رواية سجينة الظلم والانتقام الفصل العشرون 20 - بقلم سارة الشمري

الكاتبة : سارة الشمري🖤

لا أفهم كيف يستطيع الناس الكذب في العلاقات الغرامية والإدعاء بالحب , أنا لا أستطيع أن أقول مرحباً لشخص لا أستلطفه.
آل باتشينو

من ذاكرة / ميامين

ميامين ::::

مرن ٣ شهور ... بهالشهور احوالي تغيرت.. صرت مو بس احب غزوان .. لا اعشقة .. بس هو ماكو بكلبة غير الحقد والغضب ...
حاولت ان اتخلص من هالحب لان مثل مكالت خاتون حينكلب ضدج ...
صرت دائماً اجيب طاري رائد كدامة لان ادري بي ما يقبل ...
واني فعلا عندي امل وثقة ان رائد راح يجي ياخذني
صح اني احب غزوان ... بس اريد ارتاح .. اريد اهلي ... غزوان ما يحبني ... ويتمنى ان اموت اليوم كبل باجر
بكل بساطة لان اكون اخت رائد ...
غزوان بهال٣ شهور تخبل بالزايد ... صار ما يمر يوم اذا ما يضربني .. بس لان اكرر علي ان رائد راح ياخذني ... صار يكثف الشغل علية ويدقق على ابسط الامور ...
رغم هو يعذبني ويضربني .. بس احب اشوفة كدامي ... احب صوتة احب عيونة وكلشي بي
واكره نفسي اكره كلبي الي حب الشخص الغلط الي ما شاف منة بس الهم ...
مرات اعذرة واكول يسوي هيج علمود اخوه يعني لهالسبب يعصب من اجيب طاري رائد

جنت كاعدة اني وخاتون ومثل كل مرة نسولف
... بس دخل علينة غزوان وبدون مقدمات سحبني من شعري وصار يضربني ويحجي عن رائد وايكولي تحبينة ومياخذج ...
خاتون حاولت تحميني بس ما كدرت وهو طلعهة من البيت وسد الباب
ضربني وصرت ما اشوف من كثر الضرب ...
حسيت جسمي كلة ارتخى .. بس بقيت حامية وجهي بيدية
صار يرفسني ووخدة من الضربات .. انضرب راسي بالكاع .. حسيت نفسي دخت وعيوني بدت تغوش

عافني ومشى .. حاولت اكوم بس ماكدر ...
جسمي كلة يأذيني ... خشمي ينزف .. راسي مسطور ويوجعني من الضربة ... وكلبي يدك سريع ... حسيت تنفسي بدة يضيق لان نايمة على وجهي بالكاع وماكدر اكوم حتى ماكدر اتحرك

خلص .. حسيت ان راح اموت هسة ... غمضت عيوني واني اشوف امي كدامي ..
كلشي بحياتي بدة يمر علية مثل الشريط ..
امي ... اشتاقيت لحضنهة ولدعائهة يم راسي ولخوفهة علية
غزوان .. اول شخص كلبي دك الة واكثر شخص بجاني لهالدرجة
رائد : اكثر شخص حبني .. واكثر شخص ماكدر اعيش بدونة
حسيت على دموعي نزلت وطاحت بالكاع
صرت اقرة الادعية الي من اجيت لحد الان ما فارقتني وما نسيتهن ...
صح ما عشت بخير .. بس ايكولون الله يستجاب دعوة الانسان بثلاث ... اذا دعيتة بشي وكال نعم ينطيك الي تريدة .. واذا كال لا ينطيك الافضل منة ... واذا كال انتضر ينطيك الافضل منة بهواي

واني انتضر .. عندي امل بالله وبرائد .. راح يجي اليوم الي ارتاح بي ... ويمكن هو هذا اليوم .. يمكن الله راح ياخذني وارتاح من كلشي ...
غمضت عيوني ومن بعدهة ما حسيت بشي

