رواية سجينة الظلم والانتقام الفصل الرابع والستون بقلم سارة الشمري

الكاتبة : سارة الشمري🖤

إذا أحب الرجل امرأة سقاها من كأس حنانه ، وإذا أحبت المرأة رجلاً أظمأته دائماً إلى شفتيها (بيرون)

ميامين .... صارلي نص ساعة كاعدة كدام التلفزيون ومنتضرة الفيلم على نار ل جوني ديب ممثلي المفضل ..
بعدة الفلم ما بدة ودخل غزوان للغرفة واجة كعد بصفي ..
سحب من العصير من ايدي وشرب منة : شجاي تتابعين ..
حجيت بحماس : راح يبدي فيلم للممثل المفضل عندي هسة ..
حجة بهدوء وهو ينزل العصير عالطاولة : جوني ديب ؟؟
التفتتلة مستغربة : اي .. بس شمدريك اني احب جوني ديب ..
باوعلي بطرف عينة : انتي كاتبة بدفترج تحبينة ..
فتحت عيوني ودرت علي : قريييت دفتري .. واني اكول وين راح هالدفتر ..
باوعلي بأبتسامة : قريتة كلة من اول يوم رحتي لاهلج .. وعرفت كلشي عنج من خلال هالدفتر ..
تخوصرت وكتلة : بس هالشي عيب لان هذا دفتر ذكرياتي .. ما يصير تقراه ..
رفع حاجبة وما عاجبة كلامي : واذا دفتر ذكرياتج .. اني زوجج يعني عادي اقراه .. وبعدين احمدي ربج بعدني ما حاسبتج لان كاتبة انتي تحبين جوني ديب .. شحالة هوة جنة بنية ..
طبكت حواجبي بعصبية : رجاءً لا تحجي علي .. هذا احبة من طفولتي .. وبعدين اصلا كلة رجولة وكاريزما وشخصية وادوارة مختلفة .. يعني يجنن ..
باوعلي بعصبية : بعد بعد كملي ..
سحب الريموت مني وطفى التلفزيون وضمة .. حجة بعصبية : حتى تتعلمين شلون تكولين احب شخص كدام رجلج .. يلة كومي ماكو فلم .. لا جوني ديب ولا غيرة ..
باوعتلة بصدمة : غزوان بلا هالسوالف .. جيب الريموت ..
باوعلي بعصبية : وخري ما اطي الريموت ..
باوعتلة بعصبية : غزوان الفلم راح يبدي صارلي اسبوع انتضرة ...
غزوان : وشنو يعني واذا صارلج اسبوع تنتضرينة .. اكو وحدة تكل لرجلهة احب واحد ..
ميامين : يعني هسة انتة غرت من الممثل .. عادي يعني حالي من حال باقي المعجبين الة ..
طبك حواجبة : وشنو يعني واذا ممثل .. مو بشر يعني ..
جريت نفس واني اباوع للساعة اكيد بدة الفلم ..
رسمت ابتسامة على وجهي وقربت منة ..
حطيت ايدية على صدرة وقربت وجهي من ركبتة .. حجيت بهمس وخشمي لامس ركبتة : اسفة حبيبي .. اصلا ما احب احد غيرك ..
باوعلي بعيونة وذاب وياي رفع ايدة يريد يحضني ..
سحبت الريموت منة بسهوووووولللة ..
وخرت بسرعة واني اضحك وشغلت التلفزيون وهو يباوعلي مصدوم ..

££££££££

بعد مرور اشهر ... باقي يومين لعيد رأس السنة ..

حسان اقترح عالشباب ان يعيدون هالسنة بتركيا ..
الشباب اقتنعوا ووافقو يرحون وحدهم ك لمة شبابية ..

ميامين .. من بعد ما حجة وياي غزوان عن روحتهم لتركيا واني افكر شلون اخلي ما يروح ..

