رواية سجينة الظلم والانتقام الفصل الاول 1 - بقلم طبيبة الاحساس

الكاتبة سارة الشمري
#سجينة_الظلم_والانتقام 🍂🥀

حجة بعصبية :هالكلب لا تجيبين اسمة كدامي مرة ثانية ... ورب الكعبة احسب الله ما خلقج
رديت علي واحاول اخفي الخوف : الي دا تحجي عنة هذا اخوية شلون اتكولي ما اذكرة
قرب وجهة مني وحجة بفحيح : اخوج مو ... من اليوم وجاي تنسين شي اسمة اخوج وامج واختج شيليهم من راسج
انصدمت من كلامة : شنووو ... هذولة اهلي شلون تريدني انساهم ... تريد تحرمني من اهلي
حسيت اصابعة انغرزت بخصري بكل قوتة صلبت ضهري من الألم
سحبني من شعري وقرب وجهي منة : اهلللج ... وربي وجلالة اذا ما حركت گلب اخوج عليج وحركت كلبج على اخوج واهلج مثل ما حركتو كلبي على اخوي ما يطلع اسمي غزوان الجاسر

sara_zead

#البارت_الأول

الكاتبة : سارة الشمري🖤

‎كالنقطة أنت في آخر السَطر لا أحد بعدك .
.
كاعدة وعيوني لكدام تباوع بالفراغ ونضراتي ما بيها غير الضياع والخوف من المستقبل ومن الي جاي وحاسة بإشتياق وكره بنفس الوقت ....

التفت علية وهو يسوق ونبرة صوتة بيها خوف علية يالله شكد جنت مشتاقتلة : اموني تردين امر اجيبلج شي من الطريق .. خاف جوعانة

ابتسمت على كلمة (اموني) هه صارلي هواي مسامعتهة ... جاوبتة : لا ما اريد شي بس اريد اوصل للكوت بسرعة

ابتسم وكأنة يطمني : لا تخافين محد راح يكدر يقرب منج مادام اني موجود

بادلتة الابتسامة : واني متأكدة من هالشي

التفت هو يكمل سياقتة واني رفعت نضري كدام
ورجعت راسي عالكشن ونزلت الجامة وخليت الهوى يدخل للسيارة اخذت نفس قوي بكل ما بية من حيل مع ان حاسة ان حيلي وقوتي انهدت
... شميت الهوى وجريت نفس قوي حسيت ان ريتي انملت من الهوى يالله من زمان مماخذة هيج هوى نضيف بريتي جنت كل نفس اخذة يكون مصحوب بشهكة لو بخوف لو رجفة .... حاولت شكد ما اكدر اخذ نفس عبالك مراح اكدر اتفس مرة ثانية وراح ياخذون الاوكسجين مني
رجعت راسي عالكشن وغمضت عيني وحل السواد بعيوني وسمحت للذكريات تحتل عقلي الي اصلا مفارقتة ولا لحضة

