رواية سجينة الروح الفصل الثالث وثلاثون 33 - بقلم ريام هادي

سجينة الروح
للكاتبة Reem
البارت الثاني والثلاثون
بارت طويل لعيونكم 🥰
(لسان حال ابراهيم )

جنت شمعة بحياتك تطرد الليل
هسه الشمعة ذابت بيش اضويك
اترس حضني الك بدموع العيون
واذا راحن عيوني اشلون ارويك
من ماي الكلب شربتك وياي♥
وافتحلك نهر من كلبي وسكيك
هسه الكلب مات او مو كلب صار
جثه ابنص جسم حاجيني شنطيك
لميتك دمع بعيون الايام ♥♥
كلي شراح اكلهن لمن ابجيك
ألملم ذكرياتك حتى ارتاح♥
وشوف شباقي بيهن حتى ابديك
طبع ذيب الوكت لتأمنه الجروح
زمان الضحكك لازم يبجيك ♥♥

ابراهيم : يمه وينج
فضيلة : دخيلك ياابا الحسن وركضت شبيك وليدي صار شى شنهي صوتك رجنا رچ
ابراهيم : يمه انت صگد كايله لأيه انتي خاطبه بت عمي ليه
أيه : باوعت عليه تريد تاكلني وترجف وتحجي والكل صافن واني مسحت دمعتي بس عيوني دم واكفه مسافه عن ابراهيم
فضيلة : شنهي يمه گالب البيت گلاب علمود هيچ
ابراهيم : احجي يمه انتي هيچ كايله
فضيلة : اي وخطبتها واحسب احسابك گلها چم يوم ونمشي عليها
ابراهيم : شنهي بكيفج انه طفل لو لعبه بيدج
حامد : ابراهيم شنهي هذا حسك تسودنت
الحجية جميله: يمه ابراهيم شجرالك نسيت هاي امك
ابراهيم : يابه امي دمرتني گضت عليه مارحمت بحالي
حامد : فهمني ترعد وتصيح غير افتهمن شجرى وامك شنهي السوته
ابراهيم : كالت لأيه خطبت زهره بت عمي اليه وهي متصلح تكون مرتي ومتوسله بيها علمود ترضى بمنير ومو بعيد شغله منير هيه مسويتها حتى متصير اليه
حامد : وانت شلك دخل بأيه
ابراهيم : انه اريدنها يابه وامي تعرف انه من زمان اريدنها
حامد : شنهي لا انت اكيد تهذري
ابراهيم : لا يابه انه اريدنها وگلت بس اطلع من السجن اخطبها منك
فضيلة : على جثتي تاخذها
ابراهيم : ليش شسوت الج البت
فضيلة : ماتصلح ليك يمه
ابراهيم : وانه اعشكنها وماتصير لغيري لو اسوي الدم للرچاب

حامد : (بعيطه قويه ) ابراهيم الزم حدك وحسك مااهيسه چا انه واكف وتهدد هذا احترامك
ابراهيم : يابه مكعد تسمعها
حامد : هاي امك والها گل الحگ عليك واذا عندك حگ تاخذه وحسك ناصي وتحجي بأحترام لاتنسى نفسك وتصير عاق الوالدين
ابراهيم : يابه انه ادمرت والي ادمرتني امي حرمتني من الحياه وانه عايش ترضى الي سوته تخلي البت توافق على ولد عمها وتوسل بيها حتى من اطلع مااخطبها توكعها بهبيه وتصير علچ بحلك الگل حتى تعوفني وفوكاها تكول البت ماتريدك وخانتك تشوفني مثل السمچه المزوهره جدامها وماهزها گلبها وترحم بيه شون تريدني اسكت ومااعيط
حامد : هذا الشى صار فضيله احجي

فضيلة : لا خوي ماكو هيج ايه تكذب هيه رضت بمنير والحجي والي جرى گله جدامگم وهيه صغيره وماتعرف تحجى وذبت البلا عليه
أيه : لا والله بابا عمه اجتي وكالت انخطبي لمنير واني بالسادس اخليج تنفصخين منه بس اقبلي هسه ومجنت ادري ابراهيم راح يطلع من السجن وصدكت كلامها

حامد : انتي ليش هنا روحي للبيت يله
ابراهيم : يابه اسمع منها
حامد : ايه روحي للبيت بسرعه وانت اسگت حسابك بعدين وياي
أيه : طلعت اركض والدمعه بعيوني دخلت ابجي واول مشافتني ماما
يمامه : شبيج ايوو
أيه : هنا بعد متحملت وكمت ابجي واحجي
يمامه : وليش مكتيلي هيج عمتج كالت الج يعني انتي واختج راح تجلطوني هاي تالي سكوتكم لو كايله اليه جان عرفت شون الزمهم عند حدهم ومتنخطبين لمنير بس شون اذا متشلعن گلبي مترتاحن وفوكاها عيني عينك تكول كدام حامد اريده وسكتيني وهسه جايه تبجين بله شأسوي احرك روحي حتى ترتاحين انتي واختج كتلج ماما ارفضي ماانطيج كمت تتوسلين وافقي

أيه : عمه ظلت تتوسل بيه وانقهرت عليها
يمامه : وعمتج بشنو فادتج هاي تاليها ليش هيج انتي جبانه وتنهزين من كلمه متكوليلي يعني الله انطاني وحده لسانها متبري منها والثانيه جبانه ومطفيه وتخاف من خيالها شون ربي شسوي واعدل بيجن
أيه : ماما فدوه هسه صارت عركه هناك شون اخاف بابا حامد يجي ويرزلني
يمامه : لو منه اضربج انتي قبلتي على منير شعندج رحتي على ابراهيم وكولشي حجيتيله وعلكتيها
أيه : بالبدايه كتله اني موافقه لان ابن عمي واولى بيه بس من شفته بجى وانهار مكدرت حجيت كولشي
يمامه : ايه ماما انتي تحبين ابراهيم احجي انتي تحبي شو سكتي

أيه : بقيت ابجي ومحجيت كولشي استحي من ماما ومن اي احد يسألني هذا السؤال
يمامه : اصعدي فوك والله يستر من الجاي واذا اجه حامد حاولي لتشوفي وجهج لحد منشوف هذا الموضوع لوين يصفى
واني رايحه اشوف شصار وارجع

