رواية سجينة الظلم والانتقام الفصل الخامس والخمسون 55 - بقلم سارة الشمري

الكاتبة : سارة الشمري🖤

ميامين بعصبية : ..... ما سألتك وما اهتميت لان ادري بكلامهة مو صحيح وكلة خطة منهة ..
غزوان تحولت ملامحة للصدمة وايدي ارتخت عن ايدهة : وشنو الي ثبتلج ان اني ما عندي علاقة بيهة ..
ميامين وهي تباوع بعيونة ببرود : لان انت من جنت تكرهني ما سويت علاقة وية وحدة .. مو هسة وانت تحبني تروح تسوي علاقة ووية منو وية نورة .. وبعدين اني واثقة انت مستحيل تخون عمتك واهلك وتنزل راسهم وتسوي علاقة وية وحدة من شرفك وعرضك وتقربلك .. وهسة عرفت ليش ما صدكتهة ...
غزوان قرب منهة وصار يفصل بينهم سنتيمات قليلة ..
يباوع بعيونهة ويحجي بلوم : كلتي جنت اكرهج وهسة حبيتج .. ليش اني شوكت كرهتج حتى احبج هسة .. اني من شافتج عيني واني حبيتج .. حبيتج قبل لا تصيرين مرتي اصلاً ..
ميامين تباوع بعيونة بصدمة ..: ش شلون قبل لا اصير مرتك ..
غزوان وهو يباوع بعيونهة ويتنهد بعشق : تتذكرين من كتلج جنت احب وحدة قبل لا اتزوجج ..
ميامين وهي تتذكر وهزت راسهة : اي ..
غزوان : انتي الي حبيتهة .. اني شفتج قبل لا اتزوجج بكم شهر .. اجيت للكوت وشفتج بمكتبة ومن يومهة اخذتي كلبي وعقلي وصرت ماشوف دربي من وراج ..
راح لمحفضتة وطلع صورتهة الي بالمكتبة ومدهة الهة : حتى شوفي .. اخذتلج صورة بدون ما تدرين .. ما تحملت اشوف ضحكتج وما اصورج ويبقى تذكار منج عندي .. وبالتالي صارت الصدفة والله خلاج تصيرين من نصيبي انتي بالذات ...
ميامين تباوع للصورة وايديهة ترجف ..
رفعت راسهة الة ودموعهة نزلت على خدهة ..: لعد شكد جانت القسوة البكلبك .. يعني تحبني ومع هالشي عذبتني وما رحمت بحالي وخليتني اكره زماني .. تدري هسة خاف اكو شوية حب بكلبي الك .. من بعد الي كلتة صرت اكرررهـ...
قاطعهة وهو يحط اصبعة على شفايفهة وبنضرة ترجي ..: اششش فدوة كافي .. والله تعبت واني اسمعهة منج .. حسي بية لخاطر الله ..
سحب ايدهة وحطهة على كلبة : شوفي كلبي والله ما يدك هيج بس من انتي كبالي .. من اشوفج افرح مع ان انتي حتى ما تباوعيلي ..
حط خشمة على خدهة وسحب نفس ويتنهد ويحجي بقهر : من اشم عطرج احس بروحي ترد العافية ..
غمضت عيونهة وهي تحس بأنفاسة على وجهة ويحجي بكلب محروك ...
غزوان مسح دموعهة بأصابعة وحاوط خصرهة بيدة وسحبهة الة وابتدة يبوس شفايفهة بكل حنية .. وايدة حول خصرهة وايدة الثانية ورة راسهة ...
ميامين ارتخت وية حنيتة وذابت وياه بدون ما تحس ..
سحبهة لفراشة بهدوء ..
ميامين حست على لمساتة وبوساتة برگبتهة فجأة مرت هذيج اللحضة كبالهة وصار تتخيل ان هسة هي اللحضة نفسهة ..
غزوان حس على رجفة جسمهة مو طبيعية .. رفع راسة لوجهة وشاف شفايفهة ترجف ودموعهة تنزل وتتنفس بسرعة ..
حط ايدة على خدودهة : ميامين ..
فزت بسرعة وصرخت : وخررر عني .. لا تلمسني الله يخليك ..
غزوان رجع لورى ورفع ايدي كدامهة : ماشي اهدي ماراح المسج .. والله ما المسج ..
ميامين صار تبجي وتشهك وتترجاه : .. لا تعيد هذاك اليوم فدوة .. والله بالكوة كدرت انساه ..
غزوان عصرة گلبة عليهة .. سحبهة لحضنة وهو يمسح على شعرهة : خلص والله ما راح يتكرر هالشي ..
ميامين تبجي وتمسكت بي اكثر من حضنهة : انت مو حلفتلي ما تقربلي الا بموافقتي ...
غزوان وهو يبوس شعرهة : اسف يروحي والله اسف ... والله ما تتكرر مرة ثانية بس لا تبجين ..

