رواية ﮼صفقة ﮼عشك الفصل الثاني والعشرون 22 - بقلم ﮼الاميره،الموسويه 👑

بقلمي الاميره الموسويه 👑

ما احلل لاي شخص ياخذ كتاباتي وينشرهم (ذمه)

                    راضيني اذا طال الزعل .. غير اليحب ميجافي!

نور الدين .. اخذت جنطتي ورجعت ع اول طياره للعراق .. طول الوقت انتظر ع احر من جمر (اشون انتو من تنتظرون البارت 😂) اريد اعرف شنو الي صاير ويمان اشبي!
نزلت للمطار زيد اتصل بيه كالي انو هو موجود بصالة الانتظار حتى ياخذني!
ممتفق ويا يجيني معقوله لهدرجه الموضوع خطر بحيث مستعجل!!
القلق زاد بداخلي والافكار اكلت عقلي .. اني الي شردت بيمان الامريكا عفته يرجع وحده وهسه الله اعلم شصايرله!
بالفعل اول مدخلت صالة الوصول لكيت زيد واكف سلم عليه واخذ جنطتي سألته شصاير ..

زيد .. باشا الموضوع مينحجي هنا ان شاء الله بس نوصل راح تفهم كلشي.

نورالدين .. زيد لتخبلني احجيلي يمان صايرله شي؟!

زيد .. لا والله باشا استاد يمان كلشي ما بي بس الموضوع يخص ابنه الصغير.

نورالدين .. ادم!!!!!!
اشبي ادم صايرله شي ، مريض ؟!

زيد .. باشا الله يخليك هسه نوصل وافهم السالفه من استاد بسام .

نورالدين .. تمام .

طلعنا اني وزيد بالسياره گبل لبيتنا القديم!!!!
بمجرد ما وصلت المنطقتنا الذكريات كلها ترست عقلي .. حسيت نفسي دااعيش كل ذكرى بتفاصيلها مره ثانيه!
وقلقي ع يمان وابنه كان راعبني لدرجة عقلي راد ينفجر .. تفكير وذكريات !!!
وصلنا للبيت العصر .. نزلت ركض حتى جنطتي منزلتها دخلت البيت فارغ!!
صحت يمان يمان .. ماكو احد!

اشويه واجتي وحده مااعرفها شكلها منظفه او مربيه سلمت عليه وكالت محد بالبيت السيد يمان والعائله طالعين!!

مجاوبتها جريت الموبايل اتصلت بيمان .. رد عليه

كلتله انت وين؟!

يمان .. اني بالطريق راجع للبيت  انت وين؟!

نورالدين .. اني بالبيت تعال بسرعه ترى اعصابي تلفت.

يمان .. هاي وصلت بس اركن السياره.

نورالدين .. سديت الخط و وكفت انتظره اريد بس اشوفه وافهم الموضوع .. دخل يمان ولما شفته استغربت!!!
دخل وبأيده كثييير جنط و اكياس تسوق مليانه اغراض!!
زوجته وكذلك هم دخلت محمله من غير الاغراض الي يدخل بيهم الحرس!!!

اجاني يمان حظني وسلمنا ع بعض وزوجته هم سلمت عليه .. بس اني كنت مستغرب من كمية الاغراض اولاً ومن الهدوء والابتسامه ع وجه يمان وزوجته مو مال واحد واكع بمصيبه مثل مكالي!!!
هناااا اني عرفت الموضوع عباره عن لعبه منه حتى يخليني اجي مثل ما كنت متوقع!
اني اعلمك زيد الا اكسر راسك تكلي يمان بمصيبه وتالي يطلع كذب!

يمان .. مدااصدك انت كدامي .. واخيراً اجيت.

نورالدين .. بحده وملامح جامده ..  يمان شنو الموضوع او المصيبه الي جبتني على مودها فهمني!

