رواية ﮼صفقة ﮼عشك الفصل الرابع 4 - بقلم ﮼الاميره،الموسويه 👑

بقلمي (هدى الموسوي) الاميره الموسويه 👑

ما احلل لاي شخص ياخذ كتاباتي وينشرهم (ذمه)

سدن .. دخلوني للسياره وخلو شي ع خشمي مااعرفه شنو .. اني بسرعه نمت ماادري فقدت الوعي .. المهم مدريت بشي؟!
فتحت عيوني بالكوه راسي احسه ثگيل ومصدع .. اول مفتحت الضوه صار بعيني بسرعه غمضت!
كعدت بصعوبه واني لازمه راسي .. اشويه اشويه فتحت عيوني .. شفت المكان كبير حيل واشبه بالمكتب .. او قاعة اجتماعات .. هيج شي!
طاوله كولش كبيره وكراسي داير مدايرها كومه .. الغرفه عباره عن شبابيك  ع طولها والضوه ماليها .. اتقربت من الشباك حديقه اتجنن وكبيره كولها اشجار مزينه و ورد .. المنظر يجنن والجو كولش حلووو .. المنظر يسحر رحت لغير عالم .. نسيت اني مخطوفه!!
بعدني دااتأمل هذا الجمال .. فجأه سمعت الباب انفتح .. التفتت شفت  واحد دخل وديسد بالباب شفت بس ضهره!!!!!
مر ع بالي مثل الخيال انو هذي الهيئة ، الضخامه و الظهر شايفتهم .. بس وين؟!!
رأساً كلبي انقبض بقوه والخوف اتملكني .. رجعت للواقع والاحداث الي صارت الصبح .. بلا تفكير رجعت خطوتين ليوره .. هو سد الباب والتفت عليه!!!
طبعاً بهذاك الوقت مكدرت اركز بشكله وملامحه لانو الخوف كان لاعب دور ..!
بس الي حكوله هسه .. هو بعد ما الموقف انتهى والوضع اتغير وهدء كولشي نوعاً ما بديت انتبه واركز بهذا الكائن الي كدامي!
وعليه حوصفلكم شكله ..
هو يعتبر طبيعي ما بي شي مميز .. اسمر اشويه .. شعره كان حالقه خفيف .. ملامحه حاده حيل عيونه بني .. بس احلى شي بي لحيته وشواربه فد شي يسحر!!
اضخم مني بهواي جسمه مشدود اني عفت كولشي وركزت ع كرشه ... اعرف هسه حتضحكون اتكولون انتي بيا حال ؟!!!
بس اني عندي حاله من اشوف شخص عيوني لا ارادي تروح ع بطنه .. وهذا الي صار كالعاده .. والصدمه عنده كرش "
يعني كرش طبيعي مو من هذولي الي واصل لخشمهم .. مو نشاز شي مرتب .. رغم اني مااشوف بالكرش شي حلو بس هذا الكائن كولشي بي لايق عليه وتحس بفخامه من تشوفه!
اذا سألتوني عن رأيي بي ... فهو مو جميل لااااا وانما وسيم اكيد تعرفون الوسامه شنو؟!!
يعني شي من تشوفه تنسحر رغم هو كولشي بي عادي ..!
اعتقد وصلتكم الفكره اكثر من هذا مااكدر اوضح بعد لانو من ادقق بي افكاري تتخربط .... مااعرف لويش !
كان لابس قميص اسود اول دكمتين فاتحهم ورافع ارداناته .. وبنطرون هم اسود

.......

شفته التفت عليه .. اني رجعت خطوتين ليوره ، وكدامي مزهريه بيها ورد جريتها بسرعه ورفعتها بأيدي!
هو من شافني هشكل وكف بمكانه وابتسم ... بصوت هادئ وضخم تماماً ملائم الهيئه الي كدامي ...

_ اشلون صرتي؟!

سدن .. هذا من كل عقله يحجيييي .. مخطوفه و يسألني اشونج ...!!
..
اول رد فعل الي صحت بي بصوت عالي .... انت منووو .. اني وين ... شتريد مني ... بقيت اسأله واصيح بشكل هستيري .. وهو مثل جبل الجليد واكف كدامي .. وبصوت هاااااادئ وكل برود يحجي ...