بقت على صدرة لحد ما غفت وهي تبجي ...

£££££££££££££

الفندق ... العرسان ..

جناح مؤيد وجوري ..

دخل للغرفة وشافهة واكفة وتفرك بأيديهة بخوف ..
وكف كدامهة ورفع الطرحة عن وجهة ..
رافعة راسهة بس منزلة عيونهة بخوف ..
مؤيد تنهد وهو يشوف جمالهة ..
جحة بصوت حنون ..: لا تخافين .. اني على كلمتي .. تكدرين تبدلين وتاخذين راحتج ..
جوري رجع الدم بوجهة وابتسمت لا ارادياً ووجهة صار احلا .. : تمام ..
رفعت طرف بدلتهة وفتحت جنطتهة وطلعت ملابس الة .. التفتت علي وهي تشوفة بعدة واكف ما تكدر تبدل كدامة واكيد ما راح تدخل بالبدلة للحمام ..
مؤيد فهم سبب وكفتهة وطلع من الغرفة وكعد بالصالة ..
ورة شوية دك الباب وسمع صوتهة : تفضل ..
مؤيد دخل وشافهة لابسة سيت نوم طويل لونة ابيض ولابسة فوكاه الروب مالتة ...
بلع ريكة بصعوبة ورمش اكثر من مرة بتوتر وهو يشوفهة عبالك ملاك بالابيض وشعرهة الاشقر نازل على طول ضهرهة ومموج لان جانت مسويتة تسريحة ..
جوري ما باوعتلة وكعدت عالمراية تمسح مكياجهة ..
مؤيد ذب السترة وطلع تراك نوم الة وتوجه للحمام بدل ملابسة وطلع ..
شافهة كامت من المراية وراحت للجرباية تريد تنام ..
مؤيد بأبتسامة : لحضة جوري .. خل احجي وياج ..
جوري بتوتر : اي تفضل ..
مؤيد تربع بالكاع ..: تعاي اكعدي كدامي خل نسوي اتفاق ..
جوري حصرتهة الضحكة وكالت : ترة عادي تكدر تكعد عالقنفة ..
مؤيد حك راسة بتفكير : ما انتبهت .. هسة يلة المهم تعاي اكعدي ..
كعدت كدامة بفضول : شنو الاتفاق ..
مؤيد : شوفي اني وانتي خارج الغرفة نكون طبيعيين كدام الناس وما تبينين لاحد سبب زواجنة طبعاً ما عدا بسمة وخاتون الي يدرن وهنة كل وحدة راح تنكلع لبيت رجلهة .. خوش حجي ..
جوري ابتسمت على كلامة : خوش حجي .. وبعد ..
مؤيد : اما داخل الغرفة نكون اصدقاء ..
جوري : اصدقاء ..؟؟
مؤيد بجدية مصطنعة وهو يريد يطلعهة من مودهة : شوفي من الاخير اني اكلجياهة ما اريد اعيش وية وحدة تضل دومهة هادئة وكوة تحجي .. لا يعني تكونين صديقتي .. نسولف ونضحك ونشاقة حالج من حال حمزة ..
جوري بصدمة : اني مثل حمزة ..
مؤيد ببرائة هز كتفة : ايي وشنو الفرق لعد .. شبي حمزة ..
جوري ضحكت لا اراديا على شكلة .. : ماشي موافقة اكون صديقتك مثل حمزة ..
مؤيد تنهد بوية شني من ضحكة .: بس ترة من هسة اكلج انة شقاي ثكيل .. يعني حمزة من اضربة يضل اسبوع يدعي علية ..
جوري فتحت عيونهة ..: يعني تريد تضربني ..
مؤيد : لا يابوي شلون اضربج انتي .. بس مرات بدون ما ادري بالشقة واكفخ .. يعني تحمليني ..
جوري بضحكة ومدت ايدهة تريد تصافحة
: اتفقنا ...
مؤيد يباوع ليدهة وحجة بدون انتباه : تردين تحركين عشيرتي اليوم ..
جوري بعدم فهم ..: ها ؟؟
مؤيد انتبه وحجة بسرعة .: عشيرتي احتركت من النعاس .. هسة وكت مصافح بلة .. شو طلعيلي لحاف من الكنتور خل انام عالقنفة ..
جوري وهي تطلع اللحاف وتفرشة الة عالقنفة وتحط وحدة من المخدات الة ..
تمددت عالجرباية وهو عالقنفة .. كل واحد بيهم يفكر بالثاني ..
جوري فرحت لان مؤيد طلع تفكيرة هيج ومتفهم وروحة حلوة ...
مؤيد تفكيرة غير .. يفكر بألي جاي وأول مرة ينام هو وياهة تحت سقف واحد ووحدهم ..

