رواية سجينة الظلم والانتقام الفصل الخامس عشر 15 - بقلم طبيبة الاحساس

#سجينة_الظلم_والانتقام 🍂🥀

#البارت الرابع عشر

#الكاتبة : سارة الشمري🖤

أشتم صديقك في الخفاء و لكن امدحه أمام الآخرين
مثل إيطالي

بققت عيوني واني اشوفة ذب البدي وزاد من سرعة الضرب عالكيس

عززززاااا.... سديت البردة بسرعة ... خدودي صارن حمر مادري ليش ...

وقاطعني فجأة الباب الي انفتح : ميامين

وخرت بسرعة عن البردة : ها خاتون

خاتون شافت ايدي واجت علية : شبيها ايدج ... شنو هم رجع ضربج ... اني لازم احجي وياه

رادت تطلع بس اني لزمتهة : لحضة خاتون ... هالمرة مو غزوان والله
باوعتلي بأستغراب : لعد منو سوة بيج هيج
ميامين : اني جرحت ايدي ... المراية انكسرت واني كعدت الم بالكزاز وانجرحت ايدي

خاتون وهي لازمة ايدي : يروحي ... سلامتج ... خو ما تأذيج هسة
ابتسمتلها : لا ما تأذيني ... شوية احسن
خاتون : ماشي لعد تعالي ننزل نكعد جوة ... مها سوت كيك واني جبتلج منة ... تعاي تذوقيها تاكلين اصابعج وراهة
ميامين واني امشي وياها وهي تسحبني : صدك جذب جايبتلي من كيك مها
خاتون : اي متدري بية من جبتة
ميامين بشقة : خاف حاطتلي بي سم لو شي
خاتون : يلة عاد مو لهالدرجة ... لو تدري بية راح اجيبلج منة جان حطت بي سم ... بس هي متدري

ضحكت عليها وكعدت اكل كيك ... بصراحة فد شي خورافي ... اطيب من كيك السوك وخاصة بي جوز

خاتون : ها شلونهة الكيكة
ميامين : تردين الصراحة الصراحة
خاتون : اي اي الصراحة الصراحة
ميامين : الكيكة ترد الروح عكس صاحبتهة
خاتون ضحكت : بهاي عندج حق ... هي فنانة بصنع الكيك والحلويات

خاتون بهالفترة صارت كولش قريبة مني وكل يوم تجيني
الشي الوحيد الي مونسني هنا هي خاتون ... حبيتها كولش وتعلقت بيها ... باليوم الي ما تجي بي اقلق عليها
صارت مثل اختي وخاصاً هي تنحب بسرعة
مرات تتعارك وية غزوان علمودي ... بس تسكت مرات لان تخاف منة وما تكدرلة
عنيدة كولش هي لان غزوان كم مرة ايكوللها لا تطوخين علاقتج بيها قصدة علية ... بس هي اتكولة هالشي راجعلي واني ارتاحيتلهة

صارت تسولفلي عنهة ... وسولفتلي عن حياتهة
وان جانت مخطوبة وفسخت الخطوبة بس ما مهتمة هي لهذا الموضوع

بقت يمي بيومها للساعة ٩
غزوان طلع ورجع الساعة ١٢ بليل

اني جنت كاعدة بالصالة منتضرتة
هو دخل شافني .. ما اهتملي وصعد كبل لغرفتة

رحت تمددت على فراشي ومن التعب غفيت

كعدت الصبح غسلت وبدلت ونزلت
مثل كل يوم ادخل لغرفتة وانضفها واعزلها واخلي غراضة بمكانهة الصح لان اذا شافهن مموجودات
اخذ كم فلقة بالحزام

نزلت نضفت الصالة واني الم ايدي يزيد بس ما اكدر اعوف الشغل لان اعرفة يريدهة حجة

خلصت تنضيف وسويت غدا

ورة نص ساعة تقريبا دخل وهو يركض وراح لجهة الغرفة الجبيرة الي لحد الان ما داخلتهة لان هو ما يسمحلي
هو الوحيد الي يدخلهة ويبقى بيها بالساعات حتى ما عرفت شنو هي بالظبط
دخل للغرفة وورة دقايق طلع شايل بيدة سلاح .... عزززززة ....

