سجينة الروح الفصل الثامن وأربعون 48 - بقلم ريام هادي

#سجينة_الروح
مشاهد 2
دورتك فرح وعيوني تبجي عليك
ومايوم بثمن بدموعي داعيتك
أني وياك رحنة وكلنة هسة نعود
وماتانيت روحي والله تانيتك
يل داخل بكلبي بغير دكت باب
وياباب ألوفه المايوم سديتك
يالحظةفرح والوكت كلةأحزان
وأني أحتاجك وبضلوعي دفيتك
دفنت أسرارحبك دفنة المكتول
وبنارالعشك ياذهب صفيتك...

ودق : ركضنا اني وجنه وعمه احلام واشوف اختي ايدها متحركه يمه عزه ولج هاي شنو
تبجي ومفرفحه روحها
أيه : اااخ ايدي ودق الحكيلي
فضيلة : گلشي مابيها شجاج چا ياما وياما نخبز سنين هي لجعه صغيره
ودق : تخبلت من شفت ايدها من كف الايد للزند صخام ولج هاي شنو
أيه : داموت ودق فدوه ياكل بگلبي
ودق : تعالي
فضيلة : وين موليه بيها هيه شويه معجون وتصير مثل الصل
ودق : يامعجون انتي من مل عقلج شوفي ايدها محترمه كلها
فضيلة : تعاي اخذيلچ راشدي وفوخي يبت عادل
ودق : اهووو امشي ايه
فضيلة : وجعوو احجي ويه الحايط
جنة : عمه عوفيها خلي تعالجها ايدها متملخه من الحرك
فضيلة : وغمه چا انتي شدخلچ المحامي مالتهن
احلام : خيه فضيله شجرالچ البت ماكالت شى واكلتيها حاصل فاصل
ودق : اباوع عليهن يردن يتعاركن اخذت ايه وعفتهن اختي مفرفحه روحها وتبجي وتكمز من الالم وذني يتعاركن
امشي ويايه للمستوصف
أيه : اوكفي خلي اخابر ابراهيم واكوله

ودق : امشي لتخليني حتى ابراهيم اسبه ولج انتي مال خبز خرب بلوكت الي خلاج خدامه عند فضيله
اخذتها وحطيت العبايه على راسها وركض للمستوصف قريب دخلت هناك جماعتي اعرفهم رحت لدكتور اسمه ماهر حباب وعيادته فوك عيادتي وتربطنا علاقه طيبه بيه اني ومازن انسان محترم وملتزم وابن عائله معروفه بلعماره ابوه الله يرحمه جان دكتور مشهور بلعماره وهو اشتهر على اسم ابوه وسمعته الطيبه
ماهر : المستوصف منور اليوم شونج دكتوره
ودق : اهلاً دكتوره عفيه الحك لأختي ايدها احتركت
ماهر : ياستار تعالي لتخافين
ودق : كان الحرگ قوي من كعد تخبز ماخذه ردن الدشداشه ومحتركه ايدها ولو ماكو احد يمها جان گبت اختي والله يعلم جان شصار الوب وصايره اعصاب منا اشوفها تصارخ جوه ايد الطبيب والسستر ومنا اعصاب شون يخلوها تخبز وكاربين عليها مسويها خدامه وعاطت وتبجي ولزمت ايدها الثانيه

أيه : اااااخ ودق الحرك موتني ديأذوني فدوه كوليلهم على كيفهم فدووه
ودق : دكتور فدوه مكعد تتحمل على كيفك وياها
ماهر : هاي انتي دكتوره وهيج تحجين ولو ماالومج اختج بس مضطر هيج اسوي لازم اكشط الحرگ كله حتى ليلتهب وتتأذه حرگها قوي ولازم نتلافه أي مضاعفات
وبشنو احتركت
ودق : متشوف حالها كلها عجين بلتنور
ماهر : بله بربكم هاي مال تنور هلجمال والنزاكه
ودق : ابتسمت حظها بعد وجان يدخل ابراهيم يرجف شبيج ايه
ودق : اباوع عليها مثل الطفله حضنته وتبجي وهي منطيه ايدها للطبيب يشتغل بيها
أيه : احتركت ابراهيم تشوهت ايدي
ابراهيم : اسم الله يله حبيبتي على كيفج المهم انتي بخير شوو راويني وجهج اخاف بوجهج بجسمج الباقي تحسين بحراره بألم
أيه : لا بس ايدي وبقى لازم ايدي بس ايده ترجف ويباوع بعيوني احس على لحظه يبجي من شفته حتى كوه يبلع ريك ويتنفس بخوف سكتت من البجي رغم الالم الي دااحسه يفوق أي الم احس ويه كل سلخه روحي تروح ويه الطبيب بس لخاطر ابراهيم سكتت
ماهر : كملت ماعدها اله العافيه وراح اكتبلها على مراهم وعصارات لازم بإستمرار تحطهم حتى ترجع ايدها طبيعيه وحبوب تتعشى وتشربهم حتى تنام وتهدأ من الهبطه وتبتعدين ابتعاد گلي عن المي اياج ايدج يلوحها قطره مي

