رواية سجينة الروح الفصل الثاني وأربعون 42 - بقلم ريام هادي

سجينة الروح
للكاتبة Reem
البارت الواحد والاربعون
بارت طويل لعيونكم

(لسان حال ودق لطارق )

اخذت ايام عمري وسافرت لبعيد
وخليت الدمع بجفاك سابيني
ما انساك لحضه وانته تعرف زين
واذا عني تغيب عيوني تعميني
تعلمت السهر وعيوني ابد متنام
يموتني اشتياقي وحيل ياذيني
تلوعني بغيابك كوه اصبر الروح
وازرعها بأمل والصبر يجويني
سميتك شعر وسنين اكتب بيك
واضل اكتب عليك وما افك ديني

مازن : اجاني البارحه طارق للعياده
ودق : شنو طارق وشجابه
مازن : كلمه وحده تقبلين بطارق
ودق : بشنو اقبل مداافتهم
مازن : يصير زوجج
ودق : اوكف مازن كولشي مداافهم منك وشنو نسيت النهوه فهمني وحده وحده
مازن : اوووف اسمعي البارحه جنت بلعياده اشتغل واجه السره لواحد من المراجعين دخل واشوفه طارق
انت شعندك هنا امشي اطلع بره لااطيح حظك وكمت من مكاني ولزمته من قميصه
طارق : اول شى نزل ايدك عيب اني جايلك بنفسي وانت بابه عرب وابن شيوخ يصير الخطار اليجيك من غير محافظه هيج تتعامل وياه اني سامع اهل الكرم والشيخه لوشميكون بينهم ويجي خطار على محافظته يشيله على راسه مو يطرده ويتهجم عليه
طارق : نزلت ايدي منه شرايد احجي فضني بسرعه ورايه مراجعين
طارق : ليضل بالك اني اخر واحد وتقصدت اصير الاخير حتى نحجي براحتنا
مازن : اكعد وفهمني شجابك
طارق : اني اليوم جاي اسولف وياك اعرف بيك متتحمل شوفتي ولو بيدك تشرب من دمي ومالومك بت عمك وعرضك بس الي كعد يصير ظلم
مازن : وانت شعليك يااخي شدخلك
طارق : خلي نحجي بلا اعصاب وبطريقة منطقيه انسى اني الشاب الي خطب بت عمك وانسى كل الي صار ولو ١٠ دقايق وفكر ويايه اعتبرني صديق واحد مستطرف اي شى اعتبرني شباب اثنين ويسولفون
مازن : فضني شتريد
طارق : اني جاي اليوم بخصوص نهوه ودق انت ليش ناهي عليها متشوف هذا الشى حرام انت انسان مثقف واعي ومتدين صايم مصلي شون تجرأت تتحمل ذنب يتيمه انت لو ممتزوج اكول حقه يريدها ومن حقه بس انت متزوج وحسب معرفت صرت اب شتريد بعد ليش مصر لأخر لحظه ادمرها

مازن : هذا شى راجعلي مالك حق تحاسبني وانت اصلاً اخر واحد اله حق يدخل بهذا الشى
طارق : صحيح اني مالي حق بس جاوبني بشنو راح تستفاد من نهيت عليها بداعت ابنك الي اكيد هسه اله معزه خاصه بگلبك هم تنام بليل مرتاح هم تكول الي سويته يرضي الله يعني انت عايش حياتك بين دوامك وعيادتك وزوجتك وابنك ومستقر من كل النواحي تجي ادمر حياه انسانه مالها كل ذنب مجرد رفضتك
مازن : انت شنو من جرأه جاي لهنا وتحاسبني
طارق : يااخي افهمني اني مجاي احاسب واعرف مالي حق احاسب بس فكر مو حرام الي كاعد يصير كولشي بلحياه تكدر تسوي حتى مرات تعاند القدر تعاند النصيب حتى الظروف وتغيرهم بس مال تزرع المحبه بگلب شخص بلكوه وبلضرب والاهانات وتدمير المستقبل مستحيل يحبك ذاك الشخص
مازن : انت هسه شتريد
طارق : ارفع النهوه من ودق
مازن : حتى تتزوجها مو
طارق : لا حتى هيه ترتاح
مازن : اذا شرطت برفع النهوه متتزوجك مقابل ارفعها
طارق : موافق ومااندك بعد بيها
مازن : وشراح تستفاد
طارق : اشوفها مرتاحه وسعيده شوف مازن انت انسان تعرف الله تره الي الك ميصير لغيرك لو الدنيا كلها وكفت ضدك والي مو الك لو تخلص عمرك كله تركض وراه وتنطي روحك ميصير الك اني مؤمن بشى سوي الي عليك واترك الباقي على الله صعب احجي هذا الحجي كدامك وخاصه اعرف هيه عرضك بس هذا واقع اني بنت عمك دخلت گلبي من الله والي زرع حبها واني الي گلبي اعتبره حجر ميحب وكدر يزرع حبها بگلبي قادر يخليها من نصيبي لو مو انت يصير شى يغير كولشي واحتمال متصير بيوم اليه كولشي قسمه الي عليه اسوي والباقي على رب العالمين

مازن : وليش هذا الاصرار عليها هيه بلذات اكو الف بنيه غيرها
طارق : مثل ماانت مصر عليها رغم متزوج واكو الف بنيه غيرها كدامك بس باقي مصر عليها نفس الشى اني اليوم اجيتك حتى بس اكولك اليحب ميأذي حبيبه الي يحب من صدوك يتمنى يشوف حبيبه اسعد الناس حتى لو ويه غيره ودق مأذتك بيوم ولاحاولت تخرب بيتك انت اختاريت حياتك خليها تختار حياتها
مازن : يعني تريد تقنعني جاي من بغداد لهنا حتى والله شنو فك النهوه حتى لو مااتزوجها شنو هذا الفلم انت مقتنع بكلامك
طارق : اي مقتنع وبكامل قناعتي رغم حجايتي ثكيله عليك بس هذا واقع بت عمك احبها لدرجه مستعد متصير اليه المهم اشوفها سعيده لتظلمها احنا هنا بلعراق كلنا معرضين للموت كلنا نمشي وجفنا بيدنا الموت هنا ميعرف صغير وجبير على ساعه تسولف ويه واحد وتضحك وياه وره ساعه سمعت مات وتكول الله يرحمه هذا حالنا فكر اذا صار بيك شى لا سامح الله شون تقابل ربك وانت متحمل ذنب يتيمه برگبتك وكاسر بختها اني مااصير سيد وشيخ براسك بس اجيت اوضح الك الغلط الي سويته فك النهوه عنها وشوفها يااخي اذا رادتك وقبلت بيك اقلها مو غصب مو كسر رگبه مو ذله انت اكيد مترضالها الاهانه والذله

مازن : انت متعرف هواي شغلات وتحكم عليه من جانب واحد
طارق : ماانكر جنت اكرهك واشوف دم سنوني ولا اشوفك ويمك بوقتها بس لو ماانطيت گلمه لأبويه وعمامي مااندك بيك يمك اني مكسرك تكسر على سوايتك بس الي فاجأني كلام اختي صديقتها اكيد تعرفها اني من يوم الي صار وعرضي موصلت يمها صح اروح واشوفها من بعيد وهذا لا انت ولا هيه تحقوني بيه بس مااتقرب منها سألتها عن نفسيتها والحاله الي كعد تعيشها يعني حجي هوايه تدري رغم كل الي سويته انت بيها هيه مكارهتك وتكول مازن اله مواقف حلوه ويايه ودوم جان يساعدني وحتى على مااعتقد مسميتك سوبر مان مالتها مااكولك مضجت لا ضجت وحتى غرت بس الي استنتجدته من كلامها معتبرتك انسان مميز بحياتها بس محبتك كحب اي اثنين يجوز اخوه صداقه او اي مسمى ثاني لهذا رفضت الزواج مازن اني اليوم جاييك وحاط اسوأ الاحتمالات براسي ولو الغدر مو من شيمتكم بس هاي دنيا ورغم كولشي اجيت احجي بكل هدوء فك النهوه عن بت عمك وخليها هيه تختار ليش صفنت
مازن : الي ردته توصله وصل وماعندي كلام وياك بعد
طارق : ارفع الزحمه اني بس فكر زين بكلامي
مازن : الله وياك

