رواية ﮼صفقة ﮼عشك الفصل العشرون 20 - بقلم ﮼الاميره،الموسويه 👑

بقلمي (هدى الموسوي ) الاميره الموسويه👑

ما احلل الـ أي شخص ياخذ كتاباتي وينشرهم (ذمه)

سدن .. بسااااام انت شدتحجي؟!

بسام .. انتي سدي حلكج ولتحجين احسنلج.

سدن .. لا ما اسكت و مو بكيفك .. هذي حياتي الي واني حره بيها انت الي ما الك اي حق تتدخل بيها وتمشيها ع مزاجك.

بسام .. لج دااكول اسكتـ....

الاب .. بغضب  بسام احترم نفسك وانتبه على روحك انت وين كاعد.

بسام .. اني اعرف نفسي شدااحجي ويمان من حقه يعرف الحقيقه قبل لا يدمر حياة اخو.

الشيخ .. اخوان اني عندي شغل ولازم اروح اكو خطوبه اليوم لو اتوكل؟!

محمود .. احنا اسفين شيخنا راح انأخرك اشويه اتفضل وياي بره على ما ينحل الموضوع وان شاء الله تخلص شغلك وتتوكل.

طلع محمود والشيخ بره وبقى بسام وسدن واحد يشد و واحد يكبس ..

يمان .. اذا ممكن احد يفهمني شنو الموضوع؟!

سدن .. ماكو اي موضوع بسام يريد يخرب الخطوبه وبس معليك منه.

بسام .. اخرب الخطوبه مو؟!
ماشي اني راح احجي الموضوع كله اليمان وهو بعدها يقرر.

سدن .. متحجي شي ولتتدخل اصلاً .

يمان .. لا احجي .... لازم اعرف شنو السالفه ونورالدين شنو علاقته بيج!!
احجي بسام اسمعك .....

بسام .. يمان انت تعرف معزتك ومكانتك عندي انت مثل اخويه واكثر والكلام الي راح اكوله وتسمعه مو حتى اخرب خطوبتك مثل مكالتلك .. لا بس اني مااريدك تخسر اخوك خصوصاً اني اعرف شنو نورالدين بالنسبه الك..

يمان .. رجاءاً بلا مقدمات وفهمني شنووو الموضوع.!!

بسام .. ماشي .. مثل مكلتلك الموضوع وما بي انو نورالدين سبق واتقدم لخطبة سدن اكثر من مره .. يعني اخوك عنده مشاعر تجاها والا ليش يضل مصر انو يرتبط بيها وينتظرها الى ان اتوافق؟!

يمان .. نورالدين مستحيل يضم عليه هيج شي ؟!
ليش ما عندي علم بخطوبته .. هو ميحب يسوي شي بالسر خصوصاً بمثل هذي الامور الزواج والارتباط !

بسام .. تتذكر حفل الخطوبه الي سوا الباشا قبل فتره؟!!

يمان .. اي ؟! هذا السؤال جوابه تاخذه من نورالدين نفسه.

يمان .. زين ليش اتقدم اكثر من مره اكيد سدن رفضته؟!!!!

سدن .. يلا بسام جاوب ... كوله لويش رافضته؟!

بسام ..  رفضته لانها ع مفكره انو الباشا معتبرها صفقه وانو احنا دنبيعها اله.

سدن ..كذاب ..... رفضته لانو مااطيقه وماعندي اي شعور تجاهه.

يمان .. يعني افهم من كلامج عندج مشاعر تجاهي لذلك وافقتي ترتبطين بيه!!!!

سدن .. يمان ارجوك مااعتقد هذا سؤالك وقته هسه.

الاب .. سدن امشي روحي لغرفتج.

سدن .. بابا ..

الاب .. دااكول روحييييي لغرفتج.

سدن .. خلص بسام الحقير سوه الي براسه وخرب كولشي .. بس الا ادمرلك حياتك يا بسام واندمك ع الي سويته.
عفتهم وصعد الغرفتي .. معرفت شنو الي صار .. يمان شنو رده .. اشون انتهى النقاش ... ولويش راح!!!
بقيت بغرفتي الى ان سمعت صوت بابا يصيحني ..