ودق : اني اتابعها دكتور شكراً مقصرت
ابراهيم : رحمه الله والديك يله حبيبتي الزمي ايدي وامشي بيج حيل لو اجيبلج عربانه
أيه : لا ميحتاج اكدر امشي
ودق : اخذ ابراهيم ايه وطلعو واني وراهم صاحني دكتور ماهر
ماهر : دكتوره ودق من رخصتج
ودق : رجعت وهمه كملو طريقهم تفضل دكتور
ماهر : الدكتور مازن محجه وياج بموضوع
ودق : أي موضوع
ماهر : مبين من طريقه كلامج مفاتح الموضوع بعده وياج
ودق : والله الصراحه دكتور مشايفه مازن من ايام ومتكلم ويايه عن أي شى حضرتك محتاج شى تفضل
ماهر : هااا لا خلي هو يبلغج بلموضوع واتمنى تفكرين بيه قبل متنطين رأيج
ودق : ان شاء الله من رخصتك
طلعت واني بالي يودي ويجيب ياترى الي بالي صحيح لو متوهمه ومازن ليش مأجه وحاجاني
رجعنا للبيت واول مدخلنا استلمتنا فضيله من الباب
فضيلة : هايلمسعدات شرفتن
ودق : استغفر الله
ابراهيم : شبيج يمه شجرالج

فضيلة : يمه مريتك عياره گلشي مابيها گلها جويه صغيره لو الديره كلها احتركت شنهي ماخابزين گبل حسها سمع الوادم لو محتركه كلها چان شون
ابراهيم : يمه البت ايدها متملخه ياجويه ربج ستر ولا احتركت گلها وحك العباس لو صاير بأيه شى لا احرك البيت گله
فضيلة : خوش يمه هاي المرجيه منك تعال اگتلني حتى ترتاح چا انه اربي وهيه تاخذ على الجاهز
ابراهيم : يمه هاي شجابها لهاي انه چم مره كايلج لا تخلين ايه تخبز مادبرها اخاف تسوينا قدر وانتي تزيدين ماتنگصين اكول سوالف نسوان ومايصير ادخل ارجع الكه مريتي محروكه وفوكاها ماراضيه عليها
فضيلة : ماارضه عليها عبن ماتعرف شى يمه مريتك مو مره معدله وحوك مابيها بركه
أيه : ليش ياعمه شو شتريدين على قول لسانج قصرت بشى انتي اصلاً شسوي تعيبين عليه
فضيلة : شوف لسانها مال حش وترادد ومعاجبها گضي لسانچ بت البومه ولا حگ الزهره اهجج بليله ظلمه

ودق : تعالي امشي اخذت ايه وصعدنا لغرفتها وعفنا ابراهيم يتعارك ويه امه
دخلنا للغرفه وكعدتها على الجربايه ونزعتها دشداشتها المتروسه عجين اووف من اشوف شون جانت مدلله وشون حالها هسه اموت قهر
ابراهيم : يمه وروح ابوي اذا ما عفتي مرتي بحالها مااابقى ساعه بلعماره اخذها وانزل بغداد واعوف گلشي
فضيلة : من دهر صابك وكاع ابوك و الحلال گله تعوفه تسودنت وحك علي تسودنت من سحورتهن اعرف بيهن
ابراهيم : بله بربج ايه مال سحوره
الحجية جميله : فضيله نعلت الله على بليسج تسودنتي عيفي الوليد بحاله توليتي من دش
ابراهيم : هله جده وبست ايدها وتمشي واتجي على العوجيه
فضيلة : يمه تجاسر علي ويحامي لمريته
الحجية جميله : مريته يمه چا شاف مريته محركه يهلهلچ انه چم اكولن جوزي من البت خايبه شمالج لازمه خوانيكها وتكربين عليها
فضيلة : شنهي يمه تريدين انه اخدمها چا موش جنتي

الحجية جميله : چنتج موش حمارتج تكربين من صباح الله وماتنهدين
ابراهيم : شفتي حتى جده ماراضيه على سوايتج يمه ابوس ايدج ارحميني وارحمي حالج تره الي كعد تسوي يأذيني موش يأذي ايه وحيدها انه احبنها الي يمسها بمي يمسني بنار يمه هاى حبيبتي وام وليدي اذا تكصر وياج انه اوكفها عند حدها بس لاتزيدين عليها ولاتخليني بيناتجن هيه مريتي وانتي امي لاتظلميها

فضيلة :أكلك انت اغم انه شنهي ذابحتها كاتلتها هنه شغيلات تكملهن وتولي لحجرتها
الحجية جميله : شغيلات اخ منك يلساني خلي اكضه ولاتصيرين مسيجينه
فضيلة : رحمه لأبويه يمه لا ادافعين ليها البت وصخه وماتشتغل وعجوزيه انه اعلمها ماموتتها انه احبنها
الحجية جميله : كون حبچ البين تحبيها وحاركه البت چا لويشيل گلبچ عليها تفلسيها على الباچله
روح يبعد بيتي لمريتك عمت عيني تلهث من التعب
فضيلة : انه ما

الحجية جميله : اسگتي من صخم الله وچهچ توكل باالله يمه وانتي تعالي ليه شنهي قضيتچ ويه البت ماتوبين ارگدي لاتهججين الوليد يلعوبه اضل اعلم بيج
فضيلة : يمه لاتنطين بيه جدامه يتفرعن علي
الحجية جميله : اهمداچ فالحه يتفرعن علي شلچ بلحچي هاي مريته اكرصيها شوي لايلعب بيج فلك شاف البت محركه ورويحتها طايره وماتريده يتعارك ويهوبز
فضيله ابنچ رويحته بيها لاتعججين گلبه لا يهچ بيها وماتشوفين خياله يمه داري وليدج لاتخسري مالچ بلدنيا غيره هذا حمال همچ ونعشچ لاتكرهي بيج البت اشوفنها تشتغل جوه رجليج التامري تگلج تم وانتي ماراحمتها نسيتي هاي بت اخوج ومن دمج گل همچ تأذيها انه اعرفنج لزم ضليتي هيچ تخسرين الجمل بما حمل داري شمعتج ويه وليدج شمالچ تسودنتي على البت هذا حظها المصخم انه گلت تحطيها بعيونچ تالي حطيتها جوه رجولچ اااخ لوبصحتي الاوليه اله امدج بلمراح (بيت الحيوانات) واخلي الحلال كله يروح ويرد على راس حتى تعگلين وتصحين على زمانچ هذا هنا شنهي نعل موش عگل