ودق : الي افتهمته هو جاي على موضوع النهوه مو يخطبني
مازن : الي يعرض نفسه لهيج موقف وميخاف وكف بوجهي وبنص منطقتي حتى بس يخليج حره وسعيده يستاهل احترمه واعرف بس افك النهوه راح يرجع يخطبج لهذا خلي ننهي الموضوع كله وبدون جر وعر انتي قابله بيه
ودق : شوف مازن اني مااكذب عليك واكولك
مازن : قبل متكملين كلامج النهوه اعتبريها سقطت مااريد توافقين عليه علمود تخلصين من النهوه
ودق : اسمحلي اكمل كلامي اني مااكولك احبه لطارق اني مااحبه بس بنفس الوقت متقبلته
مازن : انتي اصلاً متتقبلين اي رجال شمعنه هذا ليش متقبلتيني

ودق : لان فهمني صّـْْ(☑)ـْْحّ اني مجروحه مازن اني داخلي هش لتشوفني اعيط واتعارك ودوم داخله بتحدي ويه الكل اني داخله تحدي ويه نفسي بأن مااسمح بيوم رجال يكسرني وانت تدري بسبب عقدتي وتدري كميه الالم بيه انت مراح تحس بلي حاسته ولا راح تعيش الي عشته يجوز تكول جنتي طفله ولازم تنسين شون انسى واني لحد هسه احلم بيه وهو على فراش امي ويه وحده وصخه شون انسى واني لهسه اتذكر أيه من تبجي جوعانه لو من وصخنا على روحنا وخلاني انظف وصاختنا واني عمري ٦ سنوات لحد هسه احلم بيه من يسحلني من شعري مرات اكعد شعري يوجعني مازن احس بعده لهسه يجر بيه

مازن : كافي تره من اشوفج هيج اتأذه
ودق : اعرف تتأذه بس اني خفت منك انت ابن اخوه ويجوز تطلع مثله
مازن : بس اني مو مثله
ودق : ولا اني اكدر اجازف واسمحلك تملك گلبي وبعدين انصدم كافي الي عشته بسببه ردت ابتعد عن كل واحد يذكرني بيه انت محاولت تثبتلي عكس اعتقادي دوم عياط وصياح واوامر يجوز اعذرك من جنت متعرف بحالتي بس مستحيل انطيك العذر بعد معرفت ابتعدت واتزوجت لتجي هسه تسألني على شى انت اصلاً محاربت علموده تدري طارق حار شسوه في سبيل يثبتلي حبه رغم لأخر لحظه توقعت يمل ويروح وهسه رجع وفاجأني بأن يجي بنفسه ويحجي وياك هيج واحد شون متريدني اتقبله وارجع واكول اني مااحبه بس متقبلته وهذا اهم من الحب عندي لان بدايه كولشي ناجح التقبل من الطرفين والتفاهم رغم كل شخصيته القويه وغروره وفعلاً الف بنيه تتمناه بس حاول يتفهم عقلي رغم ميعرفني
وهاي صار اكثر من سنتين وهو ولا مره مل ولا مره ابتعد ولا مره حاول يجرحني وحتى تقدملي اكثر من مره وهذا سبب كافي يخلي گلبي وعقلي يفكرون بيه

مازن : يعني الي افتهمه منج انتي موافقه عليه
ودق : حالياً اشوف ماما وعمو حامد الرأي هم رأيهم هذا شى مصيري مينوخذ بلحظه عاطفه بس حابه اكولك شكراً لان سقطت النهوه هذا الشى جبير عندي
مازن : امنيتي اصير مثله واتمنالج السعاده وياه بس حبي الاناني الج ميخليني افكر هيج
ودق : فكر بجنه وابنك همه هسه حياتك والله يحفظهم الك
مازن : اروح اني وانتبهي على نفسج وراح ابلغ ابويه بشغله النهوه
ودق : مااشي شكراً مازن
وطلع حسيت براحه مو طبيعيه وكأنه قيد على رگبتي وانفك
يمامه : شبيج ماما شو مبتسمه شبيه مازن شراح
أيه : نزلت اركض اني سمعت كولشي
ودق : لزمتها من اذنها ولج انتي انعديتي من جنه هم تتسنطين
أيه : لا والله بس انتم الاثنين بانزين ونار ومتكعدون سوه اله يگب المكان وخفت تصير عركه شى اقلها افاككم

يمامه : هسه غير يفهمني شصار
ودق : وحجيت كولشي لماما وهيه خطيه حيل كيفت
يمامه : وهسه شگلتي على طارق
ودق : والله ماادري يوم حايره
يمامه : شوفي امي الحياه متنطينا الفرص دوم ومتنطي كولشي بس اذا اجتج الفرصه الي ترتاحين الها لتركيها وتكولين يجوز يجيني الاحسن الطمع محلو كوني قنوعه دوم وطارق بلذات انسان كامل مكمل والكمال لله ومابيه قصور والولد شاريج يجوز ماعندج مشاعر اتجاهه بس على الاقل مرافضه مبدأ الارتباط بيه شفتي اني شكد جنت ممتقبله عمج بس بحبه وحنانه خلاني اموت عليه

أيه : هاااا ماما صايره الشغله علني
يمامه : ولج انتي الي طالعه عينج مو دخلتي گليه لو استخفيتي
أيه : ااااخ اذني هاي شبيكم كل وحده مستلمه اذني من جهه
يمامه : صيري عاقله
أيه : سكتت بس لج ودق وافقي خلي نركص صار فتره جفاف ماكو عرس
ودق : واني اتورط علمود حظرت جنابج تركصين
يمامه : فكري زين ماما والراي الاول والاخير الج اني الي عليه ابلغ عمج برأيج
ودق : الله كريم
بقيت افكر بحدود اسبوع وفعلاً حسيت طارق مناسب اليه ونزلت لماما وبلغتها بموافقتي
يمامه : حياتي واخيراً راح اشوفج عروس
أيه : هله هله عدنا عرس
ودق : يوم الج وافرح بيج
أيه : أًأًمٌــــيٍّٓن
يمامه : من اكولج خفيفه صايره تزعلين
أيه : هههههههه يله ماما خلي روحج رياضيه
ودق : شوكت تبلغين عمو
يمامه : اليوم ان شاء الله