دخلت وسمعت العياط ماخذ الدنيا وحامد صاير نار
ابراهيم : يابه ابوس ايدك طلكها من منير انه مااكدر اعيش بدونها انه انظلمت وهيه صغيره ماتعرف تصرف
الحجية جميله: سوده بوجهك شون يطلكها من ولد عمها وتاخذها چا هيه وليه
حامد : فضيله اخذي امي وادخلو لحجرتها وانت تعال وياي
ابراهيم : يابه
حامد : انه شحجيت تعال وياي
يمامه : وين رايح حامد
حامد : انتي روحي لبتج وانه بعدين ارد ليكم
يمامه : ماشي وطلعت وايدي على گلبي

حسان : هاا خويه خير
ابراهيم : عمي حسان بروح ابوك حاجي ابويه حامد يرضى يردلي أيه
حسان : انه اخوك عرف حامد
حامد : خوش وانت تعرف گلشي وانه مثل الاطرش بالزفه تعالو بلديوان مااريدن احد يسمع
وصلنا للديوان ودخلنا وابويه مورث ونار والجگاره ماتنزل من حلكه والسبحه تروح وترد من الاعصاب والوجه بركان يطلع منه اندار عليه وضل يعيط

هاي تاليتها ابراهيم توكف تهدد بنص بيتي وانه واكف ومالك احترام لا ليه ولا لحبوبتك ولا امك هذا الربي الربيته ليك
ابراهيم : يابه تعرف انه هسه شنهي انه طير انذبح والي ذبحه بسچينه عميه وفوكاها امه انه كضيت عمري كله اشتغل واركض واتعب حتى هاي البت تصير ليه وتالي تروح مني وتريدني اوكف تفرچ وامي گلش زين تعرف ايه شنهي تصير اليه ودوم اگلها هاي رويحتي بنيتي ربيتها على ايدي ورضيت بكلشي بس تصير ليه وتالي تطعني بظهري

حامد : ليش ماجيت وكتلي ليش ماطلبتها مني وانت يبن عمي وحزام ظهري هيج تظم عليه
حسان : ياخويه الولد سرني وتدري بيه السر مااطلعنه لو على گص رگبتي وانه لهسه مااعرفن شصار
ابراهيم : عمي اجت ايه وكالت امي السبب خلتها توافق
حسان : شنهي امك
وبديت اسولف گلشي سمعته من ايه الهم
حامد : انه مااعتب على البت هي صغيره والمرت بيه مايخليها راكزه وتفكر صح بس اعتب على الزلم المشوربه تلعب لعب من وراي چا انته اذا هيچ مسودن بيها وبعشگها ماجيت وطلبتها مالمحت وكلت يابه اريدنها ليه يابه هاي البت اريدنها بالحلال احجزها وانت هنا وكضينا السنين گلها نكول ايه لولد عمها ماوكفت وطالبت بيها

ابراهيم : جنت بالسجن ومااعرف مصيري
حامد : هذا مو عذر ابراهيم انه جنت ازورك گل شهر ومامر شهر ماطمنتك على طلعتك چان گلت اريدها لو تظل ٢٠ سنه كلها بالسجن البت اخليها تنتظرك بس هسه صعب

ابراهيم : ليش يابه انت جبيرنا وتكدر تأمر منير يطلكها واتزوجها انه
حامد : مو هيه لعب چهال والوادم شگل الهم والله طلكتها من ولد عمها وزوجتها لولد عمتها انت تعرف الديره كلها موجوده بيومها وشاهده على العقد زين من طلعت من السجن قبل العقد ليش ماجيت وحجيت وين وليت

ابراهيم : جنت منهار ومامصدك وتعبان واخذني عمي حسان لكربلا والنجف
حامد : دخيلهم اهل البيت بس الي سويته غلط جان المفروض تجي عليه قبل العقد وقبل كل الوادم ماتنجمع وتكول اريدنها واسألها اذا رادتك لو مو منير لو ابوه يطلع من كبره ماازوجها ليه وتصير ليك غصب عن فضيله وعن گل العشيره بس هسه ادز على منير اگله تعال طلك مريتك والله موش ولد عمتك يحبنها ويريدها واريدن ازوجها ليه چا هاي صايره دايره

ابراهيم : دخيلك يابه ساعدني
حامد : بويه انت تعرف غلاتك عندي بس اكو شى اسمه عگل (عقل) والعگل يكول البت تحرمت عليك وتزوجت وحتى منير لاتنسى يكدر ينهي عليها ولا انه ولا اي احد يحكمه وحگه انت بتصرفك هاذ خسرت حگگ بيها چا شون تسگت وتعوف الخطبه وتروح اوكف چدام الكل تعال ليه گلي وگف گلشي مو تروح وادير وجهك وهسه تنحب ردوها ليه

حسان : انه اخذته گلت اخافن تصير طلابه بين الولد
حامد : ياطلابه وانه موجود بس هسه ماترهم الوادم تاكل وجهنه ومنير اله كل الحگ مريته وحتى عيب عليك تنظر ليها بعد مو تطلب منه يطلكها چا انته لو ماعايش هنا وتعرف تقاليدنا لو انت مچان منير واگلك تعال طلگ مريتك وازوجها لغيرك ترضى
ابراهيم : كعدت بالكاع وانه منهار حسيت خسرت گلشي
حامد : كوم وليدي چاانت مثل حظ خالك صگد ثلثين الولد على الخال انه احسن بيك يعينك الله بس مابيدي شى اانت وحتى هيه ايه ماعرفتو تتصرفون صح لا انت الحجيت وطلبتها وانت تعرف معزتك عندي ولا هيه الي رفضت منير اثنينكم غلطتو وهاي نتيجتها