راح للغرفة مالتة وورة شوية طلع مبدل ملابسة ولابس دشداشة سودة ولابس حزام السلاح ولاف جراوية لونها رمادي على راسة

طلع من البيت بسرعة ... اني متت من الخوف ... يمة هذا وين رايح بهالشكل ... حتى ما كدرت اوكفة مو بعيدة يحط الطلقة براسي ويكمل دربة

بقيت افتر بالصالة رايحة وجاية ... ادور خاتون اليوم ما اجتني وهذا الشي اكدلي ان صاير شي ...

بقيت الوب ... خفت علي خاف يصير بي شي

يربي هسة شسوي ... والله ضل بالي
اففف شدعوة عليج ميامين هالكد حبيتي ... خلي شيصير خل يصير
صارت الساعة ب ٤ عزااا هذا وين صار
وخاتون هم ماكو

شسوي هسة اني ... صفنت شوية وكلت
خلي يموت ... قابل اني شعلية اصلا ارتاح منة وارجع لاهلي ...
بس لا خطية اهلة ... يعني هستوهم فقدو ابنهم ادور الثاني ... لا سمالله علي بعيد الشر

التفتت اباوع لجهة الغرفة الي طلع منهة
الله اليستر كلشي يطلع منج ... ادوية وعلاجات يطلع منج ... اسلحة ... ملفات ... والباقي بعدني ما شايفتة مطلعة من هالغرفة
ورة ساعة تقريباً هو دخل
رحتلة اركض ووكفت كبالة : وين صرت ضل بالي

باوعلي بأستغراب : ومن شوكت يضل بالج علية من اطلع
ميامين : شلون ما يضل بالي وانت من الضهر طلعت بسلاحك ولهسة ماكو
غزوان وهو يحط السلاح بنص كصتي : لو تشوفيني طالع بقذيفة ومن غبشة الله انتي تصمين حلكج وتكعدين عادي وما تدخلين ... صار معلوم

ميامين هزيت راسي من الخوف : اي اي شعلية اني ... عسى ما تطلع بمدفع اني اكعد وانجب بمكاني
دفعني بالسلاح من كصتي لورى : عفية ... وهسة ولي جيبيلي شي اكلة لان من الصبح ما ماكل شي

هزيت راسي ورحت اركض ... ما انتبهت ان حجيت بصوت عالي : يممممة والله يسويها ويضربني طلقة براسي مو بعيدة
غزوان بصوت عالي : واحط عشر طلقات وياها ... ترة اسمعج ... عوفي اللغوة وبسرعة جيبي الاكل

حميت الاكل عالسريع وحطيتة بالصينية ورحت للصالة
لكيتة متمدد وغافي عالقنفة ... مبين التعب واضح بوجهة
حطيت الصينية عالطبلة يمة ومشيت على اطراف اصابعي لا يكعد
طفيت اضوية الصالة ورحت للغرفة مالتي
افف شلون حيمر الوكت علي واني هنا
لا تليفون ... لا بشر .. لا اهل ... لا تعامل بي حظ
يمكن سنتين لو تلاثة واموت قهر .. خل اموت والله احسن ... همة يرتاحون واني ارتاح
بعدين استغفرت ربي على هالكلام وكلت الحمدالله على كل حال

اندك الباب وبعدين فتحتة
خاتون : ميامين ... شنو نايمة
ميامين : همزين خطرت على بالج ... تعالي كاعدة
خاتون وهي تكعد يمي : ميامي اسفة ... بس اليوم صارت مشكلة
ميامين : هو اني ردت اسألج ع الي صار .. لان غزوان طلع بحالة تخوف هو وسلاحة
خاتون : ايي .. صايرة عركة هادين على بيت عمي
ميامين : عزززة ... ليش هادين عليهم
خاتون بدون نفس : ابن عمي الي جان خاطبني متحرش ببنية واهلها جايين بأسلحتهم وهادين
ميامين بأندهاش : متتتحررررش ... شنو ميستحي هذا
خاتون : اي ميستحي ... يومية مسويلة سالفة وية العالم
ميامين : يمعودة همزين الله خلصج منة