يمان .. ماكو اي مصيبه الموضوع وما بي انو باجر عيد ميلاد ادم راح يصير عمره سنه هذا اول ميلاد اله وانت عمه الوحيد وعائلتي الوحيده اشلون افرح بميلاد ابني وهيج مناسبه وانت مموجود؟!

نورالدين .. انت مخبل؟!
صارلي يومين اني عايش بقلق ردت انجن من خوفي عليك وتالي تكلي عيد ميلاد؟!!!

يمان .. نور ادري قلقتك بلا سبب واعرف سلبت راحتك ومن حقك اتعصب عليه وتنزعج
بس اني مستعد اتحمل كل غضبك وحتى لو تضربني هم عادي بس ما اسوي ميلاد ادم بدونك .

نورالدين .. اااااوووف منك ومن عقلك هذا المحجر تتخيل اني لو ادري بميلاد ابنك مااجي؟!
ليش مكلتلي عيد ميلاد ادم وتعال ، الا ترعبني وتقلقني.

يمان .. والله لو كايلك متجي شنو قابل مااعرفك.

نورالدين .. لا تعرفني بس غبائك واكف عائق.

يمان .. هههههه عمي اني غبي بس لتعصب دخيلك .. والله ممصدك كاعد يمي.

نورالدين .. كافي دراما خليني اكوم اخذ حمام وانام من البارحه منايم بسبب فلمك الهندي.

يمان .. اي اي كوم اخذ راحتك اسبح على ما اخلي ساهره تحضرلك الغده.

نورالدين .. مااريد اي شي خليني بس انام وعود من اكعد اكل .. بس خليهم يصعدولي الجنطه لغرفتي.

يمان .. ماشي براحتك هسه يصعدوهن.

نورالدين .. صعدت الغرفتي ... ايباااااااااه ولا عبالك صارلي سنتين مداخلها اتكول البارحه نايم بيها.
كنت تعبان حيل اخذت حمام ونمت مكعدت غير ع صوت الباب ديندك!!
طلع يمان جاي يكعدني لان الدنيا صارت ليل واني هواي نمت .. كعدني وراح اني بدلت ونزلت ورا.
لكيتهم كاعدين ع السفره ديتعشون سلمت وكعدت اكلت وياهم خلصنا جابولي ابنهم ادم .. عين الله عليه من طفل اتكول نازل من السماء خلقته اتخبل طالع على امه ما شاء الله حلوه.
ويمان هم مقاصر شكله بس الطفل اكثر شي يشبه لامه ومحبوب يضحك مو جامد حتى مستغربني!
من شلته حسيت بشعور حلوو ناعم وريحته غريبه ع بالك ويحة شي هاااادئ بحياتي مشام هيج ريحه اتحسسك بالدفو.

بقيته بحضني وكعدت يمهم انسولف ع الفتره الي بقيتها بدونهم بأمريكا وعن اوضاعهم هنا..!
زوجة يمان انسانه جداً راقيه وخفيفة ظل حتى متحس بوجودها وجها بشوش وهادئه .. فعلاً مثل متوقع يمان واحسن الاختيار.

لليل كلش نام ادم بحظني اخذته امه وراحت تنيمه ..

يمان .. نور اكو موضوع اريد افاتحك بي.

نورالدين .. اي كول!

يمان .. قبل كلشي مااريدك اتعصب هو مجرد نقاش.

نورالدين .. احجي يمان فضني لتضل تعتعت.

يمان .. الموضوع بخصوص سد..

نورالدين .. اسسسسسسسسكت لتكمل.

يمان .. نور الى متى تظل انت تتجنب هذا الموضوع والى متى تبقى على هذا حالك.

نورالدين .. وشنو بي حالي اشبيه ؟!