حسان : وهسه شون خويه حامد الولد انتهى
حامد : انت هم تتحمل جزء من الي صار لو چاي وكايلي مجان وصلنا لهنا وانت تعرف بسوايه فضيله
حسان : وداعت ولدي وروح ابوي مااعرف چا لو اعرف اگلب الدنيا عليها
حامد : هاي تسودنت وهذا الوليد وكع بيها كوم ابراهيم وتعوذ من ابليس گلشي قسمه يابه هاي احنا ورثناكم التعب واللوعه
ابراهيم : يابه احبنها مااكدر اعيش بلياها
حامد : گلناها قبلك وليدي وعشنا ومشت الحياه صح مابيها لون ولا طعم بس مشت وربك ماينسى عبده كوم توضى وصلي لوجه الله ركعتين ولااهل البيت يبرد گلبك ويعينك على مابلاك كوم وهذا الموضوع تنساه البت تحرمت عليك احترم حرمت ولد خالك وانه اعرفنك اخو خيتك وسبع وماترضى بالغلط وماتنظر لعرض ولد خالك

ابراهيم : كمت ومسحت دموعي لاتخاف يابه مو انه الي اخون الامانه
حامد : عفيه بوليدي تربيتي وانه رايح اريدن من ارد اشوفنك زين
حسان : وين رايح حامد
حامد : راد للبيت هذا الموضوع مااريد ينفتح كدام منير او مازن والحجي الصار كله ينسي

الحجية جميله: ليش يمه فضيله هاي المرجيه منچ لج هاي انتي الفقيره العاگله (العاقله) چا انه اكولن فضيله بنيتي العيبه ماتطلع منها تطلعين هيچ
فضيلة : يمه فدوه اغديلچ مالي حيل كافي الي انه بيه
الحجية جميله: لج يمسودنه ضيعتي الاول والتالي وانه تجريني وياج تعالي ليه شون فكرتي هيج وهاي اليتيمه شنهي ذنبها چا وانتي عمتها مارحمتيها لا عاب الغريب
فضيلة : يمه چا وانه ولدي ليش مافكرتو بينا دومج انتي وحامد تفكرون بعادل وبنياته ماكلتو هذا اليتيم شنهي ذنبه تيتم بسبب عادل ماكلتو هذا اليتيم ليش تبهذل واشتغل ماكلتو هذا اليتيم ليش يكضي سنين من شبابه بالسجن

الحجية جميله: هو راد هيچ غير دافع عن عرضه
فضيلة : ليش منير ومازن بنات عادل مو عرضهم ليش ما منير كال انه كتلتهم ليش مو مازن كال انه كتلتهم ليش شيلتو الذنب لولدي
الحجية جميله: وحگ هو علي انتي مسودنه چا هو منهي الطكهم غير ابراهيم
فضيلة : بس محد كال تعال اكعد وانه اصيرن بمچانك وادخل السجن عبن هيه بت عمي لا شون عافو ابن الفضيله اليتيم يشيلها وهمه يدخلون گليات ومرتاحين وابني بين النشاله والحراميه

الحجية جميله: لا اعتراض على عطيتك ربي چا انه اكولن ساكته عبن براسج بليس يفتر چا هو حامد قصر وياج قصر ويه ولدچ ولج البيت كله بيدج والحلال والكياعين بيد ولدج ليش تصيرين باطله
فضيلة : البيت بيدي لان خدامه بيه اكنس وامسح واخدمكم والكياعين بيد ابراهيم عبن مازن دكتور مايصير يلزم كاعد عمه وابوه ومنير يكمل دراسته منو بقى غير ولد الخايبه فضيله

الحجية جميله: لهاي الدرجه حاقده لج انتي مو فضيله بنيتي طيبه وماتأذي نمله
فضيلة : من ضيمي يمه من ضيمي وانه اشوفن وحيدي يضيع چدام عيني
الحجية جميله: شيضيع يمعزايه وليدج بسوايتچ ضيعتي وانه من گل عقلي صدكتج وانتي توسوسين براسي
فضيلة : انه مااجرمت ردت لوليدي بت سباعيه تراعي الله بيه سنعه وكويه وتلزم ظهره موش مايعه وتدلع گليلي ايه شون تصير ام بيت وهيه كلاص مي ماتجيب لروحها شون تلزم ظهره وهيه بعيطه وحده تبجي شون تربي جهاله وهيه روحها ماحاملتها ايه ماتناسب ولدي انه اريدن مره حوك تكون وياه على الزمن موش يگضي عمره گله يركض ويداري بيها ويكسر ظهره وتدلل عليه ومابيها خير بس تعرف تاكل وتنام

الحجية جميله: چا شنهي انتي من صچچ هيج تفكرين البت صغيره وتعلم چا انتي من بطني طلعتي تعرفين گلشي وانتي لو رايده جان علمتيها سبحان الي يعرف گلشي چا هسه اخذتيله السنعه والمعدله شيفيد ووليدج ماموتاح شيفيد وهو الليل ينامه مكدر انه علمت مثلچ وخذيت احلام لحامد وكضيت العمر گله اشوفن وليدي مذبوح جدامي يضحك وعيونه كلها حزن ماشفته بيوم مرتاح ومتهني بس من اخذها انه مااحبنها بس الشهاده لله ولدي ماشفته مرتاح اله من خذاها چا انه وانتي شنريد غير نشوف وليداتنا مرتاحين وانتي جنيتي على ولدج يامدمغه

فضيلة : گلها چم يوم ويرد وينسى گلشي
الحجية جميله: چا نسه خاله كظه السنين كلها ينوح يمي هاي الخلفه كلها مسودنه بالعشك اسأليني انه كضيت كل ليله اكولن راح ينساها كفيلچ الله ينسى اسمه ومانساها
شوفي فضيله الي عملتي راح تبجين دم عليه وهاي حوبت اليتيم هيه وياه ظلمتيهم وكسرتي بختهم وانه المسودنه مشيت وراج وطلعت وكضيت البت حسبالي تريد ولد عمها طلعت تريد ابراهيم وتعاي كليلي شون منير وصل ليها

فضيلة : انه حجيت وياه وكتله اذا تريدها لازم تحطهم چدام الامر الواقع لان ماينطوها ليه مثل اختها تاليها تشرد لبغداد وهو گلي هيچ اسوي وساعديني وصار الي صار
الحجية جميله: من دهر صابج ولج صگد لو كالو من السكوتي موتي عبن هاي الفقيره الساكته هيچ اويلي على گلبك يوليدي امك تسودنت وضيعتك وضيعت رويحتها

