايدك هسه اشوفه." "يله من رخصتك." طلعت رايح لمكتبي. "اكلك هذا مو علساس انقل للبصره؟ "لا لك اجاا انذار مناك وراح فتره ورجع." "جماله اني فرحت ورحت عشيت اهلي بثواب ام البنين عبالي انقل وافتكينه منه."

"والله هذا مينقل لو نموت وابشرك ترقه هسه ومو بعيده بعد فتره هو يصير المسوؤل." "الله لا يكولها والله العظيم اذا صار الضابط فهد مسوؤل علينه اطلع تقاعد وانعل ابو الشرطه هو هنا ضابط ونايم على خوانكينه مو انوب يصير مسوؤل." "ليش نسيت ابو شجان يسوي ويانه ذاك الشبل من هذا الاسد نفس الانفه والعنتكه اي اختلاف ماكو."

"اي بس هذا اتعس لابد اللواء سالم جان يتلاطف يحجي مرات يعزم الشرطه على ريوك وعلى حسابه الا هذا خشمه عالي ويمشي على اطراف اصابعه من الغرور." "شلون يمشي على اطراف اصابيعه؟ "يستنكف لا توصخه الكاع." "ههه بهاي صدقت هو حتى جاي يستنكف يشرب منا." *** رجعت من الكليه هلكانه، هالسنه مبينه كلها شلعان كلب. وصلت للشقه تفاجئت لكيت يم الباب ورد. "شلته هاي منو خاله هنا... هاا هسه فتهمت السالفه."

فتحت الباب ودخلت ذبيت الورد على الطبله واخذت موبايلي. دكيت مره ثنين ماكو. "الو الوو شنو معناها حاطلي ورد على الباب عبالك اذا تسوي سوالف الافلام هاي راح اسامحك لا ولا بأحلامك." باستغراب: "عفوا!! يا ورد؟ "لتسوي روحك متعرف الورد الي على باب الشقه مو انت مخلي." "كلشي ما دزيت اني... وانتي منو وادزلج ورد حبيبتي واني ما ادري." "هاا لعد اذا مو انت منو؟

"امي شمدريني اني ماشاءالله انتي معجبينج هواي شوفي منو منهم شتهالج ورد ودزه الج." "فهد ثمن كلامك واعرف شلون تحجي شنو معجبيني هو منو يندل مكان سكني غيرك." "بالليل امرج واشوف الكامرات مال العماره." "لا تمرني ولا امرك خليك بنفسك ومعليك بيه." "علساس بحالج اني ام وجهه الفاهي." "هو انت تناسبك المزنجرات الي مثلك وافق شنن طبقه طنجره ولكت غطاها." "تدرين جرحتي مشاعري جدا... خايبه كعدي راحه وجهج من علباتج مينعرف."

"هسه الي يسمعك يكول براد بيت همزين ناسيك بالفرن." "و راح نضل واحد يرفع واحد يكبس... اني ماراح اتناقش وياج بعد من اجي اعرف شلون اادبج." "اني مؤدبه وغصبا ما عليك ابو النسوان." "اراويج ابو النسوان شيسوي بيج اذا ما اجي ا..... اطلع مو خوش ادمي." سديته من كام يفشر. شمرت الموبايل. "الله يلعنك ابو لسان الزفر.... كعدت وتالي يربي شوكت ترجع خالتي وتخلصني من هالمقرف هذا." *** بعد مرور ثلاث ايام.

كاعده الكط تمن للغده وسمعت صياح بالمطبخ وتالي ويه بيت سعاد. كمت دخلت للمطبخ لكيت آلاء وساره لازمات طاوه ويجرن بيها. "شكووو شبيجن من الصبح خير اللهم اجعله خير." "خاله طلعت الطاوه اريد اتريك شو هاي اجتي جرت مني الطاوه." "عمه بعينج يا جذابه همزين اني اجيت قبلج حتى اسوي ريوك لزينه واحمد وانتي اخذتي الطاوه." "الله ياخذج على هالجذب."

صحت بيهن: "كافي مخبلات انتن تتعاركن على طاوه هذا المطبخ متروس طاوات اشكال والوان ما حلت بعينوجن غير هالطاوه شنو جهال انتن شو تصرفاتجن ولا كانها تصرفات امهات وراح يربن اجيال بالمستقبل شبيجن." "شكو ايمان ليش صوتج عالي من الصبح." "لزمي جناينج الله يخليج ما اكعد اني كل ساعه افاككهن من يتعاركن." "اني اكول خليج ببيتج وعائلتج وابنج الي ما جاي نشوفه هالايام وعوفي جنايني اني وياهن ننجاز."

"انت ما كاعده بهالبيت وحدج مادام اكو عائله ثانيه وياج غصباً ما عليج تحترميها انتي وعائلتج احنه مالنه خلك المشاكل اني ربيت جهالي على الهدوء والمحبه مو الهوسه والمشاكل رجاءا انتو كلشي ما عدكم تتعاركون تصالحون ميأثر عليكم بس اني عندي بنات وجاي يدرسن ومشاكلجن جاي تاثر على مستواهن الدراسي وخاصه ورده اليوم راحت مسفطه للدوام بسبب صياحكم البارحه اني لو بنتي اخذت درجه مو زينه لو رسبت منو يفيدني انتي لو جناينج."

