رواية ذنوب على قيد الغفران الفصل الثاني والستون 62 - بقلم براء

خابرني منذر. غنى: خير؟ فهد: باوعتلها. فيصل كاتل سعاد وماخذها لاهلها وذبيها بالشارع. غنى: يااا... ليش؟ فهد: حسب اللي فهمته من منذر، فيصل ما كان يدري بيها باعت قطعة الأرض مالتها. ومن درى، تعارك وياها، كايمة تافلة عليه وضاربه. مرجع لها الضربة. وكد ما مأذيها، مكسر سنونها. تالي من شافها تخربطت، أخذها لأهلها. ومن شافوها أخوتها، طردوها وما استقبلوها. كلولها: "جفينة شرج ومالج علاقة بينه، مالنه خلك ابن رجلج".

غنى: عزّه بعينه وكسر بأيده كون. اكو واحد يرفع ايده على أمه؟ لو مهما تسوي وتفعل، تبقى هي اللي جابته وتعبت عليه. خاصة هو من دون الكل، مخليته من أهم أولوياتها. تالي يضربها ويطردها على حساب شي هو أصلاً ماله حق يتدخل بيه. فهد: مو قطعة الأرض هاي، هي مشتريتها من أيام أبوي ولحد الآن تدر عليها فلوس. تالي جيت أنا خليتها تبيعها غصبًا ما عليها. غنى: ليش سويت هيج؟

فهد: حتى أخليها تتندم لأن لعبت وياي. كعدة العشائر اللي سويتها مو على حساب الفلوس، لا. على حساب أخليها تبيع الكاع اللي تعبت عليها سنين وتحس بإحساسنه. من احترق المعمل وهسه صفت خاليه، لا بيت ولا ملك ولا فلوس. خلي يفيدها حقدها. هسه صفت بالشوارع. غنى: لهالدرجة حاقد عليها؟

فهد: وأكثر. غنى وأكثر. الشخص الوحيد اللي أكرهه لدرجة إنه أتمنى الراحة متزوره ولا تدك بابه، هي سعاد. على القهر والضيم اللي شفته منها من فتحت عيوني على هالدنيا ولليوم. غنى: كعدت بحضنه، مسحت على لحيته. لتتشمت بيها حبيبي. سلمها لله وكول: "حسبي الله ونعم الوكيل"، وهو ياخذ حقك منها. ترى الشماتة متجوز وترجع عليك. فهد: حضنتها. مو مشمت، ومسلمها لله من زمان. وانتظر أشوف شراح يصير بيها. غنى: ونعم بالله. زين، منذر ليش خابرك؟

فهد: يريدني أستقبلها. ورفضت. بعد سوايتها، لو تموت متعتب باب بيتي. غنى: لعد ليش منذر مياخذها لبيته؟ فهد: ماموجود ببيته. ذاب مرته وجهاله عد أهلها وكاعد يرمم بالبيت. وصايرة ليصة يمه بناء وعمال. وين تكعد؟ غنى: تنهدت. وهسه شلون، وين راح تروح؟ خوما تبقى بالشارع؟ فهد: لا. خذاها منذر لبيت جدي علما يكمل بيته ويجيبها يمه. غنى: بيت جدك؟! ومعقولة استقبلوها؟

فهد: للأسف أي. أهل أبوي ناس فطر وقلبهم صافي. أبد ما يحقدون على أحد. وتلكيهم من شافوها صفت بالشارع، خلوها عدهم. وهاي سوالف عمامي. الحجية أكيد ما قابله، بس يكولون عمامي: "تبقى مرة، خوما ننيمها بالشارع". غنى: الله ينطيهم على كد نيتهم النظيفة وكلوبهم الصافية. هاي لو واحد غيرهم ميقبل حتى يستقبلها. بس عمامك بينوا شكد همه ناس طيبين. فهد: هزيت راسي. أي. غنى: تلمست شعره. شبيك حبيبي؟ ليش أحسك ضجت؟

فهد: كلما أقول خلص سعاد ورقة واحتركت وطارت من حياتي، أكتشف بعده رمادها ملاحكني. كلما أقول انمحى من حياتي شي اسمه سعاد، ترجع تظهر مرة ثانية. شكلي ماراح أرتاح منها. غنى: بس هي هسه مو يمنه وبعيدة عنه، ليش شايل لها هم؟ فهد: قندرتيش وأشيل لها هم. بس ضايج لأن جنت مرتاح وبالي صافي، تالي طلعت لي نعال خربت كل مزاجي. غنى: وهو كل اللي يخرب مزاجهم يصيرون هيج؟ ياخذون العقل. فهد: ابتسم بهدوء. شتكولين أنتِ؟

غنى: أقول محد يطلع يجنن بكل حالاته غيرك. فهد: بست ركبتها. أموت عليج. غنى: شديت على حضنه. أني اللي أموت عليك يا عمري أنت. سمعت صوت موبايله. ابتعدت. أباع لها. جاوب وصوت مرة بالموبايل. فهد: صوتج لتعلي. واحجي عدل. لا أفرك حلكج بالنعال. (عفوًا) ليلى: ارتاحييييت هسه من خلييييت خوالييي يستعرون من امييي ويذبوهااا بالشارررع. فختتت هسه بررررد كلبك وطاب حقدك؟ لو بعددده. هاي امي راااح تنجلط وتموووت من وراك.