يمان .. عمرك راح يصير 40 سنه نور وانت الي وراك والي كدامك هسه عدهم 5 و 6 اطفال حتى اني الي كنت لاغي فكرة الزواج اتزوجت وصار عندي طفل انت شتنتظر؟!
الي صار سوء فهم اني مكنت ادري بيك اتحبها وماكنت احبها مجرد اعجاب والدليل اول ما شفت لارين حبيتها لو فعلاً كنت احبها وعندي هيج شعور تجاها ما كان نسيته بهالسرعه وهالسهوله انت تعرف شنو معنى الواحد لما يحب مستحيل ينسى الشخص الي يحبه واكبر اثبات انت لهذي لحظه متكدر لا تنساها ولا تكمل حياتك.

نورالدين .. كمت من مكاني .. بعدم اهتمام ولا كأني اسمعه .. اذا خلصت كلامك اني رايح انام.

يمان .. انت دتضيع حياتك هيج صدكني.

نورالدين .. بأبتسامه هادئه .. هي كانت حياتي وضيعتها خلص.

يمان .. مضاعت ولا شي البنيه اتحبك ومستحيل تنساك واني متأكد بعدها اتريدك!!

نورالدين .. تتخيل اكو وحده تقبل ترتبط بشخص باعها لاخو؟!!

يمان .. انت مبعتها كانت غايتك انو تكفر عن ذنبك تجاهي واعتقدت هذا هو الحل ولانها اغلى ما تملك قدمت كفاره لهذا الذنب.

نورالدين .. هذا الكلام فات اوانه خلص.

يمان .. لا ما خلص واني اعرفك انت متتخلى بسهوله عن شي تريده فما بالك بالانسانه الي اتحبها.

نورالدين .. حتى لو اريدها وحتى لو متمسك بيها .. هي مستحيل ترجعلي بعد او تسامحني.

يمان .. اني وياك صحيح هي انجرحت منك بس صدكني مستحيل تكرهك ماكو واحد يكره شخص يحبه لو شنو يسوي بي لان هذا شي نابع من گلبها ما العا سلطان عليه.

نورالدين .. شنو الفايده اذا تحبني  ومتتقبلني بحياتها؟!

يمان .. الحل بأيدك تكدر اتخليها تستعيد ثقتها من جديد وتخليها تتقبلك.

نورالدين .. شقصدك؟!!

يمان .. اتزوجها؟!

نورالدين .. مو اكلك انت غبي!
صارلي ساعه شألغي وياك دااكلك متريدني متطيقني اشلون توافق تتزوجني؟!

يمان .. مو ضروري اتوافق.

نورالدين .. اتريدني اجبرها؟!!
مستحيييييل حتى لو احبها واميت بيها .. مستحيل افرض نفسي عليها بالغصب.

يمان .. بس اسمعنيييي وافهم شدااحجي .. البنيه اتحبك بس اتكابر لان الي صار مو قليل لازم اتخليك تدفع ثمن الي سويته بيها ، بس صدكني تحبك والدليل اخوها بسام بلسانه كالي انو ديجوها خطابه وترفض تكدر اتكلي شنو السبب؟!!

نورالدين .. حتى ولو .. مااكدر اجبرها تتزوجني بدون رضاها.

يمان .. يعني احسن اتروح من ايدك وتصير لواحد غيرك؟!

نورالدين .. يمان لخاطر ربك لتحركلي اعصابي اني الي بيه مكفيني .

يمان .. نور انت اخويه الوحيد وشوفتك بهالحاله تحركلي روحي انت مملاحظ تصرفاتك ونفسيتك اشلون اتغيرت من يوم الي عفتها .. لمره وحده بحياتك اسمع كلامي ولتعاند .. عوف كبريائك هذا لخاطر حبك مره وحده بحياتك.

نورالدين .. اشلون اجبرها تتزوجني اشلوون من كل عقلك دتحجي يمان.

يمان .. بس بالبدايه راح تجبرها بس والله بعدين كلشي يتغير والمياه ترجع المجاريها .. هي من تشوفك متمسك بيها راح تتغير صدكني .

نورالدين .. ماادري يمان ممقتنع بهالكلام.

يمان .. ماشي هسه انت فكر بالموضوع وبعدها قرر.