_اهدي واتفضلي اكعدي وراح تفهمين كلشي ماكو داعي لا للخوف ولا للصياح.

سدن .. هدوئه والثقه الي يحجي بيها خوفني اكثر .. عليت صوتي اكثر .. كلت بلكي يخاف من الصياح ويعوفني اروح ..
_ما اهدأ ولا اكعد اذا مااعرف منووو انت وشتريد مني واني وين؟!!

_امممممم ماشي لتهدئين ولا تكعدين براحتج ، بس ع الاقل اسمعيني حتى اعرفج بنفسي يمكن تتوضح الصوره اكثر.

سدن .. بقيت واكفه والمزهريه بأيدي .. احجي دااسمعك .. انت منو وشرايد مني؟!

بخطوات واثقه بكل هدوووء وابتسامه هادئه ع وجهه .. مد ايده الي

_اقدملج نفسي نور دين حازم وهذا مكتبي الي انتي حالياً بي!

سدن .. وشكوو خاطفني شتريد مني ؟!!

نور الدين .. هههه خاطفج؟!!
اكو واحد يخطف شخص يخلي بمكتبه!!
لا ويعرفه بنفسه؟!
كنت مفكرج ذكيه .. معقوله لهدرجه تفكيرج محدود!

سدن .. تفكيري محدود؟!
لما حضرتك دتمشي بالشارع ويجي واحد يخدرك وياخذك بسياره مظلله هذا شنو تسمي جنابك نزهه صباحيه؟!
وبعدين انت من وين تعرفني اصلاً حتى تفكرني ذكيه ؟!!

نور الدين .. بهذي حقج .. واني جداً اعتذر ع الطريقه الي جابوج بيها الحيوانات هذولي بس صدكيني عقابهم راح يكون جداً عسير لان سببولج هذا الرعب واتمنى تقبلين اعتذاري.

سدن .. اول مره اشوف خاطف عنده اخلاق!

نور الدين .. نعم؟!

سدن .. شرايد مني ؟!

نور الدين .. سلامتج مرايد شي بس صارلج فتره ممداومه فقلقت عليج لذلك بيت اطمئن مو اكثر بس الكلاب الي دزيتهم قلقوني اكثر عليج .

سدن .. قلقت .. وتتطمن عليه؟!!
انت منوووو وشنووو قصتك .. ومن وين تعرفني ؟!

نور الدين .. صار كم دقيقه دنحجي وانت ع هذا الوضع متعبتي .. ع الاقل نزلي المزهريه من ايدج ترى ما اكل اني صدكيني.

سدن .. باوعت ع المزهريه وبعدين عليه .. معليك بأيديه وجاوبني ع سؤال!!

نور الدين .. دار وجهه عنها بدون اي اهتمام .. راح للمكتب طلع جكاره ودخنها بعدين ضغط ع دكمه يمه .. اشويه واجتي بنيه نازكه ومرتبه ..

السكرتيره .. دخلت شافت سدن والمزهريه بأيدها .. انصدمت من المنظر ومن نور الدين الي واكف بكل هدوء .. بصوت متلعثم نعم باشا تأمر بشي؟!

نور الدين .. عصير للانسه سدن وبلغيهم يحضرون السياره راح اطلع.

السكرتيره .. تمام باشا .. عافتهم وراحت.

سدن .. باشا ......؟!!!!!!
اهاااااااا هسه عرفت منووو انت ... نفسك الي اجيت قبل فتره والحيوان مالتك حاول يلزمني مو؟!
وميحتاج اتجاوب ع سؤال عرفت شنو رايد مني .. اتريد تنتقم لكرامة حضرتك الي هنتها ذاك اليوم مو.
بس انت غلطان اذا تعتقد تكدر تمس شعره من عندي لان بسام وبابا ينهوك خلاص.

نور الدين .. هههه انتي هواي خيالج واسع تنفعين تصيرين كاتبه.

سدن .. وخر عن طريقي وخليني اروح احسنلك .. بعد ساعه اذا مرجعت للبيت بسام يكلب الدنيا ع راسك.

