رواية توم وجيري الفصل الأول 1 - بقلم روان سالم

عريــس؟؟؟! عريس يا آسية يا بنت سناء القرعة؟ عريس مين يا بت؟! ها؟! قالت آسية وهي بتجري في الأوضة وبتحاول تهرب منه. محسسني إن سناء دي أمي لوحدي، الله! وقف ورفع إيده للسما بحركة عفوية وهو بيقول. ربنا يرحمها ويبشبش الطوبة إللي تحت راسها، كانت بتتوحم على توم وجيري وهي حامل فينا. طب أهدى بس يا توم قصدي يا أبيه والله ما أعرفه ده واحد وقفني في الجامعة وقالي أقولك إنه هيجي بليل. قالك كدا بس يا آسية؟! قالت بحمحمة.

هو مش أوي يعني هو قال كام كلمة قبلها كدا. قاطعها آسر وهو بيقرب منها بسرعة وغضب. كام كلمة يا بنت ال... صرخت جامد وهي بتهرب منه في آخر ثانية وبتدخل أول أوضة جات قدامها وهو بيحاول يفتح الباب من برا وهي مش سامحة بكدا. بقـا تخونيني يا آسية. قالت آسية بصوت عالي من جوا. أخونك ايه هو إحنا متجوزين!؟؟ فوق يا آسر أنت أخويا يا حبيبي. أخوكي الكبير؛ يعني تحترميني وتحترمي رأي وكلمتي.

قالت وهي بتبعد عن الباب وبتحط إيدها في وسطها كأنه شايفها. وحياة أمك؟ أنت أكبر مني بخمس دقايق، أوعى تاخد مقلب في نفسك يالا؛ إكمني بقولك يا أبيه في الرايحة والجاية وكدا يعني، ده أنا بقولك كدا عشان مش بالعة آسر، تحسه إسم حلو كدا ومش لايق عليك. بص للباب بصدمة وثواني وزق الباب جامد بكل جسمه ومسكها من إيدها جامد وهو بيقول بعيون بطلع شرار وبدأ يرفع صوابعه وهو بيعد قدام عنيها.

تعادي بالألفاظ في "وحياة أمي"، وتطاول باللسان في" تاخد مقلب في نفسك"، وسخرية في "إسم حلو ومش لايق عليا"... تفتكري أعمل فيكي ايه؟ بصيتله بعيون قطط وهي بتقول. تـجوزني وتخلص مني؟ صرخ بغيظ وهو بيبعد عنها وبيخرج برا عشان ميقتـ.ـلهاش في لحظة تهور. خرجت وراه بسرعة وهي بتقول. طب أستنى بس، يعني أجهز عشان العريس ده ولا ايه؟