رواية ذنوب على قيد الغفران الفصل التاسع والأربعون 49 - بقلم براء

كمت هذا يا ماعنده ذوق هيج يدك الباب. غنى: أباوع لفهد صار عصبي لأن يكرهه واحد يدك الباب حيل وهو أساساً يكرهه الأصوات العالية. فهد: فتحت الباب... صارت بوجهي خالة غنى. أهلاً أم حوراء تفضلي. سحر: بدموع صدق غنى سوت حادث ووينها؟ فهد: دتفضلي هاي وياها كاعدة جوه لتخافين. سحر: دخلت ركض شفتها كاعدة على القنفة. يمه سودة عليه هاي شصاير بحالج. حضنتها. ولكم ليش محد خابرني وكلي.

غنى: حضنتها. حبيبتي خالة والله كولشي مابيه وماكو داعي أكلج. عايزة قهر انتي. سحر: ولج شنو متكليلي؟ يعني يصير أني آخر من يعلم؟ ولو ما عمج شايف أبو جعفر ومسولفله ما جان دريت. والله من هسة كلي حتى دربي ماشفته. خليت شالي على راسي وجيتج ركض. حتى نسيت وكت فطور هسه. غنى: خالة والله مبيه شي الحمد لله. قبل يومين كعدت ووضعي الصحي بخير. فليش انتي هسه تبجين؟ فدوة اروحلج كافي بجي والله مبيه شي. سحر: ولج شنو مابيج؟

دباوعي لرجليج وايدج. ولج انتي إلى متى تضلين قليلة حظ هيج؟ يعني ماخلصتي من الناس طلعتلج الحوادث أنوب. لزمت وجها. ولج يمه سودة عليه هاي شصاير بيج. غنى: الحمد لله على كل حال. مسحت دموعها وبستها. عوفج من البجي تدرين شتاقيتلج هواي. سحر: بعد كلبي اني الأشوق. والله أجه كلبي يطك عليج. سولفيلي شلون صار الحادث. غنى: حجيتلها مختصر من الحادث وهي تهز راسها. سحر: عدج العافيه يابعد كلبي. بيه ولابيج. غنى: اسم الله عليج لتكولين هيج.

فهد: أباوعلها شلون تحجي ويه خالتها. عود هاي خالتها وتعاملها بهالأسلوب. لعد لو أمها عايشة شلون تعاملها. هالبنية منين مخلوقة. سحر: خالة فهد ليش ماخابرتني وكتلي؟ هو يصير. فهد: هو أني بيا حال يا أم حوراء. نزلت من شغلي ركض. وصلت للمستشفى وشفتها. بالي وتفكيري كله صار يمها. ما أجه على بالي لا أخابر ولا حتى أسأل منو يدري ومنو لا. سحر: زين هي هسه شلونها. فهد: الحمد لله وضعها زين. بقه على العلاج والجبيرة وتتحسن إن شاء الله.

سحر: إن شاء الله. باوعت للصينيه. تعذرني يمه اجيت بوكت الفطور. بس والله من خوفي عليها ماشفت دربي. فهد: صدك تحجين؟ أم حوراء بيتج هذا. تجين بالوقت الي يعجبج. مابيناتنه رسميات. إحنا أهل. سحر: الله يخليك ويحفظك بحق الحبيب محمد. فهد: الله يخليج. تفضلي. مدي إيدج فطري ويانه. سحر: لا تسلم بعد كلبي. سبقتكم فطرتنه أني وأبو حوراء. ركض ركض وأجينه لهنا. غنى: ضلت خالتي كاعدة شويه وكامت. سحر: يله أني من رخصتكم. لازم أروح تأخرت.

فهد: بعد وكت. خليج براحتج. أني أوصلج. سحر: لا خالة. عمك منتظرني بره. فهد: صدك تحجين؟ غير تكليلي حتى أنزله. شلون تعوفي بره مو عيب؟ شنو غربه أنتو. عفتهن ونزلت للرجال. تلكي ستلك أبو بهالحر. غنى: شويه وصعد فهد يصيحلها. فهد: أم حوراء الحجي يصيحلج. سحر: أي. كمت. بوستها. يله حبيبتي أني أروح. وبين فتره وفتره أخابرج وأجي أشوفج. وباجر أروح لكربلاء أدعيلج بالشفاء. غنى: حبيبتي خالة فدوة اروحلج.

سحر: عفيه ديربالك عليها. تره هاي عنيدة وتكابر. لو توجعت وتأذت تكبت بروحها ومتحجي. ما أوصيك عليها. فهد: باوعتلها. لتوصين حريص. بعيونها. أخليه مرتي هاي. غنى: ابتسمت. نزلت خالتي و وياها فهد. رجعت ظهري على القنفة متنهده براحه. ايمان: دبقوا افطرو هنا. والله هاي مو طلعة.

سحر: بعد كلبي نزورج بالافراح إن شاء الله. بس تعرفين أبو حوراء رجال جبير ومابي حيل الطلعات. وفوك هذا رمضان وصيام. مابي حتى يطلع للحديقة. مكضي اليوم كله كاعد لو يقرأ قرآن لو يتابع تلفزيون. ولو ما وضع غنى أصلاً ميطلع. ايمان: أي والله وضع غنى هدلي حيلي. أول العالم الله شاهد خفت عليها عبالك بتي. سحر: الله يخليج ياحنية. وربي ينولج الي ابالج. ايمان: اللهم امين.

فهد: تره جيتكم هاي مو جيه. ميصير نص ساعة وتطلعون. حتى ما قمنه بواجبكم. سيف: والله ياسيد واجبك واصل. بس تعرف انت رمضان وبغداد ازدحام. تصير وره الفطور. وفنه اليكدر يرجع من وكت. وام حوراء خبصتني من سمعت بحادث غنى. حتى فطور مثل العالم ما خلتني أفطر. آخر شي كلت أجيبها تشوف غنى. وتصير زينة وتكدر تتحرك أني هم أجي أشوفها. لأن كلبي عدها.

فهد: أني أسمي فهد مو سيد. وأنت بمقام عمامي. فماكو داعي للتكليف بالكلام وبالنسبة للازدحامات. بيا يوم بغداد ما جانت مزدحمة. وعادي بأتصال بسيط أنتو تطلعون. مو فد مشكلة. وأطلبكم زيارة بعد. سيف: إن شاء الله ابني. يله أم حوراء أمشينة. سحر: يله مع السلامة. فهد: الله وياكم. تعاي يمه. ايمان: أي يمه اجيت. فهد: دخلت جوه لكيت كرايب ابليس متجمعين. سعاد: بله مو عيب؟ اكو واحد يجي بوقت فطور.