نور الدين .. كعد بهدوء ع الكرسي كدامها وبقى يباوع عليها بتركيز .. وكأنه ديتفحص شي ثمين كدامه  .. بصوت هادئ وابتسامه متفارك وجهه ...

_انتي هواي حلوه

سدن .. بصوت عالي وبنفاذ صبر .. وانت قليل ادب ومو صاحي .. خليني اروح دااكولك.

نور الدين .. ابتسم اكثر لدرجه بانت اسنانه.. ومن تعصبين تحلوين اكثر.

سدن .. لا اله الا الله .. انت الظاهر مو بس مخبل واطرش هم..
شمرت المزهريه بالكاع و ركضت دتريد تطلع من الباب مرت من يمه هو كام بسرعه ولزمها من ايدها .. جرها حيل صارت كدامها عينها بعينه ميفصلهم غير كم انش ... بقى صافن بعيونها وهي الغضب والصدمه من تصرفه ونظراته يتطاير منها ..

نور الدين .. بصوت همس .. وعيونج اتدوخ!

سدن .. هذا مستحيل يكون طبيعي .. يباوعلي بنطرات غريبه .. وكلامه هز كياني .. بقيت مصدومه مااعرف شأسوي .. بهذي اللحظه فتحت السكرتيره الباب .. اني بسرعه دفعته عني وابتعدت...!

السكرتيره .. العصير باشا.

نور الدين .. بدون ميلتفت عليها بقى مركز بسدن .. عوفي يمج .

السكرتيره .. والسياره جاهزه حضرتك.

نور الدين .. تمام .. واشرلها بأيده بمعنى روحي.

طلعت السكرتيره وبقى هو وياها وحدهم من جديد ..

سدن ابتعدت عنه رحت وكفت يم الشباك بس اني احس جسمي كوله يرجف من الموقف الي صار .. قربه مني وكلامه مااعرف شسوو بيه ..

نور الدين .. اخذت العصير ، وكفت وراها ومديتلها ايدي .. اتفضلي اشربي.

سدن .. التفت لكيته ورايه ..والعصير بأيده!!
بصوت حاد مليان غضب .. مااشرب شي وما اريد شي خليني اطلع منا وبس.

نور الدين .. ماشي اشربي هذا العصير وكلام رجل اخليج ترحين .

سدن .. هه انت ع بالك غبيه اني جايبلي عصير مااعرف شنو مخلي بي ، مخدر لو منوم وتريدني اشربه؟!

نور الدين ... امممم تمام وياج حق .. خلص امشي اخذج للبيت.

سدن .. شكراً الك اني اروح بس طلعني منا.

نور الدين .. قبل كم دقيقه كنتي فاقده الوعي وتحت تأثير المخدر .. يعني يحتاجلج وقت يلا تصحصحين وطالما متقبلين تشربين شي ولا تنتظرين لحد متتحسنين فمستحيل اخليج تروحين لوحدج اني بأيدي اوصلج وكلام رجل اخذج البيتج گبل.

سدن .. كان واضح عليه انه صادق بكلامه .. بس مع ذلك گلبي ممتطمن له .. ماشي اروح وياك بس رجعلي موبايلي خلي اتصل ببسام واكوله اني وين .

نور الدين .. ماشي انطيج الموبايل بس متتصلين لانو بسام اذا عرف بيج وياي فأنتي الي راح تتأذين لان اخوج اعرفه كلش زين واني مااسمح بهذا الشي .

سدن .. كلامه صحيح .. بسام اذا عرف اني مو بالمدرسه لو بشنو احلف ميصدك وخصوصاً اذا شاف هذا وياي يذبحني لان هو ذاك اليوم بس حجيت وجهه صار اصفر اشون اذا شافنا سوه؟!!
وحتى اذا حلفلته وقنعته انو مو بأرادتي اجيت فاول شي يسوي يبطلني من المدرسه .. هاي اذا ما ذبحني اكيد!!
زين اشون اروح ويا هذا ؟!!
بقيت ساكته مااعرف شنو احجي!!

نور الدين .. انطيتج كلام رجل اخذج لبيتكم .. جربيني.

سدن .. اوك.

نور الدين .. اخذ سترته ، فتحلها الباب ومد ايده بمعنى اتفضلي...!