نورالدين .. تمام .. يلا تصبح ع خير.

عفت يمان وصعدت الغرفتي .. كنت شبعان نوم ماكدرت انام والافكار غزت عقلي !
كلام يمان لخبط كل وضعي بقيت افكر بكلامه وحسيت بي نوع من الصحه .. يمكن اذا حست اني متمسك بيها واريدها راح ترجع تسامحني وتترك عنادها !
او يمكن راح تكرهني بالزايد وتعتبرني اريد اشتريها ..!

ااااوووووووووف فكره اتروووح وفكره تجي دمرت عقلي الافكار .. للصيح يلا اخذت عيني نوم!
كعدت اتقريباً ب11 الصبح لكيت البيت هوسه يعدلون ويرتبون بالديكور اهووووووو هي هاي العايزه!
سلمت عليهم وطلعت للشركه اريد اشوف الاوضاع شصاير مصاير بغيابي ، واكسر راس زيد بطريقي ع الدكه الي سواها بيه!
رحت للشركه ماكو شي متغير نفس وضعها بس المشاريع متوسعه وهذي عندي علم بيها لان كنت اديرها من مكاني بأمريكا .. رزلت زيد وكالي انو هذي اوامر يمان وهو مكدر يحرك الموضوع على اخويه!
صارت الساعه ب 12 ونص الظهر طلعت بالسياره رحت اتغديت و مااريد ارجع للبيت لان هوسه .. افتريت بالسياره وبلا وعي مني عقلي اخذني لبيتها .. فتت بشارعهم اااااااه احس ريحتها بي .. ماادري ما ادري شصارلي اريد بس اشوفها..
نزلت من السياره ووكفت اتأمل بابهم .. بيتهم .. شباك غرفتها .. باب شرفتها ...!
شي بداخلي كان يصارعني حتى بس يلمحها .. مااعرف اذا موجوده او لا .. راح تطلع واشوفها لو لا؟!
اتغيرت لو بعدها مثل ما عفتها؟!
تساؤلات هواااااي شغلت بالي .. واذا بالصدفه اتجيبها كدامي!!!!!!!
اجتي سيارة محمود ونزلت هي منها ......!!

مااحجيلكم گلبي شصار بي من شفتها .. يمكن انفجارات نوويه صارت بگلبي دكاته عجيبه غريبه !
الهوا احسه دينكطع .. او يمكن شوفتها خطفت انفاسي!
نزلت من السياره وكانت ملامحها مبتسمه او ما شافتني اختفت ابتسامتها ....!!
محمود شكله ما انتبه ع وجودي او مشافني لانه نزلها وطلع گبل .. هي بقت جامده بمكانها متتحرك!!
مشيت اني بتجاها كم خطوه وكفت ع مسافه قريبه منها .. وبصوت هادئ ..

_عاش من شافج!

سدن .. لحد يسألني عن شعوريييي ابد لان اني نفسي مااعرف شدااحس!
الي ديصير هذا اكيد حلم .. مستحيييييل يكون حقيقه!!!!
بعد كل هالغياب .. بعد كل هالعذاب .. بعد كل هالاذيه الي عشتها بسببه احساس الفقدان والخساره  .. يطلع كدامي بكل برود!!

شهالصلافه!!!!
محجيت شي لان الكلام الي بداخلي فجأه اتبخر واللساني انعقد بمحرد ما شفته!

نورالدين .. ليش ساكته؟!

سدن .. اخذت نفس حتى ادفع الكلام الي حشر بحنجرتي .. بصراحه ماعندي كلام لحقارتك!

نورالدين .. ابتسمت ودنكت .. صوتها مدخل الاذني لااااا راحت لگلبي واتشعبت بيييييي
_اممممم بعده اللسانج طويل.

سدن .. ميوصل نذالتك اكيد.

نورالدين .. لهدرجه كارهتني؟!

سدن .. منو كال اكرهك؟!
لا مااكرهك لانو اذا اكرهك يعني عندي شعور تجاهك وانت بالنسبه الي ولا شي.