ايمان: المرة اجت حلكها يابس على بت اختها. ولو أحنه بمكانها هم نسوي هيج. سعاد: أي بس مو نطب على العالم وهي تفطر. والله يا الله ناس نازعة الخجل فرد مرة. فهد: خلصتي. سعاد: شنو. فهد: خلصتي كلام. سعاد: أي.

فهد: خوش. سمعوني زين. ما أريد هوسة. أريد هدووووء بالبيت. الإبرة إذا أذبها كون أسمع صوتها. هوسة ومشاكل وتعليق على فلان وعلان هم ما أريد. عدنه مرضى بالبيت ويحتاجون راحة. فكلمن يحتفظ بتعليقاته السخيفة لنفسه. وما يعلق كدامي حتى ما أسمعه حجاية تسمع بهالشهر. مفهوم. الكل: مفهوم. فهد: عفيه بالحبابين. يله كلمن يشرب جايه ويروح لغرفته. ما أريد صوت عالي. عفتهم وصعدت. فتحت باب الغرفة ودخلت لكيت غنى كاعدة.

غنى: دخل فهد بس شو كام يدخن وهو حتى مفاطر. مكملت فطور. فهد: شبعت. غنى: شبعت! هو أكلت بس شوربة وكلاص مي. فدوة فهد باوع لوجهك شلون صاير. ليش مدتاكل. فهد: حبيبي والله شبعت. أكلي انتي. غنى: فهد. فهد: ها. غنى: لزمت أيده. اكو شي. فهد: باوعتلها. لا حبيبي ماكو شي. بس راسي شويه يوجعني. غنى: لأن ما فطرت عدل. جسمك ما أخذ كفايته. تلمست وجهه. شوف وجهك صاير أصفر. فهد: ليش بهالبيت يكدر يتسمم لو يكعد مثل الأوادم.

غنى: شنو تعاركت جوه. فهد: لا. بعد ما عندي كل قابلية حتى أتعارك. تدرين شمشتهي هسه. غنى: شنو. فهد: أنام بحضنج. بس وضعج ميساعد للأسف. غنى: فتحت إيدي السليمة. تعال. فهد: لا إيدج. غنى: مبيها شي. تعال يله أني أريد. فهد: تقربت على جهتها السليمة. خليت راسي على صدرها وحاوطت خصرها على كيفي. غنى: حضنته. احجيلي شبيك. فهد: تنهدت. اكو فكرة ببالي بس متردد. غنى: شنو هي.

فهد: جاي أفكر أكل لفيصل ياخذ أمه ونسوانه ويطلع من البيت. تعبت من المشاكل المتخلص. كل يوم عرس شكل. وأني مليت. غنى: لا ديربالك تسوي هيج. لو مهما يكن يبقون أهلك ومن لحمك ودمك. ميصير هيج تفكر. إذا أنت هيج تسوي بيهم لعد الغريب شيسوي. فهد: ومشاكلهم.

غنى: تكدر تتغاضى عنهم. تغلس. تسوي أي شي. بس مو تطلعهم. وهالبيت ساترهم. وعلى فكرة الثواب بالاول والأخير راجعلك. وأجرك عد ربنه جبير. لأن متحملهم ومخلي مشاكلهم على عاتقكك بس لأنهم أهلك. فهد: يعني متردين أطلعهم وتبقين بس أنتِ وأمي وخواتي. غنى: أكيد لا. قابل شمأثرين عليه همه. يضوجوني. عادي أكدر أغلس عنهم. بس متوصل بيه أريدهم يطلعون. فهد: بهدوء. أنتي شنو بشر. عود اكو بطيبة كلبج بهالزمن.

غنى: اكو وهواي هم. وصدكني كل واحد فاقد أهله راح يتمنى ظفر من أظافر أهلك. حتى لو جانوا يسوون مشاكل. المهم إلك عزوة وسند بهالدنيا. مو مثلي صفيت وحدي. لا أب ولا أم ولا أخ ولا شي. فهد: لتكولين ما عندي أهل. لعد أني شنو. غنى: تلمست لحيته. أنت روحي مو بس أهلي.

فهد: باوعت لعيونها ونزلت. أخذت شفايفها. بستها بقوة. بهمس. احترقوا واشتعلوا بكاز. شهالشفة هاي. جريت شفايفها بسنوني. وأحس بيها تنجر عبالك مطاط وناعمة. تسوي واهس. مصيت شفتها الجوة وابتعدت. مباوع لعيونها. ما أكول غير بس الله يساعد كلبك يا أبو قاسم. غنى: بخجل. أحم. ليش؟ شبي أبو قاسم. فهد: خطية جاي يتعذب ومحد يحس. صارله أشهر صايم. واجه رمضان كمل السبحة عليه. وخطية بقه لسه مكمل صيام. وكل يوم طالعتله سالفة صفح. الله يساعده.

غنى: خطية. هاي أني هم جنت مثله. أصوم قبل رمضان. بس هالسنة مكدرت. فهد: أي. غنى: تدري أحس هذا صديقك كولش ملتزم. مبين عليه حباب ويخاف الله. فهد: ابتسمت. أي كلش ملتزم وخوش رجال. عليه الاعتماد. لو ما هو أني بخبر كان. غنى: فهد خلي أشوفه. فهد: باستنكار. شتسوفين!!! غنى: أبو قاسم صديقك. أني شايفه. كل أصدقائك مهيمن وعمر وأيمن شفتهم بالعرس. بس هذا أبو قاسم ولامرة شايفته. فهد: حكيت ركبتي. تردين تشوفي.

غنى: أي. فهد مكلت شي يضحك. ليش تضحك. فهد: هزيت راسي. هيج هيج. ماشي. أخليج تشوفيه. بس مو هسه. صيري زينة. غنى: زين ما عندك صورة إله. يوو فهد هسه عليمن هالضحك. فهد: هههه. والله سوالفج تونس. تعاي. شلتها وكمت. أبو قاسم ما أخذله صور. أخاف عليه. غنى: ليش. فهد: سكتي لخاطر محمد. ما أريد أصدمج. خليتها على الجرباية. تلمست شعرها. صار شكد ما مشطت شعرج. غنى: من يوم الحادث. فهد: أمشطله الج. غنى: تكدر.

فهد: أي ليش ما أكدر. بس وين مشاطتج. غنى: بالمجر الأول اكو مشط خشب. جيبه بلا أمر عليك. فهد: كمت فتحت المجر. أخذت المشط وأجيت. كعدت وراها. أخذت شعرها. تدرين لسه حاقد عليج لأن كصيتي. غنى: ابتسمت. والله جان يضوجني. تخيل لو أجي مستعجلة أكعد عليه. لو بالسبح يشلع الكلب ياله ينغسل. موتني. كمت كصيت منه حتى أرتاح. فهد: مشطته على كيفي. خوما اكو ضربة براسج. غنى: لا الحمد لله ماكو ضربة قوية براسي. أخ فهد على كيفك.