سدن .. دنكت اخذت جنطتي من التخم وطلعت بس اني عين عليه وعين ع الطريق .. طلعت من الباب ما اوصفلكم البنايه الي كنت بيها فد شييي راقي كولها ابيض واضويه تعمي العين!
وصلنا للحديقه اتجنننن من الخارج احلى بهواي من ما شفتها من الغرفه .. طلعنا للشارع ... شفت السياره الرياضيه الي كانت مراقبتني قبل كم يوم!!!!
باوعت عليها بصدمه ورجعت باوعت عليه..!
هو من شاف ملامح الصدمه على وجهي ابتسم ...!

نور الدين .. فتحلها باب السياره و وكف مبتسم .. اتفضلي

سدن .. مشيت من يمه بسرعه وصعدت بس اني مليون حيره وسؤال اتدور ابالي .. احاول اربط شي بشي ومدافهم اصلاً الي ديصير..!

صعد هو وياي وطلعنا بالسياره طول الطريق اني ساكته بس بداخلي خوف مو طبيعي مينوصف .. هذي اول مره بحياتي اصعد بسياره واحد مااعرفه ... و وحدنا !!
مشينا بطريق مشايفته اول مره اشوف هيج اماكن .. تعرفون مخلصه حياتي بالحبس .. مسافه وحسيت السياره دتدور بيه .. ونفسي دتلعب ... بدون وعي كلتله اوكف اوكف ...

نور الدين .. بقلق .. بشنو حاسه ، بيج شي؟!

سدن .. معدتي گلبت عفيه نزل الجامه اريد هوى..

نور الدين .. بسرعه نزل من السياره وراح فتح الباب مالتها .. كعد ع رجليه ع الرصيف .. بصوت هادئ .. ليش مشربتي العصير .. وتردين ترحين لوحدج؟!!

سدن .. كوله من وراك لو ما انت والحيوانات الي خطفوني مصار بيه كل هذا .. الله ينتقم منك ومنهم.

نور الدين .. صح كل بسببي واسف بس اهدي واخذي نفس هسه .. حاولي تهدئين.

سدن .. لا هذا من صدوك مو صاحي وربي .. اني ادعي عليه وهو خايف عليه!!
بقيت ساكته واجر نفس طويييل كل اشويه !
حسيت معدتي هدت ونفسي انتظم .. صرت احسن بس بعدني حاسه بدوخه بسيطه.

نور الدين .. صرتي احسن؟!

سدن .. اي بس اشويه دايخه.

نور الدين .. تمام انتظري هنا هسه اجيج .. لتطلعين من السياره.

سدن .. وين رايح وعايفني هنا .. ؟

نور الدين .. ثواني و ارجع لتخافين.

سدن .. لا لتروح عفيه وديني لبيتنا .

نور الدين .. تمام اوديج بس انتظري على ماارجع.

سدن .. عافني وراح لبنايه كبيره مطعم مااعرف فندق .. اني دخلت للسياره وسديت الباب عليه.
صدوك دقيقه يمكن ورجع !!!

نور الدين .. فتح الباب .. يلا انزلي.

سدن .. وين؟!!

نور الدين .. انزلي للمطعم اكلي شي انتي دايخه ولازم تاكلين.

سدن .. شنوو شنوو .. شدتحجي انت؟!
ادخل مطعم .. و وياك؟!
من كل عقلك اتريد واحد يشوفنا ويكول لبسام حتى يذبحني!

نور الدين .. لتخافين محد يشوفج بي اني وانتي صدكي ومحد يعرفج اصلاً.

سدن .. بعصبيه ما انزل .. ومااريد شييي بس وديني للبيـ.. آآخ راسي.

نور الدين .. تمام لتنزلين ابقي هنا هسه اجي.

سدن .. ويـ..ن .. بعدني دااحجي عافني وراح .. بس هالمره اتأخر .. رجع ولما رجع بيده علاكه كبيره!!
دخل للسياره وخلا العلاكه يمي ..

نور الدين .. اخذيها.

سدن .. شنو هذا ؟!!

نور الدين .. اكل .. بما انو مقبلتي تنزلين تاكلين الاكل اجه الج بنفسه.

سدن .. يا ربييي مااعرف اخاف لو اطيير من كلامه؟!
بقيت متردده اخاف الاكل بي شي .. صفنت ع الاكل وسكتت!