فضيلة : يمه كافي رحمه لأبوي كافي مناقصني اتكدر اكثر
الحجية جميله: چا الجاي اكثر اصبري يبت بطني چا ربچ ستر ماتكاتلو الوليدات چا حملتي ذنب دمهم ولي مني گلبي موجر منچ لو بيدي اكومن اجسر مفاصلچ بهاي العوجيه وعلى راسچ وافتحنه نصين هم مايبرد گلبي منج ولي

فضيلة : انتي مو ردتي منير لأيه شغير رأيج يايمه
الحجية جميله: انه ماردتها تروح للغريب ووليدج لو ماخذها هم ماراحت للغريب انه مايفرق عندي ولد عمها او عمتها عندي البت ماتروح لبغداد وتظل چدام عيني عبن من ريحه المرحوم ومن شفت مازن ماكدر ياخذ ذيج العگربه ودق خفت لا البت الثانيه تشوف اختها وتقلدها واضيع بنيات عادل انه لو اعرفن ابراهيم رايدها لو مو انتي اخذها ليه چا الوليد ينسجن ويكتل الوادم علمودها وتعبه كله يروح والبت فقيره وطيبه وحسها ماينسمع وانه احبنها لجن عمرها ماطلعت العيبه منها والي صار ليها قدر ومكتوب وگله امر ربج بس تبقى بنيتنا ولدج طيب مثلها وفقير بس هسه مايصير صارت لابن عمها وانحكمنا هيج الوادم تاگل وجوهنا وگلها درت بت عادل لابن فاضل وگله من وراج

فضيلة : مااريدنها يمه كوه هيه وانه امه وانه ادرى بمصلحته
الحجية جميله: كومي مني وصمي حلكچ تره وصلت حدها وياج ومااكولن بس يعينچ على وليدچ والي راح تشوفيه منه وعود تعالي انعي يمي مااوصيچ
فضيلة : اكومن اشوف شصار
الحجية جميله: چا شيصير بعد الغافلين الكم إٱللـِْﷻـِْﮭﮧ

أيه : كاعده والهم كله فوك راسي حتى دواسه مكعد اكدر ادرس اجتني جنه تركض ها ولج على كيفچ اخذي نفس
جنه : ولج لو تعرفين شسمعت
أيه : انتي متبطلين تتصنطين والله اذا لزمج بابا حامد يعلكچ من اذانج
جنه : ادري بس انه حذره لا عبالج
أيه : مسويه الفلحه احجي شكوو وهاج مي شبيج ازركيتي
جنه : اجيتج ركض سمعت جده وعمه فضيله يتحاجون عليج
أيه : خير شعدهم خطه يدمروني بيها
جنه : چا انتي تعرفين عمه فضيله متفقده ويه منير وكل الي صار مو صدفه
أيه : اكيد مو صدفه وعمتج طلعت داهيه واني الثوله صدكتها وبيبي وياها اكيد
جنه : لا والله جده ماراضيه ولزمت عمه فضيله نكتتها نكت
أيه : شون وبدت جنه تحجيلي كولشي واني دمعت عيني ليش اني شمسويه الها والله احبها كولش ومايوم ضوجتها
جنه : ياخيه انه هم تخبلت شون عمتي هيج تسوي چا صگد لو كالو كيدهن عظيم
أيه : ولج هاي ايه بالقران مو مثل
جنه : هااا بعد اضبط چا القران گالها ماتريدين عمتچ تطلع مسودنه وتلعب علينا بس الحيف على الزلم التمشي وره النسوان هذا ابن عمج منير شون يرضاها ويسويلج هيچ فضيحه
أيه : گلشي اتوقع منه وكعت بمصيبه بس الله ينجيني منها ادعيلي كولشي مااريد بس ادعي اخلص منه ويبرد گلب ابراهيم ميته بدمي ونار بصدري خوف عليه
جنه :إٱللـِْﷻـِْﮭﮧ يجمعكم بحگ ام البنين انه احبنج الله يعلم واعتبرج اختي الماجابتها امي واريدلچ الخير كله
أيه : اعرف گلبي وانتي هم اختي وطيبه وتستاهلين كل خير كوليلي محتاجه بشي اساعدج علمود جهاز عرسج
جنه : لا رايدتج للعوزه من فدوه اغديلج لايضل بالج اذا اريدن شى اجي عليج چا انه المن اروحن غير لخيتي

أيه : حبيبتي الله يديم خوتنا
جنه : امين اكومن اروح لا امي تنده عليه وماتلكاني تعزيني وتصخمني
أيه : روحي الله وياج
طلعت وبقيت بالغرفه وتعبانه وافكر بكل الي صار ليش الطيب محد يرحمه ودوم يدوسوه اني ممأذيه احد ليش يأذوني مبقت مصيبه موكعت على راسي ربي رحمتك بيه تعبت وانكسرت روحي وبعدني باول عمري

يمامه : دخل حامد ويرجف
حامد : ايه وينها
يمامه : دخيلك عوفها هسه البنيه تعبانه ومنهاره
حامد : چا شون گليلي البت من وراها چان صار بحر دم
يمامه : تدري بيها جبانه ومتعرف تتصرف هي من الاول هذا طبعها وصارت شغلتها كسرتها بالزايد
حامد : چا شون ترضى بمنير وهي واعده ابراهيم تضل وياه
يمامه : كله من وره فضيله مع الاسف اذت ابنها ودمرت بتي واني اعرفها ليش متريدها لان مكسوره رغم هيه عمتها ولازم اول وحده تسترها مو تبعدها والمصيبه تعرف بأبنها يريد ايه
حامد : هاي حسابها وياي بعدين
يمامه : تعال عندي شى اريده اكوله الك
اخذته ودخلنا للغرفه
اني اعرف جان المفروض تعرف بهذا الشى بس مكدرت اكولك وهسه لازم تعرف
حامد : شنهي
يمامه : اني من جنت حامد بعلاوي بشهري اخذت ايه ويايه وفحصتها الطبيبه وكالت مابيها شى والدم الي طلع منها بسبب جرح سوه بيها الله لايوفقهم