اجت ابالي فكرة ودزيت رسالة للبنات عالكروب ..
ميامين : بناات راح اطك من التفكير .. ساعدوني ..
البنات بردود متفرقة : خير .. شبيج .. بشنو .. شكو
ميامين : اكيد تدرن بالولد يردون يسافرون صح ..
خاتون : اسكتي لا تذكريني .. ماكدرت اكلة لا تروح .
بسمة : والله حتى اني كتلة روح شعلية بيك وطنكرت ونمت من وقت ..
جوري : اني من شفت اسلوبة من يحجي بهدوء وود ما كدرت اعترض ..
مها : والله اني ردت اتعارك وياه بس تعبان اجة واليوم الصبح ما كدرت احجي وياه ..
ميامين : والله اني مثلجن .. جاي ادور طريقة اخلي يبطل الروحة بس مو اني اكلة ..
خاتون : اي بس شلون ..
مها : اي طريقة بس المهم ما يسافرون .. والله اموت قهر هنا .. هاي اول سنة النة سوة وهو يريد يروح يعيد يم الحلوات ..
بسمة : بنات اني عندي طريقة ولازم كلنة نسويهة ..
الكل ..: شنوو هي ..
بسمة : اول شي همة ابيش الساعة طيارتهم ..
جوري : مؤيد كال الساعة ١ ونص بليل طيارتهم تطير .. وهمة يطلعون منا الساعة ٩ ويرحون لمطار النجف حتى يتلاكون همة ورائد وخالد وحسان هناك بالمطار ..
بسمة : حلووو .. اسمعن زين لعد ..

ميامين ... اجة الليل وصارت الساعة ٨ ونص ..
اجيت للبيت بسرعة واسوي مثل ما كالت بسمة .. سبحت وطلعت نشفت شعري .. سويت مكياج خفيف وحطيت حمرة حمرة وحطيت صبغ اضافر احمر ..
لبست سيت نوم ماروني وعكس لون بشرتي ..
اخذت العطر مال غزوان الي يحبة وابتسمت بخبث ورشيت منة علية ..
دخلت جنطة غزوان لغرفة الملابس .. اكيد هسة يريد يجي ياخذهة حتى يروح للمطار ..
ورة دقايق دخل غزوان .. باوعلي بأبتسامة ورفعة حاجب ..
رحتلة واني امشي كدامة بدلع : حبيبي اجيت ..
اخذت السترة مالتة وتعمدت اكون قريبة منة ..
سحب نفس وهو يغمض عيونة وبعدين تنهد : لا وحاطة من عطري هم ..
ابتسمت وكلت ببرائة : اممم حبيت اجربة .. حلو علية ..
سحبني من خصري الة : انتي كلشي يلوك الج .. انتي التحلينة مو هوة ..
مشيت اصابعي بخفة على لحيتة وانزل على ركبتة : اكيد مو مثل لما يكون عليك ..
حطيت خشمي على ركبتة واني اجر نفس : يصير يرد الروح ..
باوعت بعيونة : تعال حبيبي اكيد تعبان ..
سحبتة وكعدتة عالجرباية .. اخذت السترة مالتة اريد اعلكهة وطلعت تليفونة وسويتة صامت وبسرعة حطيتة عالميز ..
رحت وصرت وراه وافرك بأكتافة ..
تعمدت شعري ينزل علي ..
سحبني لحضنة بسرعة وكال : شجاي تحاولين تسوين اليوم ..
قربت شفتي منة وكلت بهمس : ليش شمسوية اني ..
قرب شفتة مني وباسني بسرعة وسحبني للجرباية ..

£££££

جوري ... جهزت نفسي ولبست سيت نوم قصير لونة احمر .. حطيت مكياج خفيف ..
باوعت لنفسي بالمراية .. ابتسمت برضى ..
انفتح الباب ودخل مؤيد باوعلي وفتح عيونة ..
وكفت كدامة ولفيت ايدة على ركبتة : اشتاقيتلك ..
باوعلي بفهاوة : ها ..
حجيت واني اقلدة : هو شنو الها .. اكلك مشتاقتلك ..
حاوط خصري بأيدي وباوع بعيوني بخبث : شهالجرأة .. ما عرفتج ..
ضحكت بدلع وهو بسرعة باسني من شفتي وهو يمشي بية للجرباية ...

£££££££

بسمة ... كاعدة عالمراية وارتب بنفسي قبل لا يجي حسنين .. وادندن ناويالك على نية بس انت اصبر شوية اذا ما اعلقك فيني وهواك يصير بيدية ..
وكفت كدام المراية ودزيت لنفسي بوسة : والله تخبلين ..
جنت لابسة سيت نوم وردي وشعري حاطتة صفح .. وحاطة مكياج طوخ شوي لان يلوكلي ..
سمعت صوتة وبسرعة رحت فتحتلة الباب قبل لا يفتحة هوة ..
شافني وباوعلي بأستغراب وبعدين دخل للغرفة ..
باوعتلة بدلع : هلو يروحي ..
باوعلي برفعة حاجب وهو يحط ايدة على كصتي : بسومي حبيبتي شبيج .. مصخنة شنو .. مو البارحة انتي مطنكرة ..
وخرت عنة وبرطمت بزعل : مو صوجك ..
حضني من ورة وحط حنجة على كتفي : اسف يحلو .. بس وراي سفرة .. وهسة اذا نمت تدرين بية ما اكعد للصبح ..
تذكرت بسرعة والتفت علي وتمسكت بركبتة وحجيت بدلع : يعني تريد تعوفني واني متجهزة الك ..
باوعلي بعيون ذايبة : شلون اكدر اعوفج ..
سحبني الة واني ابتسم بأنتصار ..