الاب .. وليدي يمان انت حسبت بسام ابني ومعزتك من معزته الله شاهد بس لكل شي حدود ..!
سدن بنتي مو لاكيها بالشارع دمي ولحمي تعبت عليها وربيتها فأعتقد مو من الاخلاق تحجي وياها هالكلام وهالاسئله واحنا واكفين ما عبرتنا ، ترى البيوت واهلها الهم حرمه المفروض تنتبه لكلامك.

يمان .. اني مكلت شي غلط سيد كريم حتى تنطيني محاضره بالاخلاق والادب ، كل ما هنالك سألتها عن مشاعرها تجاهي واعتقد هذا الشي من حقي .. الي كل الحق اعرف حقيقه مشاعر الانسانه الي راح ارتبط بيها.

ابو بسام .. اعرف ابني اكيد من حقك بس ع الاقل كان حسبت حسابنا اني واخوها .. انت تتسمى غريب عنها هي مو خطيبتك.

يمان .. سيد كريم كل الي كلته حضرتك احترمه .. بس رجاءاً اترك هذا الموضوع وفهمني شنو سالفة سدن ونور الدين؟!

ابو بسام .. مثل ما سمعت من بسام اخوك سبق واتقدم لبنتي سدن وطلب ايدها مني بس هي رفضت لانها اتريد اتكمل دراستها.

يمان .. بس لهذا السبب؟!!!!

بسام .. لا اكيـ...

الاب .. بساااام .

ابني يمان اذا اتريد تفهم الموضوع اكثر وتتأكد من كلامنا اخوك موجود وتكدر تفهم منه كلشي.

يمان .. ماشي اني راح احجي ويا نورالدين وافهم السالفه منه .. بس عندي طلب منك.

ابو بسام .. اتفضل شنو هو؟!

يمان .. اريد نأجل الخطوبه لغير يوم.

الاب .. براحتك ابني واني هم هذا رأيي .

يمان .. يلا اني اترخص اذا ممكن تصيح محمود يجي يوصلني.

بسام .. اي هسه اصيحه.

راح بسام اتفاهم ويا الشيخ و انطى حسابه وراح لانو بقى ينتظر هواي ومحمود اخذ يمان وراحو لبيتهم.

رجع بسام للبيت وابو صاح ع سدن ....

الاب .. سدن ... سدن ...

سدن .. نزلت اشوف بابا شنو يريد لكيته بس هو وبسام بالصاله!!

الاب .. تعالي بنتي اريد احجي وياج.

سدن .. لويش هو شنو الي بقى حتى نحجي؟!
ابن حضرتك سوا الشي الوحيد الي فالح بي يخرب كولشي.

بسام .. لج الزمي اللسانج لا اكصه الج.

سدن .. مرح اسكوت فهمت لووو لا .. مراح اسكوت وهذا الزواج غصباً عنك حيصير.

بسام .. الغضب الي انرسم ع ملامحه مينوصف .. راد يلزمها يموتها بس ابو اتدخل...

الاب .. سدن انتبهي الالفاظج هذا اخوج واكبر منج من تحجين ويا احجي بأحترام.

سدن .. بابا الله يخليك اترجاك فهمه انو هذي حياتي وهو ما اله اي حق يتدخل بيها.

الاب .. بسام اخوج ورايد مصلحتج .

سدن .. مصلحتي اني اعرفها كولش زين .. خلي هو ينتبه لمصلحته.

بسام .. بابا هاي مو مال عيني واغاتي شوف اللسانها شطوله .. كلتلك عوفها عليه واني اتصرف مسمعت مني.

سدن .. ههه اشونك انت عاد .

الاب .. انتووووو وتالي وياكم؟!
متكولون ابونا واكف .. كاعدين تتعاركون كدامي وعايزكم بس تتكافشون.

سدن .. بابـ...

الاب .. اسسسسس ولا كلمه انتي بالذات مااريد اسمع صوتج ، تصرفاتج واسلوبج ابد ماعاجبيني مو لاني وافقت ع القرار الي اتخذتي معناها اقبل تتجاوزين حدودج وتتمادين!
لتخليني اتصرف وياج تصرف ثاني .
الكلام الي راح اكوله موجه الكم انتو الاثنين ومراح ينعاد ، ومااريد اي نقاش بي ، والا متلومون غير نفسكم .