حامد : انتي شگعد تسولفين عيدي
يمامه : هو هذا الصار ايه الْحٍمَدٍ للـّہ طلع مابيها شى ونوعاً ما وضعها تمام حسب كلام الدكتوره بيها جرح بسيط واندمل واذا اتزوجت تصيرلها دخله حالها حال اي بنيه
حامد : وانه گلشي مااعرف
يمامه : مو هيه طلبت مني مااحجي تستحي وكالت وجان يقاطعني وكام يعيط فقد اعصابه
حامد : انتي من گل عقلج شنهي طلبت مني شنهي تستحي
يمامه : على كيفك اعصابك بس خلي افهمك

حامد : لج شتفهميني انتي تظلين هيج تسوي شغلات وانه مااعرف عنها شى وهذا الشى بالذات انتي تعرفين شجان يصير بيه تعرفين كميه العذاب وتأنيب الضمير الي عايشه اجت علي ايام كاعد بالديوان افكر واريد اطك واروحن اذبح بيت السماج حتى النسوان والزلم لج هيه هينه علي من اشوفن بت اخويه وحسبت بتي وامانه عندي تنكسر هيه هينه علي وانه شيخ ومااكدر اخذ حگها عبن سمعتها لاتطلع وتصير سالوفه دواوين هيه هينه علي وانه احسن ماصنت الامانه والبت ضاع شرفها عبن غفلت عنها

يمامه : فدوه على كيفك ضغطك ليصعد
حامد : انه گلبي موجر منج چا تضمين علي هيج سالفه وساكته وتمشين وره الزعاطيط واكيد اختها تعرف
يمامه : دنجت وسكتت شكول اله فعلاً اني غلطانه مجان لازم اضم عليه خاصه على حامد بس من كثر متوسلت بيه وتبجي وتخاف
حامد البنيه خافت لطلبون منها فحص ثاني والدكتوره تفحصها وتكول مو بنيه وترجع تنتكس حالتها
حامد : وانتي منهي الصخم وجهج وكالج انه اطلب او اسمح لأحد يطلب منها هذا الشى لو عندج احترام الي وكلمتي مسموعه وتحسبيلي حساب چان اجيتي وحجيتي وفهمتيني خوفها مو تمشين وراها الغلط مني انه ماراويتج العين الحمره جان احترمتي واجيتي غصب عنج تسولفين
يمامه : العفو والله موقصدي اضم فدوه لتزعل

حامد : ازعل هذا الشى الي هامج ازعل چا انه كضيت هاي السنين كلها بين افكر بشغله ايه وبين افكر شون اطلع ابراهيم من سجنه يعني الشغلات الغمه تركضين ركض علي وتكوليها لي والشغلات الزينه تضميها عبن مااهمج ولا ادورين راحتي ماكلتي اكولن اله واخلي يرتاح انه التفكير اكل راسي واكولن اذا ولد عمها محد رادها شون لازم اغصب عليهم ياخذوها لان اذا غريب رادها مايصير مانكله وبذاك الوگت يضيع تعبنا وتعب ابراهيم ومن طلبها منير حسيت شوي براحه عبن ولد عمها وستر وغطى عليها انتي ماتعرفين شيصير بيه من جنت اشوفن دموعها على خدها لو من جانت خرسه اجت علي ايام اريد احرگ العماره گلها ومايبرد گلبي شون هيج يصير بيها وهيه بيتي

يمامه : والله موقصدي اضم والله
حامد : اسكتي يمامه انتي وحده بلا عقل گل همج نفسج وبناتج وبس وانه رغم كل الحب حاطتني وره ظهرج بكلشي
يمامه : لا حامد فدوه لتكول هيج والله احبك واحترمك فوك متتصور
حامد : لو الج ذره حب بگلبج الي جان گلتي خطيه اشوفنه يروح ويجي وريگه ناشف على شغله ايه افرحنه واكولن البت مابيها شى بس شون لو كايلتلي ماطلعين يمامه دومج انانيه وماتحبين بس نفسج

يمامه : حضنته وابجي فدوه لتزعل والله خفت عليها ومردتها تنتكس مره ثانيه
جان يدفعني
حامد : تخافين عليها مني انه الي اعتبرها بتي وحسبت جنه انه طول هاي السنين ولا مره كتلج روحي اخذيها وفحصيها حتى لا اجرحها ولا اجرحج تالي يوم ماتطلع سليمه اطلب منج تفحصيها عذرج اقبح من ذنبج ولي مني مااريدن اشوف جهرتج

يمامه : رجعت اتوسل بيه جان يوكفني
حامد : اياج تتقربين انه اكتفيت منج ومن سوالفج تعبت يوميه ظامه سالفه علي شنهي الي اسوي وتجرين عدل كلشي طلبتي واكولن امري وتالي تاخذيها وبدون اذني وتفحصيها وتعرفين النتيجه وصار كم سنه وساكته خوش عاشت يدج ماقصرتي
يمامه :بروح ابوك لتزعل مني بداعت علي عندك بداعتي فدوه والله اخر مره اظم عليك
حامد : رصيدج وشل عندي وروح ابوي وعلاوي الي هسه حلفتيني بيهم اذا ماوليتي من وجهي لا اكطعج واطلعن حليب امج من خشمج ولي مني واستري على رويحتج

يمامه : شفته صار نار وتذكرت ضربته اليه وخفت يأذيني وهلمره احس صدوك مراح يرحمني سكتت وكتله قبل لا اطلع من الغرفه
والله موقصدي اظلم اسفه واخر مره سامحني مااكررها والله
حامد : اطلعي مااريدن اشوف جهرتج
يمامه : طلعت وصارت بوجهي ايه يمكن سمعت الكلام مسحت دموعي وغسلت وجهي وكعدت بالمطبخ ماكو ١٠ دقايق سمعت صوت الباب انركع باوعت من الشباك لكيته مغير ملابسه وطالع مااعرف شون اصلح غلطي ويااه قبل جنت مااهتم حتى من يزعل هسه مااتحمل زعله اتعب كولش لان احبه فوك ميتصور بس هاي اغلاط صارت ومااكدر اصلحهه

