رواية زواج اضطراري الفصل الثاني 2 - بقلم أروى عادل

(فجأة شعرت جيلان بتعب ثم فقدت الوعي) عمر: مالك ياما؟ ماما... بابا اطلب الدكتور. بعد ما فحص الطبيب جيلان. عزت: خير يا دكتور؟ الدكتور: إحنا مش اتكلمنا قبل كده؟ قولنا التوتر لأ، على أقل الفترة دي. عزت: والله هي اللي بقت تتعصب من أقل حاجة. عمر: يعني هي عاملة إيه دلوقتي؟ الدكتور: هي كويسة دلوقتي، بس أرجوكم بلاش تتعرض لأي ضغط عصبي الفترة دي. عن إذنكم. عمر: اتفضل يا دكتور. هنا جاءت شيري بخوف وقالت: شيري: مالها ماما؟

جيلان: ما تخافيش يا حبيبتي، أنا كويسة. إيه يا عمر رأيك في الموضوع اللي اتكلمنا عليه؟ عمر: موضوع إيه؟ جيلان: اللي اتكلمنا فيه من شوية، لحقت نسيت؟ عمر: آه افتكرت. طيب بعدين يا ماما نتكلم، انتي تعبانة دلوقتي. جيلان: أنا عايزة أسمع ردك دلوقتي، ريحني يا عمر. عمر: حاضر. بس ارتاحي بقى. جيلان: كلم الناس يا عزت. شيري: هو في إيه؟ عزت: عمر مسافر الأسبوع الجاي، يبقى نتكلم بعد ما يرجع من السفر.

جيلان: أنا لسه هستنى عمر لما يسافر ويرجع، انت عارف عمر بيطول في السفر. عزت: حاضر، هكلمهم. ممكن تهدّي شوية بقى. عمر: طيب عن إذنكم. وسلامتك يا ماما. *** الصعيد في بيت حمدان التهامي. أحكام: عمي، أنا رايدة أتحدت معاك. حمدان: عايزة إيه دلوقتي؟ أحكام: انت خابر إن عيال حنان متعلقين بأروى، وهي دلوقتي تاركاهم ورايحة على المدرسة. حمدان: واه، وإنتي بدك أعمل إيه دلوقتي؟

أحكام: أنا بجولك مالهاش عازة المدرسة، هو من ميتا البت بتتعلم؟ حدانا. حمدان: إنتي جاية دلوقتي تجول بلاها تعليم لأروى عشان عيالك؟ توفيق خابر حديثك ده؟ أحكام: إنت خابر توفيق ماراضيش حد يتحدت في موضوع تعليمها واصل. حسين: أنا مع أحكام، أنا مش خابر ليه توفيق موقّف رأسه في موضوع تعليم أروى؟ من ميتا إحنا بنعلم بناتنا. حمدان: أنا أديت توفيق كلمة في موضوع تعليم أروى، وطول ما هو رايد يعلم أروى، أنا ماليش صالح بيها واصل. ***

صفية: تعالي أهنه. إنتي خابرة أحكام بتعمل إيه حدا جدك؟ أروى: عارفة. صفية: بقى ما تعرفيش جدك قالها إيه؟ أروى: عرفت. صفية: واه، مين جالك؟ أروى: مرات عمي نعمات. صفية: يا أبوي، هي لحقت تعرف ميتا؟ أحكام: خير، بتتحَدّتوا على مين؟ صفية: لا، ما فيش يا أحكام. أحكام: وست الدار قاعدة أكدا ليه؟ ما فيش حاجة تعمليها. أروى: للأسف ما فيش. أحكام: ما فيش إزاي؟ قومي اعملي أكل لعيال حنان. أروى: حاضر. إيه خدمة تاني؟

أحكام: إنتي بتتحدتي معايا أكدا كيف؟ أروى: هو أنا اتكلمت، أهو. هخرس خالص في حاجة تاني؟ صفية: في إيه يا أحكام؟ ماتسيبي البنية في حالها. أحكام: ما فيش حد مقوّي جلب البت دي غيرك يا صفية. صفية: يعني هيبجى أنا والزمن عليها؟ كفيها عاد يا أحكام. *** توفيق: إيه الحديث اللي سمعته النهاردة في الدار؟ أحكام: حديث كيف يعني؟ توفيق: إنتي اتحدّتِ مع أبوي على موضوع تعليم أروى تاني؟

أحكام: أيوه، أنا شايفه إنه مالهوش عازة. كل شوية رايحة المدرسة وجاية من المدرسة، بعد أكدا هتكون إيه يعني؟ آخرتها هتتجوز وتجعد في الدار. توفيق: اسمها كلية مش مدرسة. بعد أكدا هتكون دكتورة. واسمعي يا أحكام، عليا الطلاق منكِ لو اتكلمتي في موضوع تعليم أروى تاني هتكوني طالق بتلاتة، فاهمة؟ أحكام: واه، هي حصلت؟ توفيق: جلتلك قبل سابق، وجولها تاني. العالم كله في كفة، وأروى لوحدها في كفة. كفاية شايف بتتعاملي معاها كيف وأنا ساكت.

أحكام: عندك حق، ما هي بنت أمها، ومعزتها من معزة أمها، مش أكدا؟ توفيق: بالظبط أكدا. معزتها من معزة أمها. كويس جوي إنك خابرة أكدا زين. *** إبراهيم: جدي، أنا بدي أتحدت معاك. حمدان: خير. إبراهيم: أنا عايز أتجوّز أروى بنت عمي. حمدان: واه، إنت كمان؟ إبراهيم: تقصد إيه يا جدي بـ "بأني كمان"؟ حمدان: فارس ابن عمتك صفية طلبها مني. إبراهيم: بس أنا ابن عمها وأحق بيها. حمدان: روح دلوقتي، ونتحدّت بعدين.

