رواية سجينة الظلم والانتقام الفصل الخمسون 50 - بقلم سارة الشمري

الكاتبة : سارة الشمري🖤

جاءني طيف لطيف...
دنا مني وهمس...
سر لي سرا مخيف...
شق اللب و انغرس...
دق له القلب عنيف...
مثل دقات الجرس...
انه طيف ظريف...
ليته قربي جلس...

ورة ثواني حست بأيدي حاوطت خصرهة ...
طفرت بسرعة تريد تكوم بس هوة تمسك بيهة اكثر

وهمس يم اذنهة : لا تتحركين .. انتي حلفتي وكلتي راح تنفذيلي كل شروطي ...
ميامين وعيونهة مغوركة : اساساً ما استبعدت منك تكون هيج .. تريد تستغل كلمتي ووعدي الي انطيتة علمود سعادة اخوي بس حتى ترضي نفسك ورغباتك ..
غزوان دار وجهة الة وحجة وهو قريب من وجهة : شششش .. لا تحجين من وحدج سامعة .. عمري ما فكرت بيج كرغبة وبس سمعتي لو لا ..
ميامين بعصبية : لعد هذا الي تريد تسوي هسة شنو .. مو رغبة ..
غزوان : الي اريد اسوي ان اخليج تنامين بحضني وابقى اتنفس عطرج طول الليل .. اني مستحيل اتقرب منج مرة ثانية بدون ما تكونين موافقة وكلبج يكون وياي ..
ميامين حست ان ارتاحت من كلامة هذا ... دارت وجهة عنة وانطتة ضهرهة ..
هو رجع مرة ثانية وحضنهة من ورة وصار ضهرهة على صدرة ..
ميامين تأففت بكلبهة من قربة منهة لهالدرجة ..
غزوان حط وجهة بشعرهة وسحب نفس منهة وهو لحد الان ممصدك ان ميامين رجعتلة .. يحس ان هسة رجعتلة روحة .. هسة رجع يتنفس من اول وجديد ..
انتبه ان تنفسهة صار منتضم .. ابتسم وعرف ان هي نامت ..
رفع راسة وقرب منهة وطبع بوسة خفيفة على خدهة الناعم ...
رجع راسة لشعرهة وغمض عيونة ...

£££££££

بيت ابو غزوان ..
نايمات جوري وبسمة ومها وخاتون على جرباية مها ورافعات رجليهن لفوك الجرباية وصايرات وحدة لازكة بالثانية لان المكان ضيق  ..
كلهن صافنات ...
خاتون بنصهن وهي تباوع ليفوك ..: اني لهسة ما مقتنعة شلون ميامين قبلت ترجع لغزوان وهي جانت تكرهة ..
بسمة بقهر : والله حتى اني اكل بروحي بس اريد اعرف ليش ..
مها وهي لحد الان يدور ابالهة تصرف غزوان من طلب منهة تجذب على ميامين بخصوص زواج خاتون .. يعني ليش ميامين من عرفت بخاتون تريد تنخطب وافقت ترجع لغزوان .. لازم اسأل غزوان على هالشي ..
بسمة وهي تضرب كتفهة بكتف خاتون : سمعي ترة باجر لازم نسألهة ولا اني ترة اموت من الفضول ..
جوري بهدوء : ليش هيج معقدات الامور .. يعني يمكن لان تحبة ورجعتلة ..
بسمة بدون اهتمام : والله لو مو تحبة .. بعد الي سواه بيهة ما ترجعلة ..
جوري بحزن : الي يحب يغفر اي خطأ للشخص الي يحبة مهما جان الخطأ جبير .. يعني هي تحبة وسامحتة ونست كلشي بس حتى تبقى قريبة منة بعد ما عرفت ان هو يحبهة ومتندم على الي سواه بيهة ..
مها بحزن : هاي هيج الحب يسوي .. اففف .. شلون الواحد ممكن يعرف ان هالشخص هو الي راح يحبة ويتعلق بي ..
خاتون بأبتسامة : عادي .. يعني ممكن مواقف تثبتلج هالشي .. او صدفة
بسمة باوعت على خاتون وعقدت حواجبهة وكالت : مثل شنو هالمواقف ..
خاتون وهي تباوع للسقف وحجت بأبتسامة : اممم .. يعني مثلا عن طريق النضرات .. انتي مجرد ما تشوفين عيونة راح تعرفين اذا كانت بيهة حب او اعجاب او لا شي .. ومرات عن طريق التصرفات .. مثلا يتحكم بيج وبلبسج ويعصب اذا حجيتي وية اي ولد .. بهاي الحالة يكون يغار عليج ويحب تكونين بس الة ... واما اذا كان شلون تعرفين هو هذا الشخص الي حتحبينة يعني ممكن تكون صدفة تجمعكم سوة ويكون هالحب من اول نضرة او ممكن يتكرر اكثر من مرة هاللقاء ويبدي الاعجاب ويتحول الى حب .. يعني الحب الة اكثر من طريقة وهالشي ما يعتمد على طبيعة حياة الشخص وتفكيرة .. يعني الحب يدخل للگلب بدون ميستأذن صاحبة .. يستوطن داخلة ويبدي يكبر لدرجة ان الشخص يحس اذا اختفى هذا الحب يعني حياتة تختفي وياه حتلو جان هالحب معذبة ..
اكو بيهم اشخاص يعانون من وجود الحب بحياتهم بس ميكدرون يتخلصون منة .. واكو اشخاص يحبون يعيشون قصص حبهم مهما جانت مشاكلة راح يتقبلونهة بكل رحابة صدر ....

