رواية سجينة الظلم والانتقام الفصل الرابع وثلاثون 34 - بقلم طبيبة الاحساس

#سجينة_الظلم_والانتقام 🍂🥀

#البارت الاربعون

#الكاتبة : سارة الشمري 🖤

إذا أحبك مليون شخص فأنا منهم، وإذا أحبك شخص واحد فهو أنا، وإذا لم يحبك أحد فاعلم اني مت.

بمكان اول مرة نروحلة

كاعدة على جربايتهة وحاطة الهتفونات بإذنهة ...
تغني وية الاغنية بهدوء ...

قاطعتهة صوت رسالة وصلت لتليفونهة ...

قرتهة وطفرت من مكانهة بسرعة  ...

الرسالة من زينة ...

(هلو نورة .. وينج ليش ما تجاوبين .. عندي الج خبر بمية .. غزوان رجع الفصلية لاهلهة والاكيد ان بعد ما ترجع لان طلع اخوهة بريئ ... يعني هسة الساحة فارغة الج وتكدرين تاخذين غزوان ... )

نورة كامت تكمز وتصيح ... واخيييراً راح تصير الي غزوان ...
طلعت من الغرفة مالتهة وتوجهت للمطبخ لامهة ...
نورة بفرحة : ماما احزري شنو صار ..
ام نورة : احجي من الاخير شصار...
نورة : غزوان رجع الفصلية لاهلهة واكيد راح يطلكهة ..
ام نورة : صدددك .. يعني هاي فرصتج نورة ديري بالج تضيعينة هالمرة من ايدج ...

نورة بخبث : هه اني ضيعتة مرة بس هالمرة مستحيل ...
ام نورة : كومي خل نروح لبيت خالج هسة .. حتى بلكي تشوفينة ...
نورة بحماس : ماشي .. راح اجهز نفسي واجي ...

٪؜٪؜٪؜٪؜٪؜

بيت ابو غزوان

دخلت مها لغرفة خاتون وكالت بملل : كومي هنا عمتج ام نورة ..
خاتون بتأفف : اففف ترة ابد مو وكتهة ... شعدهة جاية اليوم ...

مها بسخرية : اكيد عرفن بغزوان ودة ميامين لاهلهة واجن يتأكدن ويفتحن مجال لنفسهن ...
خاتون : ترة والله بطرانات هذني ... الي تدور غزوان هسة معناتهة تدور على ابرة بكومة قش ...
مها بتأفف : هسة معلية اني .. كومي انتي انزليلهن مالي خلك ...

خاتون وهي تكوم : امري ل الله ..
نزلت خاتون للصالة وشافت عمتهة وبتهة كاعدات يم الحجية ...
نورة كامتلهة وسلمت عليهة بحرارة : هلو خاتونة حياتي شلونج ..

خاتون بالكوة ابتسمت : الحمدالله بخير ...
راحت سلمت على عمتهة وكعدت على صفحة ..
نورة اجت كعدت بصفهة .. خاتون تأففت بكلبهة ..
نورة بهمس لخاتون : اكولج صدك هاي الخبيثة ميامين رجعت لاهلهة

خاتون بعصبية : نوورة .. لا تجيبين سيرة ميامين بالموزين .. اذا حجيتي عليهة تلكيني بوجهج ..
نورة بسرعة : اسفة حبي مجان قصدي .. بس هيج ردت اسأل ..

ام نورة وهي تحجي وية ام غزوان : ها خية ما فكرتو تدورون مرة لغزوان .. ترة فارس طلع السنة ... وغزوان مو زغير حتى يبقى بدون زواج ... ليش متدورولة من الاقارب ..
ام غزوان : والله خية مناي هذا اشوف ابني عريس وافرح بعرسة .. بس شنسوي غير هو ما يقبل ..
الحجية بحزم : وعليش تدوريلة على مرة .. مريتة موجودة واكيد راح ترجع لرجلهة ...

ام نورة : وانتو بعدكم تردونهة هاي ... دعوفوهة تولي وجيبولة من بنياتنة غير كل وحدة احلا من الثانية ...
خاتون رفعت حاجبهة بإستنكار من شافت نورة دنكت راسهة بخجل ...

