رواية رسائل من المستقبل — الفصل 10 — بقلم عادل عبدالله
رواية رسائل من المستقبل الجزء العاشر 10 بقلم عادل عبدالله
رسائل من المستقبلرواية رسائل من المستقبل الحلقة العاشرة
منال : فيه ايه يا ماما ؟
الأم : مش قادرة أخد نفسي ، همووت ..
ثم ينقطع صوتها فجأة !!!
منال : ماما .. ماما !!!
وفي لحظات تترك منال عملها في المستشفي وتستقل إحدي سيارات الأسعاف إلي منزل أسرتها لتجد أمها فاقدة الوعي !!
في المستشفي تجلس منال بجوار والدتها تبكي في غرفة العناية المركزة !!
تري من الباب صديقتها غادة فتخرج إليها تبكي …
منال : ماما تعبانة أوي يا غادة ، أنا خايفة عليها أوي .
غادة : متخافيش يا قلبي إن شاء الله تخف و تقوم بالسلامة .
منال : شوفتي ؟! أهي الرسالة السابعة أتحققت زي ما قرناها بالظبط !! مش قولتلك كل اللي في الرسايل بيتحقق ؟!!
غادة : يا بنتي دي صدف ، صدف يا منال مش أكتر من كده .
منال : أنتي لسه مش مصدقة ؟!!
غادة : أيوه .
منال : يعني كل اللي حصل ده ولسه بتقولي صدف ؟!!
هنا يأتي أدم مسرعاً بلهفة شديدة يسأل منال : صحيح اللي سمعته ده ؟؟ مامتك هنا في المستشفي ؟؟
منال ” ببكاء ” : أيوه يا أدم ، ماما جوه في العناية المركزة !!
أدم : طيب أهدي أهدي متخافيش ، أنا هدخلها .
يدخل أدم ويظهر أهتمام شديد بحالة والدتها !!
تسألها غادة : هو ده الدكتور زميلك اللي كلمتيني عنه ؟
منال : أيوه .
غادة : ده باين عليه مهتم أوي !!
منال : أيوه ، هو أدم كده بيهتم بكل حاجة ، خصوصاً لو حاجة تخصني .
غادة : يعني ايه ؟
منال : ما أنا قولتلك قبل كده إننا كنا مرتبطين أيام الجامعة وبعدين كل واحد راح لحاله .
غادة : هو ده اللي كنتي بتكلميني عنه أيام الجامعة ؟
منال : أيوه .
غادة : أول مرة أشوفه ، هو أتجوز ولا لسه ؟
منال : لأ .
غادة : أنتي تقصدي إنه لسه بيفكر …
منال : أنا ميخصنيش هو بيفكر في ايه ، أنا بعرفك بس أنه مهتم بحالة ماما مش أكتر من كده .
غادة : أوعي يا منال تكوني …
منال : متكمليش ، أنتي أتجننتي يا غادة ؟!! مستحيل طبعاً .
غادة : أنا بس بفكرك إنك ست متجوزة و….
منال : قولتلك مش عايزة أسمع الكلام ده يا غادة ، أنا عارفة وفاكرة كويس أوي ، وأظن أحنا أصحاب من زمان وعارفة أخلاقي كويس .
خرج أدم بعد دقائق قائلاً : أطمني ، حالة والدتك مستقرة والخط.ر زال .
منال : هي فاقت ؟ ادخل أشوفها .
أدم : فاقت لكن مش هينفع تتكلم دلوقتي ، ياريت ترجعي بيتك ترتاحي وأطمني أنا هكون جنبها بنفسي .
منال : أنا متشكرة أوي يا دكتور أدم ، لكن أنا لازم أفضل جنبها .
أدم : روحي أحسن ، هي المفروض هتقعد هنا كام يوم لحد ما نطمن بشكل كامل عليها ، ومش معقول هتفضلي جنبها الوقت ده كله !!
منال : لأ ، انا مش همشي إلا مع ماما .
أدم : هو جوزك فين ؟
منال : زمانه جاي دلوقتي .
أدم : معقول يسيبك في وقت ذي ده ؟!
منال : هو مكنش يعرف ، أنا كلمته من شوية ولما عرف ساب الشغل وجاي في الطريق .
