رواية سجينة الظلم والانتقام الفصل الرابع 4 - بقلم طبيبة الاحساس

سجينة_ الظلم_والانتقام 🍂🥀

sara_zead

البارت5

الكاتبة : سارة الشمري🖤

صفق بحرارة لمن علمك القسوة ،ثم اصفعه ليعلم أنك تعلمت..

: غزوان ايكول انتضر برة وهو ايكول ما ادخل لبيت العالم الكتلو اخوي

انصدمت (اذا هاي اولها لعد معروف تاليها شلون) يعني غزوان ايكون اخو فارس
يعني اني تزوجت اخو فارس
يربي شهالمصيبة ما توقعت اخوه الي راح ياخذني فصلية
كلت يمكن احقر واحد عدهم راح يزوجوني الة حتى ينتقمون من اخوي بس همة اخذوني لاخو فارس يعني ينتقمون من اخوي ومني هم
طلعت للشارع وحسان وياي طلع جنطتي واخذها واحد من الي جايين وياه وحطها بسيارة
تذكرت : حسان امي ما ودعتهة واخواتي ما ودعتهم
ردت ارجع ولزمني حسان : ميامين الكل دا يباوع عليج ... فدوة روحي ولا تعذبين كلبي اكثر

صعدت بالسيارة وبجيت : مخلوني اودع امي
سمعت صوت هوسة برة السيارة التفتت واني بالكوة اكدر المح اشخاص لان دموعي مغوشة عيوني والسيارة مضللة الي عرفتة ان هذا صوت زياد لان يحجي بصياح : والله متاخذونهة ... ميامين الي
اجة واحد وكف كبال زياد : وخر من وجهي لا اطلع حركة كلبي بيك
دار وجهة يريد يروح لزمة زياد من كتفة بشر وهو برد فعل سريعة ضربة بوكس على خشمة من قوتة طاح بالكاع والتفت على حسان الي اجة يركض على زياد : شيلو مزعطتكم من وجهي وربكم كوة متحمل شوفتكم
اني ما شفت وجهة لان جان منطيني ضهرة
زياد ضعيف مقارنة بي هو عضلات وطويل ولابس لبس عربي دشداشة سودة وغترة سودة لافهة على راسة ولابس الحزام مالت السلاح دخل لنفس السيارة الي اني بيها وكعد بالصدر اني جنت بالكرسي الوراه يعني ماكدر اشوف بس كتفة سد الباب حيل
حاولت اكتم نفسي حتى لا تطلع شهكاتي من ابجي

اندكت جامة السيارة من جهتة هو نزل الجامة وحجة يممة صوتة يخوف خشن نبرة صوتة مال واحد طافرة روحة من العصبية : هااا شكو بعد

الي واكف : غزوان ......ترة الشيخ راح يروح واحنة ما انطيناه فلوسة
يمممممة عززززة هو هذا غزوان يررربي ساعدني اني بيدمن طحت هذا من هسة ضرب وعصبي

طلع فلوس وانطاهيا : حمزة فضها ترة اخرتونة خل نمشي ... كدامنة طريق طويل هم يلة نوصل للبصرة المغرب ... ابوي بالمستشفى اريد اروحلة

حمزة : تأمر هسة نطلع ... وراح

اني ما كدرت اسيطر على دموعي وشهكاتي صارت تطلع بدون ما احس
ضرب بيدة على السيارة حيل وصرخ : كاااافي .. ماريد اسمع حسج
روحي طفرت من مكانها من الخوف مدري ابجي بالزايد مدري اسكت حطيت ايدي على حلكي وضغطت
حيل حتى اكتم صوتي بس دموعي تصب غطيت نص وجهي بالعباية وسميت بالله من السيارة تحركت 
التفتت على بيتنا اودعة بعيوني ومادري اذا راح ارجع لو لا
ابتعدنا عن بيتنا حطيت راسي عالجامة والسيارة هدوء
واحد يسوق نفسة حمزة الي جان يحجي وياه
وغزوان كاعد بالصدر
كعدت ادعي بكلبي : يارب ان شاء الله مايكون هيج .. بس هالفترة لان كلبة بعدة محترك على اخوه ... يارب اوكف وياي مالي غيرك
غمضت عيوني ما حسيت على نفسي شوكت نمت