يمامه : انتظرت حامد يرجع بليل
الله يساعدك حبيبي
حامد : ويساعدچ شنهي اليوم الضحكه شاكه حلكچ
يمامه : شنو يوميه مستقبلتك بالبجي
حامد : لا بس اليوم عيونج تضحك وانه اعرفنج زين
يمامه : اوويلي على حبيبي الي يعرفني
حامد : يمامه شنهي احجي لاتلعبين بأعصابي
يمامه : هااي شبيك على كيفك ويايه تعال اكعد انسولف
حامد : كعدنا يله سولفي
يمامه : وحجيتله على عرض طارق
حامد : انه اجاني مازن وگالي عن النهوه وانه طلبت منه مثل ماوكف چدام الوادم گلها وشيوخنا ونهى عليها يفك النهوه چدامهم واليوم جمعت الكل واجه جدامهم وفكها وباس يدي وراسي وتعذر
يمامه : الله يهدي
حامد : الوليد الله هداه بس گليبه ماانهدى
يمامه : شون يعني
حامد : انه اعرفنه بعده عاشگها تمنيت يحب جنه عبن جنه فقيره مو لجن بنتي لا بس جنه خدومه وطيبه وتحبه
يمامه : بمرور الايام يحبها واكيد هسه صار طفل بينهم راح تتغير هواي امور
حامد : يتعلق بيها اي يعيش ويتقبل العيشه وياها هم يصير بس يحبها لا
يمامه : وشمدريك ياعيني يجوز گلبه يجي يوم ويحبها
حامد : چا انه ٢٠ سنه احبنچ ماتغير بيوم حبي الچ احنا عشگنا يسموه عشگ المهابيل نعشگ للموت عشگ الشروگي يمشي بلدم وينشم بلهوا عبن نحب بگل رويحتنا والمايصير النا نذبح رويحتنا عليه واذا ربچ ماقسم تعرفين گلشي قسمه بس ماننسى عشگنا
يمامه : حطيت ايدي وره رگبته اثنينهم وهمست همزين بقيت تحبني جان انحرمت من احلى حب
حامد : انه مسودن وانساچ چا انتي هاذ وجر نفس قوي انتي الهوا يطيرتي
يمامه : اوويلي ربي شون جدو يخبل ويتغزل
حامد : هااا ولج تعيريني عبن صرت جد
يمامه : غير احلى جد
حامد : اجاج السره راح تزوج ودق وتصيرين جده وبذاك الوگت تعالي گليلي جد
وانه اعرفن شون اجاوبچ
يمامه : بربك لو صرت بيبي وشيب شعري وسنوني وكعت تبطل تحبني
حامد : اهاااا وحگ هو علي اعشگنچ من الاول واخليج تسوين شعرج الابيض كصيبه مثل مجنتي طالبه واركض وراچ بلبيت گله بس هاا على گيفج انه بذاك الوكت رجال جبير وعكازتي بيدي امشي على كيفچ حتى الحكن عليج واضل امشي واتغزل

يمامه : ههههههه والله اتخيل شگلنا الله يحفظك اليه يااحلى جد
حامد : شنهي بويه جلبتي جد وجد
يمامه : هههههههه حتى تبطل تتخيل روحك صغير ومن يهدولك مره ترفض وتكولهم اني رجال جبير ومااكدر اتزوج
حامد : هيچ سولفي طيرتي غيرانه
يمامه : سمعت بهذا الرجال اله كرمك بنته شنو السالفه هيه يوميه كل فتره جايك واحد بله ميبطلون هاي سوالفهم
حامد : انه ماحجيت عبن تضوجين گليلي منهي گلچ
يمامه : لو تعرف منو
حامد : بس الحجيه تعرف
يمامه : هيه عمه كالت ولعبت لعب عليه وربك اله شويه وابجي كاعده وتصفك عرس حميد هيل وطش بلولايه شويه وانجلط
حامد : ههههههه والله يحجيه ماتفوت فرصه تغثچ بيها
يمامه : شكد تحجي عليه وتغلط مرات بس ابد متقبل بوحده من كرايبكم اتجيب اسمي بطريقة محلوه تردهم الله شاهد سمعتها اكثر من مره متشوف هسه شكد متحجي اضحك ومااهتم بس كون تبطل سالفه زواجك
حامد : چا انه تحلى مره غيرج يبعد هلي وناسي وهاي تقاليد وانه اعرفن اتصرف لايضل بالج انه بيضت عيوني لچن حصلتچ اچي وره هذا العشگ والمرار گله اتزوج اله تسودنت
يمامه : ممكن اطلب منك طلب
حامد : عيوني امري
يمامه : اريد اسجل حصتي الي بيت الغزاليه بإسم البنات وحتى حصتي الي بيت شارع فلسطين بأسمهن

حامد : ليش بويه انه مقصر بشى
يمامه : انت اووف ياانت ليش هو اكو مثلك بس حبيبي اريد أمن على مستقبل البنات انت علاوي مأمن على مستقبله الله يحفظك اله واني اريد أمن مستقبل البنات

حامد : اسمعي يمامه كلشي املكه مثل ماهو ليه الج ولبنياتج وعلاوي واحلام وجنه انه ماارضى افرق بين احد بيكم لاتفكرين بهيج امور بنياتج بعيوني
يمامه : اعرف گلبي وممقصر اذا انت حتى شهريه للبنات مخلي علمود مصرف الكليه مالتهن ومتقبل انطيهم مني رغم خير من الله عندي
حامد : لاتضلين تفكرين بهيج امور جيبي وجيبچ واحد بويه بس انه اريدن شى منج
يمامه : عيووني تدلل
حامد :نروح للعمره انه وياج واحلام شگلتي
يمامه : والله ياريت
حامد : انه گلت اخافن لان احلام ويانه ماترضين
يمامه : شون مااقبل احلام طيبه حامد لسان بس گلب فارغ وصدوك احبها بس الحجيه شون شيخلصنا اذا رحنا وحدنا
حامد : انه گتلها وهيه مارضت تكول تعبانه مااكدر
يمامه : شوكت نروح
حامد : بالاول لازم اسافر للاردن
يمامه : ليش

حامد : انه قبل مده وصيت مازن يدورنا على طبيب زين علمود رجل ابراهيم تعرفين الوليد تعبان وضعه متكهرب وبس يعيط وماراضي يسمع چلمه من احد وقبل يومين صديق نازن منطي عنوان دكتور زين بالاردن يركب رجل صناعي ويعالج تشوهات رجله الثانيه انه اريدن الوليد يرد مثل الاول واذا مو مثل الاول اقلها احسن من هسه
يمامه : بس اني شون اكدر ابقى بلياك
حامد : چا انه شون انامن بلياج بس مااكدر اضل اتفرج على ابراهيم وهو موت نفسه حتى الاكل كطعه امه تنوح عليه
يمامه : حقها ابنها الوحيد شوكت ترحون
حامد : نحجز ونشوف موعدنا شوكت
يمامه : ترحون وترجعون بالف سلامه
حامد : تعالي ليه يطيرتي شبيج تكدرتي
يمامه :صايره اتعب بدونك مااعرف شبيه
حامد : چا شنهي هذا احسن خبر
يمامه : لا والله وعيونك احس روحي تايهه وحتى مااعرف اتصرف من انت موجود اني اكون مرتاحه ومأمنه

حامد : انه يمج يرويحت حامد ولايضل بالج مناك ويوميه اخابرج واطمن عليج
يمامه : الله كريم يله حبيبي ارتاح وراك طلعه الصبح لبغداد بس لو كايلي مجان اجيت وياك هم اشوف امي
حامد : مااتأخر گلها ليله وارد مره ثانيه اخذج ليله
بس لو اعرف ليش رايح
حامد : رايح لمنير
يمامه : ليش بيه شى
حامد : راح اشوفنه اخاف محتاج شى الوليد صار مده ماسائل عليه اخافن عليه ومنه ليسوي طلايب والدنيا ماتأمن
يمامه : حقك يله ارتاح
ثاني يوم طلع حامد لبغداد واني گلبي نار عليه ليش حاسه بضيق مااعرف كل شويه اخابره اخر شى گلي
يمامه لا دوهنيني انه بخير اول مره اروحن لبغداد چا انه مسويها باب الشرجي جنت من وراج يارايح ياراد
يمامه : اعرف والله بس خايفه عليك ممرتاحه
حامد : گلشي ماكو لا يضل بالج ربج الحارس
يمامه : يارب ماكو شى