فهد: هو على كيفي بس شعرج متعكد. ذكريني أغسله الج مادام مابي شي. غنى: خالة ايمان كالت خلي يلتأم جرح كصتي حتى ميلتهب لو أجه عليه مي. فهد: ماشي. مشطته الها ووخرت المشط. تلمسته. صار يجنن. غنى: شكراً حبيبي. فهد: بست شفايفها. روح حبيبج. غنى: شنو رأيك نقرأ قرآن شويه. فهد: أي ليش لا. كمت جبت القرائين وأجيت. هاج. غنى: فتحت القران. خلي نقره سورة ياسين.

فهد: بهدوء. ماشي. فتحت القران على سورة ياسين وكعدت. أني وياها. هي كملت قبلي. لأن أني بطيء بالقراءة وأتمعن هواي بالكلام حتى أفهمه. كملنه وشلنه القرائين. غنى: ابتسمت. تدري متوقعت بيوم من الأيام حكعد وياك هيج كعدة. أصلاً ما جنت متوقعة أنو أنت حتحبني.

فهد: ورثت جكارة. تدرين أني عمري ما انغصبت على شي اله حبج. أني حبيتج غصب عني وبغير إرادتي. أصلاً ما أعرف شلون وشوكت ويمتى حسيت بكل هالمشاعر تجاهج. بس سمعيني غنى. مادام صار كلشي مباح بيناتنه. شوفي صحيح أني أختلف وياج. أضحك أسولف. ممكن أتولدن شويه وأن أني وياج. وبالمستقبل القريب إذا تممنه زواجنه. ما أريد جنس مخلوق يعرف أني شلون أتعامل وياج بالغرفة. وأتذكر ذكرتلج هالشي بعقدنه. غنى: أي أتذكر. بس ليش ما أشوف عيب؟

الناس تدري شلون تعاملني. فهد: اكو جانب بالرجال ميطلع غير بس ويه مرته. وأني أفضل شخصيتي وياج متطلع وتتجاوز باب الغرفة. أحب تكون بيناتنه خصوصية. غنى: شلون يعني. فهد: يعني فهد اليحضن ويبوس ويتشاقة وياج هنا يختلف عن البرة. غنى: ليش أنت مو كتلي أني عندي شخصية وحدة. فشلون هنا شي وبرة شي.

فهد: لزمت أيدها. شوفي حبيبي. أني شخصيتي هي هي نفسها. بس هذا ميمنع أنو اكو جوانب كثيرة بشخصيتي. مثلاً أني ويه كل الناس رسمي. حتى ويه أهلي. أجي يم أمي أخفف شويه. أحجي أسولف أتشاقه وياها. ومرات ويه خواتي. هاي نادراً. أما ويه مرتي التعتبر ستر وغطه عليه. خاصة إذا مرتي صديقتي المقربة. فلا أختلف. وما مجبور أتقيد كدامها. اليجي على بالي أسوي. أبوسج أحضنج أشاقه وياج. وبعد هواي أشياء تعرفيها بعدين. أما بره ما مسموحلي لا أني ولا

أنتِ نحجي عن الي يصير بيناتنه. هاي الكعدة النكعدها سوه ما أحب أحد من أهلي أو معارفي يعرف عنها ولو تفصيل بسيط. وأرجع وأكلج أني شخص أحب الخصوصية. وخاصة علاقتي الزوجية. أكرهه أي واحد يعرف عنها شي. ونصيحة الج بالمستقبل إذا سمعت شي دار بيناتنه. أمي. أختي. أي أحد يدري بي. حسبي حسابج تاكلين رزالة أم الراشدي. وصدكي بكلمات بسيطة أكدر أبجيج دم.

غنى: بهدوء. أنت تدري بيه كولشي ما أحجي. فماله داعي هالأسلوب. فهد: بست أيديها. حبيبي أني مو قصدي أخوفج. وإنما أوضحلج كم نقطة حتى تتجنبيها بعدين. غنى: هزيت راسي. فهد: زعل الحلو. غنى: لا. فهد: شو أشوف غمازاتج. غنى: ابتسمت. فهد: لزمت وجها وبوست خدودها. ما أريدج تزعلين مني. أني كل كلامي هذا أحجي حتى ميصير اكو سوء تفاهم بيناتنه مستقبلاً. فهمتي. غنى: حضنته. هازه راسي. أعرف. فهد: بست راسها وحضنتها.

اروى: كاعدة ودك موبايلي. ورده يا ورده. ورده: ها. اروى: روحي جيبي موبايلي وشوفي منو. ورده: جبت الموبايل. سمسم يتصل بك. منو سمسم. اروى: هاي صديقتي. روحي جيبي الهيتفونات وتعالي حبابة. ليروح الاتصال. ورده: بشك. والله جذابة مو صديقتها. ركبت الهيتفونات وخليتهن بأذنها. فتحت الخط وطلعت. أني أعلمج اله أعرف منو هاي مدري هذا سمسم. اروى: الوو. سامر: ياهلا بهالصوت. الحمد لله على سلامتج حبيبتي. اروى: ابتسمت. الله يسلمك.

سامر: تدرين من طلعتي لسه واني بالي يمج. واكل بروحي. كل ساعة أريد أجيك. بس ما اكدر أجي وحدي. اله ويه أهلي. حتى محد يشك. خاصة أخوج الله يسلمه. بس يحس بشي يحكم علينه بالموت. اروى: أي فهد مينضم عليه شي. سامر: أي. أكلج. أحنه باجر وره الفطور نجي حتى نشوفج ونشوف مرت فهد. فحسبي منا لباجر. أجي وأكحل عيوني بشوفه عيونج. اروى: فدوة أروحلك سمسم. سامر: يروحلج فدوة سمسم. يله أني أروح. ديربالج على روحج. اروى: ماشي. مع السلامة.

سامر: مع السلامة حبيبتي. اروى: انطفة الجهاز. دفعته يمي. أباوع طبت أمي تنافخ. شبيج يمه. ايمان: بتول. اروى: شبيها. ايمان: مريت من فوك لكيتها واكفة يم غرفه أخوج وحلكها يتحرك. مدري شتسوي ويا. وخوفي تسوي أعمال. اروى: أعوذ بالله. لا ما أتوقع. هاي خوفية. ماعدها هالسوالف. ايمان: لعد شتفسرين تصرفها. اروى: يمكن تتصنت. ما أعتقد تسوي عمل. لأن تخاف من فهد. ولتنسين فهد شسوه بسعاد. وهي مو غبية وتعيد الغلط.