رجعت لقبل سنة من اليوم

باليوم الي اجانا بي الخبر الي دمر حياتي

جنت كاعدة وية ماما و اخواتي وهستوني جاية من المدرسة وتعبانة من الدوام وصوت الهوسة مالي البيت جان بوقتها اختي الي اكبر مني هستوها جايبة وباقية يمنة فترة وتروح لبيتها واني واختي الزغيرة وماما موجودين
وفجأة منسمع غير دك سريع عالباب 
ماما : يا ستار شكو ... كومي ميامين شوفي منو بالباب
رحت اركض وحطيت الحجاب على راسي وحجيت من ورة الباب : منو ...
: ميامين افتحي الباب اني ورود
فتحت الباب بسرعة دخلت وهي تلهث ومبينة جاية تركض : شبيج ... ليش تركضين خوفتينا وكسرتي الباب
ورود وهي كوة تجر النفس وتحاول تحجي وحجية متقطع ومبينة خايفة : مييــ ا مين مــ...مصيبة ولج
حجيت بخوف : ورود لا تخوفيني احجي شكو
طلعت ماما علينة للحوش : ها ورود عمة شبيج تلهثين ووجهج احمر صاير شي
ورود : عمة الحكو على رائد بالمستشفى ومتصوب
ماما عاطت وضربت صدرها : يمممممة ابني ولج ورود شتحجين منو كلج هالحجي
اني من حجت وكلمتها ترن بأذني لا يربي كلشي ولا رائد ما الي سند غيرة دخيلك يا الله
ورود : عمة والله سمعت احد اتصل على ابوية وسمعتة ايكول تعالو رائد بالمستشفى وبعدين سمعت ان تصاوب مدري ميت واني مباشرة اجيت عليكم لان ابوية كلي روحي ركض لبيت عمج شوفي حسان موجود بالبيت لو لا وصيحي
طبعا امي وكعت بالكاع وكامت تلطم اني ابد مو يم العالم اخواتي طلعن وسمعن صوت امي
اني طلعت اركض من باب البيت وبملابس المدرسة وبس الشال على راسي رحت اركض وورود طلعت تركض تصيح وراي لان طلعت بدون عباية
اني بالي ابد مو يمها اركض وكلساع اصدم بشخص من زحمة الشارع بالطلاب الي هستوهم راجعين من المدارس
بيت عمي بعد شارعين عنا وصلت الهم ودخلت لكيت مرت عمي (خالتي) تبجي
كتلها : عمة وين راح عمي وين زياد وين راحو
التفتت علية وكالت : راحو للمستشفى اجاهم اتصال وايكولون يمكن .... وصارت تبجي ومكدرت تكمل كلامها
رحت يمها وهزيتها من كتوفها : احجي يمكن شنو
رفعت راسها : كالو يمكن مات
حسيت كأن احد ضربني ضربة قوية على راسي : لا جذب ماكو هيج حجي رائد ميعوفنا هو سندي بهالدنيا مستحيل يعوفني بدون سند
صرت ابجي بهستريا واصيح يااااربي لا تفجع كلبي بي اخذت مني ابوية لا تاخذ مني رائد مالي غيرة ياااارب
حاولت ورود تهديني بس ماكو فايدة حسيت عكازتي طاحت ومبقى شي اسند نفسي علي بقيت ادعي بكلبي يارب دخيلك لا تاخذ مني اغلا شخص على كلبي
ورود : كومي ميامين اختج زينب اتصلت اتكول امج تخربطت تعاليلها بسرعة
فزيت وطلعت اركض ووية طلعتي وصلت للباب وصار زياد بوجهي
رحتلة بخوف : زياد فدوة وين رائد
زياد بعصبية : وين تردين تطلعين بدون عباية ... شنو اجيتي من بيتكم هيج
ميامين بعصبية اكبر : هسة هذا وكتك انت تحاسب رائد وييييييين
بعدة محجة شي ودخلت شهد (اختي الزغيرة) وتبجي : ميامين فدوة الحكي لماما بس تعيط وتبجي وتريد رائد
ردت اطلع وحسيت ايد قوية لزمتني من زندي : ويييين حلالج الوضع بدون عباية انوبة هم تردين  تطلعين بدون شال
جريت ايدي منة حيل بعصبية وحطيت شالي على واسي وطلعت اركض
وصلت لبيتنة لكيت ماما تبجي وتكطع بروحها : ولج يمة راح وليدي ليش يمة هيج تكسر كلبي عليك شعندي غيرك يبعد امك .. اول وليداتي راح مني دخيلك يا علي احميلياه