حسيت بدفو غريب .. وانفاس على وجهي .. فتحت عيوني وشفت غزوان
وجهة قريب من وجهي .. نايم بهدوء .. انفاسة منتضمة ...
انتبهت على وضعنة وانصدمت ... وين اني .. عزةة شجابني لغرفة غزوان ... وليش هيج حاضني ... اول مرة اكون قريبة منة لهالدرجة وبهالوضع ...
ماكدرت اتحرك لان محاوطني بأيدي وجسمة .. وراسة حاطة على شعري الي منثور عالمخدة
... حركت واسي شوية وهو فز ... بسرعة غمضت عيوني وتصنعت النوم ...
كوة كدرت اسيطر على هدوئي من حسيت بشفايفة على كصتي ...
بلعت ريكي وحاولت ما ابين شي ... بس حسيت كلبي صار يدك الف ... خفت لا يسمعة من كثر ما هو قريب مني
نزلني من حضنة بهدووء وغطاني ...
دخل للحمام وسد الباب .. اني بسرعة فتحت عيوني وكمت اهفي على نفسي ...
حطيت ايدي على كصتي مكان البوسة وكلت : يربي اذا هذا حلم ماريد اكعد منة ...
حركت راسي بس حسيت بصداع مو طبيعي .. رجعت راسي عالمخدة
ورة دقايق سمعت صوت الدوش توقف ... رجعت غمضت عيوني ...
سمعت حركتة وفتحت عين وحدة وعالنص ...
شفتة بس بالخاولي على خصرة ... عزززززة ... يمة اريد اطلع بس شلون
غمضت عيوني من التفت علية وحط ايدة على كصتي وبعدين نزل لرگبتي ... اجيت اكمز

دخل هو لغرفة التبديل واني صرت اسحب نفس قوي ... يممممة .. اني مو حاطتلة البرنص بالحمام ليش ميلبسة .. يعني الا الاحراجات ...

طلع هو من الغرفة وعطرة ضرب راسي وترس ريتي ... غطاني وبعدين طلع
كعدت على حيلي واني اتنفس بسرعة وحاطة ايدي على كلبي ... اريد استوعب ان الي جان يمي قبل شوية هذا غزوان ...
انفتح الباب بهدوء ودخلت خاتون : صباح الورد ميامي
ميامين بأبتسامة : صباح الجوري يروحي ...
خاتون : لا الحمدالله مبينة احسن من البارحة
ميامين : اي الحمدالله ... خاتون الي قبل شوية جان هنا غزوان لو احد ثاني
خاتون بإستغراب : اكيد غزوان .. يعني منو حيكون غيرة مثلاً
ميامين : يعني مجنت اتخيل ... هذا غزوان
خاتون : اي ميامين شبيج ... شنو شصار
سحبت خاتون من ايديهة وكعدتهة كبالي : خاتون تخيلي .. اني طول الليل نايمة بحضنة وقريبة منة
وهسة من كعد .. باسني وغطاني وتأكد من حرارتي وطلع ... خاتون لهسة مدا استوعب
خاتون : ميامين لا تتأملين اكثر ... اخاف مجرد تأنيب ضمير ..
خابت امالي : اي صح .. واني كل عقلي افكر ان ممكن كلبة يحن
التفتت على خاتون : شصار البارحة .. ليش راسي هيج يأذيني
خاتون وهي تدنك وتحجي بحزن : من بعد ما ضربج غزوان انتي فقدتي الوعي وارتفعت درجة حرارتج وغزوان خابرني واجيت عليج
حاولت اكعدج وما كعدتي .. سويتلج كمادات وضربناج ابرة
شهكت : شنوو ... منو ضربني الابرة ... بس لا غزوان
خاتون : لا تخافين مها الي ضربتج مو غزوان
طفرت بالزايد : مهاااا ؟؟ بس لا سوتلي شي لو شلتني .. خل اتأكد
كمت من مكاني ووكفت بالكاع واني احرك رجلية وايدية
خاتون وهي فاتحة حلكهة : شجاي تسوين شنو هالخبال
ميامين : اخاف صاير بية شلل لو عوق من ابرة مها
خاتون تتصنع العصبية : ما اسمحلج ترة اختي هاي .. وبعدين هي تكرهج صح بس مو لدرجة تقتلج
ميامين : حبيبتي هي اختج اي بس اني تعتبرني عدوتهة
خاتون بضحكة : والله عندج حق ... يمكن لو ما غزوان هددها ان اذا صار بيج شي تعتبر هي المسؤولة .. جان سوت بيج شي
ميامين اني اباوعلهة صفح : لا بهاي مها المضلومة ... لان اذا صار بية شي محد راح يكون المسؤول غير اخوج ...
تذكرت وحجيت بسرعة : خاااتووون ... خاف تأذيتي البارحة لو انضربتي ...
خاتون : عادي مصار شي ... يعني ضربة وحدة متجي شي مقابل الي انضربتي انتي ...
ميامين : خاتون فدوة بعد لا توكفين كدامي .. والله اخاف تتأذين بسببي .. واني اصلا تعودت يعني صار عادي
خاتون : ميامي ديري بالج اتكولين تعودت ... صدكيني راح يجي اليوم الي الله ينطيج السعادة وتتخلصين من هالعذاب ... اكيد سعادتج بعيدة عنج وانتي وية غزوان ... واني راح ابقى ادعي ان الله يهدي غزوان ويطلق سراحج ... صح يعز علية ان افارقج .. بس اني ارتاح اذا اشوفج مرتاحة ...