§§§§§§§§§§§§§§§

جناح بسمة وحسنين ..

واكف اباب الحمام ويدك بالباب ..: بسومة اطلعي ما راح اسويلج شي ..
بسمة وهي كاعدة على طرف البانيو بعد ما بدلت ملابسهة وخلتة يلتهي وحبست نفسهة بالحمام ..
: ما اطلع روح ..
حسنين : شنو تنامين بالحمام ...
بسمة : اي انام بالحمام .. ما عندي مشكلة .. اصلا حلو ودافي هم لان الغرفة باردة ..
حسنين بصبر : التدفئة مشتغلة .. واطلعي لان مو زين تنامين بالحمام ولا تعاندين ..
بسمة وهي شوية وتبجي ..: ما اريد اطلع انت ما تفتهم ..
حسنين بهدوء : بسومتي حبيبتي .. اطلعي مو زين عليج لا تختنكين .. ما اسويلج شي بس اطلعي ..
بسمة خافت لان فعلا بدت تحر لان الحمام خنكة ...
فتحت الباب وطلعت راسهة : وخر خل اطلع ..
حسنين تنفس براحة ووخر ..
طلعت بسمة ووكفت بنص الغرفة وبعدين التفتت علي وكالت : جوعانة ..
حسنين وهو يجي بأتجاهة ..: اني هم جوعان ..
بسمة ببرائة : يلة لعد اطلب اكــ...
قاطعهة وهو يبوسهة على شفايفهة بكل حب ولهفة .. بسمة انصدمت وبعدين ذابت وياه ..
ووووو الباقي معليكم بي ..

¥¥¥¥¥¥¥¥¥¥¥¥

ثاني يوم الصبح ...

فتحت عيونهة وبعدين استوعبت ان وضعهة مو مثل كل يوم .. كل مرة يكون هو الي حاضنهة .. بس هالمرة هي حاضنتة لا وايدهة لافتهة على رگبتة ..
وخرت بسرعة ايدهة وهو فز ..
غزوان بأبتسامة وصوتة مبحوح من النوم : صباح الخير ..
ميامين دارت وجهة وكامت : صباح النور ..
دخلت للحمام وغسلت وجهة وطلعت وهو بعدة متمدد عالجرباية ويراقب حركاتهة ..
دخلت بدلت ملابسهة ولبست قفطان مغربي لان اليوم يجون العرسان واكيد تجي ناس تباركلهم ..
لفت شالهة ورشت من عطرهة وحضرت دشداشة لغزوان ووياهة اغراضة ... واجت تريد تنزل بس وقفهة ..
كام من الفراش وفتح كنتورة وطلع السوار مال امة الي الحجية لبستة الهة وهو اخذة منهة ..
سحب ايدهة يريد يلبسة الهة .. سحبت ايدهة بسرعة من ايدة : ماااريدة ..
غزوان : ميامين لا تعاندين .. انتي مرت الابن الجبير ولازم تلبسين هذا السوار ..
ميامين : وانت سحبتة مني بالقوة من قبل ..
غزوان : جان مختلف هالشي قبل .. بس هالمرة البسي لخاط الحجية وامي لان هاي عاداتهن وما يصير تكسرينهة ..
ميامين مدت ايدهة وهي تتنهد بصبر ..
ابتسم ولبسة الهة وهي طلعت مباشرةً ...