فهد: يطبج مرض انتي وامج. وعساكم بنار جهنم. أني شكو؟ شنو مخلفكم وناسيكم. ولسانج لزمي. لا أنعل والديج بيج. خير وزود جان استقبلتيها أنتِ؟ مو جايه تصير قندرة جبيرة براسي. ليلى: لو بأيدي استقبلهاااا واحطها ببطن عينييي. بس بيتييي ميكفينييي يادوب مكفيني اني وجهالي وعمتييي. فهد: هاي الأعذار قنعي بيها روحج. أني مالي خلك. الموضوع ميخصني. تخليها عندج. عد منذر. بالشارع. بالحمام. أني شعليه. شنو أمكم لو أمي؟

نقطة راس سطر. مشاكلكم الشخصية ويا أمكم خلوني بعيد عنها. لتخلوني حتى الأخوة اللي بيناتنه أنساها. وأنعل الساعة السودة اللي فكر بها أبوي يخلفكم. ليلى: شنو شعليك؟

مو أنت اللي طردتها وفضحتها بالعشيرة. من وراااك امي رايحة لأقاربها وطارديها من الباب. من وراك بعد محددد يريدها وصارت منبوذة. وفوك هذا فيصل السافل كاتلها وكاسر سنونها. يعل بأيده الكسر. وبتول تزوجت بدون عرس وتفشلت كدام أهل رجلها. كل هذا صار بسببك انت. الله لا يسامح. لا انت ولا مرررتك هاي الحية أم راسين تمشي وتذب سم علينه.

غنى: كاعدة وأسمع حجيها لأن الصوت عالي وهي تصيح. كلبت الدنيا. وفهد طكن عروكه عالنات عن عصبيته. بس الفاجئني رده البارد. فهد: أولاً، مو أني اللي كلت لأمج تحرك المعمل. ولا أني اللي كلتلها تلعبي بذيلج وياي. هاي نقطة. نقطة ثانية، بتول راحت عرسَت. شسويلها إذا هي مفلفلة على ال***. خلي تشبع بي. أني شكو؟ ونقطة ثالثة، ديربالج تجيبين طاري مرتي على لسانج. لأن راح يكون لي تصرف ثاني وياج. خوش. وهسه يله روحي. لأن مشغول وما فارغلج.

غنى: أباع له. سده. شمر الموبايل ووجهه مكلوب. ليش جاوبتها هيج؟ فهد: تعلمي شغلة. تردين تموتين واحد بعز عصبيته، جاوبي بأسلوب بارد ومستفز. راح تخلي يشيط للسما. وهسه كومي من حضني ولتتقربي لي أبد. راح أروح أنام خوش. لحد ما أهدأ ياله. غنى: لزمت إيده. وإلى متى تظل كلما تصير عصبي تقفل على نفسك وتكعد؟

فهد: مسحت على ظهرها. حبيبي، هاي أحسن طريقة. تخيلي محافظ على هدوئي. ما أريد أصيح وأتعصب وتصيرين أنتِ بوجه المدفع. خلي أهدأ وأجي أنام بحضنج ونكمل يومنه مرتاحين. ما أريد أخرب هالايام. لأن حيل مستعز بيها. ومو دائماً يصح لي أرتاح هيج. بست شفايفها. وشلتها. موخرها من حضني. كمت دخلت للغرفة. ذبيت روحي على الجرباية حتى أنام.

غنى: عفته براحته. يمكن فعلاً هذا أحسن حل حتى لتنتلف أعصابه. يعتزل شوية حتى يهدأ. كمت دخلت للمطبخ. نصيت النار على الدولمة حتى تستوي براحتها. طلعت للصالة. أخذت موبايلي. داكه على أنغام. صار هواي ممخابرتها. جاوبتني من أول رنة. أنغام: الوو. هذا رقم غنى لو أني غلطانة؟ غنى: ابتسمت. أي، هاي أني. أنغام: اليوم الشمس منين طالعة ولج؟ بذاته هيج شهر متفكرين تسألين عليه؟ أو حتى تكولين مرت حمايه واختي أسأل عليها.

غنى: حبيبتي والله حقج عليه. بس تعرفين الي صار. التهيت وما كدرت أخابر أي أحد. أنغام: إشاقة وياج حبيبتي. قابل شرييد منج أني؟ والله لأن أحبج وأعتبرج مثل أختي. أعتب عليج. غنى: حبيبتي فدوة لكلبج. والله حتى أني أحبج. والعتب على كد المحبة. أنغام: أي والله. غنى: شلونه سالم وشلونها رفوله؟ والله مشتاقتلهم.

أنغام: والله موتوني. هاي أني صار لي خمس تيام عد أهلي. خبلو الوادم. سالم كل ساعة كاتل جهال أخواني. وهاي رفل كلما تشوف أبويه تتفل عليه. والرجال يمسح وجهه ويسكت. غنى: ضحكت. هههه. ليش؟ أنغام: علمي علمج. تتخبل منه. وهو سودة عليه مداريها ويموت عليها. بس هذا حظه. وهي ولا كأنها فصمة. حتى سنة بعدها ما صايرة ووكحة. شلعت كلبي. غنى: بعد كلبي والله مشتاقتلها هي وسالم. صار هواي مشايفتهم. زين منذر شلونه؟

أنغام: منذر سالفته سالفة سودة عليه. شحاله. من ترميم البيت للمحاضرات مالتة. تدرين بي ياخذ سادس ويدرسهم. هاي من غير المشاكل. أكيد حجالج فهد. غنى: أي سولف لي. وتفاجئت بصراحة. متوقعت فيصل هيج يسوي.