اولاً موضوع الزواج ينسد نهائياً ومااريده ينفتح بهالبيت ولا تتناقشون بي ابد مصارت القسمه وخلص.

ثانياً بسام اول واخر مره تتصرف من كيفك مثل تصرفك اليوم لا عبالك اني راضي عن الاحراج الي حطيتني بي كدام الناس.

بسام .. بابا اني مو حجيت وياك وفهمتك الموضوع وتباعته وانت ايدتني اشلون اتوافق على هيج شي شنو الي صار؟!
معقوله اتخلي سدن هاي الطفله تلعب بيك وتمشيك ع كلامها.

الاب .. انجب لتحجي و خليني اكمل كلامي .. اختك مو طفله وهي مسؤوله عن تصرفاتها اذا كانت مقتنعه بيمان هذا شي يخصها بس ... خلي يكون بعلمج سدن اي شي يصير مستقبلاً انتي تتحملي ولتفكرين مجرد تفكير تجين فد يوم واتكولين اريد اتطلك !
الطلاك تمحي من حياتج لان هذا اختيارج واني واخوج حاولنا ننصحج مقتنعتي واصريتي ع رأيج لذلك انتي تتحملين العواقب.

سدن .. اني اتحمل كل النتائج ولتخاف بابا مراح اطلب هيج شي.

الاب .. هذا اخر كلام ومااريد اي نقاشات بعد ولا اريد اسمع عرك ولغوه زايده فهمتو لو لا.

بسام .. الي ديصير اكبر غلط.

سدن .. خليك بحالك انت.

الاب .. روحو من وجهي وكافي الموضوع انسد.

سدن .. بابا كان داعمني كدام بسام وما حاول يغيرلي رأيي او يجبرني ارفض الزواج من يمان رغم كل الدراما الي سواها بسام .. بس مااعرف لويش كلامه الاخير عن قراراتي والمستقبل خوفني!!!
حسيت اني داارتكب غلط كولش كبير بحق نفسي .. مهما يكون الحقد والغضب الي حسيته بسبب نورالدين مو عذر حتى ادمر حياتي بهالطريقه وارتبط بشخص مااحبه واحب اخو!
مجرد شعوري تجاه اخو واني على ذمته هذي اكبر جريمه ميعاقب عليها القانون بس ربي يعاقبني .
وين تردين توصلين بهذا عنادج سدن راح تدمرين حياتج وحياة اشخاص غيرج.
بعد تأنيب ضمير قاسي وتفكير طوييييييل .. توصلت القرار نهائي !
خلص هذي اللعبه لازم تنتهي وارفض يمان اذا اتقدملي مره ثانيه .. خصوصاً اني الي اريده صار ويمان عرف بمشاعر اخو تجاهي .. اكيد هسه حيسأله ويعرف كولشي.

بهذي الاثناء وصل يمان لبيتهم .....
دخله محمود للبيت وراح كالعاده البيت كان فارغ ما بي غير المنظف والممرضه !!
سأل عن نورالدين كالوله بالمكتب مالته ماعد من الصبح!!!!!!!!

يمان .. يعني مطلع من البيت؟!

المنظف .. لا سيد يمان الباشا بالمكتب من طلعت حضرتك لحد الان.

يمان .. اهاااااا لعد اشلون من كلتله امشي وياي للخطوبه كال عندي اجتماع؟!!
ماشي ..  روح انت شوف شغلك ولحد يدخل علينا للمكتب.

راح يمان للمكتب فتح الباب ودخل بدون ميطرقه او يستأذن!

دخل وكان المنظر الي كدامه كارثي... المكتب مگلوب رأساً على عقب الاوراق بكل مكان كزاز مكسر بالكاع !
ودخان الجكاير مالي الغرفه!!!!!
ميحتاج بعد يسأل اخوو اي شي ولا يحتاج يعرف حقيقة مشاعرة تجاه خطيبته المستقبليه!!
لانو وضع الغرفه والفوضى الي بيها شرحت كولشي.
هو كان امدد ع التخم الي بالمكتب ومخلي ايد ع وجهه والثانيه بيها الجكاره!
بصوت حاد وبتسائل حجه يمان ...

