رواية زواج بالاجبار الفصل الحادي عشر 11 - بقلم فريدة احمد

ريم خرجت من الشقة بسرعة ونزلت وقفت تاكسي وركبت فيه. سواق التاكسي: هتروحي فين يا آنسة؟ ريم: المقطم. وقالت له على العنوان بالظبط. والسؤال وصلها مكان ما قالت. وبعد وقت ريم نزلت من التاكسي بعد ما حاسبت. ووقفت أمام مركز التجميل اللي هي شريكة فيه مع صاحبتها داليا. ريم اتنهدت ودخلت وهي بتبص على المكان ببتسامة حزن. في الداخل. نهى: بنت من اللي بيشتغلوا في المكان أول ما شافتها قربت عليها وقالت لها ببتسامة: آنسة ريم ازيك؟

ريم: ازيك يا نهى. عاملة إيه؟ نهى: كويسة الحمد لله. حضرتك أخبارك إيه؟ وليه مش بتيجي المركز بقالك فترة؟ ريم: كنت تعبانة شوية. نهى: ألف سلامة. ريم ببتسامة: الله يسلمك. ريم سلمت على كل الموجودين اللي أول ما شافوها كانوا مبسوطين جدا. ريم: أمّال فين داليا؟ البنات قالوا لها إن داليا في الدور التاني. ريم هزت راسها وطلعت. داليا أول ما شافتها سابت اللي في إيديها وجريت عليها وحضنتها. داليا: كنتي فين يا ريم؟ ليه كل شوية بتختفي؟

قولتيلي إنك هتجيلي امبارح ومجيتيش ولما حاولت أكلمك لقيت تليفونك اتقفل. ريم بتعب: تعالي ندخل جوه. داليا بعد ما دخلوا وقفلوا الباب قعدت قدامها وقالت لها: مالك ياريم في إيه؟ ريم مرة واحدة اتفتحت في العياط. داليا بقلق: مالك بس ياحبيبتي؟ وقربت منها وحضنتها. داليا: في إيه؟ متقلقنيش عليكي يا ريم. ريم بعدت وقالت لها: أنا تعبانة أوي. داليا مسكت إيديها وقالت لها: حبيبتي ممكن بس تفهميني مالك فيكي إيه؟

ريم هزت راسها وقالت لها: هقولك عشان حاسة إني تايهة. ريم مسحت دموعها وبدأت تحكي لها على كل حاجة وكل اللي عملوه معاها حازم من وقت ما شافها في القسم لحد ما اتجوزها. وتهديده ليها إنهم هيأذوها لو ما سمعتش كلامه. داليا وهي حاطة إيديها على بوقها ومصدومة من اللي بتسمعه: معقول في إنسان بالحقارة دي؟

ريم بدموع: أنا اتدمرت ياداليا. ضحك عليا وفهمني إني مش بنت وإن تقرير الطب الشرعي أثبت إن حصل بيني وبين الحيوان التاني ده علاقة وأنا صدقته. منا كنت متخدرة ومكنتش حاسة بحاجة. أنا مش عارفة أعمل إيه. حاسة إني في كابوس حياتي كلها اتقلبت مرة واحدة. ريم: والحيوان مش مكفيه كل اللي عمله فيا وبيقولي إن أميرة هي اللي لبستني القضية دي. ريم بحيرة: أنا مش مصدقة. هي أميرة ممكن تعمل فيا كده بجد؟ داليا

اتنهدت وقالت لها بهدوء: صدقي ياريم. ريم بصت لها بصدمة قبل ما داليا تكمل وتقولها: أميرة فعلاً هي اللي عملت فيكي كده. هو مش بيكذب عليكي. ريم بعدم تصديق: انتي بتقولي إيه؟ أميرة أختي وصحبتي هي اللي عملت فيا كل ده. طب إزاي؟ وليه؟ ريم: أنا مش فاهمة حاجة. داليا: بصي يا ريم أميرة بتغير منك ومن زمان. بس أنا بردو مكنتش متصورة إنها هتوصل بيها السفا.لة وتعمل فيكي العملة السودا اللي عملتها دي.