أدم : أيوه ، مفهوم ، مفهوم ، طيب أنا هكون جنب والدتك لو تحبي تدخلي ترتاحي شوية .
يتركهم أدم وينصرف ،
غادة : روحي أرتاحي يا حبيبتي ، الحمد لله أطمنتي علي مامتك .
منال : لسه يا غادة ، لسه مش مطمنة ، أنتي نسيتي الرسالة قالت ايه !! أنا خايفة عليها أوي ، الرسالة كانت بتقول لازم أفضل جنبها .
غادة : تاني هتقولي الرسالة ؟!!
منال : تاني وتالت ومليون ، كل كلمة في الرسايل دي صح .
غادة : أرجوكي يا منال تنسي الرسايل دي علشان خاطري ، دي ممكن تد،مر حياتك !!
منال : حياتي !! حياتي خلاص بتخلص !! اللي باقي اقل من شهرين !!
غادة : منال .
منال : نعم .
غادة : لو فضلتي علي كلامك وتصديقك للورق ده هتضيعي !!
منال : أنا خلاص يا غادة ، كل حاجة بالنسبالي أنتهت !! أهم حاجة أطمن علي ابني قبل ما أمو،ت ، وعمرو نفسي أعرف بيخوني مع مين !!
غادة : عمرو بيحبك ومش بيخونك .
منال : أنتي حرة تصدقي أو لأ ، أنما أنا متأكدة .
غادة : كنتي هتعملي ايه لو عمرو جوزك جه وأتقابل مع أدم ؟؟
منال : ولا حاجة ، عمرو لحد دلوقتي جوزي رغم إني متأكدة أنه بيخوني ، وأدم مش أكتر من زميل .
غادة : يعني الموقف هيمر عادي ؟!
منال : أكيد ، وأهو زمانه جاي دلوقتي وأكيد الموقف هيمر بشكل طبيعي .
لم تمر دقائق حتي وصل عمرو …
عمرو : مامتك مالها يا منال ؟ طمنيني ؟
منال ” تبكي ” : ماما تعبانه أوي يا عمرو ، أنا خايفة يحصلها حاحة .
عمرو : متخافيش يا حبيبتي ، إن شاء الله تخف وتقوم بالسلامة .
منال : يارب .
عمرو : أنا أسف يا غادة مأخدتش بالي إنك موجودة .
غادة : ولا يهمك ، أنا مقدرة موقفك كويس .
عمرو : طيب ممكن أدخل أطمن عليها يا منال ؟
منال : مش دلوقتي ، هي فاقت لكن مش هتقدر تتكلم دلوقتي .
عمرو : ربنا يطمنا عليها يارب .
منال : يارب .
غادة : حاول تاخد منال يا عمرو وتروحوا ترتاحوا ، الدكتور قال إنها ممكن تقعد هنا كام يوم !!
منال : قولتلك يا غادة أنا مش همشي إلا مع ماما .
عمرو : يا حبيبتي نروح ساعتين تلاته ترتاحي ونرجع هنا تاني .
منال : لاااا ، مش همشي إلا مع ماما ، أنا هفضل هنا وأنت خد غادة معاك روحها بيتها وارجع خد تميم من الحضانة وخلي بالك منه .
غادة : مادام هتقعدي مع مامتك ومش هتروحي ، يبقي نروح الحضانة الأول أخد تميم معايا البيت لحد ما تطمني علي مامتك وترجعي .
منال : مش عايزة أتعبك يا دودو .
غادة : يا قلبي تعبك راحة .
منال : ماما فاقت وفتحت عينيها أهو ، أنا داخلة أطمن عليها .
بعد الأطمئنان علي حالة الأم …
منال : يلا يا عمرو ، خد غادة معاك وروح هات تميم من الحضانة ، الوقت أتأخر !!
عمرو : حاضر أنا هروح اخد تميم من الحضانه واوصل غادة وأرجعلك .
بعد إنصراف عمرو وغادة بدقائق تتذكر منال أمراً هاماً فتحاول اللحاق بهما !!
تنزل مسرعة ، لتجدهما يقفان وتسمع غادة تقول له : منال متأكدة إنك بتخونها !!!
….
لقراءة الفصل التالي :
لو عاوز الرواية كاملة اضغط على : (رواية رسائل من المستقبل)