_شصاير؟!!

نورالدين .. من سمع صوت يمان فز من مكانه وكام بتعب وهدوء عدل كعدته ..
بصوت جامد بلا اي اهتمام ...

_اشوكت رجعت؟!

يمان .. بالاول جاوب ع سؤالي ليش هيج المكتب مكلوب ؟!

نورالدين .. ماكو شي تعديل مزاج.

يمان .. اهاا ومزاجك شنو الي معكره لهدرجه بحيث اتكسر البيت؟!

نورالدين .. بصوت حاد وغضب .. كلتلك ماكووو شي شنوو هو تحقيق؟!

يمان .. وانت ليش تصيح؟!

نورالدين .. اووووووف يمان كلتلك ماكوو شي عصبت اشويه وانت تعرفني من اعصب لازم اكسر شي.

يمان .. اي اعرف بس شنو السبب الي خلاك تعصب؟!

نورالدين .. خسرت صفقه مهمه .

يمان .. انت كل مره تخسر وتربح بالشغل شي طبيعي هذا مشفتك فد يوم معصب هيج!!

نورالدين .. هذي الصفقه غير !

يمان .. اها .. وشنو الي بيها يختلف؟!!

نورالدين .. يمان اترك الموضوع ما الي خلك احجي .. انت احجيلي ع خطوبتك شصار ؟!

يمان .. هو دااحجي عنها.

نورالدين .. مفهمت ؟!

يمان .. نور اريد أسألك سؤال بخصوص هذي الصفقه وجاوبني بصراحه .

نورالدين .. اشبيك يمان شنو اسلوب التحقيق هذا شصايرلك ؟!
اني الي خسرت الصفقه مو انت حتى تستجوبني.

يمان .. لا اثنينا خسرنا مو بس انت.

نورالدين .. شدتخربط انت؟!

يمان .. سدن بالنسبه الك صفقه؟!!

نورالدين .. مستحيل يكون يمان عرف بالموضوع!!!!!!!!

يمان .. ليش سكتت؟!

نورالدين .. انت لوين اتريد توصل يمان احجيلي وبلا لف ودوران مناقصك اني.

يمان .. هو سؤال واحد وجاوبني عليه ... شنو علاقتك بسدن؟!

نورالدين .. كعدت بصدمه من كلام يمان الظاهر فات الاوان .. ماعندي اي علاقه بيها ليش السؤال؟!

يمان .. يعني ممتقدملها؟!

نورالدين .. انت منو الي كالك هالكلام؟!

يمان .. اي لو لا نور جاوبني.

نورالدين .. اي تقدمتلها من زمان بس رفضت .. وانتهى الموضوع.

يمان .. اهاا يعني ما تقدمتلها مره ثانيه؟!
والحفله مالت الخطوبه الي سويتها ولغيتها مو هي المقصوده بيها؟!
زين لويش بقيت تنتظرها؟!!
ولويش اتقدمتلها اكثر من مره وبقيت مصر الا تتزوجها هي بالذات؟!!

نورالدين .. انت منين جبت هالكلام؟!!

يمان .. بصوت عالي ونبره غاضبه .. معليك منو كالي ومن وين عرفت هالكلام جاوبني وبس شنو علاقتك بيها .. وليش ما كلتلي بالحقيقه وليش معترضت لما كلتلك راح اتقدملها؟!

نورالدين .. بصوت غاضب وحاد .. انت منو انت حتى تستجوبني؟!
وشنو انت حتى تتدخل بخصوصياتي ؟!
اتريد تتزوجها هذيج هي وروح اتقدملها ما الي اي علاقه لا بيك ولا بيها بس!!!!!
دير بالك تعيش دور المسؤول عني وتستجوبني الظاهر نسيت اني منو.

يمان .. منسيت شي انت اخويه الكبير وكل الي اني بي حالياً بفضلك حتى حالتي هذي هم بفضلك.

نورالدين .. سهم ودخل بنص گلبي كلام يمان !!!
رغم هو يعرف اني السبب بألي صارله بس ولا مره حسسني بهذا الشي او كالي هالكلام غير هالمره.
والحقيقه المره هي كلامه صحيح!