الحجية : جا هي بكيفنة شني.. الولد ميت عليهة ويريدهة ومايريد غيرهة ...
خاتون رادت تحجي وتكول بس هي ما تريدة .. بس ماتريد تنطي فرصة لنورة وامهة يتشمتن ...

خاتون وهي توكف : عن اذنكم .. راح اسويلكم عصير ...
نورة وهي توكف وياهة : خل اجي وياج ...
دخلت خاتون للمطبخ وبدت تسوي العصير بهدوء ..
نورة : اممم خاتون .. غزوان ميحب ميامين مو ..
خاتون رفعت راسهة الهة وكالت : وليش ما يحبهة .. ترة ميامين كولش حبابة وتخبل والكل يحبهة .. وخاصا غزوان يموت عليهة ..

نورة بقهر وعصبية : لا ميحبهة .. مستحيل يحبهة ..
خاتون باوعت عليهة ورفعت حاجبهة ...
نورة انتبهت لنفسهة وكالت بهدوء : يعني قصدي اذا هو يحبهة ليش رجعهة لاهلهة ...
خاتون ببرود : ضروف ..
نورة : وشنو هاي الضروف ...

خاتون باوعت عليهة بعصبية .. قاطعهة دكة تليفونهة ...
شالتة وشافت الرقم غريب ...
فتحت خط بدون متحجي شي واجاهة الصوت : الوو خاتونة .. اني ميامين ..
خاتون بسرعة وبفرح : مييااامين ...
نورة فتحت عيونهة بعصبية وعافتهة ودخلت للصالة ...

^^^^^^^^^
بيت غزوان /

كعد من النوم وعيونة تحركة من البجي ...
فرك عيونة وكعد على حيلة ...
التفت حوالينة بالمكان .. سحب البدي الي جان بحضنة واخذ نفس منة وغمض عيونة

: صباحج خير يا زهرة كلبي ... اشتاقيتلج .. صار يوم وهيج ميت على شوفتج ... شلون بية اذا ما رجعتيلي .. والله اموت اذا ما رجعتلي ... لازم اسوي شي حتى اخليهة ترجعلي ...
كمت من مكاني وطلعت من الغرفة وسديت الباب
رحت لغرفتي سبحت وبدلت ونزلت ...
اريد اروح للكوت حتى احجي وياهة ... لازم تسمعني هالمرة ...

نزلت وطلعت برة ودخلت للحوش مال بيتنة ...
شفت خاتون تحجي بالتليفون ومنطيتني ضهرهة ...
خاتون : ميامين والله وحشة عليج .. بس يلة المهم ترتاحين ...

كلبي حسيتة راح يطلع من مكانة ... هاي حبيبتي ميامين ...
ركضت بسرعة من وراهة وسحبت التليفون منهة ...
خاتون ... كمزت من شفت التليفون انسحب مني ... شفتة غزوان ... شهكت وحاولت اخذ التليفون منة بس ما كدرت ...
ميامين ... جنت احجي وية خاتون وفجأة اجاني صوتة كلة لهفة ..: ميامين حبيبي .. فدوة سمعيني صوتج والله مشتاقلج ...

حسيت ايدي وكفت واني اسمع صوتة ... ماكدر انزل التليفون واسدة ... دموعي نزلت واني اسمعة يحجي ...
غزوان : ميامين اني هسة راح اجي للكوت الله يخليج خليني اشوفج ... بس اسمعيني ...
ميامين بسرعة : ديير بالك تجي غزوان ... والله العضيم اذا اجيت مستحيل اخليك تشوفني ... اني ماريد اشوفك ... اطلع من حياتي خلص افهم ..

غزوان نزلت دموعة : ماكدر ميامين ... من البارحة واليوم كوة اكدر اتنفس بدونج .. وين ما اباوع اشوفج كبالي .. احس كلبي يريد يوكف وانتي مو يمي ... ميامين الله يخليج ارجعيلي ... والله احلفلج راح اخليج اسعد انسانة بالدنيا وانسيج كلشي ...