خاتون : شخلصنة منة يومية متمشكل ... واليوم البيت انكلب ... امي شافت مؤيد اخذ سلاحة وطلع وشافت غزوان وياه بقت تلطم خافت يصير بيهم شي مثل فارس سمالله
ميامين بسرعة بدون وعي : لا يمة سمالله علي
خاتون ابتسمت وبكتفها ضربت كتفي : اااااه خايفة علي شنو ولج
ميامين : اي لعد ليش ... قابل شعندي وياه
خاتون : هذا كلة وشعندج وياه
ميامين : هو يسوي هالشي علمود اخوه ... فكرت بكلامج واستنتجت ان صح ... لان هو يمكن المة اكبر من المي لهالسبب ما يحقلي الومة ... هو مثل ما كلتي عندة جانب حنون ما يريد يضهرة الي ... بس هو بدون ميدري بنفسة اني جاي اشوفة هالجانب منة ... وحبيت هالجانب
خاتون بققت عيونهة : حــبــيــتي ؟؟؟
نزلت عيوني : مادري
خاتون رفعت راسي : رفعي راسج وحاجيني ... حبيتي لغزوان
استغربت نبرتهة وكأنهة معصبة : خاتون كتلج مادري ... شبيج عصبتي
خاتون وتفرك بوجهة : شتحسين ... احجيلي ... شلون حبيتي ... اقصد اذا شفتي شنو شعورج ... لا تخافين احجي بس اريد افتهم
ميامين بلعت ريكي : مادري شنو شعوري ... يعني ما اكدر اوصفة ... يعني هو يضربني ويعذبني ومن يطلع من البيت اريدة يرجع ... طول الوقت بالي يمة ... ومن يأذيني بشي ويجي بعدين يداويني احسة شخص ثاااني ... كلبي احسة يريد يطلع من مكانة ... يمكن من بعد كلامج الي كلتي الي بالبلكونة تولد بكلبي هالشعور ... والبارحة ماكدرت اسيطر على نفسي وحضنتة لان جنت ابجي وهو عصب وطلع
خاتون كامت من الجرباية بعصبية : يالغبية انتي حابتة لغزوان
ميامين : لعد ليش معصبة ... خاتون شبيج
خاتون : وادور تسألني ليش معصبة ... وج هالحب مو من صالحج راح تتعذبين اكثر ... عذابج راح يبدي هسة ...
كمت واني خايفة : شقصدج خاتون ... لا تخوفيني
خاتون : وج شأخوفج بعد ... تدرين لو غزوان عرف بهالشي شيصير ... راح تنكلب الدنيا ... هو جايبج لهاللبيت حتى يكرهج بي وبالعالم وبروحج ... بس انتي اذا حبيتي راح يصير ما يهمج اي شي ...

كعدت بالكاع وحطيت راسي بين ايدية : والله مو بيدي خاتون ... ماكدرت والله
خاتون كعدت بالكاع كدامي وحطت ايدهة على ايدي ورفعت راسي : ميامين ادري مو بيدج هالشي ومتأكدة ... بس ديري بالج غزوان يعرف هالشي ...

ميامين : لا مستحيل اخلي يعرف ... اصلا اذا ما كتلة شلون راح يعرف ...
خاتون : اييي شلون راح يعرف مو .... هستوج اتكولين ما سيطرت على نفسي وحضنتة
حبيبتي ترة غزوان ذكي ويلكطهة وهي طايرة ... يعني من تصرفاتج يكدر يفهم هالشي
لهالسبب انتبهي لتصرفاتج وتحكمي بنفسج ... لان اذا عرف غزوان هالحب راح ينكلب ضدج
طاحن دموعي ومسحتهن : طلع زقوم مو حب
حضنتني خاتون : ميامي اسفة بس والله احجي علمودج ماريدج تتعذبين اكثر واني اعرف اخوي زين
ميامين : ادري والله دا تحجين علمودي ... اصلا كلامج صح ... اني غلطت لمن حبيتة
خاتون : هسة كومي مسحي دموعج وخلي ننزل جوة نلهي نفسنة بشي احسن من كعدة البجي

غسلت وجهي ونزلنة لكيتة ماكل من الاكل وطالع
شلت الصينية وغسلت المواعين وخاتون يمي

خاتون : على فكرة ميامين طبخج طيب كولش .. شوكت تعلمتي تطبخين
ميامين : من تزوجت اختي الاكبر مني اضطريت اتعلم الطبخ لان امي مريضة وتتعب بسرعة ... صرت اني اطبخ الهم ...
خاتون : نيالج ... اني مو كولش اعرف اطبخ
ميامين بضحكة : تردين اعلمج
خاتون : ايي على يوم انشالله اجيج وتعلميني
حطيت العشا اني وياها وتعشينة
وكعدنا نسولف
ميامين : خاتون ... اريد اطلب منج شي .. فدوة حاولي تساعديني
خاتون : كولي ميامي اذا كدرت اساعدج
ميامين : فدوة دبريلي طريقة احجي بيها وية امي ... خاتون والله اكيد هسة هي كلبها باقي يمي
خاتون نزلت راسهة : ميامين والله اتمنى اساعدج بهالشي ... بس غزوان محلفني بداعة فارس وشارط علية اذا اريد اجي هنا ان ما انطيج تليفون وما اساعدج تطلعين من البيت ... واني وافقت بس حتى ما يمنعني اجي يمج

ميامين بترجي : خاتون والله مـــ....