اني شفت ماما هيج انهاريت بالزايد ووكعت ابجي بالكاع بس خفت على ماما رحت جبتلها علاج للضغط وكوة اخذتة وتريد تطلع وكوة لازميها اتصلت على اخوية حسان الزغير بس ميجاوب اتصلت على جهاز رائد يمكن احد يرد او هو اي باقي عندي امل ان ما بي شي لان هو وعدني يبقى وياي (اسلمج بأيدي لزوجج واجر اذنة يلة ) هذا كلامة
اتصل ومحد يرد حتى عمي وزياد محد يجاوب بقينا على نار
اجت عمة وورود يمنة وكتلها شكال زياد من اجة كالت ماكال شي طلع مستعجل وعصبي
كعدنة الي تبجي والي تبجي وتدعي
صارت الساعة ٧ بليل ومحد اجة او اتصل واحنا كاعدين على نار
شوية وجان تندك الباب احنة كلوبنا صارت تدك اقوى من الباب
طلعت اني اركض وفتحت الباب انصدمت ...........

الكاتبة : سارة الشمري 🖤

#البارت_الثاني

الكاتبة : سارة الشمري 🖤

يرضع الطفل من أمه حتى يشبع، ويقرأ على ضوء عينيها حتى يتعلم القراءة والكتابة، ويأخذ من نقودها ليشتري أي شيء يحتاجه، ويسبب لها القلق والخوف حتى يتخرج من الجامعة، وعندما يصبح رجلاً يضع ساقاً فوق ساق في أحد مقاهي المثقفين ويعقد مؤتمراً صحفياً يقول فيه: إن المرأة بنصف عقل!
وليم شكسبير

طلعت اني اركض وفتحت الباب شفتة واكف بطولة وما بي شي اني ما صدكت مباشرة حضنتة وصرت ابجي بصوت واشهك بصوت عالي : ليش هيج سويت بينا والله اني كلت رائد مستحيل يعوفنا
شفتة ساكت وما تحرك وحتى ما حضني رفعت راسي شفتة عيونة حمر ومبين باجي
وهستوني انتبهت لقميصة كلة دم بس ناشف واكو دم على ركبتة وجروح براسة وشفايفة بيها زراك وشوية دم من جوة
هاي التفاصيل ما انتبهت الها اول ما شفتة كل الي همني ان واكف كدامي بطولة

طلعت ماما تركض حضنتة وصارت تبجي وهو نفس الشي ما تحرك يالله شبي ... مو مهم المهم ان بخير
طبعا دخل وراه عمو ووياه زياد وحسان الي ما انتبهت لوجودهم ابد
حسان اشرلي البس حجابي ولبستة ودخلت خصلات شعري الي واكعة على كصتي بالحجاب

دخلو للصالة
ميامين : حسان فدوة شبي رائد ليش هيج صاير بي وليش كلتولنا ان مات
حسان : مو رائد الي مات .... فارس
شهكت وحطيت ايدي على حلكي من الصدمة التفتت على رائد الي سمع جملة حسان وطاحت دموعة وصار يبجي حط راسة بين ايدي وبجى بصوت عالي
يالله يعني لهالسبب هو مصدوم ومنهار لهالدرجة

رائد يبجي واول مرة اشوفة بهالحالة حتى من مات بابا ما بجى هيج : فارس مات بيدي .... ما كدرت انقذة ... مات بحضني .. كلة من وراي ... اني السبب .... هو ما الة دخل ... حاول يمنعني واني عاندت وخسرتة