فضيلة : اروحن اكمل شغيلاتي اعرفنج تحبينها وماتنطين بيها وانه اطلعيني الموخوش انه مثل السمچه مأكوله ومذمومه
الحجية جميله : هوهو هاي منهي سميچه انتي ثور هايچ كاصين كرونه ويطيح بلوادم ومابيه حظ تاليها يتزحلك بلخيس ويطيح على وجهه كومي مجابلتني ولي صيحيلي البومه اريدنها بشغيله ولا تگليها على حرگ بتها مااريدن وجع راس
فضيلة : تامرين يمه

ودق : انتي الى متى تضلين هيج ضعيفه ومابيج خير
أيه : قابل شسوي ياودق غير دااشتغل وبلغلط اخذت ملابسي قابل متقصده احرك روحي
ودق : اني مدااحجي على بس اليوم كل يوم بابا شوفي حالج مثل الخدامه تكربين من الصبح لليل حتى ابنج شامرته وبس عمتج تصيحلج مثل الزماله تركضين ركض عليها
أيه : غير شغل البيت وهذا بيتي واشتغل بيه
ودق : مو وحدج بيتج وانتي تعرفين كولش زين شدااقصد حتى الشغل الي مو عليج كامت تذبه عليج تحير شسوي عدا صوتها العالي ودوم تحقر بيج وشسوين معاجبها
أيه : مره جبيره واخذها على كد عقلها
ودق : اذا هيج لعد طبج مرض شيصير بيج حيل بيج
أيه : كوليلي شنو الي بيدي اعرف بيها متقصده تأذيني وتهيني وتشغلني بس مابيدي شى ودق
ودق : كولي لأبنها خلي يوكفها عند حدها
أيه : حاولت والله حاولت كم مره اقرر احجيله ومن يرجع للبيت تعبان وكوه شايل نفسه من الشغل ويحضني ويكولي تعبان ايوته احس لساني يتربط وكولشي صار ويه امه اختفى من گلبي وبس ابقى حايره شون اريحه واشيل هم تعبه منه

ودق : وانتي شايله الطيحان الحظ مو
أيه : احبه واخاف على زعله وبنفس الوقت اخاف من الله يطلعها بيه من اكبر وابني يأذيني كله دين ودق واخاف الله يدزلي چنه تأذيني بگبرتي
ودق : انتي من كل عقلج تفكرين هيج من هسه
أيه : لازم افكر هيج لان اذا ماافكر راح اغلط وكله سلف ودين مره جبيره واتحملها حظي شسوي الي الله
ودق :والى متى وجان تندك الباب ودخل ابراهيم
اعوفكم سلامتج قلبي
أيه : لتكولين لماما فدووه
ودق : اكيد هسه تعرف قابل متجين النا وتشوف ايدج مربطه ابراهيم عينك على ايه لتنسى هاي منو
ابراهيم : هاي بنيتي ونفس ابراهيم وعمره
ودق : الله يحفظكم وطلعت واني اعصاب على وضع اختي

ابراهيم : هايبعد هلي وكل عضاي بيه ولابيج يانور عيني
أيه : اسم الله لتكول هيج
لزم ايدي وجرني عليه وحضني
اااخ ياگلبي وجر عليج من سمعت النار گلت ايدچ احسها بروحي وحگ قمر العشيره ومااندل دربي
أيه : انت منو گلك
ابراهيم : جنه خابرتني وانه ادوهنت اريد اركض اعيط مااعرفن كرهت روحي عبن رجولي ماعانني واله انه بلحظتها يمج
أيه : متأخرت گلبي وادري بيك متقصر
ابراهيم : بله كومي خلي افحص جسمج اخاف متأذيه بغير مكان ومتدرين
أيه : برهومي حبيبي مابيه شى لتخاف
ابراهيم : يامااخاف الله ليعلم شون الرجفه بعدها بيه احس شكل السكر من الهبطه
ايه: الرحمن عليك حبيبي لتكول هيج عفيه تقهرني
ابراهيم : انتي لوتعرفين شكد احبج راح تحسين بلي حاسه

أيه : اعرف شكد تحبني بكد مااحبك بس اني اكثر وجان يحضني حيل ودمعت عينه وهمس بأذني
خفت حيل عليج ايه انتي مو بس مرتي انتي بنتي وحبيبتي وصبري وعذابي ونار گلبي وشلعه روحي مرات لو ما العيب اخذج حتى للشغل ويايه
أيه : ههههههه خوش حتى عمه تشهرنا وتفضحنا مو بعيد تطردنا بره العماره كلها

ابراهيم : ايوته تحملي لخاطري
أيه : شتحمل حبيبي
ابراهيم : تحملي ضيم امي انه اعرف متعبتج لا عبالج گلشي مااعرف وانه اعرفنج بت اصول وتحبيني وهي عمتج ومتحملتها بس انتي صيري بمچاني شنهي السوي حجيت بلحسنى ومافاد تعاركت ومافاد وتبقى امي شنهي بيدي دليني
أيه : كولشي مابيدك گلبي انت گلتها تبقى امك واتحمل كولشي لخاطرك
ابراهيم : متكوليلي اني شنو مسوي لرب العالمين وكافئني بمره مثلج
أيه : اني الي كافئني برجال مثلك فدووه كافي گلبك الطيب وخوفك عليه
ابراهيم : تعالي اليوم عوفي هاشم يم جنه وراح ابقيج بحضني ومتكومين ابد منه
أيه : والعشه والشغل