البنات صافنات ويستمعن لكلام خاتون بتمعن وتركيز ...
جوري ... نزلت دمعة من عينهة .. اني عانيت طول عمري من هالحب .. دمرني وجرح كرامتي وكسر كلبي وبالتالي حرمني من الي احبة .. ومع هالشي ماكدرت اطلعة من بالي وما احبة .. صح كلام خاتون .. اذا اختفى هذا الحب يمكن اني اختفي وياه واموت .. ماكدر اعيش بدون حب فارس حتلو جان مو كدامي ومو بهالدنيا اصلا .. حبة انزرع بكلبي وجذورة امتدت لكل كياني .. مو بهالسهولة اكدر اشيل هالحب من كلبي ..

بسمة تباوع لفوك .. كل موقف مر ببالهة لحسنين نضراتة .. غيرتة لما جانت تشوفة فجأة دخل للجامعة مالتهة ويراقبهة من بعيد .. لو تمسكة بيهة طول هالفترة .. وهالشي يعني هو شكد حبهة وما استسلم ولا مرة .. تعترف ان هي حبت تصرفاتة وخوفة عليهة واهتماماتة بأدق التفاصيل الي تخصهة .. فعلا الحل الي انطتة الهة ميامين ان تطول الخطوبة كولش فادهة وخلاهة تشوف حسنين بنضرة ثانية وخلاهة تتعلق بي اكثر .. وهي اصلا قررت ان تنطي الموافقة بأي وقت يكدر يحدد موعد زواجهم ...

مها .. ما تدري ليش مر ابالهة هالشخص الي شافتة اليوم .. معقولة هاي الصدفة الي دا تحجي بيهة خاتون .. بس منو هوة .. مؤيد حتى ما ذكر اسمة كدامهة .. هي حتى ما تعرف اذا جان من اصدقاء غزوان لان همة كالو جماعة غزوان اغلبهم يرحون وياه .. وممكن يكون من اهل ميامين .. رجع مر الموقف ابالهة وهي تتذكر شكلة .. جان وسيم كولش .. اشقر وعيونة خضر ولابس قاط نيلي ..
ابتسمت على تفكيرهة .. مها هاي وانتي خايفة ومرتبكة وهيج ركزتي بي ..