_اي صحيح اني سبب الي انت بي ودااكفر عن غلطي.

يمان .. معقوله؟!!
مدااصدك انت نورالدين اخويه الي اعرفه !
تصدك عاد طول عمري الي خلصته وياك لاول مره احس انك غبي وجبان.

نورالدين .. يمكن غبي اي .. وغبائي هذا سببه گلبي بس ابد مو جبان !
الي يسوي الي اني سويته مستحيل يكون جبان .. لان اشجع شجعان الكون كدام مشاعره يضعف ويجبن!
شجاعته تخذله لما يكون الموضوع متعلق بگلبه وعواطفه .
الا اني اتطلب مني الامر استنزف كل شجاعتي حتى اواجه حب حياتي واجبرها ترتبط بيك وتنساني.

يمان .. لهدرجه اتحس بالذنب تجاهي؟!
لهدرجه اني عبئ عليك؟!!

نورالدين .. كمت من مكاني وركعت كدام كرسي يمان المتحرك .. لزمته من وجهه خليت عيني بعينه احس عبرة الدنيا كلها متكسره بصدري مااريد اخويه يحس بالنقص لو انه عاله عليه.
بصوت مخنوك ...

_الي سويته مو بسبب احساسي بالذنب تجاهك!
لا اني ضحيت بحبي بس حتى اشوفك انت سعيد .. انت بالنسبه الي العائله الوحيده الي املكها .. انت ريحة امي وابويه .. انت امانتهم وذكراهم الوحيده .. سعادتك هي سعادتي .
هذا الي خلاني اسوي الي سويته وأن كانت هي اغلى من روحي نفسها .. بس ماكو شي بالوجود يستاهل اخسرك لاجله.

يمان .. حتى سدن؟!!!!

نورالدين .. بعدت عنه ودنكت ... اذا كانت هي سبب بخسارتي الك ما اريدها.

يمان .. وليش تخسرني؟!

نورالدين .. يمان اني وانت اثنينا نعرف انك عندك مشاعر تجاها والا ما كان اختاريت ترتبط بيها.
اني اعرفك كلش زين ما فد يوم فكرت تتزوج وترتبط الا لما شفتها .. فشلون اتريدني اجي اكلك لا متتزوجها لان اني احبها؟!!
اشلون تريدني انهي سعادتك بس حتى ابني سعادتي اني؟!

يمان .. نور اني ماانكر انو معجب بيها وعندي تجاها مشاعر .. بس هذا مو معنى ارضى اتزوج الانسانه الي يحبها اخويه.

نورالدين .. لا اني اتنازلت عنها وبرضاتي .. وتكدر تتزوجها ماكو اي شي يمنع.

يمان .. هه اني مو طفل حتى تقنعني بكلمتين .. سدن الك ومتصير لغيرك لا الي ولا لاي احد ثاني.

نورالدين .. مستحيل.

يمان .. شقصدك؟!

نورالدين .. مستحيل ارتبط بيها وتتسمى عليه مره واخويه اتقدملها.

يمان .. اني وانت واحد وسعادتك هي سعادتي لتتخيل انو اذا اتزوجتها راح انزعج لو انقهر بالعكس والله افرح لما اشوفك عريس .

نورالدين .. يمان سدن بالنسبه الي صفحه وطويتها نهائياً .

يمان .. مو بكيفك الموضوع بعده منتهى واحنا بعدنا بيها .. والخطبه راح اتم بس بدل ما اني اتقدملها انت هالمره تتقدم.

نورالدين .. انت شدتحجيييييي ؟!
شنو هي لعبة شطرنج ونتبادل الاماكن؟!
يمان الموضوع مو قصة خطوبه ومنو يتقدم .. الموضوع مشاعر اخي وعواطف مو سلعة مشاعرك واتاجر بيها .. ولا ارضاها ع نفسي ارتبذ بوحده كانت راح تتسمى مرت اخويه.

يمان .. اسمعـ...

نورالدين .. يمان سد الموضوع ولتعيد الكلام الي كلته نهائياً ابد ابد لتكرره اترجاك.

يمان .. ماشي واني هم مستحيل ارتبط بيها بعد.

نورالدين .. انتـ...

