روايه العوده الفصل الثالث 3 - بقلم حبيبه سامح

روايه العوده البارت التالت

الام قربت منها و قالت ليها

الام : جدك و عمك و مرات عمك هيجوا بكره يقعدوا معانا شويه

نيرمين بصدمه : ايه ليه ؟

الام : معرفش بابكي قالي أنهم جايين بكره

نيرمين : فجاه كده ؟

الام بتنهد : ديما لما يجوا لازم يحصل مشكله ما بينا و كمان ابوكي بيحكي ليهم كل حاجه عننا

قربت نيرمين من الام و طبطبت علي كتفها وقالت

نيرمين بابتسامه : أن شاء الله خير يا ماما ربنا معانا ديما متخفيش

الام بحب : طيب يا حبيبتي روحي ارتاحي شويه عشان هما هيجوا بدري

نيرمين : حاضر يا ماما مش محتاجه اي مساعده

الام : لا يا حبيبتي شكرا

راحت نيرمين للاوضه بتاعتها و دخلت جوا

فيفيان : مالك يا بت ؟

نيرمين باستغراب : مالي ؟

فيفيان : شكلك مضايقه و متقوحيش باين مش كده يا منه

منه : اه شكلك مضايقه

قربت نيرمين للسرير الي هما قاعدين عليه و قاعدت علي طرفه

نيرمين : عمو و مرات عمو و جدو جايين بكره

فيفيان بصدمه : ايه ؟

منه : ليهههه بقي

نيرمين : قالو عايزين يقعدوا معانا شويه

فيفيان بتريقه : عايزين يقعدوا معانا شويه ولا يوقعوا ما بينا شويه

نيرمين : ربنا يهديهم بقي و كمان جايين بدري

فيفيان : يا دي النيله يعني اصطبح بوشوشهم علي الصبح كده

منه : خلاص احنا نعمل نفسينا نايمين

فيفيان : لا ياختي عملناها مره و بابا ده يزعق فينا و صوته جاب اخر الشارع

نيرمين : خلاص يا بنات هنقعد معاهم شويه كده عبان لما يمشوا نستحمل شويه

فيفيان : حبيبتي شويه دي لو ناس عندهم ذوق دول بيقعدوا لغايه الفجر عندنا تقولي مش عندهم بيت او حاجات وراهم

صرخت اخر كلامها و نيرمين و منه بيضحكوا عليها

نيرمين بضحك : طيب بس عشان عيب نتكلم عليهم كده حتي لو هما وحشين

فيفيان حطت راسها علي المخده

فيفيان : الجدع بقي هو الي يصاحيني

نيرمين بتحدي : هنشوف بابا مش هيسيبك صدقيني

منه : تصبحوا علي خير يا جماعه

نيرمين و فيفيان : وانتي من اهله

راحت نيرمين طافت اللمبه فجاه افتكرت حاجه طلعت بره الأوضه لقيت مامتها قاعده في الصاله سرحانه

نيرمين : ازيك يا ست الكل قاعده لوحدك ليه ؟

الام فاقت علي صوت نيرمين راحت بصت ليها و ابتسمت

الام : لا يا حبيبتي مفيش حاجه

مسكت نيرمين ايديها الاتنين بين ايديها و قالت

نيرمين : بصي يا ماما أنا عارفه أن أهل بابا ظلموكي كتير و كانوا ولسه بيعملوكي بطريقه وحشه أنا مش بقولك اسكتي لا بالعكس اتكلمي و وجهيهم عادي بس بطريقه كويسه عشان ربنا كمان

الام : طيب ياا حبيبتي ربنا يخليكي ليا و مش يحرمني منك انتي غاليه اوي عندي يا نيرمين

نيرمين بصت ليها بدموع و حضنتها و مامتها بادلتها وهي في حضنها قالت

الام : لو تعرفي انتي اغلي حاجه عندك و بفضلك عن اخواتك التانين

نيرمين كانت بتسمع كل كلمه كانت بتقولها مامتها لكن حتت أن هي بتفضلها دي هي عارفه أن الجمله دي بسبب مشاعرها دلوقتي هي شايفه فعلا الفرق بين معاملتها مع فيفيان و معاها