"شدعواج انهديتي شبيج ولا جنج عجوز شكبرج .... احنه بيت واحد ولازم واحدنه يتحمل الثاني." "والله الي يدك الباب يسمع الجواب وانتي الي بديتي ودستي ببطني مو اني ... خليت الصينيه مال التمن على الكاونتر... هذا كملنه انتن مادام كاعدات والمركه انتن هم سونها اني صرت مره عجوز وموزين عليه الشغل ومادام احنه بيت واحد فالشغل يتقسم على الكل اني ما اكعد اطبخ ل ١٣ نفر كل يوم... عفتهن ورحت لغرفتي صدك بعض الناس الاخلاق متمشي وياهم.

"بنات النعال عليمن تتعاركن شفتن شلون تتشمت بيه بت الفلاليح هاي... تف عليجن." "اني شعليه متحاسبين هاي... ام لسان طويل." "الاء امشي روحي لغرفتج وخلي هالسايبه هي تطبخ." "حجيك تضوجين مني لان مثل ما ابو فيصل تزوج عليج وانتي بعز شبابج فيصل تزوج على مرته وهي بعز شبابها .... ياحرام الزمن جاي يعيد نفسه .... وشمدريجن يجوز اجيب ولد مثل فهد وفيصل يسجل كلشي اله مثل ما سوه ابوكم."

"هههه والله ضحكتيني عمي سالم عنده املاك وسجلها لفهد اما فيصل مكحف يحظي منيله املاك هو المعرض وكوه ماشي... شلون سوالف عدكم اروح اشوف جهالي." "بكلامج هذا سديتي كل باب مغفره مفتوح الج ابشرج تره اني ابليس ميلحكني اذا خليت براسي احد وانتي هسه دستي على طرفي... فتستاهلين الي يجرالج." "هزيت صدري اوي اوي رجفت... وكفت عدل عبالها تخوفني العجوز هه." ***

كاعده اتغده ودك رقم غريب عليه عرفته مرتضى لان كل ساعه يخابرني من رقم انطيته حظر ورجعت اكمل غدايه. اجتني رساله على الفايبر " غنى خاله ليش حظرتيني ". ياا هاي خالتي رحت شلت الحظر وخابرتها على الواتساب. "الو." "الو هاا حبيبتي نونه شلونج." "الحمدلله خاله اسفه لان رقم غريب حظرته ما عبالي انتي." "عادي حبيبتي موبايلي مدري شبي وخابرتج من رقم رجلي هسه عوفينه تدرين مشتاقتلج بعد كلبي." "اني اكثر والله بشري شلون صار عمو."

"لا الحمدلله صحته جاي تتحسن ويه مراجعه الاطباء الله يحفظهم ابد ما قصرو بس تعرفين عمج رجال جبير ومو بسهوله ترجع صحته مثل الاول ويكوم يرادله وقت." "الحمدلله على كل حال المهم صحته دتتحسن." "اي بشري شلونها كعدتج بالشقه خو ما متضايقه." "لا ممتضايقه بس ضجت اريدج ترجعين." "يله هانت حبيبتي مابقه شي واحنه يمج." "ان شاء الله واني بانتظاركم." "حبيبتي فدوه اروحلج ديري بالج على نفسج... يله اني اروح مع السلامه." "الله وياج."

سديته ورجعت كملت غدايه كمت غسلت المواعين ورحت اقره قران هذا روتيني المتعارف والي مستحيل يتغير صار اربع تيام مشايفه فهد لا اجه ولا اتصل واني هم لحد الان ماخذه منه موقف ومستحيل احاجي. باجر همزين ماكو دوام الطلاب رايحين سفره للحله واني كيفت عليها حتى ابقه بالبيت البنات لحن عليه هواي حتى اروح بس ما قبلت اكيد مره وحده سمعت كلامهن وطاح حظي بعد ما امشي بحجيهن لو اموت.

مر اليوم عادي كضيتها اقره قران واكل طبعا هالفتره سمنت لان اربعه وعشرين ساعه كاعده واكل اكيد اسمن. صار الليل ورحت نمت وكعدت الصبح بالتسعه بدلت واخذت من الفلوس الي خالهن فهد ورحت للسوبر ماركت اتسوك واتمشى هم. الجو يجنن جان بدايه الشهر الثالث فالجو حلو لا بارد ولا حار. لكيت الحجيه اشواق. "صباح الخير حجيه." "صباح الورد حبيبتي هاا جايه تسوكين." "اي والله خلص المسواك ونزلت اسوك." "لعد تعالي نتسوك اني وياج." "ماشي."

تسوكنه اني وياها ورجعنه للعماره صعدت للشقه فتحتها ودخلت ذبيت الغراض. جذبني عطر بالبيت شنو هالعطر اني مراشه شي قبل لا اطلع. ذبيت حجابي. سمعت صوت من غرفه فهد عرفته هنا ولو المفروض اعرف من البدايه لان عطره ترس الصاله. بس شعنده جاي بسيطه اني اعرف شسوي وياا. رحت بسرعه فتحت الباب ودخلت لكيته ديبدل. عطت بسرعه وغمضت عيوني.