روايه العوده الفصل السابع 7 - بقلم حبيبه سامح

صحيت نيرمين و قامت تصلي الفجر بعد ما سمعته و راحت صحت كل الي في البيت

بصت لقيت زينه المكتب واقعه استغربت و قامت رجعت الزينه تاني لمكنها و راحت نامت

تاني يوم

فيفيان : نيرمين اصحي يا نيرمين انتي يا بت

فتحت نيرمين عين واحده و بصت ليها بانزعاج

نيرمين : عايزه ايه يا فيفيان سيبيني بقي

فيفيان : كل ده نوم قومي ورانا حاجات كتيره نعملها

قامت نيرمين و دخلت الحمام غسلت وشها و هي بتفتح عينيها بصت في المرايا لمحت زي خيال اسود جري

بصت بسرعه لورا بخوف بس مش لقيت حاجه استغربت و بقيت تبص حوليها

خرجت بره الحمام و قفلت الباب

فيفيان : كل ده بتغسلي وشك يلا ورانا حاجات كتيره قومي البسي عشان هنروح نشتري شويه حاجات من المول

نيرمين : ماشي هقوم اهوا

فيفيان : أنا و منه لابسين هنستناكي بره الاوضه

نيرمين : طيب

خرجت فيفيان و منه و قاعدوا شويه مع بابهم و مامتهم

لبست نيرمين بلوزه حمره بكم و جيبه سوده و كانت بتعدل الطرحه خرجت بره الاوضه و قفلت الباب

نيرمين : خلصت يا بنات يلا بينا

فيفيان قامت و قالت : يلا

خرجت نيرمين و منه و فيفيان و وقفوا تاكسي و راكبوا جمب بعض ورا

نيرمين بصت لفيفيان وقالت : فيفيان هو انتي وقعتي الزينه الي علي المكتب امبارح ؟

فيفيان باستغراب : لا انا اصلا مش صحيت غير الصبح لما صحيتك

نيرمين : غريبه !

فيفيان : ايه الي غريب ؟

نيرمين : ولا انتي يا منه ؟

منه : لا والله أنا كنت نايمه برضوا جمب فيفيان

بصوا منه و فيفيان لبعض باستغراب

فيفيان : هو في ايه مالك ؟

نيرمين : مفيش

فيفيان : قولي في حاجه حصلت صح ؟ وبعدين ايه الاسئله الكتيره و الغريبه الي علي الصبح دي

نيرمين حكت ليها الي حصل و الزينه الي وقعت و حسيت أن في حد صاحي

فيفيان : اه تلاقيكي كنتي بتتخيلي

نيرمين بتنهد : ماشي يا فيفيان

منه : ممكن تكوني كنتي بتحلمي عادي ساعات أنا بحس اني كنت في الحلم بجد

نيرمين : تمام

وصلوا للمول نزلوا من التاكسي و دافعوا الفلوس للسواق

فيفيان : يلا بينا

دخلوا المول كان بيشتروا شويه حاجات و نيرمين سرحانه

منه : متفكريش كتير عادي ده تخيل ممكن يكون من الضغط النفسي متقلقيش

بصت نيرمين ليها بابتسامه وقالت

نيرمين : ماشي يا حبيبتي

: نيرمين يا نونو

وقفت نيرمين فجاه و بصت لمنه و فيفيان باستغراب

نيرمين بتريقه : و من أمتي وانتي بدلعيني يا ست فيفيان

بصت فيفيان ليها باستغراب و بعديها بصت لمنه

فيفيان بعدم فهم : قصدك ايه ؟

نيرمين بضحك : انتي هتلعبي عليا

فيفيان : يا بنتي في ايه هو أنا تكلمت

نيرمين : يا سلام مانتي لسه كنتي بتنادي عليا و قال ايه كمان بدلعيني

بصت منه باستغراب هي و فيفيان و بعديها ضحكوا جامد

فيفيان بضحك : انتي اتهبلتي ولا اتلبستي بجد

منه بضحك : نيرمين فيفيان مش اتكلمت اصلا

اختفت ابتسامه نيرمين وهما كانوا قاعدين يضحكوا عليها

نيرمين في نفسها : هو في ايه ؟

بعد ساعات روحوا البيت جريت فيفيان و منه علي بابهم و مامتهم وهما بيضحكوا و بيتكلموا عن نيرمين سبتهم نيرمين و دخلت الاوضه و قفلت الباب وراها