ميامين بسخرية : انت ما كدرت تنسى اخوك صح ... ما كدرت تنسى انتقامك الة ... واني هسة ماكدر انسى انت شسويت بية ...
غزوان بترجي : ميامين ورب الكعبة احبج .. بس اطيني فرصة ثانية ... الو .. الو

خاتون وهي تسحب التليفون منة بعصبية : خلصت .. شلون تسحب التليفون مني هيج ... بلة طلعت ميامين وحدة من صديقاتي ومو نفسهة هي ... غزوان لا تكرر هذا التصرف مرة ثانية .. ترة ما اريد علاقتي تخرب بميامين من وراك ...
غزوان : اطيني رقمهة بسرعة ..

خاتون : مستحيييل ... ميامين وثقت بية ومستحيل اخون هالثقة ...
عافتة ودخلت وهو صاح بقهر ودخل لبيتة ... حتى مالة خلك يروح للمستشفى ...
نزع حذاءة وشمرة بالكاع وتمدد عالقنفة وهو يفرك براسة بعصبية ...

طلع محفضتة من جيبة وسحب منهة الصورة والجفية ...
قرب الجفية من خشمة واخذ نفس قوي وهو يحجي وية الصورة وعبالك كبالة .. حرام عليج .. ليش تصيرين ضالمة اكثر مني ... ليش تحرميني منج ... ليش تعاقبيني بأهم شي بحياتي ...

#####

بيت ابو احمد (حافظ)

كاعدة بسمة عالقنفة بالصالة وتشرب عصير ابو القصبة وتباوع عالتلفزيون .. امهة واخواتهة واخوهة موجودين كلهم ...

سحبت نفس بملل والعصير بحلكهة ..
دك تليفونة والمتصل (خفقان)
رفعت التليفون : الووو
خاتون : بسوووم فدوة لو تجين تلحكيلي لو اني اجيج ...
بسمة وهي تكعد بسرعة : شبيج شكو ..
خاتون : نورة يمنة .. ولزكت من بعد ما عرفت بميامين مشت ..

بسمة بصدمة : وين مشت ميامين ...
خاتون : اووف مو وكت هسة احجي عالتليفون .. تجينة لو اجيكم ..
بسمة : انتي تعاي بسررعة مو تطولين ...
خاتون : ماشي جاية ما اطول .. مسافة طريق ..
سدت التليفون من خاتون ...

جوري بإستغراب : شبيج بسمة ... وين مشت ميامين ...
بسمة وهي تهز اكتافهة : مادري .. هسة تجي ونعرف ...
حطت العصير بحلكهة وتسحب منة ..
دك تليفونهة مرة ثانية ..
شالتة بسرعة بدون ما تقرة الاسم : خاتون شبسرعة لحكتي تشتاقيلي ترة هستوني سديت الخط منج ..
: احبج واشتاقيتلج شسوي ..

بسمة غصت بالعصير وشمرتة بالكاع وكامت تكح بسرعة ... وحاطة التليفون على صدرهة خاف احد يشوف المتصل ...
احمد كام عليهة بخوف لان وجهة صار احمر : بسسوم شبيج .. تنفسي تنفسي ...
انطاهة كلاص مي .. هي اخذتة وشربتة كلة مرة وحدة ... بلعت ريكهة واشرتلة بإصبعهة بمعنى اوكي كلشي تمام ...
كامت بسرعة لغرفتهة وقفلت الباب ..

حطت التليفون على اذنهة : انت مخبل ..
حسنين بخوف : بسمة بيج شي .. انتي بخير .. شجاج ...
بسمة بعصبية : لا والله ماكو شي بس مجرد طلعتلي فجأة بصوتك وتكليي احــ.... سكتت وما كدرت تكولهة ...
حسنين بإبتسامة : احــبج .. قصدج هاي ... اي احبج واشتاقيتلج ...

بسمة كعدت عالجرباية وتهفي على نفسهة وحطت ايدهة على كلبهة وكالت : اففف ليش متصل هسة شتريد ..
حسنين : اريد اعرف ردج عالموضوع ..
بسمة بلعت ريكهة : بعدني ما انطيت جواب لان بابا كال اخذي اسبوع يلة ترجعيلي جواب...
حسنين : ولشنو توصلتي بتفكيرج ..