حضنتهة واني الدمعة بطرف عيني : خاتون اني صح اتمنى يجي هاليوم الي غزوان يطلق سراحي بي .. بس بنفس الوقت خايفة من هاليوم يجي ... وبين الي اريدة يجي وبين اتمنى ما يجي

خاتون : وليش متردينة يجي ... من شنو خايفة ميامين
ميامين : خايفة ماكدر اعيش بدونة ... واذا عفتة راح ابدي بعذاب اكبر
خاتون : بالعكس ميامي لا تفكرين هالشكل ... انتي من راح تعوفينة راح تعيشين حياتج افضل ومثل قبل ...
ميامين واني احاول اغير الموضوع : هسة عوفج مني .. تعالي نسوي ريوك
خاتون : اكعدي ولا تسوين شي ... اني جبتلج شوربة حليب وتمن ... مسويتهة الحجية خاتون وجبتلج منهة ... هسة بس تاكلينهة راح يرتاح راسج

ابتسمتلهة : الله يخليج الي ويخلي الحجية خاتون ... هي كل وحدة اسمهة خاتون هيج تصير ... لعد اني بالمستقبل راح اسمي بنتي خاتون ..
خاتون بضحك : قابل هي كل خاتون مثل الحجية ... يعني لازم تكون اسم على مسمى ... مثلا اني اسم على مسمى
ميامين واني ادفعهة من كتفهة عالخفيف: ديلة عيني خاتون هانم ... هسة وين الشوربة جعت
خاتون وهي تكوم : يخسي الجوع ... دقايق احميهة واجيبهة لعندج
كمت من مكاني : لا دخيلج لا تجيبينهة ولا شي ... اني اكوم وياج ... تردين تجيبينهة لغرفة غزوان ... واني من ارتبهة على كيف وبدقة اخاف تتوصخ لو ينكسر شي .. ادور مو اكعد اكل بيهة
خاتون بضحك : ماشي لعد ... اذا تكدرين تنزلين امشي ننزل سوة
نزلنة اني وياهة وما خلتني اسوي شي ... حمت الشوربة وسوت جاي وكعدنة ناكل ..
خاتون : ميامين ما مليتي صارلج ٤ شهور محبوسة بهذا البيت .. ليش متقبلين اقنع غزوان ان تجين يمنة يعني يم الحجية ... والله تفرح بيج هواي
ميامين بسرعة : لا خاتون فدوة ... والله مالي خلك مشاكل ... خليني هنا مخنوكة احسن من المشاكل الي تصير اذا رحت .. يعني كافي مها وخالة ام غزوان .. والله اخاف اذا رحت .. وبعدين ماريد اضايق مؤيد عالطلعة والطبة ويتقيد ويضطر يجاملني حتلو يكرهني
خاتون : مادام الحجية موجودة محد تكدر تحاجيج بكلمة ... واذا على مؤيد ترة ميكرهج .. وهو هم جان رافض سالفة الفصلية ... ودوم يسكت مها من تحجي عليج وايكول البنية كافيتكم شرهة وخيرهة بعد عليمن شايلات عليهة ... وهو اصلا ما يكعد بلبيت دوم بالشغل
ميامين بتفكير : امممم يعني هسة من عائلتكم ٣ يكرهوني ... و٣ ميكرهوني ..
خاتون : منو الثالث الي يكرهج
حجيت بتنهد : غزوان .. هذا اكثر واحد يكرهني .. بس بقة ابوج .. هو اكيد يكرهني مثلهم صح
خاتون بتفكير : اممم تصدكين مادري ... هو عصب بالبداية على غزوان من سمع بي ماخذ فصلية وهو ما يدري بي ... بس من بعدهة ما فتح الموضوع ابد ... وامي ومها ما يتجرأن يفتحن هالموضوع كدامة لان يخافن