نيرمين : معقوله كل ده يكون صدفه أو حاجه عاديه يعني اني اشوف حاجه زي كيان اسود في الحمام و الزينه الي وقعت دي و باقي الحاجات كل ده عادي ؟

بصت مكان الزينه بحيره و كانت مستغربه و من طبع نيرمين أنها فضوليه و لازم تعرف كل حاجه عشان تطمن

الساعه ١١ بليل

كانت الأم و الاب و منه و فيفيان قاعدين بره بيتفرجوا علي التلفزيون و نيرمين جوا الأوضه

الام : هي نيرمين جوا بتعمل ايه كل ده لوحدها ؟

فيفيان : تلاقيها نامت أو بتعمل اي حاجه

عند نيرمين

نيرمين قامت بغضب طفولي : منا مش هقعد في الحيره دي كتير ايه كل الحاجات الغريبه الي بتحصلي دي ؟

كان واقف في البلكونه وهو مكتف ايديه الاتنين و بيبتسم بخفه عليها فا قرر أنه يلعبها شويه فا راح رفع ايديه و بسحره وقع قلم من علي المكتب

بصت نيرمين للقلم الي وقع باستغراب

نيرمين :هو المكتب ده ملبوس ولا أنا الي اتلبست علي رأي فيفيان

راحت و حطت القلم تاني علي المكتب بس فجاه و قفت بصدمه

نيرمين : هو ازاي القلم وقع لوحده ؟ و كمان الشباك مقفول يعني مفيش حاجه تحركه

ابتسم بشر وراح موقع موبيلها الي علي السرير بصت للموبيل بخضه

وبصت للاوضه كلها و هي حاسه ان الخوف أتمكن منها

كانت نيرمين كل شويه تبص للموبيل الي وقع و المكتب قربت تجيبي الموبيل مسكته بطرف صوبعها و رمته علي السرير

كان واقف وهو مستمتع بخوفها الظاهر من عينيها و حركتها

لغايت لما دخلت فيفيان فجاه الاوضه

فيفيان : انتي اتجننتي ولا ايه يا بت بتكلمي نفسك

نيرمين : هو انتي كنتي بره صح يعني أنا كل ده كنت قاعده لوحدي ؟

فيفيان باستغراب : ايوه يا بنتي

نيرمين : متاكده

فيفيان : ايوه و بعدين مالك خايفه كده ليه

كانت نيرمين هتقول ليها بس افتكرت أن فيفيان اصلا مش هتصدقها و هتتريق عليها

فيفيان : طيب يا ستي تعالي اتفرجي معانا ده في حتت فيلم انما ايه يجنن

ابتسمت ليها نيرمين بعديها راحت وراها بصت للاوضه بتوتر و قفلت الباب

كان واقف بعيد وهو متعصب بس رجعت ملامحه للبرود

: بقي كده ماشي

كانوا قاعدين بيتفرجوا و بيضحكوا مع بعض

بص ليها بانزعاج ورفع أيده من بعيد خلا شعر فيفيان يتشد

فيفيان بصراخ : شعرييي

بص الكل ليها باستغراب

نيرمين : في ايه مالك ؟

فيفيان بعصبيه : انتي هتستهبلي

نيرمين : في ايه ؟

فيفيان بصريخ : شديتي شعري ليه هااا؟

نيرمين باستغراب : شديت شعرك ؟

فيفيان : اه مانتي الي قاعده جمبي منه قاعده جنب ماما و بابا هيكون مين يعني

نيرمين : أنا مش عملت حاجه

فيفيان بتريقه : يا سلام و كمان كدابه

نيرمين بصوت عالي : أنا مش كدابه

هزت راسها فيفيان و قالت : اه اه مصدقاكي

قامت نيرمين بغضب وراحت للاوضه بتاعتها و قفلت الباب

الام : ليه بس كده يا بنتي

فيفيان : قولي ليها هي الي بتشد شعري

الام : معلش يا بنتي بتهزر حصل خير

فيفيان : انتي مصدقاها يا ماما

الام بسرعه : لا طبعا يا حبيبتي مصدقاكي انتي

كانت نيرمين واقفه علي الباب و سمعت كل حاجه اتقالت

نيرمين : يعني ماما كمان مش مصدقاني

الدموع جت في عينيها راحت قاعدت علي السرير و عيطت

بص ليها بحزن لما شافها مضيقه

اتقدم لقدام و راح رامي حاجه جمب السرير

فتحت عينيها و هي مستغربه الصوت الي سمعته ده بصت لتحت السرير و

نيرمين بصدمه :

يتبع

روايه العوده

للكاتبه حبيبه سامح