ايمان: ما أعرف. كلبي مقبوض. واني أعرف مادام كلبي وجعني يعني راح يصير شي. اروى: استغفري الله وتعوذي من الشيطان. هاي ضيكت خلق. يمكن بسبب أجواء البيت المتوترة. ايمان: يمكن. ساره: أكلك فيصل. فيصل: خير. ساره: أريد فلوس. فيصل: شتسوي بيهن. ساره: أريد أشتريلي جم حاجة. فيصل: مثل شنو يعني. ساره: مكياج. ملابس. سيتات نوم. عطور. هيج شي. فيصل: ماعندي فلوس. كعدي وسكتي. ساره: شنو ما عندك؟

يعني مرت فهد وحد ميز تواليتها متروس ترس مكياج وعطور. والله فتحت الكنتور كدامي ذاك اليوم. تحير شتباوع. أشگال وألوان عدها. هاي من غير سيتات النوم الي اشترتهن بعرسها. كومة كومة. وأني عندي بس خمسة وجاي أدور بيهن. فيصل: ليش مرت فهد هم تلبس سيتات نوم؟ ههه. عبالي تستحرم متلبس.

ساره: ليش مو عدها رجال. أكيد تلبسله. خوا ما ينام وياها بالدشداشة. وشلون رجال هي. عدها كومة فلوس. وعنده وما مقصر وياها. شتريد وشتشتهي يجيبلها وبنفس اليوم. فيصل: أنتي كلتيها. رجلها عده كومة فلوس. مو مثلي. ساره: تره أنت عندك معارض سيارات. والسيارة عندك تنباع بالملايين. فليش تكول ما عندي. لا عندك. ومو قاصر. بس كول فهد ميبخل على مرته. مو مثلك. أمده حظي وقسمتي. قابل مثل حظي.

فيصل: فهد زنكين. دك فلوس. نايمة على كلبه. يكدر هسه يشتريله قصر وهم متخلص فلوسه. أما أني رجال عملي. أجمع بالفلوس حتى أفتح معارض أكثر وأستفاد من فلوس السيارات بأشياء مهمة. مو أصرفهن على المكياج والملابس. وعلى فكرة لو ما فهد ماخذ كل الورث. جان أحنه هسه فوك النخل فوك. بس أبويه الله لا يرحمه. سجله كل شي.

ساره: كمت. شبعت من هالاسطوانة التعبانة هاي. كمت كعدت أباوع على ميز التواليت. جريت قلم الكحلة مال غنى. حتى كحلتها أصلية. قابل مثلي هاي من الصبح خالتهه لسه وما راحت. كل شي عدها أصلي وحلو. ومن أحسنه. ليش بس أني. أفف شكد أكرهه حياتي. لا عد الرجل تهنيت ولا عد الأهل. الساعة الرابعة عصراً. فهد: نزلت جوه. سلام. الكل: وعليكم. فهد: يمه طالع للسوك. أني. سجليلي شتردين بالضبط حتى أجيبه. سعاد: جيب بطيخ.

فهد: شجاي أحجي أني. هندي. شتردون سجلولي بورقة واني أجيبه. ايمان: بعد وكت يمه. هسه الدنيا ظهر. فهد: لا هم ياله الحك. منا لساعة ماكو محط رجل بالسوك. بتول: راح تروح للسوك هيج. أقصد يعني. تروح للسوك لابس قميص وبنطرون. فهد: ليش المفروض ألبس قاط. لو أطلع مصلخ. لو شنو. سعاد: قصدها ليش كاشخ. ماكو داعي تروح تنضرب عين غير تخاف عليك. فهد: أي. الله يسلمها حنينة. طالعة عليج. يله يمه لخاطر ربج.

ايمان: أوكف. غير أتأكد شناقصنه وأكتب لك. ورده: فهد حبيبي عمري. فهد: اختصري ورده. شتردين. ورده: أريد أجابـس ونساتل وهالسوالف. حباب تعرف رمضان وهالسوالف تونس. فهد: ماشي. وبعد. ورده: سلامتك أخويه الغالي. فهد: باوعت للجهال. شتردون أجيب لكم ويايه. احمد: منريد عمو. فهد: لا تردون. الي تشتهو كلولي واني أجيبه. ليلى تردين شي. ليلى: تسلم بعد كلبي. خيرك سابق. فهد: كملتي يمه. ايمان: هاك هاي الورقة. سجلتلك بيها كل شي. فهد: ماشي.

غنى: طلع فهد واني كعدت أكلب بالموبايل. ملانة. صلاة وصلينه وقران وقرينه بس مليت. وما أعرف شسوي. شوكت أخلص من هذني المقيداتني وترجع أمشي وأحرك إيدي. خلي أدك على نرجس. البارحة اجتني وراحت بسرعة ما تأخرت. اجيت أخابرها. ولفت نظري رقم مكتوب عليه سامح. أتذكر سجلته أول مارجعت بيوم الأجاني. ضغطت على الرقم. داكه عليه. سامح: الوو. منو. غنى: السلام عليكم. سامح: وعليكم السلام. منو. غنى: أني غنى.

سامح: يا هله بهالصوت. شلونج عمي حبيبتي. شخبارج. صار فتره طويلة منتظر اتصالج. غنى: الحمد لله بخير. حاجيت بيبيتي. سامح: لا والله هالايام وضعها كلش تعبان. كل يوم جاي توكع. وكلنه خايفين عليها. وأخاف لا أكللها وتتخربط بالزايد. غنى: زين شلون هسه. أني كلتلك أريد أشوفها. ومو مشكلتي إذا ما كدرت تحاجيها. هاي مشكلتك. إذا متكدر انطيني عنوانها واني أجي. ممحتاجة منك شي.

سامح: والله يا عمي وضعها مو زين. وإذا ظهرتيلها فجأة. احتمال جبير توكع وتموت من الصدمة. خليني أحاول أمهدلها السالفة. غنى: تنهدت. وشوكت تمهدلها السالفة. تره طولت هواي. سامح: انطيني مجال للعيد. ووعد أخليج تشوفينها. غنى: ماشي. حدي وياك للعيد. وإذا ما حاجيتها أني أدور عليكم والگاها. سامح: ماشي. للعيد للعيد. خلص. غنى: يله مع السلامة. سامح: لحظة عمي. غنى: نعم تفضل. سامح: ها. لالا. هيج. يله مع السلامة.