بسمة وهي ما تدري شنو ترد : بعدني ما توصلت لشي ... يعني ما عندي سبب يخليني اوافق ..
حسنين : وما عندج سبب يخليج ترفضين .. بس ان اني احبج هذا سبب مو كافي بالنسبة الج حتى يخليج توافقين مو ... بسمة الله يخليج مو كافي عاد .. صارلي ٥ سنوات افتر وراج واريدج بس تنطيني نضرة وانتي رافضة ... وكل ما اسألج شنو السبب ما تنطين جواب .. بسمة كليلي اذا اكو احد تحبينة خليني ابتعد بهدوء ...

بسمة بعصبية : شكلولك علية يومية احب واحد ..هو اني شايفة وجوه حتى احب .. شو ما شايفة غير وجهك ..
حسنين : وليش ما حبيتي وجهي .. شنو الما عجبج بي ...
بسمة بدون تفكير : مابي شي ما عجبني ...
حسنين بضحكة : اوووو .. اول مرة تطلع منج ..
بسمة ضربت حلكهة حيل وتتلاطم لان دومهة ما تلزم لسانهة ...

بسمة : اني اروح .. باي
حسنين : لحضة بسمتي .. الله يخليج فكري بالموضوع زين ... انتي تدرين بية احبج واريدج حلالي ويمي ... كافي خليتيني انتضر هواي .. صرت شايب ترة واني انتضرج عمري صار 32 يعني 8 سنوات وادخل الاربعين .. لا تخليني انتضر اكثر بسمتي حبيبي ..

بسمة .. سديت التليفون منة بدون ما اكلة باي ...
حاطة ايدي على كلبي واتنفس بسرعة ...
يمة كالي بسمتي حبيبي ... اهوي على نفسي بسرعة بتوتر ...
اندك الباب : منووو
خاتون : افتحي الباب ليش قافلتة .. اني خاتون ..

٪؜٪؜٪؜٪؜٪؜٪؜

بيت ابو رائد /

كاعدة عالمرجوحة بالحديقة وكلامة يتردد بإذنهة ..
ميامين ... يربي دخيلك لا تخلي يقرب مني .. ابعدة عن طريقي يارب ... والله تعذبت هواي وبعد ماكدر اسامحة على الي سواه ... مستحيل انسى اي شي ...
اني هسة البس مستور بالبيت لان اخاف الآثار  تبين بجسمي .. الحرگ والضرب مال اعكال الي لهسة مطبوع بضهري وجسمي ...

يمكن الي جنت اعيشة هناك وجنت اسمي حب هذا ما جان الا مراهقة لو استعطاف لحالة غزوان لان جان فاقد اخوه ... بس هسة حبة انشال من كلبي وحط الكره بمكانة ... مستحيل احبة بعد ما سوة هيج بية ... هو محى حبة من كلبي بالساعة الي اعترفتلة بحبي وهو قابلني بالرفض والضرب والاهانة ...

رفعت راسي لفوك وغمضت عيوني وتنهدت من كلبي ...
حسيت بإيدين حاوطت خصري ...
فتحت عيوني بسرعة ...
وفجأة صرخت : غززززووووااان ...

الكاتبة : سارة الشمري 🖤

مرحبا حبايبي شلونكم ❤️ اريد توقعاتكم للبارت الجاي .. واتمنى عجبكم البارت .. واذا شفتو شي مو حلو بطريقة الكتابة اتمنى تكولولي لان هالشي مهم بالنسبة الي 😘

#البارت الواحد والاربعون

#الكاتبة : سارة الشمري 🖤

الحب عذاب في قلوب الشباب، الحب نبات في قلوب البنات، الحب أسطورة في القلوب المكسورة، الحب شر لا بد منه.

حسيت بإيدين حاوطت خصري ...
فتحت عيوني بسرعة ...
وفجأة صرخت : غززززووووااان ...
وخرت ايدي من خصري والتفتت علي شفتة ميت من الضحك ..
تقربت منة وضربتة على كتفة حيل : خاااالد .. شكم مرة كتلك لا تخوفني هيج ...