££££££££

مها ... جهزت نفسي وسويت مثل ما كالت بسمة بالحرف الواحد .. واكفة كدام المراية واحط بالحمرة ودخل خالد ..
شافني وصوفر بأعجاب .. ذبيت الحمرة ورحتلة بدلع .. اخذ ايدي وفرني وعيونة تمشي علية : خفي علية .. حرام عليج شايلة كل هالجمال .. لا وحاطة كحلة واني بدون كلشي العيون حاركات اهلي ..
باوعتلة بضحكة : شعندي غيرك حبيبي ..
مشيت كدامة بدلع واني لابسة قصير : تعال حبيبي محضرتلك العشى ..
سحبني الة ..: شو تعاي هي مال عشى .. اليوم اتعشى بيج ..

£££££££££

خاتون ... فعلا مشيت بخطة بسمة .. لبست سيت نوم اسود .. حطيت مكياج خفيف .. رشيت من العطر الي يحبة رائد .. باوعت لشكلي بالمراية : هذا وجهي اذا خليتك تروح ..
ثواني وانفتح الباب ودخل رائد .. باوعتلة بحب ومشيت الة وصوت الحجل يرن وية مشيتي ..
وكفت كدامة : الله يساعدك ..
قرب راسة من ركبتي وسحب نفس قوي : خرب بليسج على هالعطر ..
ابتسمتلة : ادري بيك تحبة .. وحطيتة علمودك ..
حجة وهو يهز راسة بتنهد : ولج مو وراي سفرة .. هسة وكتهة ..
باوعتلة بزعل واني امشي : خلص براحتك .. تريد تعوفني علمود السفرة ..
سحبني الة وبثانية صرت بحضنة ..
حجة وهو يحط راسة بركبتي : لا يا بوي .. الا مسودن واعوفج ..

£££££££

(البنات .. كل وحدة خلت رجلهة ينام وسوت تليفونة صامت .. حاسباتهة زين )

حسان .. منزل جنطتي وحاطهة بالباب وواكف انتضر رائد ينزل حتى نمر على خالد وننطلق لمطار النجف ومن هناك نتلاكة وية الشباب بالمطار ..

صارلي ساعة انتضر بالصالة .. امي نامت خطية لان ما متعودة تسهر ..
افففف وين صار هذا .. اتصل علي ما يرد .. اكيد هسة خالد يعصب لان خليناه ينتضر هواي ..
دكيت على خالد اكثر من مرة .. هذا الثاني هم ما يجاوب .. يربي هسة اني شسوي .. حتى عيب اروح ادك علي الباب ..
تمددت عالقنفة واني انتضر الافندي يشرف ..
غمضت عيوني وما حسيت غير رحت بسابع نومة ..

( هههه هاي عاقبة الي يضل بدون زواج .. ينام بالصالة )

الساعة ٧ الصبح ..
ميامين ... نايمة وحاطة راسي على صدرة .. تحرك هو وسحب تليفونة .. فتحت عيوني على حركتة ..
كلت بصوت نعسان : حبيبي شجاي تسوي ..
غزوان : اريد اتطمن عالشباب وصلو لو لا ..
فتحت عيوني بسرعة وشلت راسي : شلون يعني الولد .. وانتة ما جنت راح تسافر ..
غزوان : لا كتلهم ما اسافر .. لان تدرين بية ماكدر ابعد عنج كم يوم .. وهم كلت ابتدي السنة الجديدة بشوفة عيونج ..
رجعت راسي وفرحت اكثر لان ما سافر علمودي ..
بقة يدك عليهم بس محد يشيلة ..
عقد حواجبة وحجة بخوف : ليش محد يجاوب .. خاف صاير عليهم شي ...
ابتسمت وحابسة ضحكتي : لا تخاف عليهم .. كلهم نايمين هسة ..
باوعلي مستغرب : وانتي شمدريج ..
حجيت بضحكة : لا كل وحدة مسوية على رجلهة خطة .. يعني احنة متفقين ما نخليكم تسافرون .. وانتو كلبكم رجيج ما يتحمل هالجمال هذا ..
طبك حواجبة : يعني هاي خطة منجن .. زين خاف الولد سافرو وصارلهم شي .. شمدريج بخطتجن نجحت ..
ابتسمت : اتصل على حسان وتأكد بنفسك ..
فعلا سحب تليفونة واتصل على حسان .. ورة كم رنة رد علي حسان : ها غزوان ..
غزوان : ها حسان ما سافرتو ..
حسان وكأنة تذكر وطفر : لا يربي راحت علية نومة .. اكيد عافوني ومشو .. لان يدرون بية كوة اكعد ..
غزوان بضحك : رد نام يكلبي رد نام .. كلهة منومة اليوم مو بس انتة ..
سد التليفون من حسان والتفت علية وهز راسة : ما جذب الكال ان كيدهن عضيم ..