بالرغم انها بتساعدها اكتر منها بس لكل اب و ام بيبقي في ابن أو بنت مميز ليهم و هي راضيه بالوضع ده

بعدت عنها ببطئ و بصت ليها بابتسامه

نيرمين : طيب انا هدخل انام بقي عايزه حاجه يا ماما ؟

الام : لا يا حبيبتي تصبحي علي خير

نيرمين : وحضرتك من اهله

راحت الام و دخلت نامت و نيرمين كمان

تاني يوم

كانوا صاحيين كلهم بيلبسوا معادا فيفيان كانت نايمه

نيرمين : يا بنتي قومي بابا هيزعق مش ناقصين مشاكل

منه : اه نيرمين عندها حق مش كفايه المشاكل الي جايين النهارده

بصت نيرمين ليها بحده

نيرمين : عيب كده

منه : أنا مش فاهمه انتي ليه بتدافعي عنها

نيرمين : مش بدافع عنهم بس برضوا دي نميمه و مهما عملوا هما برضوا هيفضلوا اهلنا هنعمل ايه لازم نسامح

منه : طيب

بصت منه و نيرمين لفيفيان الي غرقانه في النوم

نيرمين : هي دي الي هتجيبلنا المشاكل بت يا فيفيان اصحي بقيييي

صرخت نهايه كلامها بزعيق

قامت فيفيان بخضه و قالت

فيفيان : أنا صاحيه اهوا يا بابا صاحيه والله

بصت نيرمين ليها بسخريه و قالت

نيرمين : متحلفيش

فيفيان : هو انتي ؟

نيرمين : انتي شايفه ايه

سمعوا صوت خبط علي الباب و الاب بيقول

الاب : اوعي تكون البت فيفيان لسه نايمه

قامت فيفيان بسرعه من علي السرير و بتختار اي حاجه تلبسها

فيفيان بسرعه : لسه نايمه ايه يا بابا هو أنا اهل الكهف

قربت نيرمين من ودن منه وقالت

نيرمين بهمس : اختك هتدخل النار من كدبها ده

ضحكت منه و نيرمين عليها وهما بيبصوا عليهم و بيضحكوا

بعد ساعات

رن الجرس راحوا كلهم قاعدين مستنين في الصاله و الاب راح و فتح الباب

دخل العم و مرات العم و الجد

الاب : ازيك يا بابا بقالك كتير اوي مش بتيجي لينا وحشتني

بص الجد بطرف عينيه علي الام وقال

الجد : ما انت عارف انا مش باجي ليه

بصت الام لتحت بكسوف و كانت محرجه جدا و البنات كانوا مضايقين قامت نيرمين و قالت

نيرمين : والله لو حضرتك عندك مشكله مع ماما ممكن تقولي ليها مش تقاطعها و انا عارفه أن ماما ديما بتتصل بحضرتك و تطمن عليك فا لو في مشكله نحلها ولا ايه راي حضرتك

بصوا الكل ليها بصدمه من كلامها و الاب مكنش عارف يقول ايه عشان كلام نيرمين كان حقيقي و اتكلمت بطريقه محترمه

دخل الجد منغير ما يرد و قاعد هو و العم و مرات العم راحوا سلموا عليهم و أرح الجد سلم علي نيرمين و بص في عينيه بحده بص باصتها ليه كانت قويه و باصات فيها ثقه أن ربنا معاها

راحوا قاعدوا و الام كانت مبسوطه اوي أن نيرمين دفعت عنها راحت بصت لنيرمين و نيرمين بصت ليها و ابتسموا لبعض