قاطعني صوت جاي من الصالة
اني ما عرفت صاحبة الصوت بس خاتون فزت من كرسيهة
خاتون : امــــي .... شـــجــــابــــهــة هــنــا

الابطال👇🏻

الكاتبة : سارة الشمري🖤

#البارت_الخامس_عشر

#الكاتبة : سارة الشمري🖤

يسيئ إلى نفسه دوما من حارب عدوا ليس لديه ما يخسره
مثل إيطالي

قاطعني صوت جاي من الصالة

اني ما عرفت صاحبة الصوت بس خاتون فزت من كرسيهة
خاتون : امــــي .... شـــجــــابــــهــة هــنــا

كمت من مكاني : اممممج
خاتون : اي هذا صوت امي ...
سمعنا صوت غزوان وهو ينزل من الدرج : هللة يممة ... تفضلي

واكفين اني وخاتون اباب المطبخ ما شفتهة منطيتني ضهرهة

كعدت عالقنفة وغزوان انتضرهة تكعد يلة كعد
كاللهة : شضيفج يمة ...
ام غزوان : ماريد شي ... اجيت اشوفك لان من بعد العركة ما مريت علي وكلت خافن بيك شي ...

غزوان وهو ينزل يكعد كدامهة ويبوس ايدهة : لا يضل بالج يمة ... بخير شوفيني كدامج
ام غزوان : الحمدالله يمة ... جا اني شريد غير سلامتكم ... يحفضكم الي ويرحم اخوكم انشالله
غزوان : امين يمة امين
ام غزوان : جا خاتونة وين ... شو من مساع مشت وماجت عالعشا
غزوان وهو يلتفت لجهة المطبخ وشافنة واكفين بالباب : هاي خاتونة واكفة وراج

كامت امة وتريد تمشي التفتت على خاتون وشافتني يمهة
انطتني خزرة خفت منها حجت وية خاتون وهي تأشر علية : عايفة البيت وكاعدة يم هالفگر بت الفگر
خاتون : يمة ميامين شعليهة
ام غزوان بعصبية : انتي ما غير على لسانج بس شعليها ... ولج اخوها الكتل اخوج بيدة
خاتون : ماما انتي كلتيها اخوها مو هي
ام غزوان : جا هي وحد شني ... هم نفس اخوهة ناكرين للأيد التنمد الهم ... ما شايفين خير

ميامين لاول مرة احجي : اخوي عمرة ما نكر معروف لاحد ... وما عمرة طمع بشي
ام غزوان : والج عين تحجين يبت الــ####
اخوج استغل طيبة كلب ابني ... ولج جان يجيني يتوسل يمة اني ورائد نريد نسوي مشروع فدوة بس دبريلي فلوس ... يمة رائد هيج وهيج كال ... طاير يجيني عبالك شو اشايف ... تالي اخوج ما صار بعينة وكفات ابني ... كتلة بيدة كتل وليدي بيدة ... طمع بمشروعة ... خايبة لو ماخذ املاكنة كلهة ولا كاتل ابني ..

خاتون رديت عليهة بعصبية : اخوي عمرة ما جان هيج ... ما عمرة فكر بحلال غيرة ... الفلوس جانت اخر همة ... لا تتهمون اخوي بضلمكم ... انتو تبليتو علي ... اخوي ما قتل فارس
ما لحكت اكمل كلمتي الاخيرة الا شهكت من الالم