جوري ... ابتسمت بخبث واني اشوفة يطفر من النوم ويشوف تليفونة صامت : راحت الطيارة ..
سويت روحي نايمة وما تحركت ..
اسمعة يحجي وية روحة .. غزوان داك علية واني شلون صار تليفوني صامت ..
ضحكت بكلبي وكملت نومتي وهو نفس الشي ..

باقي الشباب حالهم نفس حال مؤيد .. والبنات فرحانات ان حققن غايتهن ...

££££££

بعد مرور ٨ شهور ...

رائد ... رجعت من المجمع ودخلت للبيت .. صعدت فوك واني ادور بعيوني عليهة بأستغراب لان اسمع صوتهة بس ماكو ..
حجيت بصوت : خااتوون ..
اجاني صوتهة من ورة القنفة : اني هنا ..
باوعتلهة وطبكت حواجبي : شتسوين هنا ..
لمت شفايفهة وعبالك بس تريد احد يحجي وياهة حتى تبجي : ماهوة .. ضاع مني ..
كامت من ورة القنفة وتمشي جنهة بطة وبطنهة بارزة لان بشهرهة السابع ..
رائد : شنو هوة الضاع ..
ما حاجتني بس وجهة احمر من العصبية ونفشت المخاد مال القنفات وتشمرهن بالكاع وتدور بأطراف القنفات ..
رائد : خاتون ما راح تكليلي عليمن تدورين ..
نفخت كذلتهة وكالت بقهر : الحجل مالتي ماكو .. مادري وين حطيتة ... كلبت علي البيت بس ماهوة ..
باوعتلهة بعصبية : وهسة انتي تفترين علمود حجل .. انعل ابو الحجل .. تعاي اكعدي ..
تخوصرت وكالت وعيونهة مغوركة : ماا اكعد .. هذا الحجل انتة جبتة الي بيوم عرسي .. شلون ما افتر علمودة ..
باوعتلهة وورحت كعدت يمهة بأبتسامة ..: انتي دورتي زين وما لكيتي ..
جوري : اي دورتة ما تشوف شلون كالبة البيت ..
رائد : انتي تدورين وهو وياج طول الوقت ..
طبكت حواجبهة : وينة ..
رفعت ايدهة .. جانت لابستة على شكل سوار ..
حكت راسهة ببرائة : نسيتة ..

££££££££££

خالد ... كاعد العب دومنة اني ومها ..
خالد : مهااا .. راح اموتج .. لا تغشين ..
مها بضحكة : ما اعرف متعودة عالغش ..
خالد : لا حبيبتي اني ما تغشيني ..
تأففت وشمرت الدومنة : خلودي حبيبي شنو رأيك تجرب تطبخلي اليوم ..
باوعتلهة برفعة حاجب : كولي والله .. ما اعرف اطبخ ..
مها كامت بملل : زين اني مليت شسوي ..
خالد : اي كولي هيج من البداية .. مليتي مني ..
مها : لا مو مليت منك .. بس مليت من كعدة البيت .. اخذني لبيت اهلك اريد اشوف عمتي ..
خالد بأبتسامة : كومي امري لالله ..
كمزت من مكانهة واني صحت بيهة : على كيفج ترة اريد ابني ...
باوعتلي بعصبية : والله من ورة ابنك اني محبوسة بالبيت لان الدكتورة كالت لا تتحركين هواي .. هالمرة لو مو ابنك اطلع اطلع ...
ضحكت عليهة بطنهة هستوهة بدت ترز لان بشهرها الرابع .. الله يسهللهة ..