خاتون استغربت هدوء البنات وسكوتهن .. شافتهن كل وحدة صافنة لفوك .. جوري دموعهة على خدهة .. بسمة تباوع لفوك وتفكر وعيونهة فرحانة ... مها تلعب بطرف شعرهة ومبتسمة وسرحانة بغير عالم ..
رفعت حاجب ونزلت الثاني .. بلة جوري تحب فارس وتبجي علي هاي افتهمناهة .. وبسمة اكيد تفكر بحبيب القلب حسنين اكيد ماكو غيرة ...
الا هاي مها ..
كرصت مها من زندهة حيل .. مها كمزت من صفنتهة وعاطت من قوة الكرصة : ااااه ..
خاتون : كشففتتتج ... تحبببييين من ورانة ولج ..
البنات كمزن من صفنتهن على صرخة مها .. جوري بسرعة مسحت دمعتهة وبسمة فزت بخوف وهي تباوعلهن : شكو شبيج .. منو الي تحب ..
خاتون وهي تأشر على مها : هاي الخانوم .. اني احجي عالحب وهي صافنة بغير عالم .. احجييي ولج تحبين منو ..
مها رجعت لورى بخوف لان خاتون كامت تتقدم منهة .. حجت بتوتر : ما احب احد والله هيج صفنت .. وخري عني ..
بسمة وهي تتخوصر : نعم نعم .. وخري شنو .. ولج مها تحبين .. هسة تسولفيلي ..
مها وهي تكوم من الجرباية وتريد تتهرب منهن : اووف وخرن عني .. الفتن سالفة علية واني كلشي ما حاجية .. اعوذ بالله منجن .. يلة كومن من فراشي على ما اطلع من الحمام .. ترة اريد انام ..
مها دخلت للحمام والبنات وحدة تباوع بوجه الثانية وما مصدكات كلامهة ...
تمددن كل وحدة بفراشهة وكلمن تفكيرهة بشخص معين ما عدا خاتون الي نامت مباشرةً من التعب ...

&£&£&£&£&£&£

اليوم الثاني ..

فتحت عيونهة وهي تحس بأيدين على خصرتة .. وانفاسة الحارة تضرب على ركبتهة ...
استوعبت المكان والحال الي هي بي .. حاولت تحرك راسهة بس ماكدرت لان حاط راسة على شعرهة ..
حست بي تحرك .. هي مباشرة غمضت عيونهة ..

غزوان فتح عيونة .. ابتسم وهو يحسهة بحضنة .. استنشق من عطرهة وهو يهمس : هالاوكسجين يعادل الكعدة بحديقة كلهة ورد لمدة شهر كامل على نقاوتة ..
بلعت ريكهة وهي تسمع همساتة وانفاسة يم اذنهة .. قشهر جلدهة وعصرت ايدهة الي جوة المخدة حيل من حست بشفايفة على ركبتهة وباسهة بخفة وبعدين كام بخفة حتى لا يزعجهة وكل فكرة ان هي نايمة ..
دخل للحمام وهي كعدت تهوي على نفسهة .. شنو من بشر هذا .. مسحت رگبتهة مكان بوستة بقرف ..
افففف والله اقرف من لمساتك علية .. كامت من مكانهة بعصبية ..
فتحت باب الغرفة وتوجهت لغرفتهة القديمة ..
فتحتهة وابتسمت استغربت ان باقية نفسهة وعلى حالهة ما تغير منهة اي شي ..
دخلت للحمام غسلت وطلعت .. رجعت للغرفة وشافتة طالع من الحمام ..
توجهت للمراية بس هو صار كدامهة ..
رفعت عيونهة الة ببرود .. حاوط خدودهة بأيدي وقرب منهة وباس كصتهة بوسة دافية ..: صباح الخير ..
ميامين وهي تنزل ايدي عن خدودهة ببرود وتتوجه للمراية : صباح النور ..
وكفت كدام المراية واخذت المشط وتسرح بي شعرهة وهو يراقب حركاتهة ..
صار وراهة وحاوط خصرهة بأيدي وحط فكة على كتفهة وكال وهو يباوع بيعونهة المعكوسة من المراية .. : تدرين شكد مشتاقلج .. وشكد جنت اغار وانتي بعيدة عني .. اغار من الاشخاص الي جانو يشوفونج واني ماكدر اشوفج او اسمع صوتج ..
ميامين ببرود : كل هالشي من ايدك .. انت الي خليتني اكره شوفتك واكره اسمع صوتك ..
غزوان والندم واضح بعيونة : يعني ما راح تسامحيني وترحمين حالي ..
ميامي التفتت علي وكالت : غزوان خل اكلك شي واحد ... مادام الرحمة ما موجودة بقاموسك .. اذاً لا تطلبهة من احد مرة الثانية .. لان الناس من تنطي تريد المقابل يكون بالمثل مالتهة ..
راد يحجي غزوان بس قاطعهم دك الباب ..
خاتون : غزوان ابوية دز عليك .. وايكول اذا ما ينزل هسة اجي اسحلة سحل لان الساعة ٩ ..
تأفف غزوان وراح لغرفة التبديل ولبس دشداشة بيضة ولبس ساعتة وتعطر ومشط شعرة وطلع ...
ورة ثواني دخلن مها وخاتون وجوري : صبااح الخير ..
ميامين بأبتسامة : صباح النور ..
دخلت بسمة وهي تسحب وراهة جنطة ميامين ..
ميامين شهكت وهي تشوف جنطتهة بيد بسمة ..
هجمت عليهة بسرعة وعضتهة من كتفهة بقهر ..
بسمة صرخت بألم : ااااااه .. يالحيوانة ..فكيييني ...
ميامين فكتهة ودفعتة : تستااهلين ..
بسمة تفرك كتفهة بألم وشوية وتريد تبجي : الله ياخذج كولي امين .. حتى الجلاب مو مثلج .. اااه شوفي شلون صارت حمرة وسنونهة طبعت ..
ميامين بعصبية : والله قليلة بحقج .. ماخذة جنطتي ومخليتني البس من ذني الزبالة الجايبتهن ..
بسمة بقهر : هذني مو زبالة .. هذني للعدهن انوثة ورقة .. بس ولو انتي شمعرفج بهالسوالف مال الانوثة والبنات ... بس باعي شلون عضيتيني بربج هاي سوالف بنية ...
ميامين عافتهة بغرور ومشت وهي تكول : تستاهلين ..
مها وجوري وخاتون خربانات ضحك عليهن ..
خاتون حطت الريوك بالكاع وكالت : يلة تعاي تريكي اكيد هسة جعتي ..
كعدن يتريكن ويسولفن وبسمة كل ما تذكرت العضة ترجع تسب ميامين ..