منير : هله يابه زارتني البركه تعال ادخل متوقعت جيتك
حامد : شنهي يابوي رحت وگلت عدولي الچلب العضك گتلناه
منير : لا يابه بس والله دوام وشغل ومصارلي مجال انزل للعماره انت شونك مازن
مازن : چا حتى اخوك ماجيت وباركت اله شنهي سالفتك وليدي
منير : والله يايابه جانت نفسيتي تعبانه وهسه احسن بس عندي شغله اريد اطلبها منك
حامد : شنهي الشغيله
منير : امي
حامد : خيريه شجرالها
منير : اتصلت بيه ورادت تشوفني واجت وشافتني وتريد تشوف مازن وخابرته وبلغته ومقبل احجي وياه يابه قافل
حامد : وانت ارتاحيت من شفتها
منير : لا يابه لو مشايفها هواي احسن
حامد : موش هاي امك
منير : بس نستنا وعاشت حياتها وجهالها بطولها عود هسه اتذكرت تسأل علينا من صرنا زلم ومازن صار اب اني لان توسلت بيه احجي ويه مازن وحلفتني واله مجان ادخلت
حامد : ليش يوليدي احسنك تعبان
منير : اووووف يايابه كولش تعبان جيتها اذتني اشوفها عايشه ومرتاحه زين شون نامت بليل واحنا بعيدين عنها شون غمضت عيونها تدري هذا السؤال خلصت طفولتي ومرحله المراهقه واني اسأله لروحي تمنيت تبقى متمسكه بينا مثل عمه يمامه ومتتنازل بسهوله
حامد : هي ماعملت شى حرام
منير : حقها تتزوج وتعيش بس مو تنسانه وادير وجهه وهسه من كبرنا اتذكرت عدها ولد ماانسى من توسلت بيها تاخذني لو تبقى يمنا وشون راحت ولا اهتمت والحلو من اجتي عرفت انت جنت ادزلها فلوس اول سنه وره متزوجت يله كطعت المصرف منها شون ادزلها
حامد : قبل ماتتزوج هي مرت اخوي ومسؤوله مني وامكم وماردتها تحتاج احد ويأذوها اخوتها بس من سمعت تزوجت قطعته عبن صارت بحكم رجال ثاني

منير : أيه شخبارها
حامد : انساها وليدي
منير : لا والله هيج فضول سمعت بيها دخلت كليه ونجحت
حامد : منين تسمع اخبارها و
سألت مازن
منير : شوكت تزوجها لأبراهيم
حامد : انه گلت لا الك ولا اله
منير : انه اعرفنك يشيخ حامد گلبك رچيج وماطول تعرف ابراهيم يحبها راح تزوجها اله
حامد : انت ماتحبها ليش تغالط نفسك
منير : اريد ارجع وياك للعماره مشتاق للكل هناك
حامد : نرد باجر الصبح
منير : خلي نطلع نغير جو واشتري غراض لجده وللبنات وهديه لأبن مازن غير صرت عم
حامد : يله امشينا

واحنا نمشي بلكراده صار انفجار قوي حسيت انشاليت واركعت مااسمع شى بس عياط النسوان لزمت وجهي كله دم اتذكرت ابويه ركضت عليه يابه دخيلك احجي
حامد : هاا بويه شصار بيك شى
منير : لا مابيه
حامد : هذا شنهي الدم
منير : هيج جرح بسيط كوم دخيلك بس خلي اشوفك
حامد : لا اله الا الله كوم وليدي نساعد الوادم التتراكض اخافن محتاجين شى
منير : بيومها شفت ابشع منظر بحياتي ناس مكطمه نسوان مذبحه اطفال محتركه جان الانفجار كولش قوي هزنا هز جان شهر السادس ٢٠١٣ وبعد ايام لرمضان لهذا الناس تتسوك ركضنا اني وابويه نساعد العالم رغم هو هم انشكت كصته وتأذت شويه ايده بس مقبل نرجع اله نساعد وحتى رحنا تبرعنا دم وهناك شفنه ممرضه صديقة عمه يمامه واكل ابويه بلسلام
يابه لو تدري عمتي هيج الممرضات يستقبلوك تشوفك مكطم ولا ادزلك للمستشفى
حامد : بسگ بويه لو تعرف چا شخلصنا
منير : هلمره ولا وحده حلوه بس ذيج ومبينه مخطوبه
حامد : ولك بسگ تونا طالعين من الموت
منير : اي والله لازم اعقل هاك شوف بربك الي يشوف هيج جمال يعقل اول وحده اشوفها حلوه اليوم
حامد : لا اله الا الله ولك اثگل تسودنت
منير : بويه بروح ابوك اروحن ارقمها واجيك البنيه اگلتني بعيونها
حامد : ولك منير اذا كمت من يمي اطگگ بلحزام چدامها
منير : اهووو يابه يردون دم رايح اتبرع كمت جان يسحلني من ياختي وكعدني
حامد : چا هيه چسب هسه تبرعت گل ساع
منير : يعني اليوم ماارقم
حامد : اركد وانجب
منير : اذا متخليني ارقم اخابر عمه يمامه واكولها احنا بالمستشفى والممرضات واكو دكتوره عينهم عليه وهو يضحك الهن ومتونس عليهن واخليك من ترجع للبيت تنومك بالديوان هههههه
حامد : يله زلمه وسويها وحگ هو علي ابيتك بلجول اذا انه اباتن بالضيافه
منير : يله عقلت
حامد : يله امشينا فضت
لك وين مولي
منير : نسيت تلفوني
حامد : منير
منير : وروح جدي نسيته ثواني وارجع
حامد : هذا وين وله ولك وينك
اجيت يابه يله امشينا
حامد : ذيل الچلب عمره ماينعدل من الموت وترقم
منير : اني
حامد : لا ابوي انه اعرفنك فلم هذً ورحت للدكتوره واجيت
منير : هله بأبو منير يلكفها وهيه طايره
حامد : انه الك نرد للعماره وانه اعرفن شون اخليك تجر عدل
منير : ههههههه راضي والله المهم رقمتها هي غير تخبل وكله قدر يابه صار الانفجار حتى اشوف هاي الحوريه
حامد : ربك وراك الموت حتى تعقل مو تتسودن
منير : يله يابه كلشي بيه اراده هههههه
حامد : مسودن مايصيرلك جاره لا وعلي

اول مرجعنا للعماره اجتي عمه تبجي وتحضن بيه
يمامه : بيك شى اتأذيت
حامد : شنهي بويه شبيج وهاي دمعاتج
يمامه : خابرتني كوثر وكالت صار انفجار وانت مجروح
حامد : نسيت اوصيها ماتبلغج غير هذا دوهني
يمامه : بيك شى فدوه
حامد : بسچ بويه هياني چدامچ گلشي مابيه
منير : اكولها على السسترات
حامد : بسگ يلثول
يمامه : شبيكم تتهامسون صار شى
منير : عمه من الاخير رجلج طالعه عينه ومبقت ممرضه متحارشت بيه وحتى دكتوره حليوه وهو يضحك الهن ومكيف
يمامه : صدوك حامد
حامد : شنهي بويه هسه جنتي تنوحين علي انگلبتي وفتحتي عيونج الوليد يتقشمر(يتشاقه) وياج
يمامه : لا مو اني هم شفت بعيني قبل شنو نسيت
منير : علكت والله
الحجية جميله: هله بلجاينه لك يمسودن تروح وماتسأل على حبوبتك
منير : جده انتي الخير والبركه
الحجية جميله: شنهي حسچ واصل للديره گلها
يمامه : غير اشوف الشيخ شون صار وخاصه بين الدكتورات الحلوات
الحجية جميله: شنهي وليدي وجنه العافيه كافي ماشبعتي اريدنه يجدد
يمامه : شنو يجدد عمه هي سياره ويجدد
الحجية جميله: يمه حميد شوفنه وحيده صغيره حليوه نريد نحسن النسل ذني نسوانك كبرن وخرفن
حامد : لا يمه جنهن العافيه شبيهن
الحجية جميله: ياعافيه يمه وحده مسودنه ماترتاح اله الوادم تكاتل من وراها چا اثنين اطلگن بسبتها وتسالها ليش يمه هيچ تگلك انه شنهي هنه مسودنات ورعنات والثانيه بومه وتفتر علينا خلفت وحيد وصگته محرك نص عمر يمه لو منك اطلگهن وهاي الحديثات الظالات اجدد شبابي عليهن
منير : ابد الحجيه مو طبابه خير
يمامه : حامد فدوه سكت عمتي تره والله راح تموتني
حامد : هههههههه يمه على كيفچ وياهن
صگد خابرني ابو طارق يردون يجون
يمامه : شوكت
حامد : الجمعه حضرو نفسكم
يمامه : ان شاء الله الحمدلله على السلامه حبيبي
الحجية جميله: بعد وگت والغسل اي والله كون حفره والمجن گلجن واطمچن بيها واخلص
يمامه : على گلبج عمه كاعدين
الحجية جميله: كبر اي والله من دهر صابج تلوموني من اسميها بومه