جان يحجي بحجي متقطع وبأنهيار وحجية ممفهوم
طلعت مكدرت ابقى واشوفة هيج ضعيف ويبجي

خل اعرفكم بنفسي
اسمي ميامين عمري ١٨ سنة صف سادس علمي اني كولش شاطرة وبية صفتين عنيدة وذكية
وبنفس الوقت هادئة احب اقرة كتب وخصوصاً روايات الحب وروايات اجاثا كريستي مادري شنو الربط بينهن لان هاي حب وهاي قتل وجرائم مادري المهم اني شكلي حلو ومثل متعرفون بنات الكوت حلوات واصلا عندي عرق كردي بيبيتي ام امي كردية وجانت تخبل واني وشهد اختي ماخذين شكلها وخاصا الحفرة (غمازة) الي بالحنج وشامة جوة الشفة بنص حنجي عيوني كبار ولونهن اسود وعندي خدود يعني مو ضعيفة وهم مو سمينة يعني مربربة شوي وبيضة كولش
اخوية رائد اكبر مني ب ١٢ سنة اعتبرة ابوية مو بس اخوية وكلشي بحياتي هو درس الجامعة مالتة بالبصرة لان جانو بيت عمي عايشين بالبصرة وهو يمهم وهناك تعرف على صديقة فارس الي صارو اكثر من اخوان ميمر اسبوعين ولازم يتشاوفون حتى من خلص دراسة ورجع للكوت وهو يخابرة ويروحلة او مرات فارس يجي.... يجي بالشهر مرتين او تلاثة
وهو حباب وخوش ولد ومن توفى بابا هو ابد ما عافة وبقى واكف وياه صارت علاقتهم ينضرب بيها المثل ودوم ايكول هذا اخوية الي مجابتة امي

اختي الجبيرة اشواق متزوجة وعندها ٢ ولد ومو دائما تجينة
واختي الاصغر منها زينب هم متزوجة وهستوها صار عدها ولد وباقية يمنة كم يوم وتروح

واخوية حسان اكبر مني ب ٤ سنوات يدرس جامعة وملتهي بنفسة مو نفس رائد

واختي الزغيرة شهد عمرها ٧ سنوات بس لسانها طويل وماخذة صفة العناد مني هي كولها على بعضها تشبهني بالشكل نسخة مني وحتى غمازة الحنج وشعرها طويل واسود مثل شعري اني ما اخليها تقصة

رحت لغرفتي وسديت الباب وكعدت ابجي
ابجي على حال اخوية الي يبجي الصخر لو ابجي على فارس خطية الي راح بعز شبابة الله يساعد اهلة لو ابجي على الهبطة الي اكلناها يالله شجان صار بينا لو الخبر طلع صدك والله اموت وراه

باوعت عالساعة شفتها صارت ب ١٠ بليل شبسرعة مر الوقت
طلعت من غرفتي شفت ماما كاعدة بالصالة : ها ماما وين رائد
ماما : كوة نام وبس يبجي حتى ما كدرت افتهم منة السالفة بس ايكول كلة من وراي
كعدت يمها : اكيد راح يتأثر هذا فارس لو نسيتي
ماما : والله ما ناسية حتى اني جنت معتبرتة مثل ابني بس يمة خايفة على وليدي لا يسوي بنفسة شي وهو يلوم بروحة
ميامين : لا تخافين ماما ترة رائد اقوى من هيج بس هو هسة بعدة بحالة صدمة وان شاء الله راح يتعدى هالمرحلة
ماما : انشالله يارب التفتت علية يلة ماما انتي هم روحي نامي وارتاحي اخواتج نامن وانتي بعدج
ميامين بست امي براسها : ماشي ماما تصبحين على خير
ماما : وانتي من اهلة حبيبتي