ابراهيم : تسكتين لو انزل اگلب البيت على راس الكل خليني عاقل وابقي بحضني واريد اشوف منو تكوم منه
أيه : هههههه اصلاً اكيف يااريت بسته من خده وحضني حيل احس على لحظه يدخلني بضلوعه وبس يباوع عليه ويقرا ايات اخاف هبطت وخفت حنية ابراهيم وحبه هو الي مصبرني على ضيم عمه فضيله

ودق : نزلت وطلعت من البيت معاجبني اشوف احد كعدت بلحديقه مردت اروح وتشوفني ماما راح تسألني الف سؤال ومالي خلك اجاوب كعدت جوه الشجره الكعده الي ياما وياما شهدت تعبي ودموعي وقهري المنظر حلوو وقت غروب وهوا بارد يرد الروح وصافنه ومحسيت غير كعد يمي
خير شو عايف العياده وجاي احجي ومااباوع عليه
مازن : شفتج مفتحتي العياده استغربت وجان يدك تلفوني جنه خابرت وكلتلي على ايه لغيت المواعيد واجيت اشوفها
ودق : وشفتها
مازن : لابعدني
ودق : وشكو جاي يمي انت جاي على ايه واني ودق مو ايه
مازن : شفتج كاعده هنا عرفت بيج ضايجه انتي متكعدين هنا اله بيج شى
ودق : اوووووف مخنوكه مازن حيل مخنوكه
مازن : شصار بيج شى
ودق : اختنكت على اختي الي صايره خدامه وعمتها تلعب بحالها وفوكاها ساكته وراضيه
مازن : كلتي راضيه ليش بعد انتي ضايجه
ودق : شون مااضوج واني اشوف اختي حال الضيم حالها تدري شغل البيت عليها حتى الي مو عليها لازم تشتغله
مازن : بس جنه هم تشتغل وياها

ودق : اني مكعد اعيب بجنه خطيه هم خلف الله عليها هم حامله هاشم على گلبها بس عمه فضيله مكعد ترحمها الشغل الثكيل كله عليها وبس تشوفها كاعده وعاطت ليش كاعده كومي سوي هيج حتى لو نظيف تخليها ترجع تنظف حتى بوقت العزايم الي مفروض لا جنه ولا ايه يدخلن المطبخ كامت ادخل ايه وجانت ادز على نسوان عمتهم الي دوم يحضرن من اكو عزيمه جبيره اخر مرتين مدزت عليهم وخلت ايه تشتغل شغل ٣ نسوان وياريت راضيه اطب وتطلع اتعيط عليها وتتأمر اني موضد الشغل بس ضد تسويها خدامه وفوكاها خلتها تخبز يومياً بينما جان الخبز دوم عليها لان بيبي متقبل احد يخبز غيرها متستنضف احد تالي وماادري شون قنعتها وخلتها يوميه تخبز وهي حتى التنور تخاف منه واليوم هاي نتيجتها احتركت وياريت قابله لسانها شطوله وكدام الرايحه والجايه تحجي عليها والله بس لو تقبل ايه احجي اله اگلبها عليها والزمها حدها
باوعت على مازن صافن عليه وحاط ايده جوه حنچه ومستمتع بلكلام ومبتسم
ليش تحسسني داحجيلك قصه ممتعه ومندمج بيها حيل
مازن : هههههه احب اشوفج عصبيه
ودق : اووو يامازن والله الك خلك تتشاقه

مازن : لتعبين نفسج ميفيد هذا القهر هاي حياتها وهي مو صغيره وادرى بيها
ودق : اعرف مو صغيره بس لازم تصير سباعيه ومتقبل الاهانه حتى لو عمتها
مازن : لتضوجين يجي يوم وتفض وترضى عليها عمه
ودق : والله عمتك غضب ونازل على اختي مراح تتهنى طول ماعمتك فوك راسها
مازن : كولي ياالله وهي تنحل ويله كومي نروح للشغل شنو اليوم متفتحين
ودق : لا مالي مزاج هاا صدوك تذكرت اليوم شفت دكتور ماهر بلمستوصف وكلي اكو شغله كالها الج مازن شغله شنو
لاحظت اختفت ابتسامته وظهرت مكانها توتر بعيونه
مازن : ماطول كاعدين ونسولف يجوز منحصل هيج مجال بعد
ودق : احجي شراد ماهر سكت شويه حسيته متوتر
ماهر خطبج مني
ودق : والله
مازن : شو حسيتج كيفتي
ودق : اباوع انگلبت خلقته ويريد يكطعني كلت ايي خلي العب شويه عليه ضايجه صار فتره بس يحرك بأعصابي خلي اني هم احرك اعصابه بعيني يمازن
مو اكيف بس هو الصراحه فرصه ممتازه وماكو وحده عاقله ترفضه

مازن : انت تحجين صدوك لو تتشاقين
ودق : وهو هذا موضوع واحد يتشاقه بيه انت احسبها ويايه الرجال دكتور ومن عائله معروفه ومؤدب وملتزم والكل يشهد بأخلاقه انت من الناس تحبه وتحسب اله الف حساب وعمره مناسب للزواج ٣٣ سنه ارقى عمر الوحده تحب هيج عمر يكون الرجل بيها بكامل عقله وناضج وفوك كل هذا حلو شكله وسيم لا بأس بيه كله رجوله ومقتدر يعني كامل والكمال لله
جان يوكف وعيونه تنط شرار واني حاصرتني الضحكه مستمتعه بغضبه
مازن : اني راح اكول اله انتي رافضه الزواج
ودق : هااا لا كول اله كعد تفكر
جان يرجع يكعد وعت ايدي بقوه حسيت كتفي انخلع
مازن : شنو تفكرين انتي مو متتزوجين
ودق : منو كال اني بس انتظر الشخص المناسب وجان يعيط بقوه
مازن : انجبي ماكو زواج وراح ترفضي وغصب عنج
ودق : غصب انت متبطل سالفه الغصب انت تدري اكثر وحده اني ميمشي ويايه الغصب عناد بيك اوافق عليه وهذا الشهر اتزوج وراح اكول لعمو حامد وخلي نشوف كلمتك لو كلمته
هنا حسيته وصل لأخره وكام يضرب بلشجره برجله ذب حركته بيها حجايه ثانيه احس يجي يخنكني
وجان اضحك ضحكه يمكن صار سنين مضاحكتها من كل گلبي واندار ويحجي بعياط منهار
مازن : وسم وزقنبوت على شنو تضحكين