غنى: سديته منه. أفف. إلهي يا مسهل الأمور. سهلها عليه. سمعت الباب يندك. عفيه باب ما يسكت أبد. صحت. منووو. ساره: هاي أني ساره. غنى: تفضلي. ساره: دخلت. وينج. غنى: هياتني هنا على الجرباية. ساره: ها. شلونج. غنى: الحمد لله. تفضلي كعدي. ساره: كعدت. جاييتج بطلب. ولترديني. غنى: إذا أكدر عليه من عيوني. ساره: سهل وتكدرين عليه. عفيه أريد سيت نوم منج. غنى: باستنكار. عفواً.

ساره: شبيج. سيت أو يجوز أنتِ تسميه قميص نوم. أريد أستعير واحد منج وأرجعه الج بعدين. غنى: بس ميصير تلبسين من سيتاتي. ساره: ليش يمه؟ بيه جرب. غنى: لا. العفو مو هيج قصدي. بس أحم. أنتِ تعرفين قمصان النوم المن تلبس. فميصير أني ألبس شي لزوجي وتجين أنتِ تلبسي وياي. خاصة إذا ملبوس ويلبس للزوج. مو حلوة. لا أخذ منج ولا أنطيج. وأصلاً هو ميجوز. يعني شلون تلبسين لفيصل شي هو ملبوس لغير رجال. زحمة. ساره: هسه عليمن سويتيها قصة؟

كولي ما أريد أنطيج. غنى: باوعتلها. والله مو هيج. وتره لو ما أريد أنطيج. أكلج. بس هو ميصير. أخذيها بالعقل. يصير آخذ سيت نوم منج. أنتِ تلبسي لفيصل. وأجي أني ألبسه لفهد. ميصير. ساره: والله يصير. قابل أني كلت لج خلي نتبادل وأنام ويه فهد. هو سيت نوم. ما أعرف ليش تبالغين أنتِ. غنى: استغفر الله. شنو هالحجي ساره. وبعدين أني ما أبالغ. كلمن يفكر بطريقة معينة. ساره: يعني ما راح تنطيني. غنى: تعذريني. هيج شي. ما أگدر أنطيج.

ساره: شكل الحادث خلاج نحسة. جنتي حبابة. مدري شبيج هسه. غنى: أباوعلها. عافتني وراحت. طبكت الباب حيل وراها. كون فهد يشوفها هيج تطبق الباب. جان لعب بيها جولة. تنهدت. هسه أني شسويتلهة وانهدت عليه. سمعت الباب رجع اندك. معقوله رجعت. صحت. منو. ليلى: أني. فتحت الباب ودخلت. ها حبيبه شلونج. غنى: الحمد لله. استريحي. ليلى: كعدت. أي. شلونه فهد وياج.

غنى: الحمد لله. أباوعلها تباوع داير مدايرها. وكلما تريد تحجي تسكت. الواضح عندج كلام. ليلى: أي والله أريدج بسالفه. بس كون تبقه بيني وبينج. غنى: أي ميخالف. ليلى: شوفي حبيبتي. أني واكعة بمشكلة. وما عندي واحد يساعدني غيرج. غنى: خير يا ستار. احجي. ليلى: أني محتاجة فلوس. ومحتاجتها مو شلون ما كان. وأريد أطلب من فهد. بس أخاف لا يردني. غنى: لا ليش. فهد أبد ميرد أحد. خاصة إذا محتاج الفلوس لشي ضروري.

ليلى: أدري. بس خاف من يسمع بالمبلغ. يرفض يسلفني. غنى: ليش. شكد المبلغ الي ترديه. ليلى: تسع ملايين. غنى: فتحت عيوني. تسع ملايين تردين. ليلى: أي. وفهد عنده. يعني التسع ملايين متشكل فرق عنده. حالهن حال التسعين ألف. غنى: ليش عندج التسعين ألف قليلة. حتى تقارنينهن بتسع ملايين. ليلى: هاي أنتِ. لأن جانوا أهلج فقرة. عندج هيج مبلغ جبير. بس فهد لا. هالمبلغ شيئ كدام ثروته. غنى: تنهدت. وأني شنو المطلوب مني هسه. وليش دتكليلي.

ليلى: أريدج تقنعيه. غنى: وشلون أقنعه. شكله يعني. ليلى: كليله أختك معتازة فلوس وتريدك تنطيها المبلغ الي تريده سلفة. أنتِ بعد مرته. وعرفي شلون تقنعيه. حتى لو عصب. حاولي ويا. غنى: وشاني أستفاد لو صار عصبي. ليلى: تكسبين أجر. أنتِ مو تدورين هالسوالف وتخافين الله وملتزمة. إذاً أكيد تعرفين أنو لو باستطاعتنا نساعد شخص. ميصير نتردد. هاي مو حكمج ومواعظج المخبوصة بيها. غنى: تنهدت. أفااتحه بالموضوع وأشوف شيكول.

ليلى: بستها. بعد كلبي. يا طيبة. شلون حبابة أنتِ. غنى: ااااه. على كيفج حبابة. كتفي. ليلى: آسفة. آسفة. يله أعوفج ترتاحين. كرصت خدها. يمه فدوة. شلون وجهه جنه كيمر. نيالك يا أخويه صبرت ونلت. غنى: لزمت خدي. توقعت وره أسلوبها اللطيف هذا اكو شي. وفعلاً طلع اكو شي. فهد: خلي هنا. أي عاشت إيدك. تفضل. : رحم الله والديك. فهد: ووالديك بالرحمة. سديت الجنطة وصعدت. دك موبايلي. غانم. الوو. غانم: السلام عليكم.

فهد: حركت. وعليكم السلام. شلونك. غانم: ليش نازل بدون إذن. صار أيام أخابرك ومترد. ليش. فهد: ليش يايوم أني نازل بدون ما آخذ إذن. ومنو كلك ما ماخذ إذن. صباح سجل اسمي قبل لا أطلع. ولو ما صارلتلي شغلة طارئة ما أنزل. غانم: هو صباح الي مبلغ عليك. والمشكلة مو هنا. صباح مبلغ المسوؤلين الفوك. واجتك عقوبة يا سيادة الضابط. فهد: لحظة لحظة. صباح هو الرفع شكوى عليه للوزارة.

غانم: أي نعم. وأني كل هذا ما أدري بي لحد ماخابرني المسوؤل البارحة. وكام يحجي عليك يكول عود هذا المعتمدين عليه هيج مستهتر بالوضع. لعد باقي الضباط شلون. فهد: لا يا م... سكتت. استغفر الله. اسمع. أني ما خايف من شي. ولو أريد أنزل وحدي ما خايف. لا منك ولا من صباح الوصخ. ولا من المسوؤل الفوك. بس أني ما نزلت وحدي. اخذت إجازة وسجل اسمي كدامي ياله نزلت. وأصلاً على أي أساس المسوؤل يصدكه بدون ميتأكد مني.

