جاء يوم الفرح، والمعازيم تملأ القاعة، وآسر يجلس بجمود، ومازن يقف في آخر القاعة مع صديقه عزمي حتى لا يتحدث مع أبيه، فهو أخذ منه موقف. ومايسة ودنيا ترحبان بالضيوف النساء. تملأ الزغاريد المكان والطبل وعروض زفة العرسان، ولكن يتفاجأ الجميع بمروان وبيده نورا العروس بفستان رائع ضيق من أعلى وينزل باتساع لأسفل وحجاب مطرز. والمفاجأة الأكبر آية تنزل خلفهما وهي تمسك طرحة العروس والفرحة تملأ وجهها.
وقف الكل متصنم من المفاجأة، حتى آسر وقف. اتجه العروسان للكوشة وجلسا، وقفت آية بجوارهما وأطلقت زغرودة مدوية.
ضحك مازن بشدة: أختي دي ملهاش زي، أنا متأكد إن كل دا من تخطيطها.
عزام: وإنت فرحان بيها؟ دي يتخاف منها.
مازن بفرحة: ودا يسعدني.
عند آسر، يقف جواره أحمد بسعادة: عمرك شفت زوجة تفرح لزوجها كدا؟
آسر وهو سرحان: المشكلة إن قوتها دي بتعلقني بيها أكتر.
أم مازن تجلس كما هي مصدومة، لا تعرف هل من المفروض تحزن أم تسعد. عصام ذهب إليها يجذبها من ذراعها: إيه اللي بتعمليه دا؟ مش دا جوزك؟
آية بابتسامة: حضرتك جوزتني باختيارك، عاوز إيه دوقتي؟
وتركته لتعود بجوار العروسين، وجدت مايسة قادمة عليهما ووجهها لا يبشر بالخير، وقفت أمامها: ما تحاوليش تعكري سعادتهم، حضرتك شوفتي اللي عملتيه قبل كدا لما فرقتيهم؟ حصل إيه؟ ضيعتي من عمر ابنك 11 سنة ضايع وكاره وجوده جنبكم.
تسمرت مايسة، أكملت آية: مالها نورا؟ بنت زي القمر وعلي خلق وحتسعد ابنك، عاوزة إيه أكتر من كدا؟ لولا اللي عملتيه، كان زمانك فرحانة بأحفادك حواليكي، اطلعي باركيلهم وخلي فرحتهم تكمل.
صعدت مايسة بتباطؤ، وقفت أمامهم، وقفا مروان وعروسه أمامها. وبعد قليل من الصمت، احتضنت مروان: ألف مبروك يا حبيبي. ثم نظرت لنورا بتكبر الذي لا تستطيع التخلي عنه: مبروك، أتمنالكم السعادة، بس قدامك سنة لو ما جبتيليش حفيد، حيكونلي موقف تاني معاكي.
ضحك مروان: مايسة هانم هي هي، لازم تدي تعليماتها، بس حبيبتي يا أمي، أنا أتمنى طفل طبعًا من حبيبة عمري، بس في كل الحالات وجودها معايا بالدنيا.
ذهبت آية لمازن: إيه رأيك فيه يا ميزو؟
مازن احتضنها: أنت خلاص ما يتخافش عليكي.
آية عملت حركة كأنها تعدل لياقتها: أومال يا ابني، دا أنا آية.
عزمي متدخلًا: إنت فعلًا ما يتخافش عليكي، بس يتخاف منك.
نظرت له آية باشمئزاز: طب خاف بقى. ثم نظرت لمازن: عن إذنك يا ميزو حشوف جوزي وعروسته لو عاوزين حاجة.
وتركتهم مع ضحكة مازن وغضب عزمي.
قاطع طريقها آسر مبتسمًا: مبروك لجوزك.
آية بسعادة: الله يبارك فيك.
آسر: وحتطلقي منه امتى؟
آية: يا ساتر يا رب، حد يقول كدا؟ دا مرمر قرة عيني.
وتركته يقبض على يديه من شدة غضبه. أتى له أحمد الذي كان يتابع من الخلف: بتحط نفسك في مواقف بايخة.
آسر: أنا متأكد إني حتجنن على إيديها.
انتهى الفرح وركب العريس والعروس سيارة مزينة بالزهور والبالونات وركبت آية بالأمام مع السائق وخلفهم الزفة. قبل أن يركب مازن مع صديقه جاءه والده: عجبك عمايل أختك دي؟
مازن: هي عملت إيه؟ مش مروان دا اختيار حضرتك؟ عن إذنك عشان ألحق زفة جوز أختي.
انتهت الزفة ووصلوا لفيلا حاتم ومروان متجه للسلم بعروسه وخلفهما آية تمسك طرحتها.
حاتم: استني يا عريس، ممكن أفهم إيه اللي بيحصل وأي لعبة بتلعبوها؟
مروان: هي دي مبروك بتاعة حضرتك بعد طول صمت؟ عامة الله يبارك فيك.
وصعد السلم. دخل غرفته ومعه العروس وآية.
آية: طب عشان ما أطولش عليكم، احنا على اتفاقنا.
مروان بابتسامة: أكيد طبعًا وتأكدي يا آية، إنك أخت لي وأي وقت تحتاجيني حتلاقيني جنبك.
نظرت آية لنورا التي تقف متوترة: المهم نورا تكون فهمت الوضع، أنا كل اللي عاوزاه مروان ما يطلقنيش غير لما أنا أطلب منه، عشان ما ألاقيش بابا ولا عمي عاملين لي حاجة جديدة، وتأكدي إن جوازي من مروان مجرد اتقاء مشاكل بس، وأنا حكيتلك كل حاجة.
نورا بابتسامة: أنا متفهمة دا كويس جدًا ما تقلقيش.
آية: طب أسيبكم بقى، ألف مبروك.
مروان: هو مازن تحت؟ لو لسه ما وصلش استني لما ييجي.
آية: لا دا كان ورانا على طول بعربية صاحبه.
وخرجت، مجرد أن خرجت وابتعدت قليلًا، وجدت من يسحبها من يدها لإحدى الغرف.
آسر: رايحة فين وسايبة بيتك؟
آية وقد أحست أنه يتهرب من كلمة "زوجك": آه قصدك بيت جوزي.
كز على أسنانه: حتطلقي منه امتى؟
آية: اخص عليك، ليه الفال الوحش دا؟
آسر: أنا عارف إن كل دا لعبة وإنتي اللي بتتحكمي فيها بصوابعك.
آية: أنا؟ دا أنا غلبانة.
وتركته وخرجت.
آسر: برضه آخرك في حضني.
نزلت آية وخرجت مع مازن، وجدت عزمي ينتظر بالخارج بالسيارة.
آية: جبت شنطي معاك من أمانة الفندق؟
مازن: أيوه، في شنطة العربية يالله بينا.
ركبت آية بالخلف ومازن ركب بالأمام بجوار عزمي واتجهوا إلى الإسكندرية.