نورالدين .. رغم روحي رجعت لما شفتها .. بس كلامها كان سيوف يگطع هذي الروح!

_كذابه.

سدن .. شعندك جاي لهنا؟!
وشكو رجعت اصلاً؟!

نورالدين ..امممممم اشتاقيتلج .

سدن ..كل الحقد الي بگلبي والوجع الي نخر روحي كلمه وحده هزت روحي لدرجه اتمنيت اركض عليه واحضنه ..  هههه  اكو واحد يشتاق لخطبية اخو؟!

نورالدين .. بغضب .. لتعيديها بعد.

سدن .. لويش متحب تذكر شهامتك لما بعتني؟

نورالدين .. سدن كافي .

سدن .. اذا الحقيقه تزعجك شكو اجيت؟!

نورالدين .. اجيت حتى احجي وياج وننسى الي صار .

سدن .. ههههههه لا صدوك؟!!
بعد عندك امنيه حاب اتكولها حضرت الباشا .. بلكي احققهم كلهم الك.

نورالدين .. بحده لتستهزئين .

سدن .. اهاااا لعد شنو اتريد اركض لحظنك واستقبلك بالاحظان؟!!
انت غبيييي لو تتغابى؟!!
شنو نسيييييت الي سويته بيه؟!
نسيت الشرط الي عرضته عليه؟!
نسيت كرامتي الي دستها؟!

نورالدين .. منسيت شي واذا تتذكرين رجعتلج بوقتها وطلبت منج اتسامحيني وتتركين الموضوع وترفضي ليمان .. بس انتي شسويتي؟!
لتخلين الغلط كله عليه .. اشكد اترجيتج ترفضي .. اشكد حجيت وياج حتى متوافقين؟!
انتي شنو كان ردج؟!
شنووو الي سويتي؟!
نسيتي؟!!!!

سدن .. منو كالك انو مشاعري لعبه عندك؟!
اتبيعني اليوم الاخوك وتضحي بيه وثاني يوم تجي اتكولي احبج ولتوافقين؟!
وتريدني اوافق واتبع اوامرك بلا اي نقاش؟!
ليكون مفكرني بلا گلب .. بلا مشاعر .. حيوان عندك مربي؟!

نورالدين .. كافي سدن احنا ثنينا غلطنا واثنينا دفعنا الثمن ،لا اني الي دفعت الثمن ببعدي عنج!
انتي يمكن كارهتني ونسيتيني بسهوله بسبب حقدج عليه .. بس اني كنت كل يوم اموت بغيابج !
كنت كل يوم اقاسي ابشع شعور واتعايش ويا في سبيل مااتذكرج!
لج اني بسببج حتى البلد تركته في سبيل ما اضعف واجيج وتتأذين بشوفتي والله متت بغيابج الموت شفته  بعد شتردين اكثر؟!

سدن .. مااريد منك شي ولتراويني خلقتك بعد.

نورالدين .. كنت احجي وياها ونار تحرك بروحي .. وصلت لحاله دموعي كانت راح تنزل بأي لحظه من الوجع الي احسه .. توقعتها من تسمع عذابي بدونها اتلين او ع الاقل اتحس بيه!
بس ردها دمر كل شفقه بداخلي !
بصوت حاد
_تمام راح اروح بس خلي يكون ببالج .. الي راح يصير انتي الي جبرتيني اسوي.

سدن .. اعلى ما بخيلك اركبى.

نورالدين .. تمام .. حظري روحج للي راح اتعيشي منا ورايح.

للحكايه بقيه 💔
لحد اتكول البارت قصير رجاءاً داانزل الاحداث بالتسلسل لتستعجلني والنشر بين يوم ويوم حتى لحد تسأل بعد اشوكت اتكملين 😪
رأيكم بالاحداث وتوقعاتكم للبارت القادم .
لتنسووووووووووووووووووووون التصويت