يمامه : تعالي ودق
ودق : نعم يووم
يمامه : انتي گلتي لطارق يرجع يتقدم
ودق : لا بس گلت لنور سقطت النهوه
يمامه : مو تفاجأت لان ابوه خابر الجمعه يردون يجون
ودق : اعرف
يمامه : ولج شبسرعه
ودق : والله مو اني هو گلب الدنيا بس الله شاهد متصلت بيه بس بنور
يمامه : ولج هو شنو الفرق بين نور وبينه شوفي بنتي من هسه اكولج تره ماكو زواج لحد متتخرجين بس خطوبه هسه
ودق : اني هم گلت لنور
يمامه : لا والله معناها گلتي لطارق تعالي بحضني والله كبرتي وصرتي عروس
ودق : لتخجليني ماما
أيه : هي هاي وين تخجل يجوز يجي يوم تگتل طارق وتشبعه جلاليق بنتج مسترجله
ودق : امشي لج لتخافين هو شخصيته قويه وحلوه ويعرف يتصرف صح ويايه
أيه : هله هله تيرا تيرا بده الحب
ودق : ماما عفيه خلي تبطل من الصبح تلعب عليه
يله كافي وحظرو نفسكم كلها يومين ويجون وجان نسمع هلهوله قويه هزت البيت نزلنا نركض طلعت جنه تهلهل وتكمز وتكول
على عناد العاندونه كلاص شربت شربونه كلللللوش
ودق : خرب ببليسج ولج بعدج نفسه موزين عليج
جنه : شنهي نفسه خيه گل العافيه بيه عيفيني فرحانه
ودق : هههههه يمكن انتي فرحانه اكثر مني
جنه : خيه لو بيدي اذب لوري حجار وراج
ودق : هههههههه صريحه عمي
جنه : هههههههه اتقشمر وياج يبعد گلبي هسه عرفت شايفه گل الخير يله أيه وياي
أيه : مااعرف
جنه : شنهي شيرادلها كمزي واني اهوس واهلهل
أيه : يله وياج
كللللوش جنها طماطة لا تكول محمرة
افصوص روبه ويا كفاها
وين دورهه ولكاها
أيه : اكولج هاي هوسات لو غدا خلصتيها علينا لبن وطماطه بعد فد خبزه واليرحم اهلج

جنه : شنهي ياأيه خربتيها علينا
أيه : هو اني شوفينا وحده مابيها اكل تره جعت
جنه : وجع هاج اسمعي
هاي فرحتنا الجبيره فرحت كل العشيره هاي فرحتنا التمام فرحت كل العمام
أيه : لا والله فرحتج انتي الجبيره
جنه : يا والغسل بطلت
ودق : هههههههه كملي الله عليج معليج بيها هاي خبله
يمامه : كملي ام حمودي مالج علاقه والله حلو تهوسين
جنه : اغديلج فدوه عمه هاج هاي الوادم التفهم موش انتي
أيه : يله سمعينا يم العريف راح اهوس وياج بس مابيها اكل
جنه ؛عين البارده كل الهلا بيهه وعين الحاره حيدر يطفيهه.
أيه : اي هاي حلوه
كلللللوشششش

واجت يوم الخطوبه نركض منا ومنا واهل طارق اتصلو كالو لان الطريق طويل ليش ميصير قرايه فاتحه وخطوبه ونيشان ولان وراه دوام والتحاق وبعد كم يوم رمضان لازم ننتظر للعيد وهو مقبل خاف يگلبون وحتى سيد راح يجيب وراد عقد محكمه بس عمو مقبل كال مو هسه والحلووو راحو للكاظم اشترو نيشان ويدزولي الصور على الفايبر حتى اختار واختاريت واحدحلو ونازك

لبست بدله ساك (عدله ) كيمونه واني طويله ورشيقه طلعت تخبل عليه جان لونها كشمير
(وردي وصخ) ومكياج بلونها فاتح وشعري بس رفعته منا ومنا بتسريحه بسيطه وأيه بلفير سوته وهو طويل وثخين طلع يجنن
نزلت والكل يهلهل ويصلي على محمد
يمامه : طالعه تخبلين
الحجية جميله: يبعد بيتي جنچ فلعه كمر
ودق : يعني مو مسعده احلى مني
ودق : چا شنهي يايمه گلنالچ حلوه بس تضل مسعده احلى منچ
ودق : حضنتها لبيبي وبستها والله اني اليوم احلى من مسعده لو شمسوين وشمتكولين
الحجية جميله: يله عبن عروس ارضى بس اليوم
ودق : اي عفيه بيبي بس اليوم
يمامه : اكعدي ماما تره وصلو مبقى شى وين ايوته
أيه : اجيت
الحجية جميله: هله بسورها ونورها يمه بنياتنا الحسن گله ليهن
أيه : شوني طالعه بيبي
الحجية جميله: شنهي يمه غطي زنودج طالعات گيمر السده تنحسدين حبوبه
أيه : بس اليوم فدوه بيبي لتحركين ماما عليه كوه قبلت البس هذا الفستان
الحجية جميله: شحدها تفتح حلگها افرگه فرك ليها ولج فضيله تعالي
فضيلة : امري يمه
الحجية جميله: شوفي جنتچ شونها
أيه : اني متت خجل ودنجت
فضيلة : هيه من الاول تخبل وحلاها الگمر يستحي منه
أيه : ابتسمت اول مره اشوف عمه فضيله تمدح بيه كل هاي السنين ضدي بس هم احسها ممرتاحه
جنت لابسه بدله عدله كيمونه سوده وبيها خيط ذهبي واني بيضه طلعت تضوي عليه وحطيت مكياج خفيف بعد متوسلت بماما وجنت حافه بلجديد وشعري بس فاتحته بحيث الكل يباوع عليه وخطيه حارت ماما مدري تقرا معوذات عليه مدري على ودق وكل شويه ترزلني لان متكدر ترزل ودق لان العروس جنت اني اكل نصيبي من الرزاله وتكولي من وراجن حتى دربي ماافهمه بس حايره اقرا ايات وافتر
سمعنا صوت هورنات الدنيا انگلبت ودخلو اهله النسوان والزلم بلديوان والكل فرحان شويه ونسمع طلقات كالو قرو الفاتحه
ودق : احس دگات قويه بگلبي صاحوني گالو السيد اجه تعالي وره الباب
وبدا السيد يحجي لحد موصل وگلت قبلت
واشتغلت الهلاهل
بيومها الكل اشوفه فرحان ويركص اما جنه لا بعرسها مشفتها هيج طايره

شويه وسمعت كالو العريس راح يدخل
دخل طارق رفعت عيني وشفته جان لابس قاط نيلي وطالع يخبل وطاير من الفرح اجه كعد يمي وجان يكولي
صدوك صرتي اليه مدااصدك
ودق : لا صدك
طارق : صرتي حلالي ومرتي ولج شطالعه هذا كله اليه ميصير الدخله اليوم ليش التأجيل
ودق : ههههههه اسكت عيب منا الناس
جابو الذهب فتحو العلبه التخم وهو ضايف ٦ اسوارات
ودق : ليش مو صار هوايه
طارق : اني لو اجيبلج ذهب الدنيا يرخصلج بس اكو شى لازم البسه الج
وجان يطلعة من جيبه الدنبوس الذهب ابتسمت انطيني البسه
طارق : من كل عقلج غير نذرت اني البسه بيدي وخري ايدج يله
ودق : اكعد راحه منا العالم عيب
طارق : هو داالبسج باقي نيشانج قابل شمسوي
ولبسه على كيف وعيونه اگلتني اكل جان يبوسني من رگبتي والكل عاط هااا هااا متت خجل وجان يصيح ولكم صارت اليه ممصدك وطاير من الفرح وجان يصيحوه جماعته ومنسمع غير الجو احترك طلقات ثاري اصدقائه الضباط كلها تدري بي وناذرين الكل يضربون بعرسه وكلها لابسه قوط منظرهم يجنن وكف المنطقه على حيلها وهو بنصهم يهوس ويصيح اخذتها اخذتها