ودق : ههههههههه حيل لعد بس انتي تلعب بأعصابي واضحك بدون توقف بحيث عيووني ادمع من الضحك وهذا فاك حلكه يريد يعرف ليش اضحك ومستمره اضحك وهو يكمز ويضرب بلشجره اخر شى متحمل لزمني من جتفي حيل وهزني ويعيط
كاااافي ارحمي بحالي صدوك انت قابله بيه
صدوك نسيتي طارق وراح تتزوجين
هنا غابت ضحكتي بعد مجانت طالعه من گلبي ومسمعه الدنيا كلها وحل محلها غصه بلگلب وهدوء عجيب دفعت ايده بهدوء ورفعت راسي للسما
ليش اكو واحد ينسى نفسه طارق نفسي طارق اني واني طارق شون انسى
جان يرجع يكعد
لعد ليش گلتي موافقه وراح تتزوجين هذا الشهر
ودق : هيج حبيت اردلك جزء بسيط من مغثاتك اليه دوم تتدخل بشغلي وحياتي حبيت احرك گلبك واستمتع بعصبيتك مثل ماكنت مستمتع قبل شوي بعصبيتي

مازن : شوكت تحسين بيه
ودق : نزلت عيووني وصارت عيووني بعيونه واحجي بهدوء ويااه
حاسه بيك مازن حاسه ياابن عمي بس انت الي محاس بيه ولا راح تحس ولا راح تفهم بيوم بأن هذا وإشر على گلبي مو ملكي ملكه هو
مازن : بس هو مات وصار سنين
ودق : ميت بلنسبه الكم بس اليه عايش محد يحس بلنار بس صاحبها
مازن : مثل ماانتي هسه محاسه بنار گلبي
ودق : انت جايب النار لگلبك ومحاس بلنعمه الي انت بيها عندك مره تحبك وتخاف عليك ومخلفه الك طيور من ذهب ولد وبنيه الله يحفظهم وتريدلك بس الرضا بس انت لتزعل مني عينك فارغه وكعد تظلم بت عمك وياك
مازن : موبيدي لو احلفلج كل الايمنات موبيدي شكد احاول انساج احبج اكثر شكد احاول ابتعد اتقرب واشتاق اكثر حاولت بكل الطرق وكلها توديني الج
ودق : واني طريقي شوك وميفيدك

مازن : مستعد امشي بيه لأخر عمري
ودق : شوف مازن اني مالي حق وسلطان على گلبك ولا على تصرفاتك ويه زوجتك بس اكولك شى مهم خاف الله بيها تره جنه ذهب صافي واذا خسرتها بيوم راح تتندم العمر كله اني ادري بيك تحبني بس اني وياك مابيوم راح ننجمع اني وياك مثل الزيت والمي مننجمع واذا انجمعنا كأن حطيت البانزين والنار سوه نتيجتها الانفجار
مازن : معناها بيج مجال تتزوجين بس المهم مو اني
ودق : أي اتزوج بحاله وحده
مازن : وهي
ودق : رجعولي طارق وباجر اتزوجه
مازن : تعرفين هذا الشى مستحيل

ودق : عفيه مستحييييييل ركز على الكلمه لهذا زواجي من غير طارق مستحيل سموني مخبله سموني معقده ماعندي ذره عقله بايره متعرف تتصرف شسموني عادي ولا يهمني اني كل الي اريده منكم عوفوني بحالي اترجاكم اني ممدخله بحياه احد بيكم عوفوني ادير حياتي
مازن : وشنو حياتج هسه
ودق : احلى حياه شغلي وعيادتي واهلي واهم شى جهالك وابن ايه الي اعتبرهم جهالي ذوله مالين الدنيا عليه
مازن : اخاف يجي يوم عليج وتتندمين
ودق : مااتندم بس اتركوني بحالي مازن انت بلذات انتبه على عائلتك تره والله جنه خطيه لتأذيها
مازن : قابل اني شمسوي الها

ودق : هي هنا الكارثه ممسوي شى عايفها ولا عبالك زوجتك كافي اذا هسه متحملتك اخاف يجي يوم ومتتحمل وتخسرها
مازن : يالوعه گلبي محد مطيح حظي وشالع افادي غيرج انتي
ودق : لوعة گلبك
مازن : وسامطه جد جدي مو بس ملوعه گلبي
ودق : كون بيبي تسمعك اله تسمطك بمي حار وتصلخك مثل الباچه هههههه
مازن : ودق
ودق : يبوو على ودق نعم تفضل تنهد تنهيده حسيتها شكت صدره وكال بصوت هادئ
مازن : اني كولش احبج
ودق :عافني وكام اووف يامازن متتعب
بقيت على كعدتي اباوع شون الشمس تنزل مودعتني وتكول لتضوجين يجي يوم ويتركوج بحالج
وجان اسمع طكطكه ورايه انداريت فزيت خرب ببليسج فززتيني باوعت عيونها كلها دموع سحبتها وكعدتها يمي شبيج ولج صار شى
جنة : ادري بيه يحبج ادري