أنغام: حقير وسافل. ولج ماشفتها. سنونها متكسرة وحلكها ملتهب. كوه تحجي. لأن هالحقير مو غالط عليها. كايمة ضاربته وتافلة عليه. كوم اركع راسها بميز الطعام والميز خشب. مكسر سنونها وشاك حلكها. خطية خذاها منذر للمستشفى. مضمد لها لثتها ومنطيها مسكنات. غنى: زين أنتِ وين شفتيها؟ أنغام: من ذبوها أخوانها. مخابرة منذر جاي عليها ركض. جابها لبيت أهلي. لأن وين يوديها؟

خلاها عدنه. وراح لبيت الحجي علي يحاجي الحجية تبقيها عدها. بس مدة حتى يكمل البيت ويجيبها تعيش يمنه. ومن حركت كلبه، خابر فهد يحجيله. لأن مات من القهر. والمن يفضفض؟ سودة عليه. غنى: تنهدت. رغم كل سواياتها. بس والله انقهرت عليها. يعني مو سهلة واحد يضرب أمه. خاصة هو تحبه من دون الكل.

أنغام: من عبنه حقير. جانت تشيل بهالفلوس والذهب وتبيع وتنطي. عادت حتى أختها. لأن ما قبلت تنطي بتها اله. تالي خوش جازاها. ولو هذا عقاب من الله. جانت بطرانه على فهد وعيشته كلها. الله. أوكفي لي. خلي أحطج عد فيصل وتشوفي.

غنى: هي عمت على نفسها. فهد جان مداريهم مثل المي الي بالصينية. ومو لأن رجلي أحجي هيج. بس ما فديوم سمعته حاسب على شي. لا على أكل. لا على شرب. لا على لبس. عايفها براحتها تتصرف. بس تالي أذته برزقه. وحركت شي معيش عوائل كومة. وكل هالعوائل خطيتهم بركبتها.

أنغام: أي والله. فهد ما قصر ويانه كلنه. كد شعرايه. والله أتذكر بيوم اللي جان يجي نهاية الشهر ومنذر يخلص راتبه ويضل ياكل بروحه. يشيل فهد أوراق وينطي. من غير الألعاب والملابس اللي بكل طلعة يطلعها. يذكر جهالي وجهال فيصل. حتى جهال ليلى مينساهم. بس همه الله يهديهم. مدري شبيهم. غنى: تنهدت. الحمد لله والشكر على كل حال. أهم شي الصحة. أنغام: أي والله.

غنى: ضلينا نحجي شوية وسديته. مسحت على وجهي. سودة عليه فهد دومه مشلوع كلب من وره سعاد وجماعتها. على كوله ورده. حبيبتي ورده تكسر الخاطر. طلعوا ظالميها بالتصحيح. وطلعت إكمال بالأحياء. وتكول أروى: "شحالها صارت؟

خاصة هي كولش شاطرة. صحيح تبين ممهتمة. بس هي شاطرة". وهالشي لاحظته من درستها. بس فهد مسكت. قدم اعتراض للتربية. ورجعوا صححوا دفترها. وطلعوا فعلاً خطأنين بالتصحيح. خالينها 35 وهي ماخذة 97. شوف الفرق بغبائهم هذا وعدم مسؤوليتهم. هاي دمرت مستقبل كومة طالبات. تنهدت. داخله للمطبخ. طفيت الكدر. حتى واهس للأكل بعد ماكو. وكفت أسوي مقبلات من الملل. كملت. أباع للساعة. بـ 8:30. خلي أكعده يصلي حتى نتعشى. لأن حتى صلاة ما مصلي. غسلت إيديه ورحت للغرفة. فتحت الباب ودخلت. أباع له غافي. ميهون لي أكعده. بس إذا ظل نايم يضل كاعد للصبح. وتتعلعل نومته. تقربت منه. نمت بصفه وحضنته. من وره. أحب أحضنه هيج. حبيبي أكعد. صارت حتصير التسعة وأنت نايم.

فهد: همم. غنى: حشكت راسي بركبته. جريت نفس وبسته. كوم يروحي. أذن الأذان من زمان وأنت مصليت. وحتى العشة تجهز. كوم حتى تصلي ونتعشى. فهد: ما أشتهي. غنى: وخرت منه. مباوعت له. شنو متشتهي؟ يعني أني كاعدة من الظهر أحضر بالدولمة وسويتها مثل ما أنت تحبها. تالي تكلي متريد. فهد: باوعت لها. حبيبي والله مو جوعان. غنى: بهدوء. خلص براحتك. فهد: أجتي تكوم. جريتها عليه. كرصت خدها. هسه أكوم. كل شي ولا الكيمر يضوج.

غنى: ابتسمت. كايمة. يله. انطيني إيدك. فهد: تكدرين تكوميني؟ غنى: طبعاً. فهد: أنطيتها إيدي. يله فنج. غنى: لزمت إيديه. أجر بي. شو هذا مينجر؟ سحبته حيل وهم ماكو. على نومته هاي شنو؟ ليش ميتنجر؟ فهد: ههه. كتلج متكدرين. غنى: لا أكدر. بس أنت سمنان. أي سمنان. تعال شكد وزنك وطولك حتى أسويلك رجيم. شثكلك. فهد: ضحكت. طولي 185 و وزني 85. جسمي مثالي. يافاهية. غنى: لحظة. مستحيل. أنت 85؟ ممبين عليك.

فهد: كعدت. أي صحيح. مو وزني ماخذه بطولي. وأني طبيعتي عظمي خشن مو ناعم. إضافة إن شغلي يبني جسمي. باوعت لها. يله بيج خير. كوميني. غنى: لزمت عضلات إيده. يعني الشرطة هيج تسوي؟ فهد: لا حبيبي. الملاكمة. غنى: فتحت عيوني. ملاكمة؟ فهد: أي. قبل فترة مو قصيرة. جنت داخل معهد ملاكمة على حساب شغلي. وهالشي أضاف لجسمي بنية عضلية أكبر. غنى: أكول ليش انفصخت إيدي هذاك اليوم. باوعت له. أني أنسحب. يله كوم أنت.