خالد بألم وهو يفرك كتفة مكان الضربة : ااي .. على كيفج شنو هاي ايد لو ساطور ...
ميامين دارت وجهة عنة ورجعت كعدت عالمرجوحة ..
خالد وكف وراهة وكال بخبث : شوف الشوك شيسوي .. من حسيتي بأحد لمسج ما ذكرتي غير غزوان ..
ميامين بتوتر : هيج طلعت مني لا اراديا ...
خالد وهو يضربهة بخفة : علييينة .. شحال لو ما جنتي اذا كمزتج تكولين اسم رائد ... لو هسة تبدلت الموازين وغزوان اخذ مكان رائد ...

ميامين كامت بسرعة وكالت : مستتححيييل .. رائد مستحيل احد يكدر ياخذ مكانة...
خالد : اي تمام اسف شبيج عصبتي ...
ميامين كامت عنة ودخلت لغرفتهة وسدت الباب بعصبية ...
كعدت عالجرباية بعصبية .. ليش كلت اسمة ...
للحضة تخيلتة ممكن يكون هوة ... خفت يرجع مرة ثانية لحياتي .. خفت يكون نفذ كلامة واجاني لهنا ..
ماريدة .. ماريد اعيش وياه مرة ثانية ... ما اتحمل اشوفة كل يوم ...
قاطع تفكيري صوت تليفوني ...

>>>>>>>>>>

بيت ابو احمد (حافظ)

كاعدة خاتون وبسمة وياكلن حب عين الشمس وكل وحدة تسولف همهة للثانية ...
بسمة وهي تمسح دمعتهة : اكره اخوج ... يعني ميامين شذنبهة .. خلي هسة اجة دورة يتعذب مثل ما عذبهة ...
خاتون : اي واني هم اكول هيج ... وماريد ميامين ترجعلة لان اريدة شوية يحس بالعذاب الي شوفة الهة ...
بسمة بتنهد : شنسوي يختي .. الي كاتبة الله يصير ..
خاتون : هسة المهم كليلي شراح تردين لابوج من جواب ..
بسمة بتفكير : حايرة والله ..
خاتون : وليش حايرة ...

بسمة سكتت وما ردت ... ما تعرف شنو ترد ..
خاتون سحبت تليفونهة واتصلت على ميامين ..
ميامين : الو خاتونة ..
خاتون بإبتسامة : هلو امون .. اسفة عالشي الصار مساع .. بس والله ما انتبهت علي ان سمعني ..
ميامين : لا تهتمين حبي انتي مالج ذنب بشي ..
خاتون وتريد تغير الموضوع : المههم ... اكو ناس يمي يردون يسلمون عليج ...
ميامين بإستغراب : منو ..
بسمة : اموووون .. اني بسمة .. مشتاقتلج  ..
ميامين بفرح : بسووومة .. اني الاكثر .. شلونج
بسمة : الحمدالله تمام .. ميامين محتاجة مساعدتج بشي .. يعني اريد تنطيني حل ...

ميامين : عيوني الج ... تفضلي ...
بسمة حجتلهة كلشي صار ...
ميامين : هسة افهم من كلامج انتي حايرة خاف توافقين وبعدين تتندمين ..
بسمة : بالضبط ...
ميامين : تمام لعد .. اشرطي على حسنين شرط ...
بسمة : وشنو هالشرط ...
ميامين : اتصلي بي وكوليلة ان تردين فترة الخطوبة تطول حتى تتعرفون على بعض اكثر ... واذا ما تفاهمتو تطلبين منة تنفصلون .. تمام ..
بسمة بتفكير : بس تعتقدين يوافق ..
خاتون : اكيد اذا يريدج راح يوافق لان هذا شرطج ..
بسمة : تمام .. اسوي مثل ما كلتي واشوف تاليهة ...