حامد : يمه وين فضيله
الحجية جميله: يمه على كيفك ويه خيتك
حامد : چا انه شسويت
الحجية جميله: مو اشوفنك ترعد وصاير جمر
حامد : فضيله تعالي ليه وينج
فضيلة : امر خويه
حامد : شوفي انه عمري مااذيتچ بچلمه ودوم شايلچ على راسي واكولن هاي خيتي وعاگله وفقيره واروحن وانه مأمن على بيتي بأيدها بس طلع غلطان
فضيلة : حشاك من الغلط خويه
حامد : لا غلطان عبن طلعتي داهيه وعرفتي شون تتمسكنين حتى تمكنتي
فضيلة : خويه هذا وليدي ومن حگي اشوفله بت الحلال التناسبه
حامد : چا ايه بت حرام
فضيلة : انه ماكلت هيج بس ماتناسب وليدي هيه بديره وهو بديره انه اعرفن اذا خذاها تدمره ماتلزم ظهره
حامد : وانتي شدراچ عندج علم الغيب انطيتي مجال ليها حتى تثبتلچ هيه ام بيت وتستاهل ولدچ

فضيلة : بت عمه اولى بيه عبن شاطره وسباعيه وبيت اهلها كله على راسها وماتشكتي وماتحجي وحليوه ومن ثوبنا
حامد : چا هيه بالطبخ والنفخ هيچ عقلج صغير چان علمتيها للبت وهو اكو افقر من ايه حسها ماينسمع وفوك گل هذا ولدچ عاشكها وتدرين بيه شون اطاچ گلبج هيچ تأذي
فضيلة : ليش نجذب خويه انه وحيدي اريدله بت بيت مو ملعوب بيها ومااحس غير راشدي فرني وأذاني

الحجية جميله: يمه حميد تمد ايدك على اخيتك
حامد : انه عمري ماكضيتچ بشعره بس مال اطعنين بت اخوج لهنا وبسچ تعرفين بيها اشرف من الشرف وازيدچ علم البت گلشي مابيها
الحجية جميله: شنهي يمه گلشي مابيها نجذب على رويحتنا
حامد : يمه البت سليمه وكل الجرى جرح وطاب ويوم دخلتها راح تشوفون نيشانها
ارتاحي خيتي ضيعتي ولدچ بسبب عقلچ
الحجية جميله: لاتسودني شنهي نيشانها
حامد : امها ماخذتها بغداد للدكتوره وفاحصتها والبت مابيها شى كتلچ جرح وطاب والله جبر بخاطرها
الحجية جميله: كلللللللوش يمه احسن گلبي يطلع من عضاي يمه دخليك ياابا الحسن صگد يمه مااصدك كللللوش

حامد : صدكي يمه وراح تشوفين نيشانها بعينچ وازيدلكم علم تذكرون من تمرضت بسحر فرحه وامها الله لايرضى عليهن هيه اجتني بالحلم وبيدها رايه العباس سلام الله عليه وحطته على جرحي عبن هاي البت نظيفه وفقيره ومن اهل الله وشارتها من ابو فاضل وفدواته ماقصر ربج نصفها وطلعت بت

الحجية جميله: دخيلك ياابو فاضل يمه كمت ارجف واخافن منها تشور بيه
حامد : وانتي فضيله ادعي ربج حوبه اليتيم تبطي ماتخطي وانتي عيرتيها وفوكاها انه ادري الجرى كله بيوم خطوبه منير من وراج وچان راحت سمعتها كدام الخطار ادعي ربج مايطلع حوبتها
فضيلة : كمت ابجي والله خويه ردت صالح ولدي ومستقبله
حامد : يمه فهمي بتچ وليدها كبر مو طفل وهو ادرى بحياته انه اروحن عندي فصل بالناصريه اتأخر ثلث تيام (٣ايام) لايضل بالج
الحجية جميله: روح يمه مودع بالله تروح وترد سالم
بسچ مايفيد تنعين يطبج حريشي هذا زرعج وراح تحصدي اسكتي

ابراهيم : دخلت على امي تبجي
اسمعي يمه انه مو عاق الوالدين والله شاهد عليه شكد احبنچ بس طول ماحرمتيني منها وتعرفين رويحتي عدها انه راح احرمنچ منه ومااظل هنا
فضيلة : يمه دخيلك وين عايفني
ابراهيم : انه راح اعيش بستان ابويه الحامد الي بالجهه الغربيه بالدار الصغيره ورحمه لأبوج وابوي لاتوصلين جاري لا وحگ هو علي اهچ من العماره گلها
الحجية جميله: روح حبوبه وديري بالك على رويحتك وبجاه ام البنين يبرد گلبك
فضيلة : يمه شون يروح ويعوفني مصار كم يوم من رجع صار سنين محرومه منه
ابراهيم : واعتبريني ماطلعت من السجن
الحجية جميله: اسكتي فضيله يله يمه اخذ غريضاتك وتوكل
فضيلة : يمه شتحجين مااعوف وليدي بعيد عن حضني
ابراهيم : حبوبه بلغي ابويه حامد
الحجية جميله: لاتخاف يمه التريده تم
فضيلة : يمه هذا راح شون تشجعي
الحجية جميله: كرمينا بسگوتچ وخلي الوليد يرتاح هو تعبان گلها چم يوم ويرد اصبري لاتهججي من كل الديره اركدي
فضيلة : وشون اتحمل مااروحن املي عيني منه
الحجية جميله: من عمايل ايدچ اسگتي وربچ يحلها

أيه : سمعت من جنه كل الي صار الي جانت دوم تتصنط وتجي تنقلي الاخبار بهاي الاحداث چانت امها بيت جدها وبس هيه موجوده وتكعد تسمع كل الكلام وتكوله اليه عرفت بابا حامد وبيبي وعمه وحتى جنه عرفو انه بنيه بس ولد عمي وابراهيم معرفو
ماما تعاركت ويه بابا حامد وطلع زعلان وهي ادك عليه وميجاوبها حسيتها تعبت حيل من وراه حتى اكل متاكل وساكته دوم تأكدت امي وصلت بالحب وياه بحيث متكدر على زعله وهاي ٣ يوم من راح للناصريه ومن رجع انصدمنا اخذ كم قطعه من الملابس وراح يبات هناك بيت جدي وماما تاكل بروحها اكل