ورجع وكعد يمي وجان يكولي ودق اني كولش احبج
ودق : اعرف
طارق : يجي يوم وتكوليها اوعدج اني مابيدي اروح بس مبقى وكت لازم نرجع ورانا طريق
ودق : ترجع بلسلامه
كام باسني من راسي وراح همه طلعو لو استلمن الساحه جنه وايه ودك ركص وبنات عم بابا وجناينهم تكول مفجوعات على الركص خلصت الحفله بسلام بليل نزعت ولبست تراك بس بعدني بشعري والمكياج وكاعد العب بلحلقه صدوك اني انخطبت واضحك ويه روحي جان يخابرني طارق

طارق : بعد مالكم حق عندي مرتي واشتاقيت الها
ودق : حقك عمي
طارق : تدرين لأخر لحظه خايف ليطلع واحد وهم ينهي عليج
ودق : هههههه شطلعت هاي
طارق :اريد يوميه اسمع صوتج وخاصه من تكعدين من النوم
ودق : شمعنه
طارق: حتى احس روحي يمج
تدلل
مرت الايام وطارق مغرگني باهتمامه وخوفه جان يخابرني كل وقت ومينام اله على انفاسي اكله مااعرف انام والخط مفتوح يكول نوميني ونامي وحتى بلدوام يتختل ويخابرني بديت احس يومي ميمشي اله اسمع صوته

من يوم خطوبتي واني مشفت مازن حتى لقرايه الفاتحه محاظر وجنه كالت بيومها حتى للبيت مرجع وهيه راعت ظروفه شكد قويه جنه غير وحده ولا تتحمل زوجها هيج
بيوم كاعدين اجت فضيله على أيه هاي الجبانه خافت تنزل

ودق: ولج انزلي شجاج
أيه : عمتج متجي اله بمصيبه
ودق : اني موجوده بس اذا صار حجي ومعجبج صيحيلي
أيه : ماشي
نزلت واني خايفه شرايده مني
فضيلة : خيه ام علاوي اريدن البنيه من رخصتج وحيدها
يمامه : مااشي
أيه : اويلي متت رعب هاي شتريد
فضيلة : اگعدي يمه شوفي انه بعد كل الصار وعدت رويحتي اذا رد الوليد سالم اخطبج ليه انه لهسه ماراضيه وماعاجبني الوضع گله بس الوليد يحبج ومايرضى يكض غيرج
أيه : بله هاي شحجي وياها شون موقف ام الي احبه وفوكاها عمتي اخت ابويه تكولي مراضيه بس مجبوره اخطبج شون اردها مجان عندي رد الها غير السكوت

فضيلة : الي اريده منچ تقنعين ابراهيم يسافر ويه خاله مايرضى يسوي رجل وانه تعبت اتوسل بيه ومايفيد حتى الاكل كطعه وليدي تعبان وحال الضيم حاله حتى خاله عجز وياه ولا هو صغير ونغصبه وگل الطرق اجيت بيها وياه وهو قافل تعالي وياي اقنعيه الحجز بعد ٥ ايام ولازم يسافر واذا ماراح لازم ينتظر ٦ اشهر وانه مااتحمل اشوفنه هيج ويجوز يحرگ رويحته الوليد تعبان وماكو غيرج تقنعه
أيه : وكفت على حيلي يله عمي امشي
فضيلة : وامج
أيه : ماما متعارض ثواني دخلت بلغت ماما. رايحه لجنه بس اتوقع عرفت السبب وسكتت
صعدت ودخلت لغرفته شفته كاعد على الكرسي اللحيه عاليه وضعفان صار شهر مشايفته ميقبل احد يوصل يمه واني احترمت هذا الشى توقعت يتحسن وضعه طلع الاسوأ
هذا شنو حالك
ابراهيم : شجابج
أيه : شطلعت هاي كل مااجي يمك تكولي شجابج جابني گلبي ابراهيم الى متى تضل هيج تبقى تأذيني وتأذني نفسك

ابراهيم : وشبيج انتي شو ماشيه حياتج وضعج تمام وكولشي ماشي حسب الاصول وحتى اني لغيتيني من حياتج
أيه : انت من كل عقلك هيج تحجي شنو لغيتك اني منتظرتك يوم يوم ترجع مثل الاول وتجيني
ابراهيم : ماارجع ايه وروحي من حياتي
أيه : مو بكيفك اكو مره مسؤوله منك وغصب عنك تروح وتسافر وتعالج نفسك دوم اعتبرك قوي ليش هيج ضعفت
ابراهيم : لتعبين نفسج سفر مااسافر وهذا حالي وطخي راسج بلحايط
أيه : اووف استغفر الله كنبصت يم رجله
شوف ابراهيم تروح وغصب عنك وترجعلي كافي تره هواي انطيتك مجال
ابراهيم : لج شايفه نفسج انتي اني مااريدج لتشوفيني عاجز وتتجاوزين والله اطيح حظج
أيه : نزلت دموعي والله موقصدي ردت احسسك شكد احبك واريدك تتحسن لخاطري جان يعيط حيل
ابراهيم : اطلعي بره مااريد اشوف احد وگتلچ الف مره لتبجين
أيه : لا شو ابجي ومااكل ولا اشرب واموت نفسي لحد متسافر
ابراهيم : ايه حسي بيه اني انتهيت ليش متمسكه بيه
أيه : لان احبك والله اموت عليك لتعوفني
ابراهيم : اني مااريدج
أيه : كمت على حيلي واعيط انت واحد ضعيف انت مو ابراهيم الحبيته يوم ترجع تحبني ويوم تطردني مكافي شوف اني شكعد اسوي حتى ننجمع وشوف انت شكد ضعيف واستسلمت
ابراهيم : شنو الي سويتيه خاتون عايشه حياتج وكليه وركص وكالو لاعبه لعب بخطوبة اختج واكثر من واحد خطبج متولين وتنخطبين وتخلصيني
أيه : شنو الي سويته مو اوكف ورحت ركض لبيتنا والهث والدمعه بعيني رحت طلعت الحلقه ورجعت ركض
ابراهيم : وين وليتي وليش رجعتي اصلا
أيه : هاك
ابراهيم : شنو هاي
أيه : هاي الحلقه الي لابسته بلكيه حتى لحد يتقرب مني الكل يعرف مخطوبه وخطيبي اسمه ابراهيم هاك الزم واگلبها للحلقه بيها حرفي وحرفك
باوعت عليه مصدوم ويگلب بيها انتي ليش هيج سويتي
أيه : لان احـٍُــبٌك ومنتظرتك وسحبتها من ايده ومستعده حتى هنا البسها جان يبجي اني متت قهر حضنت راسه شبيك فدوه
ابراهيم : خايف ايه خايف اسافر وتفشل وماارجع مثل قبل او مااكدر امشي عدل واخسرج
أيه : تتذكر حادثتي بوقتها شصار بيه ويأست من الدنيا انت وكفت ويايه وبجانبي وتقبلتني على حالتي بربك قل حبك اليه
ابراهيم : لا زاد بلعكس
أيه : لعد ليش تتوقع مني اخذلك ليش متأمن بيه وبحبي الك ابراهيم اني اتسجلت بأسمك من الله ربك رجعك اليه لتسوي هيج عفيه لخاطري اقبل تسافر لخاطري وجان يمسح دموعه ودفعني
ابراهيم : وخري مني ريحتج طيبه ومااريد المسج وانتي مو حلالي
أيه : خوش لعد احجي ويه بابا نعقد قبل متسافر
ابراهيم : هههههه شگلج يضحك عبالك طفله
أيه : هااا شگلت
ابراهيم : مااعتقد يقبل
أيه : انت بس اقبل والباقي عليه
ابراهيم : ومنير هنا اكيد تتصعب
أيه : عمي بس اقبل واني اگلبها للدنيا
بله بربك صايره البنيه هيه الي تتوسل بس خلي نتزوج اله اطلعها من خشمك بعيني
ابراهيم : لج انتي حلم عمري ورويحتي بس خايف عليج والله
أيه : لتخاف فدوه والله. راضيه بكولشي بس اقبل
ابراهيم : انتي شون تلبسين الحلقه مخفتي
أيه : اني مااكولك مااخاف لا خفت بس من اتذكرك واتذكر حبك الخوف گله يروح مني
ابراهيم : أيه
أيه : حبيب ايه وروحها
ابراهيم : تتزوجيني
أيه : اي وهسه
ابراهيم : هههههههههه يابه والله موطبيعيه صايره بس سوالفج تخبل
أيه : اول شى تاكل وتزين وراك عقد حتى من تسافر اني على ذمتك
ابراهيم : واذا مقبل ابويه
أيه : نحاول مره واثنين شعدنا اني الك وانت اليه