\\\\\\\\\\\\

بعد مرور ٣ شهور  ....
غزوان حالتة تغيرت .. صار محد يشوفة ابداً ..
يلهي نفسة بالشغل حتى لا يفكر بيهة .. ومن يرجع للبيت ينام بغرفتهة وعلى مخدتهة ويباوع على صورهة ويكعد يبجي ... ما يكدر ينساهة وما يكدر ينام وهي بعيدة عنة ... الشوق اخذ كل حيلة منة .. وخاصا ان خاتون قافلة على موضوع ان تنطي رقمهة ... العذاب الي يعيشة بعمرة ما عاشة ... حتى صار ما يدخل لبيت اهلة ... وضعف وصار مهمل نفسة ...

ميامين ... حياتهة تقريباً رجعت لطبيعتهة مثل قبل ... رادت ترجع للمدرسة بس من سمعت ان ميصير ترجع الا بأذن زوجهة لهالسبب بطلت متريد ترجع لان ما تريد اي حوار بينهة وبين غزوان ولنفس السبب ما اتصلت بي حتى تطلب الطلاق منة ... بقت بالبيت وما تطلع بس عدهة هاي جنة مقابل الي جانت عايشتة ابيت غزوان ...

خاتون ... بقت على تواصل وية ميامين وتعرف كل اخبارهة وكل يوم تحجي وياهة ... كل ما تشوف حالة غزوان اتكول هذا قليل يم الي سواه بميامين ويستاهل اكثر ...
رائد .. باقي على حالة وحياتة رجعت بس مو مثل قبل ... رجع للمجمع مالتة بس كلش مفتقد لوجود فارس وياه ومرات يبجي علي وكل اسبوع لو اسبوعين يروحلة ويزور قبرة ويرجع ...
وحبة بقة بكلبة ومحد عرف بي لحد الان ...
حس ان ردت روحة برجعة ميامين لحياتهم ...

بسمة شرطت على حسنين ان تكوف فترة الخطوبة طويلة وهو وافق طبعا عندة المهم هي توافق علي ... وهو صار طول هال٣ اشهر مدللهة ويتغزل بيهة .. وهي تدلل علي تريد تشوف قدرة تحملة الهة ..

_________

بيت غزوان ..

رجع للبيت الساعة ١٠ .. مثل كل يوم يجي تعبان وحيلة مهدود ...
كعد بالصالة ورجع راسة لورى وغمض عيونة بتعب وخيالهة ما يفارك عقلة ولا ثانية ...
دخلت علي مها وشافتة كاعد هيج ... كلبهة ينمرد على اخوهة بس ما بيدهة شي تسوي الة ...
مها : غزوان ..؟
غزوان فتح عيونة وباوع عليهة وكال : ها مها شرايدة ...
مها بهدوء : بابا دزني عليك .. ايكول خلي يجيني ..
غزوان وهو يكوم : كليلة تعبان ويريد ينام ..
مها وكفتة : غزوان والله ايكول الموضوع مهم ولازم يجي ...
غزوان بتأفف : ماشي يلة روحي واني لاحكج ..
مها وهي تمشي : تمام بس مو تتأخر ..
هز راسة وهي طلعت ...

صعد لغرفتة سبح ومشط شعرة ولبس جاكيت لان الجو بارد وشتا ...
راح لبيت اهلة .. دخل للصالة وشاف الكل مجتمعين ... اللهم اجعلة خير ...
راح حب راس حبوبتة وابوه وامة ...
ام غزوان : هيجي يمة ما تمر علية .. لا تكول امي ضال كلبهة يمي .. خلفالله على مؤيد يومية يشوفك ويجيبلي اخبارك ..
غزوان : اعذريني يمة بس انشغلت ...
التفت لابوه وكال : ها بوية امرني .. مودي علية ..
ابو غزوان : اي مودي عليك ... وعندي قرار انتة لازم تنفذة ...
غزوان : امرني بوية اني حاضر ...

ابو غزوان : من باجر امك تروح تخطبلك ...
غزوان وكف : شلوون .. بوية شتحجي انت ..
ابو غزوان بحزم : شوف ولك .. انت كبرت واني كبرت واريد اشوف احفادي ... وتتزوج غصباً عليك ومو بكيفك ... اني اطيتك مجال هواي ...
غزوان : بوية اني ماريد اتزوج ... اني احب ميامين وماريد غيرهة ...
ابو غزوان : ميامين اذا رجعنة وخطبناهة اكيد اخوهة ما يطيهة الك .. يعني شيلهة من راسك ... وانت من راح تتزوج هسة اكيد تكوم تحبهة مثل ما حبيت ميامين ...
غزوان بعصبية : شني هي دومنة واحب وحدة ثانية ... اني احب ميامين وماريد غيرهة ...