خرج إبراهيم، وهو واضح الحزن على ملامحه. توفيق: هو ماله إبراهيم؟ طالع من حداك زعلان؟ حمدان: بدو يتجوّز أروى. توفيق: وإبراهيم كمان؟ هو ما خابرش إن جمال أخوه طلب يديها؟ حمدان: لا، أكيد ما خابرش. اسمع يا ولدي، عندك جمال، وفارس، وإبراهيم. شاور روحك وقولي هتوافق على مين لبنتك؟ توفيق: هسأل أروى الأول. حمدان: واه، من ميتا وإحنا بناخد رأي البنية في حاجة زي أكدا؟ توفيق: ده شرع ربنا يا أبوي، وحقها.

حمدان: دلوقتي أهم حاجة، بكرة تقول لي اختارت مين فيهم عشان نخلص، بعد ما تشاور بنتك. *** توفيق: تعالي يا أروى، عايز أتكلم معاكي. أروى: والله إنت ملخبطني شوية تتكلم باللهجة الصعيدية، وشوية تتكلم عادي زي أنا. توفيق: معلش، بحكم شغلي بسافر كتير، عشان كل واحد بكلمه باللغة اللي بيفهمها. المهم، أنا كنت عايزك في موضوع كده. أروى: نعم يا بابا؟ توفيق: دلوقتي جمال وإبراهيم وفارس، ثلاثة متقدمين ليكي. المفروض تختاري واحد فيهم.

أروى: بس يا بابا، دول ثلاثة بعتبرهم إخواتي. توفيق: اسمعي يا أروى، إنتي عارفة جدك، هو قال لي أشوفك تختاري مين من التلاتة. أروى: بابا، أنا لسه قدامي تلات سنين طب، ده غير السنة دي كمان. أنا مش عايزة أتجوز دلوقتي غير لما أخلص دراستي. توفيق: يا بنتي، ما فيش حد هنا هيوافق تفضلي الفترة دي كلها من غير جواز. دي عاداتنا يا أروى. أروى: يعني مكتوب عليا أعيش طول عمري كده؟ قالت جملتها، ثم بدأت تنهمر الدموع على خديها.

توفيق: طيب، بتعيطي ليه دلوقتي؟ أروى: عشان مش عايزة أتجوز حد فيهم. توفيق: طيب، أدي نفسك فرصة تفكري، بعد كدا نشوف. *** جمال: إنتي رايحة فين دلوقتي؟ أروى: رايحة أدي الشاي لجدّي. جمال: واه، وشعرك ظاهر ليه أكدا؟ أروى: ما هو ما فيش حد غريب بره، كلهم ولاد عمّي وعمّتي. جمال: بردوا، البسي حاجة على راسك، واحترمي نفسك إنتي وماشية. أروى: على فكرة، أنا محترمة. عن إذنك. مشيت خطوتين. فارس: وإيه جمال كان بيقول لك إيه؟

أروى: وإنت كمان؟ ولا حاجة. فارس: ولا حاجة كيف؟ ما بشوفش إني إياك. المهم، أنا مش جولت قبل سابق تلبسي هدوم واسعة عليكي؟ أروى: حاضر، هلبس حاجة أوسع، وهلبس حاجة على راسي، وهحترم نفسي. في حاجة تاني؟ تركته، ثم مشيت كمان خطوتين. إبراهيم: إنتي حكايتك النهاردة، كل شوية هتوقفي مع واحد؟ وبجولك إيه؟ إني مابديش أكدا. أروى: يالهوي، إنتوا عايزين إيه النهاردة؟ من غير ما تتكلم. حاضر، حاضر. في حاجة تاني؟

إبراهيم: واه، هو إني جولت لك حاجة؟ *** صفية: مالك يا بت أخويا؟ أروى: تعبت يا عمتي، واتخنقت. صفية: واه، ما تجولي في إيه؟ أروى: موال كل يوم، جمال وإبراهيم، حتى فارس ابنك. صفية: طيب، اختاري واحد منهم واخلصي. أروى: حتى إنتي يا عمتي؟ أحكام: إنتي يا بت يا أروى. أروى: نعم؟ خير؟ أحكام: جومي جهزي العشا. أروى: بس النهاردة العشا مش عليا. أحكام: مش عليكي، بس أنا بدي إنتي اللي تعملي العشا. بعد أكدا تحمّي عيال حنان قبل ما ينعسوا.

صفية: خليكي أهنه يا أروى، إنتي تعبانة، أنا اللي هعمل العشا. أحكام: إنتي بتجويها عليا أكدا يا صفية؟ صفية: بجويها عليكي كيف يعني؟ كل ده عشان حاولت إني اللي هعمل وكل العسل؟ أحكام: لع، بس إنتي أكدت بتكسري كلمتي. أروى: خلاص، هنا. هروح أعمل العشا. عايزة حاجة تاني يا مرات بابا؟ مش عايزة أروح أولّع في نفسي عشان ترتاحي؟ أحكام: والله تكوني ريحتي. صفية: كفايكي عاد يا أحكام، أكدا كتير. نعمات: سمعتوا الأخبار الجديدة؟

صفية: في إيه يا بومة؟ نعمات: أخو علاء اتقدم لأروى، رايد يتجوّزها. *** إلى اللقاء في الجزء الثالث