جانت ودق دوم تخابر وتاخذ موجز الاخبار مني اول بأول من يوم الخطوبه ومنير مشفناه خفه وراحه وعرفت ابراهيم عايف البت وهج عايش وحده وعمه تبجي عليه
اني رجعت لدراستي ودااحاول اسيطر على الوضع مرت الايام والوضع هدوء تحس الكل تعبان وزعلان بس ساكتين كل واحد منه مجروح بطريقه تختلف عن الثانيه

مر شهر وماما وبابا حامد واحد بعيد عن الثاني وكل متحاول ماما تصالحه يصدها حتى ميسمع منها جان عقاب قاسي الها مرات اسمعها تبجي بس مابيدي شى اسوي لحد مابيوم طگ گلبي متحملت اشوفه اكلها قليل وضعفت وذبلت رحت اتمشى لبيت جدو شافتني عمه دارت وجهه فوكاها هيه الي متتقبل تشوفني سلمت وماردت براحتها الي عليه سلمت دخلت استملتني بيبي

الحجية جميله: هله بسورها ونورها يمه صايره فلعه گمر
أيه : هلو بيبي اشتاقيتلچ وبستها من ايدها وراسها
تعاي اگعدي چا هيچ تعوفين حبوبتچ ومتنشدين عليه
أيه : والله بيبي ملتهيه بالدراسه انتي شونها صحتچ
الحجية جميله: انه بخير اذا انتي بخير
أيه : بستها من خدها بخير حبيبتي
الحجية جميله: يبعد رويحت حبوبتج
أيه : بيبي وين بابا حامد
حامد : هاي منهي التنشد علي الهزامه الي ماتسأل على ابوها
أيه : كمت حضنته وبسته حيل جنت مشتاقه اله
حامد : هاي تاليتها ماتسألين على ابوج
أيه : والله بابا انت الي عفت بيتك ومتسال علينا
احلام : چا هذا مو بيته
أيه : هلو عمه وبستها اشتاقيتلج شخبار صحتج
احلام : هاي البت لسانها عسل يبعد عمتج زينه يم الله
أيه : بابا اريدك شويه
حامد : يله بويه امشينا
كعدت وياه بالصاله وبديت احجي
ليش هيج بابا تعرفها لماما زعلانه وتعبانه
حامد : هذا الشى بيني وبين امچ لاتدخلين بيه
أيه : شون ماادخل واني السبب
حامد : امچ ماتحترم والمره الماتحترم ماتصيرلي حرمه وانه ماريدنها بعد
أيه : شنوو لا بابا على بختك انت لو شايفها شكد تعبانه وحتى اكل متاكل
حامد : بسچ ايه مااريدن اسمع اي شى عنها
أيه : هاي طيرتك هيچ گلبك يصير قاسي عليها
حامد : بويه المره الماتحترم رجلها وماتامن بيه وتسره بالصغيره والجبيره هاي حرامات تبقى على ذمتي موزين ماطلگتها انه امچ شفت اشكال والوان منها گبل وجنت اكولن ماتحبني ماتعرفني حگها وانطيها فرص موش هسه تحبني وياي وياي وام وليدي وتضم علي شغلتچ

أيه : والله اني توسلت بيها وكعدت الها دخيل جنت خايفه اطلبون فحص مني
حامد : انه مازعلان منج انتي صغيره وماتعرفين بس هيه الجبيره الفاهمه هيچ مالي وجود تاخذج وتفحصچ وانه نايم ورچلي بالشمس
أيه : فدوه بابا سامحها لخاطري بس هاي المره والله لو تشوف حالها شكد تعبانه واسمعها بليل تبجي عليك
حامد : احسن انه اريدنها تتأدب انه لو چلمه زايده منها چان كسرت عظامتها تكسر
أيه : كمت ابوس بيه واتوسل يرضى عليها
حامد : الله كريم مو هسه
أيه : اني اعرف گلبك مينطيك هاي حبيبتك وطيرتك بله بربك مشتاقيت الها
حامد : ولچ اسكتي طالعه عينج
أيه : هههههه والله ترجف عليه ولوبيدك هسه تروح تركض وتحضني وجان يضربني بخفه ايده على راسي بالشقه
ولج ملعونه كبرتي وتحجين
أيه : يله بابا گتلك بداعتي خطيه والله
حامد : مو هسه حبيبتي انه اعرفن شوكت ارد ليها لايضل بالج
أيه : الله يجمعكم مثل قبل
حامد : وانتي شون كيفچ واحوالچ
أيه : الْحٍمَدٍ للـّہ عايشه
حامد : انه مابيدي شى بنيتي وتعرفين شنهي قصدي
أيه : اعرف بابا اروح اني باجر عندي امتحان
بسته وطلعت شافتني جنه
اكيد سمعتي كولشي
جنه : ههههههه لا ولج جنت اسبح تعالي ليه اشتري شى علمود العرس
أيه : باجر اروح اشتري محتاجه شى ويايه اشتري الج
جنه : عساج سالمه گلشي كملت ولج مامصدكه گلها اسبوع واصيرن مريته وانامن بحضنه
أيه : الله يسعدج والله انتي تستاهلين گل الخير
جنه : يبعد گلبي اروحن امشط ومن تشترين اريدن اشوفه
أيه : ماشي
مرت الايام وباجر حنه جنه ومازن من يوم مخطب مازن وحياته يطلع من الصبح للمستوصف وراها للعياده مالته ميرجع اله بليل يتعشى وينام حتى ايام العطل والجمعه يفتح عيادته عبالك يتهزم من حياته
ماما خابرت ودق حتى تحظر رادت متجي بس ماما بقت تعيط عليها وبالاخير استسلمت واجتي