ودق : انتي متجوزين تتسنطين متبطلين هاي الطبيعه
جنة : انه ماتسمعت عليكم وداعت وليداتي بس هو ابن عمج صوته عالي هرج الدنيا هرج وطلعت اركض اشوفنه شبيه وسمعته
ودق : وليش تبجين
جنة : چا شون ماابجي موزين مني ماحارگه رويحتي اسمع زلمتي يتغزل بت عمي
ودق : اكيد سمعتي كل الحچي
جنة : ونار وشابه بيه خيه اريدن اكطع الثوب العلي شون بيه وين اولي المن اشكي هذا ولد عمج وحبيبج راح يجلطني
ودق : لهنا وبس جنه ابن عمي أي بس مال حبيبي لا واياج اسمعها بيوم منج اني حبيبي واحد وبس وهو طارق ومتسجله بأسمه من شافتني عصبيه طكت بجي حضنتها ولج كافي لتبجين اموت قهر من اشوف دمعتج
جنة : گلشي سويت ومافاد ودق مافاد انه لو اروحن لبوي واگله ثاني يوم يطلگني بس انه مااريدن اطلك

ودق : اني الي معجبني بيج متحمله كل هذا اني مدااهجم بيتج او احركج عليه لا والله بس هذا السؤال دوم بالي شون متحمله جنه
جنة : عبن احبنه مسودنه وطحت بلعشك چا منين اجيبنها من الغريب منهي ابوي لو نسيتي
ودق : هههههههه أي والله روميو العماره
جنه حبيبتي اكيد سمعتي كلامي اله وارجع واكرر اني لغير طارق مااكون مااااااااا اكون افتهمتي من جانبي ارتاحي بس انتي هم لتذبين نفسج عليه صيري عزيزه نفس الحب حلوو بس اذا صار بيه مذله ينگلب جحيم والمره بلذات اذا انهانت بحبها وقبلت صدكي الرجال مراح يحترمها وراح يدور على غيرها اكو رياجيل يموتون على المره الصعبه القويه صيري سباعيه ولتقبلين لنفسج المذله
جنة : شنهي اعوفنه واطلك

ودق : ماكتلج اطلكي بس على الاقل حسسي بشخصيتج مو دوم تدلل وتأمر ناقشي افتهمي منه الي متحبي كولي مااحبه لتسكتين بطلي تعيشين بدور سي السيد الدنيا تغيرت واطورت وزوجج طبيب هم لازم يحس عنده مره تفهمه والها شخصيتها
جنة : انه مااعرف علميني
ودق : يووو يراد بالايام اذا مو بالاشهر اعلم بس هم تدللين امسحي دموعج وكافي تفكرين
جنة : يعني مايجي يوم وتاخذي مني

ودق : باوعت عليها اني ادري بيها تحبه ومقدره حبها بس هي انسانه ضعيفه وقابله هذا الشى على نفسها
مازن عندي ابن عم واخ وبس ومحرم عليه حرمت اخويه ارتاحي جنه من جانبي ارتاحي ويله كومي على جهالج صوتهم لهنا واصل
باستني وراحت
بقيت افتر بلحديقه شفت ماما دخلت لبيت جدو مبين بيبي راح تستلمها خوش استلام خلي اروح اسمع شصاير اكيد الشيخه جميله محضرتها قنبله
يمامة : صاحتني الحجيه واني اعرف على شنو اول مدخلت عليها
شونج عمه

الحجية جميله : بعد وگت انه مو گتلچ لاترجعين الثوب ليها
يمامة : عمه البنيه طكت من البجي جان وكف گلبها ومات
الحجية جميله : ماتموت هي دميعات تذبهن ويولن چا هيچ احسن البت بايره وراگبها چني البت مربطه وعليها تابعه وماترضى تعوفها
يمامة : لا تابعه ولاشى هي متريد تتزوج وبس وتريد تبقى على هذا وضعها ياعمه شبيدي عليها
الحجية جميله : اهمداچ يلبومه چا كدرتچ على وليدي حطيتي محبس بيدچ وتحودين بيه حود
يمامة : لا اله الا الله مشكوره
الحجية جميله : شگثر گتلچ خذي الثوب واحرگي عمت عينچ تختلي والبت تنوح يمچ تشيلي وتنطي ليها من صخونه كون
يمامة : لو شايفه وضعها والله انتي تنطي الها
الحجية جميله : خايبه بسچ گل نفع مابيچ انه اريدن البت تعرس وافرح بفروخها وتالي تقشمرتي وراح شغلنا كله بلشط ورجعت ابليس رگبها انه وين اولي بلبت عبن تخبلت

يمامة : ياعمه فدووه اروحلج عوفيها براحتها
الحجية جميله : لاتكبين بوجهي وحگ الزهره اكطع العوجيه على راسچ لاتشوفين نفسچ مسيجينه ومريضه مايفيدج اريدنچ تلزمين البت وتنخلين راسها نخل لزم تعرس
النسوان گلت وجوهنا وانتي فاچه حلكچ وتحمرين وتكحلين تكول حديثه ولاعبه براس وليدي حيري بتچ موش وكتها حايره بحميد
يمامة : عمه هو حامد بيا حال مكعد تشوفين وضعه حاير بلفصول والكعدات وحتى يرجع تعبان ومتأخر واني معايفه ودق بس والله متقبل فدووه عمه طلعيها من راسج ابوس ايدج مااريد اخسر بتي

الحجية جميله : اليوم اكضي بيچ التوبه انه اگلها اريدها تعرس وهي عيفيها ولي مني لا انشد على حميد يطلگج
ودق : ميطلكها روحه بيها ههههههه
الحجية جميله : ايا والغسل تسمعين علينا
ودق : ركضت وحضنتها وابوس بيها
بيبي حبيبتي شيليني من راسج