غانم: المسوؤل رايح حتى يتأكد ومالاكي اسمك بسجل الحضور. ومن شايف الغياب لاكيك بي وتأكد وخابرني. لعب لعب. وقدم بيك عقوبة. فهد: شنو العقوبة. غانم: أجه أمر بقطع 600 ألف دينار عراقي من راتبك. فهد: طز بيهم وبالراتب. أهم شي متمس العقوبة شغلي. وأني أعرف شلون أتصرف ويه صباح. والله لأطلع هال 600 من عينه. هالاخ الكح... لا إله إلا الله. اللهم أني صائم. غانم: اهدأ. لتصير عصبي. أنت التزم بموعد الالتحاق. وحاجي وشوف شيكلك.

فهد: أنعل أبو لابو اليحاجي. غانم: مو يشد وياك. فهد: طز بي وبعشرة من أمثاله. دخلي التحق وأعرف شتصرف وياهم. عباله الكو... من يقدم بيه عقوبة راح أخاف منه. أي والله رجف. غانم: لا واصل صيامك. أكلك أني خلي أروح. لا يروح صيامي. وأنت قبل لا تلتحق خابرني حتى أروح وياك. فهد: ماشي. سديته. يسويها وحدة بوحدة. الم...

شلون أني قدمت بيه عقوبة وكت الدز خبر وكال استشهدو. عود طلعها وحدة بوحدة. عباله أني جلب فلوس مثله. واهتم لو كطعو من الراتب. بس بسيطة. أنت جبتها لروحك. والله لأخليك تصيح الويل. وراتبك إذا ما أطيّره. أطلع كلب ابن كلب. وصلت للبيت. صفيت السيارة ونزلت. فتحت الباب ونزلت المسواك. دكيت الجرس. فتحوها. بتول: الله يساعدك. فهد: وخري عن وجهي. دخلت جوه. خليت الغراض بالصالة. متكومن تاخذن المسواك للمطبخ. شبييييجن صافنااات.

آلاء: أي أي صار. ساره: أباوعله. شكد شايل مسواك وغراض. صارت عيني على جسمه. ما عنده كرش مثل فيصل. حلو جسمه ومعضل. تخيلت شكله هو وغنى وهمه بفراشهم. وقارنتهم بوضعي أني وفيصل. استغفر الله. ساره شهالتفكير هذا. أعوذ بالله من ابليس. فهد: دخلت باقي المسواك وسديت السيارة. هاكم هاي علاكة الجهال. وهاي علاكة ورده. ايمان: عاشت إيدك بعد كلبي. ربي يخليك خيمة على راسي. فهد: بوجودج إن شاء الله. ساره: هاي العلاكة البأيدك المن.

فهد: لمرتي. ساره: هذا كله الها. فهد: لعد الي؟ شهالأسئلة السخيفة هاي. على كل شي تسألين. بطلي هالعادة. عفتهم وصعدت. ايمان: هذا شبي صاير عصبي. يمه فهد. فهد: درت وجهي عليها. ها يمه. ايمان: بيت جدك يجونه وره الفطور. فهد: صعدت. أي هله بيهم. وصلت للغرفة. فتحتها ودخلت. لكيت غنى كاعدة. غنى: الله يساعدك. فهد: ويساعدج. غنى: أباوعله كالب وجهه وضايج. بيك شي حبيبي. فهد: لا. غنى: لا بيك شي. ليش ضايج. فهد: بهدوء. مابيه شي.

غنى: علينة سيدي. تعلمني بيك. أحجي. فهد: قاطعتها بعصبية. مو كلتتتتت مابييييه. قزرقط لييييش تلحييييين. كوه تطلعيني ضايج. شهالالحاح هذااا. كافيييي. سكتي. غنى: بهدوء. آسفة. بعد ما أسألك. أخذت موبايلي بس حتى ما أصفن وأبجي. كولش استهضمت من كام يغلط ويصيح. يعني أني ما كتله شي. مجرد شفته مو على بعضه وسألته. ماكو داعي لهالصياح.

فهد: كمت طلعت ملابس الي. دخلت للحمام أسبح. دبكت من الحر. سبحت وطلعت. أباوع الساعة بالستة. بعد ساعة وشي يأذن. أعلّي السبلت لو بردانه. غنى: بكيفك. فهد: باوعتلها ورجعت عليته. كلعت التلفزيون وكعدت أقلب. قرب الأذان. كمت نزلت جوه. ايمان: هاك يمه راح يأذن. هذا فطوركم. انتظر. جاي أشوي معلاك لمرتك. لازمها تغذية. خلي أكمله وآخذه الها. فهد: ماشي. منذر: شبيك فهد. فهد: شبيك يعني. مرسوم على كصتي بستال. ومستغربين.

منذر: هسه شكتلك أني. وانهديت عليه. شدعوه عليك. فهد: ما جاوبته. مالي خلكه. بالي كله يم ابن الكح... صباح. سمعت الأذان. ورده: بعد وكت. أبو حلك الفاهي. لو مخلي الأذان على باجر. علي: حيوووانه. ميصير تحجين هيج. ورده: حجه. إيه. الله علي. منذر: خزرتها. كافي ورده بطلي مناكر. عيب. مو بكدج هو. ورده: دنكت راسي. يمه خفت منكم. أحم أحم آسفة. فهد: أخذت الصينية. عاشت إيدج. ايمان: سبع عافيات بعد كلبي.

فهد: صعدت فوك. فتحت الباب ودخلت. خليت الصينية فوك النايلونه. ورحت أشيلها. يله عوفي الموبايل و تعاي حتى نفطر. غنى: بهدوء. ما أشتهي. فهد: مو بكيفج. هو وراج علاج. أباوعلها ولا كان. جريت الموبايل. مو أحجيييي وياج. غنى: كتلك ما أريد. فهد: مو بمزاجج. يله تعاي. شلتها كعدتها على القنفة. مرتاحة هيج. غنى: لارد. فهد: هسسسسسه غير تحجيي. غنى: أي مرتاحة. فهد: تنهدت. خال الشوربة كدامها. يله أكلي. غنى: أباوعله. بده ياكل ولا كان.

فهد: ليش ما جاي تاكلين. هو عناد لو شنو. اكلي يله. غنى: أخذت الخاشوكة ودموعي نزلت. أني ما متعودة واحد هيج يعاملني. فهد: أباوعلها. دايرة وجها عني وحتى متاكل. اكلي معلاك. سوته الج أمي. يوووه تسمميييي. ولتكلبين الفطور عليه زقوم تره روحي طالعة. غنى: بدون ما أجاوبه. أخذته. مالي خلك المشاكل. فهد: انتبهت عليها. كامت تبجي. تنهدت. أعرف روحي دست بالحجي. خرب الك.... أني شجفصت. و وياها. مسحت إيدي. شو حبيبي باوعيلي. ليش تبجين.