فهد: ضحكت. كايم. بست خدودها. يله تعاي. غنى: أباع له. فعلاً من هدأ رجع مثل الأول. ابتسمت. ماشية وهو ورايه. دخلت للمطبخ وهو راح يتوضى ويصلي. حضرت الزلاطة والمقبلات. وطلعت دولكة. خليت بي مي. أدري شكد يدقق. وإذا لكى شي ناقص يزفني خوش زفة. جهزت كل شي. وأخذت سفرة. فرشتها بالصالة. لأن حارة الدنيا مو مال نكعد بالمطبخ. نقلت كل شي. بقة بس يكمل حتى أصُب الدولمة. انتظرته يكمل حتى نتعشى. كمل واجه للمطبخ. فهد: شهالريحة؟

خرب يومج تدوخ. غنى: ابتسمت. يله هسه أصب. أخذت صينية صغيرة. لأن أحس الدولمة متطلع طيبة إذا متنصب كلها بصينية. والبخار هيج يطلع منها يصير منظرها يجنن. أخذت صينية خليتها على الكدر. فهد: تدبريها لو راح تفشلين روحج؟ غنى: باوعت له. ما عيب. كلبت الكدر بالصينية. شوف. فهد: عفيه عفيه بمريتي النادرة الفاهية. غنى: شلت الصينية ومشيت. بسيطة. أني أعلمك. مادام فاهية بعد ممنوع بوستي ولا تحضني. أشبط المخده ونام.

فهد: كرصت خلفيتها. نزت. أم ال..... همزين بس ألزمج تخدرين. وراسج من رجليج متندلي. بعد ممنوع. أم الممنوع. غنى: يمه والله فزيت فزة. عززه فهد. شهاللفظة هاي. فهد: ما كلت شي. هاي الحقيقة. غنى: عيب يا حبيبي عيب. أنت شنو لسانك؟ وبعدين لو واقعة الصينية هسه من إيدي ومتبدي الأكل شنتعشى؟ فهد: غمز لها. كل الي يحبه كلبج. غنى: سكتت. ولا يتوب. طلعنا كعدنا بالصالة. تربعت وبدينا نتعشى. أباع له. مد إيده رافع دشداشتي. هاي شنو؟

فهد: حبيبي حارة الدنيا. كلت أرفع دشداشتج حتى تتهوى. زرورج. غنى: ضحكت بصوت عالي. وهاي أول مرة أضحك هيج. بس سوالفه تجبرني أضحك. ههههههههههه. فهد: هاي ضحكة الـ... منين تعلمتيها؟ غنى: هههه. عززه فهد. شهالسوالف هاي؟ مو كاعدين على النعمة؟ متبطل أنت. فهد: بهدوء. لا ما أبطل. وأنتي تعرفين. ضكت الدولمة. غمضت عيوني. احتركو واشتعلوا بكاز. غنى: عجبتك؟ فهد: كلش. شوفي. أني من سافرت لتركيا. أكلت دولمة عدهم. بس شنو من دولمة؟

خيال. بيومها جزمت إن أطيب دولمة بالعالم تتسوى هناك. بس اليوم لا. أسحب كلامي. غنى: سبع عوافي حبيبي. فهد: وكلتها على كلبج حبيبتي. صدك عاشت إيدج. نفسيتج بالاكل تجنن.

غنى: ابتسمت. تعشينا بهدوء. وكالعادة لازم نتناقش. أحلى ما بعلاقتنه أني وفهد إنو أحنه أصدقاء. ومبيناتنه قيود. وهذا الي يريحني. إنو فهد ميتقيد كدامي ويتصرف على طبيعته. ومثل ميحب. بحيث الي يشوفه هسه ميصدك إنو هذا نفسه الضابط الشايف نفسه. والي رافع خشمه وميتحاجه. هيج طبيعته بالحقيقة. أكول حبيبي. فهد: بهدوء. ها حبيبي؟ غنى: شوكت نرجع لبيتنا؟ فهد: بيتنه؟! غنى: أي بيتنه. ليش؟

فهد: ابتسمت. عجبتني هالحجاية. وبالنسبة للرجعة، بس نكمل عشة. أخابر غانم. وإن شاء الله يطلع كلشي تمام. وينزل الخطر عنه. حتى نرجع لحياتنه الطبيعية. غنى: إن شاء الله. والله أني لازمة كلبي وخايفة عليك. من يوم الي سولفت لي. أخاف يعرفوك أو يشكون بيك. فهد: لتخافين. كتلج سابقاً. أني أكثر ورقة رابحة بقسم الاستخبارات كله. مو بسهولة يفرطون بيه. أني والي وياي. غنى: شمعنى أنت بالذات؟

فهد: لأن ما أخاف. وكلها تعرفني. أي قضية توكع بأيدي ما أعوفها إلا أكملها. عكس بعض الضباط اللي وياي. يحاولون مرتين ثلاثة بعدين يأيسون. ويقدمون على انسحاب. ويسلمون القضية لغير ضابط. أني لا. ألأبدي بيه أكمله. ولهالسبب كدرت بفترة مو كلش طويلة أثبت جدارتي بشغلي. غنى: ابتسمت. أني فخورة بيك. وهوواي هم. فهد: خلي نكمل عشة. وأسويلج شي يخليج تفتخرين بيه أكثر. غنى: يمه منك توبة. بعد ما أحجي. فهد: ههه. دعوفي النومي وأكلي.