الحجية جميله : يمه گبرتي وبرتي ماتريدين زلمه يدفيج ويستر عليج وفروخ تلعب جارچ ليش يايمه تلعبين برويحتج فلك
ودق : اذا تحبيني عوفيني مرتاحه وجهال مازن وابن ايه جهالي كولشي مااريد من الدنيا بس انتم سالمين كولشي خير وبركه
الحجية جميله : شلچ بلحچي هاي انه اكولن تاخذيلج زلمه معدل چا حتى الصخول والجمس عرست وانتي ضاله على گلبي سوادي عرس وانتي ضليتي

ودق : ههههههه رجعنا مخلصنا من مسعده هسه سوادي اريد افتهم كل هذا الحلال الي عدكم خير من الله متحبين بس الصخول ليش بله
الحجية جميله : چا الصخول شزيناتها احسن منج تحچي وياهن يفتهمن وانتي احجي وافادي مشلوع وضاله جنچ غراب مسودن صافن على زمانه وتجي عصه تفشخه ومايتحرك صافن اثيول ويحيدوه ومايتحرك
ودق : خلف الله عليج بيبي بله فهميني اني غراب ومره صخله وماما انداريت عليها العفو منج طبعاً بومه
يمامه : عادي ماما غير عمتي بعد لو بس اتوب

ودق : وذاك جمس والثاني مطي متفهميني منو الي يعجبج يابيبي
الحجية جميله :گلگم مطايه ماتفهمون اگلكم هوش يمنه تحيدون يسره گلكم ثولان
ودق : وعمو حامد
الحجية جميله : يبعد هلي وكل عشيرتي والعماره گلها هذا زينات العشيره وهلالها هذا حميد يصعد ويه الريه (الرئه) وينزل ترحوله فدووه گلگم
ودق : همزين لكينا واحد يعجبج زين شوكت تكوليلي ياحلوه ياورده
الحجية جميله : من تعرسين حتى اگلچ زهره العشيره ها عايله وياچ انه
ودق : واني مااعرس بيبي من الاخير
الحجية جميله : كومي لابارك الله بيچ شو صخيله ومدوهنه وعوبه وترحين ڤًدوه لسوادي وشعراته

ودق : ههههههههه خلي اروح فدووه المهم مااتزوج وجان تنزع العال وركعتني براسي واني اركض واسمعها تعيط على ماما وتكولها هاي خلفتج من اهمداچ ههههههههه
والله خطيه ماما شسوي ميعجبها للشيخه جميله
رجعت لمملكتي بعد يوم حافل من الاحداث حضنت ريحته بلسم لدوا جروحي

عرفت ماما بحرك ايه وبيومها بجت بجي انتهت وحتى تعاركت ويه فضيله بس اكيد فضيله صامده ولا يمها الموضوع صّـْْ(☑)ـْْحّ هاي الفتره خف الشغل عليها لان محروكه بس هي متوب منها
وبيوم وساعه ٨ بليل واندكت الباب فتحها علاوي واسمع يسلم على واحد ركضنا لبسنا ربطاتنا نسيت اكولكم غير تحجبت شسوي حتى اسكتهم بس بمرور الوقت حبيت الحجاب والتزمت بيه
وجان تصيح ماما تعالي سلملي على ابن عمج هذا منو ابن عمي وامد راسي واشوف منير
لك هلوو منير
منير : رجاءاً اسمي باش موو منير
ودق : يابه دطير
منير : هههههههه شونج ولج بعده لسانج طويل اني گلت عقلت
ودق : من تعقل اني اعقل
ولك شجابك كلنا بعد منشوفك
منير : والله اجيت زياره اشوفكم مشتاق الكم شنو ممشتاقين اليه
ودق : لا شون تعال اكعد شوكت اجيت
منير : من الظهر بس تعرفين الحجيه بعد وعمامي والولد كملت الكل واجيتكم
ودق : هله بيك
يمامة : هله بيك والله مًشتاقين لسوالفك
وجان تدخل همسه

همسه : السلام عليكم
منير : وعليكم السلام هاي همسه ولج هيج كبرانه
همسه : قابل ابقى صغيره شونك منير الْحٍمَدٍ للـّہ على سلامتك
منير : الله يسلمج
ودق : اباوع على منير اكل همسه بعيونه وهي ولا يمها خرب ولا يتغير
بقى لليل وعشى وسوالف وضحك بس اني عيني على منير الي اكل همسه بعيونه وخاصه هي كبرانه ومحلوه صايره عروس
وبعد ٣ ايام جنت راجعه من الدوام حتى اتغدا وابدل واطلع شفت همسه ومنير واكفين على صفحه ويحجون خفت على اختي رغم اعرف منير تغير بس مهما كان مااعرف شنو نيته وياها وماانسى الي سواه بيه
سمعته يكول الها

منير : كولش عاجبتني انتي حلوه ومتوقعت هيج كبرانه صايره تموتين صاكه
همسه : اسمع منير اني همسه ليغرك الاسم همسه يعني هدوء بس اني اعصار اني لا ايه ولا ودق اني الي يلمس شعره مني شايف هاي العماره احركها على راسه وراس الي يطلعله
منير : حلوو وتخرمشين هم توقعتج بزونه هادئه
همسه : لا عيني لا ليغرك الهدوء والصوت الناصي اني اذا اطلع لساني عليك اكرهك بليوم الي انولدت بيه لتندك بيه سجلك البطولي ويه خواتي اعرفه كله روح شوفلك وحده تندك بيه لتندك بهمسه
منير : يعني عرفتي اني جاي على مودج من شفت صورتج
همسه : أي اعرف ومن الاخير بيتك بيتك روح حباب ارجع للصبايا بتركيا اني ماافيدك