نور الدين .. كدامج الاكل اخذته من المطعم .. واذا تردين تتأكدين انطيني لفه اكلها كدامج حتى تصدكين مبي لا مخدر ولا شي.

سدن .. هااا .. اوك .. مديت ايدي فتحت العلاكه .. ما اكوللكم شنوو من اكل بداخلها .. حتى الي طالع من العمليات هستوه تنفتح نفسه ع الاكل .. واني تعرفوني مااحب اكل!!
اخذت لفه واكلت .. بس مكثرت لان هو كاعد يمي عيب هسه يكول هذي مشايفه!
اكلت لفه وعصير وعفت الباقي .. هو يسوق بهدوء ولا حجه كلمه حتى مباوعلي .. وصلنا نص الطريق جان يرن الموبايل!!!
طلعت الموبايل من جنطتي ... بسام يتصل بك!!!!!

گلبي يمكن وگف عن الحركه وقتها .. ع بالك بسام طلع كدامي مو اسمه بالموبايل!!
هو التفت شافني الظاهر الخوف كان واضح ع ملامحي .. لدرجه خلا يحجي ..!

نور الدين .. لتخافين .. جاوبي.

سدن .. شنـ..ـوو.. لا..اا .. ما اا جاوو ..ب

نور الدين .. كلتلج لتخافين كوليله اني بالمدرسه .

سدن .. بصوت مرتبك .. لا .. اخاف يعرف؟!!

نور الدين .. بس لتخافين وسوي الي اكلج عليه!

سدن .. بگلب يرجف ونفس مگطوع .. رديت ...

_ااا.. اللوو!

بسام .. انتي وين؟!

سدن .. ها .. بـ..ااا .. بـالمدر..سسـ..ـه.

بسام .. منو اخذج .. محمود يكول ما اخذج ويامن رحتي لعد؟!!

سدن .. هاا .. اايي .. مو ..مو محمود هذا .. شسمه ..!

بسام .. سدن اشبيج .. وانتي وييييين؟!!!!

سدن .. بلعت ريكها واستجمعت نفسها .. بالمدرسه .. اني بالمدرسه بسام .. كلتلك.

بسام .. منو اخذج اذا محمود مموصلج؟!

سدن .. رحت لوحدي .. لان محمود اتأخر .. واني عندي امتحان فأضطريت اروح.

بسام .. ماشي اني جايج للمدرسه حتى ارجعج .. اطلعيلي.

سدن .. بصدمه وخوف .. باوعت لنور الدين .. لكته صافن عليها بنظره هادئه وابتسامه .. شنووو ... تجيني ... هسه؟!!!!!!
بقيت صافنه بوجهه انتطر منه حل للمصيبه الي حتصير ..!

نور الدين .. هز راسه بهدوء بمعنى خلي يروح للمدرسه!

سدن .. الصدمه والرعب مااوصفه الكم لان مينوصف .. والاعظم من هذا كوله الكائن الثلجي الي كاعد يمي وبكل برود يكولي خلي يروح!!
بلا وعي طلع مني الكلام ..

_اوك تعال حطلع.

سد بسام الخط واني دخل اتنفست .. بس احس روحي حموت .. گلبي يدك بكل سرعته ..
التفت عليه ومااعرف شنو احجي!

نور الدين .. اهدي .. كلشي مراح يصير وبسام راح ياخذج من المدرسه.

سدن .. انت شدتحجي .. احنا وين والمدرسه وييين شيوصلنا قبله ومدرستي خطوتين عن بيتنا !!!

نور الدين .. بس اهدي واتركي كلشي عليه.

سدن .. صفنت بوجهه .. نبرة الثقه الي بكلامه وملامحه الهادئه حتخبلني .. جر الموبايل واتصل..!

نور الدين .. الوو انت وين؟!

سدن .. مااعرف شنو حجه ويا هذا الي اتصل بي .. بس سمعته هو .. يحجي بهدوئه المعتاد..!

نور الدين .. هسه تتصلي بـ بسام الاحمد وتكله يروح للشركه حالاً.
_وانت تروح تستقبله على ما اجي.
_تمام.