@£@£@£@£@£@

كاعدين الشباب بالديوانية مال بيت ابو غزوان ...
وفرحانين على فرحة غزوان ...
احمد بضحك : اكول غزوان .. تنصحني اتزوج لو لا ...
حمزة : من اول يوم تسألة .. خلي يمر كم شهر لو سنة وبعدين اسألة ..
مؤيد : اي ويجيكم غزوان طفران ويكللكم لو ضال اعزب احسلي ..
غزوان مطنشهم بعدم اهتمام ومبتسم وهو يسمع لسوالفهم ... يدري بيهم يردون يخلونة يعصب ....
حسنين بضحك : حمزة بما انك متزوج .. احجيلنة شلونة الزواج .. يعني تنصحنة نتزوج ..
حمزة الي كاعد بصف غزوان .. رجع ضهرة على نفس المخدة الي غزوان مرتكي عليهة وكال بهيام : ياخي الزواج شي ثاني .. تحس بالاستقرار ..
مؤيد كاتم ضحكتة على حمزة : زين شنو الاشياء الموحلوة بالزواج ..
حمزة وهو يفكر : اول شي لا تتأخر عالبيت .. يعني تلتزم بنضام دقيق بالاوقات ..
احمد يرفع حاجبة بأبتسامة وكوة لازم ضحكتة على شكل حمزة : والاشياء الحلوة شنو ..
حمزة بسرعة : كلشي حلو .. ياخي تدللك بس تطلب منهة فد اكلة تلكاهة مسويتهة .. الكلام الحلو .. والسوالف الما تنمل ..
قرب وجهة من غزوان وهمس بأذنة : واحمر واخضر واصفر ..
غزوان فتح عيونة بسرعة والتفت على حمزة بعصبية .. اخذ الخاشوكة الحديد مال الجاي ..
حمزة طفر بسرعة وهو يضحك وشرد .. غزوان شمر الخاشوكة وطاحت بكصة احمد الي حط ايدة على كصتة بصدمة ..
الشباب طاحو بالكاع من الضحك على شكل احمد المصدوم .. غزوان ما تحمل اكثر وكام يضحك على احمد ..
قاطعهم دخول ابو غزوان عليهم ..
وكفو ضحك همة ووكفو احتراما الة ..
غزوان عقد حواجبة بقلق وهو يشوف شكل ابوه الما يتفسر ومبين عصبي

الكاتبة : سارة الشمري 🖤
... بعد لحد يجي ويكلي نريد بارت بليل لان والنبي ايدية طاحت واني اكتب 😂 بس يلة انتو تستاهلون ...
توقعاتكم للبارت الجاي حبايبي