غنى: دفعت إيده. ومسحت عيوني. مبيه شي. فهد: كمت كعدت كدامها. لزمت وجها ومسحت عيونها. أني آسف لأن صيحت عليج. بس أنتِ لحيتي عليه. وأني صاير عصبي. ما عندي قابلية أحجي. فطلعت حركتي بيج. ألف مرة كايلج من أصير عصبي لتحاجيني لحد ما أهدأ. ليش متسمعين الكلام.

غنى: بدموع. هو هذا أسلوب. أني شسويتلك غير من خوفي عليك أسأل. حتى أطمئن. أكدر أغلس. وحتى ما أسألك. وبالأول وبالتالي أنت تحجيلي. بس أني صوجي أصلاً ليش أدخل. من أكون أني ولا شي بالنسبة الك. حتى أتجرا وأسألك. فهد: بست راسها. حقج عليه. وشتكولين أني وياج. بس أني من أعصب أفقد. وأنتي تعرفيني. أكوم أخبط. يله حبيبي كافي بجي. غنى: مجاوبته. مسحت دموعي. فهد: يله أكلي. غنى: ما أريد. ولتلح عليه. ما أشتهي.

فهد: خلص. أني هم ما أريد. أخذت الموبايل ورجعت. جسمي على القنفة. غنى: أباوعله. صدك عاف الأكل. وهو كولشي ما ماكل. كوم أكل أنت صايم. فهد: بهدوء. ما أريد. انسدت نفسي. غنى: أخذت بالخاشوكة وقربتها عليه. يله أكل. بهدوء. خلص مزعلانه. بس أكل لتضل جوعان. فهد: رجعت الخاشوكة. بهدوء. سمعي. اجتني عقوبة وأمر بقطع قسم من راتبي. لأن نزلت. وبسبب واحد حقير محه اسمي من الإجازة. وقدم شكوى بيه للمسوؤلين. وصار الصار. غنى: وليش سوه هيج.

فهد: م... ابن كح... غير. غنى: احتقن وجها. متصيرله جارة. وميتوب من الفشار. وبعدين. فهد: صرت عصبي لأن تعاقبت بدون سبب. وأني ما مسوي شي. ولا أكثر. وأنتي اجيتي حاجيتني. وأني عصبي. ما كدرت. طلعت حركتي بيج. وصرتي بوجهة الدفع. وصدكيني كلشي كلته. لتاخذيه بعين الاعتبار. لأن أني نفسي ما أعرف شخبصت وياج. غنى: جنت تكدر تكول موضوع خاص. ما أريد أحجي بي.

فهد: بوقت العصبية ما أكدر أسيطر على نفسي. فأفضل أضل ساكت لحد ما أهدأ. وهاي أني من حجيت. شفتي شخصبت. حبيبي. غنى. روحي. مرة ثانية من تشوفيني عصبي. أصلاً لتحاجيني. لحد ما أهدأ. غنى: بهدوء. أصلاً بعد ما أدخل. يله كمل فطورك. صار أيام أشوفك متاكل بشكل صحيح. فهد: أني ما أريدج متدخلين. أنتِ ليش تحورين كلامي. أني أريدج تدخلين وتحجين. بس من أهدأ. ومو واني عصبي.

غنى: تنهدت. فهد أنت مدتفهم. أنو أني مرتك. مو وحدة من الجنت وياها. ولازم أسأل وأعرف شبيك مابيك. مو تدخل أو شي. وإنما إحنه متزوجين. وأسمنه روح وحدة. وما يصير نضم على بعضنه شي. وأني من حرصي وخوفي عليك لحيت عليك. لا أكثر. مجنت متوقعة حضايقك هيج. ولو أدري حتى ما أسألك.

فهد: ليش منو كالج الجنت وياها جان مسموحلهن يسألني عن أي شي يخصني. ما أريد أتطرق لمواضيع تضوجج. بس أني جنت ماخذهن أدوات أشبع رجولتي بيها. لا جنت أقبل يسألني وينك وشبيك أو ماشبه. هنه جم أخت وأخو عندي ميدرن مو أحجيلهن عن حياتي وعن البيه. وأني أقدر حرصج وحبج إلي. بس كلتلج أني وكت الي أضوج من شي. لحد يتقربلي. لحد ما أبرد. وأني أجي أنام بحضنج وأحجيلج. وعلى فكرة أنتِ الوحيدة الي أسمحلها تكعد وتتناقش ويايه. لو وحدة غيرج ما جان بررت ولا حتى حجيت. تزعل تزعل. هي واللابسة برجلي. اله أنتِ. أنتِ روحي. اكو واحد يكدر يزعل روحه. جاوبيني.

غنى: هزيت راسي. لا. فهد: خلص لعد ياروحي. أني ما أريدج تزعلين مني. وعسى بالموت الي يضوجج وينزل دمعة من عيونج الحلوات. حتى لو جنت أني. زين. غنى: اسم الله. لتحجي هيج. فهد: متقبلين. غنى: طبعاً ما أقبل. لتدعي على روحك. فهد: أروح فدوة للي ميقبل عليه. يله خلي نتصاحب على كولتج. غنى: مديت أصبعي. فهد: لا حبيبي. صلح الإصبع هذا من جنتي ما متزوجة. أما هسه أني ما أقبل بمشابكة الأصابع. غنى: لعد.

فهد: شنو رأيج نسوي صلح جديد بيناتنه أني وياج اسمه صلح الشفايف. نشابك شفايفه سوه. ونكدر نعتبر هذا لغز نتصالح بي لو تعاركنه. يله أنتِ بادري. لأن بردتي الأكل وحرمتيني من الفطور. غنى: أباوعله يأشر على شفايفه. مستحيل. فهد: إذا ما بستيني باجر ألتحق وأعوفج. والله. غنى: فهد رجاءاً. مالها داعي هالسوالف. فهد: الموضوع غير قابل للنقاش. تبوسيني. ما أروح. متبوسيني. منا للوحدة ألتحق. والخالقج واني عد حجايتي. وأنتي تعرفين.

غنى: خلص. ألتحق بكيفك. فهد: ماشي. لعد خلي أخابر جماعتي أكلهم يجوني. غنى: أباوعله دك صدك. جريت الموبايل منه. خلص لتدك عليهم. فهد: سديته. يله. غنى: باوعتله. زين. خلي أبوسك بخدك. فهد: بوست الخد هاي خليها للنسوان اليجن يزورنج. أما أني مترويني غير من الحلك. غنى: تقربت عليه. يعني مصر. فهد: مليار بالمية. غنى: أباوع لشفايفه. هسه لو محترمة نفسي ومزعلانه من البداية مو أحسن. فهد: يله استعجلي. غنى: غمض عيونك.