ريم وهي في حالة زهول: طيب وانتي عرفتي إزاي إن هي السبب؟ داليا: سمعتها بوداني وهي بتكلم المحامي واتأكدت إنها هي ورا كل اللي حصل ده. داليا: انتي متعرفيش كانت عاملة إزاي لما عرفت إن انتي خرجتي دي كانت هتتجنن إن خطتها فشلت. ريم وهي بتهز دماغها من اللي بتسمعه: أنا مش مصدقة. أميرة! وضحكت بسخرية على غبائها وهي بتقول: يعني كل اللي حصلي ده من صحبة عمري. وانتي إزاي كنتي عارفة ومقولتيليش؟

داليا: أنا لسه عارفة من يومين. وهو ده الموضوع اللي كنت عايزة أحكيهولك لما كلمتك امبارح بس انتي اللي اختفيتي. ريم: أنا مش عارفة ألاقيها منين ولا منين. من حازم الزفت ولا من أميرة اللي لحد دلوقتي مش قادرة أستوعب إنها هي اللي عملت كل ده. ولا من فارس اللي طلع معندوش أي ثقة فيا. ريم: انتي عارفة أنا حاسة إيه دلوقتي. أنا اتخدعت في أكتر اتنين قريبين ليا. انتي متخيلة. حبيبي وصحبتي.

داليا: عارفة إنها حاجة صعبة. بس صدقيني الاتنين ما يستاهلوش إنك تزعلي نفسك بسببهم. داليا: وبعدين انتي متخيلة الزبالة أميرة دي عملت كل ده ليه؟ ريم بضياع: مش عارفة. مش عارفة إيه السبب اللي ممكن يخليها تأذيني بالطريقة دي. داليا: عشان بتحب فارس ياريم. وطبعاً هي اللي شككته فيكي. تعرفي إنها بقت بتقابله كل يوم. ريم: كفاية. كفاية أنا عايزة ما أسمعش اسمهم تاني. ريم قامت: أنا لازم أمشي. داليا: طيب انتي ناوية تعملي إيه؟

ريم: في إيه؟ داليا: هتعملي إيه مع جوزك ده؟ ريم بتعب: مش عارفة. بس مش هرجعله. داليا: أمّال هتروحي فين؟ ريم: أنا هسافر شرم الشيخ لماما. داليا: وتفتكري هايسيبك؟ ريم: عارفة إنه مش هيسيبني بس أنا حالياً مش عايزة أشوف وشه. داليا: بصي ياريم أنا معاكي إن حازم ده حيوان وواطي. بس أنا شايفة إن هو الوحيد اللي يقدر يحميك. ريم: يحميني من مين؟ أنا محتاجة اللي يحميني منه.

داليا: أنا حاسة إن هو مش هيأذيكي. اللي عمله معاكي ده واصراره عليكي بيقول إن هو بيحبك. ريم بسخرية: بيحبني؟ وليه متقوليش إن إصراره ده عشان هو إنسان مريض وأنانى أهم حاجة إنه يحقق رغبته وبس. داليا: لا ياريم أنا متأكدة إن هو حبك والدليل على كدة إن هو اتجوزك. ريم: اسكتي ياداليا انتي مش فاهمة حاجة. اللي زي حازم ده ميعرفش يحب. دا اتخلق عشان يأذي بس.

داليا: على فكرة بقا لو هو فعلاً كان عايز يأذيكي كان خد منك اللي عايزو من غير جواز وزي ما بتقولي بني آدم بجبروته ده مكنش هيفرق معاه غير رغبته وبس. ريم: ليه حاسة إنك بتدافعي عنه؟ داليا: أنا مش بدافع عنه أنا بس بقولك فكري كويس أنا مش عايزكي تخسري كل حاجة. ريم بيأس: أنا خلاص خسرت كل حاجة. يلا أنا همشي أنا بقا. وقامت. داليا: هتسافري؟ ريم: أيوه. داليا: أنا من رأيي متسافريش من وراه. أنا خايفة عليكي. ريم وهي بتاخد

شنطتها من على الكرسي: متخفيش. هيعمل إيه أكتر من اللي عمله؟ داليا: طيب خلي بالك من نفسك وابقي طمنيني عليكي. ريم: حاضر. وفتحت الباب ولسه هاتخرج لاقت أميرة في وشها. أميرة: ريم وحشتني أوووي. أميرة بستغراب: في إيه ياريم؟ إيه المعاملة دي؟ ريم بسخرية: بجد؟ عايزة تعرفي في إيه؟ أميرة بتوتر: أيوه طبعاً. ريم: في إنك واحدة وا.طية وز.بالة. ورفعت إيديها ومرة واحدة راحت نازلة على وشها بالقلم.