طلعت ركض منه صار منير بوجهي
منير : شونج ايه
أيه : الحمدلله من رخصتك ونزلت
خفت منه اخاف يسوي مشاكل
رحت حجيت لماما كالت من يرجع من السفر يله تعقدون توسلت بيها مقبلت مااعرف ليش
رجعت لأبراهيم وكتله وخفت من ردت فعله جان يكولي امج كلامها صح اسافر واصير زين وارجعلج
أيه : اخاف تغير رأيك
ابراهيم : شون اغير وانتي الي خطبتيني
أيه : خوش لزمتها عليه
ابراهيم : حضري نفسج بس ارجع اخطبج تعالي وباس راسي انت احسن بنيه بلدنيا
أيه : وانت احسن حبيب بلكون

وره يومين شفت منير كاعد ويه بابا معرفت شگله بس سمعته كال الله كريم
بيوم السفر مشفته لان مكدرت اطلع القلق اگل گلبي وخفت لا بابا يفشلني وسافرو وطول السفر يخابرني لان عندي تلفون صح دقايق معدوده بس اهون مما كولشي ماكو

بدت الكليات ورجعنا لبغداد ومر اكثر من ٣ اشهر على سفر ابراهيم وبيوم كاعده ويه صديقة اليه اخذت ملازم منها ومااشوف غير واحد فوك راسي رفعت راسي واشوفه ابراهيم طفرت شفته واكف على حيله
من الفرحه اجيت احضنه
ابراهيم : شونج بطتي
أيه : الحمدلله على سلامتك ودمعت عيوني
ابراهيم : اشششش فضحتينا
أيه : ممصدكه كدامي واكف
صديقه أيه : شبيج ايوو
أيه : مسحت عيوني اقدملج خطيبي ابراهيم جان مسافر ورجع
الحمدلله على سلامتك من رخصتكم
ابراهيم : هاي انتي صدوك تحجين
أيه : شكوو
أبراهيم : لابسه الحلقه
أيه : لعد شنو عيني كعد نلعب امشي خلي اشوفك ممصدكه شجابك
ابراهيم : اجيت مشتاق حيل ومكدرت اصبر انتظر شهر يله تجين للعماره البارحه اجينا من السفر وكعدنا بشقه منير وكتلهم عندي ولد صديقي اسلم عليه واجيكم وصدكوني
واجيت اشوفج قبل مااروح لهلنا
أيه : الف الحمدلله والشكر
ابراهيم : اشتاقيتلج يارويحتي
أيه : اوف ربي وحق الله مو بكدي
دك تلفوني بابا حامد جمدت شكوو
الوو ها بابا شونك
حامد : كولي لبراهيم خلي يجي وتعالي وياه لو يجاوب على التلفون
أيه : شنوو
ابراهيم : اشرت الها شكوو اشرت على تلفوني فتحت لكيت ٥ مكالمات فائته سدته والصدمه على وجهه وخايفه شبيج ايه
مجاوبت دكيت گلي جيبها وتعال
امشينا
أيه : خايفه عفيه
ابراهيم : لتخافين لو اعرف اتعارك ومااخلي بشر يلمس شعره منج طلعنا من الكليه صح مشيتي مو قويه بس زينه وبمرور الايام كالو تتعلم وتكوم تمشي احسن اخذت تكسي وصعدتها ليوره واني ليكدام اباوع عليها بلمرايه وهيه طول الطريق ناشف ريگها وترجف من الخوف دخلنا وشافها ابويه
حامد : انه ماراضي عليك عبن جذبت ورحت ليها مايصير گلشي بلظلمه مامقبول منكم
ابراهيم : يابه والله بس رحت اشوفها
حامد : مارضاها گله ولا الجذب اعقد عليها ولي وين ماتروح روح
ابراهيم : هاااا اعقد
حامد : اي اعقد وانتي حظري مستمسكاتج اليوم اعقدلج عليه ومن تخلصين السنه لبسو الذهبات
أيه : اني مبقت لحظات ويغمى عليه وممصدكه الي كعد اسمعه احد يكرصني يعضني يدعمني هم راضيه بس يصحيني هذا حلم لو حقيقه
ابراهيم : ومنير

حامد : هو الوليد يمك جارك انه بلغت الحجيه وامها وامك راح اعقدلكم وتصير حرمتك وعلى العطله الحفله امها ماترضى هسه تكول تلتهي
أيه : حضنت بابا وابجي
حامد : شنهي بويه هيج هذا المسودن شالع گلبج
ابراهيم : بست راسه الله لايحرمني منك
حامد : يله امشو
ابراهيم : انه خايف لا منير يزعل او يتعارك
حامد : المصخم الثاني طار وفار ولاتخاف هو گلي اعقد ليهم عبن شافگم مفرفحين وهو تراهن وياي انت رايح ليها وخسرت من وراكم ١٠ ورقات خذاهم وله صدقانه بس مارضى يحظر حتى لاينحرج
ابراهيم : هذا الولد محيرني
حامد : وانه مثلك ماتعرفه شيريد
يله بويه امشي ورانه رجعه
أيه : بيومها ممصدكه صح مو مثل البنات قرايه فاتحه وهوسه وحفله بس هذا كله مو بعيني المهم عندي ابراهيم كولشي مااريد بس برهومي واجه خالي وصديقه شهود وعقدنا جانت اسعد لحظه بعمري ومن وصلت استقبلتني ودق بلجگليت هيه وبيبي وزوجة خالو والهلاهل وماما حبيبتي تبجي بلتلفون لان محضرت واسمع هوسات جنه وعمه احلام وبيبي رغم مو ويايه بس جانو طايرين مااعرف سبب العقد بهاي الطريقه بس مو مهم كافي صرت زوجه ابراهيم شرعاً واخذه بابا وراح حتى مخلاني اختلي بيه يله الايام جايه المهم اني حالياً زوجة ابراهيم

مرت الاشهر واحنا بسنه ٢٠١٤ خلصت السنه الدراسيه ورجعنا اول مدخلنا استقبلونا بلهلاهل وجنه المسودنه تكمز ههههه تعلمت احجي مثلهم وابراهيم اويلي عليه العشق مالتي سوينا حفله بينا بسيطه لبسني الذهب مجان بعيني غير بس هو والاحلى مقبلت يلبسني غير حلقه هاي الحلقه الي بقيت لابستها سنتين نفسها بلخطوبه لبسها اليه وحتى طارق خطيب ودق حاظر