رحت لغرفتي تمددت وغمضت عيوني ومن التعب نمت مباشرة

كعدت الصبح الساعة ٧ غسلت وبدلت ملابسي وطلعت
لكيت ماما كاعدة بالصالة واختي زينب يمها : صباح الخير
الكل: صباح النور
ميامين : رائد كعد لو بعدة شلون صار
ماما : رائد طلع من الصبح للمستشفى
ميامين بدهشة : شنوووو طلع وهو بهالحالة ليش خليتو يطلع وبعدين شعندة رايح للمستشفى
زينب : اتصلو علي علمود حادثة البارحة ولازم ايكون موجود
ميامين : وشكو يروح شنو ميكدرون يأجلوها وبعدين هو الولد مات قابل شيسوولة بعد
ماما : شلون شكو رايح غير يردون يعرفون منو الي قتل فارس
ميامين فتحت عيوني : قــــــــتـــّــل ؟؟؟؟؟؟
زينب : اي قتل لعد انتي شعبالج
ميامين : عبالي حادث سيارة لان حتى رائد متأذي يعني عبالي هذا سبب الاصابة
زينب : لا مقتول بالسلاح
ميامين : يمممة عززززا منو الي تجرئ يسوي هيج .. يعني ليش يسوون هيج همة شعندهم وياه
ماما : والله ما ندري هو هذا الي نريد نعرفة
حطيت ايدي على خدي واني افكر بالموضوع
افففف هي مال مدرسة شمرت الجنطة ورحت ابدل ملابسي بدلت ورجعت كعدت
ماما : ليش مداومتي ميصير تغيبين ترة انتي بكلوريا
ميامين : عادي ماما يوم واحد ميأثر
ماما :ماشي لعد كومي تريكي ميصير تبقين هيج
ميامين : لا ماما مجوعانة
ماما : لا امي كومي تريكي ميصير تبقين ع لحم بطنج
كمت للمطبخ طلعت صمونة ودهنت بيها جبن واخذت كوب جاي وكعدت اتريك
وانتي اكل وسمعت صوت الباب اكيد اجة رائد
عفت الكوب ورحت اريد اتطمن علي
شفتة دخل ويريد يروح لغرفتة
وكفت بوجهة : رائد حبيبي انت بخير
ابتسم ابتسامة خفيفة بيها انكسار والم وسخرية بنفس الوقت: بخير ؟ هه اي بخير
لزمت ايدة بترجي : رائد الله يخليك لتحرمنة منك والله احنة منكدر نعيش بدونك فدوة ارجعلنا مثل قبل لمن تدخل للبيت تضحك وبعدك بالباب وتصيح اموني
شفتة تعاطف وياي وحط ايدة على خدي : ترة مو سهل الي ينكسر ومستحيل يتصلح ..... ومن نفقد اشخاص جانو همة سبب وجودنا ... اني فقدت ابوية بس الي عوضني وصبرني فارس وهسة فقدت فارس منو بقالي يصبرني .... اموني لا تضغطين علية لان صعبة ارجع مثل قبل بسهولة

دنكت راسي وهو عافني ودخل لغرفتة
رجعت لغرفتي وبجيت وافكر بكل كلمة كالها
رائد صار النا الاب من بعد وفاة بابا وصار هو الي يواسينا ويوكف ويانة وينسينا تعبنا وتفكيرنا ان صرنا بدون اب ابد محسسنا بهالشي
بس احنة مفكرنة بي نفس الشي مفكرنة هو هم جان محتاج الشخص الي يصبرة ويصيرلة اب واخ ويوكف وياه احنة جان همنة انفسنا وبس
بس فارس الي جان يصبر رائد ع وحدتة

وهسة هو فقد فارس يعني فقد ابو للمرة الثانية
صرت ابجي يالله شكد انانية اني مفكرت غير بنفسي جنت كل ما اوكع بمشكلة اروح لرائد بس ولا مرة سألتة اذا عندة مشكلة او يريد شي

مادري شكد بقيت افكر وابجي لحد ما اذن الضهر يالله صارلي هواي بغرفتي محسيت عالوقت
كمت توضيت وصليت ودعيت لرائد ودعيت لفارس بالرحمة
رحت تمددت وغفيت مباشرةً لان كاعدة من الصبح

فزيت ع دك قوي ع الباب الخارجي
باوعت للساعة جانت ب ٣ الضهر كمت من نومي
وطلعت اريد اشوف شكو
طلعت برة وشفت رائد واكف بالباب وشكلة يريد يطلع بس اكو احد ديحجي وياه برة وسمعت هالجملة وبس
( انت رهن الاعتقال بتهمة قتل المدعو فارس عبدالله الجاسر)

الكاتبة : سارة الشمري🖤