غنى: ماشي. تعشينا وكملنا. كمت شلت المواعين. سويت جاي ووكفت أغسلهن. كملت وعزلت المطبخ. صبيت جاي النه. وطلعت. أنطيته جايه وكعدت. شربنا جاي وكعدنا للـ 12. وكمنا للغرفة. فتحت كنتور فهد. لأن ما عندي ملابس. لبست قميص نوم من الي جابهن فهد. مستور نوعاً ما. واجيت تمددت. فهد: ورثت جكارتي. ماشرت على صدري. تعاي هنا. غنى: ذبيت الروب واجيت. نمت على صدره وحضنته.

فهد: بست كصتها. طبعاً شفتج اليوم كلشي ما أكلتي. كضيتيها تنتقش. لازم أركز على أكلج. أريدج تسمنين. غنى: باوعت له. ليش؟ أنت مو تحجي على اللي يحبون السمان؟ فهد: أخذت نفس من الجكارة. نافخة بوجهها. حبيبي اكو فرق بين إنه أريد صحتج تصير زينة. وبين إنه أسمنج. وبعدين أنتِ ما عا يزج شي. بس يرادلج شوية صحة. لأن كلش ضعيفة. خصرج محبس إيدي تلتف عليه. ميصير هيج صحياً. مو زين هيج.

غنى: والله خطية. المرأة العراقية حارت. تسمن كلتو ضعفي. ضعفت. كلتو سمني. شلون بله؟ هسه نسمن لو نضعف؟ فهد: ضحكت. حبيبتي الناس أذواق. اكو زلم يحبون الضعيفة. وأكو زلم يحبون السمينة. والأغلبية يحبون السمن. لغرص أحجيلج عنه بعد شوية. غنى: زين أنت شتحب؟ فهد: أني ما أحب لا هذا ولا هذا. كل شي معقول. أحبه. وما أعرف إذا لحسن أو لسوء حظي. مريتي كل شي عندها يتجاوز المعقول. غنى: بهدوء. شلون يعني؟

فهد: يعني أنتِ هسه كل شي عندج عابر الشي المعقول. بياضج، حدت وسواد عيونج، طول شعرج، نظافتج، ترافتج، فهاوتج، برائتج، جمالج، حجم أذاناتج. كل شي زايد عندج. ماكو شي معقول. غنى: يعني شسوي قابل أني خلقت نفسي؟ فهد: لزمت إيدها. تعاي نتفاهم. هذا لون جسم إنسان طبيعي. غنى: ليش شبي؟ فهد: وين اكو واحد هيج لون بشرته؟

غنى: والله أني أشوفها عادية. بس الناس بس تنتقد وتعيب. ساعة يكولون جنج بيضة مسلوكة. ساعة يكولون جنج قطنة. مع إنو أني مخالقة نفسي. والحمد لله على الصحة. قابل أروح آكل الله. ليش خلقتني هيج؟ فهد: خليت إيدي بصف إيدها. تصدقين. مع إنو أني مو أسود. بس من ألزمج لو أحضنج أحس روحي أسود. غنى: شابكت إيدي ويه إيده. وبستها. صحيح مزنجر. بس أحبك. فهد: خو أنتِ اللي تحارشتي. دتشوفي هالمزنجر شراح يسوي بيج؟ كلبتها ونمت فوكها.

غنى: توبة. أسفه والله توبة. فهد: دخلي أعاقبج. حتى تبطلين. جماله لابستلي أحمر. دتحملي. أبو قاسم كعد من وره سوالفج. مديت إيدي جوه هدومها. كرصتها. غنى: كام يكرص. آآآه فهد. والله جسمي يوجعني. ههههه. لااااااا. فهدددد. إيدك. والله العظيم متستحيييي أنت. فهد: ههههه. _صباحاً. محسن: صباح الخير. ياسمين: وخفه لهالوجه. شبيك ولك؟ محسن: عود شنو معناها؟ أبويه وعمي جابوا سعاد لهنا.

ياسمين: اسكت ولك. كلبي مجمر وما أكدر أحجي وأكسر بحجاية أبوك وعمك. محسن: يعني ماكو هيج صلافة. فوك ما حرقت المعمل وخلتنا نتلاطش أشهر وحلكنه يابس. هسه جايه تبقى يمنه. ياسمين: كضت عمرها تكتل الواحد وتمشي بجنازته. ولا كأن مسوية شي. متشوفها قبل شويه نزلت ويه أمك ومسويه الوضة عادي.

محسن: عجيب والله عجيب. أني لو منها بعد هالسواية وجهي بعد ما أراوي. بس هي ذرة مستحة ماعدها. جماله ابنها ملخها تملخ بالبارحة. وأخوتها طردوها. وهي ولا كأن. ياسمين: إن لم تستحي افعل ما شئت. هاي بايعه ومخلصة. لا تحس ولا تهتم. سامر: صباح الخير. ياسمين: شبيكم كالبين وجوهكم. اللهم صباح خير. سامر: حجيه مو وضعية هاي تره. ياسمين: شكو ومرض بوجهه العدو. شبيك مطنكر؟ بس لا حساب سعاد؟ سامر: لا مو بس على حساب سعاد.

محسن: لعد شبيك جنك نعال مكلوب على وجهه. سامر: اسكت عني أنت. متزوج ومرتاح. سمعي حجيه. أني بعد ما أتحمل. أريد أعرس. ولتكليلي وره عرس شهد. هاي تتعزز ووجها جنه مداس. وتريدني أنتظرها؟ ياسمين: هوب هوب ولك. منيه الوجها جنه مداس؟ شهد إذا تحجين عليها إشكك شك. خاف عبالك. وبعدين منو لازمك متعرس؟ سامر: وهالمشاكل هاي. محسن: شعليك بالمشاكل؟ عرس يمعود. تره إذا طولت فهد يفركش. تدري بي يكرهه الجر والعر.