فهد: كلبت عيوني. الله يساعد كلبي عليج. بعد جم يوم. غمضت عيوني. يله. غنى: أباوعله غمض عيونه. تقربت عليه. غالقة كل مسافة بينه. حسيت بإيده على خصري. قربت شفايفي على شفايفي. بسته بشفته بسرعة وابتعدت. بس إيده مقيدني. فهد: بخفوت. بعد وحدة. غنى: كافي فهد. مو كل شوية. متشبع أنت. فهد: بهمس. ب ع د و ح ده (بعد وحدة) . سويها برضاج أحسن ما آخذها غصباً عنج.

غنى: باوعتله. بعد مغمض. رجعت بسته على كيفي. حسيت بي حرك شفايفه. رجفت جسمي. اجيت أبتعدت بس ما كدرت. ما أعرف شنو الخلاني أبادله. وأني أصلاً ما أعرف شلون يبادلون البوسة. حسيت بلسانه يطخ بلساني. كزبر جسمي وحسيت على نفسي وابتعدت بسرعة.

فهد: سندت راسي على راسها. ورب العزة. أجمل صلح مر عليه من انولدت بهاليوم. فتحت عيوني. شسويتي بيه. دمرتيني. أنتِ أول مرة أجرب شي وأريد أعيده مرة واثنين وعشرة. وما أمل ولا أريد أبتعد أبد. أعترف أني أعلن نفسي أسير لشفايفج. ومن هاللحظة هاي. غنى: كلامه خلى كلبي يرفرف ويدك بسرعة. أنت تحبني. فهد: حضنتها. الحب كلمة سخيفة برأيي. متعبر عن شعوري.

غنى: ابتسمت بحضنه. أحس دفو الدنيا كلها بضلوعه. ابتعدت. يله حبيبي. انسى الصار. وكعد أفطر. فهد: أني فطرت. أطيب فطور. تردين فطري أنتِ.

غنى: بخجل. خلص يله خلي ناكل. كعدنه نفطر. وهو تغير مزاجه ورجع يبتسم. وكل شويه يوكلني حتى ما أكل. اكتشفت شغلة بفهد. أنو لو مزاجه حلو ومرتاح. حتى صوته مينسمع. أما إذا صار عصبي. فعيونه تصير جمر. عبالك حمم بركان. ويضل ساكت. وشرايينه تبين. بالأضافة للي يتقربله يكون يومه أسود. وهذا الشفته بي اليوم فعلاً. شخصية فهد غريبة عجيبة. وما جذبت من كلت شخصيته صعبة الفهم. كملنه فطور. وهو كام غسل وأجه. أخذني للحمام. غسلي وخلاني أتوضأ. عبالك طفلة كدامه. شالني كعدني على الكرسي حتى نصلي. وراح نزل الصينية وشرب جاي وأجه. فرش سجادته وكف بدينه نصلي. كملنه وكعدنه نقره قرآن بحدود التسعة. كملنه. اندكت الباب. طلع فهد يفتحها.

فهد: هاا ليلى. ليلى: أجو بيت جدي. خلي مرتك تبدل. راح يصعدون فوك. فهد: ماشي. دخلت. تعاي. شلتها كعدتها على الجرباية. أباوعلها جانت لابسة دشداشة سمائية. بدليها. غنى: ليش. فهد: طالعة حلوة بيها. غنى: لعد إذا حلوة ليش تريدني أنزعها. فهد: ها. خليج لابستها. اندكت الباب. طلعت فتحتها. شفت كل نسوانه كبالي. النسوان: السلام عليكم. فهد: وعليكم السلام. نورتو. تفضلو. شلونج حجية. ياسمين: هله بيك بعد كلبي.

غنى: طبن نسوان عم فهد وبنات عمه. والحجية وعمته. وباقي البيت. بوسني وتحمدلي بالسلامة. ماعدا أم مرتضى ومروة. الي أصلاً مسلمت. كالعادة. وأني ما أحاجيها. ياسمين: اللهم صلِ على محمد. وجهج منور. ومبينة متحسنة. عيني باردة عليج. نسرين: يعني هذا شكل وحدة مسوية حادث. والله عمي أنتِ أصحى مني. ورده: قل أعوذ برب الفلق. راحت البنية. ايمان: خزرتها. صوتج. ملك: حبيبتي الف سلامة. متشوفين شر. غنى: الله يسلمج حبيبتي.

شهد: بشقة. شفتي أنتِ وذيج الغبرة خربتن حفلة عيد ميلادي. غنى: حقج. شهد: أشاقة وياج حبيبتي. فدوتج العيد ميلاد. ولا يهمج. مروه: شلونك فهد. فهد: هله. أجو الولد لو لا. ياسمين: لا بيبي. أجينه مشي. فهد: كعدت. ها. نسرين: أكول عمه. ليش غرفتك وصخة. هاي عود أنت ابو النظافة. هيج. فهد: باوعت. وين الوصاخة بالموضوع. نسرين: الغرفة بيها تراب. وأنت تشيرتك أملح. شنو فلوسك قليلة عمه. لو مرتك بس تتكشخ ولابستلي قصير ومطلعة زرورها.

حياه: أم مرتضى شجاج. فهد: لحظة. من رخصتج. أولاً الغرفة لونها ترابي وجوزي. يعني مو وصخة. هذا لونها. وثانياً التشيرت لونه كحلي مو أملح أو وصخ حسب كلامج. وثالثاً مرتي مطلعة رجليها مو زرورها. وأكو فرق. الزر هو الفخذ. مو الرجل. حقيقة أنتِ معلوماتج جداً ضعيفة. أنصحج تقرين معلومات عامة. نسرين: معلوماتي مابيها شي. مرتك مطلعة جسمها. بدال ما تحاسبها تدافع لها.

فهد: بهاي صدكتي. صدك المفروض متطلع رجليها. لأن رجليها مراية. ومو كل واحد يستحق يشوفها. فاني وياج. غطي رجليها. المجبسات يمه. غنى: أشرتله. كافي. لتدوس بالحجي. بقو للوحدة وطلعو. أباوع لفهد. كعد يقرأ قرآن. عفته براحته. تمددت ونمت. فهد: ضليت للفجر أقرأ قرآن. وصلت للجزء 25. مابقا شي وأختمه. لأن بكل صلاة كمت أقرأ جزء. كاعد أقرأ وسمعت غنى تصرخ. كمت ركض. **********يتبع.