سدن .. سد الموبايل وكمل سياقه .. اني الصدمه والذهول والخوف والقلق كولهم متلبسين بيه .. بقيت ساكته الى ان وصلنا للمدرسه .. كلتله نزلني بعيد عن المدرسه ليشوفني احد وياك.

نور الدين .. تمام.

سدن .. هذا الكائن هواي يصرف تمام !!
يلا هسه شعليه بي اني .. اخذت جنطتي ودااريد انزل چان يحجي...!

نور الدين .. اذا حابه اتكولين لاخوج ع الي صار ماكو مشكله .. لكن خوفاً عليج ماانصحج بهذا الشي .. وانتي حره.

سدن .. حتى اذا مكلت البسام اساساً حيعرف كولشي .. اذا مو مني من المدرسه حيجي يسأل عني ويتأكد بنفسه .

نور الدين .. لتخافين اعتبري موضوع المدرسه منتهي مراح يعرف غير من عندج.

سدن .. اشون ميعرف شقصدك؟!

نور الدين .. اني راح اتصرف بهذا الخصوص .. ومحد راح يحجي شي عن غيابج لا لاخوج ولا الغيره.

سدن .. يا ربييي هذا فضيييع معقوله لهدرجه يكدر يسوي هيج!!!
والله مااعتقد يكدر يسكت ست سعديه هذي فضيحه.

نور الدين .. ها شقررتي ؟!!

سدن .. هاا .. اوك مراح اكول شي .. بس لتفكر تعيد الي سويته اليوم وتدز چلابك تخطفني مره ثانيه.

نور الدين .. ميتكرر ابد واتمنى تتقبلين أعتذاري .. او ع الاقل فكري بي.

سدن .. يااااي گلبي حيطير يا جماعه .. سبحانه مغيير الاحوال من خوف ورعب الى فرح وأطمئنان .. اوك حفكر .. بس عندي طلب اذا ممكن.

نور الدين .. وهو؟!

سدن .. تكدر تخليهم يعيدولي الامتحان لانو ضاع بسببك اصلاً.

نور الدين .. بأبتسامه .. ههه تمام .

سدن .. شنو يعني؟!!

نور الدين .. يعني اعتبري تم.

سدن .. گلبي كان ديطير من السعاده بس ملامحي بقت ممهتمه .. اوك شكراً.

نور الدين .. تمام .

سدن .. نزلت من السياره بس اني الكاع مسايعتني من الفرحه .. لان خلصت من تحقيق بسام .. ومن مشكلة الامتحان .. يا ربي شكراً الك .. اكيد انت دتكافأني لانو وعدتك بعد مااطول اللساني ولا اغلط .
نزلت من السياره وبنفس اللحظه طلعو الطلاب من المدرسه .. ركضت بسرعه دخلت بنصهم ... و وكفت ع الرصيف انتظر بسام .. چان يجي محمود بسيارتنا..!
رحت اني صعدت بالسياره ولا كأنو شي صاير ..

سدن .. اليوم الصبح لويش مأجيت محمود .. اشكد اتصلت عليك؟!
تعرف من وراك بسام سوالي قصه مالها اول من تالي!!

محمود .. اني اسف بنيتي بس الجهاز لاعبين بي الجهال ومسوي صامت ما سمعته الله شاهد واخذتني نومه .. اسف وحجيت ويا استاذ بسام وفهمته ع كلشي كلتله انتي ما الج علاقه .

سدن .. ايي كولش حيسكت بسام .. ع اساس متعرفه انت .. المهم لويش ما اجه هو مو كالي حيجي ياخذني هو؟!

محمود .. ماادري اتصلو بي من الشركه وراح .. كالي اني اوصلج.

سدن .. تمام .!
وصلت للبيت لكيت بسام ماكوو .. بدلت ونمت راسي حيل مصدع .. كعدت العصر ع صوت موبايلي .. صابرين دتتصل!!