سامر: هي هاي العايزة. فهد يفركش. حتى أنتحر. هو أني ما عولت. ياسمين: هاي منو كلكم فهد يفركش؟ لا بالعكس. أصلاً من حاكيته كال براحته. وبعدين ياريت يطولون. ما أريد أختي تروح بهالسرعة. قابل مثلكم عوزكم شوية وتركعون شهد جلاق وتنطوها لحارث. محسن: لا والله حجيه. بس شهد عمت عليهم كلهم. خطبو و زواجهم متوقف على عرسها. هي وذاك المطي.

سامر: أني والله تعذروني. اتفقت أني وعلي منا لشهر نتمم كلشي ونعرس سوه. واليوم إذا رجعوا من البصرة. نروحلهم حتى أحاجي فهد أني وعلي على هالموضوع. ياسمين: ليش علي مو فاصخ؟ سامر: لا حجيه. يا فاصخ. حاجة البنية وراح يبدون يجهزون للعرس. وين نايمة أنتِ؟ ياسمين: والله يايمه على هالمشاكل راسي من رجلي ما كمت أندله. تنهدت. بالخير إن شاء الله. استعجلو وعرسوا. لتطلع لنا سعيدان بشغلة ثانية.

سامر: حتى اسمها وأخلص العالم من شرها. كافي جزعتنه. يله من رخصتكم. أروح للمستشفى. ياسمين: الله وياك. دير بالك على روحك يمه. وانت ليش كاعد متكوم؟ محسن: كايم والله. كلما أشوف حال المعمل أموت قهر. بس مجبور أوكف بي. أني تدري فهد ماهو. وأبويه وعمي كبروا وميكدرون. يله في أمان الله. ياسمين: في أمان الله بعد كلبي. ربي برد كلوبهم ورجعهم بالسوق مثل قبل. دخيلك.

_غنى: واكفة أنشف شعري. وفهد يفتر بطرك الشورت الأسود وشعره المنكع. يخابر المسوؤل مالته ويفشر ويغلط. جماله ميستحي من مسوؤله. بقيت شعري رطب وعفته مفتوح. أباع هم طال. لازم أكصه. بس خلي تصح لي فرصة. كون فهد ماموجود. فهد: خوش خوش. دخلي أداوم. إذا ما أ.... الخلفهم. أطلع ابن كلب. صبرولي. من عيوني يدللون. ماشي ماشي. يله مع السلامة. سديته. غنى: شبيك حبيبي؟ ليش تصيح؟ فهد: ذوله الكوا...... الشرطة. غنى: شبيهم؟

فهد: سالفة طايح حظها. مالج بيها. باوعت لها. صدك باجر الصبح نرجع للبيت. لأن أمي وخواتي يرجعن اليوم. غنى: أي همزين. خلي نرجع. والله شتاقيت للبيت. رغم هالشقة أموت عليها. بس ماكو مثل غرفتي. أرتاح بيها أكثر. فهد: حتى أني. ما أرتاح إذا مو بغرفتي. صحيح هنا هم بيتي. بس هالغرفة تخنك. رغم واسعة. بس ذيج متعود عليها. غنى: أي صحيح. باوعت لها. حبيبي شتريد أسوي غدة؟ فهد: فاصوليه. غنى: ممنكعتها؟

غير تكلي من البارحة. هسه إذا أنكعها متلحك. فهد: خلص. سوي اللي تردي. غنى: خوش لعد حسوي مركة شجر. فهد: بهدوء. حتى أديرها على راسج. والله هذا الأكل شكثرة. مالكيتي غير الشجر. غنى: والله طيبة. بس أنت لازك بالفاصوليه. فهد: تره المقارنة بين الفاصوليه والشجر نفس المقارنة بينج وبين آلاء مرت فيصل. غنى: شهالتشبيه هذا حبيبي. أشكرك. طلعتني فاصوليه. فهد: تدللين حبيبي. أقل واجب هذا.

غنى: ابتسمت. داخله للمطبخ. حسوي تبسي. لأن حرت. جهزت الغدة. والتهيت بين البيت والصلاة والقرآن. وفهد هم مكضيها على التلفزيون. لو يتمرن بالبيت. كد ما ضايج. خلص اليوم ركض ركض. وما حسينا عليه. ثاني يوم الصبح. لبست فستاني اللي لبسته بعرس أيهم. وفهد رجع لبس ملابس جديدة. لأن يتعقد يلبس شي ويرجع عليه. مدري منيله هالسالفة. كملت. فهد: فتحي الحزام. غنى: مضابته.

فهد: ميخالف حبيبتي. خصرج مبين. ما أريد واحد ينتبه لتقاسيم جسمج. لأن ميجوز. يله فتحي. غنى: صار. فتحت الحزام وشلته. أصلاً ضميته بشنطتي. وأخذت كل الغراض. راح فهد. تأكد من كولشي بالشفة. وفصل السبالت عن الكهرباء. والغاز عن الطباخ. وطلعنا راجعين للبيت. شفنا حجية أشواق. كالعادة جايه هي والحجي. تقربت منها. شلونج حجيه؟ أشواق: حضنتها. يا نونه بعد كلبي. شلونج؟ غنى: بابتسامة. حبيبتي حجيه الحمد لله. أنتِ شلونج؟ والله مشتاقلج.