فيفيان في سرها : والله البت دي طلعت جريئه

الاب : حضرتك و حشتني اوي انت و اخويا

الجد : وانت كمان يا بني

الاب : عامل ايه يا حسن ؟

العم : الحمدلله كويس انت اخبارك ايه

الاب : الحمدلله

مرات العم : ايه مش هنشرب حاجه ولا ايه ؟

فيفيان : لا احنا بخله بعيد عنك

ضربت نيرمين كتف فيفيان و منه بتحاول تداري ضحكتها قامت نيرمين و قالت

نيرمين : هروح اجيبلكم حاجه ساقعه واجي

راحت للمطبخ و كان الجد بيبص ليها بعدم رضا لغايت لما مشيت دخلت نيرمين المطبخ و جابت حاجه ساقعه و كوبيات

دخلت الام المطبخ عليها و حضنتها

الام بدموع : شكرا يا حبيبتي شكرا اوي

لفت نيرمين و بصت ليها بابتسامه و قالت

نيرمين : متشكرنيش يا ماما ده واجبي

قامت شايله السنيه و دخلت ليهم و الام قاعدت علي جمب حطت نيرمين الحاجات علي التربيزه و قاعدت

مرات العم : ايه يا فيفيان يا حبيبتي مش تعرفينا عن العريس ؟

فيفيان باستغراب : عريس ؟

مرات العم بخبث : اه اصل مستحيل تكوني كل ده و مش اتجوزتي دي حتي تبقي فضيحه

بصت فيفيان للأرض و سكتت بس نيرمين أدخلت

نيرمين : لا يا طنط فيفيان لسه مش اتجوزت هي مستنيه ابن الحلال يجي و ربنا لسه مش أذن

مرات العم بضحك : ابن الحلال برضوا ؟

ضحكوا العم و مرات العم و الجد و الاب كان بيحاول يجاريهم في الكلام قامت فيفيان فجاه وراحت لاوضتها

نيرمين قربت لمنه و قالت ليها بهمس : روحي شوفي اختك

منه : ماشي

قامت منه و راحت لفيفيان و الام بصت علي اوضه فيفيان بقلق وراحت برضوا ليها

بصت نيرمين لمرات عمها و قالت

نيرمين : لو سمحتي يا طنط الموضوع ده حساس عند فيفيان ممكن حضرتك مش تتكلمي فيه و كمان دي حياتها الخاصه هي حره برضوا

الجد بحده : كده كتير قومي يا نيرمين قومي انتي

نيرمين باستغراب : ليه يا جدو

الجد بزعيق : لما اقول كلمه تتنفذ

قامت نيرمين باستغراب و راحت للمطبخ تشرب حاجه بص الجد للاب بتريقه

الجد : ايه هما البنات هما الي ممشين عليك الكلام ولا ايه

الاب : لا ازاي حضرتك بتقولي كده يا بابا

الجد : لا ما هو ده الي شايفه ولا ايه يا حسن

العم : ايوه لازم تشد عليهم شويه و انت كنت قايلي امبارح انك هتجوز فيفيان غصب عنها و مش عارف ايه وفي الاخر هي الي مشيت كلامها عليك

الاب : لا هي مش مشيت كلامها ولا حاجه نيرمين اتكلمت معايا و اقنعتني بي ان دي برضوا حياتها الخاصه

الجد بتريقه : حياتها الخاصه قال

مرات العم : أنا مش بحب ادخل والله بس فيفيان دي زي بنتي

الاب : لا ازاي اتفضلي طبعا

مرات العم : شد عليهم شويه هما مش بيجوا غير بالشد كده حضرتك كلمتك تكون مسموعها لحسن الدلع ده نتيجته مش حلوه واهو انت شايف النتيجه

العم : احنا عايزين مصلحتك و انت لازم تتدخل في كل حاجه في حياتهم ليك حق و حياتهم الخاصه كمان يعني أنا مش قصدي حاجه بس مش كلمه توديك و كلمه تجيبك

كان الأب ساكت و مش عارف يقول ايه و كان حاسس بالاحراج بسبب كلامهم و الغضب كمان

قام الجد و العم و مرات العم

الجد : اسمع كلامي هو ده الصح

العم : ايوه كلام بابا صح يا حسين

راحوا مشيوا و قفل الاب الباب و كان متعصب جدا

الاب بزعيق : فيفيانننننننننن

يتبع

روايه العوده