حجيت وياها .. اول ما بدت اسألتها وتفاهتها ع الي صار الصبح وحبها الكبير وخوفها عليه ليكون صارلي شي !!
كلتلها انو كنت خايفه من الامتحان واتصلت ع بسام اجه اخذني.
طبعاً هي من سمعت بسام جاي للمدرسه وهي متدري... مو بس انجلطت صار بيها صرع .. بعد لغوه طووووويله .. كالتلي انو ست سعديه كالت مراح تعيد الامتحان بعد لو انموت!
كلتلها عادي مو مشكله !!
كالعاده اول ما خلص استحوابها بخصوص بسام .. سدت الخط وولت
اني بعد منمت نزلت جوه .. جان يجي بسام!!

بسام .. هلاو اجاج محمود اليوم؟!

سدن .. اي اجه .. لعد انت مو كلتلي حجيج لويش دزيت محمود؟!!

بسام .. صارتلي شغله ومكدرت .

سدن .. كنت اتحاشى اباوع لبسام من احجي ويا .. وخوف بداخلي مينوصف منه .. لان بحياتي ممكذبه عليه ولا طالعه بدون علمه .. لذلك كنت اخاف بس يباوع بعيوني انفضح وينكشف كولشي .. اوك.

بسام .. ليش رحتي للمدرسه اليوم وحدج اني شحجيت؟!

سدن .. كلتلك الي صار يا بسام .. واضطرييييت اروح.

بسام .. بعد لتكرريها .. واذا مااجه محمود كليلي واني اوديج.

سدن .. اوك.

كالعاده خلص اليوم .. ونمت الصبح رحت للدوام اخذني بسام .. اول مطلعت من البيت شفت سيارته واكفه براس الفرع!!
گلبي كام يدك سريع من شفتها .. بس سويت روحي عادي .. وصلت للمدرسه من شافني دخلت راح!
دخلت للصف وبدا الدرس والمفاجأه صارت... ست سعديه كالتلي سدن حظري نفسج الدرس الثاني تمتحنين!!!!!!!

طبعاً ما احجيلكم الصدمه الي كانت ع وجه صابرين .... نظرة الشماته الي بعيونها كوني بعد ماامتحن وحرسب بلحظه اتبخرت!
الصف كوله اتفاجأ اشون ست سعديه تعيد الامتحان!!!!!
هذي ست سعديه اقل اقل اقل ما يقال عنها حقنه .. واذا كالت ع شي لو يجي وزير التربيه بنفسه متغيره .. زين شنو الي صار هسه!!!!
اني بكل ثقه الغرور صار عندي مليون مو الف .. الدرس الثاني امتحنت .. وجاوبت الحمدلله من السعاده والراحه الي حاستها .
يمكن هذا احلى يوم بحياتي لحد الان .. بالنسبه الي معجزه ست سعديه تعيدلي الامتحان .... البنات كولها تتسائل اشون وليش!
كنت فرحانه فرحه من داخلي دتطلع احسها ... بس كل هذا اتبخر من رجعت للبيت.
خلص الدوام طلعت ، هم شفت سيارته واكفه يم المدرسه بقى ورانا من دخلت للبيت راح ..
دخلت البيت فارغ .. صعدت لغرفتي سبحت وبدلت .. چان اسمع صوت بسام يصيح!!!!
نزلت ركض .. لكيت بسام واكف والغضب يطلع نار من عيونه .. وصابرين واكفه بصفه والسم يتطاير من ضحكتها الخبيثه!!!!!!

بسام .. بصوت عالي مليان غضب ... وين كنتي البارحه وليش بالمدرسه غايبه؟!!!!!

للحكايه بقيه😍
للي يسألون عن سبب التأخير مو اختلاف بموعد النشر ولا عدم انتظام بمواعيدي لااا .. بس التفاعل ميشجع وما الي واهس اكملها ، اعرف حتكولون القصه بعدها بالبدايه وممفهومه لذلك التفاعل قليل وحقكم اكييد بهذا الشي بس اني طبيعتي هشكل اذا شي ميشجع يخرب واهسي بي 😪اعتذر منكم واحاول اشجع نفسي بنفسي😂

رأيكم بالاحداث وتوقعاتكم للبارت القادم 🤗
والي يكولون لويش نور الدين ميحجي هو عن نفسه اصبروو اشويه بعده ممعرفكم ع حاله ☺️
اشويه صبر حبايبي وجزيل الشكر لكل الي يعلقووون تعليقات حلوه مثل روحهم وكل الي يصوتووون 😘😙💜🙏🏻