رواية زوج مستعمل الفصل الخامس 5 - بقلم فاطمه سمير

أنا عارف إنك مصدومة بس لازم نتكلم دلوقتي، ممكن؟ هزيت رأسي بموافقة، مسك إيدي وقعدني على الكنبة وقعد جمبي وقال بشرود: _اتجوزت إسراء؛ لأن كُنت شايفها بنت مجتهدة في شغلها وشاطرة فيه وكُنت مفكر إنها هتفهم دماغي زي ما بتفهم في الشغل وأنا ساعتها ماكنتش بأمن بالحب ولا الكلام ده، وكُنت بسافر كتير و بسيب إسراء هنا، ولاحظت بعد جوازنا أنها متغيرة بدأت ارقبها.... ضحك بسخرية:

_واكتشفت إنها من الأول متجوزاني؛ علشان توقعني هي وشادي عطا. كمل وهو بيبصلي: _وعرفت حاجات كمان عنها، تمسح وجودها من حياتي؛ فطلقتها. ابتسم وهو بيضم إيدي ليه: _بعدها بخمس شهور رجعتي أنتِ من السفر، مش هقولك كُنت بحبك من زمان والكلام ده، بس لما ماما اقترحت عليا اتجوزك لقيتني بوافق من غير تفكير، واتجوزنا ومن أول يوم لينا في بيتنا حبيت يكون ليكِ حياتك الخاصة لغايت ماتخدي عليا وتتقبلي وجودي في حياتك. ضحك وهو بيزقني بِخفة

في كتفي: _بس الأستاذة فضلت سنة كاملة في حياتها الخاصة، وأنا واقع في حبها. اتنهدت بعصبية وقولت: _والله وأنا هعرف منين أنك بتحبني، وأنت مش مبين؟ قال بتوتر وهو بيبصلي: _ماكنتيش بتحسي من تصرفاتي؟ قولت بانفعال: _أنا واحدة بتشك في الكلام مبالك في التلميحات؟! كملت بسخرية: _أنا اتعودت إن لو الحاجة ماتتقالش بصراحة يبقا كأنها ماتتقالش. قال بصدق وهو بيحاول يهديني:

_أنا ماكنش قصدي كده والله، كُنت عاوز اسيبلك مساحتك؛ علشان ماحسش إنك مجبورة عليا. قولت بتسرع: _طالما بتحس أوي كده ماحستش إني بحبك؟ قال بصدمة وهو بيبصلي: _إيه؟ استوعبت اللي قولته جيت أجري، مسك إيدي وقال بحب: _قوليها تاني... زقيته بغضب وقولت: _هي الشهادة بتاعتك مضروبة ولا إيه! ، المفروض أنتِ اللي تقول الأول. ضمني بحب واتنهد وقال: _بحبك. بصتله بحب وقولت بأبتسامة:

_قريت قبل كده جملة وعجبتني أوي وقولت ساعتها لما اللوح يبوح أبقا أقولها ليه. ضحك وقال: _رومانسيتك هتموتني، أشجيني. ضحكت بِخفة وقولت بغرام: _"وجاء قلبي لك مهرولًا لتنتشله من هذا العالم"