فتحت عيوني على صوت باب السيارة ينفتح بس مو من جهتي التفتت شفت الي يسوق نزل وغزوان هم نزل صعد بمكان الي يسوق بس الولد ما رجع صعد .. راح
التفتت اباوع من الجامة بسم الله شنو هالمكان
بيت لو اكول علي قصر
لحضة بس لا هذا بيتهم لعد اني من التعب الطريق كولة نمتة
السيارة واكفة اباب البيت صعد غزوان وفتحلة حمزة الباب وراح دخل السيارة لداخل البيت حوش وبصفة حديقة تخبل طفة السيارة ونزل
التفتت ماكو ولا واحد : زين واني وين اروح ابقى بالسيارة
باوعت علي واكف بعيد ويخابر طلعت بنية شابة من الباب الداخلي للبيت لابسة اسود وكفت حجت وياه ومبينة معصبة وهو نزل تليفونة وحجة كلمتين وعبالك ما مهتم الها .... اجت البنية لجهة السيارة وفتحت الباب من جهتي
خفت وايدية كامت ترجف
حجت بهدوء : انزلي وياي لا تبقين بالسيارة اكيد صارلج هواي على كعدتج
انتبهت عليها لابسة اسود بأسود وعيونها حمر مبينة من البجي ليش .... غبية ميامين اكيد تبجي شنو نسيتي ان عندهم فاتحة وابنهم ميت

قاطعت تفكيري وهي تحجي بهدوء وبي من الحنية شوي مدت ايدها الي : لا تخافين ما راح ائذيج .. تفضلي وياي قابل تبقين بالسيارة
حجيت بخوف واني اباوع لغزوان الي مستمر يخابر ومنطينة ضهرة : بسس هوو
قاطعتني : لا تخافين هو طلب مني انزلج لان يريد يروح لبابا بالمستشفى .... يلة انزلي قبل لا يعصب

نزلت من السيارة باوعت عليها مبينة حبابة رغم تعب وجها الي مبينة بس حلوة وهادئة

اففففف ميامين انتي بيا حال وتتصفنين بوجها وين عرفتيها حبابة
سديت الباب وراي هي راحت فتحت باب الخانة الورا ونزلت جنطتي اني رحت بسرعة اخذتها منها
:اني اشيلها
ابتسمت بخفة : عادي نفس الشي
يلة امشي وياي
مشت هي واني مشيت وراها مرت من يمة وهو منطينة ضهرة ويحجي بالتليفون لهسة ما شفت وجهة ... ميامين شتسوين بوجهة اكعدي راحة

مشيت وراها اخذتني ودخلتني بس مو لنفس هذا البيت الي همة بي والي طلعت منة البنية
اكو باب مفتوح على طارمة بيتهم على بيت ثاني دخلتني منة وشفت الحديقة تجنن مشيت وراها فتحت الباب اول ما دخلنا صالة شنو من ناس ذولة مبينين زناكيل ... جان رائد يحجيلي ان فارس غني وعندة فلوس بس ما توقعت لهالدرجة كلة من الاثاث الراقي
التفتت علية : راح تبقين هنا ... اعتبري البيت بيتج
باوعت عليها بأستغراب : بيتي ؟؟
ابتسمت : اي هذا بيت غزوان وبما انج صرتي زوجتة يعني هم بيتج .... تعالي خلي اخذج لغرفتج

زوجتة ؟؟ ليش مكالت فصلية واصلا ليش تعاملني هيج
بقيت واكفة بمكاني هي التفتت علية
كالت : اكيد اتكولين اني منو وليش اعاملج هيج
اتفاجأت : هاااا
اجت يمي : اني اخت غزوان يعني اخت فارس
انصدمت اختة وهيج تعاملني : اخت فارس وهيج تعامليني ... ليش
حطت ايدها على كتفي : وليش ما اعاملج هيج ... انتي مالج ذنب بشي ... اجيتي بسبب ذنب مو ذنبج ... صدكيني اني ضد شي اسمة ان ياخذوج فصلية ويحرمونج من امج واهلج بسس ذنب انتي ما اقترفتيه ... بش شنسوي غزوان ماكدرت اوكفة