ودق :طارق مله حياتي بحبه واهتمامه جان ميدخل عليه اله لو ورد لو دبدوب شبعني هدايا مااريد شسوي بيهم يكول ميخالف بقيهم لجهالنا من يوم الخطوبه ومشفت مازن بس مرتين وبلمرتين بس سلام حتى بوجهي ميباوع عذرته وابتعدت
سمعنا الاخبار موزينه سقوط الموصل هنا دخلت بحاله من الخوف عليه جنت دوم اتصل ومرات شبگه ماكو واموت خوف وحتى اليوم الي ميخابر بيه مااكل
كاعده وحايره صار يومين ماكو واجه علاوي كال خطيبج هنا طفرت ونزلت حتى ممشطه
وركض حضنته من حلات روحي
طارق : اذا هيج بعد ولا اخابر حتى كل مااجي احصل هيج حضنه
ودق : ظل بالي حيل عليك متت خوف ليش تلفونك مغلق
طارق : عطل التلفون وسويتها حجه وقنعت الضابط بس انزل ٤٨ ساعه واجيت اشوفج ياروح طارق
ودق : همزين اجيت طمني شخبارك
طارق : تعالي اكعدي مشتاقلج حيل ولج شنو هاي كفشتج
ودق : عزه نسيت والله ممشطت اروح امشط واجي
طارق : ههههههه والله تبقين هيج غير تخبلين
ودق : لا حباب والله ثواني واجي من وراك حتى اكل مأكلت
طارق : جيبيلي المشط اني امشطلج
ودق : لا شبيك طروق
طارق : بداعتي جيبيلي المشط مشتاق لشعرج
جبت المشط وانطيته اله وكعد يمشطلي بهدوء ويبوس برگبتي من وره واني اغار
كافي طروقي بداعتي
طارق : من فدوه لريحة شعرج شكد احبه لج اياج تصبغي اموت عليه هيج لونه وطوله ولمسته اوف شوكت انام عليه
ودق : كافي لتجي ماما عيب
طارق : غير ترحم بحالي امج واتزوجج
ودق : هانت گلب بيج المشط
طارق : بعدني مشبعان منه تعالي وين طفرتي
ودق : ليجي احد عيب كافي صاير وكح
طارق : هو العنده مره مثلج ميصير وكح من امداه شنو طابوكه
ودق : هههههه كافي اجتي ماما

يمامه : شونك ابني
طارق : هلو خاله شونج
يمامه :  الْحٍمَدٍ للـّہ هيج توكع گلبها عليك
طارق : خاله ارحمو بحالي وزوجوها اليه والله مااخرها على القرايه شو البيت مابيه احد ونور وياها واني كل ١٤ يوم انزل ٧ يعني متتأثر
يمامه : بس اني اتفقت وياك اله تتخرج وهاي سنه اخيره
طارق : وعد رجال تتخرج وتفرحين بيها حتى الاطفال انأجلهم اكسبي اجر بيه وزوجونياها
يمامه : ههههههه شبيك تريد تبجي
طارق : بربج خاله هاي حاله اجه من الانبار للعماره بس حتى اشوفها ولازم ارجع باجر وعدنا روحه للموصل
يمامه : انتبه على نفسك ابني
طارق : والله اني راح اموت اذا مااتزوجها لتخليها بنفسي
يمامه : ياستار كول ياالله انتي شتكولين ماما
ودق : هااا اباوع عليه عيونه تخبل مال جهال عبالك يتوسل بكيفج يووم
يمامه : بس اذا رسبتي ومتخرجتي لا انتي بنتي ولا اعرفج
طارق : وشرفي مااعطلها بس ارحموني كولشي جاهز بس انطيكم فلوس البدلات والصالون شو حتى الغرفه اشتريتها والفرش والسبلت والتلفزيون حتى ثلاجه حطيت

يمامه : هههههه لعد احنا شنجيب هدايا الها
طارق : هديتكم اتزوجها وهذا هو
يمامه : اسألها عمها اذا قبل من عيوني
طارق : هَــْـِْـْْـِلاّ بخالتي البطله يروحولج فدوه الدواعش
ودق : هههههههه والله انت فد واحد واني منو يروحلي فدوه
طارق : طارق والدنيا كلها
ودق : اسم الله حبيبي
طارق : استري على نفسج منا للعرس تره واصله حدها هسه اخذج وبغرفه امج وادخل عليج مرتي وبكيفي
ودق : ههههههه لا سكتت مااحجي بعد

بعد يومين وصل الرد واشتغلت الهوسه وهلمره عرس يعني بيت الشيخ راضي راح ينگلب
طارق شرط عليه اشتري البدله حاولت اقنعه أجر هيه كم ساعه مقبل اله شراء اشتريتها وجانت اتجنن بعد ٣ ايام العرس وناس حايره تسوي شعرها وناس تنظف نفسها وناس تشتري ملابس وناس تطبخ
دك التلفون عليه
هاا طروقي نزلت لا حبيبي
طارق : روح طارق نازل بليل ليضل بالج بس اشتاقيت اسمع صوتج
ودق : طارق ميصير تره عكب باجر الحنه وانت بلدوام يصير هيج
طارق : نازل وعيونج عندي مأموريه اخلصها والصبح مصبح بغداد
ودق : لتتأخر فدوه
طارق : تعرفين شكد احبج
ودق : اعرف هوايه هوايه هههههه
طارق : انتي اول نبضه بگلبي واخرها انتي الي من شفتج رجف صدري وگلبي گلي هاي الي ادور عليها صار ٣ سنوات انام واكعد واحلم بليوم الي انومج بيه على صدري والعب بشعرج واشم ريحتج واصبح بوجهج
كل يوميه اكول هم الله يكتبلي عمر واحقق حلمي وياها
ودق : حبيبي شبيك خوفتني ليش هيج تحجي والعبره خانكتك
طارق : خانكتني من الفرحه لان كلها يومين وتنامين بحضني
ودق : قصدك ٣ ايام
طارق : اليوم خلص مينحسب احبج يااول واخر حًب بعمري
ودق : واني هم احبك
طارق : حاب اسمعها بعد
ودق : احبك احبك احبك
طارق : اوف ربي وعدتج وفيت وگتلج راح تحبيني
ودق : ويله اوفيلي بوعدك وارجعلي سالم وتعال نعرس لو متريد نعرس
طارق : لج اني راح اعرس على روحي اذا مأجيتج
ودق : ههههههههه يله روح وانتبه على نفسك
طارق : خلي شويه ابقى وياج شبيج
ودق : اعرفج راح تبدي تتغزل وتخش بلعميق
طارق : الله اكبر غير مرتي شون مصيبه هاي بس هينه كلها ساعات واعرف شون اطلعها بيج اله اطلع تعب هاي السنين كلها وحركان الاعصاب بيج اموتج بعيني
ودق : متسويها لان تحبني
طارق : تعرفيني مينطيني گلبي أذيج بس اموتج موت من البوس واگلچ اكل
ودق : ههههه يله كافي دلع ولتتأخر
طارق : احبج ياروح طارق

نمت واني احلم بليله عرسي شون راح اطلع  حالي حال كل البنات وحالي حال اي عروسه معلكه بدلتها  وعكب باجر عرسها بقيت صافنه على البدله ومتمدده على الجربايه اشوفها شون حلوه وبيضه ناصعه البياض  والبركع الطويل محطوط فوكها ومسكت الورد على الميز ابتسمت على منظر طارق اذا شاف البدله وهو يمشي ويوصي اياج يطلع صدرج اياج اصلوخ واني اشتريتها اسقيات والصدر كله يطلع مغريه حيل  بس اخذت شال مغربي حتى ميبين شى بس بلبدايه اطلعه بيها وحدها واخلي يكمر من التفكير والفرحه نمت وكعدت على كابوس دمر حياتي
كعدت وماما بصفي تبجي وتكعدني على كيف كومي ماما
طفرت شبيج يوم صار شى بيج انتي شى
جان تحضني حيل واخذتني من ايدي ونزلت وياها واني ممركزه شصار واشوف عمو حامد مدنج ومكسور ومازن هم وضعه مو تمام  وأيه تشهك من البجي هيه وجنه
احجو شبيكم
يمامه : بنتي البقيه بحياتج رجلج بطل واستشهد
يتبع ...

حاان موعد اطلاق سراح ارواح قصه (سجينة الروح ) يامن كنتم سجناء القصه وتأثرتم بها سواء بمشاعرها الحزينه او السعيده وقفلاتها الصادمه انتظروني غداً الساعه الحاديه عشر مساءاً بلبارت الاخير من سجينه الروح