ابو غزوان : صوووتك لا ترفعة واني موجود
غزوان : سوي الي تريدة واني زواج ما اتزوج ...
راد يطلع ووكفة صوت ابوه : غزوان اذا ما وافقت ما ارضى عليك والله ..
غزوان التفت على ابوه بترجي : بوية فدوة اروحلك لا تسوي هيج ..
ابو غزوان : انت لا تسوي هيج غزوان ... ولك العالم كامت تعير بية ... يكلولي ضام فلوسك على كلبك ما ترضى تزوج ولدك ... وشي ايكلولي صرت شكبرك وولدك شكبرهم وانت لهسة ما عندك احفاد .. خاف واحد منهم ايموت مثل فارس وما ضال منة ذكرى الك ...
ام غزوان بسرعة : سماااالله على وللدي يومي كبل يومهم انشالله ...

غزوان بترجي : يابة فدوة اروحلك معليك بحجي العالم خل يولون ...
ابو غزوان : غزوان انة العندي كلتة ... وانت بكيفك بعد .. اذا ما تريد رضاتي عليك لا تتزوج ...
غزوان بتعب : اسف بوية .. رضاك اهم من كلشي .. واني حاضر بالتريدة .. بس ياهي التريد تخطبلياهة ..
ابو غزوان : امك اختارتلك نورة بت عمتك ...
مها وخاتون : شنوووووووووو ...
مها : لا بابا فدوة اختار اي وحدة الا نورة ..
ام غزوان : شبيهة البنية شني لان حبابة ما تردنهة ..
خاتون : يمة الله وكيلج هاي تتلوكلج وتسوي روحهة فقيرة وهي من جوة لجوة ...
ابو غزوان : بس انتي وياهة ... مو عيب عليجن تحجن على بت عمجن ...

غزوان ... عفتهم يحجون وطلعت ... احس ضاكت بية الوسيعة ... مختنك ...
شلون راح تجي وحدة وتاخذ مكانج بهالبيت ...
ماكدر احب وحدة غيرج ... انتي احتليتي كلبي وروحي وعقلي ..ماكدر افكر بغيرج ...
شلون اباوع بوجهة وهي مو انتي ...
دخلت للصالة وصارت كدامة مزهرية جبيرة ...
ضربتهة برجلي بكل عصبية وتطشرت بالكاع ...
صرخت من كل كلبي ...
كاااافي عااد .. حسي بية والله راح اموت من دونج ... ادور ابوي يريد يجيب وحدة غيرج لحياتي ...
ماكدر اضلم وحدة ثانية بس شسوي ...

£££££££

ميامين ... كاعدة بالصالة واباوع عالتلفزيون وبالي ابد مو يمة ...
تأففت بملل .. التفتت شفت شهد دخلت وشايلة بيدهة طاسة ومتروسة شامية (بوشار)
ابتسمت واني اشوفهة تمشي على كيف خاف تطيح منهة الطاسة ...
كمت واخذتة منهة : هااي شنووو .. شهودتي شمسوية اليوم ...

شهد وهي تكعد : مو كلتي راح يبدي فلم لجوني ديب على ام بي سي تو واني كلت لمام تسويلنا شامية حتى ناكلهة واحنة نباوع ...
ضحكت عليهة وكتلهة : راح اصيح حسان يجي يشوف الفلم ويانة ... الفلم جان اسمة (finding neverland)
توجهت لغرفة حسان بس ما لكيتة ...
رحت لغرفة رائد وسمعت صوتهم بالغرفة ...
ردت افتح الباب بس شهكت وحطيت ايدي على حلكي من سمعت جملة رائد ..

الكاتبة : سارة الشمري🖤

اسفة حبايبي ادري البارت قصير بس والله ما لحكت اكتب شي .. هم اعذروني حبايبي😘