طاحت دموعي تفاجأة من حضنتني وتمسح على ضهري : اهددي لا تبجين .. اعتبريني اختج ماشي

هزيت راسي ب اي
كالت : مكلتيلي شنو اسمج
جاوبتها : اسمي ميامين
ابتسمت : اسمج حلو مثلج طبعا .. اني اسمي خاتون
جاوبتهة بأستغراب : خاتون
خاتون ضحكت : اي خاتون اكيد اتكولين اسم عجايز بس شسوي سموني على اسم بيبي واني هم احبة هالاسم لان غريب ومحد يسمي هسة
ابتسمت على روحها الحلوة
سحبت جنطتي وهي تمشي : يلة تعالي اخذج لغرفتج 
مشيت وراها واني اتلفت بكل انحاء البيت
فارغ محد بي بس جبير
حجيت بدون وعي واني اتلفت : انتي متأكدة هذا لبيت عايش بي شخص واحد
خاتون ابتسمت : اي والله ... هو غزوان سواه من تعبة وفلوسة وما قبل ابوية يبني الة .. ترة غزوان مرتب كولش ومو فوضوي لهالسبب لا تخافين مراح تتعبين بشغلة .. واذا احتاجيتي شي اطلبي مني

ابتسمت الها : خاتون اني ما اعرف شلون اشكرج ... والله مجنت متوقعة ان حتستقبليني هيج
خاتون : لا تحجين هيج .. اعتبريني صديقتج اوك
ميامين : اوك

دخلتني لغرفة حجمها وسط ومبينة ما مستعملة
خاتون : تفضلي هاي غرفتج
ابتسمت : شكرا 

خاتون : اني حروح اتطمن على امي ... اذا كدرت امرلج بعد شوي
ابتسمت : اوك ... اخذي راحتج
طلعت هي واني شلت عباتي وفكيت حجابي : اوووف اختنكت حطيت شالي على ركبتي

فتحت جنطتي شفت كنتور وسط موجود رحت فتحتة مابي ملابس بس بي كم تعلاكة
طلعت الكم فستان بسيطات ينلبسن بالبيت وعلكتهن ورتبت الدشاديش والشالات على جهة
وكم تراك وكم دشداشة قصيرة هم علة جهة
ما اخذن هواي من الكنتور لان قليلات ومبينة هاي مو غرفتة لان مابيها اي غراض رجالية
الحمدالله هيج احسن كل واحد بغرفة

خلصت تعزيل غراضي وكم شغلة جبتهن للحمام الي ما اكدر ما استخدمهن ... اخذ مني التعزيل ساعة تقريبا وكعدت شوية وحدي وصافنة مادري شكد مر من الوقت

مليت من الغرفة فتحت الباب كلت خلي انزل بما ان البيت فارغ

نزلت من الدرج واني اباوع عالبيت
شفت باب مفتوح دخلت هذا المطبخ ما شاء الله والله ذويق بصراحة المطبخ يجنن كولشي من الحديث
فتحت الثلاجة واني منطية الباب ضهري وماانتبهت للعيون الي تراقبني

شفت الثلاجة متروسة اكل وخضروات واني ميتة من الجوع واليوم كلة مماكلة شي وهسة الدنيا ليل هستوها غربت الشمس
شفت ماعون بي زيتون اخذت وحدة حطيتهة بحلكي والثانية اخذتها بيدي سديت الثلاجة
اكلتها وطلعت النوة من حلكي بعدني ما حاطة الثانية بحلكي حسيت بحركة وراي من الخوف ما التفتت بس الزيتونة طاحت من ايدي

الكاتبة : سارة الشمري🖤