من ضربتها على حلكي بضهر ايدها : اسم ابني لا تجيبينة على لسانج ... ترة وروح فارس ما ارحم بيج عضم
دفعتني حيل وطحت بالكاع : وخري من وجهي بت الــ####
طلعت من البيت وخاتون رادت تكومني
بس غزوان الي طول الوقت واكف وساكت صاح بيها بعصبية : خاتووووون ....
ميامين كلت لخاتون : روحي ورة امج اني اكوم
راحت خاتون ... ردت اكوم بس كومني هوة من شعري جرة بيدة حسيتة تكطع
صرخ بوجهي بكل عصبية : انتي تردين بوجه امي
خاتون : غزوان فدوة ... والله ماكدرت اسمعها تحجي على اخوي وما ادافع عنة
جنت احجي وهي يسحبني وياه للمطبخ ... سحلني سحل وولا عبالك احجي شي
دخل للمطبخ : فدوة والله اسفة ...
شمرني بالكاع
جان اكو شموع موجودة بالمطبخ للزينة كولش كبار
اخذ وحدة منهن وشغلها بالجداحة
شمر الجداحة بالكاع وسحب ايدي

ميامين واني ابجي : فدوة غزوان لا .... دخيلك لا تسوي هيج ... عاقبني شلون ما تريد بس مو بالحرك فدوة
غزوان بعصبية : وربج ما ارحمج .... الج عين تردين بوجه امي ... ولج هاي امي ... اذا تكلج شي ما تكليلها غير تأمرين ... شما تحجي ما تردين بوجهة ...سممممعتي
حجيت بسرعة واني اهز راسي واناشغ من البجي : اي اي والله ما اعيدهة ... فدوة لا تحركني
غزوان : مو بهالسهولة
سحب ايدي واني حاولت اسحبها بس هو لازمني اقوى
قرب الشمعة على ساعد ايدي
صرخت صرخة من قوة الالم حسيتها اخذت روحي : اااااااااه
وهو مستمر حاط الشمعة على ايدي
فرفحت من البجي وهو لازم ايدي بكل قوتة
كل محاولاتي بأن اسحب ايدي منة فشلت
حسيت ايدي راح تنشل من قوة الالم ... فقدت الامل بأن بفك ايدي

لزمت ياخة الدشداشة مالتة وقربت منة
حطيت حلكي بكتفة وصرخت : غــــــزوااااان ...
هو بسرعة شمر الشمعة بالكاع ... واني بعدني اصرخ من الالم

دفعني بالكاع حيل وطلع
بقيت اصرخ بالكاع وابجي واناشغ ... حاطة خدي بالكاع واضرب بأيدي الثانية عالكاع واصرخ من الوجع ....احس ايدي انشلت من الالم ما اكدر احركها
كمت من الكاع واني افتر بالمطبخ وابجي : ااااه ... يمممة وينج ... تعاليلي فدوة ... والله راح اموت ... اااااه
اباوع لايدي صايرة كلها حمممرة وشي تذب دم وسودة من ورة نار الشمعة

الم فضيع .... احس راح اموت بأي لحضة
انتو سامعين ان اقوى الم بالعالم هو الم الحرق ماكو اي الم ممكن يكون اقوى من الحرق ويجي بعدة الم الولادة
بقيت افتر بالمطبخ واناشغ وابجي اضرب عالطبلة من كثرة الالم : اااااااه يا ربي ساعدني ... مالي غيرك
ردت احط عليها مي بارد لان احسها مشتعلة نار من الالم
ترست الكلاص مي بارد من البراد
ايدية ترجف وابجي طاح الكلاص من ايدي وانكسر
كعدت بالكاع وانهاريت من البجي : اااااه يمممة ...
ابجي من وجع كلبي لو من الم ايدي
كعدت اناشغ بالكاع وايدي احس الالم انتقل لكل جسمي
غوشت عيوني ... ما حسيت بشي بعدهة

فتحت عيوني واني اشوفة كدامي واكف بعيد عني
حجيت واني امد ايدي بأتجاهة : رائـــد
واكف يبتسملي
حجيت برجاء : رائد اخذني وياك فدوة لا تبقيني هنا
ابتسملي وفتح باب الغرفة طلع
كمت واني اشوفة يروح صرخت وراه

فزيت من نومي بسرعة : رائـــــد
كمت من مكاني لنفس المكان الي جان واكف بي
بالغرفة
كمت من جربايتي بسرعة اريد الحك رائد
بس حسيت ايدين حاوطت خصري
التفتت شفتة وصرخت : عوووفني ... وين رائد .. هسة جان هنا ... وخر عني
غزوان وهو يكعدني عالجرباية : اهددددي ... هذا كابوس
صرخت بي : انت كابوس ... رائد مو كابوس ... وهسة تشوف راح يجي ياخذني