ودق : وصلت وباجر حنه مازن وجنه ليش مخنوكه وروحي تفرفح مردت احظر بس شسوي ماما غصبتني
اول موصلت سلمت ورحت نمت كعدت ملكيت احد خابرت على ماما لان عندي تلفون كالت بيت جدج علمود يحظرون للحفله باجر اسمع الهلاهل ماسكتت منا عمه احلام وفضيله هلهولتهن توصل لسابع جار ومنا نسوان العمام والخوال البيت عباره عن ملحمه نسوان يمكن ب٤٠ مره وبنيه من جميع الاعمار لبست بنطرون وتيشيرت طويل لان الجو زين بشهر الثالث ٢٠١٠ وتمشيت عليهم جان اشوف من بعيد مازن كاعد وحده على المصطبه الي بالحديقة الجنا دوم نتعارك عليها وظلمه وهدوء مشفت نفسي غير رچلي تاخذني ليمه
شونك مازن تفاجأ بشوفتي
مازن : هلو هاي انتي هنا
ودق : ممكن اكعد
مازن : تفضلي
ودق : مبروك
مازن : شكراً
سكتنا وبس نسمع الهلاهل وانفاسنا المضطربه وطول الهدوء بينا واثنينا ننتظر منو يبدي الحديث جان يهمس بهدوء
ليش اجيتي
ودق : شنو قصدك
مازن : مردت اشوفج بهيج يوم
ودق : اني دنجت وانقهرت وكتله حاسه بيك وصدك اني هم مردت احظر
مازن : ياريت محظرتي
ودق : موبيدي حكم القوي واذا حاب مااشوفك وجهي هليومين بس لازم احظر
مازن : مجرد فّگًــره وجودج هنا توترني
ودق : كمت جان يسحبني من ايدي وكعدني باوعت عليه
مازن : راح اكولج شى اسمعي ومن تكومين منا انسي لان اني هم اريد اكوله حتى يطلع من گلبي وانساه وابدي صفحه بيضه ويه جنه

ودق : كول اسمعك واني گلبي ينبض بقوه اباوع عليه مدنچ ويفرك ايد بأيد احس داخله نار بس يمثل الهدوء ويحجي بصوت هادئ بس حركه ايده ودماراتها من الاعصاب تبين داخله عكس خارجه
مازن : من رحتي من العماره لبغداد جان دوم ابويه حامد يوصيني انتبه عليج وخاصه انتي جنت دوم اشوفج وكحه وعصبيه وتتعاركين ويه الرايح والجاي بس جنت ارتاح من اشوفج قويه ومتنطين مجال يوم بعد يوم لاحظت نفسي اراقبج مو لخاطر ابويه لا بس لان كمت اشتاق اشوفج اشتاق لشعرج لطولج لكولشي بيج حتى عصبيتج ومن شفت الناقص تقرب منج ضربته من كل گلبي لان حسيت شى ملكي ويردون يلمسوه حسيت انتي مالتي الي وممنوع احد يلمس شعره منج ومن رجعتكم مرجعتكم لخاطر ابويه لا لخاطر تصيرين كدام عيني خفت الزمن ياخذج مني وتتعلقين بواحد وخاصه جنتي مراهقه وطايشه صح جنت اتعارك وياج وعلى كولشي احاسبج بس من حبي الج جنت اغار عليج بشكل موطبيعي حتى مااكدر اتحكم بغيرتي واطلع غيرتي بصوتي وعياطي عليج ودق كل مشكله وكل عيطه وكل لزمه مني الج بقوه هاي لان جنت اغار وانجن عليج

ودق : جنت اسمعه وفاتحه عيوني على كلامه واحس بألم موطبيعي كلامه أذاني حيل
مازن : ويوم محجيتيلي على وضعج والي تحسي جنت اتمنى اخذج بحضني واكولج اني يمج اني مااخونج اني اتنفسج بس حبيني ربع حبي الج وانطيني فرصه
ودق : طلع كوه صوتي والعبره خانكتني لعد ليش مكتلي هذا الحجي ليش هسه يله حجيت

مازن : لان راح تصديني وراح تهينين رجولتي وكرامتي
ودق : مستحيل هيج اسوي
مازن : لا تسوين واكثر هم عقدتج من ابوج دمرتج وخلتج تتمنين كل رجال يتقربلج اتذبين حرگه عادل بيه وتهيني لهذامكدرت اكولج مشاعري وخاصه انتي راح تتفننين بأهانتي واني كله ولا كرامتي
ودق : لعد ليش هسه حجيت
مازن : لان اعرف ماكو بعد مجال لكولشي وراح اطلعج من حياتي بس حاب اكولج شى اني حبيتج حب محد ولا اكو رجال راح يحبه الج يجوز تصرفت غلط ومتقربت منج بس انتي السبب بنيتي سور داير مدايرج والي يتقرب ادوسه واني صعب انطيج نفسي ادوسيها رغم كل حبي الج بس كرامتي اهم

ودق : اسفه
مازن : لتتأسفين المهم عيشي حياتج وانسي عادل وكل الي سواه بيج تره الدنيا متوكف عليج اذا زعلتي واذا متزوجتي حاولي تحبين الحياه وقبل كولشي حبي نفسج حتى تحلين نفسج من عقده عادل مو كل الزلم خاينه مثل مااكو زلم تخون اكو نسوان هم تخون الخيانه مالها جنس محدد الخيانه طبع سواء بالمره او رجال والي يريد يكون وفي راح يوفي من الطرفين والي يحكمه اخلاقه وخوفه من الله

ودق : نزلت دمعتي جان يمد ايده ويمسحها وكلي
اني كولش حبيتج ومن كثر حبي الج اتمنالج السعاده من كل گلبي وصيري عاقله وبطلي اللسان الطويل انتي گلبج ابيض بس الي عاام عليج لسانج صدگيني بس تحبين نفسج راح تحبين الحياه والناس كلها وشتحتاجين ابقى ابن عمج وحزام ظهرج بكل وقت

ودق : واني هم اتمنالك السعاده مازن جنه حبابه ورده واكيد راح تسعدك واكيد ماعندي غيرك انت سوبر مان مالتي لتنسى كل مصيبه الكاك يمي
مازن :المهم انتبهي لنفسج وابتعدي عن المشاكل الله يسعدج
ودق : كام وعافني واني بس راح لو دموع الدنيا كلها اتجمعت بعيوني ابجي بهستريا
ومااسمع غير جنه تتقرب مني فزيت بقوه وانداريت وجان تكولي
جنه : تحبي لمازن
يتبع ..،