يمان .. ماكو داعي نحجي اكثر نور .. برأيي الانسانه متصلح الاي واحد بينا بعد.

نورالدين .. ماكو رد.

يمان .. اني تعبان لازم ارتاح.
عاف نورالدين وطلع يمان ... اثنينهم كانت گلوبهم مكسوره .. اثنينهم كانو حاسين بالذنب!!
بس الطرفين اتنازلو وانتهى النزاع .. الطرفين اتفقو انو يتخلون عنها.

بعد هذا الكلام الي دار بينهم مرت الايام ونور الدين ميلتقى بأخو ولا يرجع للبيت ابد !
يخلص الوقت بالشغل وبالليل ينام بواحد من الفنادق الي يملكها .. اما يمان حاول يتناسى الموضوع مثل اخو ويعيش كأنو مصاير شي بس وضعه مكان يسمحله يطلع او يشوف ناس او حتى يرتبط مثل قبل حتى ينسى!
لذلك حالته انتكست جداً .. واضطر يلجأ للكحول ومخدرات حتى ينسى الي صار فتحول الى مدمن !!!!!
بعد مرور فتره ع هالحال وصلت الاخبار النورالدين انو اخو بالمستشفى!!!
ترك كولشي وراحله .. هناك الاطباء كالوله انو حالته حيل متدهوره وماخذ جرعه كلش كبيره من المخدرات!
بلا اي تفكير نور الدين حجز تذكرتين سفر .. عاف كولشي واخذ يمان وسافرو !!!!!!!!
سافرت بدون محد يعرف اخذته وطلعت لأمريكا .. ابذلت اقصى ما املك حتى اساعده ويتعالج.
بالبدايه يمان كانت نفسيته متدمره بسبب الادمان وعلاقتي بي مو هالكد لان كان محملني اني ذنب الي صار بي!
فأني قدرت وضعه واتحملت كل تصرفاته ومعاملته المجحفه الي ، كلت حقه بكل الي يسوي لان الي صار مو قليل.
اشويه اشويه بدت حالته تتحسن ومزاجه كذلك ، زعله مني وغضبه اتبخرو مع الوقت .
بعد معاناة .. عذاب وسهر .. اتحسنت حالتة وبدا يستعيد عافيته !
اتخلص من الادمان وانتقل الى مرحله جديده وهي علاج رجليه!!!
رغم انو الاطباء بالعراق كالولي انه مسألة شفاء يمان مستحيله وانه مراح يكدر يمشي على رجليه مره ثانيه ابد.
بس الطب بالخارج متطور اكثر فأنطوني أمل كبير بجاح علاجه!
الكن يحتاج فلوس ولحسن الحظ اني امتلك الي يمكني من علاج اخويه وزايد  كل ما املك فدوه بس يتعالج يمان و قليل بحقه.
عرضته ع عدة اطباء شخصو حالته والضرر .. بعد تحاليل ومراجعات وهوسه ... خضع يمان لـ4 عمليات جراحيه!
2 بظهره و 2 برجليه.
ما احجيلكم شعوري لما اخذو للعمليات .. حسيت نفسي دااودع الدنيا كلها مو اخويه!
طول مدة العمليه الي استمرت 8 ساعات كنت عايش برعب وقلق .. بس أملي بألله كان كبير.
وفعلا نجحت العمليه وطلع يمان سلامات.....!

بعدها بالعلاج الطبيعي واستمر 6 اشهر متواصله ... اخرها كام يمان ع حيله!
فرحتي بشفاء يمان كانت اتعادل كنوز الدنيا عندي .. من شفته واكف ع رجليه مره ثانيه حسيت نفسي شفت امي وابويه كدامي!
اتحسن يمان ورجع لحياته الطبيعيه .. بس من محاسن الصدف انه وگع بالحب!
اتخيلو يمان يحب كنت مفكر بعده يفكر بـيها ويريدها ....!
بس لما صارحني بحقيقه مشاعره تجاه الممرضه الخاصه بعلاجه الطبيعي هنا صدمني!!

للحكايه بقيه 💔

عذراً ع التأخير وباجر راح ينزل بارت ثاني
رأيكم بالاحداث وتوقعاتكم للبارت القادم .. لتنسووووووون التصويت 🙋🏻‍♀️