منير : لا والله عجبتيني هم تخبلين وهم وكحه اموت على الوكحه
همسه : متغيرك بعدك ذيل الچلب عمره مينعدل
ودق : وجان يلزم ايدها ولوها تخبلت ردت ادخل وانعل يومه جان ادفعه حيل وتكوله بكل اعصاب
همسه : اياك اطخني مره ثانيه واسمع لك لعبالك مااعرف سوالفك ومااعرف الفيس الي دخلتلي عليه ومسوي نفسك معجب اني ماالعب روح العب بعيد لتنكسر رگبتك
منير : صدوك انتي اضرب من ودق

همسه : اتشرف اصير مثل اختي ياريت بس اني مو ودق اني همسه وامشي ولي من وجهي لا وداعت ماما اكول لبابا حامد اخلي يربيك من جديد
ودق : خفت ليمد ايده عليها بس هو الغبي احسه مستمتع بأعصابها همسه همسه وينج
همسه : هاا دودو اجيت
ودق : شراد منج منير

منير :ها الله يساعدج لا مردت شى بس حبيت اسلم واشوف بيا مرحله صارت ادردش وياها
ودق : عدنا بيت ادخل ودردش وياها لتوكفون بره
همسه : ميحتاج خلص الحجي ماعندي شى ويااه
وعافتنا وطبت
منير : يله من رخصتكم
ودق : منير جوز من همسه ولك متعبت
منير : يمكن ماخذ مقاوله لهاي العائله
ودق : هههههههههه الا همسه وهااا هي بحكم المخطوبه هسه
منير : المن

ودق : لزميل وياها بلكليه يحبها وتحبه وباقين للعطله يجي يتقدم الها لتعيد التاريخ منير كافي الي مريت بي اني وايه
منير : لتخافين هاي البزونه مااتقرب منها ولو تمنيت الله يرزقني بمثلها بس هو هذا حظي ويه هاي العائله مصنع كيك وماحصلت منكم بس صمون الجيش القديم
ودق : ههههههههه بلعافيه على الصمون
منير : اضحكي هو جنا اني وانتي منحوسين بهاي العائله مراح نشوف زواج بعمرنا
ودق : لا يجي يوم وتلكه بت الحلال الي تناسبك وتحبك وتحبها
منير : وانتي
ودق : اني راهبه بيت ال راضي
منير : ههههههههه ديري بالج على نفسج يااحلى راهبه
بعدها مشفت منير وحسب كلام همسه هم متقرب منها

مرت ايام مرات اسميها الهدوء قبل العاصفه ومرات اكول حالنا حال كل العراقيين نمر بكولشي

عرفتو جانت بسيط من حياتنا خلال الاشهر الفاتت واخفيت جزء كبير لعدم التعرف على شخصيتنا الحقيقيه اتمنى من كل شخص يقرأ كلامي وخاصه بهاي الايام المباركه تدعولي وتدعون لعائلتي وخاصه لماما شمعه بيتنا ولعمو حامد خيمه العشيره وهلالها على گوله الشيخه جميله
يمامه وحامد بعدهم عصافير الحب الي يشوف حبهم يكول ماكو ولا راح يجي مثله
عمو حامد مثال للعاشق الشروگي المتيم الي اذا حب يفدي حبيبته بروحه ومثال للعشق النقي عشق اهلنا القداما ويمامه مثال للام الحنينه الي تفضل بناتها على روحها وبنفس الوقت كدرت تحب حامد بنفس الحب وتبادله عشقه
أيه وابراهيم علاقتهم اشبهه بعلاقه ماما وعمو بس كون عمه فضيله اتوب منهم جان حياتهم تصير احلى حياه

همسه بعدها النمره الجديده بعائلتنا الي من تمشي تهز الكاع هز بجمالها وشخصيتها وبعدها روحه بعمه احلام الي هاي الفتره كلها قضتها بس مشاكل يوميه محركه مجموعه من النسوان على غير نسوان وتكب العركه بينهن وهي تطلع منها سالمه ومن نحاجيها ليش هيج سويتي جملتها المشهوره وانه شبيدي هنه نسوان ناقصات عگل عربانات ياهي اليجي يدفعهن انه مالي دخل نارهن تاگل حطبهن وعمي حامد مره يعيط عليها ومره يسكت عنها لان دوم يكول اخاف عليها مريضه وبت عمي مااريد ادخل بخطيتها وهذا طبعها شيغيره

مازن وجنه على وضعهم متغير شى رغم محاولاتي لتغيير جنه لكن مازن لحد هاي اللحظه متأمل بيوم اكون اله مع الاسف متعلق بأمل ماله وجود الله يهدي ويبرد گلبه

اما جموله شيخه الكل الشيخه جميله بعدها كفيلكم الله بس تعد وتصف مستلمتنا من صغيرنا وجبيرنا وابشركم صار اسمي سوادي موو مسعده يله احسن من البايره ههههه الله يحفظها النا شيختنا وبركه العشيره
اني ودق سجينة روح طارق ادعولي الله يبعد عني كلام الناس وتدخلهم
وترحمو لحبيبي شهيد قلبي طارق

الى هنا ختمت معاكم مشاهد من قصه سجينة الروح اعتذر اضطريت اخفي جانب كبير من الاحداث لتجنب معرفه الاشخاص اتمنى استمتعتو معي طيله اليومين
اعتبروه هديه مني لرمضان
ورمضان مبارك عليكم جميعاً بطلات القصه يتابعون تعليقاتكم
انتظروني بقصه جديده ومميزه قريباً
تحيااتي ريام
احـٍُــبٌــ💘ـٍَــْگُِم