بس طلعت تحولت ملامحة للعصبية .. سحب تليفونة واتصل على اركان .. لان محد يكدر يوقفهة عند حدهة غيرة ..

~~~~~~~~~~~~~~~~~

جوري ... كعدت من النوم شفتة بعدة نايم ..
كمت ومشيت على اطراف اصابعي وما طلعت صوت حتى لا يكعد ودخلت للحمام .. سبحت عالسريع ولكيت شسوار زغير على مراية الحمام نشفت شعري عالسريع وطلعت ما لكيتة .. همزين كعد حتى اكدر ابدل .. قفلت الباب للأحتياط ..
فتحت جنطتي وطلعت نفنوف ابيض ومنقش بذهبي وبي حزام ذهبي .. لبستة وكعدت عالمراية اريد اسوي مكياج..
اندك الباب .. اوو نسيتة مقفول ..
رحت فتحتة وشفتة يجر وياه عربة الريوك ..
دخل وعلى وجهة ابتسامة : صباح الخير يا طيرة ..
حجيت بأستغراب وابتسامة : صباح النور بس شنو طيرة ..
مؤيد وهو يحط الاكل بنص الغرفة : لان الطيور اول المخلوقات تصبح مثل الديج والعصافير ..
جوري بأبتسامة ..: حلو والله يطلع منك شي حضرة الدكتور مؤيد ..
مؤيد يرفع اكتافة : جا من عبث صرت دكتور ...
جوري ضحكت وهزت راسهة وراحت للمراية تكمل ..
مؤيد وهو ياخذ ملابسة : عوفي الصبغ هسة واكعدي تريكي بين ما اسبح حتى نروح للبيت ..
جوري هزت راسهة : ماشي ..
دخل للحمام وجوري كعدت تتريك وهي ميتة من الجوع لان البارحة من التوتر ما اكلت ولا شي ..

&&&&&&&&&&&&

الغرفة الثانية ..

بسمة ... جنت نايمة وحسيت بشي يمشي بهدوء على خدي وبعدين نزل على رگبتي ..
فزيت بسرعة واني اتخيلهة حشرة على رگبتي ..
صرت اتلمس خدي وركبتي بخوف ..
التفتت وشفتة خربان من الضحك علية ..
باوعت علي بغباء بس استوعبت من شفتة رافع الخيط بيدة ..
حجيت بعصبية : شنو هالسخافة .. خوفتني ..
حسنين وهو يبوسني على خدي : صباحية مباركة يعروسة ..
بسمة تذكرت الي صار واستحيت ووجهي صار احمر .. تحمحمت وحاولت اغير الموضوع : ابيش الساعة هسة ..
حسنين : الساعة ٩ ونص .. كومي يلة اني كعدت من الساعة ٨ ونص وحضرتج نايمة ..
بسمة فعلا انتبهت ان هوة سبحان ومبدل ملابسة .. : ليش ما كعدتني وياك ..
حسنين بأبتسامة : شكلج حلو وانتي نايمة وما هان علية ازعجج .. ويلة كومي بين ما اطلب الريوك ..
بسمة بأبتسامة : ماشي ..
دخلت للحمام وهو ابتسم وكام يطلب الهم ريوك ..

~~~~~~~~~~~~~~~~~~~

بيت ابو غزوان

ميامين .. واكفة بالمطبخ اني وخاتون ومها نحضر العصاير ومواعين الجكليت والكيك لان الناس جاية تبارك ومنتضرات العروس تجي ..
دخلنة الضيافة وقدمناهة ..
الحجية : ميامين يمة تلكين عصاير اباب المطبخ .. يبعد كلبي كون ما اتعبج بس حطيهن بالمجمدة هم يلة يبردن ..
ميامين : انشالله حبوبة ..
طلعت ولبست شالي وصرت ادخل بكراتين العصاير ..
سمعت صوت واحد من جهة الباب يصوفر ويكول : بوووية شلون صاروخ ارضي هذا ..
رفعت راسي للباب الخارجي لا اراديا ..
شهككت واني اشوفة واكف ويباوعلي بنضرات قذرة .. ما لحكت ادخل الا شفتة انسحب وصار بالكاع وما اسمع بس صوت الضرب ..

الكاتبة : سارة الشمري🖤