حجيت بسخرية واني اريد اغير الموضوع : مها تخاف ... مستحيل
خاتون بضحك : لا تشوفينهة هيج مستقوية عليج ... ترة اكبر خوافة هي مها ... تخاف من كلشي
وخصوصاً الحيوانات
ميامين : والله مها تخوف بلد .. هي اذا شافنهة الحيوانات يخافن منهة
خاتون تضحك : والله انتي كلبج مورم منهة مبين
ميامين : المشكلة ماكدر اكول عنهة وجه البومة لان حلوة .. والمشكلة الاكبر تشبه الحجية خاتون ... انتي مو اسمج خاتون ليش ما طلعتي تشبهينهة
خاتون : والاسم شعلي ... اني وغزوان نشبه بابا يعني سمارنة والشعر الاسود علي بس اني عيوني سود وغزوان زرك
... ومها نسخة الحجية خاتون ... الحجية خاتون جانت معروفة بجمالهة وجدي الشيخ الجاسر من اول ما شافهة بالعمارة سحرتة بعيونهة الصفر
ابتسمت وحجيت : لحضة ... شوداهة للعمارة .. وجدج جاسر شلون شافهة
خاتون بضحك: اولا اسمة الجاسر مو جاسر يعني الف ولام ... ثانيا هو جان عندة كعدة عشاير بالعمارة بما ان هو جان شيخ ... وهي هم بنت شيخ ومن شايفهة عجبتة وحبهة ورغم هي جانت اصغر منة بهواي ... بس دك رجل الا ياخذهة واخذهة ... يعني حبهة من اول نضرة ... بيبي اتكول من شافني دودهت احوالة ...
ميامين بأبتسامة : شكد حلو الحب من اول نضرة ... زين وابوج شلون تزوج امج
خاتون بضحكة : تصدكين اذا كتلج هم من اول ما شافهة حبهة
ميامين : هاي شنووو ... طلعت الوراثة بأبوج
خاتون : ايي ... الشروگي من يحب بعد يدك رجل وما يتنازل ... وامي تصير بت خالة ابوي ... يعني الحجية خاتون تصير خالة امي
ميامين بأستغراب : شلون بت خالتة ومن اول نضرة .. يعني ما شايفهة من قبل
خاتون : لا ما شايفهة ... لان امي اهلهة من بغداد بس رغم هالشي جانو متشددين يعني البنية الي ما متزوجة ما تطلع لبيوت القرايب بس بيت عمهة فقط ...
ميامين : لعد شلون شافهة ...
خاتون : الله رادة يشوفهة ... وصارت ان اهل امي عزمو الحجية خاتون يمهم ... وبابا راح وصلهة الهم وهي جانت راجعة من المدرسة وهو رايد يطلع من بيتهم وراد يدعمهة بالسيارة ... وشافهة وحبهة .. بس اهلهة ما قبلو ينطوهة لان بغداد بعيدة عن البصرة ... وابوية دك رجل الة ياخذهة ... وجدو جان واكف وياه لان ايكلة اعرف لوعة كلبك مثل كلبي ... واخذ بابا مشية عليهة وهمة انطوهة ماكدرو يرفضون
ميامين واني فاتحة حلكي : قصصكم مال مسلسلات ... يعني بالوراثة يحبون من اول نضرة ... ويتزوجون بنية اصغر منهم بهواي ... يعني يتزوجون بعمر جبير
خاتون وهي تضحك : بالضضضبببط .... هسة لحد الان ما واصلة هاي الوراثة لاخواني ... ماندري اذا توصل لو لا

قاطعنة الصوت : وشمدريج ما واصلة هاي الوراثة لاخوانج

ميامين .. خاتون 👇🏻

الكاتبة : سارة الشمري🖤