&&&&&&&&

حسنين ... كاعدين وية اهلي على سفرة الاكل .. دخلت دعاء وبيدهة طاسة كزاز وحطتهة كدام بسمة ..
بسمة فتحت حلكهة وهي متحمسة تريد تاكل ..
اختي شمس عاطت : وييييع .. شنو هذا ..
بسمة كمزت : شبيييج .. عادي زلاطة وفوكاهة نوتيلا ومايونيز ..
حوراي اختي الثانية حطت ايدهة على حلكهة : بسمممة صدك راح تاكلين هذا .. والله احس راح استفرغ بس بمجرد المنضر ...
شوق اختي الثالثة : بسمة شوكت تخلص فترة النساوة مالتج ونرتاح ..
باوعتلهن وهي تباوعلهن من وحدة لوحدة ..
حسنين : شعليجن بيهة .. خل تاكل بكيفهة ..
باوعتلي بأبتسامة وعبالك شجعتهة وكامت تاكل وهي تتلذذ .. اباوع لاخواتي طابكات حواجبهن بقرف واني حالي اردئ من حالهن بس ماريد اكسر بخاطرهة ..
بسمة من ابتدت فترة النساة وهي تشتهي اشياء غريبة عجيبة .. ودعاء ما تخلي شي ما تسوي الهة ..

££££££££

مؤيد ... كاعد بالغرفة واشتغل عالابتوب ...
طلعت جوري من الحمام وهو مدنك تباوع لشي بيدهة ..
اجت وكفت كبالي .. حجت بصوت حزين : مؤيد يعني اذا خطين مو حامل صح ..
باوعتلة بسرعة .. يا حمل ..
كمت وكفت : شنوو ..
انطتني اختبار تحليل الحمل المنزلي ..: اشتريت هذا من الصيدلية لان شكيت ان حامل .. بس طلعلي خطين .. يعني مو حامل ..
اباوع للأختبار وايدية ترجف ..
باوعتلهة وكلت : جوري اذا خطين حامل .. واذا خط واحد مو حامل ..
باوعتلي وعيونهة شعت بفرح : و والله ..
حجيت بفرح : والله ..
بقيت واكف : لحضة خل استوعب .. راح اصير اب .. راح يصير عدنة بنت او ولد صح ..
هزت راسهة وهي تضحك ...
حضنتهة لصدري حيل ..
نزلت ابشر اهلي بهالخبر ..

£££££££££££££££££££££££

ميامين : كاعدة بالبلكونة والجو حلو لان دنيا الليل .. السما صافية والنجوم متناثرة بكل جهة ..

حسيت بأيدين حاوطتني من ورة بدفو وهمس بأذني ..: ليش كاعدة برة ..
حطيت ايدي فوك ايدي ورجعت راسي لصدرة : الجو حلو .. تعال اكعد يمي ..
كعد بصفي وحضني لصدرة ..
حجيت بهمس : غزوان ..
غزوان : هممم ..
ميامين : تتذكر اول يوم اجيت بي لهالبيت ..
تنهد وكال : شذكرج بهاليوم ..
حجيت بأبتسامة : لا والله صدك .. تدري بيومهة جنت ميتة من الخوف بس حاولت ما ابين هالشي .. تخيلت هالمكان راح يكون سجني طول العمر ..
غزوان بهدوء : ندمانة ؟؟
التفتتلة بسرعة : ابداً .. اصلا احمد الله واشكرة كل يوم الي جمعنة مهما جانت الضروف .. واذا جان حضنك سجني فهو احلا سجن ..
حضني لصدرة اكثر ..: الله لا يحرمني من هالعيون ..
ابتسمت وكتلة : غزوان شنو اكثر شي تحبة بية ..
غزوان وهو يباوع للسما : جمال السماء في نجومها وجمال حبيبتي في شعرها ...

......النهاية .....

الكاتبة : سارة الشمري🖤
ولهنا تنتهي القصة حبايبي اتمنى حبيتوهة ونالت اعجابكم .. وسامحوني اذا فد مرة زعلتكم بالبارتات .. هواي بنات كالو حرامات راح تخلص وتعودنة عليهة 😘 شنسوي يا كلبي كل قصة والهة نهاية والحمدالله نهاية ابطالنة سعيدة 😘
اعذروني اذا خليتكم تنتضروني هواي واسفة اذا مرات اتعصب على البعض .. بس والله اكثركم كلامكم زرع بكلبي التفائل ومحبتكم خلتني استمر بهالقصة 😘
دمتم سالمين حبايب سارة 👍🏻❤️