أشواق: تشتاق لج العافية. والله دائما بسيرتج أني والحجي. وكلما أريد أسأل عليج أنسى. غنى: ابتسمت. شلونك عمو؟ فهد: هله بيج بنيتي. ربي يحفظج. شلونك ابني فهد؟ فهد: أهلاً بيك حجي. شلونج حجيه؟ أشواق: هله بيك وليدي. تعالوا تغدوا يمنه. فهد: رحم الله والديكم. متقصرون. يله من رخصتكم. أخذت إيدها وطلعت. تذكرين من درى سوت بيج دكة ناقصة ومثلنة؟ غنى: أي أتذكر. بيومها جذبت وسويتني حبيبتك. وأني ضربني ثول.

فهد: شديت على إيدها. بس هسه أنتِ فعلاً حبيبتي. مو؟ غنى: ابتسمت. صعدنا راجعين للبيت. الطريق كله أباع للشوارع. وكأني أشوفها أول مرة. يمكن محد يصدكني. بس من الراحة اللي أني بيها. أشوف الدنيا وردية وتجنن. وصلنه للبيت. وره ساعة. لأن العمارة بعيدة. صف فهد السيارة ونزلنا. دك الباب. توقعت الجهال يفتحون الباب مثل كل مرة. بس هالمرة فتحتها ورده. الي أول ماشافت فهد حضنته. ورده: شلونك؟

فهد: هله بالسبعة. هله اللي بيضت وجهي وطلعت معدل عالي. ورده: لعد شعبالك؟ ورده أني. نونه ياعمري شلونج؟ غنى: حضنتها بقوة. هالبنية أحس روح مروان بيها. فأحبها هواي. بوستها. شلونج؟ ورده: والله مشتاقلج. وكمت أبجي عليج من رحتي. فهد: سديت الباب عن اللواكة. يله خلي ننطب. ورده: تعال. منطيتني هدية. فهد: طاحظج. خلي أطب وأطيج اللي تردي. غنى: دخلنا جوه. وخاله وأروى طلعن بسرعة. إيمان: هله هله يمه بنيتي. ستوه نور البيت. والله.

غنى: بوستها. منورة بوجودج خاله. ابتعدت حاضنة أروى. يربي شكد مشتاقتلها هي و ورده ونرجس. أروى: أم وجه الفاهي. على كولة فهد. هيج تسوين بينه. غنى: ابتسمت. مقبولة منج. أروى: حقيرة والله. دمعتي مانشفت عليج. عبالي صاير بيج شي. غنى: بهدوء. أسفه. فهد: تره أني صار لي خمس تيام غايب. أروى: هههه. أنت نور البيت حبيبي.

غنى: أباع له. شلون يحضن ويبوس بأمه وخواته. أحب حنيته عليهن. وأعتقد لهالسبب هن يموتن عليه ويعزنه. هو ومنذر أكثر من علي وفيصل. إيمان: روحوا يمه بدلو وارتاحوا. حتى نتغده سوه. والله صار هواي ما ملتمن. غنى: صعدنا فوك. فتحت باب الغرفة ودخلنا. أباع للغرفة. اكو شي بيها ناقص. باوعت لفهد. الطبله الزجاج وين؟ فهد: فتحت قميصي من وره. وحدة كسرتها. غنى: لتكلي جروح إيدك من وراها. فهد: هزيت راسي. غنى: صدك تحجي؟

اكو واحد يفلش شي بأيده؟ فهد: جنت محتاج أفرغ الي بداخلي. وماكو غير هالطريقة. عوفج من هالموضوع. لأن ينرفزني. خلي نبدل وننزل. مشتاق للحديقة. وصار هواي مامعتني بيها. خلي أطلع أشوف ورداتي وشجراتي شخبارهن. غنى: بهالحر؟ فهد: أي. ضايج. وين أروح؟ غنى: رحت بدلت. لبست دشداشة وردية وزركة. وأخذت شالي. ونزلت. البيت وحشة بدون الجهال. متعودة على صوت أحمد وزينة وسالم. إيمان: تعاي احجي لي شسويتي ماسويتي بذيج الفترة.

غنى: كعدت بالمطبخ أني وخاله. وأجن البنات. بديت أحجيلهن على بيت جدو. وخاله إيمان فهمت إن فهد ميقبل نتطرق للموضوع الأساسي. أروى: يعني أهل أبوج طلعوا حبابين؟ غنى: ورده ورده. ورده: ها هااا. غنى: دمغتها. ضاحكة. ولج بطلي سوالفج. إيمان: كعدي ولج. زين الحمد لله من طلعوا خوش ناس. بس الي فاجئني زمرد طلعت عمتج. غنى: أني هم تفاجئت من دريت. متوقعت يصادفني هيج شي.

إيمان: ذكرتيني بأخويه محمد. سودة عليه. جان يموت على عمتج ومدللها دلال. لأن جابوها اله صغيرة عمرها. يمن بحدود 14، 13 سنة. وهي بطبعها هادئة. وصوتها مينسمع. المهم بقة وياها مدري جم سنة. واستشهد بالحرب. بعد كلبي مات وهو عمره 23 سنة. كلشي ماشاف من هالدنيا. بعز شبابه. وودعنه. حتى طفل ما صار عنده. حتى يشيل اسمه. مات وانطفى اسمه ويا. غنى: أباع لخاله إيمان. بجت. خطية شكد حساسة. أروى: ليش البجي يمه؟ الله يرحمه.

إيمان: بدموع. تذكرته حبيبي. جانت ضحكته رنانة. وشحلاتها. المنطقه كلها تعرف بمحمد. أبو كلب الطيب. أبو ضحكة الحلوة. تالي هالوجهه الحلو خذاه التراب. غنى: الله يرحمه خاله. هم السابقون ونحن اللاحقون. شكد بجينة على أمواتنه ومارجعوا. ورده: أوي يمه شبيجن كلبتنها مناحة. هاي عود أحنه فرحانين لأن خلصنه من سعاد وشيلتها. أروى: حبيبتي وراج وراج. متخلصين منها. ورده: والله حتى أني ما مرتاحة. أحس راح يصير شي.