غزوان : اهددددي ميامين ايدج
انتبهت لايدي ملفوفة ... اكيد هو لافهة
كمت احاول افك الشاش بقسوة
غزوان وهو يلزم ايدي : اوكفي شجاي تسوين .. تسودنتي
حجيت بعصبية كلشت واني اجر بيدي اريد افكة : عوفني معليك بية ...
غزوان بعصبية : ميامين عوفي الشاش بي علاج لا تتزلغ ايدج
تخبلت بالزايد : ماريد علاجك ... اني اريدها تتزلغ ... اني اريد اتألم ... حتى من اتألم اكرهك بالزايد ... ماريد انسى المهة
غزوان : لا تخافين ما راح اخليج تنسين الاآمي ... اذا طاب مكان بجسمج ... اسوي جديد ... بس المهم ما تنسين
كمت ابجي بالزايد : الله ينتقم منك ... كوم عني ... ماريد اشوف وجهك

درت وجهي عنة .. بس هو دارني لجهتة من فكي حيل : مجبورة تشوفين وجهي ... وغير وجهي ما تشوفين
دفع وجهي بيدة وطلع من الغرفة
غطيت راسي باللحاف وكعدت ابجي ... ابجي على امي لو على رائد ...لو على حظي
غفيت ودموعي على خدي

كعدت الصبح واني احس ايدي كولش تأذيني ... كمت من فراشي بالكوة احس ميتة من التعب

غسلت وبدلت وطلعت
رحت لغرفتة مثل يومية حتى انضفهة وارتبهة
فتحت الباب ... استغربت من شفت الغرفة مرتبة ونضيفة ... حتى الفراش مرتب ... يعني هو كل يوم يخرب الغرفة حتى اجي اعزلهة واليوم مرتبهة ... استغربت الصراحة
طلعت من الغرفة ونزلت جوة بعدني عالدرج ودخلت خاتون من الباب
اجت علية بسرعة : ميامي ... بيج شي شسوالج غزوان
جنت مغطية الحرك بالردان مالت الدشداشة لان ردانهة طويل
خاتون متدري وحطت ايدها على ايدي اني صرخت : اااااه .. خاتون ايدج
خاتون خطية كمزت : شنو شبيج ... شبيها ايدج
رفعت الردان وشافت الشاش على طول ساعد ايدي
شهكت : هاي شنو شمسوي بيج ...
سحبت ايدي منها : هيج ماكو شي
خاتون بعصبية : شلون ماكو شي واني بس لمستها انتي صرختي ... احجي شنو هذا
ميامين : حرك بالشمعة
خاتون بصدمة : حررررررك ... وصلت بي يحركج ...
ميامين : عفية خاتون عوفي الموضوع والله ما ناقصة مشاكل
خاتون : انتضري هنا راح اجيبلج علاج مال حرك من بيتنة
ميامين : ماشي
راحت خاتون واني فكيت الشاش من ايدي ... انصدمت منضرهة يخوف ...

كمت ابجي .. يعني ايدي تشوهت ... اصلا شنو الي بية ما تشوه ... حتى كلبي تشوه يعني بربكم اكو وحدة تحب واحد هيج معذبهة بالله هذا مو كلب مشوه ...

دخلت خاتون وشافتني ابجي اجت تركض : شبيج ميامين
شافت الحرك وشهكت : يمة شنو هاي ... شمسوي بيج
ميامين : انطيني العلاج فدوة خلي الفهة
جابت العصارة وصارت تدهن على ايدي
ابتسمت على شكلهة وهي تقرة ايات وتنفخ على ايدي
ميامين : خاتون شدا تسوين
خاتون : انشر عليج مثل متسويلنة الحجية خاتون

خلصت ولفتة الي بشاش
كمت للمطبخ ... عزززة بعدة على هوستة
الكزاز بالكاع ... والشمعة
خاتون : اكعدي عالكرسي ... اني المة
ميامين : لا عوفي اني هسة اشيلهن ...
خاتون : دكعدي لا ابتلي بيج

كعدت عالكرسي وبدت خاتون تلم بالكزاز

خلصت وبقت شوية يمي وبعدين راحت
رحت تمددت عالقنفة ونمت
مادري ليش كل ما اتمدد على هاي القنفة اغفى منتبهين لهالشي

كعدني صوتة : ميامين ....

الكاتبة : سارة الشمري🖤