غنى: اسم الله. لتحجن هيج. كمت أساعد خاله بالغدة. والبنات راحن يعزلن البيت. واكفة أثرم البصل حتى أحمسه وأخليه فوك التمن باكله. وهم حسيت بدوخة. لزمت الطباخ. إيمان: شبيج يمه؟ غنى: دوخت. إيمان: شجاج يمه؟ دتعاي كعدتها. وانطيتها كلاص ماي. غنى: شربت كلاص مي. وأحس بدوخة فضيعة. بحيث راسي ينبض من الألم. إيمان: شبيج يمه شجاج؟ غنى: ما اعرف خاله. هاي رابع مرة أدوخ. أباع لها. صفنت. شبيج خاله؟

إيمان: بس لحظة. أنتِ الشهرية شوكت آخر مرة أجتج؟ غنى: من زمان. إيمان: ولج خاف حامل. غنى: باوعت لها. ها؟ حامل؟ إيمان: أي ولج. خاف حامل. خلي نسوي تحليل ونتأكد. غنى: لزمت بطني. معقولة؟ أطلع أني حامل؟ إيمان: لتصفين يمه. فهد قبل لتروحين لبيت جدج تقربلج قبلها بمده. غنى: هزيت راسي. إيمان: ومن ذاك اليوم لليوم ما تقربلج بعد؟ غنى: ابنك ميتقرب. صدوك تحجين؟

والله شكلج متدرين. السيد فهد باليوم جم مرة يريد. لا والاسطوانة الجديدة. كل شوية وكال أبو قاسم يكول. يله. إيمان: شبيج؟ صفتني. عذريني يمه. لأن تدخلت بخصوصيتكم. بس غرضي أتأكد من حملج. والله. غنى: احم. لا خاله. تقرب. إيمان: خوش. لعد هسه أخابر علي يجيب لي اختبار. غنى: لا خاله فشلة. إيمان: لا مو فشلة. قابل هو شمدري الج؟ أوكفي. هسه أدز له رسالة. وهو يفهم. غنى: دزت له رسالة. شويه وخابرها. إيمان: الوو. علي: شتسويين بي يمه؟

تره ما مرتاحلج. إيمان: شنو ولك؟ علي: احجي يمه. ويا من غلطانة؟ إيمان: أكل تبن أبو حلك الفاهي. غلطانة شنو؟ جيب الاختبار وانت ساكت. علي: هسه غير أعرف المن يمه؟ دخيلج. بس لا أنتِ اللي حامل؟ إيمان: الله يطيح حظك. وتف على كتصك. ويني ووين الحباله؟ أني من خلقتكم بطلت. ما أريد البزر. والاختبار أريده لوحدة. ما عليك منيه. جيبه وتعال. يله. علي: بس. إيمان: عليووووي. علي: خلص جايبها وجاي.

غنى: انتظرت. علي أجه. انطه الاختبار لخاله. أخذته. أنطته لي. علمتني شلون أستخدمه. وكالت وره الغدة نسوي. صبينا وكعدنا نتغده. بطني ما غصتني. حتى غدة ما تغديت. كد ما متوترة. فهد: بهمس. شبيج حبيبي؟ ليش متاكلين؟ غنى: لا مبيه شي. ما أشتهي. أكلت فواكه قبل شوية. كمت أسوي الجاي. معولة يكملون غدة. صبيتلهم جاي. ودخلت ويه خاله لغرفتها.

إيمان: شوفي يمه. إذا خطين يعني حامل. وإذا واحد يعني مو حامل. هذا الاختبار أصلي. جربته مرت منذر. ومن أول ما استخدمته انطاها النتيجة مضبوطة. يله طبي وكولي يا الله. قبل لا تدخلين. غنى: يا الله. دخلت للحمام. سويت الاختبار. وانتظرت تطلع النتيجة. كلبي يدك بسرعة. وكأنّي بأمتحان. أباع. طلع. أخذته. مباوعت له. أحس برودة سرت بأطرافي. خطين. معقولة؟ صدك حامل؟ إيمان: ها؟ غنى: خطين.

إيمان: يااااا. كللللووووش. الف مبروك بعد كلبي. ربي ينطيج الفرحة مثل ما فرحتي كلبي. غنى: ابتسمت. وأحس راودني شعور غريب. إنو أكون أني حامل. شي لحد الآن مداستوعبه. إيمان: شبيج يمه؟ غنى: فرحانة. إيمان: يبعد كلبي كلبج. ربي يسعدج ويحفظج يايمه. يله أمشي. كلي فهد. بسرررعه. خلي أبشر البنات. غنى: طلعت. ملكيت فهد. وين فهد؟ علي: صعد فوك. غنى: صعدت وراه. دخلت للغرفة. لكيتة كاعد على اللابتوب. مدري شيسوي. فهد: ها؟ شبيج حبيبي؟ تعاي.

غنى: نزعت حجابي. واجيت كعدت بحضنه. فهد: حضنتها. شبيج حبيبي؟ شو حتى ماتغديتي. غنى: فهد أنت تحبني؟ فهد: ابتسمت. أعشكج. مو بس أحبج. غنى: أريد أكلك شي. فهد: كولي يروحي. غنى: باوعت له. فهد أني حامل. أباع لابتسامة اختفت. وتبدلت ملامحه. وهالشي فاجئني. فهد: ********* يتبع.